Akọp mè Ene Iba Ilelet Isi Ikpọ Kenan

Ebi Ijeren enan̄a me ogoon̄ Saina mè ije itibi iteke ijọn̄ Paran isi ere ekigwen Kades. Me ere ya, Jioba otutumu inyi Mosis ibe: ‘Ria akọp mè ebirieen̄ iba, ene ge ge me otoko geelek ibe esi ekpọ Kenan, lek ijọn̄ mbasa inyi ebi Ijeren.’ Eya orọ, Mosis ogwegwen akọp mè ebirieen̄ iba mè itumu inyi ema ibe: ‘Ije isi Kenan, mè iweek iriọọn̄ me ijọn̄ ya ikekitibi inorie ijaan̄. Ikpọ mè ire ebi ama ya minye lek sa kpenye lek, mè ikpọ si mè ire ekiluk me uwu ọfọ sa ire ama ile.’ Kelep mè Josuwa emaan̄ me lek akọp mè ene iba cha isisi Kenan.

Mgbọ akọp usen ini orakabe, ema ekaka, mè isa figi mè pomegaranet mè gerep ika. Ema etutumu ibe: ‘Ijọn̄ Kenan ire ata ijọn̄, ire, ebi ama ya minye lek. Enanama ogọ obebene ikana ama ile ya.’ Kelep otutumu ibe: ‘Eji mekọt itim igak ema. Eji eneje mgbọ keyi!’ Ire oriọọn̄ inu orọrọ Kelep otumube ikeya ni? Bak lek ọmọ mè Josuwa mitoon̄ ejit me lek Jioba. Ire, akọp ene kechilọ etutumu ibe: ‘In̄-in̄! Ebi ama ya mimiin̄ enenen! Eji ekup kubọk akaka me isi kiban̄.’

Ukpook obebene itet ebi Ijeren. Ema ebebene ikinunuun̄ mè ikitumu inyi ge ge ibe: ‘Eji enegobo ofifi ene ogwu obosa eji ije, mè egwu ekom efo Ijipiti. Keke orọ eji ebesi ere ya ibe ekpan̄ eji esan̄a?’ Josuwa mè Kelep etutumu ibe: ‘Ikakpaka ibot inyi Jioba mè ikatet ukpook, Jioba mobem eji.’ Ire, ebi Ijeren kpegban̄. Kpan̄asi ikeya, ema ekekiweek ikpakpan̄ Josuwa mè Kelep!

Keke ke Jioba orọ? Itumu inyi Mosis ibe: ‘Ife chi kpeweek isisiki ibot inyi emi ikerere ibe ke nrọ owuwa inu inyi ema. Eya orọ, ema ebekukup me emen ewe yi akọp acha ini, mè ikwaan̄ ita me ere yi. Ire nsabọn kiban̄ mè Josuwa mè Kelep ebeluk me lek ijọn̄ nchieekbe use inyinyi ema.’