Judong cokiri, wunwang’ ponji i bang’ Gideon

1. Nimakere ku 1 Pethro 5:2, judong cokiri gitie ku rwom ma kani ma pire teki?

YEHOVA umiyo tic mi gwoko rombe pare ma pigi tek i iye i kor judong cokiri. Jumaco maeno ma gimiiri gimaru rwom migi mi timo ni umego ku nyimego, man gibetimo tego nibedo “jukwac” m’ubegwokogi i andha. (Yer. 23:4; Som 1 Pethro 5:2.) Watie ku foyofoc lee dit pi jumaco maeno ma gin’i cokiri mwa!

2. Judong cokiri moko gibenwang’iri ku peko ma kani?

² Judong cokiri ginwang’iri ku peko dupa kinde ma gibepong’o rwom migi. I andha, nigwoko cokiri utie tic ma yot ungo. Tony ma tie jadit cokiri moko mir État-Unis utuc niponjo ning’eyo kadhiri mi tic m’ubekwayu eyii. Ekoro kumae: “Kinde ma thong’om mi Korona ucaku, acoko tic dupa mi pangu pi coko man pi lembanyong’a. Re kadok atim rukani de, tic ubino pare asu thuthuru m’ukwayu jutim. I ng’eye, program para mi somo Biblia, mi timo ponji para ma segi, man mi rwo ucaku podho.” Jadit cokiri mange ma nyinge Ilir mi ng’om mi Kosovo ulund unwang’ere ku kit pekone m’ukoc. Kinde m’ebino kwo i kabedo ma lwiny n’i iye, enwang’u nia etie tek niworo telowic ma dilo ubemiyo. Eyero kumae: “Kinde ma biro mi filial umiyo ira tic mi konyo umego ku nyimego ma gin’i kabedo mir ariti, tegocwiny para unwang’ere i amulaic. Lworo umaka, man telowic ma jumiyo de abino neno nia ve tie telowic ma copo konyo ngo.” Misioner moko ma nyinge Tim i ng’om mir Azia unwang’u nia nitimo lembe ma pol ma nwang’u etimo kubang’ ceng’ udoko tek ire. Ewacu kumae: “Saa moko anwang’u nia aol lee man wiya de jony.” Dong’ ang’o ma copo konyo judong cokiri ma gibenwang’iri ku peko m’urombo ku maeno?

3. Wan ceke wacopo nwang’u bero ma kani niai kud i lapor pa Gideon m’ubino japoklembe?

³ Judong cokiri gicopo nwang’u ponji niai kud i lapor pa Gideon m’ubino japoklembe. (Ebr. 6:12; 11:32) Ebino jagwok dhanu pa Mungu man jakwac migi. (Pok. 2:16; 1 Kei. 17:6) Calu Gideon, judong cokiri de jung’iyogi pi nigwoko dhanu pa Mungu i saa ma lembe tie tek mandha. (Tic. 20:28; 2 Tim. 3:1) Wacopo nwang’u ponji niai kud i lapor mi jwigiri man mi woro ma Gideon unyutho. Kinde m’ebetimo tic ma jumiyo i kore, cirocir pare unwang’ere i amulaic. Dok nwang’u watie judong cokiri kunoke ngo, wacopo medo ninyutho foyofoc mwa pi judong cokiri. Wacopo diko cingwa ku jumaco maeno ma giteng’ini i tipo pi tic ma tek ma gibetimo.​—Ebr. 13:17.

KA JWIGIRI MWU UBENWANG’ERE I AMULAIC

4. Gideon unyutho jwigiri nenedi?

⁴ Gideon ubino dhanu ma jwigere.b Kinde ma malaika pa Yehova uyero ni Gideon nia Yehova ung’iye pi nigonyo nyithindho mir Israel kud i masendi mi Jumidian, ng’atu maeno ma won jwigiri uwacu kumae: “Wat para gi jucan m’usagu i Manase, an de a nok m’usagu i ot pa vwa.” (Pok. 6:15) Enwang’ere nia eromo ngo ku tic maeno, ento Yehova ung’eyo ma ber nia eromo time. Ku kony pa Yehova, Gideon utimo tic pare cuu mandha man edare.

5. Saa ma kani m’eromo bedo tek ni jadit cokiri ninyutho jwigiri?

⁵ Judong cokiri gitimo tego migi ceke pi ninyutho jwigiri i lembe zoo. (Mik. 6:8; Tic. 20:18, 19) Gidhongo ngo korgi pi copo ma gitie ko kunoke pi gin ma gitimo; man ka gitimo kosa moko, gicayiri ngo nia dong’ tijgi mbe. Re saa moko ecopo bedo tek ni jadit cokiri ninyutho jwigiri man ning’eyo mupaka pare. Ku lapor, ecopo yiyo tic dupa man ing’eye nitimogi zoo doko tek ire. Kunoke ecopo bedo tek ire ninyutho jwigiri kinde ma jubepake kunoke jubecaye pir ayi m’etimo ko tic moko. Dong’ ka judong cokiri gibenwang’iri i wang’ lembe ma kumeno, lapor pa Gideon romo konyogi nenedi?

6. Judong cokiri giromo nwang’u ponji ma kani i kum jwigiri pa Gideoni? (Nen bende cal.)

⁶ Kway kony. Ng’atu ma jwigere ng’eyo mupaka pare. Gideon ugam ung’eyo mupaka pare uketho ebedo ayika nikwayu kony ibang’ jumange. (Pok. 6:27, 35; 7:24) Judong cokiri ma ging’iyo i lembe de gitimo kumeno. Tony ma jular juweco pire i wang’e ukoro kumae: “M’abino nyathin, juponja niyiyo tic ceke; eno uketho abed ayiyo tic lee nikadhu kadhiri para. Pieno, ang’iyo nia i thier mwa mi juruot wakewec iwi ng’eyo mupaka man apenjo paru pa min ot para iwi lembene. Aneno bende video ma nwang’ere i jw.org ma thiwiye wacu: “Comme Jésus, formons les autres, faisons-leur confiance et rendons-les capables.” Tony ucaku kwayu jumange ukonye ku tic ma jumiyo i kore. Adwogine ubino ang’o? Eyero kumae: “Dong’ tic mi cokiri ubewotho ma ber man an de atie ku saa lee mi tungara i thenge mi tipo.”

7. Judong cokiri romo kwanyu lapor pa Gideon nenedi kinde ma jubecayugi? (Yakobo 3:13)

⁷ Dwok lembe ku yoo ka jubeceyi. Gin mange ma romo bedo ni amulaic ni judong cokiri utie cac. Kendo lapor pa Gideon copo konyogi. M’umbe jiji, egam eng’eyo ng’ico pare, eno uketho kinde ma Juefraim gibecaye, edwoko igi lembe ku yoo. (Pok. 8:1-3) Gideon udwoko ngo lembe ku kwinyo. Enyutho jwigiri m’ewinjo ko paru migi, man eweco i bang’gi ma ber, e uketho wi lembe ukwiyo. Judong cokiri ma ging’iyo i lembe gilubo lapor pa Gideon, giwinjo jumange cuu, man gidwoko lembe ku yoo kinde ma jubecayugi. (Som Yakobo 3:13.) I ayi maeno re ma giketho kwiyocwiny bedo nuti i cokiri.

8. Judong cokiri gicikiri nitimo ang’o kinde ma jubepakugi? Kemii lapor moko.

⁸ Dwok pak ceke ni Yehova. Kinde ma dhanu yungo Gideon pir aloci m’enwang’u iwi Jumidian, etelo nen migi iwi Yehova. (Pok. 8:22, 23) Umego ma jung’iyo gicopo lubo lapor pa Gideon nenedi? Ukwayu gidwok yung mi gin ceke ma gitimo udok ni Yehova. (1 Kor. 4:6, 7) Ku lapor, tek jubefoyo jadit cokiri moko pi kite m’eponjo ko ponji ku bodho, ecopo telo nen mi dhanu iwi Lembe pa Mungu ma tie ukungu mi ponji mwa kunoke iwi bodho mi ponji ma wanwang’u i dilo pa Yehova. Saa moko ukwayu judong cokiri gibed gipar cuu ka nyo ayi ma giponjo ko ponji miyo yung ni Yehova kunoke telo nen mi dhanu i wigi. Wakewec iwi lapor pa jadit cokiri acel ma nyinge Timothy. Kinde ma fodi edoko jadit cokiri adoka, egam emaru mi tuko de ngo nibemiyo korolembe mi dhanu ceke. Ekoro kumae: “Abed amondo i thiwiwec para ku lembe dupa man ku lapor ma tung’ tung’ ma nwang’u ayiko cuu mandha. Lembuno ketho jufoya mi tuko de ngo. Ku lem ma rac, abed atelo nen mi dhanu zoo i wiya kakare nitelo nen migi iwi Biblia kunoke iwi Yehova.” E nok nok, Timothy uneno nia kwayu eyik ayi m’ebed eponjo ko ponji kara kud etel nen mi dhanu i wiye. (Rie. 27:21) Lembuno ukelo adwogi ma kani? Ekoro kumae: “Kawoni dong’ umego ku nyimego ma tung’ tung’ giyero ira kite ma ponji para ukonyo kogi ninyego ku peko migi, niciro amulaic, kunoke nicoro ceng’ini ku Yehova. Foyofoc maeno miyo ira anyong’a lee nisagu anyong’a m’abed anwang’u con ka jubeyunga.”

SAA MA NYUTHO WORO KUNOKE TEGOCWINY TIE TEK IRI

9. Nyutho woro ku tegocwiny ubino tek nenedi ni Gideon? (Nen cal m’i ng’eye.)

⁹ Saa ma Gideon udoko japoklembe, ebino ku yeny mi nyutho woro man tegocwiny. Jumiyo ire tic mir ariti mi nyotho pemlam pa Baal ma won ugiero. (Pok. 6:25, 26) Ing’eye kinde m’ecoko dhog udul mony, juyero ire wang’ ario zoo nia ejwig wendgi udok nyanok. (Pok. 7:2-7) Tokcenne, juyero ire nia ecidh iwi judegi pare i diewor ma ling’.​—Pok. 7:9-11.

10. Ecopo bedo tek ni jadit cokiri moko ninyutho woro i lembe moko ma kani?

¹⁰ Kwayu judong cokiri gibed “ayika niworo” lembe. (Yak. 3:17) Jadit cokiri ma wor bedo ayika niworo lembe ma Giragora ubeyero, man eworo telowic ma dilo pa Mungu ubemiyo. I ayi maeno re m’eweko lapor ma ber ni jumange. Re asu eromo bedo ire tek ninyutho woro. Ku lapor, saa moko nyo enwang’u telowic dupa kunoke telowicne gilokiri pio pio man etie tek ire nitiyo kugi. I lembe mange ecopo penjere ka nyo andha telowic moko m’uwok copo konyo kunoke nyo utie mi rieko. Kunoke juromo kwaye nia etim tic moko ma copo ketho jutwiye. Dong’ judong cokiri gicopo lubo lapor mi woro pa Gideon nenedi i kit lembe ma kumeno?

11. Lembang’o ma copo konyo judong cokiri nibedo wori?

¹¹ Winj telowic kilili man tii kude. Mungu unyutho ni Gideon kite m’ukwayu enyoth ko pemlam pa won, kaka m’egier i iye pemlam ma nyen ni Yehova, man kit lei m’ukwayu ethier ni lam. Gideon ucayu ngo telowicnegi ento elubogi tap tap. Tin judong cokiri ginwang’u telowic ma dilo pa Yehova ubemiyo nikadhu kud i baruwa, atwong’a, man telowic mange, kara wabed museme i thenge mi kum ku mi tipo ceke. Wamaru judong cokiri mwa pilembe gibelubo cuu mandha telowic ma dilo pa Mungu ubemiyo. Dhanu mi cokiri zoo nwang’u berone.​—Zab. 119:112.

12. Judong cokiri copo tiyo nenedi ku Juebrania 13:17 tek alokaloka moko uwok i dilo pa Yehova?

¹² Bed ayika nitimo alokaloka. Poy nia Yehova uketho Gideon ujwigo wend juaskari pare ma pol. (Pok. 7:8) Nwang’u eromo paru nia, ‘nyo pir alokaloka maeni tie tek andha? Nyo alokalokane bikonyo?’ Re Gideon uworo. Tin judong cokiri gicopo lubo lapor pa Gideon kinde ma gibeworo alokaloka m’uwok i dilo pa Mungu. (Som Juebrania 13:17.) Ku lapor, i oro 2014 Guriri m’utelowic utimo alokaloka iwi kite mi culo pi giedo mi Udi Ker man Udi coko ma dongo. (2 Kor. 8:12-14) Con, dilo pa Yehova ubed uroyo banja i cokiri pi nigiero igi Ot Ker man cokiri dok culo sentene i ng’eye. Ento kawoni, dilo pa Yehova tiyo ku giramiya m’uai kud i cokiri ma tung’ tung’ mi wang’ ng’om zoo pi nigiero Udi Ker man Udi coko ma dongo kaka moko ci ma yeny utie i iye, kadok i cokiri ma giramiya migi nok magwei de. Kinde ma José uwinjo pir alokalokane, ebino ku jiji iwi lembene. Eparu kumae: ‘Eni dong’ Ot Ker acel de mbe ma jubigiero. Yo kuni lembe timere ngo kumeno.’ Re ang’o m’ukonyo José nidiko cinge i kum telowicne? Eyero kumae: “Wec ma nwang’ere i Lembrieko 3:5, 6 upoyo wiya nia kwayu agen Yehova. Man adwogi mi lembene ubino ber mire maa! Wabegiero ngo Udi Ker agiera kende, ento ayi ma nyen ma jubetiyo ko ku giramiya mwa ubekonyo dhanu ceke kara lembe ubed rom rom.”

13. (a) Cwiny Gideon ubino tek i kum lembang’o? (b) Judong cokiri gicopo lubo lapor pa Gideon nenedi? (Nen bende cal.)

¹³ Tim yeny pa Yehova ku tegocwinyi. Gideon uworo Yehova kadok nwang’u ebino ku lworo man tije ubino kud ariti de. (Pok. 9:17) Kinde ma Yehova utielo cwiny Gideon, cwinye ubino tek nia Mungu bikonye kara egwok dhanu pa Mungu. Judong cokiri m’ubekwo i theng ng’om ma jukwero tic mwa i iye gibelubo lapor pa Gideon. Ku tegocwiny, gibedo ma kwong’a nicidho i coko man i lembanyong’a kadok nwang’u jucopo twiyogi, jupenjo dhogi, tic wekogi, kunoke junyayu rop i kumgi de.c I saa mi masendi ma dit, bikwayu judong cokiri gibed ku tegocwiny pi nilubo telowic ma gibinwang’u kadok nwang’u lembene bibedo kud ariti i iye de. Saa moko nyo gibinwang’u telowic iwi kite mi twong’o rwonglembe mi pokolembe ma juporo ku lungu pei man iwi gin m’ukwayu watim kara wabothi kud i masendi pa Gog mi Magog.​—Ezek. 38:18; Nyu. 16:21.

KAN ETIE TEK NINYUTHO CIROCIR

14. Pirang’o nyutho cirocir ubino yot ungo ni Gideon?

¹⁴ Tic ma Gideon ubino ko mi bedo japoklembe ugam ukwayu kero ma lee. Kinde ma lwiny uvoyo Jumidian ku diewor, giringo man Gideon uriemo togi niai i poga mi Yezrel nitundo i dhu kulo Yordan ma copere ubino i kind vunga. (Pok. 7:22) Nyo Gideon giwok gijik i dhu Yordan? Ungo! Kadok giol de, en ku dhanu pare 300 gikadhu Yordan man gimediri ku riemo tokgi; nitundo giwok gimaku Jumidian man givoyogi ku lwiny.​—Pok. 8:4-12.

15. Ecopo bedo tek ni jadit cokiri ninyutho cirocir i saa ma kani?

¹⁵ Saa moko jadit cokiri copo nwang’u nia lembe mi cokiri man mi gwoko juruot pare udaru tego pare man ujonyo wiye. Saa maeno, judong cokiri copo lubo lapor pa Gideon nenedi?

16-17. Ang’o m’ukonyo Gideon niciro, man judong cokiri giromo bedo ku genogen ma kani? (Isaya 40:28-31) (Nen bende cal.)

¹⁶ Bed ku genogen nia Yehova bimiyo iri tego. Gideon ubino ku genogen nia Yehova bimiyo ire tego. De andha emiyo ire tegone. (Pok. 6:14, 34) Nindo moko Gideon ku dhanu pare giriemo tok jubim ario mi Jumidian ku tiendgi ma copere nia jubimne gibino ringo ku ngamia. (Pok. 8:12, 21) Re ku kony pa Mungu, Juisrael uwok umakugi man givoyo lwiny. Judong cokiri de gicopo jengiri iwi Yehova, ma tie ng’atu ma ‘voc ungo, kadi ma ol de ngo.’ Ebimiyo igi tego kinde ma gitiye ku yenyne.​—Som Isaya 40:28-31.

¹⁷ Wakewec iwi lapor p’umego Matthew m’utie acel m’i kind umego mi Komite ma diko kind umego ku odiyath. Ang’o m’ukonye niciro? Eyero kumae: “Anwang’u nia Jufilipi 4:13 uyero lemandha. Wang’ ma pol kan aol man avoc, abed arwo ku cwinya ceke m’akwayu ko Mungu nia emii ira tego man rieko m’akony ko umego para. Saa maeno, abed anwang’u tego mi tipo pa Yehova m’ubed ukonya niciro.” Calu Gideon, judong cokiri de gibetimo tic ma tek pi nigwoko dhanu pa Yehova kadok lembene yot ungo igi de. Re ukwayu ging’ey nia copo migi utie ku mupakane man gicopo timo ngo kwa gin ma nang’u gimito gitim. Ento mito gibed ku genogen nia Yehova biwinjo kwac migi man ebimiyo igi tego pi niciro.​—Zab. 116:1; Filip. 2:13.

18. I adundo, judong cokiri gicopo lubo lapor pa Gideon nenedi?

¹⁸ Judong cokiri gicopo ponjo lembe dupa niai kud i lapor pa Gideon. Gicikiri ning’eyo mupaka migi man ninyutho jwigiri i tic ma gibetimo man i ayi ma gibedwoko ko lembe kinde ma jubecayugi kunoke jubeyungogi. Mito ginyuth woro man tegocwiny, asagane kawoni m’ajiki mi ng’om dong’ ni ceng’ini magwei. Bende gibed ku genogen nia kadok gibenwang’iri i wang’ peko ma rukani de, Mungu bimiyo igi tego. M’umbe jiji, wabefoyo jukwac maeno m’ubetimo tic ma tek, man ‘wabimedara nimaru wagi dhanu ma kumeno.’​—Filip. 2:29.