Ema Mikpaka Ibot Inyi Jioba

Ike mgbọ ojebe, mgbọ ebi Ijeren ekupbe me emen èwê, Kora mè Datan mè Abiram melek efit ene iba mè akọp go mikup ikeme Mosis. Ema etumu inyi Mosis ibe: ‘Iyak, eyi kinyi igana! Keke orọ owu obore ogwu isi kiji? Keke orọ si Erọn obore ogwu ngwugwa? Jioba owa melek kiji si, ubọk ikupbe melek kwun̄ mè Erọn.’ Jioba ikabele ejit me lek inu ema erọbe. Jioba imọnọ inu ya ema erọbe kubọk ire ọmọ ke ema erọ ikeme!

Mosis otutumu inyi Kora mè ebi melek kan̄ ibe: ‘Iyakwut, inu me ere atanga okupbe, ogwu ikup iben ngigọ nsensi kan̄ ikaan̄ me ubọk. Ke Jioba mojeen̄ eji ogwu igobobe.’

Me ofit iwele kan̄, Kora melek efit ebirieen̄ iba mè akọp go esisi lek Mosis me ere atanga okupbe. Me ere ya, ema ewọwọp nsensi kubọk ema ire ebi ngwugwa. Jioba otutumu inyi Mosis mè Erọn ibe: ‘Ida lek kinyi isan̄a me lek Kora mè ebi melek kan̄.’

Kora isi lek Mosis me ere atanga okupbe, ire, Datan, Abiram mè ebi ototun̄ ukan̄ kiban̄ kpechieek isisi. Jioba otutumu inyi ebi Ijeren ibe eda lek ebọkọ me lek uwu ọfọ Kora, Datan mè Abiram. Mgbọ yaage, ebi Ijeren edada lek ibọkọ. Datan, Abiram mè ebi ototun̄ ukan̄ kiban̄ esisibi ikeke me agba oyet uwu ọfọ kiban̄. Mgbọ yaage, ijọn̄ ochichili mè imeen̄ ema. Ukan̄ oseseme mè itaka Kora mè efit ebirieen̄ iba mè akọp go me atanga chinichini ya.

Jioba otutumu inyi Mosis ibe: ‘Bọkọ mkpat me ubọk ebi ibot otoko geelek, me ge erieen̄ kiban̄ ge ge me lek. Ge erieen̄ Erọn me lek mkpat ebi otoko kè Libai mè kpulu mkpat cha tap me emen atanga chinichini. Mkpat ene geelek otitibi inwan̄ me lek, ene ya ke ngobo.’

Me ofit iwele kan̄, Mosis okpukpulu mkpat cha isibi mè isa ijeen̄ ebi ibot otoko cha. Mkpat Erọn otitibi inwan̄ me lek, mè igwook ajakajak me lek mè ito si owuwa mfut alimọn oreren̄e. Jioba osasa me ikeya ijeen̄ ibe ke ire Erọn ke ọmọ ogobo ibe ire ogwu ibot ngwugwa.