Ike Owa Ke Eji Ebesa Ikup Me Utana me Chieen̄ Awaji?

Keek-nu ata uga okakaan̄ ima okinen̄e lek gwun̄ kan̄ obosi uwu ikpa isun̄. Momun̄ ijaan̄ ibe ke gwun̄ ya iken mun̄ mè itap mkpọ otatana mè ijaan̄. Eyi morọ ibe gwun̄ ya ikaan̄ unye akpalek, mojeen̄ ebi ene si ibe ke nga kan̄ mè nte kan̄ mekikpọ ọmọ chieen̄ ijaan̄. Ubọk yaage si, Nte kiji okakaan̄ ima, Jioba, iweek ibe eji ekup me utana—me anam akpalek mè eru. Eji esikup me utana, eji mekirọ lek kiji oruru mè ikisa itọn̄ ijet Awaji.

1. Ike owa ke eji ebesa ikup me utana me anam akpalek?

Jioba itumu inyi eji ibe: “Ikup me mbuban.” (Pita Eyi Adasi 1:16) Ikukup me mbuban igọbọ ikukup me utana me anam akpalek mè eru. Eji mekọt ikup me utana me anam akpalek sa me ikekiken mun̄ mgbọ geelek mè ikekisun̄ mkpọ eji ekitap, uwu, mè uji kiji me utana. Eji mekọt ikigọọk isun̄ Uwu Ntitiin̄ kiji me utana si. Sa me ikukup me utana me anam akpalek, eji ekisa itọn̄ ijet Jioba.—Ebi Kọrint Eyi Òso Iba 6:3, 4.

2. Inyi eji ekup me utana, kpasi eru ke eji ebekijit?

Baibul ibe mè “eji egwọk akpalek kiji etana, mè esibi etele inu geelek òkichaka mbuban me lek akpalek kiji mè ekwukwu kiji.” (Ebi Kọrint Eyi Òso Iba 7:1) Eya orọ, eji mesa ijijit inu geelek echi obochaka akpalek mè iyaka ire nkeek kiji. Igbe ibe inu eji ekikeek ikibele Jioba ejit, eya orọ, eji etap efuuk ekejit ikekikeek inu olọlọ. (Okwa Itọn̄ 104:34) Eji mesa si ikekitumu usem otatana.—Fuk Ebi Kọlọsi 3:8.

Keke si ke eji eberọ inyi eji ekup me utana me anam akpalek mè eru? Usini inu mokọt itap unan me akpalek kiji. Eya orọ, eji ekijit inwọnwọ siga, itatap njọn̄ mè inwọnwọ ijo ugwun̄, eji kpekinwọ ugwun̄ ubọk geelek si. Sa me ijijit inu chi, eji mekaan̄ unye akpalek mè ikijeen̄ ulibi me lek inyinyi eyi ugwem. Eji si ekisa ikukup me utana me eru sa me ikekitim igak ijo eru kubọk ikekiriki ulọk ilaak me lek kiji, mè ikekikpọ ogugo njak. (Okwa Itọn̄ 119:37; Ebi Efesọs 5:5) Mokọt iyọt ititim igak eru chi, ire, Jioba motap ubọk inyi eji etim egak.—Fuk Asaya 41:13.

KWEEN̄ GBAALEK

3. Ikukup me utana me anam akpalek ikisa itọn̄ ijet Jioba

Eji esifuk ikan Jioba onyibe ebi Ijeren, eji mekween̄ ubọk isabe ikup ufiak inyi Jioba ibe ebi eyi kan̄ ekup me utana. Fuk Isisibi 19:10 mè 30:17-19, mè igbaan̄ ikpa idodo chi:

• Keke ke ere Baibul chi okijeen̄ eji ofolek ubọk Jioba okimun̄ ikukup me utana me anam akpalek?

• Kpasi ata eru obotap ubọk inyi owu okup me utana me anam akpalek?

Ikukup me utana me anam akpalek iweek mgbọ mè efuuk. Ire, eji mekọt ikup me utana me ere geelek eji elukbe, mè ire eji mikaan̄ ikpoko, sa ire eji kpekaan̄. Fit FIDIO yi, mè igbaan̄ ikpa idodo yi ogọgọọk.

FIDIO: Awaji Ima Ebi Itatana (4:10)

• Ike owa ke ikekisun̄ mkpọ kiji me utana obokitap umin me lek ata etip eji ekilook?

4. Tim gak ijo eru

Ire okinwọ siga mè iyaka ire ikisa ugwun̄ irọ mkpọ me oniin̄ ikagbege, omoriọọn̄ ibe ke itetele eru chi ikafet. Keke obokọt itap ubọk inyi owu ni? Kween̄ ubọk eru chi osabe ikaan̄ igbaan̄ me lek kwun̄. Fuk Matiyu 22:37-39, mè igbaan̄ ikpa ubọk inwọnwọ siga mè iyaka ire isasa ugwun̄ irọ mkpọ me oniin̄ ikagbege osabe ikaan̄ mgbaan̄ me lek . . .

• mgbaan̄je ene melek Jioba.

• ebi ototun̄ ukan̄ ene mè ebi ofifi ife.

Neen̄ ubọk obosa itim igak ijo eru.a Fit FIDIO yi.

FIDIO: Ikekikaan̄ Ntet-Lek (2:47)

Fuk Ebi Filipai 4:13, mè igbaan̄ ikpa idodo yi:

• Ike owa ke ikekiriaak uriaak, ikekikween̄ Baibul mè ikekisi nkween̄mkpọ ntitiin̄ mgbọ geelek obosa inyi ene unye isasa itim igak ijo eru?

5. Tim gak nkeek mè eru ikatanage

Fuk Ebi Kọlọsi 3:5, mè igbaan̄ ikpa idodo chi:

• Ike owa ke eji esa iriọọn̄ ibe ke ikekikpọ ogugo njak, ikekiria etip mè ogugo ikatanage ijet ene me fun, mè ikekiriki ulọk ilaak me lek ene sa me ikekisa ubọk ichiọọk me lek njak ene ire eru ikatanage me chieen̄ Jioba?

• Ire okeek ibe ke ijeen̄ iriọọn̄-inu ibe Jioba iweek ibe eji ekup me utana me eru ni? Keke orọ ofọọkbe ikeya?

Week riọọn̄ ubọk obokọt itim igak nkeek ikatanage. Fit FIDIO yi.

FIDIO: Rọ Mkpọ Inyi Okup Me Utana (1:51)

Jisọs isa inu ntọt-me-lek ijeen̄ ibe ke eji merọ mkpọ isasa ikup me utana. Fuk Matiyu 5:29, 30, mè igbaan̄ ikpa idodo yi:

• Ikerere ibe ke Jisọs ikabe mè eji etap unan me akpalek kiji, ijeen̄ ibe ke iweek eji ikwaan̄ me ubọk isasa ikup me utana. Keke ke ene obokọt irọ isasa ijit nkeek ikatanage?b

Ire okisa ititim igak nkeek ikatanage, Jioba imọnọ efuuk okitap ibene. Fuk Okwa Itọn̄ 103:13, 14, mè igbaan̄ ikpa idodo yi:

• Ire okirurumun̄ me lek ijo eru, ike owa ke ere Baibul yi obosa itap owu efuuk me owot ibe okawọ lek?

Ire okaan̄ ntọbọ-ukot, ikasibi ibe ke okpokọt irọ itet!

Mokọt ifet ikekeek ibe, ‘Nkakọt irọ itet, eya orọ, mkpayaka itap efuuk.’ Ire, keek inu yi nu: Ire ogwu okilibi ekot inan̄a irọn̄, ire eya isibi ibe ke ikpobokọt ilibi ire ota, mè iyaka ire, ire mebe iyaka ibene me ibot ilibi ni? In̄-in̄! Ubọk yaage si, ire okaan̄ ntọbọ-ukot, eya ikasibi ibe ke okpobokọt itim igak ijo eru. Ikasibi si ibe ke otutuuk efuuk okitap ichep ita. Ikakaan̄ ntọbọ-ukot ire inu okirọrọ ene—eya orọ, kawọ lek! Sa me ntap-ubọk kè Jioba, omokọt itim igak ijo eru.

ME MGBIDIM

Eji merọ ibe Jioba ibele ejit sa me ikekisun̄ akpalek kiji, nkeek kiji, mè eru kiji me utana.

Idodo

• Keke orọ ikukup me utana ochubọk ikup me ufiak?

• Ike owa ke obokọt ikisun̄ akpalek kwun̄ me utana?

• Ike owa ke obosa ikisun̄ nkeek kwun̄ mè eru kwun̄ me utana?

WEEK

Kpasi asabọn asabọn inu ke obokọt irọ isasa ikup me utana me anam akpalek ikerere ibe ke okakaan̄ ikpoko iwa?

Unye-Lek mè Utana—Igwọgwọk Ubọk (3:01)

Week riọọn̄ usini inu echi obokọt irọ inyi okayaka ikinwọ siga.

“How to Quit Smoking” (Awake!, May 2010)

Kween̄ riọọn̄ mgbaan̄ ikpọkpọ ogugo njak okikaan̄ me lek ene.

“Pornography—Harmless or Toxic?” (The Watchtower, August 1, 2013)

Fuk ike ogwu enerieen̄ ge osabe itim igak ikpọkpọ ogugo njak eyi orerie ọmọ lek.

“I Failed Many Times Before I Succeeded” (The Watchtower No. 4 2016)