Adasi Ogwu Ubọọn̄ Ebi Ijeren

Jioba inyi ebi Ijeren ebi oyerebet ibekikpọ ema chieen̄ me lek, ire, ema ekiweek ikakaan̄ ogwu ubọọn̄. Ema etutumu inyi Samien ibe: ‘Otutuuk ebi ido okukup ikana eji mikaan̄ ebi ubọọn̄. Eji si ekiweek ogwu ubọọn̄.’ Me nkeek Samien, inu yi ema ekido ilọ, eya orọ, Samien obebeek uriaak inyi Jioba. Jioba otutumu inyi Samien ibe: ‘Ikare owu ke ebi Ijeren ejit, ire emi ke ema ejit. Tumu nyi ema ibe ke ema mekọt ikaan̄ ubọọn̄, ire, ogwu ubọọn̄ ya modo owuwa mkpọ me ubọk kiban̄.’ Mgbọ Samien otumube inu Jioba otumube inyi ema, ebi Ijeren efọfọọk ibe: ‘Eya ikagbaan̄ eji me lek. Eji ekiweek ubọọn̄!’

Jioba otutumu inyi Samien ibe ke ogwu enerieen̄ ge ekigwen Sọọlu obore adasi ogwu ubọọn̄. Samien orọrọ Sọọlu ubọọn̄ me Rama sa me itọtọkọ aran̄ me ibot kan̄.

Ike mgbọ ojebe, Samien ogwegwen ebi Ijeren ititiin̄ inyi isa ayaya ogwu ubọọn̄ kiban̄ ijeen̄ ema. Ire, ema kpemun̄ lek Sọọlu. Ire oriọọn̄ mkpọ orọrọ ni? Sọọlu ililibi ilet. Mgbọ eweekbe Sọọlu imun̄, esasa ọmọ inu ibe ikeke me etete ebi Ijeren. Sọọlu ijọn̄ọ igak otutuuk ene, ijaan̄ uja si. Samien otutumu inyi ema ibe: ‘Ikpọ, ogwu Jioba ogobobe ya ire eyi.’ Ebi Ijeren ekekitaan̄ ukpo itumu ibe: ‘Ogwu ubọọn̄, luk ujọn̄ọ ugwem!’

Me adasi mgbọ, ogwu ubọọn̄ Sọọlu ikigbagban̄ utọn̄ inyi Samien mè ikisiki ibot inyi Jioba. Ire, ike mgbọ ojebe, inwenwene. Kubọk inu njeen̄, ikare ikwaan̄ ogwu ubọọn̄ igwagwa ngwugwa. Ire, me mgbọ ge, Sọọlu igwa ngwugwa eyi Samien mogwa mije Samien ikagwat lek inu me ere Sọọlu okikup ikpọ ọmọ. Keke ke Samien orọ ni? Itumu inyi Sọọlu ibe: ‘Owu kpomo kpaka ibot inyi Jioba.’ Ire Sọọlu mokween̄ mkpọ inan̄a me lek inu olọlọ irọbe ni?

Ike mgbọ ojebe, mgbọ Sọọlu obosi itim etim melek ebi Amalek, Samien otutumu inyi ọmọ ibe ikpan̄ otutuuk ene me ama ya. Ire, Sọọlu ikakpan̄ Agagi ogwu ubọọn̄ ama ya. Jioba otutumu inyi Samien ibe: ‘Sọọlu ijit emi, ikarọ inu inyibe ida ibe irọ.’ Samien otutumu inyi Sọọlu ibe: ‘Mije ibe ke okayaka ikisiki ibot inyi Jioba, Jioba mogobo ofifi ogwu ubọọn̄.’ Ike Samien oyakabe isi ikana ibofo, Sọọlu otetet otu utọn̄ ofọnti Samien, ofọnti ya ogwagwak. Samien otutumu inyi Sọọlu ibe: ‘Jioba ibọkọ ubọọn̄ isan̄a me ubọk kwun̄.’ Jioba mosa ubọọn̄ ya inyi ogwu omama ọmọ mè ikisiki ibot inyi ọmọ.