ችግረኞችን መርዳት

አንዳንዶች ገናን የሚያከብሩበት ምክንያት

ኢየሱስ ድሆችን እንዲሁም የታመሙና ችግር ላይ ያሉ ሰዎችን ይረዳ ስለነበረ አንዳንዶች ምሳሌውን መከተል ይፈልጋሉ። ይህን ለማድረግ ከሁሉ የተሻለው ጊዜ ደግሞ የበጎ አድራጎት ድርጅቶች ብዙውን ጊዜ የእርዳታ ገንዘብ ለማሰባሰብ ተጨማሪ ጥረት በሚያደርጉበት በገና ወቅት እንደሆነ ይሰማቸዋል።

ይህን ማድረግ ተፈታታኝ የሆነው ለምንድን ነው?

በበዓላት ወቅት ብዙ ሰዎች ገበያ ስለሚወጡ፣ ስለሚዝናኑና ወዳጅ ዘመዶቻቸውን ስለሚጠይቁ ጊዜያቸው የተጣበበ ነው። ጊዜያቸው፣ ጉልበታቸው ወይም ገንዘባቸው በእነዚህ ነገሮች ስለሚሟጠጥ ሊያደርጉት የሚችሉት ነገር ለእርዳታ ድርጅት የተወሰነ ገንዘብ መስጠት ብቻ ሊሆን ይችላል።

ሊረዱን የሚችሉ የመጽሐፍ ቅዱስ ሐሳቦች

“ማድረግ እየቻልህ ለሚገባቸው መልካም ነገር ከማድረግ አትቈጠብ።” (ምሳሌ 3:27) ድሆች እንዲሁም የተራቡና ችግር ላይ የወደቁ ሰዎች እርዳታ የሚያስፈልጋቸው በገና ሰሞን ብቻ አይደለም። አንድ ሰው እርዳታ እንደሚያስፈልገው ካስተዋልክና ልትረዳው ‘የምትችል ከሆነ’ በዓል እስኪመጣ ለምን ትጠብቃለህ? ደግነትና ርኅራኄ ማሳየትህ መልሶ ይክስሃል።

“ከእናንተ እያንዳንዱ በየሳምንቱ የመጀመሪያ ቀን እንደ ገቢው ሁኔታ የተወሰነ መጠን በቤቱ ያስቀምጥ።” (1 ቆሮንቶስ 16:2) ሐዋርያው ጳውሎስ ይህን ምክር የሰጠው ድሆችን መርዳት ፈልገው ለነበሩ የጥንት ክርስቲያኖች ነው። አንተም ለተቸገሩ ግለሰቦች ወይም የሰበሰበውን ገንዘብ በአግባቡ ለሚጠቀም አንድ የእርዳታ ድርጅት አዘውትረህ መስጠት እንድትችል የተወሰነ መጠን ያለው ገንዘብ በየጊዜው ‘ማስቀመጥ’ ትችል ይሆን? በዚህ መንገድ አቅምህ የሚፈቅድልህን ያህል እያደረግህ ለችግረኞች እንደምታስብ ታሳያለህ።

“መልካም ማድረግንና ያላችሁን ነገር ለሌሎች ማካፈልን አትርሱ፤ ምክንያቱም አምላክ እንዲህ ባሉት መሥዋዕቶች እጅግ ይደሰታል።” (ዕብራውያን 13:16) ‘ያለንን ነገር ለሌሎች ከማካፈል’ በተጨማሪ “መልካም ማድረግን” ወይም ሌሎችን የሚጠቅም ተግባር መፈጸምን መርሳት እንደሌለብን ልብ በል። ለምሳሌ ያህል፣ አስተዋይ የሆኑ ወላጆች፣ ልጆቻቸው አረጋውያንን በዕለት ተዕለት ሥራዎች እንዲያግዙ እንዲሁም ካርድ በመላክ፣ ሄዶ በመጠየቅ ወይም ስልክ በመደወል የታመሙ ሰዎችን እንዲያበረታቱና ድሃ ወይም የአካል ጉዳተኛ ለሆኑ ልጆች አሳቢነት እንዲያሳዩ ያሠለጥኗቸዋል። ልጆች እንዲህ ዓይነት ሥልጠና ከተሰጣቸው በበዓል ወቅት ብቻ ሳይሆን ሁልጊዜም ደጎች እና ለጋሶች መሆንን ይማራሉ።