ደፋር የሆነው የጳውሎስ እህት ልጅ

የአጎቱን ሕይወት ስላተረፈ አንድ ወጣት እስቲ እንመልከት። የዚህ ወጣት አጎት ሐዋርያው ጳውሎስ ነው። የወጣቱን ስም ባናውቅም ድፍረት የሚጠይቅ ነገር እንዳከናወነ እናውቃለን። ምን እንዳደረገ ማወቅ ትፈልጋለህ?—

ጳውሎስ በኢየሩሳሌም ታስሮ ነበር። የታሰረው ስለ ኢየሱስ በመስበኩ ነው። አንዳንድ ክፉ ሰዎች ጳውሎስን ስለጠሉት አንድ መጥፎ ነገር ለማድረግ ተመካከሩ። እንዲህ ተባባሉ፦ ‘የጦር አዛዡ፣ ጳውሎስን ከወታደሮች ጋር ወደ ፍርድ ቤት እንዲልከው እንጠይቀው። እኛም መንገድ ላይ እንደበቅና ጳውሎስ በዚያ በኩል ሲያልፍ እንገድለዋለን!’

የጳውሎስ እህት ልጅ ይህን ሐሳባቸውን ሰማ። በዚህ ጊዜ ምን ያደርግ ይሆን? ወደ እስር ቤቱ በመሄድ ስለ ጉዳዩ ለጳውሎስ ነገረው። ጳውሎስም ወዲያውኑ ይህንን መጥፎ ሐሳባቸውን ለጦር አዛዡ እንዲናገር አሳሰበው። የጳውሎስ እህት ልጅ ጉዳዩን ለጦር አዛዡ መናገር ቀላል የሚሆንለት ይመስልሃል?— በፍጹም፣ ምክንያቱም የጦር አዛዡ ትልቅ ቦታ ያለው ሰው ነበር። የጳውሎስ እህት ልጅ ግን ደፋር ስለነበር የጦር አዛዡን አነጋገረው።

የጦር አዛዡ ምን ማድረግ እንዳለበት ያውቅ ነበር። አዛዡ፣ ጳውሎስ ጉዳት እንዳይደርስበት ለመከላከል ሲል 500 የሚያህሉ ወታደሮችን አዘጋጀ! ከዚያም በዚያው ዕለት ምሽት ጳውሎስን ወደ ቂሳርያ እንዲወስዱት አዘዛቸው። ጳውሎስ በደህና ደርሶ ይሆን?— አዎ፣ እነዚያ መጥፎ ሰዎች ጥቃት ሊያደርሱበት አልቻሉም። ያሰቡት መጥፎ ነገር ስላልተሳካ ጳውሎስ ተረፈ።

ከዚህ ታሪክ ምን ትምህርት ታገኛለህ?— አንተም እንደ ጳውሎስ እህት ልጅ ደፋር መሆን ትችላለህ። ለሌሎች ስለ ይሖዋ ስንናገር ድፍረት ያስፈልገናል። አንተስ ደፋር በመሆን ስለ ይሖዋ መናገርህን ትቀጥላለህ?— እንዲህ የምታደርግ ከሆነ የአንድ ሰው ሕይወት ልታተርፍ ትችል ይሆናል።