Mosis Igobo Itọtọbọ Ebum Inyi Jioba

Eriọọn̄ ebi ototun̄ ukan̄ Jekọp kubọk ebi Ijeren me Ijipiti. Mgbọ Jekọp mè Josefu ekwube iraka, ayaya ogwu Fero obebene ikikpulu. Ayaya ogwu Fero ya ikaan̄ ukpook bak lek ebi Ijeren ekiwa mè ikikaan̄ unye igak ebi Ijipiti. Eya orọ, irọrọ me ebi Ijeren ekana ebi usun̄. Ikekitet ebi Ijeren me ubọk unye ibe ekebot okpungwu mè iyaka ire ewuuk inama-uwu mè ekesi ikwaan̄ onyenye. Ire, ike ebi Ijipiti ekitet ebi Ijeren me unye ibe ekesi unye ikwaan̄, ikeya ke ebi Ijeren ekiwa igbaalek. Bak lek Fero ikamage ubọk ebi Ijeren ekpọkpọk ikiwa, inyinyi ida ibe ekpan̄ nsabọn ebirieen̄ geelek ebibaan̄ ebi Ijeren emanbe. Ire omokọt ikeek mbet lek ukpook ebi Ijeren ekaan̄be ni?

Ogwu enenwaan̄ ogwu Ijeren ge ekigwen Jokebedi omaman gwun̄ enerieen̄ ge ojajaan̄. Inyi ọmọ ikọt ibem gwun̄ ya, Jokebedi obeben gwun̄ ya itap me emen okwun mè iben isi iyik me agba okwaan̄ Nali. Ngwan̄ gwun̄ ya ogwu ekigwen Miriam okukup iriak ikikpọ mkpọ obobọkọ irek.

Gwun̄ enenwaan̄ Fero onunu me agba okwaan̄ ya iboniken mun̄, mè imun̄ okwun ya okite me isi mun̄. Imun̄ sọntiik gwun̄ okito ito me emen okwun ya, nsan gwun̄ ya otetet ọmọ. Miriam onanan̄a isibi mè ido ibe: ‘Ire nsi mweek ogwu enenwaan̄ obokọt ikpọ chieen̄ me lek gwun̄ yi inyi owu ni?’ Mgbọ gwun̄ enenwaan̄ kè Fero ochieekbe, Miriam osisi igwen nga kan̄ Jokebedi inu. Gwun̄ enenwaan̄ kè Fero otutumu inyi Jokebedi ibe: ‘Bọkọ gwun̄ yi kpọ chieen̄ me lek nyi emi, ke makpe owu ikpoko.’

Mgbọ gwun̄ ya ominbe, Jokebedi osasa gwun̄ ya ijet gwun̄ enenwaan̄ Fero. Gwun̄ enenwaan̄ Fero ogwegwen gwun̄ ya Mosis mè ikikpọ chieen̄ me lek kubọk gwun̄ kan̄. Mosis imin isibi kubọk gwun̄ ogwu ubọọn̄, mokọt ikaan̄ mkpọ geelek iweekbe si. Ire, ikawuuk Jioba. Mosis iriọọn̄ ibe ke ọmọ ire ogwu Ijeren, ikare ogwu Ijipiti. Igobo si itọtọbọ ebum inyi Jioba.

Mgbọ Mosis osobe akọp acha ini, itutumu ifieek me ejit kan̄ itatap ubọk inyi ebi ama kan̄. Me mgbọ imun̄be ogwu Ijipiti ge okisulu ogwu Ijeren ge, isusulu ogwu Ijipiti ya, ene ya okwukwu. Mosis orọrọkọ ijọn̄ ifuun̄ ene ya. Mgbọ Fero oweekbe iriọọn̄, iweek ubọk ibokpan̄ Mosis. Ire, Mosis olilibi isi lek ijọn̄ Midian. Jioba okekikpọ chieen̄ me lek kan̄ me ere ya.