የወጣቶች ጥያቄ

ማኅበራዊ ሚዲያ ላይ ታዋቂ መሆን ምን ያህል አስፈላጊ ነው?

ኢሌን የተባለች ወጣት እንዲህ ብላለች፦ “አብረውኝ የሚማሩት ልጆች ማኅበራዊ ሚዲያ ላይ በመቶዎች የሚቆጠሩ ፎሎወሮች እንዳሏቸው ሳይ ‘ዋው! በጣም ታዋቂ ናቸው!’ ብዬ አሰብኩ። እውነቱን ለመናገር ትንሽ ቀንቼባቸው ነበር።”

አንተስ እንዲህ ተሰምቶህ ያውቃል? ከሆነ፣ ይህ ርዕስ ማኅበራዊ ሚዲያ ላይ ታዋቂ ለመሆን መጣጣር ከሚያስከትለው አደጋ እንድትጠበቅ ይረዳሃል።

ምን አደጋዎች አሉት?

መጽሐፍ ቅዱስ በምሳሌ 22:1 ላይ “መልካም ስም ከብዙ ሀብት ይመረጣል” ይላል። ስለዚህ ጥሩ ስም ለማትረፍ፣ አልፎ ተርፎም ተወዳጅ ለመሆን መፈለግ ምንም ችግር የለውም።

አንዳንድ ጊዜ ግን ተቀባይነት ለማግኘት ያለን ፍላጎት በጣም ከፍተኛ ከመሆኑ የተነሳ ታዋቂ ካልሆንን ደስታ እንደማናገኝ ሊሰማን ይችላል። ታዲያ ይህ ስሜት አደጋ ሊኖረው ይችላል? የ16 ዓመቷ ኦንያ አደጋ እንዳለው ይሰማታል፦

“ሰዎች ታዋቂ ለመሆን ሲሉ ብቻ የማይሆን ነገር ሲያደርጉ አይቻለሁ፤ ለምሳሌ በትምህርት ቤታችን ከአንደኛ ፎቅ ላይ የዘለሉ ልጆች አሉ።”

አንዳንድ ወጣቶች የእኩዮቻቸውን ትኩረት ለመሳብ ሲሉ አደገኛ የሆኑ የሞኝነት ድርጊቶችን ሲፈጽሙ በቪዲዮ ተቀርጸው ኢንተርኔት ላይ ይለጥፋሉ። ለምሳሌ አንዳንድ ወጣቶች የልብስ ማጠቢያ ሳሙና ሲበሉ ተቀርጸው ኢንተርኔት ላይ ቪዲዮውን ለቀዋል፤ እንዲህ ያለውን መርዛማ ነገር መብላት ማንም ሰው ሊያደርገው የማይገባ ነገር ነው!

መጽሐፍ ቅዱስ ምን ይላል? “የምትሠሩትን ነገር ለዝና ስትሉ አትሥሩ።”—ፊልጵስዩስ 2:3 ሕያው ቃል

ሊታሰብበት የሚገባ ነጥብ፦

ማኅበራዊ ሚዲያ ላይ ታዋቂ መሆን ለአንተ ምን ያህል አስፈላጊ ነው?
የእኩዮችህን ትኩረት ወይም አድናቆት ለማትረፍ ስትል ጤናህን ወይም ሕይወትህን አደጋ ላይ የሚጥል ነገር ታደርጋለህ?

እኩዮችህ ምን ይላሉ?

“‘ታዋቂ ለመሆን ማንኛውንም ነገር ከማድረግ አልመለስም’ ብሎ ማሰብ አደገኛ ነው፤ አንዳንድ ወጣቶች ማኅበራዊ ሚዲያ ላይ የሆነ ዓይነት አነጋገር፣ አለባበስ ወይም ምግባር ያላቸው መስለው ከታዩ ታዋቂ እንደሚሆኑ ይሰማቸዋል። ታዋቂነት የምታምኑበትን ነገርና መሥፈርታችሁን መሥዋዕት ልታደርጉለት የሚገባ ነገር አይደለም።”—ሊያና

“ታዋቂ መስለው ይታያሉ”

ታዋቂ ለመሆን ሲሉ አደገኛ ነገር የሚያደርጉት ሁሉም ሰዎች አይደሉም። የ22 ዓመቷ ኤሪካ እንደገለጸችው ሌላ ዘዴ የሚጠቀሙ ሰዎችም አሉ፦

“በሕይወታቸው ውስጥ የተከናወኑ ነገሮችን በሙሉ በየጊዜው የሚለጥፉ ሰዎች ሁልጊዜ አብረዋቸው የሚዝናኑ ብዙ ጓደኞች ያሏቸው ይመስላሉ። በዚህ መልኩ ታዋቂ መስለው ይታያሉ።”

የ15 ዓመቷ ካራ አንዳንድ ሰዎች ታዋቂ መስለው ለመታየት ሲሉ እንደሚዋሹ ተናግራለች፦

“አንዳንድ ሰዎች ፓርቲ ላይ እንደነበሩ የሚያስመስል ፎቶ ይለጥፋሉ፤ እንደ እውነቱ ከሆነ ግን ከቤታቸውም አልወጡም።”

የ22 ዓመቱ ማቲው እንዲህ ዓይነት ነገር እንዳደረገ ሳይሸሽግ ተናግሯል፦

“አንድ ፎቶ ለጠፍኩና ቦታው የኤቨረስት ተራራ እንደሆነ ጻፍኩ፤ እኔ ግን እስያ ሄጄ እንኳ አላውቅም!”

መጽሐፍ ቅዱስ ምን ይላል? “በሁሉም ነገር በሐቀኝነት ለመኖር እንፈልጋለን።”—ዕብራውያን 13:18

ሊታሰብበት የሚገባ ነጥብ፦

ማኅበራዊ ሚዲያ የምትጠቀም ከሆነ ይበልጥ ታዋቂ ለመሆን ስትል ትዋሻለህ?
የምትለጥፋቸው ፎቶግራፎችና የምትጽፋቸው ሐሳቦች ማንነትህንና የምታምንበትን ነገር የሚወክሉ ናቸው?

እኩዮችህ ምን ይላሉ?

“አንዳንድ ሰዎች ላይክ ለማግኘት ሲሉ ማንኛውንም ነገር ከማድረግ አይመለሱም። ግን መታወቅ የምትፈልጉት በምንድን ነው? ተገቢ ባልሆነ አለባበስና አነጋገር ወይም ያለኝ ነገር ይታይልኝ በማለታችሁ ነው? ወይስ መታወቅ የምትፈልጉት ባሏችሁ ጥሩ ባሕርያት ወይም ለሌሎች አሳቢነት በማሳየታችሁ ነው? ተወዳጅ መሆን ደስ የሚል ነገር ነው፤ ግን ተወዳጅነት ያተረፋችሁት በምትኮሩበት ነገር ሊሆን ይገባል።”—ሃና

“ፎሎወር” እና “ላይክ” ማግኘት ምን ያህል ቦታ ሊሰጠው ይገባል?

ብዙ ሰዎች ማኅበራዊ ሚዲያ ላይ ታዋቂ ለመሆን ቁልፉ በጣም ብዙ ፎሎወርና ላይክ ማግኘት እንደሆነ ይሰማቸዋል። ቀደም ሲል የተጠቀሰው ማቲውም እንደዚያ ይሰማው እንደነበር ተናግሯል፦

“‘ስንት ፎሎወር አለህ?’ ወይም ‘በአንድ ፖስት እስከ ስንት ላይክ አግኝተህ ታውቃለህ?’ ብዬ ሰዎችን እጠይቃለሁ። የፎሎወሮቼን ብዛት ለማሳደግ ስል የማላውቃቸውን ሰዎች ፎሎው አደርግ ነበር፤ እነሱም መልሰው ፎሎው እንዲያደርጉኝ አስቤ ማለት ነው። ታዋቂ የመሆን ጥም አደረብኝ፤ ማኅበራዊ ሚዲያ ደግሞ ይህን ጥሜን አባባሰው።”

ፎቶግራፎች፦ 1. አንዲት ልጅ በማኅበራዊ ሚዲያ ገጿ ላይ ያገኘችውን ላይክ እያየች ፈገግ ስትል። 2. ይህች ልጅ ከረሜላና ቸኮሌት ስትበላ። 3. ልጅቷ ሆዷን ይዛ፤ ያዘነች ትመስላለች። — ማኅበራዊ ሚዲያ ላይ ታዋቂ መሆን ገንቢነት የሌለው ጣፋጭ ምግብ እንደመብላት ነው፤ እንዲህ ያለው ምግብ አፍ ላይ ቢጣፍጥም አያጠግብም

የ25 ዓመቷ ማሪያ እንደገለጸችው አንዳንድ ሰዎች ለራሳቸው ያላቸው ግምት የተመካው ‘ምን ያህል ፎሎወርና ላይክ አለኝ?’ በሚለው ላይ ነው፦

“አንዲት ልጅ የለጠፈችው ሰልፊ ብዙ ላይክ ካላገኘ አስቀያሚ እንደሆነች ይሰማታል። ይሄ የተሳሳተ ድምዳሜ እንደሆነ ግልጽ ነው፤ ግን በዚያ ሁኔታ ውስጥ ያሉ ብዙ ሰዎች እንደዚያ ይሰማቸዋል። እነዚህ ወጣቶች ሌላ ሰው ሳይሰድባቸው ራሳቸውን እየሰደቡ ነው ሊባል ይችላል።”

መጽሐፍ ቅዱስ ምን ይላል? “በመካከላችን የፉክክር መንፈስ በማነሳሳትና አንዳችን ሌላውን በመመቅኘት በከንቱ አንመካ።”—ገላትያ 5:26

ሊታሰብበት የሚገባ ነጥብ፦

ማኅበራዊ ሚዲያ የምትጠቀም ከሆነ ራስህን ከሌሎች ሰዎች ጋር እንድታወዳድር እንደሚያደርግህ ይሰማሃል?
የሚያሳስብህ ከልባቸው የሚያስቡልህ እውነተኛ ጓደኞች ያሉህ መሆኑ ነው ወይስ የፎሎወሮችህ ብዛት?

እኩዮችህ ምን ይላሉ?

“ማኅበራዊ ሚዲያ ላይ ታዋቂ ለመሆን ሰዎች የሚያደንቁት ዓይነት ሰው መሆን ይኖርብሃል፤ በአብዛኛው ደግሞ እንዲህ ማድረግ የሚቻለው እንደ እነሱ ዓይነት ሰው በመሆን ነው። ይሄ ደግሞ ሌሎች ለአንተ ባላቸው አመለካከት ወይም የእነሱን ትኩረት መሳብ በምትችልበት መንገድ ላይ ከልክ በላይ እንድታተኩር ያደርግሃል። ተወዳጅ ለመሆን መፈለግ ያለ ነገር ነው፤ ታዋቂ ለመሆን ቆርጠን ከተነሳን ግን ይህ ፍላጎት ሙሉ በሙሉ አእምሯችንን ይቆጣጠረዋል።”—ጆሹዋ

“በትሕትና ጉራ አትንዙ”

አንዳንድ ሰዎች፣ ስላከናወኑት ነገር ጉራቸውን የሚነዙት በነገሩ እንዳልተደሰቱ በሚያስመስል መንገድ እንደሆነ አስተውላችሁ ታውቃላችሁ?

“አዲስ መኪና ከገዛሁ ወዲህ ሁሉ ሰው ካልሸኘኸኝ ይለኛል!”
“ሰው ሁሉ ውፍረት በመቀነሴ እያደነቀኝ ነው፤ አሁንስ ሰለቸኝ!”

ተናጋሪው ጉራ እየነዛም ትሑት እንደሆነ ለማስመሰል ሲል በሁኔታው እንዳልተደሰተ የሚያስመስል ነገር ጣል ያደርጋል።

ማሳሰቢያ፦ እንዲህ ያለው ጉራ ማንንም አያታልልም፤ በመሆኑም ብዙውን ጊዜ ጉዳት ማስከተሉ አይቀርም። እንዲህ ያለ ጉራ የሚነዛ ሰው ትሕትናው የይምሰል ስለሆነ ብዙውን ጊዜ ዓይን ያወጣ ጉራ ከሚነዛ ሰው የበለጠ ሌሎችን ያበሳጫል።

ስለዚህ ማኅበራዊ ሚዲያ ላይ ሐሳብ ስትጽፍ ወይም ፎቶ ስትለጥፍ በትሕትና ጉራ እንዳትነዛ ተጠንቀቅ። “የገዛ አፍህ ሳይሆን ሌላ ሰው ያመስግንህ” የሚለውን የመጽሐፍ ቅዱስ ምክር ተከተል።—ምሳሌ 27:2