14. ባቢሎን ‘የወላድ መካንና መበለት’ የምትሆነው በምን መንገዶች ነው?

¹⁴ ባቢሎን ምን ይደርስባታል? ይሖዋ በመቀጠል እንዲህ ሲል ይገልጻል:- “አሁን ግን በአንድ ቀን እነዚህ ሁለት ነገሮች፣ የወላድ መካንነትና መበለትነት፣ በድንገት ይመጡብሻል፤ ስለ መተቶችሽ ብዛትና ስለ አስማቶችሽ ጽናት ፈጽመው ይመጡብሻል።” (ኢሳይያስ 47:9) አዎን፣ ባቢሎን በዓለም ላይ የተቆናጠጠችውን ታላቅ ሥልጣን በድንገት ታጣለች። በጥንቶቹ ምሥራቃውያን አገሮች መበለትና የወላድ መካን የሆነች ሴት ከሁሉ የከፋ መቅሰፍት እንደደረሰባት ተደርጎ ይቆጠር ነበር። ባቢሎን በወደቀችበት ሌሊት ምን ያህል ‘ልጆች’ እንዳጣች የምናውቀው ነገር የለም።d ይሁን እንጂ ውሎ አድሮ ከተማዋ ከናካቴው ሰው አልባ እንደምትሆን ተተንብዮ ነበር። (ኤርምያስ 51:​29) በተጨማሪም ነገሥታቷ ከዙፋን የሚወርዱ በመሆኑ መበለት ትሆናለች።

15. ባቢሎን በአይሁዳውያን ላይ ከፈጸመችው ግፍ በተጨማሪ ይሖዋን ያስቆጣው ነገር ምንድን ነው?

¹⁵ ይሁን እንጂ ይሖዋ በባቢሎን ላይ የተቆጣው በአይሁዳውያን ላይ በፈጸመችው ግፍ ብቻ አይደለም። ‘የመተትዋ ብዛትም’ አስቆጥቶታል። አምላክ ለእስራኤላውያን የሰጠው ሕግ መናፍስታዊ እምነቶችን የሚያወግዝ ቢሆንም ባቢሎን በአስማት ድርጊቶች የተሞላች ነበረች። (ዘዳግም 18:​10–12፤ ሕዝቅኤል 21:​21) ሶሻል ላይፍ አማንግ ዚ አሲሪያንስ ኤንድ ባቢሎኒያንስ የተባለው መጽሐፍ ባቢሎናውያን “ሥፍር ቁጥር በሌላቸው አጋንንት እንደተከበቡ አድርገው በማሰብ በከፍተኛ ፍርሃት ተውጠው ይኖሩ” እንደነበረ ይገልጻል።