Keke Ore Ikpọchieen̄ Isa Inyi ebi Ikwukwu?

1. Keke ore ata etip inyi eji ofolek ebi ikwukwu?

Mgbọ Jisọs onube inire Betani okup iriak Jeruselem, ogwu unene kan̄ Lajọrọs ikwu egwe ini iraka. Jisọs melek Meri mè Mata, ebi ngwan kè Lajọrọs esisi ere efuun̄be Lajọrọs. Sọnja mgbọ, urum ebi ene etititiin̄. Ire omokọt ikeek mbet lek unwọọn̄ Meri mè Mata ekaan̄be mgbọ Jisọs ojomobe Lajọrọs me mkpa inu me ugwem ni?—Fuk Jọn 11:21-24, 38-44.

Mata iwuwuuk lek iriọọn̄ ata etip ofolek ebi ikwukwu. Iriọọn̄ ibe Jioba mojomo ebi ikwukwu ikpọk inu me ugwem me eluk me inyọn̄ ijọn̄.—Fuk Jobu 14:14, 15.

2. Keke ore irek ogwu okwukwu?

Mfuun̄ ijọn̄ ke esa irom ebilene. (Ibebene 2:7; 3:19) Eji kpere ekwukwku okiluk me emen anam akpalek. Eji ire inu nrom ekisa chieen̄ imun̄, eya orọ, kpunu inu geege okinan̄a isibi me emen ene isiluk me ofifi ere. Eji esikwu, nden̄ kiji ikwu si, ntọt kiji si ichep. Omọrọ, Lajọrọs ikakpa inu geege ofolek inu ijebe itibi mgbọ ikwube, mije ogwu okwukwu ikayaka inọ lek.—Fuk Okwa Itọn̄ 146:4; Ogwu Etip 9:5, 6, 10.

Ire Awaji ikisa ukan̄ isut ebi ikwukwu osusut ni? Eyi Baibul ojejeen̄ ibe ke ogwu okwukwu ikayaka inọ lek, isibi ibe ke ijejeen̄ ekibe ene isikwu, ke ikifo emen ukan̄ ire ijejeen̄ ataak okifiat erieen̄ Awaji. Ufulek nkeek ya, isasa ukan̄ isut ebi ikwukwu osusut ire inu ọmọ ochabe.—Fuk Jerimaya 7:31.

Ikpọ fidio What Is the Condition of the Dead?

3. Ire ebi ikwukwu mekọt igọọk eji ikpa usem ni?

Ebi ikwukwu kpebekọt itumu usem miya ire inọ ikọ. (Okwa Itọn̄ 115:17) Ire, usini ebi osat ire ebi ikpak, mekọt itumu usem inyi ebi ene mè ifiaan̄ irọ kubọk ire ogwu okwukwu ya otumu. (Pita Eyi Òso Iba 2:4) Jioba icha idodo ido-inu ofolek ogwu okwukwu.—Fuk Ikan Òso Mgbọ Iba 18:10, 11.

4. Ire ebi owa ke ebejomo ikpọk inu me ugwem ni?

Efie efie ebi ene ebi ikwukwu ikup me udọn̄ ufuun̄ ire ebi ebejomo ikpọk inu me ugwem me inyọn̄ ijọn̄ yi. Ikerere ebi kperiọọn̄ Awaji mè ebi ikirọ ijọ inu mejomo me mkpa si.—Fuk Luk 23:43; Ikwaan̄ Ebi Otuchieen̄ 24:15.

Ebi ejomobe me mkpa mekọt iyaka ikween̄ inu ofolek Awaji mè ijeen̄ ichechieek me lek Jisọs sa me isisiki ibot inyi ọmọ. (Ichichili 20:11-13) Ebi ejomobe me mkpa irọrọ ata inu menwọọn̄ ugwem ikakaan̄ge itata me inyọn̄ ijọn̄.—Fuk Jọn 5:28, 29.

5. Keke ke njomo me mkpa okijeen̄ eji ofolek Jioba?

Awaji irọ inyi ikpọchieen̄ ebi ikwukwu ifet inan̄a melek iraria ogwu Gwun̄ ibe inikwu inyi eji. Eya orọ, njomo me mkpa ikijeen̄ eji mbet lek ima mè nsan eyi ikagbege Jioba okaan̄be melek kiji. Ebi ikwukwu esikpọk inu me ugwem, ire ekene ke obochubọk ima imumun̄ lek ni?—Fuk Jọn 3:16; Ebi Rom 6:23.