Saka 6 Folad

Onini a maponengay pasangaray ko kaˈorip, awaayto ko sakafecol a kakaenen. Miingiday cingra i pakiyahoan a hako, awaay ko adeses a miparo to tosa laliping. Matefad koniya tosa laliping i hako i, awaay ko honi. Mafanaˈay ci Yis tosaay laliping ko miparoan ningra, o sasafaay a payci itiya konini. Oniya miming payci cowa ko papakacakay to cecay ˈalic, itini kakaenen a ˈayam, o samadoloay ko ˈalic. Tada masemeray ci Yis toniya manikaway a maponengay, orato mitahidangay to nisawawaan, papinengneng cangranan to demak noniya fafahiyan. Sanay ci Yis: “Ikaka no niparoan no nimanima a tamdaw ko niparoan nonini a maponengay a pakoyoc a fafahiyan a payso.” Dotoc sanay ci Yis mitadtad: ‘Cangra (Oya cihafayay tamdaw) o nano rafas ko niparoan a payci, o nonini a maponengay cangoˈotay ko sakaˈorip, emin hananay ningra a miparo.’ (Marko 12:43, 44) Oniya madimadiay a fafahiyan mieminan ningra miparo i hako ko payci, malecaday o patorodan ningra ko ˈorip i kamay ni Yihofa, pakasoˈlinay cingra iraay ko madimadiay a olah ni Yihofa, o mamidimokos cingraanan.​—ˈOlic 26:3. w21.04 6 fiedac 17-​18 fatac

Itini fafekang no sera ci Yis padotocay tawlik fanekfek a mitosil, mitokelay to nisawawaan tawlik a mitosil. (Yohani 4:​35, 36) Ano kalacafay ci Yis to nisawawaan i, soˈlinay fanekfek cangra. (Luka 10:​1, 5-​11, 17) Kawra, tiya malepel ato patayen ci Yis i, malahdaway ko fanekfek no nisawawaan a mitosil. (Yohani 16:32) Patikol ci Yis maˈorip, pakalalokay to nisawawaan misarocod to mitosilay a tayal. Minokay cingra tayra kakarayan, soˈlinay fanekfek ko falocoˈ no nisawawaan a mitosil, telocto oya misafelitay a tamdaw somowalay to aniniay a sinael. Padotocay ci Yis mikayat to mitosilay a tayal no Krisciyang, midamaan ni Yihofa cangra, mansa ˈalomanay ko micadaay to soˈlinay kimad. Tinakoen, itini saka 33 miheca Kocinsic, maedeng 3,000 ko tamdaw micadaay to paputisem. (Dmak 2:​41) Ikor, padotocay matongal ko ˈaloman no nisawawaan. (Dmak 6:7) Kawra paˈayaway ci Yis, itini salikoray romiˈad, wa ikaka ko ˈaloman no micadaay to ngaˈayay lihaf.​—Yohani 14:12; Dmak 1:8. w21.05 14 fiedac 1-2 fatac

Maharatengayho iso ko kahemek no niyah tiya pakahela to soˈlinay kimad han? Maedeng o mamicada ko kahacecay tamdaw to mahelaay iso a soˈlinay kimad saan kiso miharateng. Pakasoˈlinay kiso, o papadama ko soˈlinay kimad ciepoc ko kaˈorip nangra, iraho ko makapahay hatokel nangra no ikor. (ˈOlic 119:105) Orato, mahemekay kiso pasowal to salawina ato widang to mananamay iso a kimad. Kawra teloc i? Caay ka harateng, cowa ka olah cangra a mitengil. Eca ka pitengil ko tao to milasilan ita a lihaf, cowa ko mamacekid kita. Itiniho i fafekang no sera ci Yis, adihayay ko midemakan a kafahkaˈan, misawacay to midamaay ko Kawas cingranan, kawra kamayan eca ka pakasoˈlin ko ˈalomanay tamdaw cingranan. Tinakoen, midemak ci Yis to kafahkaan patikol paˈorip ci Lacarusan, mihaiyay ko misafelitay ci Yisan a tamdaw toniya demak. Kawra, o ˈaˈideman no Yutayakiyo kamayan manaˈay mihai to ci Misiya ci Yis, sapipatayaw cingranan aci Lacarusan.​—Yohani 11:47, 48, 53; 12:​9-​11. w21.05 2 fiedac 1-2 fatac

Misarocod micerid mirienang to saˈopo. Mihaen wa ngaˈay kiso mikitini lalakaw no saˈopo milifok to sapakalalok, wa adihay ko toki mafanaˈ to romaroma salikaka. Malawidang to ngaˈayay nanamen iso a salikaka i kasakopang, soˈlin cowa ka hecad to mihecaan iso ato lalengawan nangra, kamayan ngaˈay kiso malawidang cangranan. Sowal no Fangcalay Cudad, o “matoˈasay a tamdaw” iraay ko taneng. (Yopu 12:12) Roma i, wa ngaˈay kita mikitini i madimadiay ci Yihofaan a kaemangay Krisciyang minanam to adihayay. Ikakaay ko mihecaan ni Yonatan ci Tafitian, kawra kamayan mala ngaˈayay a widang cangra. (1 Samuil 18:1) Soˈlin tahalifa cangra to adihayay a pasangaray, kawra madadamaay, malacafay midoko ci Yihofaan. (1 Samuil 23:16-​18) Cecayay aca ci Ilina o Misawacayay Tamdaw ni Yihofa i paro no lomaˈ, sanay cingra: “O kasakopangay a tamdaw malecaday o wama wina ato salikaka ita, pakaynian ni Yihofa cangranan a midimokos kitaanan.” Makalimay ko salikaka pakalalok ato padama tisowanan, kawra cacipinang cangra to saali iso, ngaˈ ngaˈay cangra padama. w21.06 10-​11 fiedac 9-​11 fatac

Pasowalay ci Yis to pakayniay hongti ato koli a sapatinako. Adihayay ko kiyam no koli to hongti, hakelong no kaˈorip cowa ko mamaemin patikol, kawra palasawad hananay no hongti ko kiyam ningra. O roma koli cikiyamay toniya koli to miming a payci, cowa kakahi koniya koli a misodod. Saikor, mipalitan no hongti koniya awaay ko olah a koli. O waywayan noniya koli mipalakay to niyah ato tao. Salakat, midokaˈan ningra koya cikiyamay cingranan a koli, awaay ko olah ‘patayra i kapalitan, tahira kaemin no pipatikol to kiyam ko tolas.’ Dotoc, midokaˈay to roma a koli, samanen ‘maˈaraw no roma koli koniya demak, tada mararomay.’ (Matay 18:30, 31) Malecaday, o waywayan ita o mamilingat to tao. Ano eca kakahi kita misodod to pakararaway kitaanan a tamdaw, wa samaanto ko teloc hani? Salakat, o mamidokaˈ kita tora tamdaw, samanen cowa kakahi kita misodod cingranan, eca pisikol cingranan, eca ciharateng cingranan. Dotoc, eca kakahi kita malakangaˈay tora tamdaw, o papakasomad to roma salikaka i kasakopang. w21.06 22 fiedac 11-​12 fatac

Salakat palecadan no Kawas ko tireng Ningra misangaˈ to tamdaw, nao mamitodong to Kawas, kawra maolahay ci Satan mikayhid to tamdaw midemak to malafoay a demak. Itini lintad ni Nowa, ‘maˈaraw ni Yihofa tatiihay ko demak no tamdaw i fafekang no sera,’ ‘pakayni i misangaˈan Ningra a tamdaw i fafekang no sera, makesemay a mararom.’ (Satapangan 6:​5, 6, 11) Mikitiya tahanini, o pakayraan no lekakawa no tamdaw masalofay han? Awaay ko kangaˈayan! O lekakawa nohatini matomesay ko tongsinlien ato malafoay a waywayan no tamdaw. (Ifiso 4:​18, 19) Maˈaraw ni Satan malafo ko waywayan no tamdaw, maedeng mahemekay. Ano ngaˈay cingra mikayhid to midokoay to Kawas a tamdaw mararaw, maedeng wa mangalef ko hemek ningra. Itini pikowan ni Satan, ‘o tamdaw ko mikowan to tamdaw, pasemsemay to tamdaw.’ Soˈlinay i, o misemsemay cowa ko tamdaw aca, mahawpay ko patorodan no Kawas i tamdaw midimokos a cikiw ato pinaˈorip. (Patnakay 8:9; Satapangan 1:​28) Samaanay ko teloc hani? Roma mikakingkiway tamdaw sanay mirikec, noikor pina miheca, o demak no tamdaw papalaˈafo to 100 emang kasasiroma no pinaloma. w21.07 12 fiedac 13-​14 fatac

O roma midokoay ci Yihofaan a tamdaw padotocay makesem to nano raraw isaˈayaw, o hatiniay a kakesem papiharatengay cangranan, soˈlin pasasiyorayto ko niyah, cowa ko mamisodod ci Yihofa cangranan sanay. Ano mahaenay kiso i, tongalen ko kafanaˈ ci Yihofaan, mihapinang to makahiay Cingra paihkal to madimadiay a olah i sikawdan Ningra, mihaen mamasayar ko falocoˈ iso, ngaˈayho makorac ko makapahay falocoˈ, lipahak a midoko ci Yihofaan, samanen o ˈirang ni Yis ngaˈayay ‘mikorac to kihcod a raraw ita.’ (1 Yohani 1:7) Ano pakayniay kiso i cecay dangoc no niyah matoled ko falocoˈ, haratengen tada makahiay ci Yihofa misodod to soˈliˈlinay pasasiyor a tamdaw. Sinanoten mansanay ko sowal ni Tafiti to kalaliting no madimadiay a olah ato misododay, sanay cingra: ‘Ano hakowaay ko takaraw no kakarayan a miliyas to sera i, hatiraay ko kakahad no madimadiay a olah Ningra to mangodoay i Cingraan. Ano hakowaay ko kararaay no kawali ato kaetip i, hatiraay ko pipaliyas Ningra to raraw ita i titaanan.’​—ˈOlic 103:11, 12. w21.11 5-6 fiedac 12-​13 fatac

O malo faˈinayay a Krisciyang o kakangodoen ko fafahi. (1 Pitiro 3:7) O mikangodoay o caciharateng ato misaareteng minengneng. Mikangodo ko faˈinay to fafahi, o mamiharateng to kasenengan no fafahi, cowa ko papakidem ko saali cingranan, cowa ko papalalini to roma fafahiyan cingranan. O mahaenay palalini hano tatiih hani? O faˈinay no salikaka ci Rosa cowa ko Misawacayay Tamdaw ni Yihofa, marariday a palalini ci Rosaan to roma fafahiyan, milokesay ko sowal, midokaˈay ci Rosaan, matoleday ko falocoˈ. Sanay cingra: “Marariday kako cisasa ci Yihofaan soˈlinay misaareteng takowanan hokira, misaaliay to sapakalalok ato sahinom no tao.” O faˈinay a Krisciyang mikangodoay to fafahi, mafanaˈay cangra mihaen to demak wa patanektek to kalalaˈed to fafahi, ngaˈayho patanektek to kalalaˈed ci Yihofaan. Mikangodo ko faˈinay to fafahi, wa micerid pasowal to fafahi to tada maolahay cingranan, misaaretengay cingranan, mipakahemekho to fafahi i ˈayaw no tao. w21.07 22 fiedac 7-8 fatac

Ano mihaiay ko widang tisowanan pafeli to misaalian iso a dafong, ano eca ka itini misaˈosian a tatokian a ira, wa matoled kiso han? Kawra, ano mafanaˈay kiso iraay ko matatodongay a lalangian no widang eca pitoor to toki, wa makahi kiso mihadidi mitala. Itini Taneng 13:11 pasowalay kitanan hano pairaen ko mihadidiay. Sanay ko sinael: ‘O ranikayay malifok a dafong, ranikayay a maˈesal; o palidlid sanay mahoped a dafong wa padotoc a matongal.’ Mikitini toniya sinael mananam ita ko manan hani? Mihadidi kita a dademak, ano palidlid han ko demak, mihaen wa ira ko sangaˈayay a minaroˈan. Itini Taneng 4:​18 sanay: ‘O lalan no moecelay tamdaw malecaday o taengad to papacem, taengad taengaday a matedi tangasa i kalahokan.’ Ihkalay mitadtad koniya sinael, ci Yihofa wa palidlid saan a paihkal to araaw i finawlan no Niyah. Roma i, oniya sinael pahapinangay kitanan, ano sakacakataw ko cecay Krisciyang, matongal ko piingid ci Yihofaan, cowa ka ngaˈay macaloh, misaaliay to toki. w21.08 8 fiedac 1, 3-4 fatac

Itini ˈayaw no hererekan romiˈad, adihayayho ko hatayal ita. (Matay 24:14; Luka 10:2; 1 Pitiro 5:2) Makalimay kita misarocod a matayal saki Yihofaan. ˈAlomanay tamdaw mitanamay tano caka lecad a pakayraan mitongal to tayal saki Yihofaan. Roma tamdaw misakafahay, roma itiniay Pitil matayal anca mirienang to patirengay a tayal. Roma i, misaˈicelay ko faˈinayan salikaka, malaˈosi ko patosokan malo dama sikawdan anca malohemay malitengay. (1 Timoti 3:​1, 8) Maˈaraw ni Yihofa makahi a patafang to niyah ko finawlan Ningra, maedeng o mamahemek! (ˈOlic 110:3) Kawra, pakayniay kiso eca ka laˈosi ko patosokan a matoled han? Ano mahaenay i, itini satolon pasowalen ci Yihofa to nafalocoˈan iso. (ˈOlic 37:​5-7) Ngaˈayay licayen iso ko matenesay a salikaka, minengneng o maanan ko sasalofen iso a macakat, dotoc misarocod a mitoor to sapaini a midemak. Mihaen, o mamalaˈosito ko patosokan iso alatek. w21.08 20 fiedac 1 fatac; 21 fiedac 4 fatac

O fafahiyan a pairasolay ci Anna o maponengay cingra 84 ko mihecaan, ‘caay pisawad tayra fangcalay sefi,’ malecad o picerid ita mirienang to saˈopo anini. Mansa palifonen ni Yihofa cingra, paˈaraw cingranan to hofoc hananayho a Yisan. (Luka 2:​36-​38) Anini a lintad, ˈalomanay matoˈasay salikaka madimadiay a midoko ci Yihofaan, patirengay to ngaˈayay taˈarawan no kaemangay salikaka. Ano licayen ita to tayal nangra saki Yihofaan a kahemekan nalifetan i saˈayaw, hanaca mihadidi a mitengil, wa adihay ko malifokay a epoc. Pakaynien ci Yihofaan ato likakawa Ningra, kalimlaan ko matoˈasay a salikaka. Pakaˈaraway cangra samanay ci Yihofa palemed toniya likakawa Ningra ato cangranan, mikitiniayho isaˈayaw a raraw minanam to adihayay kalimlaan a sapasifanaˈ. O mahaenay a salikaka malecaday ‘o nemnem no taneng,’ o mamisongilaˈ kita minanam cangranan. (Taneng 18:4) Ano talaˈayaw kiso a mafanaˈ cangranan, wa patongal a paˈicel to pakasoˈlin no niyah. w21.09 3 fiedac 4 fatac; 4 fiedac 7-8 fatac; 5 fiedac 11, 13 fatac

Matongalay ko ˈaloman no midokoay ci Yihofaan a tamdaw, malecad o ‘odoˈ ’ cangra. O inaneng nangra malecaday o misowalan ni Isaya ‘o hacol no kasakitakit,’ tada ciepocay to likakawa no Kawas. (Isaya 60:​5, 16) Itini sadama nangra, o ngaˈayay lihaf mapatenakayto i 240 kasakitakit ato kasakilac, o mitepangan a cudad o sasowalen mataˈlifayto ko 1,000 masasiroma. Itini salikoray a ˈawaled, mingerngeray to kasakitakit a tayal pacieciay to tamdaw misaˈosi: Wa midama to Hongti Kitakit no Kawas? Anca mitadiˈec to sifo no hekal? O sasiˈayawen no kahacecay tamdaw a papiliˈen konini. Soˈlin midofdofay ko finawlan ni Yihofa to rikec no sifo, kawra itini mirikecay a demak masongilaˈay ko pitafo nangra to misatenokay. (Loma 13:​1-7) Mafanaˈay cangra, edengan ko Hongti Kitakit no Kawas ko ngangaˈay misaysay to kihcod a pasangaray no tamdaw, oniya Hongti Kitakit o cowa ko nonini a hekal.​—Yohani 18:36, 37. w21.09 17-​18 fiedac 13-​14 fatac

Ano miliyas ko paro no lomaˈ ci Yihofaan, padotoc kiso patanektek to pakasoˈlin no niyah ato paro no lomaˈ, kalimlaan mihaen to demak. Wa samaan ko pidemak iso hani? Micerid miasip ato midotim to lalakaw no Fangcalay Cudad, miceridho mirienang to saˈopo, mihaen o papafelien ni Yihofa kiso to ˈicel. O wama ato fafahiyan kaka ni Ciyawanna miliyasay to soˈlinay kimad, sanay cingra: “Ano maˈosi ako ko nalifetan ni Apikail, Istir, Yopu, Yosif aci Yis i Fangcalay Cudad i, rihadayayto ko falocoˈ ako. O ngaˈayay a taˈarawan nangra padamaay takowanan tawlik ko harateng, cowato pakidem ko kasomad ako.” Soˈlin tada misemsemay ko falocoˈ iso, aka paselaˈ mitolon i Cingranan. Cangacangen ko sidaˈitay a Kawas padama tisowanan tano harateng Ningra minengneng to demak, ngitangiten Cingra “pahapinang tisowanan to demak, pasifanaˈ tisowanan to rarakaten a lalan.” (ˈOlic 32:​6-8) Manaokaniw, pasowal to soˈliˈlinay a harateng iso tada pakarorayay to falocoˈ iso alatek. Kawra tada cipinangay ci Yihofa to nafalocoˈan iso, pakalalokay tisowanan mifowah to nafalocoˈan a harateng i Cingranan.​—Kasadakan 34:6; ˈOlic 62:​7. w21.09 28 fiedac 9-​10 fatac

Itini Kongyen 32 miheca ikor no Pitaˈlifan a Lisin, tarokos ci Pitiro, Yakop aci Yohani maˈaraway ko kasapaan a mapolosi. Itini ˈakawangay a lotok, itiniay i cecay pala no Hirmon a lotok, mafalicay ko tireng ni Yis i kaˈayaw nangra, ‘mato cidal a maˈdil ko pising ningra, mato likat a tomeliˈ ko rikoˈ ningra.’ (Matay 17:​1-4) Matengilay no tarokos ko sowal no Kawas: ‘O wawa Ako konini, o kaolahan Ako, o mihaydaan Ako. Ka pidofdof kamo cingranan.’ Hakelong no kaˈorip no tarokos soˈlinay mihaen ko demak, makalimay kita mitodong to taˈarawan nangra. Tada miakoˈiday kita pakaynien ni Yihofa i ‘fafongohan no kasakopang’ ci Yis Kristo mikayat kitaanan. (Ifiso 5:​23) Nanay malecad kita to tarokos ci Pitiroan, ci Yakop aci Yohanian, misetek to falocoˈ hakelong no kaˈorip midofdof ci Yisan. Misaˈicel kita mihaen to demak, adihay ko mamalifok a sapalemed anini, noikor iraho ko awaay ko tolas a sapalemed. w21.12 22 fiedac 1 fatac; 27 fiedac 19 fatac

Korinto a kasakopang o cecay tamdaw madadiˈiyay to fafahi no wama, palimoˈotan ni Pawlo cangra mifalah toniya tamdaw, samanen o tatiihay a demak noniya tamdaw mifiyoray to romaroma tamdaw i kasakopang, harateng no roma tamdaw cowa ka pakidem ko raraw noniya tamdaw sanay. (1 Korinto 5:​1, 2, 13) Ikorto, mafanaˈ ci Pawlo taˈangayay ko kafalic noniya mararaway a tamdaw, soˈliˈlinay a pasasiyor. Pasowalan ni Pawlo ko malohemay malitengay: ‘Kifalocoˈen namo a misodod cingra, hinomen cingra.’ Misamanay hani? Sanay ci Pawlo: ‘Hoeca pakidem ko kasomad ningra, cato piliyaw a talifak.’ Siniˈadaay ci Pawlo toniya pasasiyoray a tamdaw, eca ka ciharateng pakidem ko kasomad ningra, hawad sato a micangacang to sasodod ni Yihofa. (2 Korinto 2:​5-8, 11) O malohemay malitengay malecaday ci Yihofaan makalimay paihkal to siniˈadaay i mararaway tamdaw, ano ira ko lalangian, misarocoday cangra mihaen to demak. Kawra ano kalimlaan i, o tatanektek cangra a midemak to sapirikec, ano eca i, o pakiyadiay to tatiihay a demak. w21.10 11-​12 fiedac 12-​15 fatac

Ano pakararawen no tamdaw ato soˈlinay a dokaˈ malecaday sanay ko piharateng, o roma cowa ka samaan, o roma i pakidemay. Tinakoen, ano mifohat kita to tikami i, caka pinaˈon makeritay ko tarodoˈ, soˈlin adadaay, kawra ikor no tosa romiˈad, icowaay koya dokaˈ caayto ka harateng ita alatek. Malecaday, o macadaay ita a pipakararaw cowa ka samaan, tinakoen cowa ko padetengan no tao a sowal ato midemakan mimingay ko pidokaˈ kitaanan, kahnayay kita misodod cangranan. Roma pakayraan i, ano tangongol ko pidokaˈ, misaaliay to tatapiden ato tatafoen. Ano tatefing han ita kora dokaˈ, mamatongal kora dokaˈ. Kaadayayan i, o roma tamdaw micada to pakidemay a pakararaw i, haharateng sanay to hakowaay ko kasomad no niyah, hakowaay ko taˈangay no dokaˈ. Mihaen ko demak nangra malecaday o mitatefingay tora dokaˈ, o mamitongal to roray no niyah. Soˈlinay i, ano tooren ko aniniay a sinael a midemak coko aikaka ko kangaˈay han? w21.12 12 fiedac 15 fatac

Ano miharateng ko cecay malohemay malitengay o caˈedong no cecay Krisciyang cowa kangaˈay, ngaˈay cingra isalakat milicay to niyah: “Soˈlinay ira ko lalangian no Fangcalay Cudad a mihadak kako to sapalimoˈot han?” Sakacipinangaw tonini, ngaˈayay licayen ningra ko sapaini no roma malohemay malitengay anca matenesay a Krisciyang, malacafay miharateng to mihadakan ni Pawlo pakayni caˈedong a sapalimoˈot. (1 Timoti 2:​9, 10) Cowa pihadak ci Pawlo to adihayay a saˈosi, ao mitadtaday to pina taˈangayay a safalod, tinakoen o caˈedong no Krisciyang ‘kasanengseng ko nika cirikoˈ, paihkal to matatodongay a harateng.’ Cipinangay cingra ano cowa pisafelit to safalod no Fangcalay Cudad, o ngangaˈay ko Krisciyang mitoor to kaolahan no niyah a mipiliˈ. Papahecaden ko pinengneng no malohemay malitengay. Haharatengen, soˈlin o matenesay a Krisciyang tatosa, o mipiliˈan nangra cowa ka lecad alatek, kawra sakoniya sowal o matatodongay ko cecay, o mararaway ko cecay cowa ka saan. Cowa ka ngaˈay kita pacieci to tao micada to patirengan no niyah a palinian. w22.02 16 fiedac 9-​10 fatac

Adihayay ko lalangian ita masasi paihkal to madimadiay a olah. Nengnengen ko Fangcalay Cudad i Taneng samanay ko sowal: ‘Aka paliyasen ko madimadiay a olah ato soˈlinay a demak tisowanan. . . . Mihaen, o kaolahan no Kawas ato tamdaw kiso, mahapinang to masongilaˈay ko kacipinang iso to demak.’ ‘Iraay ko madimadiay a olah a tamdaw o sakaciepoc no niyah.’ ‘O cima micangacangay to moecelay ato madimadiay a olah, mamilifok to ˈorip.’ (Taneng 3:​3, 4; 11:17, ato roma pihongyak.; 21:21) Onini a sinael padamaay kitanan minanam to tolo lalangian paihkal to madimadiay a olah. Saka cecay, o mamalo kalimlaan a tamdaw kita i pinengneng ni Yihofa. Saka tosa, o mamilifok ko niyah to epoc, tinakoen patireng to midaˈocay kalawidang to tao. Saka tolo, noikor mamilifok kita to adihayay a sapalemed, mahawpay ko midaˈocay a ˈorip. Soˈlinay iraay ko lalangian ita midofdof to limoˈot ni Yihofa, sanay Cingra: ‘Pairaen namo ko madimadiay a olah ato siniˈadaay falocoˈ a macacada.’​—Cikariya 7:9. w21.11 8 fiedac 1-2 fatac

O masiˈayaway iso i salakat ato aniniay a sapalifet ano mahapinangay iso cangoˈotay ko pakasoˈlin no niyah, aka matoled, o ngaˈayay a toki patanektek to pakasoˈlin han ko pinengneng. Mikifalocoˈ a mitolon ci Yihofaan, mangalef tahalifa to katalawan a tatokian, mihapinangho pakaynian ni Yihofa i paro no lomaˈ ato widang padama kitaanan. Mitadiˈec kita to sapadama ni Yihofa malaˈosi ko pilakowit to sapalifet anini, matongal ko pakasoˈlin, noikor ano maananto ko mifekaday a demak o papadama ci Yihofa kitaanan. Soˈlin padamaan ni Yis ko nisawawaan mihapinang itini maanan a pakayraan cangoˈotay to pakasoˈlin, kawra mafanaˈay cingra wa ngaˈay ko nisawawaan mitadiˈec to sapadama ni Yihofa malaˈosi ko pisiˈayaw to sapalifet, cowa ka cisasa cingra tonini. (Yohani 14:1; 16:33) Pakasoˈlinay ci Yis, noikor wa ira ko taˈangayay ˈopo tamdaw iraay ko tanektek a pakasoˈlin milakowit to taˈangayay a padiing. (Paˈarawan 7:​9, 14) O masalalomaˈay kiso han? Ano mameten iso ko kahacecay toki patanektek to pakasoˈlin, noikor o mamilakowit to taˈangayay a padiing!​—Hipray 10:39. w21.11 25 fiedac 18-​19 fatac

Cowa ko mamilongoc kita midemak ci Yihofa to kafahkaˈan a midipot kitaanan nohatini, kawra mafanaˈay kita o mitadiˈecay ci Yihofaan a tamdaw soˈlin mapatay nohatini, o mamilifok to midaˈocay ˈorip noikor. Cato ka halafin noikor, o pakasoˈlin ita to Kawas mamicada to pakidemay a sapalifet. O Makok a Kok (o makomoday a kalo kitakit) mamiˈodis to finawlan no Kawas. Itiya, iraay ko katalawan no ˈorip wa saan kita miharateng alatek, kawra pakasoˈlinen ita iraay ko ˈicel no Kawas hanaca o mamilidong kitaanan. Itini pinengneng no kalo kitakit, malecaday kita o awaay ko midipotay a lopayˈay siri. (Icikil 38:10-​12) Awaay ko sapilood a lalosidan, cowa ka fanaˈ milood, harateng no kalo kitakit sapilowidaw kitaanan o madoloay saan. Cowa pakasoˈlin cangra to Kawas, cowa pakahapinang itiniay i tatihi ita ko coyoh pakopang, misadayay a midipot kitaanan, mihaenay ano mihadak to kamay ko coyoh a milidong kitaanan i, tataˈangay ko kacekid nangra.​—Paˈarawan 19:11, 14, 15. w22.01 6 fiedac 12-​13 fatac

Polong a salikaka sahtoay o kalimlaan sanay ci Yihofa, o mamihaen ko pinengneng ita cangranan. O mamisarocod kita a ciharateng ato midipot to salikaka. Ano mafanaˈ kita midokaˈay ko niyah anca pakararaway to cecay tamdaw, aka talimaan saan ko harateng, cowa ka ngaˈay miharateng to hinaketeray ko tao, o raremoen ningra a dangoc konini saan. Hano madokaˈay saan ko harateng no roma tamdaw hani? Roma tamdaw pakayniay kalomahadan, a madolo matoled ko harateng. Roma tamdaw cowaho ka halafin mafanaˈ to soˈlinay kimad, cowaho pinanam to sasamaan misodod to tao. Ano samaanto, wa misarocod kita a misaysay to pasangaray. Roma i, ano marariday pakararawen no tao ko niyah saan miharateng, o mamihai to o sasalofen no niyah a dangoc konini. O mamihaen cingra to demak, ngaˈ rihaday ko falocoˈ, ngaˈayho malakangaˈay to salikaka. w21.06 21 fiedac 7 fatac

Tada siniˈadaay ci Yis kitaanan. Ano macariraw eca ka rihaday kita i, ano ira ko mafanaˈay to harateng ita a widang i tatihi, maedeng o mamahemek kita. Onini a widang ano tahalifaay to malecaday a sapalifet, o ngangaˈay to malifok ita ko sahinom. O mahaenay a widang ci Yis. Ihkalay ko kafanaˈ ningra ano malonay anca misaali to sapadama o masamaanay a nafalocoˈan, cipinangayho cingra to iraay ko maanan a dangoc ita, o aitini ‘pisaalian ita to sapadama a tatokian’ padama kitaanan. (Hipray 4:​15,16) Itini ci Yis i Kisimani i, micadaay to sapadama no coyoh, malecaday cacadaen ita ko sapadama ni Yihofa kitaanan. Ano pakaynianto i cudad, ika, kimad, anca malohemay malitengay ato matenesay a widang padama kitaanan, o mamakahi kita a micada. (Luka 22:39-​44) Papafeli ci Yihofa to rihaday tisowanan. Ano mitolon kita i, ‘papafeli ko Kawas to mataˈlifay no maharatengay no tamdaw a rihaday,’ patanektek kitaanan.​—Filipi 4:​6, 7. w22.01 18-​19 fiedac 17-​19 fatac

O pakayraan ni Yihofa a dademak o sangaˈayay, kawra sapakasoˈlinaw to minilnilan Ningra a tamdaw cowato ka dolo alatek. Saan kita miharateng: “O mikeriday a salikaka i likakawa ano misaˈosi i, midoedoay to sakayat ni Yihofa, anca tano niyah sanay a harateng ko pidemak han?” Haratengen, pakasoˈlinay ci Yihofa to minilnilan Ningra a tamdaw, ano eca pakasoˈlin kita to mikeriday a salikaka, cowato ka ngaˈay pasowal to pakasoˈlinay ko niyah ci Yihofaan. Anini itini fafekang no sera minilnilan ni Yihofa ko ‘madimadiay citanengay a koli’ mikayat to likakawa Ningra. (Matay 24:45) O madimadiay citanengay a koli ciˈinorongay mikayat to finawlan no Kawas, hanaca pafeli to sakayat to malohemay malitengay i kasakopang, malecad o demak no malohemay malitengay no saka 1 hahekalan. Itini kasakopang, o malohemay malitengay midoedoay tonini a sakayat midemak. Ano midofdof kita to sakayat no mikitiniay likakawa ato malohemay malitengay, paihkalay to pakasoˈlinay kita to pakayraan ni Yihofa a dademak. w22.02 4 fiedac 7-8 fatac

Malo Misawacayay Tamdaw ni Yihofa, tada lipahakay kita, malikoay. Ano ngaˈay kita padama to ‘iraay ko matatodongay waywayan ngaˈay milifok to midaˈocay ˈorip a tamdaw’ malo Krisciyang, maedeng o lalipahak kita. (Dmak 13:48) Kinacecayay, pasowalan no nisawawaan ni Yis cingra ngaˈayay ko minaroˈan a mitosil, itiya ‘tada lipahakay’ ci Yis, malecaday ko harateng ita ci Yisan. (Luka 10:​1, 17, 21) Pakalalokan no tarokos ci Pawlo ci Timoti saan: ‘Ka pisinanot kiso to niyah ato sapasifanaˈ no niyah, mihaen to demak wa ngaˈay milidong to niyah, ngaˈayho milidong to mitengilay tisowanan a tamdaw.’ (1 Timoti 4:​16) Mihaenay, o mitosilay a tayal ita milingatay to sakaˈorip ato sakapatay. Malo finawlan no Hongti Kitakit no Kawas, o mamicerid kita misinanot to niyah, makalim palecad to mitenakan ita a ngaˈayay lihaf ko waywayan no niyah, ngaˈayho pakahemek ci Yihofaan. (Filipi 1:​27) O mamisinanot kita to sapasifanaˈ no niyah, itini ˈayaw no mitosil songilaˈen ko pisaday ato micangacang ci Yihofaan padama kitaanan. w21.10 24 fiedac 1-2 fatac

‘O faelohay a capeling’ o pakayraan a misimsim ato midemak, ngaˈay paihkal to capeling ni Yihofa. O cecay a tamdaw piharateng no niyah, nafalocoˈan ato pidemak makayat no fangcalay saocor, paihkal to minaroˈan no fangcalay saocor a capeling, o micaˈedongayto to faelohay a capeling. Tinakoen, maolahay cingra ci Yihofaan, maolahho to romaroma midokoay ci Yihofaan a tamdaw. (Matay 22:36-​39) Tahalifa to sapalifet ato pasangaray i, padadotocay cingra a lipahak. (Yakop 1:​2-4) Micowatay cingra to rihaday. (Matay 5:9) Micada to tao i, pairaay cingra to mihadidiay ato sidaˈitay. (Kolosay 3:​13) Maolahay cingra to ngaˈayay, micerid midemak to ngaˈayay. (Luka 6:​35) Pakasoˈlin ningra to kakarayan a Wama, iraayho ko mahecaday a demak. (Yakop 2:​18) Ano ira ko pakangolaway cingranan a tamdaw, padadotocay cingra a damsay. Ano makayhid i, paihkalay cingra to miˈimeray. (1 Korinto 9:​25, 27; Titus 3:2) Sapicaˈedongaw to faelohay a capeling, o papalahad kita to masowalay i Kalatiya 5:​22, 23 ato masowalay no roma sinael a polong makapahay a capeling. w22.03 8-9 fiedac 3-4 fatac

Ngaˈayay todongen no malohemay malitengay ko tarokos ci Pawlo, cowa ko pakalomalomaˈ aca mitosil, maharekho misaday micerid mitosil to tamdaw. (Ifiso 6:​14, 15) Tinakoen, malecad ci Pawloan, ngaˈayay sakadademaken no malohemay malitengay ko pitosilan a tatokian pahatatanam to dama sikawdan ato romaroma a salikaka. (1 Pitiro 5:​1, 2) O malohemay malitengay caka ngaˈay pakidem ko ˈifowa to tayal no likakawa no Kawas, awato ko toki a mitosil. (Matay 28:19, 20) Sapidimokosaw to caka lecad a ˈinorong, latekay o maminaˈay cangra to mahaenay a tayal. Ikor no mitolon ato misongilaˈ a misimsim mamahapinang nangra alatek, ano micada to cecay a tayal, wa awato ko pakayraan midemak to kalimlaan a demak, tinakoen fanekfek a mitosil, pahatatanam to wawa to mitosilay a tayal anca misikay to pakalomaˈay pidoko. Ngaˈay cangra rihaday ko falocoˈ, mafanaˈay ci Yihofa minaˈay cangra to katayalan a toki pakayniay sapidimokosaw to cowa ka lecad a ˈinorong. w22.03 27 fiedac 4, 7, 8 fatac

Maharatengayho iso ˈayaw no micada ko niyah to paputisem, o nafalocoˈan to mamalo Misawacayay Tamdaw ni Yihofa han? Matalaway kiso itiya han? Harateng iso cato ka ngaˈay pakalomalomaˈan ko niyah mitosil, anca matalaw to pisafelit no paro no lomaˈ ato widang tisowanan. Ano mahaenay i, ira ko mahaenay a nafalocoˈan no pacekiwan i, o papahecad ko nafalocoˈan iso. Mafanaˈay ci Yis wa ira ko hatiniay a sasa no roma tamdaw, kawra kamayan palimoˈoten ningra ko nisawawaan aka pakayni kakokiˈ a misawad midoko ci Yihofaan. (Matay 10:16, 17, 27) Palidlid han pahatatanam ko pacekiwan pasayra i tamdaw mitosil. Tiya corcoren ni Yis ko nisawawaan malingad mitosil i, marawraway cangra alatek. Kawra pasowalan ni Yis cangra pasayra cimaanan a mitosil, ato o maanan ko hasowal, padamaay cangranan miremo to makokiˈay. (Matay 10:​5-7) Wa ngaˈay kiso samaan a minanam ci Yisan hani? Padamaen ko pacekiwan mihapinang o cima ko tatosilen ningra. Tinakoen, papiharatengen ko pacekiwan, o cecay kimad no Fangcalay Cudad itini kafanaˈan ningra cima ko matatodongay padamaen, dotoc pasifanaˈan ko pacekiwan tano kantangay a pakayraan paladaˈ i tamdaw toniya soˈlinay kimad. w21.06 6 fiedac 15-​16 fatac

“Lalomaˈ no pina ehon, matelepayto ko pisasingdian a lomaˈ ato matelangay lomaˈ.” “Sasifod sanay ko tamdaw. . . . Sowal no ˈalomanay maedeng tosaay ehon ko ˈatoray, kawra halafinan nanay ko piharateng ako.” O nafalocoˈan no cowa ka patay a tamdaw i taˈangayay ˈatoray i 2015 miheca Nipoe konini. Soˈlinayto, tahalifaay kita to cecay kangernger, mafiyoray ko polong a kitakit. Sanay ko sowal no pairasolay ci Hakay: ‘O ˈaˈideman no sofitay i kakarayan ci Yihofa sanay: “Cato ka halafin, wa liyawen Ako mingernger ko kakarayan ato sera, o riyar ato hadhad. ” ’ (Hakay 2:6) Pairaay to sakapalak ko ˈatoray, kawra o paliˈayawan ni Hakay a kangernger pairaay to ngaˈayay minaroˈan. Pasowalay ci Yihofa tonini, sanay Cingra: ‘Wa ngerngeren Ako ko kasakitakit, o papataynien i fangcalay sefi ko odoˈ no kasakitakit, wa patomesen Ako to ˈdil itini.’ w21.09 14 fiedac 1-3 fatac

Ano sapatirengaw to kalawidang ato tao, wa mararid mikifalocoˈ masasowal. Malecaday to kalawidang ita aci Yihofaan. Itini satolon ita pasowal ci Yihofaan to harateng no mita, nafalocoˈan ato kaciharatengan a demak, o paihkalay to mitadiˈecay kita Cingranan, mafanaˈho to maolahay Cingra kitaanan. (ˈOlic 94:17-​19; 1 Yohani 5:​14, 15) Kalacafay to madimadiay widang macacawmaˈ, o sapafeli ni Yihofa kitaanan a sapatelong cangra. (Yakop 1:​17) O kakarayan Wama pafeliay kitanan to ˈalomanay ‘marariday paihkal to olah’ a salikaka, paihkalay to tada ciharatengay Cingra kitanan o kahacecay tamdaw. (Taneng 17:17) Masowalay no tarokos ci Pawlo i Kolosay, roma Krisciyang padadotocay midama cingranan, pafeli cingranan to ‘taˈangayay a sahinom.’ (Kolosay 4:​10, 11) Ano ci Yisto misaaliay to sadama no widang, hanaca tada miakoˈiday cingra to padamaay cingranan a tamdaw ato coyoh. (Luka 22:43) Pasowal to cecay matenesay a widang to cariraw no mita, cowa ko malonayay a waywayan, ao sadipot konini. w21.04 24-​25 fiedac 14-​16 fatac

O sasowalen ato waywayan no cecay faˈinayan anca fafahiyan salikaka pakasomaday tisowanan, sasamaanto kiso hani? Sarocoden a micowat ko rihadayay. Fanekfek a mitolon, mingitangit ci Yihofaan palemed toya pakararaway tisowanan a tamdaw, hanaca padama tisowanan mihapinang to kangaˈayan ningra. Maolahay ci Yihofa cingranan, samanen maˈaraway koniya ngaˈayay. (Luka 6:​28) Ano kamayan pasangar kiso a misodod cingranan, miharateng to sasamaan a masasowal cingranan. Aka misaˈosi to padetengay cingra a midokaˈ tisowanan. (Matay 5:​23, 24) Ano masasowal kiso cingranan i, pakasoˈlinen to awaay ko tatiihay harateng ningra. Ano eca kakahi cingra malakangaˈay tisowanan, sasamaanto hani? Ka paihkal to mihadidiay cingranan, padadotoc a misodod cingranan. (Kolosay 3:​13) Sakakaay i aka ˈinteh ko falocoˈ, samanen mihaen ko demak o mamipalak to kalawidang iso aci Yihofaan. Aka a pakayni i tamdaw anca romaroma a demak a mapolin. Mihaen, wa ngaˈay kiso misawacay sakakaay kaolahan iso o Kawas ci Yihofa.​—ˈOlic 119:165. w21.06 23-24 fiedac 15 fatac