Debit mè Sọọlu

Mgbọ Debit okpan̄be Golayat iraka, ogwu ubọọn̄ Sọọlu orọrọ ọmọ ogwu ibot ebi akọn̄ kan̄. Ebi ene eneniriọọn̄ Debit isi bak lek itimbe igak me owuwa akọn̄. Debit isikinan̄a me oyet akọn̄ ikika, ebibaan̄ ekinanan̄a isibi ikinikọt mè ikijop okwa mè ikitumu ibe: ‘Sọọlu ikpan̄ eyi kan̄ me obop me obop, ire, Debit ikpan̄ eyi kan̄ me akọp akọp obop!’ Sọọlu obebene ikaan̄ mba-ejit me lek Debit mè ikiweek ikpakpan̄ ọmọ.

Debit iriọọn̄ ifit uneen̄ ijaan̄. Usen ge, mgbọ Debit okifit uneen̄ inyi Sọọlu, Sọọlu omọmọnọ otunwa kan̄ isa itọbọ Debit. Debit ogwagwat lek ifala, otunwa ya oraraka isiwaan̄ me lek uwu. Mgbọ eya orakabe, Sọọlu okpọkpọk ikup inye ikisa ubọk ibokpan̄ Debit. Ike mgbọ ojebe, Debit olilibi isi ilet me emen èwê.

Sọọlu osasa obop ebi akọn̄ ita isi ikiweek Debit ibokpan̄. Me ikariọọn̄ge, Sọọlu ojeje isi inin̄ emen nkororok ge ere Debit mè ebi melek kan̄ ekupbe. Ebi melek Debit etutumu inyi Debit ususuk ibe: ‘Irek isibi inyi owu ikpakpan̄ Sọọlu.’ Debit ojeje ususuk isi lek Sọọlu mè ikọọk otu utọn̄ ofọnti kan̄. Ire, Sọọlu ikariọọn̄. Sọnja mgbọ iraraka, Debit obebene ikifieek lek kan̄ ikọ ibe ke ọmọ ikajeen̄ ulibi me lek ogwu Jioba okenbe aran̄. Ikachieek ibe ebi melek kan̄ ekpan̄ Sọọlu. Kpan̄asi ikeya, Debit otataan̄ ukpo igwen Sọọlu mè itumu inyi Sọọlu ibe ke ọmọ ke kọt okpan̄ ogwu mgbọ ọmọ okaan̄be irek. Ire Sọọlu monwene ejit kan̄ ofolek ikpakpan̄ Debit ni?

In̄-in̄. Sọọlu ikwekweek inye ikiweek Debit ibokpan̄. Me eririeen̄ ge, Debit mè gwun̄ ogwu ngwan̄ ge ekigwen Abisa enwenween̄ lek itibi inin̄ ere Sọọlu mè ebi melek kan̄ ekupbe. Ike mgbọ ya, ilaak iben Abina ogwu okibem Sọọlu. Abisa otutumu inyi Debit ibe: ‘Eji mikaan̄ irek mgbọ keyi! Tele ibe mkpan̄ ọmọ.’ Debit ofọfọọk ibe: ‘Jioba morọ Sọọlu inu geelek iweekbe irọrọ ọmọ. Eji emọnọ otunwa mè iko mun̄ kan̄ mè eje enan̄a.’

Debit onenene ogoon̄ ge okukup iriaak ere Sọọlu mè ebi melek kan̄ ekupbe mè ikitaan̄ ukpo itumu ibe: ‘Abina, ire keke orọ okabem ogwu ubọọn̄? Otunwa mè iko mun̄ Sọọlu ye?’ Sọọlu orọriọọn̄ ida Debit mè itumu ibe: ‘Owu ke okpan̄ emi, ire, okaweek ikpakpan̄ emi. Nriọọn̄ ibe ke ire owu obokana ogwu ubọọn̄ ebi Ijeren.’ Sọọlu ogwugwu ikom ifo uwu ubọọn̄ kan̄. Ire, ikare otutuuk ebi uwu Sọọlu echa Debit.