Debit mè Golayat

Jioba itumu inyi Samien ibe: ‘Je si uwu kè Jesi mije, ire ge me lek bọn ebirieen̄ kan̄ obokana ogwu ubọọn̄ ebi Ijeren.’ Eya orọ, Samien osisi uwu Jesi. Mgbọ imun̄be ogwu okpan Jesi, itutumu ibe: ‘Ibore gwun̄ enerieen̄ yi ore ene ya.’ Ire, Jioba otutumu inyi Samien ibe ke ikare ọmọ ire eya. Itutumu si ibe: ‘Ire inu okup ene me ejit okup ufiak inyi emi, ikare ubọk ijaan̄be ire.’

Jesi osasa ofifi nsabọn ebirieen̄ gweregwen kan̄ ijeen̄ Samien. Ire, Samien otutumu inyi ọmọ ibe: ‘Jioba ikagobo ene geege me lek kiban̄. Ire okaan̄ ofifi gwun̄ enerieen̄ ni?’ Jesi obebe: ‘Nkaan̄ ofifi gwun̄, erieen̄ kan̄ ire Debit, ọmọ ire sọn̄ gwun̄ okup me ere ikikpọ chieen̄ me lek arọọn̄ n̄a.’ Mgbọ Debit onube, Jioba otutumu inyi Samien ibe: ‘Ire ọmọ ire eya!’ Samien otọtọkọ aran̄ me ibot Debit kubọk ogwu obore ubọọn̄ ebi Ijeren me mgbọ okup me isi.

Ike mgbọ ojebe, ebi Ijeren esisi itim akọn̄ melek ebi Filisia. Ene ge me lek ebi akọn̄ cha ijọn̄ọ enenen mè inye lek si, erieen̄ kan̄ ire Golayat. Usen geelek, Golayat ikisa ebi Ijeren irọ mkpọ ochak, ikitaan̄ ukpo itumu ibe: ‘Iria ogwu obokọt igọọk emi itim etim ijet emi. Ire ikọt itim igak emi, eji mekana ebi usun̄ kinyi. Ire, ire emi ntim igak enyi, enyi mekana ebi usun̄ kiji.’

Debit isa inorie ijet ebi ngwan̄ kan̄ me ere ebi akọn̄ ebi Ijeren etitiin̄be. Inọnọ mkpọ Golayat okitumu mè itumu ibe: ‘Magọọk ọmọ itim etim!’ Ogwu ubọọn̄ Sọọlu otutumu inyi Debit ibe: ‘Owu ire sọntiik gwun̄.’ Debit ofọfọọk ibe: ‘Jioba motap ubọk inyi emi.’

Sọọlu obeben mkpọ akọn̄ kan̄ inyi Debit ibe itap, ire, Debit otutumu inyi Sọọlu ibe: ‘Mkpakọt isa inu chi me lek itim etim.’ Debit omọmọnọ olik mgbọlọ kan̄ mè ije isi agba mun̄, mè iteen̄ asabọn mgbọlọ go orọrọt lek itap me emen akpa kan̄. Ililibi isi lek Golayat. Golayat obebene chieen̄ imun̄ Debit mè itaan̄ ukpo itumu ibe: ‘Je na me ere yi, sọntiik gwun̄. Masa owu inyi unọn owulu me inyọn̄ mè anam oron etaka.’ Ire, Debit ikafieek owot, itataan̄ ukpo itumu si inyi Golayat ibe: ‘Owu osa otunwa mè oge akọn̄ inu, ire, emi nnu me erieen̄ Jioba. Ikare eji ke owu okitọ ubọk me isi, ire Awaji kiji. Otutuuk ebi ikup me ere yi memun̄ ibe ke Jioba ikaan̄ unye igak oge akọn̄ mè otunwa. Awaji kiji moyaka otutuuk kinyi itap eji me ubọk.’

Debit omọmọnọ ewuuk ge itap me emen olik mgbọlọ kan̄ mè isook inye ubọk efuuk kan̄ okọtbe. Sa me ntap-ubọk Jioba, ewuuk ya ototoon̄ me inyọn̄ okwut isi Golayat mè ifuun̄ inin̄. Golayat ogwu onyenye lek ya orọrọn̄ me ijọn̄ mè ikwu. Ebi Filisia elilibi iweek ebek ugwem kiban̄. Ire otoon̄ ejit me lek Jioba kubọk Debit ni?