Gidiọn Itim Igak Ebi Midian

Ike mgbọ ojebe, ebi Ijeren ekpọkpọk itele Jioba mè ikisi itọbọ ebum inyi awaji ataak. Acha jaaba ke ebi Midian echiin̄ anam ebi Ijeren mè ifiat uko kiban̄. Ebi Ijeren elilibi isi ilet me emen ewuuk melek inyọn̄ ogoon̄ inyi ema ekọt enwọnọ me ubọk ebi Midian. Ema si mibeek Jioba ibe inyan̄a ema. Eya orọ, Jioba oraria ogwu osat kan̄ ge ibe isi lek ogwu enerieen̄ ge ekigwen Gidiọn. Ogwu osat ya osisi itumu inyi Gidiọn ibe: ‘Jioba igobo owu ibe ore ogwu akọn̄ okakaan̄ unye.’ Gidiọn ododo ogwu osat ya ibe: ‘Mbajeje ikọt inyan̄a ebi Ijeren? Nkakup me lek inu geege.’

Ike owa ke Gidiọn obosa iriọọn̄ ibe ke Jioba owa melek kan̄ ni? Ito okpọkọ ikpa anam inwọọn̄ okweekbe lek me ijọn̄ mè itumu inyi Jioba ibe: ‘Ire mbat irep igwook me lek ikpa anam yi gaalek, mè otutuuk inyọn̄ ijọn̄ ire nchat, mariọọn̄ ibe ke ire emi ke obosa inyan̄a ebi Ijeren.’ Me ofit iwele kan̄, Gidiọn omumun̄ ibe ikpa anam ya ireke idek, ire, ijọn̄ ichachat! Gidiọn okpọkpọk ibeek ibe Awaji irọ inyi ikpa anam ya gaalek ichat, ire, mbat igwook ikana me otutuuk inyọn̄ ijọn̄ me ewelegwe ogọgọọk. Irọrọ ikeya si, mgbọ ya, Gidiọn ochechieek inye ibe ke ire Jioba ogobo ọmọ. Itititiin̄ ebi akọn̄ kan̄ inyi esi etim etim melek ebi Midian.

Jioba otutumu inyi Gidiọn ibe: ‘Marọ ibe ebi Ijeren etim egak. Ire, mije ibe ke okaan̄ owuwa ebi akọn̄, owu mokikeek ibe ke osa me unye kwun̄ itim igak. Eya orọ, tumu nyi ebi ukpook okitet ibe egwu ekom efo.’ Akọp obop ene iba mè obop iba efofo, iyayaka isik akọp obop ene. Jioba okpọkpọk itumu inyi Gidiọn ibe: ‘Ebi akọn̄ isisik miwa si enenen. Sa ema je si otu mun̄ mè tumu nyi ema ibe enwọ mun̄, mè gobo ebi geelek ikukup me ugwọk-chieen̄ ike ekinwọ mun̄ ya.’ Efit ene ita gaalek ekup me ugwọk-chieen̄ ike ema ekinwọ mun̄. Jioba ochechieek use ibe ke ire ibot ene inen yi ebetim igak efit obop ebi akọn̄ Midian ge mè akọp obop ita mè obop go (135,000).

Me eririeen̄ ya, Jioba otutumu inyi Gidiọn ibe: ‘Mgbọ obosi itim akọn̄ melek ebi Midian ikem!’ Gidiọn onyinyi ebi akọn̄ kan̄ otita mè ugọn̄ eletbe ukan̄ me emen. Gidiọn otutumu inyi ema ibe: ‘Iriọọn̄ ubọk ikpọ emi, mè irọ inu geelek marọbe.’ Gidiọn owuwut otita kan̄, itọbọ ugọn̄ kan̄ ibum, imọnọ ukan̄ kan̄ ibene ifo inyọn̄ mè itaan̄ ukpo itumu ibe: ‘Oge akọn̄ Jioba mè eyi Gidiọn!’ Otutuuk ebi melek kan̄ erọrọ ubọk yaage si. Ebi Midian efefieek owot, mè ilibi inin̄ agan̄ geelek ema eriọọn̄be. Wọlọwọlọ oninin̄ etete kiban̄, ema ebebene ikikpan̄ lek kiban̄. Ikeyi ke Jioba osa irọ ibe ebi Ijeren ekpọk etim egak ebi ochicha kiban̄.