Ana Ibeek Ibe Awaji Inyi Ọmọ Gwun̄

Ogwu Ijeren ge ekigwen Elikana ikaan̄ nwa iba, Ana mè Penina, ire, ire Ana ke ima ichit. Penina ikisa Ana irọ mkpọ ochak mije Ana ikakaan̄ gwun̄. Acha geelek, Elikana ikisasa ebi ototun̄ ukan̄ kan̄ ikisi itọbọ ebum me Silo. Usen ge, mgbọ ema ekupbe me Silo, Elikana omumun̄ ike Ana nwa kan̄ ogwu imabe okifieek ejit mè ikito ito, ijeje isi lek mè itumu inyi ibe: ‘Soso Ana, kayaka ito ito. Owu okaan̄ emi me agba lek kwun̄, emi mma owu si.’

Ike mgbọ ojebe, Ana ojeje ọmọ gaalek isi ibeek uriaak. Ikakọt itet lek kan̄ ikaan̄, ikpọkpọk ikito ito ike ikibeek uriaak inyi Jioba. Ana ochechieek use ibe ire Jioba inyi ọmọ gwun̄ enerieen̄, ke ọmọ moyaka gwun̄ ya inyi Jioba inyi isa otutuuk ugwem kan̄ isi ikwaan̄ inyi ọmọ.

Ogwu ibot ngwugwa Ilai obebene chieen̄ imun̄ Ana okito ito mè ikitumu ikọ me otu, ire, ikanọ ikọ ikitumu, ikekikeek ibe ke Ana inwọnwọ miin̄ isa. Ana otutumu inyi ọmọ ibe: ‘In̄-in̄, ogwukaan̄ n̄a, nkanwọ miin̄ isa. Nkaan̄ ufialek omimin enenen, ọmọ orọ nkikpa inyi Jioba.’ Ilai omumun̄ ibe ke ọmọ ikeek ilọ mè itumu inyi Ana ibe: ‘Kè Awaji irọ inu oweekbe inyi owu.’ Ejit Ana osisiki, ikayaka ifieek ejit, inanan̄a ikeke mè ije ifo. Sabum acha ge osobe, Ana omaman gwun̄ enerieen̄ mè igwen gwun̄ ya Samien. Ire omokọt ikeek mbet lek unwọọn̄ Ana okaan̄be ni?

Ana ikawuuk use ichieekbe Jioba. Mgbọ yaage ibanbe gwun̄ ya ebe, isasa ijet me uwu mbuban ibe ikisi ikwaan̄ me ere ya. Itutumu inyi Ilai ibe: ‘Gwun̄ mbeekbe Jioba ya ire eyi. Nsa ọmọ inu ibe isa otutuuk ugwem kan̄ isi ikwaan̄ inyi Jioba.’ Elikana mè Ana mikisi ikpọ Samien acha geelek mè ikisa ayaya ofọnti awudu ijet ọmọ. Jioba okpọkpọk inyi Ana ofifi nsabọn ebirieen̄ ita mè ebibaan̄ iba.