Saka 9 Folad

Soˈlin tadamaanay ko sapasifanaˈ ni Yis, kawra cangoˈotayho sanay ko roma tamdaw. Pakayni ka eca pitoor to saali nangra a midemak to kafahkaˈan, hato caayto pakasoˈlin cangra cingranan. (Matay 16:4) Samaanay ko sowal no Fangcalay Cudad? Pakayni ci Misiyaan, sanay ko sowal no pairasolay ci Isaya: “Caay pilekal, caay pisatataˈang to ngihaˈ, caay picaceliˈ a pasowal i lalalalan cingra.” (Isaya 42:​1, 2) Dademak ci Yis cowa ka pisatataˈang to ngihaˈ. Cowa patireng cingra to makapahay a lomaˈ, cowa ka picaˈedong to mikiriwiˈay a rikoˈ no pidoyongan, anca misaali to tao tano mikiriwiˈay a ngangan pangangan cingranan. Soˈlin misiˈayaw to sakapatay a sasawkit, sapisangaˈayaw ci Hirotian cowa ka pidemak ci Yis to kafahkaˈan a demak. (Luka 23:​8-​11) Soˈlinay midemak ci Yis to kafahkaˈan a demak, kawra o misaaretengan ningra i, o pilasil to ngaˈayay lihaf. Pasowal cingra to nisawawaan sanay: ‘Onini ko araaw ako a tayni.’​—Marko 1:​38. w21.05 4 fiedac 9-​10 fatac

Mikilimay kita toya ‘iraay ko matatodongay a waywayan ngaˈayay milifok to midaˈocay ˈorip a tamdaw.’ (Dmak 13:48) Sapadamaaw toniya tamdaw malo Krisciyang, o papadamaen ita cangra (1) cipinang, (2) micada, (3) misaka dademak to mananamay a kimad no Fangcalay Cudad. (Kolosay 2:​6, 7; 1 Tisalonika 2:​13) O polong a tamdaw no kasakopang wa ngaˈay paihkal to olah i pacekiwan, mirienang cangra to saˈopo i, mahemek militemoh cangranan, patireng to ngaˈayay taˈarawan nangra. (Yohani 13:35) Roma i, wa mihadak ko singsi to adihayay toki ato ˈicel padama to pacekiwan, mifalic to ‘cilamitay’ a harateng ato nanaman. (2 Korinto 10:​4, 5) Sapikayataw to pacekiwan micada to paputisem, wa pina folad ko mamapalak a toki alatek. Kawra oniya pisaˈicel iraay ko epoc. w21.07 3 fiedac 6 fatac

Malo Misawacayay Tamdaw ni Yihofa, pakasoˈlinay kita to o soˈlinay kimad ko sapasifanaˈ no niyah i tamdaw han? Pakasoˈlinay kita to mihaydaan ni Yihofa ko pakayraan no niyah a midoko Cingranan han? Sasamaan kita a pakasoˈlin toniya tosa a demak hani? Tanektekay ko pakasoˈlin no tarokos ci Pawlo to soˈlinay kimad. (1 Tisalonika 1:5) O mahaenay a pakasoˈlin cowa ko patelasay. Misongilaˈay cingra micekiw to sowal no Kawas, pakasoˈlin to ‘mikayatan no Kawas ko tamdaw mitilid to polong a Fangcalay Cudad.’ (2 Timoti 3:​16) Mikitini Fangcalay Cudad mananamay ni Pawlo ko maanan hani? Makilimay ningra ko soˈlinay a wacay, misawacay to o mikiˈokan no Kawas a Misiya ci Yis, oniya wacay o padetengan no ˈaˈideman no Yutaya a mipawan. Onini a makaniway ˈaˈideman no pihakelongan mitaypiyaway ko niyah to Kawas sanay ko sowal, kawra midemakay to kaˈintelan no Kawas a demak. (Titus 1:​16) Cowa ka lecad ci Pawlo cangranan, o Sowal no Kawas ko sapasifanaˈ ningra to tao, misaka dademakay ko niyah, eca ko kaolahan aca no niyah a Sowal no Kawas ko pakasoˈlinan.​—Dmak 20:27. w21.10 18 fiedac 1-2 fatac

Wa misaˈicel kita a paloma ato micefos to nanom, kawra aka mapawan o Kawas ko palahaday. (1 Korinto 3:​6, 7) Itini pinengneng ni Yihofa, sahtoay o kalimlaan ko ˈorip no tamdaw. ˈAyaw no ira ko hererekan, palacafayan no Kawas kita to wawa Ningra a matayal, misaˈopo to kasafinawlan, tada o kalikoan ita konini. (Hakay 2:7) O mitosilay a tayal malecaday to milidongay a demak, o kapot no milidongay kita, miocoran milidong to itiniay pisikitangan a tamdaw. O malidongay a tamdaw cowa ka ˈaloman alatek, kawra o mihadakan no milidongay a ˈicel iraay ko epoc. Malecaday, o tayal no kahacecay a mitosilay sahtoay o kalimlaan. Soˈlin cowa kafanaˈ kita hahakowa ko malidongay tamdaw nai hekal ni Satan, kawra ngaˈayay sakadademaken ni Yihofa ko kahacecay tamdaw a padama cangranan. Itiniay i Polifia ci Anteliyase sanay: “Mahapinangay ako, ano cimato ko mafanaˈ to kimad, patafang to tireng micada to paputisem, sahtoay o minaroˈan no ˈalomanay tamdaw.” Nanay ira ko mahaenay tawlikay waywayan ita to mitosilay a tayal. Mihaen, o papalemeden ni Yihofa kita, wa ngaˈay kita mikitini mitosilay tayal milifok to soˈlinay a lipahak! w21.05 18-19 fiedac 19-​20 fatac

O patosokan no miˈadopay o sapilepelaw anca mipatay to ˈaˈadopen. Mitelian ningra ko masakenaay a talakal, oniya talakal masowalay no Fangcalay Cudad. (Yopu 18:​8-​10) Samanay ko miˈadopay mikayhid to ˈaˈadopen makefeng i talakal hani? Misongilaˈay ko miˈadopay mihapinang, minengneng to tatalacowa ko ˈaˈadopen, o maanan ko kaolahan, samaan madolo a makefeng i talakal. Ci Satan malecaday o miˈadopay, misongilaˈay a mihapinang kitaanan, misinanot to tatalacowa kita, o maanan ko kaolahan, dotoc miteli to talakal, itini caka harateng ita a tatokian milepel kitaanan. Kawra mikiˈokay ko Fangcalay Cudad, soˈlin makefengto kita i talakal, wa ngaˈayho a masadak milaliw. Roma i, pasifanaˈayho ko Fangcalay Cudad kitaanan, sasamaan i satapang aca miliyasto toniya talakal. O saciˈicelay a tosa talakal ni Satan, o misatakaraway ato maˈanofay. Pina caˈol mihecaan, ci Satan misaka dademakay toniya tosa waywayan milepel to ˈalomanay a tamdaw. Ci Satan malecaday milepelay to ˈayam a tamdaw, mikayhid to ˈaˈadopen makefeng i talakal. (ˈOlic 91:3) Kawra wa ngaˈay kita miliyas to talakal ni Satan. Misamanay? Samanen maharekayto pasowal ci Yihofa kitaanan, ci Satan wa tano manan a pakayraan misaˈfit.​—2 Korinto 2:​11. w21.06 14 fiedac 1-2 fatac

O matoˈasay a salikaka malecaday o odoˈ masakalimlaan, palinian no Fangcalay Cudad ko ˈofad nangra to tadamaanay a tamohong. (Taneng 20:29) Kawra, masakahmaway no tamdaw ko epoc nangra. Ano maharateng no kaemangay ko kalimlaan nangra, pasayra cangranan a minanam, wa milifok to mikikakaay to hafay a kalimlaan dafong. Itini pinengneng ni Yihofa, o matoˈasay salikaka tada kalimlaan! Mafanaˈay ci Yihofa to i kemoday falocoˈ nangra, tada masemeray to makapahay capeling nangra. Adihayay mihecaan madimadiay cangra matayal saki Yihofaan, pasifanaˈay a paladaˈ to mataringay a taneng ato nalifetan no niyah i kaemangay tamdaw, pakahemekay ci Yihofaan konini. (Yopu 12:12; Taneng 1:​1-4) Masemerayho ci Yihofa to piemem nangra. (Malaki 3:​16) O kaˈorip nangra cowa ka sahto saan o sinowayay, kawra kamayan a tanektek ko pakasoˈlin no falocoˈ nangra. Palinien to satapang a mafanaˈ to soˈlinay kimad, matongalay ko pakasoˈlin nangra to mamalaˈosi ko mitokelan nangra! ‘Soˈlin matoˈasto’ cangra padadotocay milasil to ngangan ni Yihofa, mansa tada maolah ci Yihofa cangranan.​—ˈOlic 92:12-​15. w21.09 2 fiedac 2-3 fatac

Wa micerid kita mitiyawca to araaw no falocoˈ no niyah. Ngaˈayay licayen ita ko niyah: “Mikikakaay ko demak no niyah to tao ngaˈ lipahakay kako han? Adihayay ko mihadakan ako a ˈicel, sapisawacayaw to saidahiyay ko niyah, anca mikikakaay to cecay tamdaw han? Anca harateng ako sapatafangaw to sangaˈayay no niyah ci Yihofaan hokira?” Palimoˈotay ko Fangcalay Cudad kitanan aka palalini to tao. Misamanay hani? Samanen ano saidahiyay ko niyah mikikakaay to tao saan miharateng, o mamisatakaraw, kawra ano eca pakalini to tao ko niyah saan i, wa matoled. (Loma 12:3) Haratengen, misolotan ni Yihofa kita tayra i tatihi Ningra, cowa ko pakayniay i makapahay a pising ita, mafanaˈ a caciyaw anca kaolahan no tao, ao pakayniay kaolah ita Cingranan, makahi mikotod to wawa Ningra.​—Yohani 6:​44; 1 Korinto 1:​26-​31. w21.07 14-​15 fiedac 3-4 fatac

Sapisafaelohaw to harateng, o mamitolon kita, micekiwho ato midotim to Kimad no Kawas. Cangacangen ita ci Yihofa pafeli to ˈicel kitaanan, ho ngaˈay tahacelem kita. Ira ko sapadama no fangcalay saocor, wa mananam ita ecato palalini to tao. Ano misatakaraw kita, anca misatapang a maˈinap to tao, o papadama ci Yihofa kitaanan mihapinang to pasangaray no niyah, hanaca kaliki a mifalic. (2 Rayray 6:​29, 30) Falocoˈ ita iraay ko manan a harateng, ihkalay mahapinang ni Yihofa, mafanaˈayho Cingra to misaˈicelay malaˈodot kita to waywayan no hekal ato dangoc no niyah. Maˈaraw ni Yihofa ko pisaˈicel ita, matongalay ko olah kitanan. Ci Yihofa tano olah no wina to wawa mitadtad to samanay Cingra micada kitaanan. (Isaya 49:15) Maˈaraw ni Yihofa ko mihadakan ita a ˈicel, misarocod ko falocoˈ ato harateng midoko Cingranan, mikiriwiˈayto maolah kitaanan. Mafanaˈ tonini, tada mahinomay kita! w21.07 24-​25 fiedac 17-​19 fatac

Misarocod to falocoˈ kita midemak to sapatorod a tayal, wa matongal ko lipahak a matayal. Misamacay ko harateng mirienang to mitosilay, misaˈicelho matayal saki salikaka. (Dmak 18:5; Hipray 10:24, 25) Misaday kiso to lalakaw no saˈopo, wa ngaˈay mihadak to pakalalokay to tamdaw a sapacaˈof. Misarocod a misaday to kamok i pihatatanaman. Ano mitahidang ko malohemay malitengay papidemak tisowanan, tooren ko toki milahci, malo ngaˈayay tadiˈecen a tamdaw. Aka miharateng to cowa ko kalimlaan ko roma demak, cowa ka ngaˈay mipalak to toki midemak, wa misaˈicel ko niyah pacakat to inaneng a matayal. (Taneng 22:29) Ano misamacay kiso matayal saki Yihofaan, wa matongal ko kacakat, wa matongal ko lipahak no niyah. (Kalatiya 6:4) Ano maˈaraw ko tao milifok to kaolahan iso a tayal i, patadoen cingra a mahemek.​—Kalatiya 5:​26. w21.08 22 fiedac 11 fatac

Aka pisatakaraw kita, ka pisapoener ko falocoˈ micada to sapasifanaˈ. Malecad ano ˈatekak ko olat wa mifiyor to katatemik no falocoˈ, o misatakalaway paˈatekakay to falocoˈ ita, eca ka makahi micada to sakayat ni Yihofa. Mahaenay ko Farisay a tamdaw, saˈatekak sanay ko falocoˈ eca pisikol to wacay, eca ka pihayi to o wawa no Kawas ci Yis, iraay ko fangcalay saocor no Kawas. (Yohani 12:37-​40) O hatiniay a waywayan masakatalawan, mikayatay to sakalahdaw no midaˈocay a hatokel nangra. (Matay 23:13, 33) Mahapinangay, papifalicen to capeling ita ko Kimad no Kawas ato fangcalay saocor, mikayat to harateng ato saˈosi ita, tada o masakalimlaanto! O ngaˈayay taˈarawan ci Yakop, misapoeneray ko falocoˈ ningra, mansa makahi micada to sapasifanaˈ ni Yihofa. Misapoeneray a capeling padamaay cingranan malo ngaˈayay a singsi no Fangcalay Cudad. w22.01 10 fiedac 7 fatac

Edengan padadotoc kita mitolon, wa ngaˈay pakasoˈlin wa tengilen no kakarayan Wama ko satolon ita ato pacaˈof to satolon ita. (Kolosay 4:2) Soˈlin manayaray ko caˈof no satolon ita, kawra mikiˈokay ci Yihofa, wa ‘itini pisaalian ita to sapadama a tatokian’ o papacaˈof to satolon ita. (Hipray 4:​16) Mihaenay, ano cowa ka lecad to maharatengay ita a tatokian mifekad ko demak, cowa ko ngangaˈay kita miroroh ci Yihofaan. Tinakoen, pasifanaˈay ci Yis kitaanan micangacang to kaira no Hongti Kitakit no Kawas, palaˈafo toniya ciraraway a hekal, ˈalomanay salikaka midofdofay toniya limoˈot ningra, adihayay a mihecaan padotocay pakayni toniya demak a mitolon. (Matay 6:​10) Kawra ano ira ko tamdaw pakayni ka eca kaˈaraw ko mitalaan ningra a kahererekan noniya hekal a malahdaw ko pakasoˈlinay falocoˈ i Kawas, tada o mafolaay a demak konini! (Hapakuk 2:3; Matay 24:44) O papadotoc kita a mitala ci Yihofaan, paira to pakasoˈlinay falocoˈ a mitolon Cingranan. O kahererekan wa itini matatodongay a tatokian mifekad, samanen maharekayto ci Yihofa misaˈosi to ‘romiˈad ato toki.’ Maraod ko toki wa mahapinang ita, itiya o tada matatodongay a tatokian!​—Matay 24:36; 2 Pitiro 3:​15. w21.08 10 fiedac 10-​11 fatac

Ano misapoeneray ko matoˈasay salikaka, wa mihayi to midemakan nangra cowa ka mahaen to saˈayaway a adihay. Haratengen ko aniniay a kasakilac kantok. Tahira 70 ko mihecaan nangra wa manilnil tayra i faelohay a katayalan, pakayni cangranan hatiniay a kafalic cowa ko madoloay alatek, kawra mafanaˈay cangra ano o kaemangay salikaka ko midemak wa ikaka ko kangaˈay. O paihkalan nangra a waywayan malecaday to nolitengan Lifi a tamdaw. Tahira 50 ko mihecaan no Lifi a tamdaw wa mihawad to tayal no fangcalay kopang, kawra wa itini cecay katayalan ngaˈ ira ko lipahak cowa ka saan ko harateng nangra, ao misaˈicel milahci to ngaˈayay demaken no niyah a demak, misarocod padama to kaemangay tamdaw. (Saˈosi 8:​25, 26) Malecaday, isaˈayaw malo kasakilac kantok a salikaka soˈlin cowato pilisoˈ to kasakopang, kawra kamayan cangra ngaˈay mihadak to ˈicel a padama to kitiraan a kasakopang nohatini. w21.09 8-9 fiedac 3-4 fatac

Pasowalay ci Yis to cecay pakayni malafelay wawa kasemeran a tawcikel, maˈoningay itini Luka 15:11-​32. Cecay kapah mitowakangay to wama, miliyasay to lomaˈ ‘tayra i maraayay a kitakit,’ malafoay ko kaˈorip itira. Ikorto, pasangaray ko kaˈorip ningra, misatapangay cingra misimsim to waywayan no niyah, maharatengay itiniho i lomaˈ no wama maˈorip ikakaay ko kangaˈay. Sowal ni Yis, oniya kapah ‘talipaˈelalayto,’ misaˈosiay minokay i lomaˈ no wama, micangacang to sasodod no wama to niyahan. Mafanaˈ cingra to pakidemay ko raraw no niyah kalimlaan konini, kawra o tatalaˈayaw cingra a midemak! Tano waywayan koya malafelay wawa misawacay to soˈlinay pasasiyor ko niyah. O tawcikel ni Yis cowa ko pitemer aca to tamdaw, wa ngaˈayho mananam no malohemay malitengay samaan misawkit to pakidemay ko raraw a tamdaw o soˈlinay pasasiyor hokira. w21.10 5 fiedac 14-​15 fatac

O maanan ko cowa ko mamangernger, cowa ko mamalaˈafo hani? Tarokos ci Pawlo sanay: ‘Ano mamalifok ita ko cowa ko mamangernger a Hongti Kitakit, ka padotoc . . . ira ko mikifalocoˈay a mikangodoay a falocoˈ midoko to Kawas.’ (Hipray 12:28) Hatiraayto, malaˈosito ko demak i, edengan o Hongti Kitakit no Kawas ko materek. (ˈOlic 110:​5, 6; Taniil 2:​44) Cowato ka hakowa ko toki! O kahacecay tamdaw o mamipiliˈ: Wa padotoc mitoor to pakayraan noniya hekal a maˈorip, salikor malaˈafo han? Anca mitoor to araaw no Kawas maˈorip, salikor milifok to midaˈocay a ˈorip han? (Hipray 12:25) Misaˈicel kita mitosil, wa ngaˈay padama to tao mipiliˈ toniya kalimlaan a sasaˈosien. Nanay haratengen ita ko sowal no Tapang ci Yis: ‘Oniya ngaˈayay lihaf no Hongti Kitakit wa patenaken i paro no kakarayan, matengil no polong kasafinawlan, maraod ko toki irato ko salikoray romiˈad.’​—Matay 24:14. w21.09 19 fiedac 19-​20 fatac

O malohemay malitengay, wa mikiriwiˈ kamo a mihinom to iraay ko miliyasay ci Yihofaan a paro no lomaˈ a salikaka. (1 Tisalonika 5:​14) Ngaˈay kiso itini ˈayaw ato ikor no saˈopo talaˈayaw masasowal cangranan, ciharateng cangranan, ngaˈayho milisoˈ cangranan, patado cangranan mitolon. Ngaˈayho kiso kalacafay cangranan mitosil, anca tahidangen cangra mirienang to pakalomaˈay a pidoko iso. O lopayˈay a siri ni Yihofa tahalifa to taˈangayay a pidokaˈ, o pakaenay tamdaw no kasakopang wa misongilaˈ a midimokos cangranan, pafeli to siniˈadaay, olah ato kaciharateng i cangranan. (1 Tisalonika 2:​7, 8) Ci Yihofa ‘caay ciharateng malaˈafo ko cecay tamdaw, makalimay pasasiyor ko kahacecay tamdaw.’ (2 Pitiro 3:9) Soˈlin pakidem ko raraw no cecay tamdaw, pakaynien ci Yihofaan kamayan kalimlaan ko ˈorip ningra. Haratengen, sapilidongaw to ciraraway tamdaw hakowaay ko mihadakan ni Yihofa a sapiˈaca, oniya sapiˈaca o ˈorip no kaolahan Ningra a wawa. Matomesay to olah ci Yihofa, misaˈicelay padama to miliyasay Cingranan a tamdaw patikol i tatihi Ningra, makalimayho makahi cangra mihaen to demak, mikitini misowalan ni Yis malafelay wawa a sapatinako mahapinangay konini.​—Luka 15:11-​32. w21.09 30-​31 fiedac 17-​19 fatac

Pakayniay i kalonay ato adada no tireng, cangoˈotayto ko ˈicel iso itini mitosilay a pasifanaˈ to tamdaw han? Soˈlin mahaen, wa ngaˈayho kiso mihadak to ˈicel mirienang to mipanayay a tayal, pakayni ko kalipahak. Haratengen ko nalifetan ni Tafiti ato sikawdan ningra. Kinacecayay, miˈafasan no Amalik tamdaw ko paro no lomaˈ ato dafong nangra. Oya 200 a sofitay ni Tafiti tada malotayay, caay kangaˈay milepel to ˈada, terek sanay a mihimaw to dafong. Mapadik ni Tafiti ko ˈada i, palilaman ko polong a tamdaw to maˈafasay a dafong. (1 Samuil 30:21-​25) Mikitini toniya tawcikel mamananam ita ko cecay kalimlaan a kimad: Soˈlin caka adihay ko midemakan ita, ano misarocodayto kita a pasifanaˈ to tamdaw, ano ira ko faelohay tamdaw mafanaˈ ci Yihofaan hanaca patafang to tireng micada to paputisem i, o ngangaˈay kita miladaˈ to lipahak. Maˈaraway ni Yihofa ko nano rorayan ita ato olah Cingranan, o papalifon kitaanan. Padamaayho Cingra kitaanan cipinang, ngaˈay mirienang to mitosilay a tayal i polong no hekal tada kalikoanto, ano hakowato ko midemakan ita o ngangaˈay a lipahak. (Yohani 14:12) Ano eca pisawad kita, o ngangaˈay pakasoˈlin o mihaydaan no Kawas kita! w21.10 28 fiedac 15-​17 fatac

Ano taˈangay taˈangay ko mihecaan, pakaynien ci Yihofaan ecato kalecad to saˈayaway a ciepoc ko niyah saan kita a calemcem alatek. Soˈlin ecato kalecad to saˈayaway ko ˈicel ita, wa ngaˈayho misaka dademak to taneng ato nalifetan no niyah padama to kaemangay tamdaw malo ciepocay a tamdaw, mitamorong to adihayay ˈinorong. O matoˈasay salikaka ano sapadamaaw to kaemangay salikaka, wa mitafo to misapoeneray. Saan ko pinengneng no misapoeneray tamdaw ikakaay ko tao to niyah. (Filipi 2:​3, 4) Ano ira ko misapoeneray a waywayan no matoˈasay salikaka wa cipinang, itini adihayay a pakayraan, matatodongay to safalod no Fangcalay Cudad anca ciepocay a pakayraan cowa ka cecay aca. Mansa, o isaˈayaway a pakayraan no niyah o sangaˈayay a pakayraan cowa ko mamihaen ko piharateng nangra. (Patnakay 7:​10) Soˈlin adihayay ko kalimlaan nalifetan no matoˈasay salikaka, kawra mafanaˈay cangra ‘padotocay mafalic ko pakayraan noniya hekal,’ mansa misaaliay cangra padotoc minanam a misalof alatek.​—1 Korinto 7:​31. w21.09 8 fiedac 1, 3 fatac

Ci Yihofa cowa ka pisaali Cingra to midokoay Cingranan a tamdaw midemak to malafoay demak, o malefotay a makoracay a Kawas Cingra. Sapatalipaˈelalaw to Israil tamdaw tonini, o taˈangayay saysi i kaˈayaw no tamohong a tadaekim a paya matiliday ko ‘oni Yihofa ko makoracay sanay a sowal. (Kasadakan 28:36-​38) O pakaˈaraway to tadaekim a paya a tamdaw o mamafanaˈ to makoracay ci Yihofa. Kawra o cecay Israil tamdaw ano awaay ko toki pakaˈaraw toniya tadaekim a paya, cowa ko mamafanaˈ to o makoracay ci Yihofa han? O mamafanaˈ! O polong faˈinayan, fafahiyan ato wawa no Israil iraay ko toki mitengil to miˈosian no tamdaw a lalakaw no Rikec ni Mosi. (Limoˈot 31:​9-​12) Ano iraay kiso itiya, mamatengil iso ko ilaenoay a sowal: ‘Ci Yihofa Kako o Kawas namo. . . . Ka makorac kamo, samanen o makoracay Kako.’ ‘Itini pinengneng Ako ka padotoc kamo makorac, samanen Kako ci Yihofa o makoracay.’​—Lifi 11:44, 45; 20:​7, 26. w21.12 3 fiedac 6-7 fatac

Alatek pakayniay kita i sakaˈorip macariraw ko harateng. Samaanen o kitiraan no roma tamdaw cowa kangaˈay ko kicay, pasangaray mietan to payci paririˈ to lomaˈ. Roma pakayraan i, roma salikaka citatodongay mietan to payci paririˈ to lomaˈ a tamdaw mapatayay, awaayto ko sakaˈorip no paro no lomaˈ. Kawra, pairaen ko pakasoˈlin no mita, aka pakidem ko cariraw, o papaira to haepoc no niyah. Haratengen ita, mikiˈokay ko kakarayan Wama ci Yihofa ano isalakat kita micangacang to Hongti Kitakit, o mamidimokos Cingra to sakaˈorip no mita. (Matay 6:​32, 33) Padotocay Cingra mitoor to sakiˈok, caay ka pisamangah. (Limoˈot 8:​4, 15, 16; ˈOlic 37:25) O ˈayam ato hana ano midimokosan Ningra, hano calemcemho kita to manan ko kakaenen, manan ko cacaˈedongen hani? (Matay 6:​26-​30; Filipi 4:​6, 7) O maolahay to wawa a wama wina o mamidimokos to wawa. O kakarayan a Wama ita ano maolahay kitaanan, mana mifalah Cingra kitaanan eca pisikol hokira? w21.12 17 fiedac 4-5 fatac; 18 fiedac 8 fatac

Na pakidemay ko pidokaˈ no roma tamdaw tisowanan han? O midokaˈay tisowanan o faˈinayan salikaka anca o fafahiyan salikaka han? Haratengen hena taˈarawan ni Yosif, o kakakaka ningra na pakidemay ko pidokaˈ cingranan, kawra padotocay cingra misamacay matayal saki Yihofaan, ci Yihofa pakayni pihadidi ningra kadofahay ko pipalifon cingranan. Saikor masongilaˈay ko pisodod ni Yosif to kakakaka ningra, mahapinangay to samanay ci Yihofa a palemed cingranan. (Satapangan 45:5) Malecad ci Yosifan, ano miingid kita ci Yihofaan, pakasoˈlin to masadafdafay ko pisawkit Ningra, o mamilifok kita to sahinom. (ˈOlic 7:​17; 73:28) Ano micadaay kiso to cowa ka sadafdaf a demak, anca madokaˈ no roma demak, haratengen ‘miingidan ni Yihofa ko makesemay ko falocoˈ a tamdaw.’ (ˈOlic 34:18) Maˈaraw ni Yihofa ko pitafo iso to mihadidiay, mihepol to karetengay ˈinorong Cingranan, tada maolahay Cingra tisowanan. (ˈOlic 55:22) O Misawkitay Cingra to polong no sera, mafanaˈay Cingra to kihcod a demak. (1 Pitiro 3:​12) Ano misiˈayaw kiso to pasangaray a saysayen a demak i, wa makahi kiso mihadidi mitala ci Yihofaan han? w21.08 11 fiedac 14 fatac; 12 fiedac 16 fatac

Songilaˈen misaka dademak to kaˈorip palahad to tangongolay a kalawidang aci Yihofaan, o inanengay a mipiliˈan. Mamihapinang kita to kalimlaan. Nolatekay, o midemakan ita a demak cowa ko mararaway, kawra matatodong ko mipiliˈan ita ngaˈ ngaˈay misongilaˈ misaka dademak to toki. Itini ci Yis i lomaˈ ni Marta aci Mariya palafang a tatokian mifekaday a demak ngaˈay mitadtad tonini. Hinapaladaˈay a Martaan mahemekay micada ci Yisan, orato ˈifowaay a misaday to kadofahay a kakaenen. Kawra mametay to toki ci Mariya maroˈ i kaˈayaw ni Yis mitengil to sapasifanaˈ ningra. Ngaˈayay ko harateng ni Marta, kawra ‘mipiliˈay to safangcalay’ ci Mariya. (Luka 10:38-​42) Ikor mapawanayto ci Mariya o maanan ko mikaenan a kakaenen itiya alatek, kawra caay ka mapawan cingra to mananamay ci Yisan a kimad. Misalimlaay ci Mariya to kalacafay ci Yisan a tatokian, malecaday misalimlaay kita to kalacafay ci Yihofaan a tatokian. w22.01 27 fiedac 5-6 fatac

Soˈlin pakayni ci Yihofaan misapoeneray ko harateng ni Ahap to cecay liyad, kawra ikorto o waywayan ningra paihkalay cowa ka soˈliˈlin pasasiyor cingra. Samanen cowa ka falahen ningra ko pidoko ci Paalan itini lalomaˈ no Israil, cowa picowat to matatodongay pidoko. Ikor no mapatay ci Ahap, patalahkalay ci Yihofa to pinengneng ci Ahapan. O ‘tatiihay a tamdaw’ ci Ahap sanay ci Yihu. (2 Rayray 19:​1, 2) Haratengen, ano soˈlinay pasasiyor ci Ahap, cowa ko papasowal ko pairasolay to o ˈintehay ci Yihofaan a tatiihay a tamdaw cingra. Mahapinangay, soˈlin paihkal ci Ahap to miming makesemay harateng, kawra cowa ka soˈliˈlin pasasiyor. Wa ngaˈay kita mikitini ci Ahapan minanam to manan hani? Tiya paliˈayaw ci Iliya pasowal to mamalaˈafo ko polong finacadan ningra i, soˈlinay misapoeneray cingra, ngaˈayay konini. Kawra ikorto o demak ningra paihkalay to cowa ka soˈliˈlin a pasasiyor cingra. Mihaenay, o pasasiyoray cowa ko cecayay liyad makesem ko harateng. w21.10 3 fiedac 4-5, 7-8 fatac

O pairasolay ci Isaya, o fafahi ningra iraay ko no niyah pairasolay a tayal, samanen panganganan cingra to ‘fafahiyan pairasolay.’ (Isaya 8:​1-4) Ci Isaya ato fafahi misamacayay matayal saki Yihofaan. Anini, o mararamoday a tamdaw ngaˈayay paisalakaten ci Yihofa i nokaˈorip, misarocod a matayal saki Cingranan. Malacafay ko mararamoday micekiw to sapairasol no Fangcalay Cudad, mihapinang to malaˈosiay ko sapairasol, o papaˈicel to pakasoˈlin ci Yihofaan. (Titus 1:2) Ngangaˈay cangra miharateng sasamaan ko niyah mihadak to ˈicel palaˈosi to pina sapairasol no Fangcalay Cudad. Tinakoen, paˈayaway ci Yis o ngaˈayay lihaf no Hongti Kitakit itini ˈayaw no saikoray romiˈad mapatenak i paro no kakarayan, ngaˈay cangra misaˈicel a mitosil, micowat to sakalaˈosi nonini a sapairasol. Ano pakasoˈlin cangra to mamalaˈosi ko sapairasol no Fangcalay Cudad, mamatongal ko pisarocod matayal saki Yihofaan. w21.11 16 fiedac 9-​10 fatac

O wina ni Yis itiya o maponengayto alatek, tada ciharatengay ci Yis cingranan. Mikitini kaolah ato kaciharateng ni Yis to wina, patorodan ci Mariya ci Yohanian, pakasoˈlin to dadimokosen ni Yohani ko saali no wina i noˈadingoan. Mikitiya, malecaday o wina hananayto ni Yohani a midimokos ci Mariya. Mikitini kahofoc ci Yisan misongilaˈay ci Mariya a midimokos cingranan, itini ˈayaw no mapatay cingra itiniay itihi ningra a pacafay, tada o ngaˈayay a wina, mansa tada maolah ci Yis cingranan! Mikitini i sowal ni Yis ci Yohanian mamananam ita ko maanan? Pakaynien kitaanan, mikikakaay ko kalangaˈay ita to cowa ko ˈaˈirangan a Krisciyang a salikaka. Misafelitay ko salawina ita anca mifalahay kitaanan alatek. Malecad o mikiˈokan ni Yis, ano madimadi kita ci Yihofaan ato likakawa Ningra, ˈalomanay salikaka wa malo wawa, wina anca wama no mita, o malifokay ita wa ‘simoˈot tingloh’ no malahdaway. (Marko 10:29, 30) Tada makedecay ko paro no lomaˈ no Krisciyang, o kahacecay tamdaw mitadiˈecay ato maolahay ci Yihofaan, masasiolahayho. Masalalomaˈ no mahaenay a paro no lomaˈ, samanay ko harateng iso hani?​—Kolosay 3:​14; 1 Pitiro 2:​17. w21.04 9-​11 fiedac 7-8 fatac

Ira ko madimadiay a olah no mita mamikiriwiˈ a misaˈicel padama to tao. Anini ˈalomanay salikaka misaˈicelay paihkal to madimadiay a olah, hanaca mihaenay ko demak toya cowa ko kafanaˈan nangra a Krisciyang. Tinakoen, mafekad ko pades i, makalimay cangra tangsol a mafanaˈ to sasamaan ngaˈ ngaˈay mirienang to padamaay to tahapadesay. Tahalifa to pasangaray ko kasakopangay a tamdaw, cowa ka cisasa cangra padama to salikaka, mihadakay to ciepocay a sapadama. Malecaday to saka 1 hahekalan no Makitoniya a Krisciyang cangra mihadak to payci ato ˈicel padama to salikaka, o midemakan ‘mataˈlifay to ˈicel nangra.’ (2 Korinto 8:3) O malohemay malitengay mamihayda to mihadakan no salikaka, paihkal to miakoˈiday a falocoˈ i cangranan. Itini matatodongay a tatokian o malohemay malitengay pakahemek to salikaka, ngangaˈay paˈicel cangranan padadotoc a tanektek.​—Isaya 32:​1, 2. w21.11 11 fiedac 14 fatac; 12 fiedac 21 fatac

Kita o kahacecay tamdaw misaaliay to sapaini ato sapalimoˈot no tao. Latekay, talaˈayaway kita milicay to kangodoan ita a tamdaw, mitengil to sapaini ningra. O roma, ciharatengay kitaanan a salikaka mahapinangay to ‘mamapolinto’ kita, midemak to kaadayayan no niyah a demak, mansa patalipaˈelal kitaanan. (Kalatiya 6:1) Midemakay kita alatek to pakidemay a raraw, misaaliay to sasalofen. Ano o maanan to pakayraan ko picada ita to sapalimoˈot, oha mamakahi kita midofdof, mihaen ko demak adihayay ko saka ngaˈay no mita, o sakalidong no ˈorip ita. (Taneng 6:​23) O aniniay a sinael pakalalokay kitaanan, ka ‘pisongilaˈ mitengil to sowal no citanengay a tamdaw.’ Toniya hekal awaay ko tamdaw mafanaˈay to kihcod, iraay ko mikikakaay kitaanan adihayay ko nalifetan, adihayay ko kafanaˈan. (Taneng 12:15) Mihaenay, mitengil to sapalimoˈot anca sapaini no tao paihkalay konini to misapoeneray kita, mafanaˈ to adihayay ko kacangoˈotan no niyah, misaaliay to sapadama ngaˈ malaˈosi ko patosokan. Citanengay a Hongti ci Solomon sanay: ‘Mihoped to ciepocay a harateng, wa malaˈosi ko demak.’​—Taneng 15:22. w22.02 8 fiedac 1-2 fatac

O cecay tamdaw soˈliˈlinay pasasiyor, cowa ko pasowal aca tada makesemay ko niyah, o mamifalic to harateng ato waywayan. O tatodong i, mamihawad cingra a mararaw, hanaca miliyaw mitoor to palinian ni Yihofa a maˈorip. (Icikil 33:14-​16) O sakakaay kaciharatengan ningra o mamisalof to kalalaˈed no niyah aci Yihofaan. Ano pakidem ko raraw no ngaˈayay widang ita, sasamaan ko demak ita hani? Ano padama kita to widang mihimed to raraw o mamipalak cingranan. Maˈaraway ni Yihofa ko kihcod, cowa ko mamalipalaw Cingra. (Taneng 5:​21, 22) Ngaˈay palimoˈoten iso ko widang misaali to sadama no malohemay malitengay, ano cowa ka kahi cingra mihai to raraw i malohemay malitengay, o papasowalen iso ko malohemay malitengay toniya demak, mihaen ngaˈ o soˈliˈlinay padama cingranan. w21.10 7 fiedac 19-​21 fatac

Kita o kahacecay tamdaw o mamitodong ci Yisan, mihadak to niyah matayal saki tao. Sowal no Fangcalay Cudad ci Yis ‘micadaay to tatirengan no koli.’ (Filipi 2:7) Makahiay kita malo koli ni Yihofa ato malo sikawdan no salikaka, makalimay matongal ko kangaˈay no demak ci Yihofaan ato salikaka, malecad o cecay ngaˈayay koli anca ngaˈayay sikawdan misaˈicelay pakahemek to tawki. Ngaˈayay licayen ita ko niyah: “Hakowaay ko kalim ako makahi kinafalah a padama to tao hani? Ano misaaliay to mamiasik to pitaykayan, anca misaaliay to tatomadawen ko Hongti Kitakit Kasaˈopoan, wa tangsol kako makahi padama han?” Ano mahapinang ita iraay ko fafalicen no niyah, kawra awaay ko ˈicel mihaen to demak, ka pasayra ci Yihofaan micangacang a mitolon. Soˈliˈlin mikifalocoˈ a pasowal ci Yihofaan, mingitangit Cingranan padama kitaanan ‘ira ko makalimay harateng ato ˈicel a midemak.’​—Filipi 2:​13. w22.02 23 fiedac 9-​11 fatac

Tada sidaˈitay ci Yis, mansa padadotocay a damsay, makahi a micaˈi. (Matay 11:29, 30) Tinakoen, o cecay Foinikiya a fafahiyan micangacangay ci Yisan miadah to wawa ningra, satapang aca minaˈayan ni Yis. Kawra paihkal konini fafahiyan to tanektekay a pakasoˈlinay ikor, sidaˈitayto ci Yis cingranan, miadah to wawa ningra. (Matay 15:22-​28) Roma i, soˈlin tada sidaˈitay ci Yis, kawra cowa pitoor cingra to nafalocoˈan a dademak, latekay tanektekay cingra misalof to kaolahan ningra a tamdaw. Tinakoen, tiya miconged ci Pitiro ci Yisan midofdof to araaw no Kawas i, itini kaˈayaw no romaroma a nisawawaan mirikecan ni Yis ci Pitiro. (Marko 8:​32, 33) Mihaen ko demak ni Yis cowa ko papakangodo ci Pitiroan, ao papadama ci Pitiroan a macakat. Patalipaˈelalay ci Yis to romaroma nisawawaan, o mamidama cangra cingranan cowa ko mamiconged cingranan midofdof to araaw no Kawas. Maedeng mangodoay ci Pitiro itiya, kawra macadaay ningra ko sapasifanaˈ itiya. Ano maolahay kiso to cecay a tamdaw, latekay wa patodicek kiso mihadak to pasangaray ningra, mihaen ngaˈ o soˈlinay sidaˈit cingranan. Tonini a tatokian o tatodongen ci Yis. O sapalimoˈot iso salalangien ko Fangcalay Cudad. w22.03 11 fiedac 12-​13 fatac

Pakahemek kita ci Yihofaan o midokoay Cingranan. (ˈOlic 34:1) Pasowal kita to tao tada maolahay ko niyah ato masemeray to makapahay a capeling ni Yihofa ato kasapaan a demak Ningra, o pakahemekay Cingranan. Ano matomesay ko miakoˈiday a falocoˈ ita, kahnayay mahadak i ngoyos ko pakahemekay a sowal. Mihaenay, mamipalak kita to toki misongilaˈ midotim to kihcod nano demak ni Yihofa kitaanan, mihaen wa adihay ko lalangian ita pakahemek Cingranan. Sowal no Fangcalay Cudad: ‘Pakaynien ci Yisan padadotoc a pakahemek to Kawas, o sapatafang ita Cingranan a sapatoˈaya konini; tano ngoyos milasil to fangcalay ngangan Ningra, o sapatafang ita a minaroˈan konini.’ O mitosilay a tayal pafeliay kitaanan to toki mihaen to demak. Makalimay kita ‘o sapatafang a sapatoˈaya ita Cingranan’ o sangaˈayay, mihaenay itini ˈayaw no mitosil ngaˈay songilaˈen no niyah miharateng to o maanan ko hasowal, malecaday itini ˈayaw no mitolon misongilaˈ ko niyah miharateng to hasowal, mihaen wa fanekfekto kita paladaˈ to soˈlinay kimad i taowanan. w22.03 21 fiedac 8 fatac