29, 30. “ታናሹ ለሺህ” የሆነው እንዴት ነው?

²⁹ በ⁠ኢሳይያስ ምዕራፍ 60 መደምደሚያ ላይ ይሖዋ በራሱ ስም ዋስትና የሰጠበትን የማይታጠፍ ቃል እናገኛለን። እንዲህ አለ:- “ታናሹ ለሺህ የሁሉም ታናሹ ለብርቱ ሕዝብ ይሆናል፤ እኔ እግዚአብሔር በዘመኑ ይህን አፋጥነዋለሁ።” (ኢሳይያስ 60:​22) ተበታትነው የነበሩት ቅቡዓን ክርስቲያኖች በ1919 እንደገና ተሰባስበው ሥራቸውን ማከናወን ሲጀምሩ ‘አነስተኛ’ ነበሩ።e የተቀሩት መንፈሳዊ እስራኤላውያን ሲሰበሰቡ ግን ቁጥራቸው በከፍተኛ ደረጃ ጨመረ። እጅግ ብዙ ሰዎች መሰብሰብ ሲጀምሩ ደግሞ ቁጥራቸው በሚያስደንቅ ሁኔታ እየጨመረ ሄደ።

³⁰ ብዙም ሳይቆይ በአምላክ ሕዝብ መካከል ያለው ሰላምና ጽድቅ ቅን ልብ ያላቸውን በርካታ ሰዎች በመሳቡ ቃል በቃል “ታናሹ” “ብርቱ ሕዝብ” ሆነ። በአሁኑ ጊዜ ቁጥራቸው በዓለም ላይ ካሉት በርካታ ሉዓላዊ መንግሥታት የሕዝብ ቁጥር ይበልጣል። ይሖዋ በኢየሱስ ክርስቶስ በኩል የመንግሥቱን ሥራ ከመምራቱም በላይ በእጅጉ እንዳፋጠነው በግልጽ መረዳት ይቻላል። እውነተኛው አምልኮ በዓለም አቀፍ ደረጃ ሲስፋፋ ማየትና የዚህ እድገት አካል መሆን መቻል ምንኛ የሚያስደስት ነው! አዎን፣ ይህ ጭማሪ እነዚህን ትንቢቶች ከረጅም ጊዜ በፊት የተናገረውን አምላክ ይሖዋን እንደሚያስከብረው ማወቃችን በእጅጉ ያስደስተናል።