Mikifalocoˈ a Mitolon ci Yihofaan

1-2. (1) O manan a lalangian alatek pasangaran nanay kita mikifalocoˈ a mitolon ci Yihofaan? (2) Hano mafanaˈ kita wa misongilaˈ ci Yihofa mitengil to satolon ita?

ANO mitolon kiso i, maceriday pasowal to mahecaday a sowal, anca o pinangan aca a nanaman hokira? Soˈlinay i, ˈalomanay tamdaw mahecadayto miso a harateng. ˈIfowaay ko kaˈorip no mita, maceriday a macaloh mitolon. O roma tamdaw, awaay ko kapo to niyah sanay, cowa ka citatodong miingid to Kawas, mansa pasangaran nanay mifanaˈ Cingranan to nafalocoˈan.

² Saan ko sowal no Fangcalay Cudad, misakaretengan ni Yihofa i, cowa ko makapahay a sasowalen ko satolon no mita, ao naitiniay ikemod no falocoˈ misapoener no mita. Saan ko Fangcalay Cudad, midohingaan Ningra mitengil ko pingitangi no ‘misamimingay ko falocoˈ a tamdaw.’ (ˈOlic 10:17) Misongilaˈay a mitengil Cingra to kahacecay a sowal no mita, samanen tada ciharatengay Cingra kitanan.—ˈOlic 139:1-3.

3. Oniya lalakaw mamilengo to manan?

³ Oniya lalakaw wa milengo: Misamaanay hano rihaday kita a mitolon ci Yihofaan? Sasamaan ko demak ita ngaˈ ciepoc ko satolon no niyah? Itini Fangcalay Cudad maˈoningay ko adihayay a satolon, sasamaan kita a minanam, ho madolo mifanaˈ to Kawas to nafalocoˈan? Ano pakidem ko cariraw kita cowa ka fanaˈ to o manan a sasowalen, sasamaan ko demak hani?

SARIHADAYEN KO FALOCOˈ A MITOLON CI YIHOFAAN

4. Cipinang kita to manan a demak i, wa rihaday kita mitolon ci Yihofaan hani? (ˈOlic 119:145)

⁴ Ano cipinang kita ci Yihofa o madimadiay, ciharatengay kitanan a widang, wa rihaday ko falocoˈ ita mifanaˈ Cingranan to harateng ato nafalocoˈan no mita. Mitiliday to ˈOlic 119 fedengan a tamdaw misaˈicelay misao widang ci Yihofa ko pinengneng. O kaˈorip oniya mitiliday cowa ko madoloay, katihi ningra ˈalomanay ko misafakofakoay a tamdaw, maceriday paoraf cingranan. (ˈOlic 119:23, 69, 78) Malaodotho cingra to cowa ka lefot a waywayan no niyah. (ˈOlic 119:5) Kawra, kamayan cingra mahemek a mikifalocoˈ a mitolon ci Yihofaan, misarocod a micangacang Cingranan.—ˈOsien ko ˈOlic 119:145.

5. Hano aka a pakayni i masofaway ko harateng eca ka pitolon ci Yihofaan? Patinakoen a mitadtad.

⁵ Nolatekay, alatek cowa ka citatodong ko niyah mitolon ci Yihofaan saan ko harateng. Kawra makalimay ci Yihofa to tamdamdaw mitolon Cingranan, mahawpay ko pakidemay ko raraw a tamdaw. (Isaya 55:6, 7) Mansa, aka a pakayni i masofaway ko harateng, eca ka pitolon ci Yihofaan. Tinakoen, paontingay to hikoki a tamdaw maefer ko hikoki i, ano tahalifa to pasangar i, ano hacowato i, ngaˈayay fanaˈen ko mikayatay a tamdaw. Ano makaliorat ko lalan anca mararaw i, wa mangodo cingra caka pisaali to sapadama han? Cowa! Mahecadayto, ano itini pidokoan makaliorat kita anca midemak to cowa ko kaolahan ni Yihofa a demak, ngaˈayay rihadayen kita micangancang to sapadama Ningra a mitolon Cingranan.—ˈOlic 119:25, 176.

SASAMAAN CIEPOC KO SATOLON NO NIYAH

6-7. Samaanen ita ko demak ngaˈ madolo a mikifalocoˈ a mitolon ci Yihofaan? Patinakoen a mitadtad. (Nengnengen ko ilaenoay safanaˈ.)

⁶ Ano naitiniay i nafalocoˈan ita a mitolon ci Yihofaan, mifanaˈ Cingranan to nafalocoˈan ato harateng no niyah, wa ciepocto ko satolon no mita. Mihaenay, o manan a pakayraan to hapapadama kitanan mihaen to demak hani?

⁷ Midotim to makapahay capeling ni Yihofa.a Ano midotim kita ci Yihofaan to masamaanay a Kawas i, wa mangalef a mikifalocoˈ mitolon Cingranan. (ˈOlic 145:8, 9, 18) Nengnengen ko fafahiyan salikaka ci Keristin a nalifetan. Tada mariˈangay ko wama ningra, saan cingra: “Palo wamaen ci Yihofa a minengneng i, masasowal Cingranan, pakayni takowanan cowa ko madoloay. Maceriday kako miharateng to cowa ka ngaˈay ko midemakan, calemcemay to hamamifalah Cingra takowanan.” O manan ko padamaay cingranan misalof to harateng ningra hani? Saan cingra: “Midotimay to madimadiay a olah ni Yihofa, parihadayay to falocoˈ ako. Pahapinang ci Yihofa kamayan a mikiting ko kamay ako, cowa ka sawaden Ningra. Soˈlin mararaw kako mapolin i, kamayan Cingra midama takowanan, padadotoc a maolah takowanan. Mansa ano mahemekayto ano mararomayto i, wa ngaˈay fanaˈan ako Cingra to ikemoday no harateng no mako.”

8-9. ˈAyaw no mamitolon i, misaharatengay to o manan ko sasowalen, mihaen to demak o manan ko epoc hani? Patinakoen a mitadtad.

⁸ Salakat saharateratengen o manan ko sasowalen. ˈAyaw no mamitolon, ngaˈayay licayen ko niyah to pina a salicay, tinakoen: “Masiˈayaway ako ko manan a pasangar hani? O cima ko pakararaway takowanan, pasangaray kako misodod cingranan han? Toniya ngata i kaˈorip ako mafekaday ko kafalic, misaali to sapadama ni Yihofa ho ngaˈay a miremo han?” (2 Hongti 19:15-19) Roma i, ngaˈayay dofdofen ita ko sapakafanaˈ ni Yis, haratengen pakayni to fangcalay ngangan ni Yihofa, hongti kitakit, araaw, ngangaˈay kita mingitangit to manan.—Matay 6:9, 10.

⁹ Fafahiyan salikaka ci Aliska mafanaˈayto o faˈinay ningra salikorayto no ekang no ponoˈ ikor, pasangaray a mitolon. Sanay cingra: “Tada mararomay kako, masasifoday ko harateng a mitolon, cowa ka fanaˈ to o manan a sasowalen.” Ikor, o manan ko padamaay cingranan hani? Saan cingra: “ˈAyaw no mamitolon i, saharateratengen o manan ko sasowalen. Mihaen i, cowa ko niyah aca a pasangar ko miharatengan, rihadayay ko falocoˈ ako, ihkalay ko maharatengay.”

10. Paira to halafinay a toki mitolon, o manan ko epoc hani? (Nengnengen ko coka.)

¹⁰ Paira to halafinay a toki, naˈonen a pasowal. Soˈlin apotoˈay a satolon ngaˈayay ira ko epoc, kawra ano halafin ko toki a mitolon, wa madolo pasowal to nafalocoˈan no niyah.b Faˈinayan ni Aliska ci Yilayciya sanay: “Mitanamay kako to romiˈamiˈad kinapinaay a mitolon, kawra mahapinangay ako, mitongalan ako ko toki mitolon ikor, mangalefayto ko piingid ci Yihofaan. Cowa ka afaden ci Yihofa mitala to satolon ako, mansa cowa ka caloh kako, ngaˈayay naˈonen a pasowal.” Tanamen hena: Kilimen ko ngaˈayay pisamacayan a tatokian ato kitiraan misongilaˈ a mitolon, mitolon i, ngaˈayay pangihaˈen a pasowal, ikor misaˈicel micerid a midemak.

MIDOTIM TO MITILIDAN I FANGCALAY CUDAD A SATOLON

11. Midotim to maˈoningay i Fangcalay Cudad a satolon, o manan ko epoc hani? (Nengnengen ko sapatongal lalakaw “Mahecaday ko Harateng Iso Cangranan Han?”)

¹¹ Miˈoningan no Fangcalay Cudad ko adihayay naifalocoˈay a satolon ato pakahemakay to Kawas a ˈOlic, midotim toniya lalakaw, mamacada iso ko adihayay a epoc. Maˈaraw iso ko nolitengan a sikawdan no Kawas samaanay pasowal to nafalocoˈan, alatek sapitodongaw cangranan mifanaˈ to Kawas to nafalocoˈan. Alatek patalipaˈelal tisowanan konini, mafanaˈ itini satolon tano masasiromaay a sowal a paihkal to nafalocoˈan. O roma i, maˈosi iso ko roma a satolon i, alatek wa mahapinang to sowal ningra mahecaday ko harateng ato nafalocoˈan no niyah.

12. Midotim kiso to Fangcalay Cudad a satolon i, salalicayen ko niyah to manan a salicay?

¹² Midotim kiso to maˈoningay i Fangcalay Cudad a satolon i, ngaˈayay licayen ko niyah: “O nima a satolon konini? I masamaanay a pakayraan a pasowal hani? Na mahecaday ko harateng ako toni han? Mikitini toniya satolon o manan ko mananamay ako?” Sapikilimaw to sapacaˈof noniya salicay, alatek mamisaˈicel kiso mikilim to romaroma a lalakaw, kawra mihaen to demak tada ciepocay. Nengnengen ko pina tinakoan.

13. Mikitini i satolon ni Hano o manan ko mananamay ita? (1 Samuil 1:10, 11) (Nengnengen ko coka.)

¹³ ˈOsien ko 1 Samuil 1:10, 11. Oniya satolon o misowalan ni Hana, itiya masiˈayaway ningra ko tosaay taˈangayay a pasangar. Sakaciwawaaw cingra, kawra cowa ka ciwawa. Cowa konini aca, o roma a fafahi no faˈinay ningra, maceriday miafad cingranan, ho maroray ko kaˈorip ningra. (1 Samuil 1:4-7) Ano halafinto awaay ko pakayraan iso misaysay to pasangar, mikitini i satolon ni Hana o manan ko mamananam? Halafinay ci Hana mitolon ci Yihofaan, pasowal Cingranan to kihcod a cariraw no falocoˈ, telocto i, macadaayto ningra ko sahinom. (1 Samuil 1:12, 18) ‘Papatoroden iso ko karetengay a ˈinorong ci Yihofaan,’ tatodong i, pasowal Cingranan to kihcod cariraw ato nafalocoˈan iso, mihaen i, mamacada iso ko sahinom.—ˈOlic 55:22.

14. (1) Mikitini satolon ni Hana, o manan ko mananamay ita? (2) Miˈosi ato midotim to Kimad no Kawas, hano sakaciepoc to satolon ita hani? (Nengnengen ko ilaenoay safanaˈ.)

¹⁴ Ikor mihofocayto ni Hana to wawa, ci Samuil hananay. Misawadto ko wawa micoco i, mikeridan ni Hana cingra tayra i kaˈayaw no Sakakaay Saysi ci Ilian. (1 Samuil 1:24-28) Ikor, mikifalocoˈay ci Hana mitolon ci Yihofaan. Mikitini toniya satolon mahapinang ita, pakasoˈlinay cingra ci Yihofaan oha mamidipot a midimokos to madimadiay a sikawdan Ningra.c (1 Samuil 2:1, 8, 9) Soˈlin pasangaray ko kaˈorip, kawra misaˈicelay ci Hana misamacay i sapalemed ni Yihofa. O manan ko mananamay ita hani? Ano macerid kita misinanot to samaanay ci Yihofa midama kitanan, wa irato ko ˈicel miremo to pasangar no mita.

15. Mikitini i satolon ni Yirimiya o manan ko mananamay ita? (Yirimiya 12:1)

¹⁵ ˈOsien ko Yirimiya 12:1. To cecay a liyad, maˈaraway no pairasolay ci Yirimiya ko mariˈangay tamdaw sinowayay ko kaˈorip a mangolaw. Roma i, makapoˈiay no Israil tamdaw pakatoleday ko falocoˈ ningra. (Yirimiya 20:7, 8) Ano maˈaraw ita ko mariˈangay tamdaw sinowayay ko kaˈorip, anca milikaf ko tao kitanan, alatek mamahecad ci Yirimiyaan ko harateng. Soˈlin pasowalay ci Yirimiya ci Yihofaan to roray ningra, kawra cowa ka cisasa cingra to masadafdafay ni Yihofa. Ikor, maˈaraway ningra to samaanay ci Yihofa mirikec to misafelitay a finawlan, maedeng patanotktok to pakasoˈlinay falocoˈ ningra to masadafdafay ni Yihofa. (Yirimiya 32:19) Ngaˈayay pasowalen ita ci Yihofa to keter no mita, kawra haratengen, pakasoˈlinen a mitiˈer Cingra, wa itini i matatodongay a tatokian misaysay to pasangar.

16. Mikitini i satolon no Lifi tamdaw o manan ko mananamay ita? (ˈOlic 42:1-4) (Nengnengen ko coka.)

¹⁶ ˈOsien ko ˈOlic 42:1-4. Oniya ˈolic o malaholiway a Lifi tamdaw ko mitiliday. Itiya, cowa ka ngaˈay cingra kalacafay to finawlan midoko to Kawas. Itini toniya ˈolic, mihadakan ningra ko naifalocoˈay a harateng. Ano adada ko tireng ita i, halafin caka ngaˈay masadak, anca pakayni i pihakelongan a mapalit, alatek wa mahecad kita cingranan, sasifod sanay ko harateng. Kawra, ano samaanto ko harateng ita, ngaˈayay emin han mifanaˈ ci Yihofaan. Mihaen ko demak wa padama kitanan misierod to harateng, halo tano harateng ni Yihofa noka pinengneng to pakayraan no niyah. Oniya Lifi tamdaw mahaenay ko pakayraan. Fanaˈen ningra ko Kawas, oranto i, mahapinangay ko pakayraan no niyah soˈlin cowa ka hecad ko isaˈayaway, kawra kamayan makilimay ko pakahemekay to Kawas a pakayraan. (ˈOlic 42:5) Roma i, maharatengay ningra samaanay midimokos ko Kawas cingranan. (ˈOlic 42:8) Mahecaday, ano misongilaˈ kita a mitolon, wa cipinang to harateng no niyah, mihapinang to o manan ko kalimlaan, wa milifok to ˈicel padadotoc a mihadidi.

17. (1) Mikitini i satolon ni Yona o manan ko mananamay ita? (Yona 2:1, 2) (2) Haratengen ko pina a sinael i ˈOlic, sasamaan padama kitanan mihadidi to pasangar hani? (Nengnengen ko ilaenoay safanaˈ.)

¹⁷ ˈOsien ko Yona 2:1, 2. Oniya sowal o pairasolay ci Yona itiniay i tiyad no taˈangayay foting a pasowal ci Yihofaan. Itiya, makesemay ko falocoˈ ningra cowa ka pidofdof ci Yihofaan, kawra kamayan cingra pakasoˈlin to hatatengilen ni Yihofa ko pingitangit ningra. I satolon ningra, sakadademakan ni Yona ko adihayay a sowal i ˈOlic.d Mahapinang i, mananamay cingra toniya pakahemekay a ˈolic. Midotim toniya lalakaw parihadayay cingranan, mafanaˈto oha papadamaen ni Yihofa cingra. Mahecaday toni, wa ngaˈay kita pakaharateng to pina a sinael. Mihaen i, tahalifa kita to pasangar mitolon ci Yihofaan i, alatek wa maharateng ita toniya sinael, halo milifok to sahinom.

PADADOTOC MITOLON, PADADOTOC MIINGID CI YIHOFAAN

18-19. Ano cowa ka fanaˈ kita pasowal to nafalocoˈ no niyah ci Yihofaan, Loma 8:26, 27 sasamaan mihinom kitanan hani? Patinakoen a mitadtad.

¹⁸ ˈOsien ko Loma 8:26, 27. Nolatekay tada macariraway kita, telocto i, cowa ka fanaˈ to sasamaan pasowal to nafalocoˈan no niyah ci Yihofaan. Kawra aka calemcem, samanen i mahaenay a pakayraan, o fangcalay saocor no Kawas wa patado kitanan a “mingitangit.” O manan ko tatodong hani? Tano fangcalay saocor ni Yihofa mikayat to mitiliday to Fangcalay Cudad, mitilidan ko satolon no ˈalomanay tamdaw. Ano awa ko pakayraan ita pasowal to nafalocoˈan no niyah i, oniya matiliday a satolon i pinengneng ni Yihofa mahecaday to pingitangit no mita, halo pacaˈof kitanan.

¹⁹ I Rowasiya a fafahiyan salikaka ci Ilina mikitini toniya kimad milifokay to sapadama. Na pakayni cingra i mitolon ato miˈosi to Fangcalay Cudad a malepel. Itiya pakidemay ko saroero ningra, pasangaray a mitolon to Kawas. Mitikolay cingra a miharateng: “Maharatengay ako ko mananamay isaˈayaw, ano pakidem ko rarom ako cowa ka fanaˈ to o manan ko sasowalen ci Yihofaan, itini Fangcalay Cudad o satolon no madimadiay a sikawdan mahecadayto o no mako a satolon saan ko pinengneng ni Yihofa. I pasangaray a romiˈad, maharateng koniya demak tada mihinomay takowanan.”

20. Ano pakidem ko saroero i, sasamaan misaday ko satolon no mita?

²⁰ Ano pakidem ko saroero ita i, alatek pasangaray misamacay a mitolon. O manan ko papadama kitanan hani? ˈAyaw no hamamitolon i, ngaˈayay tengilen ko lokoing no ˈOlic, pahecad ci Tafitian tiliden ko harateng no niyah. (ˈOlic 18, 34, 142 ato lalangian a sowal) Manaokaniw, awaay ko pakidemay a saˈosi tonini. Ano o mananto a pakayraan i, oha ngangaˈay padama kiso misaday to falocoˈ no niyah, ngangaˈay kiso tanamen.—ˈOlic 141:2.

21. Hano ngangaˈay kita misarocod a micangacang ci Yihofaan, mifanaˈ Cingranan to nafalocoˈan iso hani?

²¹ Soˈlin awaay ko sowal no mita, cipinangay mafanaˈ ci Yihofa to nafalocoˈan no mita. (ˈOlic 139:4) Kawra, sapitengilaw Cingra to sowal ato harateng ita, ato hakowaay ko pakasoˈlin ita Cingranan. Mihaenay, aka papicongeden ko maamaan a demak tisowanan a mitolon to kakarayan a Wama. Dotimen ko satolon i Fangcalay Cudad, haratengen mikitini o manan ko mananamay; mamisarocod a micangacang ci Yihofaan, mifanaˈ Cingranan to nafalocoˈan iso, paladaˈ to harateng iso. O sangaˈayay a Widang iso ci Yihofa, ano icowato midohingaay Cingra a mitengil to satolon iso, tahadaˈoc patihi tisowanan!