የሶርያ ንጉሥ ቤንሃዳድ በእስራኤል ላይ በተደጋጋሚ ጥቃት ይሰነዝር ነበር። ሆኖም ጥቃት በሚሰነዝርበት ጊዜ ሁሉ ነቢዩ ኤልሳዕ የእስራኤልን ንጉሥ አስቀድሞ ያስጠነቅቀው ስለነበር ከጥቃቱ ያመልጥ ነበር። ስለዚህ ቤንሃዳድ ኤልሳዕን ለመያዝ ወሰነ። ኤልሳዕ ዶታን የሚባል ከተማ ውስጥ እንዳለ ስለሰማ እሱን ለመያዝ የሶርያን ሠራዊት ወደዚያ ላከ።

ሶርያውያን ሌሊት ላይ ዶታን ደረሱ። በቀጣዩ ቀን ጠዋት የኤልሳዕ አገልጋይ ወደ ውጭ ሲወጣ ከተማዋ በብዙ ሠራዊት እንደተከበበች አየ። እሱም በጣም ስለፈራ ‘ኤልሳዕ፣ ምን ብናደርግ ይሻላል?’ በማለት ጮኸ። ኤልሳዕም ‘ከእነሱ ጋር ካሉት ከእኛ ጋር ያሉት ይበልጣሉ’ አለው። ወዲያውኑም ይሖዋ የኤልሳዕ አገልጋይ በከተማዋ ዙሪያ ያሉት ተራሮች በሙሉ በእሳት ፈረሶችና የጦር ሠረገሎች እንደተሞሉ እንዲያይ አደረገው።

የሶርያ ወታደሮች ኤልሳዕን ለመያዝ ሲሞክሩ ኤልሳዕ ‘እባክህ ይሖዋ እነዚህን ሰዎች አሳውራቸው’ በማለት ጸለየ። በዚህ ጊዜ ዓይናቸው ማየት ቢችልም እንኳ የት እንዳሉ ግራ ገባቸው። ኤልሳዕ ወታደሮቹን እንዲህ አላቸው፦ ‘የመጣችሁት ወደተሳሳተ ቦታ ነው። ተከተሉኝና ወደምትፈልጉት ሰው እወስዳችኋለሁ።’ እነሱም ኤልሳዕን ተከትለው የእስራኤል ንጉሥ እስከሚኖርባት እስከ ሰማርያ ድረስ ሄዱ።

ሶርያውያኑ የት እንዳሉ የገባቸው ሰማርያ ውስጥ ከገቡ በኋላ ነበር። የእስራኤል ንጉሥም ‘ልግደላቸው?’ በማለት ኤልሳዕን ጠየቀው። ኤልሳዕ ይህን አጋጣሚ በመጠቀም ሊጎዱት ሞክረው የነበሩትን ሰዎች ይበቀል ይሆን? በፍጹም። ኤልሳዕ እንዲህ አለ፦ ‘አትግደላቸው። የሚበሉት ምግብ ስጣቸውና አሰናብታቸው።’ ስለዚህ ንጉሡ ትልቅ ድግስ አዘጋጅቶላቸው ከበሉና ከጠጡ በኋላ ወደ ቤታቸው ሄዱ።

ኤልዛቤል ጎቶልያ የምትባል ልጅ ነበረቻት፤ ጎቶልያ ልክ እንደ እናቷ ክፉ ነበረች። ጎቶልያ የይሁዳን ንጉሥ አግብታ ነበር። ባሏ ሲሞት ወንድ ልጇ በአባቱ ምትክ መግዛት ጀመረ። ልጇ ሲሞት ግን ጎቶልያ ራሷ ይሁዳን መግዛት ጀመረች። ከዚያም ሌላ ሰው ሥልጣኑን እንዳይወስድባት ስትል የራሷን የልጅ ልጆች ጨምሮ የንጉሣውያኑን ቤተሰብ በሙሉ ለማስገደል ሞከረች። በዚህም የተነሳ ሰው ሁሉ ይፈራት ነበር።

ሊቀ ካህናቱ ዮዳሄና ሚስቱ የሆሼባ፣ ጎቶልያ የምታደርገው ነገር ትክክል እንዳልሆነ ተገንዝበው ነበር። ስለዚህ ሕይወታቸውን አደጋ ላይ ጥለው ከጎቶልያ የልጅ ልጆች አንዱ የሆነውን ኢዮዓስ የተባለውን ሕፃን ደብቀው ወሰዱት። ከዚያም በቤተ መቅደሱ ውስጥ አሳደጉት።

ኢዮዓስ ሰባት ዓመት ሲሆነው ዮዳሄ መቶ አለቆቹንና ሌዋውያኑን በሙሉ በመሰብሰብ ‘የቤተ መቅደሱን በሮች ጠብቁ፤ ማንንም እንዳታስገቡ’ አላቸው። ከዚያም ዮዳሄ ኢዮዓስን የይሁዳ ንጉሥ አድርጎ ሾመው፤ በራሱም ላይ ዘውድ አደረገለት። የይሁዳ ሰዎችም ‘ንጉሡ ለዘላለም ይኑር!’ ብለው ጮኹ።

ንግሥት ጎቶልያ የሕዝቡን ጩኸት ስትሰማ በፍጥነት ወደ ቤተ መቅደሱ መጣች። አዲሱን ንጉሥ ስታይ ‘ይህ ተንኮል ነው! ተንኮል ነው!’ ብላ ጮኸች። ከዚያም መቶ አለቆቹ ይህችን ክፉ ንግሥት ይዘው አወጧትና ገደሏት። በሕዝቡ ላይ ያሳደረችው መጥፎ ተጽዕኖስ ይወገድ ይሆን?

ዮዳሄ ሕዝቡ ‘ይሖዋን ብቻ እናመልካለን’ ብለው ለይሖዋ ቃል እንዲገቡ አደረገ። እንዲሁም የባአልን ቤተ መቅደስ እንዲያፈርሱና ጣዖታቱን እንዲሰባብሩ አደረገ። በተጨማሪም ሕዝቡ በይሖዋ ቤተ መቅደስ ውስጥ በድጋሚ ይሖዋን ማምለክ እንዲችሉ በዚያ የሚያገለግሉ ካህናትንና ሌዋውያንን ሾመ። የረከሰ ሰው ወደ ቤተ መቅደሱ እንዳይገባ የሚከላከሉ በር ጠባቂዎችንም መደበ። ከዚያም ዮዳሄና መቶ አለቆቹ ኢዮዓስን ወደ ቤተ መንግሥቱ ወስደው ዙፋን ላይ አስቀመጡት። የይሁዳ ሰዎች በጣም ተደሰቱ። በመጨረሻ ክፉዋ ንግሥት ጎቶልያ በመገደሏና የባአል አምልኮ በመወገዱ ይሖዋን በነፃነት ማገልገል ቻሉ። በእርግጥም ዮዳሄ በድፍረት የወሰደው እርምጃ ብዙ ሰዎችን ጠቅሟል።