Gobo Ebi Unene Kwun̄ Jaan̄

Ata ebi unene ekirọ ibe eji ekaan̄ ubelejit egbaalek me mgbọ inu okije ijaan̄, mè ikitap eji efuuk me owot me mgbọ inu oyọtbe. Ire, Baibul itaba eji ubọk me utọn̄ ibe ke ikare otutuuk ene ere ata unene. Eya orọ, ike owa ke obosa igobo ata unene? Kpọ-nu idodo chi ogọgọọk.

1. Ike owa ke unene ogobobe obosa ikaan̄ mgbaan̄ me lek kwun̄?

Eji ekimalek ikween̄ eru ebi eji ekigọọk igbaan̄ mkpọ irọ. Mokọt ire ata eru mè iyaka ire ijo eru—eyi ire atikọ mè ire eji ekigọọk ema irọ mkpọ isi mè isi, sa eji ekigọọk ema irọ mkpọ me emen efet. Ike Baibul otumube, “ogwu ògọọk ebi ìriọọn̄ inu ije, môriọọn̄ inu, ire, ogwu ògọọk ebi mbubut [ebi kpema Jioba] ije mônin̄ me ufialek.” (Urọk 13:20) Unene ebi imama Jioba mè ikitọbọ ebum inyi ọmọ mekọt itap ubọk inyi eji ekup eriaak me lek Jioba mè erọ ata ntumu-mfieek. Ire, irere unene melek ebi kpekup me ntitiin̄ mokọt irọ ibe eji eda lek ebọkọ me lek Jioba. Eya orọ Baibul okitap eji efuuk me owot ibe eji egobo unene kiji ejaan̄! Ebi unene kiji esire ebi imama Awaji, eji melek kiban̄ mekaan̄ oruru. Eji mekọt ikup inye ‘ìkikat ge ge ejit, mè ìkitap si ubọk ìkibene ge ge ìgwuun̄ me emen ichechieek.’—Ebi Teselonaika Eyi Adasi 5:11.

2. Ike owa ke unene ogobobe obosa ikaan̄ mgbaan̄ me lek Jioba?

Jioba ikigbagbala chieen̄ igobo ebi unene kan̄. “Ogwu òtatat melek kan̄ ìre [unene].” (Urọk 3:32) Ike owa ke ibokup me lek Jioba ire eji igobo ebi kpema ọmọ kubọk unene? Mofieek ọmọ ejit enenen! (Fuk Jemis 4:4.) Ire, Jioba mobele ejit mè isa eji irọ ebi unene kan̄ ire eji ijit ijo mgbaan̄je mè ikitaba lek iriaak me lek ebi imama ọmọ.—Okwa Itọn̄ 15:1-4.

KWEEN̄ GBAALEK

3. Gbala chieen̄ inyi okagobo ijo unene

Ebi geelek kpema Jioba melek onineen̄ kan̄ ire ijo unene. Fit FIDIO yi, mè igbaan̄ ikpa idodo yi ogọgọọk.

FIDIO: Kween̄ Ijijit Ijo Mgbaan̄je (6:17)

• Ike owa ke eji ebekọt isa ibene ikigọọk ijo unene me eji ekariọọn̄ge?

Fuk Ebi Kọrint Eyi Adasi 15:33, mè igbaan̄ ikpa idodo chi:

• Ekene obokọt ire ijo unene inyi owu? Keke orọ ofọọkbe ikeya?

Fuk Okwa Itọn̄ 119:63, mè igbaan̄ ikpa idodo yi:

• Keke obojeen̄ ibe ke ene ire ata unene?

4. Ebi kpere mkpọ yaage me lek kiji mekọt ire ata ebi unene kiji

Baibul ikpa mkpọ ofolek Debit mè Jonatan, ebirieen̄ iba me Ijeren ukot ikaan̄. Ema kpere acha yaage, irek kiban̄ si ikup esese; ire, ema mikana ata unene. Fuk Samien Eyi Adasi 18:1, mè igbaan̄ ikpa idodo yi:

• Keke orọ ebi unene kiji kpebere gaalek ebi otu ogbo kiji mè iyaka ire ebi ikup me mbet lek irek eji ekupbe?

Fuk Ebi Rom 1:11, 12, mè igbaan̄ ikpa idodo yi:

• Ike owa ke ebi unene imama Jioba ekisa itap ge ge efuuk me owot?

Me emen fidio yi, kpọ ubọk gwun̄ ute ijija ge osabe imun̄ unene me ere ikakeekbe. Fit FIDIO yi, mè igbaan̄ ikpa idodo chi ogọgọọk.

FIDIO: Week Unene me Ere Echi Ekakekeekbe (5:06)

• Me emen fidio ya, keke orọ nga mè nte Akil ekikaan̄ sasaak ofolek ebi unene kan̄ me uwu ikpa?

• Keke orọ imabe ebi unene cha me adasi mgbọ?

• Ike owa ke ikọt isa itim igak ikukup agaga?

5. Ubọk eji ebesa ikaan̄ ata unene

FIDIO: Ekene Ore Ata Unene? (4:14)

Fuk Urọk 18:24 mè 27:17, mè igbaan̄ ikpa idodo chi:

• Ike owa ke ata unene ekisa itap ubọk inyi ge ge?

• Ire okaan̄ ata unene okup ikecha ni? Ire okakaan̄, ike owa ke obosa ikaan̄?

Fuk Ebi Filipai 2:4, mè igbaan̄ ikpa idodo yi:

• Inyi okaan̄ ata unene, igbe ibe owu ore ata unene. Ike owa ke obosa ire ata unene?

ME MGBIDIM

Eji esigobo ebi unene kiji ijaan̄, eji ekirọ ibe Jioba ikibele ejit mè ikirọ lek kiji oruru.

Idodo

• Keke orọ ebi eji egobobe kubọk ebi unene kiji okupbe ufiak inyi Jioba?

• Ebi unene owa ke eji ebejit?

• Ike owa ke obosa irọ unene onyenye melek ebi ata ife?

WEEK

Kween̄ ubọk ata ebi unene ebesa itap ubọk inyi eji me mgbọ ufialek.

“Build Strong Friendships Before the End Comes” (The Watchtower, November 2019)

Fuk usini mkpọ oborọ isasa ikaan̄ ata unene.

“How Can I Make Good Friends?” (Questions Young People Ask—Answers That Work, Volume 1, chapter 8)

Keke ke oboriọọn̄ ofolek ikakaan̄ unene me emen efet?

Sa Iriọọn̄-Inu Kirọ Inu Me Emen Efet (4:12)

Me emen ibot usem obe “I Yearned for a Father,” fuk inu orọrọ ogwu enerieen̄ ge onwenebe ebi unene kan̄.

“The Bible Changes Lives” (The Watchtower, April 1, 2012)