Adasi Osusut Ita

Ebi Ijipiti etetet ebi Ijeren me unye ibe ekesi unye ikwaan̄ kubọk ebi usun̄. Jioba oraria Mosis mè Erọn ibe esa etip keyi ejet Fero: ‘Tele ibe ebi n̄a efo inyi ema mesi itọbọ ebum inyi emi me emen èwè.’ Ire, Fero osasa me ugumulek ifọọk ibe: ‘Mkpabatele ibe ebi Ijeren efo.’ Fero onyinyi ebi Ijeren ikwaan̄ onyenye igak adasi mgbọ. Jioba morọ Fero inu. Ire oriọọn̄ inu Jioba orọbe ni? Isut ebi Ijipiti akọp osusut. Jioba itumu inyi Mosis ibe: ‘Fero ikachieek igbagban̄ ikọ ntumube. Me ewelegwe, Fero mosi agba okwaan̄ Nali. Je si lek kan̄ mè tumu nyi ọmọ ibe ke otutuuk mun̄ okup me okwaan̄ Nali mokana eje bak lek ikachieekge ibe ebi n̄a efo.’ Mosis osisiki ibot mè ije isi lek Fero. Fero okekikpọ ike Mosis osabe uti okup me ubọk kan̄ isulu okwaan̄ ya, mun̄ okup me okwaan̄ ya okakana eje. Mun̄ ya obebene ikijọ, irin̄ okwakwaan̄, ebi ene kpeyaka ikaan̄ ata mun̄ ebenwọ. Ire, Fero ikachieek ibe ebi Ijeren efo.

Usen jaaba oraraka, Jioba okpọkpọk iria Mosis ibe isi ilook Fero etip ibe: ‘Ire okatele ibe ebi n̄a efo, akwọọk mojot Ijipiti.’ Erọn omọmọnọ uti kan̄ ikaan̄ me ubọk, mè ibene ubọk kan̄ inyana ikpọ okwaan̄, akwọọk ojojot otutuuk ere. Ebi ene ekekimun̄ akwọọk me emen uwu kiban̄, inyọn̄ mkpilaak kiban̄, mè emen alala kiban̄. Fero obebe me Mosis ibeek Jioba ibe isan̄a akwọọk cha, mè ichieek use ibe ke ọmọ motele ibe ebi Ijeren efo. Jioba otetet osusut ya ikaan̄, ebi Ijipiti ekekikpulu nkwukwu akwọọk cha ititiin̄ me edọ mè edọ. Otutuuk emen ama okekidun̄u olu, ire, Fero ikachieek ibe ebi Ijeren efo.

Jioba otutumu inyi Mosis ibe: ‘Erọn mosa uti okup ọmọ me ubọk isulu me ijọn̄, mfuun̄ mokakana ijo atatan, mè iyaka ire asabọn mkpọ okifiik ene.’ Mgbọ yaage, ijo atatan ojojot otutuuk ere. Usini ebi Ijipiti etutumu inyi Fero ibe: ‘Osusut yi ikinan̄a me ubọk Awaji.’ Ire, Fero ikachieek si ibe ebi Ijeren efo.