Ukan̄ Okilomo Me Lek Uti Ge me Oron

Mosis iluk akọp acha ini me Midian. Ikaan̄ nwa mè nsabọn. Usen ge, me mgbọ ikikpọ chieen̄ me lek arọọn̄ kan̄ me ere okup iriak ogoon̄ Saina, imun̄ inu ge okeke ọmọ chieen̄ enenen. Imun̄ ukan̄ okisak me lek uti ge me oron, ire, ukan̄ ya ikataka oron ya! Me mgbọ Mosis ojebe iriak ibosi ikpọ mkpọ okirọ, inọnọ ida ge okitumu me emen oron ya ibe: ‘Mosis! Kaje iriak. Wọọk ikpukot kwun̄ mije ere okekebe ire ijọn̄ mbuban.’ Jioba okisa ogwu osat itumu ikọ ya.

Mosis otetet ukpook, mè isa mkpọ ichit isi kan̄. Ida ya otutumu ibe: ‘Mmun̄ ufialek ebi Ijeren ekibọkọ. Ire owu obosa ebi n̄a ije isibi me Ijipiti. Manyan̄a ema isibi me ubọk ebi Ijipiti mè isa ema inu me lek ijọn̄ ojajaan̄.’ Ire okakeek ibe ke inu ya ike Mosis chieen̄ ni?

Mosis ododo mkpọ ibotumu ire ebi Ijeren ido ọmọ ibe: ‘Ire ekene oria owu inu me lek kiji?’ Awaji ofọfọọk ibe: ‘Tumu nyi ema ibe ke ire Jioba, Awaji kè Ebereyam, mè Awaji kè Ajiki, mè Awaji kè Jekọp oria owu.’ Mosis otutumu ibe: ‘Ire ema kpegban̄ utọn̄ me lek n̄a ye?’ Jioba orọrọ ibe Mosis iriọọn̄ ibe ke ọmọ motap ubọk inyi ogọt. Itutumu inyi Mosis ibe itọp uti okup me ubọk kan̄ ito me ijọn̄. Uti ya okakana ulu! Mgbọ Mosis otetbe edim ulu ya, igwugwu ikom ikana uti. Jioba otutumu inyi ọmọ ibe: ‘Mgbọ geelek orọbe inu oriọọn̄ yi, mojeen̄ ibe ke ire emi nria owu.’

Mosis otutumu ibe: ‘Emi nkariọọn̄ ubọk ekitumu usem ijaan̄.’ Jioba ochechieek ọmọ use ibe: ‘Majeen̄ owu inu obotumu, maria si Erọn ngwan̄ kwun̄ ibe itap ubọk inyi owu. Mije iriọọn̄be ibe ke Jioba motap ubọk inyi ọmọ, Mosis osasa ogwu nwa mè bọn ebirieen̄ kan̄ igwu ikom isi Ijipiti.