Haratengen Patado to Tao a Mitolon

1. Sasamaan kita mafanaˈ to misakaretengay ci Yihofa to satolon no mita?

O MITOLON o masakalimlaan a sapatelong. Haratengen, pafelian ni Yihofa ko coyoh to romaroma a tayal, pafelianho ci Yis to masakalimlaan a ˈinorong. (ˈOlic 91:11; Matay 28:18) Kawra, pakayni pitengil to satolon no tamdaw i, cowa papikotayen Ningra ko cimacima tamdaw, ao Niyah aca ko midemakay. O ‘mitengilay to satolon a Tapang’ ci Yihofa, mitengilay Cingra to satolon no mita a micangacang.—ˈOlic 65:2.

2. Pakayni patado to tao a mitolon, patirengay ci Pawlo to o manan a taˈarawan hani?

² Ngaˈayay emin han ita ko nafalocoˈan a mifanaˈ ci Yihofaan ato cariraw no niyah. Kawra, haratengenho ita patado to tao a mitolon. O tarokos ci Pawlo mihaenay ko demak. Na patadoay cingra to Ifiso a kasakopang mitolon. I mitilidan ningra a tikami canganan, sanay cingra: ‘Mitolon kako i, maceriday a masowal kamo.’ (Ifiso 1:16) Na patadoay ci Pawlo to cecay a tamdaw mitolon. Itini tikami pasowalan ningra ci Timoti: ‘Miakoˈiday kako to Kawas, hanaca i romiˈad dadaya a mitolon i, padadotocay maˈilol tisowanan.’ (2 Timoti 1:3) Soˈlin adihayay ko pasangar ni Pawlo, maceriday micangacang to sapadama no Kawas. (2 Korinto 11:23; 12:7, 8) Kawra kamayan cingra mipalak to toki patado to tao a mitolon.

3. Hano matawal kita patado to tao a mitolon hani?

³ Nolatekay, matawalay ita patado to tao a mitolon. Misamaanay hani? O fafahiyan salikaka ci Saplinaa somowalay to cecay lalangian, sanay cingra: “Itini toniya hekal, ˈifowaay ko nokaˈorip ita. Nolatekay pisiˈayaw aca to pasangar no niyah, sasifod sanayto ko falocoˈ no mita. Telocto i, ono niyah aca a demak ko maharatengay ita a mitolon to Kawas.” Mahaenay ko harateng iso han? Ano haenen i, oniya lalakaw ngaˈay padama tisowanan. Dotoc mamilengo kita, patado to tao a mitolon hano o masakalimlaan, ato itini toniya pakayraan sasamaan ngaˈay ko demak iso.

HANO PATADOEN KO TAO A MITOLON HANI?

4-5. Patado kita to tao a mitolon hano o ‘tada ciepocay’ han hani? (Yakop 5:16)

⁴ Patado to tao a mitolon ‘tada ciepocay.’ (ˈOsien ko Yakop 5:16.) Patado to tao a mitolon wa ngaˈay mafalic ko teloc no demak han? Ngaˈayay! Mafanaˈay ci Yis to tarokos ci Pitiro ikor wa cowa ko mihayi cingranan, mansa pasowal ci Pitiroan: ‘Patadoanto ako kiso a mitolon a micangacang, ho eca ka malahdaw ko pakasoˈlinay falocoˈ no miso.’ (Luka 22:32) Mafanaˈayho ci Pawlo to o satolon ngangaˈay mifalic to pasangaray a pakayraan. Na marofo i Loma i, patikamian ningra ci Filimon sanay: ‘Makalimay kako pakayni satolon namo, ho ngaˈay kako mapasalat a minengneng tamowanan.’ (Filimon 22) Telocto i, kalikiayto ci Pawlo a mapasalat, ngaˈayayto tayra icowacowa a pitosil.

⁵ Ngaˈay paciecien ci Yihofa, palimoˈot Cingranan tooren ko sowal ita a midemak han? Cowa. Kawra mamidohinga ci Yihofa to satolon no mita, misinanot to kaciharatengan no mita a demakan. Nolatekay misaˈosiay Cingra palaˈosien ko micangacangan ita a demak. Mihaenay, ngaˈayay kita pakayni i roma a demakan micangacang ci Yihofaan, ikor patorod hanto ko demak i Cingranan.—ˈOlic 37:5; 2 Korinto 1:11.

6. Patado to tao a mitolon papadama kitanan palahad to siniˈadaay falocoˈ, hano saan ko sowal hani? (1 Pitiro 3:8)

⁶ Patado to tao mitolon papadama kitanan palahad to ‘siniˈadaay falocoˈ.’ (ˈOsien ko 1 Pitiro 3:8.) Iraay ko siniˈadaay falocoˈ a tamdaw misinanotay to masiˈayaway no tao a roray, makalimayho miˈesal to roray no tao. (Marko 1:40, 41) O malohemay malitengay ci Maykel sanay: “I satolon ako pasowal to malitemohay no tao a pasangar, mangalefay ko kacipinang to roray nangra a maolah cangranan. Soˈlin cowa ka fanaˈ cangra, kawra i harateng ako hato mangangataayto cangranan.” O malohemay malitengay ci Riciyate masowalay ningra ko roma ciepocay, sanay: “Patado kita to tao a mitolon, makalimayto sapipadamaaw cangranan a midemak.” Sanayho cingra: “Patado to tao mitolon ikor, misaˈicelayho a padama cingranan, mahecaday kita to lalosidan ni Yihofa, palaˈosi to patadoan ita to tao a micangacang a demak.”

7. Patado to tao a mitolon hano papadama kitanan matatodong ko pinengneng to pasangar no niyah? (Filipi 2:3, 4) (Nengnengen ko coka.)

⁷ Patado to tao a mitolon papadama kitanan matatodong ko pinengneng to pasangar no niyah. (ˈOsien ko Filipi 2:3, 4.) I hekal ni Satan, o kahacecay tamdaw mamisiˈayaw to masakenakenaay a pasangar. (1 Yohani 5:19; Paˈarawan 12:12) Ano palahad kita to patadoay to tao a mitolon a nanaman, wa maharateng to ‘polong kasacefang a salikaka, tahalifaay to malecaday a sapalifet.’ (1 Pitiro 5:9) O misakafahay a fafahiyan salikaka ci Kaysalin sanay: “Maceriday kako patado to tao a mitolon, mihaen ko demak patalipaˈelalay takowanan, o tao mahecaday takowanan adihayay ko pasangar. Maharateng koni, cowato ka haharateng sa kako to pasangar no niyah.”

MISAALIAY CANGRA TO SATOLON NO MITA

8. Ngangaˈay kita patado to cima mitolon hani? Patinakoen hena.

⁸ Wa ngaˈay kita patado to cima mitolon hani? Ngaˈayay patado kita to cowa ka hecad a tamdaw mitolon. O kaemangay alatek misiˈayaway to pilikaf ato sakayhid no cafay micudad, o malitengay misiˈayaway to pasangar a maliteng. O roma salikaka mamisiˈayaw to adada no tireng, o roma i, mamihadidi to pisafelit no sifo anca paro no lomaˈ. (Matay 10:18, 36; Dmak 12:5) ˈAlomanay salikaka mafiyoray no pades. Cowa konini aca, o roma salikaka pakayni masasifoday a sifo, mansa mamiliyas to kitiraan no niyah. Alatek cowa ka fanaˈ kita toniya salikaka, kawra ngaˈayay kita patado cangranan a mitolon, mihaen o paihkalay to mitengilay kita to sapalimoˈot ni Yis, “masasiolah” to salikaka maemin.—Yohani 13:34.

9. Oya mikeriday a faˈinayan salikaka ato fafahi nangra, hano patadoen ita cangra mitolon hani?

⁹ Ngaˈay kita patado to mikeriday i likakawa no Kawas a faˈinayan salikaka a mitolon. Oniya faˈinayan salikaka mahawpay ko malohemay malitengay ato dama sikawdan, kasakilac kantok, Iing no fenpo ato romaroma kantok no fenpo, Malohemay Malitengay i Congpo ato dama nangra. Misaˈicelay cangra matayal i kitanan, kawra mamiremoho to cariraw no niyah. (2 Korinto 12:15) O kasakilac kantok ci Marke sanay: “Kapasangaran ako a demak i, maraayay ko kaitiraan ako to wama wina. Matoˈasayto cangra, tatiihayto ko tireng nangra. Soˈlin ira ko fafahiyan kaka ato faˈinay ningra midimokos cangranan, kawra awaay ko pakayraan ako padama cangranan, tada mararomay kako tonini.” Soˈlin mafanaˈ kita anca cowa ka fanaˈ to o manan ko kacarirawan nangra, mamicerid kita patado cangranan a mitolon. (1 Tisalonika 5:12, 13) Ngaˈayayho patadoen ita ko fafahi nangra a mitolon. Samanen o fafahi nangra madimadiay a midama, ngaˈ ngaˈay cangra padadotoc a matayal.

10-11. Maolahay ci Yihofa patado kita to ˈalomanay salikaka mitolon han? Tadtaden hena.

¹⁰ Mahecad toya masowalay i saˈayaway a fatac, maceriday kita patado to romaroma salikaka mitolon, cowa kono cecayay aca a tamdaw a mitolon. Tinakoen, alatek micangacangay kita ci Yihofaan padama toya marofoay a salikaka, anca micangacang Cingranan mihinom toya mapatayay ko salawina a salikaka. O malohemay malitengay ci Tannate sanay: “ˈAlomanay ko salikaka ita tahasiˈayaway to cowa ka lecad a pasangar, mansa itiniay kita i satolon a patado to polong tahapadesay salikaka a mitolon.”

¹¹ Mihaen ko satolon ita maolahay ci Yihofa hokira? Maolahayto! Soˈlin cowa ka fanaˈ kita to saali no kahacecay salikaka i paro no kakarayan. Mansa patado kita to mahecaday ko masiˈayaway a pasangar a salikaka a micangacang ci Yihofaan, o matatodongay koni. (Yohani 17:20; Ifiso 6:18) Mihaen ko demak ita misawacayay to ‘maolahay kita to polong masacefangay a salikaka.’—1 Pitiro 2:17.

PATADO TO CECAY TAMDAW A MITOLON

12. Hano misongilaˈ mihapinang to demak no tao, wa patatodong a mitolon hani?

¹² Misongilaˈ a mihapinang. Ngaˈayay patado kita to ˈalomanay tamdaw a micangacang to Kawas, ngaˈayayho patado to cecay tamdaw a mitolon. I kasakopang iso, iraay ko cima halafinayto ko adada han? Iraay ko awaay ko faˈinay a wina ‘sapidoedoaw to araaw ni Yihofa mipakafanaˈ a mirikec’ to wawa, kawra pasangaran nanay a maroray han? (Ifiso 6:4) Iraay ko kaemangay macariraway ko falocoˈ han? I picudadan tahalifaay cingra to saroero han? Misongilaˈ a mihapinang to itatihiay iso a salikaka, misiˈayaway to masamaanay a pasangar, wa siniˈada cangranan, sapipatadoaw cangranan a mitolon.b—Loma 12:15.

13. Sasamaan kita patado to cowaho ka fanaˈan a salikaka mitolon hani?

¹³ I satolon ngaˈayay sowalen ko ngangan no tao. Soˈlin cowaho ka fanaˈan a salikaka, itini satolon ita ngaˈayay sowalen ko ngangan nangra. Tinakoen, itini Krimiya, Eriteriya, Rowasiya ato Sinciyapor a pala, iraay ko roma salikaka ita pakayniay i pihakelongan a marofo. Ngaˈayay kiso itini jw.org wangcan mamaˈaraw ko ngangan nangra.c O kasakilac kantok ci Polayen sanay: “Ano tiliden ako ko ngangan no marofoay a Krisciyang, ikor ˈosien, madoloayto a maharateng ako cingra, patado cingranan a mitolon.”

14-15. Sasamaan ko demak ita ngaˈ patatodong to saali no tao a mitolon hani?

¹⁴ Matatodong ko picangacang. Isaˈayaway fatac masowalay ci Maykel sanay: “Manengnengay ako ko safanaˈ no jw.org wangcan ko marofoay faˈinayan salikaka i, wa licayen ko niyah, ano kakoto i, sasamaan ko nafalocoˈan hani? Maedeng calemcemay ko fafahi ako, makalim ngaˈay ko pidipot cingranan. Pakayni to mahaenay a midotim, mafanaˈayto kako sasamaan patado to marofoay a faˈinayan salikaka a micangacang.”—Hipray 13:3, ato roma pihongyak.

¹⁵ Roma i, ngaˈayay haratengen ita to samaanay ko kaˈorip no marofoay faˈinayan salikaka i kapalitan, wa adihayto ko maharatengay a cacangacangen a demak nangra. Tinakoen, cangacangen ita ci Yihofa, ngaˈay ko picada no mihimaway a dimeng cangranan, pafelien no cifadangalay tamdaw to adihayay pasalat cangra a mirienang to midokoay a demak. (1 Timoti 2:1, 2) Ngaˈayay patadoen ita ko kasakopang noniya faˈinayan salikaka a mitolon, pakayni i madimadiay taˈarawan noniya salikaka mapakalalok ko kasakopangay a salikaka. Cangacangenho ita ci Yihofa, pakayni to cowa pidoko Cingranan a tamdaw pakaˈaraw to ngaˈayay waywayan no marofoay a salikaka, makahi mitengil to ngaˈayay lihaf. (1 Pitiro 2:12) Soˈlin patado to tahapadesay a salikaka mitolon i, ngaˈayay sakadademaken koniya pakayraan. Misongilaˈ mihapinang kita, i satolon pasowal to ngangan no salikaka, hanaca patatodong to saali nangra micangacang, paihkalay to ‘matongalay ko olah no kalalaˈed’ no mita.—1 Tisalonika 3:12.

MATATODONG KO PINENGNENG

16. Pakayni patado to tao a mitolon, papairaen ita ko manan matatodongay a pinengneng hani? (Matay 6:8)

¹⁶ Mahecad to masowalay isaˈayaw, nolatekay o satolon ita ngaˈay mafalic ko teloc no cecay a demak. Kawra kamayanho mitawmec to matatodong ko pinengneng no mita. Haratengen, o satolon ita cowa ko pasowal ci Yihofaan to cowa ko kafanaˈan Ningra a demak, cowa ko pakafanaˈ Cingranan to sasamaan misaysay to demak. Cipinangay ci Yihofa to saali no sikawdan Ningra. Soˈlinay i, cowaho ka fanaˈ cangra to saali no niyah, anca cowaho ka hapinang ita o manan ko saali nangra i, mafanaˈayto ci Yihofa. (ˈOsien ko Matay 6:8.) Mihaenay, hano patadoho kita to tao a mitolon hani? Samanen ciharatengay kita to tao! Masasiolahay kita, mansa wa patado a mitolon. Maˈaraw ni Yihofa ko midokoay Cingranan a tamdaw mitodong Cingranan paihkal to olah, tada lipahakay.

17-18. Tano tinakoen a mitadtad hano patado kita to tao a mitolon?

¹⁷ Soˈlin o satolon ita cowa ka pifalic to manan a demak, kawra patalahkalay to olah ita to salikaka, ano ci Yihofato misinanotay toni. Tinakoen, o cecay paro no lomaˈ tosaay ko wawa, o cecay faˈinayan a kaka, o cecay fafahiyan a safa. Adadaay ko kaka mafotiˈay i takal, mikilimay ko fafahiyan safa to wama a micangacang, sanay: “Adadaay ko kaka, siniˈadaan, paˈoripen iso cingra!” Soˈlinay mafanaˈay koniya wama, maolahay cingra to wawa no niyah, hanaca midimokosayto cingranan. Kawra, maˈaraw ko fafahiyan wawa ciharateng to kaka, maedeng lipahakan koniya wama.

¹⁸ Mahecadayto, makalimay ci Yihofa malaciharateng kita, malapatado mitolon. Mikifalocoˈ kita maolah to tao, cowa ko niyah aca ko miharatengan, mafanaˈay a cipinang ci Yihofa. (2 Tisalonika 1:3; Hipray 6:10) Roma i, mahecad masowalay isaˈayaw, patado kita to tao a mitolon, nolatekay soˈlinay mafalic ko pakayraan nangra. Mansa ceriden patado to tao a mitolon!