INU NKWEEN̄ 29

Keke Okirọ Ene Isikwu?

Printed Edition

Ire owuuk lek ichep ogwu omabe me mkpa ni? Me mgbọ ufieejit yi, omokọt ikikeek: ‘Keke okirọ ene isikwu? Ire ikpọchieen̄ omaan̄ ibe ke eji mekpọk imun̄ ebi ima kiji ni? Me inu nkween̄ yi mè eyi ogọgọọk, eji mekween̄ ufọọk-otu okinyi ene ukarajit echi Baibul onyibe.

1. Keke okirọ ene isikwu?

Jisọs isa mkpa itọt me lek uga ilaak. Ogwu uga ilaak obenbe ikakiriọọn̄ inu okirọ ikana ọmọ. Ike owa ke mkpa osa ibet lek ilaak ni? Ene isikwu, ikayaka ikinọ lek. Ubọk geelek isabe ima ebi unene kan̄ mè ebi ototun̄ ukan̄ kan̄ ire, ikpoboriọọn̄ ibe ke ọmọ itele ema. Ubọk Baibul otumube, “ebi ìkwakwaan̄ kperiọọn̄ inu geege.”—Fuk Ogwu Etip 9:5.

2. Ike owa ke irọriọọn̄ atikọ ofolek mkpa okisa irọ eji oruru?

Owuwa ebi ene ekitet ukpook mkpa melek ebi ikwakwaan̄! Ire, inu Baibul otumube ofolek ebi ikwakwaan̄ mokọt ikat owu ejit. Jisọs ibe: “Atikọ . . . môsan̄a enyi isibi me usun̄.” (Jọn 8:32) Usini uwu uriaak ekijeen̄ ibe ke ikaan̄ mkpọ okup me emen ene okiluk ugwem ene isikwu, ire, ikare inu Baibul ojeen̄be ire eya. Eya orọ, kpunu ene geege okibọkọ ukwook isikwu. Ofifi si, mije ibe ke ebi ikwakwaan̄ kperiọọn̄ inu geege, ema kpebekọt isak eji unan geege. Eya orọ, eji kpebekitọbọ ebum inyi ema, mè iyaka ire ikirọ mkpọ echi eji ekikeek ibe mokibele ema ejit, eji si kpebekibeek uriaak me ibot kiban̄.

Usini ene ekitumu ibe ke ema mekọt igọọk ebi ikwakwaan̄ ikpa usem. Ire, eyi ikafet. Ike eji ekween̄be, “ebi ìkwakwaan̄ kperiọọn̄ inu geege.” Mokọt ire ibe ke ebi ikikeek ibe ke ema ekigọọk ebi ima kiban̄ ikwakwaan̄ ikpa usem echubọk ikigọọk ebi ijo ekwukwu ikifiaan̄ irọ kubọk ema ire ebi ikwakwaan̄ ikpa usem. Eya orọ, irọriọọn̄ atikọ ofolek ebi ikwakwaan̄ ikibem eji me lek ebi ijo ekwukwu. Jioba itaba eji ubọk me utọn̄ ofolek igọgọọk ebi ikwakwaan̄ ikpa usem mije, iriọọn̄ ibe ke igọgọọk ebi ijo ekwukwu igbaan̄ mkpọ irọ mosak eji unan.—Fuk Ikan Òso Mgbọ Iba 18:10-12.

KWEEN̄ GBAALEK

Kween̄ gbaalek inu Baibul ojeen̄be ofolek mkpa, mè rọ inyi ichechieek kwun̄ inye me lek Awaji ogwu ima, ogwu ikakinyi ebi ikwakwaan̄ ukwook.

Ogwu enerieen̄ ge mè nsabọn iba kan̄ ikweek irek me inyọn̄ ikasi me mgbọ ekirọ mkpa-ene ogwu nwa mè ire nga nsabọn cha. Ebi unene mè ebi uwu kiban̄ ekup ikana ema ikikat ema ejit mè ikitap ubọk inyi ema.

3. Kween̄ atikọ ofolek irek ebi ikwukwu

Me otutuuk linyọn̄ yi, ebi ene mikaan̄ esese esese nkeek ofolek inu okirọ ebi ikwakwaan̄. Atikọ ire, ikare otutuuk nkeek cha otat.

Me agan̄ olukbe, keke ke ebi ene echieek ofolek irek ebi ikwukwu?

Inyi omun̄ inu Baibul ojeen̄be, fit FIDIO yi.

FIDIO: Keke Ore Irek Ogwu Okwukwu?—Okpọkọ Me Lek (1:19)

Ogugo: Ogugo onan̄a me fidio ‘Keke Ore Irek Ogwu Okwukwu?—Okpọkọ Me Lek.’ 1. Ogwu okwukwu me inyọn̄ mkpilaak me uwu ugwun̄. 2. Ogwu enerieen̄ okilaak me etete ene iba me emen train, me mgbọ ikikọp uran.

Fuk Ogwu Etip 3:20, mè igbaan̄ ikpa idodo chi:

Igọọk me lek ere Baibul yi, keke okirọ ene isikwu?
Ire ikaan̄ inu okup me emen ene eyi ikakikwu ni?

Baibul itumu inyi eji mkpọ ofolek Lajọrọs, atalek ogwu unene Jisọs. Ike okifuk Jọn 11:11-14, taba iman̄ me lek inu Jisọs otumube ofolek irek Lajọrọs. Mè igbaan̄ ikpa idodo chi:

Jisọs isa mkpa itọt me lek keke?
Keke ke inu-ntọt yi okijeen̄ eji ofolek irek ebi ikwukwu?
Ike owa ke omun̄ inu Baibul otumube ofolek irek ebi ikwukwu?

4. Atikọ ofolek mkpa ikirọ eji oruru

Irọriọọn̄ atikọ ofolek mkpa ikisan̄a eji me usun̄ ukpook ebi ikwukwu. Fuk Ogwu Etip 9:10, mè igbaan̄ ikpa idodo yi:

Ire ebi ikwakwaan̄ mekọt isak eji unan ni?

Atikọ Baibul ikibem eji si isan̄a me lek nchieek ibe ke eji mekọt irọ ibe ebi ikwakwaan̄ ekebele ejit mè ikitọbọ ebum inyi ema. Fuk Asaya 8:19 mè Ichichili 4:11, mè igbaan̄ ikpa idodo yi:

Me nkeek kwun̄, ike owa ke Jioba okimun̄ ebi ikitọbọ ebum inyi mè iyaka ire ikiweek ntap-ubọk ebi ikwakwaan̄?

Ogugo: Orọmijọn̄ ekisa imin ebi ikwukwu. 1. Ogwu enerieen̄ okibeek uriaak me isi ere efuun̄be ene mè inorie ibosa inyi. 2. Ebirieen̄ ita itatap ofọnti ifit ikijop okwa. 3. Ebi ene itap mkpọ ichit isi mè iben mkpọ obet lek ukwuuk ene me usen ekikeek ebi ikwukwu. — Atikọ ofolek mkpa ikisan̄a eji isibi me usun̄ orọmijọn̄ echi Jioba ikabọkọbe itap

5. Atikọ ofolek mkpa ikikat eji ejit

Owuwa ene ire ebi ejeen̄be ibe ke mgbọ geelek ema esikwu, ke ema mebọkọ ukwook mije ijo inu ema erọbe. Ire, ikikat eji ejit irọriọọn̄ ibe ke kpunu ogwu okibọkọ ukwook mgbọ geelek isikwu—ikerere ogwu ochuchubọk irọ ijo inu omimin. Fuk Ebi Rom 6:7, mè igbaan̄ ikpa idodo yi:

Ike eji efukbe me ere Baibul yi, eyi ogwu okwukwu okpebe mkpukpe ijo inu kan̄, ire okeek ibe mokibọkọ ukwook mije ijo inu iwuukbe lek irọ ni?

Ike okiriọọn̄ Jioba ijaan̄, ikeya si ke oboriọọn̄ ibe ke ọmọ ikpobotele ibe ebi ikwakwaan̄ ekebọkọ ukwook. Fuk Ikan Òso Mgbọ Iba 32:4 mè Jọn Eyi Adasi 4:8, mè igbaan̄ ikpa idodo chi:

Ire Awaji ogwu okakaan̄ eru chi eji efukbe mkpọ ofolek me ere Baibul chi mokọt ichieek ibe ebi ikwakwaan̄ ekebọkọ ukwook ni?
Ire atikọ ofolek mkpa ikat owu ejit ni? Keke orọ ofọọkbe ikeya?

USINI ENE EKIBE: “Nkikaan̄ ukpook ofolek mkpọ oborọ emi nsikwu.”