Saka 11 Folad

Itini adihayay pakayraan padamaay ci Yihofa tisowanan: Ano tatiih ko waywayan no tao, padamaay Cingra rihaday ko falocoˈ iso; eca kakahi ko tao mitengil, padama tisowanan miharateng to matatodongay a sinael paladaˈ to tao; ano eca kakahi ko tao mitengil, pafeliay Cingra to ˈicel tisowanan padadotoc a tanektek. (Yirimiya 20:​7-9) Pahatatanamay ci Yihofa kitaanan mitosil i tamdaw, paihkalay konini to kangaˈay Ningra. Itini mitosilay ato kaˈorip a saˈopo, matengilay ita ko adihayay ngaˈayay sakasasowal a sapaini, pakalalokay ko likakawa kitaanan misaka dademak to mananamay. Salakat cowa ka timolo kita mitanam misaka dademak to faelohay pakayraan mitosil, kawra satimolo saan kita a mihaen to demak, mahapinangay tada ciepocay. O kamok no saˈopo ato taykay marariday pakalalok kitaanan mirienang to masakenaay a pakayraan misawacay, mangalef ko cowaho ka tanamen ita. Salakat marawraway kita alatek, kawra misaˈicel kita a midemak, pairaay to toki no niyah milifok to sapalemed ni Yihofa. w21.08 27 fiedac 5-6 fatac

Itini sapatikami to Korintoay a Krisciyang, mihadakay ko tarokos ci Pawlo to pakidemay a sapalimoˈot. Maharek cingra mitilid tonini a tikami i, miocoran ningra ci Titus tayra cangranan. Tiya mafanaˈ cingra to mikifalocoˈay cangra micada to sapalimoˈot i, tada lipahakay ko falocoˈ. (2 Korinto 7:​6, 7) Ngaˈayay todongen no malohemay malitengay ko taˈarawan ni Pawlo, mipalak to adihayay toki kalacafay to salikaka. Tinakoen, ngaˈay cangra itini ˈayaw no saˈopo kahenay a tahira, mihaen wa ngaˈayto ko kasasowal to salikaka. Adihayay tatokian, pina aca ehon ko mipalakan no malohemay malitengay, o ngangaˈayto matinako no salikaka ko kaciharateng ato sapakalalok. (Loma 1:​12) Roma i, ngaˈayay tano Fangcalay Cudad ko malohemay malitengay paˈicel to pakasoˈlin no salikaka, ho mafanaˈ cangra tada maolahay ci Yihofa cangranan, hanaca mikilim to toki pakahemek cangranan. Ano kalimlaan i, wa misalalangian to Fangcalay Cudad ko malohemay malitengay mihadak to ihkalay a sapalimoˈot, hanaca paihkal to damsayay a waywayan, samanen makalimay cangra makahi ko salikaka micada to sapalimoˈot no niyah.​—Kalatiya 6:1. w22.03 28-​29 fiedac 11-​12 fatac

Pafeliay ci Yihofa to finawlan Ningra to ‘kasapaan a ˈicel,’ ho ngaˈay cangra padadotoc madimadi midoko Cingranan. Milifok kita to ˈicel a cecay pakayraan pakayniay i satolon. Itini Ifiso 6:​18 pakalalokay ci Pawlo kitaanan micerid a mitolon. O papacaˈof ko Kawas kitaanan, pafeli to ˈicel kitaanan. Latekay cato ka tomeseng kita, anca caka fanaˈ to maanan ko cacangacangen i Kawas. Soˈlin pasangar kita tano sowal paihkal to harateng ato nafalocoˈan, kamayan mitokel ci Yihofa kitanan pasayra Cingranan a mitolon. (Loma 8:​26, 27) Pakaynianho ni Yihofa i Fangcalay Cudad pafeli to ˈicel kitaanan. Mikitiniay i picekiw to Fangcalay Cudad ci Pawlo milifok to sahinom ato ˈicel, wa mihaen ko demak ita. (Loma 15:4) Micekiw ato midotim kita to Kimad no Kawas i, wa pakaynien ni Yihofa i fangcalay saocor pakacipinang kitanan, samaan a misaka dademak to safalod no Fangcalay Cudad misaysay to pasangaray nohatini.​—Hipray 4:​12. w21.05 22 fiedac 8-​10 fatac

Misaaretengay kita to pasifanaˈay to tamdaw to Fangcalay Cudad a tayal, soˈlin cowa ko madoloay saan kita miharateng, kamayan misarocod a midemak. Caay pihai ko pakayraan no niyah saan kita miharateng. Tinakoen, o roma mitosilay matoˈasayto anca tatiihay ko tireng. Ano mahaenay ko pakayraan iso, ngaˈayay haratengen ita mananamay ko faelohay pakayraan, ngaˈay kita tano tingwa anca tano tingnaw a lalosidan a pacekiw. Itini kiso i lomaˈ wa ngaˈay pasifanaˈ to tamdaw minanam to Fangcalay Cudad, tada madepocay konini! Mihaen to demak iraay ko kangaˈayan, o roma tamdaw sapinanamaw to Fangcalay Cudad, kawra o pitosilan no salikaka a toki pakayra cangranan cowa ko madepocay. Tinakoen, itini kanikaran anca dadaya ngaˈ iraay ko toki nangra. Wa ngaˈay kiso misalof to toki, pasifanaˈ toniya tamdaw to Fangcalay Cudad han? Haratengen ko taˈarawan ni Yis. Ci Nikotimus itiniay i dadaya mikilim ci Yisan, mansa itiniay toniya tatokian pasifanaˈ ci Yis cingranan.​—Yohani 3:​1, 2. w21.07 5 fiedac 10-11 fatac

Nisawawaan no Paputisemay a Yohani maˈaraway ko nisawawaan ni Yis eca ka pisaliway, maapohay ko harateng. Sowal ni Yis ano maˈoripho cingra, awaay ko lalangian no nisawawaan a misaliway. (Matay 9:​14-​17) Soˈlin mihaen ko pitadtad ni Yis, o Farisay tamdaw ato misafelitay ci Yisan a tamdaw, padadotocay milikaf cingranan eca ka pidofdof to pisalisinan ato nolitengan a nanaman nangra. Itini Paselaˈan Romiˈad, maˈaraw nangra ko miadahan ni Yis a adadaay, tada maketeray. (Marko 3:​1-6; Yohani 9:​16) Pahiyoay cangra to masongilaˈay a mitoor ko sarikec no Paselaˈan Romiˈad, kawra misasingdi i fangcalay sefi, cowa ko mararaway sanay. Tiya rikecen ni Yis cangra i, tada mangolaway cangra. (Matay 21:12, 13, 15) Kinacecayay, itini i Nacali a kasaˈopoan, pasifanaˈ ci Yis to tamdaw i, tano tinakoan nolitengan a somowal, oya tamdaw misatekeday, cangoˈotay ko pakasoˈlin, telocto tada mangolaway cangra. (Luka 4:​16, 25-​30) Fahkaˈay ko ˈalomanay tamdaw to waywayan ni Yis, mansa caka kahi cangra pakasoˈlin ci Yisan.​—Matay 11:16-​19. w21.05 5-6 fiedac 13-​14 fatac

Patalipaˈelalay ci Yihofa kitanan miliyas to misatakaraway ato maˈanofay a waywayan a cecay pakayraan, o pakayni i roma soˈlinay a tamdaw ato demak pasifanaˈ kitaanan. Masowal ko maˈanofay, wa maharateng ita ci Akoma Satan alatek. Na o coyoh ni Yihofa cingra, maedeng adihayay ko mikiriwiˈay a sapalemed, kawra sapialaawho cingra to adihayay, sapilifokaw to edengan ni Yihofa a dadokoen. Makalimay ci Satan malecad kita cingranan, mansa mihalaka cingra ira ko macangalay harateng ita. O sakacecay a patosokan ningra ci Ifa. Maolahay ci Yihofa ci Ifaan ato faˈinay ningra, ‘o masakenaay a heci no kilang i palosayan’ ngaˈayay kaenen nangra, tahira karenecan a komaen, edengan o heci no cecay kilang cowa ka ngaˈay kaenen. (Satapangan 2:​16) Milipalawan ni Satan ci Ifa, pasowal cingranan oya cowa ka ngaˈay kaenen a heci saan ko Kawas o ngaˈayay kaenen ningra. Cowa pisalimla ci Ifa to iraayto no niyah, sapilifokawho to adihayay. Samanay ko teloc? Mararaway ci Ifa, saikor mapatayay.​—Satapangan 3:​6, 19. w21.06 14 fiedac 2-3 fatac; 17 fiedac 9 fatac

Wa mahofoc ci Atam aci Ifa to wawa, misongilaˈ midimokos to cikiw. Ano makahi midofdof ci Atam aci Ifa, palecad to araaw ni Yihofa cangranan a midemak, cangra ato teloteloc wa tahadaˈoc materek i paro no lomaˈ ni Yihofa. Ci Atam aci Ifa o kalimlaan a tamdaw itini paro no lomaˈ ni Yihofa. Milengo to misangaˈan ni Yihofa a tamdaw, itini ˈOlic 8:5 sanay ci Tafiti: ‘Pasafaen Iso ko saaroˈan ningra to coyoh to miming, mapafeli Iso cingra to ˈdil ato ˈodingar malo tamohong.’ O coyoh o taˈangayay ko ˈicel, ˈadingo a tireng, soˈlinayto cowa ka lecad ko taneng ato ˈicel no tamdaw to coyoh. (ˈOlic 103:20) Nikawrira sanay ko sowal no Fangcalay Cudad, ‘masafaay no coyoh to miming’ ko tamdaw. Ka adayayan i, ikor ci Atam aci Ifa mitowakangay ci Yihofaan, telocto cowa ka ngaˈay materek i paro no lomaˈ ni Yihofa, pairaay to pades no teloteloc. Kawra, cowa ka falic ko araaw ni Yihofa, o hatokel Ningra o midofdofay Cingranan a tamdaw tatahadaˈoc malo wawa Ningra. w21.08 2-3 fiedac 2-4 fatac

Anini, ˈalomanay midokoay ci Yihofaan a tamdaw tahacadaay to pisafelit. O romaroma a salikaka itiniay i makecengay ko midokoay a tayal a kilac, o mamalepel cangra alatek, dotoc ‘mapatayniay i ˈaˈayaw no ˈaˈideman ato hongti,’ pasayra cangranan misawacay. (Matay 10:17, 18) O romaroma salikaka misiˈayaway to cowa ka lecad a pisafelit, soˈlin itiniay cangra i pasalatay ko pihakelongan a kitakit, kawra cowa pihayi ko paro no lomaˈ to pihakelongan nangra. (Matay 10:32-​36) Adihayay tatokian, mahapinangay no paro no lomaˈ no salikaka awaay ko kapo a misafelit, orato cowato pihaen to demak, ilalomaˈ nangra iraay ko malo fanekfekay a Misawacayay Tamdaw ni Yihofa. Ano micadaay kiso to pisafelit nohatini, aka a pisawad, ka timolo! Ira ko sapadama n i Yihofa ato fangcalay saocor Ningra, cowa ko mamatalaw kiso! w22.03 16 fiedac 8 fatac

Sowal no Fangcalay Cudad, ˈintehay ci Yihofa to ‘misatakaraway a mata, misamangahay a sema, mipatayay to tamdaw a kamay.’ (Taneng 6:​16, 17) ‘ˈIntehay to mariˈangay tamdaw, milipalaway to tao a tamdaw’ Cingra. (ˈOlic 5:6) Ci Yihofa ˈintehay to mahaenay a waywayan ato demak, mansa itini lintad ni Nowa palaˈafo to polong a tatiihay tamdaw itiya, samanen mitomesan nangra ko mariˈangay demak i cikiw. (Satapangan 6:​13) Itini lintad ni Malaki, o romaroma tamdaw tano misaˈfitay a pakayraan milikong to fafahi. Sowal ni Yihofa ˈintehay Cingra to mahaenay a tamdaw, cowa ko cacadaen Ningra ko pidoko nangra, o papakayni tatiihay a demak nangra misawkit cangranan. (Malaki 2:​13-​16; Hipray 13:4) Pakafanaˈan ni Yihofa kita: ‘Kaˈintehen ko tatiihay.’ (Loma 12:9) O ‘kaˈintehen’ o ciˈicelay a harateng, tatodong i, tada teliˈiyay to cecay a demak, tada mapiliˈay. Malecaday, o piharateng aca to mararaway a demak i pinengneng ni Yihofa, tada kapiliˈanto ano haratengen ita. w22.03 4-5 fiedac 11-​12 fatac

Cato ka halafin, o kakarayan a Wama ita wa pakaynien Ningra i Hongti Kitakit a palemed kitaanan. Ano aninito anca noikor a faelohay hekal, o mitalaay ci Yihofaan a tamdaw o mamilifok to kadofahay a sapalemed. Itini faelohay hekal, o finawlan no Kawas cowato ko mamisiˈayaw to masakenaay a cariraw ato kasomadan. Itiya wa malahdawto ko cowa ka sadafdaf a demak, awato ko roray ato somad. (Paˈarawan 21:4) Cowato ko cacalemcem kita mitala to misaalian a dafong, samanen wa kadofah ko dafong itira. (ˈOlic 72:16; Isaya 54:13) O mahaenay a kaˈorip tada kasemeranto! Toniya tatokian, padamaay ci Yihofa kitaanan misawad to tatiihay nanaman, hanaca palahad to makapahay a capeling, sahtoay o patadoay kitanan misalof, padama kitanan misaday maˈorip itini faelohay hekal. Aka matoled, aka pisawad, o sangaˈayay a kaˈorip itiniay i kaˈayaw mitala kitaanan! Nanay tapalen ita ko hanoikor, nanay padotoc a mihadidi, lipahak ko falocoˈ a mitala ci Yihofaan palaˈosi to sakiˈok Ningra. w21.08 13 fiedac 17-​19 fatac

Macada ko tikami no tarokos ci Pawlo ikor, itiniay i Yutiya a Krisciyang o mamisawad to tayal, miliyas to lomaˈ no niyah ato cowa ko Krisciyang a salawina, o ‘mamilaliw tayra i lotok.’ (Matay 24:16) Maedeng misaaliay cangra madadama ngaˈ milakowit to pasangaray. ˈAyaw nonini ano mitoorayto cangra to sapalimoˈot ni Pawlo, paladaˈ to dafong no niyah, wa madoloto mananam to faelohay nokaˈorip. Ano misaaliay ko salikaka to sapadama i, cowa pifanaˈ kitaanan alatek. Mihaenay mamadolo kita ingiden, makahi padama to tamdaw. Itini kasakopang iso maedeng iraay ko roma salikaka madoloay ingiden, ano hacowato tatokian makahiay padama to tao, cowa ko papiharateng to tao hato miafaday cangranan. Makalimay kita malecad cangranan! w22.02 23-​24 fiedac 13-​15 fatac

Toniya pina miheca adihayay kasakopang ato kasakilac pakakadepan. Ano mitahidang ko malohemay malitengay kitaanan malinah tayra i faelohay a kasakopang, o tatangoˈol kita miliyas to paro no lomaˈ anca o widang. Hatiraay, pasowalan ni Yihofa ko malohemay malitengay, o kahacecay a mitosilay tatalacowaen a kasakopang misilsil hani? Cowa ka pihaen. Mahaenay, pasangarento kita a midoedo to saˈosi nangra a midemak alatek. Kawra, haratengen pakasoˈlinay ci Yihofa to malohemay malitengay, paiken cangranan patado to kasakopang a misaˈosi, ano kitato o papakasoˈlin cangranan. Soˈlin cowa ka lecad to maharatengay ita ko saˈosi no malohemay malitengay, hano kakamayen kita a midama cangranan hani? Samanen mihaen to demak, o ngangaˈay midama to kakelec no finawlan no Kawas. Roma i, misapoener ko kahacecay tamdaw midama to saˈosi no kasacefang no malohemay malitengay, o mamacowat ko kasakopang. (Hipray 13:17) Sakakaay i, pakasoˈlinay ci Yihofa tonini a malohemay malitengay, patorod cangranan midimokos kitaanan, mihaenay ano palecad kita cangranan o paihkalay to pakasoˈlinay ko niyah ci Yihofaan.​—Dmak 20:28. w22.02 4-5 fiedac 9-​10 fatac

Ano micadaayto kiso to paputisem faˈinayan a salikaka, ngaˈayay misaˈicel pacakat to inaneng caciyaw ato pasifanaˈ. Hano o ngaˈayay a patosokan konini hani? Samanen itini piasip, caciyaw ato pipasifanaˈ padotoc a macakat kiso, wa taˈangay ko sapadama to tao. (1 Timoti 4:​15) Wa ngaˈay kiso misarocod a minanam ato misaka dademak to Sarocoden Miasip ato Pasifanaˈ lalakaw noniya cudad, kinacecay cecayen fedengan ko nanamen, itini lomaˈ misongilaˈ mihatatanam, ikor itini pikimadan sakadademaken ko mananamay a kalimlaan. Ngaˈayay licayen iso ko mikiriwiˈay a singsi, ato mafanaˈay caciyaw ato pasifanaˈ a malohemay malitengay, mitengil to sapaini nangra. (1 Timoti 5:​17) Aka o pacakat aca to inaneng ko haratengen, haratengenho sasamaan mitongal to pakasoˈlin no mitengilay, pakalalok cangranan a midemak. Mihaen ko demak iso, o papatongal to lipahak no niyah ato tao. w21.08 24 fiedac 17 fatac

Ano ikakaay ko tao to niyah saan ko pinengneng ita, ano maˈaraw ko salikaka ikakaay ko inaneng kitaanan i, cowato ko malalifet cangranan, ao papatado cangranan a mahemek. Ano sakadademaken nangra ko inaneng no niyah matayal saki Yihofaan, mamatongal ko kahemek ita. Mihaen, o kahacecay tamdaw i kasakopang wa ngaˈay mararihaday, makelec a malacecay. Ano caay ka ciharateng kita maˈinap to tao, o mamisaˈicel palahad to misamimingay a capeling. Ano misamiming kita, wa mahapinang adihayay a demak cowa ka tada ngaˈay ko demak no niyah, cowa ko mamisawacay to ikakaay ko idahi no niyah to tao, ao maminanam to ikakaay ko inaneng kitaanan a salikaka. Tinakoen, o cecay faˈinayan salikaka mafanaˈay mikimad, ngaˈayay licayen ita cingra samanay ko pisaday. Cecay fafahiyan salikaka mafanaˈay mitangtang to dateng, ngaˈay papipasifanaˈen ita cingra. w21.07 16 fiedac 8-9 fatac

Maˈoningay itini Saˈosi o cecay Israil tamdaw itini Paselaˈan a Romiˈad mipodpoday to kasoy, telocto mipatayan ni Yihofa. Ikor no halafinay miheca mifekad konini a demak, mikitini maˈoningay no saka 2 Samuil, o Hongti ci Tafiti maˈaˈodangay mipatayayho to tamdaw, kawra misododan ni Yihofa cingra. (Saˈosi 15:32, 35; 2 Samuil 12:​9, 13) Saan kita miharateng alatek: ‘Ci Tafiti midemakay to maˈaˈodangay ato mipatayay to tamdaw a taˈangayay raraw, misododan ni Yihofa cingra, o roma tamdaw kahmaway ko raraw, hano patayen ni Yihofa cingra hani?’ Cowa pihacecay ko Fangcalay Cudad mifanaˈ kitanan to kihcod mifekaday a demak. Tinakoen, mafanaˈay kita soˈliˈlinay ci Tafiti pasasiyor to nano raraw no niyah. (ˈOlic 51:​2-4) Kawra oya mipodpoday to kasoy i Paselaˈan a Romiˈad a tamdaw samanay hani? Makesemay cingra to nano raraw no niyah han? I saˈayaw na misafelitay cingra to sarikec ni Yihofa han? Padeteng sanay cingra eca pitengil to limoˈot anca saliyaliyaw sanay eca ka falic han? Cowa ka somowal ko Fangcalay Cudad. Kawra adihayay ko kafanaˈ ita ci Yihofaan, mansa ngaˈay pakasoˈlin to ‘moecelay ko kihcod a demak’ Ningra.​—ˈOlic 145:17. w22.02 2-3 fiedac 3-4 fatac

O misamimingay tamdaw caay ka ˈakawang ko pitokel to niyah. Mihaen, wa ngaˈay padotoc a lipahak cingra, padotoc a mihadak to sadama. Ngaˈayay patinakoen ita ko misamimingay tamdaw to parakatay to paliding macokacok. Saka cokacokaw, fafalicen ningra tayni manaˈonay ko kolaci, soˈlin mamanaˈon ko cikay no paliding, kawra ngaˈayho talaˈayaw ko paliding. Malecaday, o cecay misamimingay tamdaw mafanaˈay hahacowa ‘minaˈon to kolaci,’ mihaen wa ngaˈay cingra padadotoc fanekfek matayal saki Yihofaan ato padama to tao. (Filipi 4:5) Sinanoten ko tinakoan ni Parcilayan. Mitahidang ci Tafiti cingranan malacafay to niyah tayra i lomaˈ no hongti i, 80 ko mihecaan ningra. Tada misamimingay cingra, mafanaˈay cingra cowato ka adihay ko madangaray a demak, minaˈayay to satahidang, mitahidangay cingra to kaemangay a Kimhanan mikotay cingranan. (2 Samuil 19:35-​37) Malecad ci Parcilay, ˈalomanay matoˈasay salikaka makahiay pafeli to toki i kaemangay salikaka matayal saki Yihofaan. w21.09 10 fiedac 6-7 fatac

Palo sidaˈitay a Wama ko pinengneng ci Yihofaan pasangaran nanay kiso han? Mahaenay ko piharateng no ˈalomanay. Caayho matinako ita ko olah no wama alatek, mansa pasangar miharateng to samanay ko maolahay midipot to paro no lomaˈ a wama. Masongilaˈay ko kacipinang ni Yihofa to nafalocoˈan ita, mafanaˈayho to hano mahaen ko harateng ita, tada mihinomay konini kitaanan! Mitokelay Cingra malakangaˈay kita Cingranan, mansa mihaen a pakalalok kitaanan i Fangcalay Cudad: ‘Ka piingid kamo to Kawas, wa ingiden no Kawas kamo.’ (Yakop 4:8) Tada maolahay ci Yihofa kitaanan, hanaca mikiˈokay kitaanan o sangaˈayay a Wama Cingra. Ngaˈayay ci Yis padama kitaanan miingid ci Yihofaan. Tangongolay ko kafanaˈ ningra ci Yihofaan, hanaca malefotay a mitodong to capeling no Wama, mansa saan ko sowal ningra: ‘Pakaˈaraw takowanan, o pakaˈaraway to Wama.’ (Yohani 14:9) Malecaday o kaka ita ci Yis, pasifanaˈ kitaanan mikangodo ato midofdof to Wama, eca pidemak to pasomaday to Wama a demak, pasifanaˈayho cingra kitaanan samaan ko demak ngaˈ milifok to pihayda no Wama. O nalifetan ni Yis i fafekang no sera padamaay kitaanan mihapinang, o sidaˈitay damsayay a Wama ci Yihofa. w21.09 21 fiedac 4-5 fatac

O finawlan ni Yihofa makelecay a malacecay midoko to tada cecayay a Kawas. Patorodan ni Yihofa ko malohemay malitengay to kalimlaan a ˈinorong, o mamitafo to kakorac no kasakopang. Ano ira ko tamdaw pakidemay ko raraw, o malohemay malitengay o mamitoor to saali ni Yihofa, misawkit tonini a tamdaw wa ngaˈay materek i kasakopang hokira. Adihayay ko haharatengen no malohemay malitengay a demak, minengneng tonini mararaway a tamdaw soˈliˈlinay mikifalocoˈ a pasasiyor. O sowal aca to makesemay ko niyah, kawra ˈintehay ko falocoˈ to na midemakan no niyah tatiihay a demak han? Misetekay to falocoˈ cingra ecato piliyaw mararaw to malecaday a demak han? O noka raraw ningra, pakayniay pifiyor no tatiihay widang, mamakahi cingra ecato picawmaˈ to mahaenay tamdaw han? Wa mikifalocoˈ a micangacang ko malohemay malitengay mitolon, misimsim to mifekaday a demak ato safalod no Fangcalay Cudad, ato waywayan noniya tamdaw pakayni i raraw no niyah, ikor mamisaˈosi to ngangaˈay cingra materek i kasakopang hokira. Itini roma pakayraan, mamisaˈosi cangra mifalah tonini mararaway a tamdaw.​—1 Korinto 5:​11-​13. w22.02 5 fiedac 11-​12 fatac

Ano pinaayho romiˈad micada kita to paputisem, anca pinaayto poloˈ a miheca, makalimay kita o kahacecacecay tamdaw mala kaolahan ni Yihofa a tamdaw. Sapalaˈosiaw tonini a patosokan i, misaaliay kita to sapiˈimeraw to harateng no niyah. Misamaanay hani? Samanen o harateng ita taˈangayay ko pifiyor to capeling. Ano micerid kita miharateng misamaan parenec to no tekedan a coos, o sasowalen waywayan ita wa irato ko pasangar. (Ifiso 4:​17-​19) O roma pakayraan i, ano micerid kita miharateng to ciepocay a demak, o sasowalen ato waywayan ita wa madoloto pakahemek to kakarayan a Wama ci Yihofaan. (Kalatiya 5:​16) Nikawrira, itini i ponoˈ ita awaawa sa iraay ko mararaway a harateng, kawra ngaˈayay kita mipiliˈ eca ka pitoor tonini a harateng midemak. ˈAyaw no micada kita to paputisem o fafalahento ko kaˈintehan ni Yihofa a sasowalen ato waywayan, o saka cecay konini mihelong to katelangan a capeling, o sakakaay kalimlaan konini. Sapakahemekaw ci Yihofaan, o mamicaˈedongho to faelohay a capeling. w22.03 8 fiedac 1-2 fatac

Sapisawkitaw ko malohemay malitengay to soˈlinay pasasiyor ko pakidemay ko raraw a tamdaw cowa ko madoloay. Misamanay hani? Samanen cowa pakaˈaraw ko malohemay malitengay to falocoˈ no tamdaw, edeng pakayni i wacay ko pisawkit to soˈlinay mafalic ko waywayan no salikaka, ˈintel to midemakan no niyah. Misaaliay ko malohemay malitengay to ihkalay a wacay, misawacay to harateng ningra, ato waywayan soˈliˈlinay a mafalic. O hatiniay a kafalic misaaliay to toki. O cecay mafalahay a tamdaw ano sapisawacayaw to soˈliˈlinay pasasiyor ko niyah, o mamicerid mirienang to saˈopo, mitengilho a midofdof to sapalimoˈot no malohemay malitengay micerid mitolon ato micekiw to Fangcalay Cudad, o mamisaˈicel miliyas to mikayhiday cingranan miliyaw mararaw a demak. O cecay tamdaw misaˈicel misalof to kalawidang ato Kawas, o ngangaˈay pakasoˈlin to misongilaˈay ci Yihofa misodod cingranan, o malohemay malitengay papadama cingranan miliyaw malo salikaka. w21.10 6 fiedac 16-​18 fatac

Tangongolay ko olah ni Yis ci Yihofaan, ano itinito kakarayan anca i fafekang no sera i, misamacayay midoko to Kawas ci Yihofaan. (Luka 4:8) Pasifanaˈan ningra ko nisawawaan mihaen to demak, midoko cingra ato madimadiay a nisawawaan cowa pisakadademak to samiyay. O ˈAdingo ko tireng no Kawas, o misangaˈan no tamdaw a dafong caay ka ngaˈay patalahkal to ˈdil Ningra. (Isaya 46:5) Roma i, ngangaˈay kita patado to fangcalay tamdaw misangaˈ to samiyay ato pasayra i samiyay nangra a mitolon han? Itini 10 a Rikec saka tosa a limoˈot, aniniay sinael a sapalimoˈot somowalay ci Yihofa. Pakaynien i makalimay sapilifokaw to pihayda no Kawas a tamdaw, ihkalay konini a sowal. Sowal no mikingkiway to likisi no hekal, o salakatay Krisciyang ci Yihofa aca ko midokoan sanay. Anini, o Misawacayay Tamdaw ni Yihofa malecadayto. w21.10 19-​20 fiedac 5-6 fatac

Na mirikecay ci Yis to saka 1 hahekalan a Yutiya Krisciyang, o ‘mamaˈaraw nangra ko sofitay pakopang i taliyok no Yirusalim niyaroˈ,’ itiya ‘o mamilaliw cangra tayra i lotok.’ (Luka 21:20-​24) Mihaen ko demak nangra o mamadipot ko ˈorip, kawra o mamifalah to adihayay a dafong. Sowal no Mikecolay i saˈayaw sanay: “Hayi sanay cangra miliyas to omah ato lomaˈ, cowa ka pinokay milosimet to dafong. Tanektekay ko pakasoˈlin nangra o papafeli ci Yihofa to sadipot ato sadama cangranan, hanaca makahi paisalakat to midokoay Cingranan a demak itini kihcod a demakan.” Sanayho ko lalakaw: “Pakayni pinengneng ita to dafong, o aira ko sapalifet noikor. O pakadafongay o kalimlaan han? Anca o sakalidong no midopoay to Kawas a tamdaw ko ikakaay kalimlaan? Hatiraayto, sapidofdofaw to limoˈot a milaliw, o mamihadidi kita to adihayay roray alatek. Ano kitato cowa ko tatangoˈol to dafong, tatangsol a mitengil to limoˈot ni Yis.” w22.01 4 fiedac 7-8 fatac

Miliyas ko Israil tamdaw to Icip caka halafin, pasowalan ni Yihofa ci Mosi to milingatay to ngangan no Niyah ato capeling a demak, sanay Cingra: ‘Yihofa, Yihofa, o siniˈadaay to tamdaw, patadoay miharateng to tamdaw a Kawas, o caay ka ranikay a maketer, iraay ko kadofahay madimadiay a olah, tada soˈliˈlinay ngaˈay tiˈeren, midaˈocay ko olah to tamdaw, misododay to raraw.’ (Kasadakan 34:​6, 7) Oniya kasemeran a sowal mahapinangay ni Mosi, o madimadiay a olah ni Yihofa iraay ko cecay mikiriwiˈay a pakayraan. O maanan hani? Sowal ni Yihofa cowa ko madimadiay aca a olah, pasowalayho ‘iraay ko kadofahay madimadiay a olah’ no Niyah, o sasinanoten ita konini. Itini Fangcalay Cudad oniya ‘iraay ko kadofahay madimadiay a olah’ a sowal kina pinaay masadak, o ci Yihofa ko misowalan cowa ko tamdaw. (Saˈosi 14:18; Nihimiya 9:​17; ˈOlic 86:15; 103:8; Yoil 2:​13; Yona 4:2) Itini Fangcalay Cudad miceriday ci Yihofa mihaen a somowal to Niyah, mahapinangay misaaretengay Cingra tonini a capeling. w21.11 2-3 fiedac 3-4 fatac

O tarokos ci Pitiro ato fafahi ningra patirengay to ngaˈayay a taˈarawan no mararamoday a tamdaw. Mafanaˈ ci Pitiro ci Yisan maedeng kalitosa tangasa cecay miheca a tatokian, o mamisaˈosi to kalimlaan a sasaˈosien. Nao mifotingay ko tayal ni Pitiro midimokos to paro no lomaˈ, kawra mitahidang ci Yis ci Pitiroan mihakelong cingranan i, mamisimsim ci Pitiro sasamaan midimokos to paro no lomaˈ. (Luka 5:​1-​11) Ikor misaˈosiay ci Pitiro mihawad to mifotingay a tayal, kalacafay ci Yisan tayra icowacowa pala mitosil. Mahapinangay, tada midamaay ko fafahi ningra cingraanan. Ngaˈay mikitini Fangcalay Cudad mahapinang ita, ikor no patikol maˈorip ci Yis, na kalacafayay ko fafahi ni Pitiro tayra i caka lecad a pala matayal. (1 Korinto 9:5) Awaay ko hasasa, tada ngaˈayay ko fafahi ni Pitiro, mansa ngaˈay mihadak to sapaini i mararamoday a Krisciyang. (1 Pitiro 3:​1-7) Mikiˈokay ci Yihofa, salakatay micangacang to Hongti Kitakit a tamdaw mamicada to sadimokos Ningra. Ci Pitiro ato fafahi ningra ihkalay mahapinang pakasoˈlinay tonini a sakiˈok.​—Matay 6:​31-​34. w21.11 18 fiedac 14 fatac

Tarokos ci Pawlo tada maolahay to salikaka, caay ka talaw to roray matayal saki cangranan. (Dmak 20:31) Mansa tangongolay ko olah no salikaka cingranan. Kinacecayay, o malohemay malitengay no Ifiso mafanaˈ to cowato ko mamaˈaraw nangra ci Pawlo, ‘ongong sanay a tomangic.’ (Dmak 20:37) Malecaday, o malohemay malitengay ita maolahay to salikaka, hanaca misaˈicelay padama cangranan. (Filipi 2:​16, 17) Kawra nolatekay, adihayay ko masiˈayaway no malohemay malitengay a pasangaray, o manan ko papadama cangranan miremo tonini a pasangaray hani? O marorayay matayal a malohemay malitengay ngaˈayay miharateng to taˈarawan ni Pawlo. (1 Korinto 11:1) Cowa ko mikiriwiˈay a tamdaw cingra, o cowa ka lefot a tamdaw, latekay misaˈicelay cingra ngaˈ matatodongay ko pidemak. (Loma 7:​18-​20) Roma i, misiˈayawayho cingra to masakenakenaay a pasangaray. Kawra cowa ka pisawad ci Pawlo, cowa ka lahdaw ko lipahak. Ano todongen no malohemay malitengay ci Pawlo o ngangaˈay miremo to pasangaray, padadotoc lipahak matayal saki Yihofaan. w22.03 26 fiedac 1-2 fatac

Masowalay no Lifi 19:3 ko o Paselaˈan a Romiˈad a limasmas. Manaokaniw, cowa ko mamidofdof ko Krisciyang to Rikec ni Mosi, to lipalipay cowa ko mamidofdof to Paselaˈan Romiˈad. Kawra haratengen ita samanay ko Israil tamdaw midofdof to Paselaˈan Romiˈad, ato mikitini toniya limasmas malifokay nangra ko maanan a epoc, wa adihay ko mananamay. O Paselaˈan Romiˈad o mamisawad ko tamdaw to tayal paselaˈ hanaca o pidokoan to Kawas a romiˈad, mansa itini Paselaˈan Romiˈad tayraay ci Yis i kasaˈopoan no Nacali miˈosi to Kimad no Kawas. (Kasadakan 31:12-​15; Luka 4:​16-​18) Palimoˈotay ci Yihofa i Lifi 19:3 sanay: ‘O dadoedoen ko paselaˈan Ako a romiˈad.’ Toniya sapalimoˈot miocoray kitaanan mitongal to toki midoko to Kawas. Itini tonini a pakayraan iraay ko sasalofen no niyah saan kiso han? Ano micerid kiso mipalak to toki mirienang to midokoay to Kawas a demak, ngangaˈay palahad to tangongolay a kalawidang ci Yihofaan, o kalimlaan no padotocay a makorac konini. w21.12 5 fiedac 13 fatac

Itini fafekang no sera ci Yis i, makahiay macacawmaˈ to masakenaay a tamdaw. Na malacafayay cingra to cihafayay, iraay ko fadangalan a tamdaw komaen, kawra mipalakayho to adihayay a toki cingra kalacafay to manikaway, maroeroay a tamdaw. O roma tamdaw o “ciraraway” sanay ko pinengneng no ˈalomanay, kawra sidaˈitay ci Yis micada cangranan. Maˈaraw no misao moecelay sanay a tamdaw tada mapiliˈay, miliclicay to nisawawaan ni Yis sanay: “Hano mikapot kamo to milisataay ato romaroma a ciraraway a tamdaw a komaen saw?” Orato ci Yis tano sinael anini a pacaˈof cangranan. (Luka 5:​29-​31) Itini ˈayaw no masadak ci Misiya, pairasolay ci Isaya paˈayawayto cowa ko mamicada ko tamdaw cingranan, sanay: ‘Misakahmaway ko pinengneng no tamdaw cingranan, kapiliˈen no tamdaw. . . . Caay ka sapinengnengaw ko tamdaw cingranan. Misakahmawan no tamdaw cingra, cowa ka pisaareteng ko pinengneng ita cingranan.’ (Isaya 53:3) Ano ‘kapiliˈen no tamdawˈ ci Misiya saan ko sowal no Fangcalay Cudad, mihaenay ano maˈaraway no saka 1 hahekalan a Yutaya tamdaw ko pisakahmaw no tamdaw ci Yisan, cowa ko fafahka ko harateng. w21.05 8-9 fiedac 3-4 fatac

O roma salakatay Krisciyang cowa pisakadademak to Kimad no Kawas, o roma tamdaw misakakinihay a maolah to cihafayay a tamdaw, iraayho ko roma tamdaw cowa pisinanot to sasowalen no niyah. (Yakop 1:​22; 2:​1-3; 3:​8-​10) Soˈlin pakidemay ko pasangaray nonini a salikaka, kawra awaayto ko kapo nangra cowa ka saan ci Yakop a miharateng. Mihadakay cingra to sidaˈitay ihkalay a limoˈot, pakalalokayho to mamisalof a tamdaw pasayra i malohemay malitengay micangacang to sapadama. (Yakop 5:​13, 14) Mananamay ita: Matatodong ko pihalamham to tao, mamitafoho to tawlikay. Pakaynien i ˈalomanay pacekiwan, misaka dademak to mananamay cowa ko madoloay. (Yakop 4:​1-4) Misaaliay cangra to halafinay a toki ngaˈ mafalicay ko tatiihay a nanaman alatek, hanaca palahad to capeling no Krisciyang. Timolo a pasowal to pacekiwan o manan ko sasalofen nangra. Toniya tatokian, o mamitafo kita to tawlikay, pakasoˈlin ci Yihofaan o mamisolot to misapoeneray ko falocoˈ a tamdaw tayra i tatihi Ningra, papafeliho cangranan to ˈicel a mifalic.​—Yakop 4:​10. w22.01 11 fiedac 11-​12 fatac

Kihcod a Krisciyang o mamisaˈicel a mitodong ci Yihofaan, paihkal to siniˈadaay i tamdaw, misamanay hani? Cecay lalangian i, ano eca ka siniˈada kita to tao, cowato ko mamitengil ci Yihofa to pitolon ita. Caay ka olah kita mihaen ci Yihofa micada kitaanan, mihaenay o mamisaˈicel kita eca ka pakidem ko saali to tamdaw. O micadaay to roray a salikaka ano misaali to sapadama ita, aka a talimaan saan, ka pitengil to ‘pingitangit no sasafaay a tamdaw.’ Haharatengen ita ko limoˈot no Fangcalay Cudad: ‘Cowa ka siniˈada to tao i, ano masawkit ko niyah cowa ko mamilifok to siniˈada.’ (Yakop 2:​13) Ira ko misapoeneray a waywayan ita, miharateng kita to misaaliay ko niyah to siniˈada, o mamadoloto paihkal to siniˈadaay a falocoˈ i tao. Pakayra i soˈliˈlinay pasasiyor, miliyaway patikol i kasakopang a tamdaw o ngangalefen ita mihaen ko demak. Itini tinakoan no Fangcalay Cudad ngangaˈay padama kitaanan palahad to siniˈadaay a falocoˈ, miliyas to awaay ko olah a waywayan. w21.10 12 fiedac 16-​17 fatac

ˈAyaw no mahererek ko mitosilay a tayal i, mikilimay ci Yis to awaay ko adeses a kitiraan, mamisongilaˈ mitolon ato midotim. ˈAyaw no mapatay cingra i salikoray a dadaya, tayraay cingra i Kisimani. Itiya, pasayraay cingra i nisawawaan mihadak to milingatay to mitolonay a kalimlaan a limoˈot. Tahira cangra i Kisimani i o dadayato, mataˈlifayto ko lafii alatek. Pasowalan ni Yis ko tarokos malacafay cingranan a “mikecol,” ikor tayraay i ngata a pala mitolon. (Matay 26:37-​39) Kawra itini pitolon ningra i, mafotiˈay ko tarokos. Maˈaraw ningra mafotiˈay cangra, miliyaw palimoˈot cangranan ‘ka padadotoc mikecol, padadotoc mitolon.’ (Matay 26:40, 41) Mafanaˈay cingra taˈangayay ko saroero no tarokos, hanaca tada marorayay. Patadoay cangranan miharateng cingra, sanay: ‘Faedetay ko falocoˈ, kawra malonayay ko tireng.’ Ikor, kinatosaay aca ci Yis mitolon, kawra ano patikol cingra i maˈaraway ko kafotiˈ nangra, cowa ka pitolon.​—Matay 26:42-​45. w22.01 28 fiedac 10-​11 fatac