‘Ng’ii giri . . . nia ibitimo ni ng’a’

1. Wacikara nitimo ang’o pi nibedo kud anyong’a mandha, man pirang’o? (Isaya 48:17, 18)

WEGWA mi polo umaruwa lee mandha man ebemito wakwo kud anyong’a niai kawoni man i nindo m’ubino. (Ekl. 3:12, 13) Andha ecwiyowa ku bodho moko ma wang’u ijo, ento emiyo ngo iwa copo mi bimo wiwa giwa kadi mi ketho wan giwa cik iwi gin ma ber ku gin ma rac. (Ekl. 8:9; Yer. 10:23) Eng’eyo nia kara wakwo ku mutoro mandha, wacikara nitimo ire man nikwo nimakere ku cik pare.—Som Isaya 48:17, 18.

2. Sitani ubemito nia wapar ang’o, man Yehova utimo ang’o pi nituco wi vupo parene?

² Sitani ubemito wapar nia wacopo bedo jumutoro kadok nwang’u wabetimo ngo ni Yehova, man nia dhanu gicopo bimo wigi gigi ma ber mandha. (Tha. 3:4, 5) Pi nituco wi vupo maeno, Yehova uweko dhanu gikegibim wigi gigi pi kare moko. Matoke ma bimobim mi dhanu ukelo unyutho nia gimbe ku copo mi bimo wigi gigi. Ento Biblia upong’ ku lapor mi jumaco ku jumamon dupa ma ginwang’u anyong’a i kwo migi pilembe gitimo ni Yehova. Ng’atu m’ukwo kwo mir anyong’a nisagu zoo kud i kindgi utie Yesu Kristu. I thiwiwec maeni, wabicaku ku neno thelembe m’uketho eng’iyo nitimo ni Yehova. I ng’eye, wabineno thelembe m’uketho Wegwa mi polo uromo ya watim ire thier. Tokcenne, wabineno thelembe moko m’uketho wang’iyo nitimo ni Yehova.

THELEMBE M’UKETHO YESU UNG’IYO NITIMO NI YEHOVA

3. Sitani umito emii ang’o ni Yesu, man Yesu ke utimo ng’iyong’ic ma kani?

³ Kinde ma Yesu ubino iwi ng’om, saa ceke ebed enyutho nia eng’iyo nitimo ni Yehova. Ku lapor, nyanok i ng’ey batizo pare Sitani uyero nia ebimiyo ire ker ceke mi ng’om tek erwo ire wang’ acel kende. Ento Yesu udwoko ire kumae: “Cidh cen Sitani! Kum Lembagora uwacu kumae: ‘Yehova Mungu peri re m’icikiri nirwo ire, man en kende re m’icikiri nitimo ire tic ma leng.’” (Mat. 4:8-10) Pirang’o Yesu utimo ng’iyong’ic maeno? Wakenenu thelembene moko.

4-5. Yesu ung’iyo nitimo ni Yehova pi thelembe moko ma kani?

⁴ Thelembe ma kwong’a m’uketho Yesu ung’iyo nitimo ni Yehova utie mer; ebino ku mer ma thuc yor i bang’ Won. (Yoh. 14:31) M’umedo maeno, Yesu utimo ni Yehova pilembe ebino lembe ma kakare nitimo kumeno. (Yoh. 8:28, 29; Nyu. 4:11) Eng’eyo nia Yehova re m’umiyo iwa kwo, nia wacopo gene man nia en re m’emiyo iwa piny ceke ma beco. (Zab. 33:4; 36:9; Yak. 1:17) Yehova ubed uyero kwa lemandha ni Yesu man en re m’emiyo ire piny ceke m’ebino ko. (Yoh. 1:14) Sitani ke unyayu dubo man tho. Etie javupo, eketho cwinye hai i kum piny man edieng’ kwa pi bero pare gire. (Yoh. 8:44) Yesu ugam ung’eyo Yehova giku Sitani ceke cuu mandha. Emito ngo nyanok de nia elub lapor pa Sitani man ejai i kum Yehova.—Filip. 2:5-8.

⁵ Thelembe mange m’uketho Yesu ung’iyo nitimo ni Yehova utie nia eparu pir adwogi ma woro pare bikelo. (Ebr. 12:2) Egam eng’eyo nia tek egwoko bedoleng’ pare, ebidwoko nying’ Won leng’ man ebimiyo jamgony ma bigonyo dhanu kud i peko ceke ma Sitani unyayu.

THELEMBE M’UKETHO WEGWA MI POLO UROMO YA WATIM IRE THIER

6-7. Pirang’o tin dhanu ma dupa gitimo ngo ni Yehova, ento pirang’o Yehova uromo ya watim ire thier?

⁶ Tin dhanu ma dupa gitimo ngo ni Yehova pilembe fodi ging’eyo ngo kite pare ma beco man gin m’etimo igi. Dhanu ma jakwenda Paulo urweyo igi i Athene de gibino tap kumeno.—Tic. 17:19, 20, 30, 34.

⁷ Paulo ukoro ni dhanu mir Athene nia Mungu re ‘m’umiyo kwo man yuyo ku piny ceke ni dhanu zoo.’ Emedo kumae: “Wakwo man wawotho, wabedo nuti de ni kume.” Mungu re m’utie Jacwic ma ‘niai i kum ng’atu acel, utimo thek ceke mi dhanu.’ Pieno, eromo ya watim ire thier.—Tic. 17:25, 26, 28.

8. Ang’o ma Yehova bitimo ngo zoo de? Kekor.

⁸ Calu ma Yehova utie Jacwic man Ubimo mi polo ku ng’om zoo, nwang’u eromo diyo dhanu nia gitim ire. Ento Yehova bitimo ngo lembe maeno nyanok de. Kakare nitimo kumeno, emiyo iwa thelembe dupa m’ubenyutho nia andha enuti man nia emaru ng’atuman m’i kindwa lee mandha. Ebemito nia dhanu ma wendgi lee gidok jurimbe pi nja. (1 Tim. 2:3, 4) Pieno ebeponjowa kud ayi ma wacopo ponjo ko jumange de ging’ey lembakeca pare man lembe ma beco m’ebitimo ni dhanu. (Mat. 10:11-13; 28:19, 20) Emiyo iwa bende cokiri m’utie kaka ma wacopo timo iye thier ire, man emaku yub ma wek kara wabed wanwang’ kony mi judong cokiri ma jumer.—Tic. 20:28.

9. Mer pa Yehova ubenen nikum ang’o?

⁹ Mer ma lee ma Yehova umaru ko dhanu ubenen bende nikum lembe m’etimo ni ju m’ukwero nia enuti. Kepar pi lembe ma e: Niai con, dhanu bilioni dupa ging’iyo nikwo nimakere ku cik ma giketho gin gigi iwi gin ma ber ku gin ma rac. Re kadok kumeno de, Yehova umiyo igi ku berocwinye gin ceke ma gitie ku yenyne pi nikwo kud anyong’a. (Mat. 5:44, 45; Tic. 14:16, 17) Emiyo igi kaka mi bedo ku jurimo, ku wedi m’umarugi, kaka mi nyolo awiya, man mi nwang’u sukulia mi tic migi ma tek. (Zab. 127:3; Ekl. 2:24) Lembe maeno ceke ubenyutho kamaleng’ nia Wegwa mi polo umaru dhanu zoo. (Ai 34:6) Kawoni wakedwogu iwi thelembe moko m’uketho wang’iyo nitimo ni Yehova man iwi mugisa m’emiyo ni ju ma ging’iyo nitimo ire.

THELEMBE M’UKETHO WANG’IYO NITIMO NI YEHOVA

10. (a) Wabetimo ni Yehova pi thelembe ma kwong’a ma kani? (Matayo 22:37) (b) Idaru nwang’u bero ma kani nikum cirocir pa Yehova? (Zaburi 103:13, 14)

¹⁰ Calu Yesu, thelembe ma kwong’a m’uketho wabetimo ni Yehova utie nia wamare lee. (Som Matayo 22:37.) Ka wabeponjo lembe iwi kite pa Yehova, eno miyo iwa ava mi doko jurimbe. Wakewecu iwi cirocir m’enyutho iwa. Kadok nyithindho mir Israel gijai ire wang’ udul de, re ekwayugi kumae: “Wudwog kawono kubeng’wu kubeng’wu ng’atuman kud i yo pare ma rac.” (Yer. 18:11) Man kadok watimo kosa dupa de, Yehova weko iwa kum epoy nia wan utur. (Som Zaburi 103:13, 14.) Kan iparu pi kite ma Yehova ciri ko man pi kurayung pare mange m’enyutho iri, nyo eno cweli ngo nitimo ire pi nja?

11. Wang’iyo nitimo ni Wegwa mi polo pi thelembe mange ma kani?

¹¹ Thelembe mange ma cwaluwa nitimo ni Yehova utie nia etie lembe ma kakare nitimo kumeno. (Mat. 4:10) Bende, wang’eyo adwogi ma tic mwa bikelo: Ebidwoko nying’ Yehova leng’, ebituco nia Sitani tie javupo, man ebinyayu anyong’a i adunde Wegwa mi polo. Man tek wang’iyo nitimo ni Yehova niai kawoni, wabibedo ku genogen mi timo ire rondo ku rondo.—Yoh. 17:3.

12-13. Lembe ma Jane giku Pam gikadhu kud i iye ubemiyo iwa ponji ma kani?

¹² Wacopo ponjo nibedo ku mer ma thuc yor i bang’ Yehova niai ma wan aradu, man merne romo medere nidoko tek nisagu kinde ma wabeteng’ini. Wakewecu iwi lapor pa nyamego Jane giku nyamin ma Pam.a Saa ma gicaku ponjo Biblia wang’ ma kwong’a, Jane ubino ku oro 11, Pam ke ku oro 10. Kadok junyodo migi giyiyo ngo niponjo Biblia de, re giyiyo nia Jane giku Pam giponj Biblia ku Jumulembe pa Yehova tek gibimediri bende nicidho i dini mi jupagi. Jane uyero kumae: “Gin ma Jumulembe pa Yehova giponja ko niai kud i Biblia ukonya niuro nitiyo ku yath ma merojo man nitimo lemsasa mi tarwang’ calu aradu wada mange.”

¹³ I ng’ey oro moko, Jane giku Pam zoo gidoko jurwey. I ng’eye gicaku tic pa jayab yo. Saa ma junyodo migi utii, gimediri asu ku tije kinde ma gibegwokogi. Jane ukoro pi lembe ceke ma Yehova utimo ire kumae: “Anwang’u ponji ma nia Yehova gwoko jurimbe saa ceke, man nia calu ma 2 Timoteo 2:19 uyero, ‘Yehova ung’eyo jupare.’” M’umbe jiji, Yehova dieng’ pi ju ceke ma ging’iyo nimare man nitimo ire!

14. Wec man timo mwa kabu acidi m’iwi nying’ Yehova nenedi? (Nen bende cal.)

¹⁴ Wabemito wakab acidi ceke m’iwi nying’ Yehova. Kepar nia itie ku jarimbi moko m’utie dhanu ma yoo, ma won berocwiny man ma weko lembe. Ento nindo acel iwinjo ng’atu moko ubeyero nia jarimbine tie dhanu ma kwiny man ma javupo. Icopo timo ang’o? Icopo cero bang’e. Kumeno bende, kinde ma Sitani ku dhanu ma gin’i ng’ete pare gibemewo vupo iwi Yehova pi nicido nyinge, wan wayero lemandha i wiye man wacero ba nyinge ku kero mwa ceke. (Zab. 34:1; Isa. 43:10) I ayi maeno, wanyutho nia wang’iyo nimaru Yehova man nitimo ire nikadhu kud i wec man timo mwa.

15. Paulo unwang’u bero ma kani kinde m’ewilo lembakeca pare? (Jufilipi 3:7, 8)

¹⁵ Watie ayika niwilo lembakeca mi kwo mwa kara watim ni Yehova lee man i ayi m’efoyo. Ku lapor, jakwenda Paulo ung’iyo niweko rwom m’ebino ko i dini mi Juyahudi pi nidoko jalub pa Kristu man nitimo ni Yehova. (Gal. 1:14) E kumeno, enwang’ere ku lembe ma beco dupa i kwo pare man enwang’u rwom mi cibimo karacelo ku Kristu i polo. Ang’eyang’o uwok ungo i iye nyanok de pi yub m’emaku mi timo ni Yehova. Wan de ang’eyang’o biwok ungo nyanok de i iwa tek wang’iyo nitimo ni Yehova.—Som Jufilipi 3:7, 8.

16. Lapor pa Julia ubemiyo iwa ponji ma kani? (Nen bende cal.)

¹⁶ Tek waketho timo ni Yehova i kabedo ma kwong’a i kwo mwa, e ebimiyo iwa mugisa niai kawoni man i nindo m’ubino. Wakewecu iwi lapor pa nyamego moko ma nyinge Julia. I wang’ niponjo lemandha, ebino jarawer mi kanisa moko niai m’e nyanok. Ebino ku bodho mi wer; eno uketho jarawer moko ma lee umiyere pi niponje. Pire ugalu ngo ku yik man ecaku wer kaka m’ung’eyere lee. Kinde m’ebino i somo mi mizik i iniversite moko ma pire uyik lee, nyathin wadi moko mi somo unyutho ire pi Mungu man ukoro ire nia nying’ Mungu tie Yehova. Nyanok i ng’eye, Julia ucaku ponjo Biblia wang’ ario kubang’ yenga. Tokcenne, eng’iyo nitiyo ku kwo pare zoo pi nitimo ni Yehova kakare nimiyere i tic pa wer. Ebino yot ungo ire nimaku yub maeno. Ekoro kumae: “Dhanu ma dupa giyero ira nia abenyotho giramiya para mi wer; ento agam amito atii ku kwo para zoo pi nitimo ni Yehova.” Tin oro ma kadhu 30 udaru kadhu niai m’etimo ng’iyong’ic maeno. Ebewinjere nenedi? Emedo kumae: “Atie ku kwiyocwiny mir adunde, man atie ku genogen iwi Yehova nia ebipong’o yeny ceke mir adundena i nindo m’ubino.”—Zab. 37:4.

MEDIRI NITIMO NI YEHOVA

17. (a) Ukwayu dhanu ma fodi gibetimo ngo ni Yehova gitim ang’o, man pirang’o? (b) Ju ma dong’ gidaru ng’iyo nitimo ni Yehova ging’eyo lembang’o?

¹⁷ Ajiki mi ng’om maeni ni ceng’ini magwei. Jakwenda Paulo ukiewo kumae: “Kum ‘i ng’ey saa ma nyanok kende,’ e ‘ng’atu m’ubebino bitundo man ebigalu ngo.’” (Ebr. 10:37) Lembe maeno ubenyutho ang’o? Mi kwong’o, saa udong’ nyanok ni dhanu pi ning’iyo nitimo ni Yehova. (1 Kor. 7:29) Mir ario, tek dong’ wadaru ng’iyo nitimo ni Mungu, ukwayu wang’ey nia kadok bikwayu wacir peko de, re ebibedo pi “saa ma nyanok kende.”

18. Yesu giku Yehova gibemito nia watim ang’o?

¹⁸ Yesu ukwayu dhanu nia gidok julub pare, man gimediri nilubo toke. (Mat. 16:24) Pieno tek wadaru timo ni Yehova pi oro ma dupa, ukwayu wabed ku lembakeca mi medara nitimo ire. Bende, ukwayu wamedara nikwo nimakere ku yub ma wamaku mi timo ire. Andha eromo bedo lembe ma yot ungo, ento wabinwang’u anyong’a man mugisa lee niai kawoni.—Zab. 35:27.

19. Lapor pa Gene ubemiyo iwa ponji ma kani?

¹⁹ Jumoko giparu nia nitimo ni Yehova kwayu miyiri ma lee dit. Tek itie aradu, nyo ibeparu nia timo ni Yehova uketho ibekoso piny moko? Umego moko m’aradu ma nyinge Gene uyero kumae: “Abed aparu nia nitimo ni Yehova utie ve nibedo i kol. Udok ubedo ve awiya wada ma dupa ma wadongo kugi gibenwang’u anyong’a i piny ma calu nambu, weco ku nyir kunoke tuko mi video ma nyutho lemrop, nwang’u an ke abenyotho saa para zoo i coko man i tic mi lembanyong’a.” Paru maeno ubedo ku matoke ma kani iwi Gene? Ekoro kumae: “Acaku dikara bende i timo mir aradu ma gi Jumulembe ngo, man pi kare moko lembene ubed unyang’a de andha. Ento anwang’u ngo anyong’a mandha. Acaku paru pi lemandha mi Biblia m’ang’iyo akakaka niwil ko, man amaku yub mi timo ni Yehova kud adundena ceke. Niai eca, udok ubedo ve pare Yehova udwoko wang’ rwo para ceke acel acel.”

20. Ukwayu wabed ku lembakeca mi timo ang’o?

²⁰ Jagor zaburi moko uwer ni Yehova kumae: “Jamutoro tie ng’atu m’ing’iyo man m’ikelo ceng’ini kara ubed i lela peri.” (Zab. 65:4) Dong’ wamedara nibedo ku lembakeca ma rom ku pa Yocuwa m’uyero kumae: “An ku juoda re, wabitimo mwa ni Yehova.”—Yoc. 24:15.