Awaji Iroon̄ Ebereyam Ikpọ

Ajiki ikween̄ me ubọk ogwu ute Ebereyam ibe ke ikup ufiak ibe ọmọ ima Jioba mè itoon̄ ejit me lek otutuuk use ichieekbe. Ire, mgbọ Ajiki osobe akọp acha iba mè go, Jioba otutumu inyi Ebereyam ibe irọ inu ge eyi oboyọt enenen irọrọ. Keke ke ibe me irọ?

Awaji itumu inyi Ebereyam ibe: ‘Soso, mọnọ ibot gwun̄ ge kwun̄ mè sa si inyọn̄ ogoon̄ Moraya mè sa ọmọ gwa ngwugwa nyi emi.’ Ebereyam ikariọọn̄ inu orọrọ Jioba obe me ọmọ irọ inu ya. Ire, isiki ibot inyi Jioba.

Me ewelegwe ogọgọọk, Ebereyam osasa Ajiki mè ebi usun̄ kan̄ iba ije isi Moraya. Me òso egwe ita, ema ebebene chieen̄ imun̄ ogoon̄ Moraya me ujọn̄ọ ere. Ebereyam otutumu inyi ebi usun̄ iba kan̄ ibe ekup eban ọmọ, mè isa Ajiki ikije isi ere ebesi igwa ngwugwa. Ebereyam obebe me Ajiki iben iye, ọmọ omọmọnọ ubuja. Ajiki ododo ogwu ute ibe: ‘Anam eji ebesa igwa ngwugwa ye?’ Ebereyam ofọfọọk ibe: ‘Gwun̄ n̄a, Jioba mosan̄a isibi.’

Mgbọ ema erebe inyọn̄ ogoon̄ ya, ema enanama ntook. Ebereyam obọbọp ubọk kè Ajiki mè ukot kan̄ mè iben ọmọ imaan̄ me inyọn̄ ntook ya.

Ebereyam omọmọnọ ubuja. Mgbọ yaage, ogwu osat Jioba ogwegwen ọmọ inan̄a me emen inyọn̄ ibe: ‘Ebereyam! Kasak unan me lek gwun̄ ya. Mgbọ keyi ke nriọọn̄ ibe ke owu okaan̄ ichechieek me lek Awaji, mije, owu okajit isasa gwun̄ kwun̄ igwa ngwugwa inyi Awaji.’ Mgbọ ya, Ebereyam obebene chieen̄ me imun̄ lek orie arọọn̄ ge eyi oron ogọbọbe iko kan̄ ikam. Itọtọn̄ọ Ajiki ugwat ugwat mè isi itet orie arọọn̄ ya isa igwa ngwugwa.

Bene me usen ya fo isi, Jioba okekigwen Ebereyam ogwu unene kan̄. Bak lek keke ni? Bak lek Ebereyam orọbe otutuuk inu geelek Jioba obe me ọmọ irọ, ikerere me mgbọ ikagobobe itet inu orọrọ Jioba obe me ọmọ irọ.

Jioba oyayaka ichieek Ebereyam use ibe: ‘Emi magbana owu mè irọ ibe nsabọn kwun̄ ewa.’ Eyi isibi ibe ke ire inan̄a me lek ototun̄ ukan̄ kè Ebereyam ke Jioba obogbana otutuuk ebi ata ife geelek.