INU NKWEEN̄ 51
Ike Owa Ke Obosa Ikirọ Inyi Jioba Ikibele Ejit Inan̄a Me Ubọk Okisa Itumu Usem?
Mgbọ Jioba orombe eji, inyi eji uche osisibi esese—orere, ikọkọt ikitumu usem. Ire Awaji ikaan̄ ulọk me lek ubọk eji ekisa uche yi irọ mkpọ ni? Iin̄, ikaan̄! (Fuk Jemis 1:26.) Ire ikeya, ike owa ke eji ebekisa uche ikekitumu usem irọ mkpọ me oniin̄ obokibele Jioba ejit?
1. Ike owa ke eji ebekisa uche ikekitumu usem irọ mkpọ?
Baibul itumu inyi eji ibe: “Ìkikat ebi melek kinyi ejit, mè ìkitap si ubọk ìbene ebi melek kinyi ìgwuun̄.” (Ebi Teselonaika Eyi Adasi 5:11) Ire omokọt ikeek usini ebi iweweek ukarajit ni? Keke ke oborọ isasa ikat ema ejit? Rọ inyi ema eriọọn̄ ibe ke oma ema. Omokọt itumu inyi ema inu omabe ofolek kiban̄. Ire omokọt ikeek ere Baibul obotap efuuk me owot ogwu oriọọn̄be isi ni? Owuwa ere Baibul omaan̄ obokọt isa irọ mkpọ. Kawuuk si ibe ke usem okitumu mè ubọk okisa itumu mokọt ikaan̄ mgbaan̄ me lek ebi ofifi ife. Eya orọ, kisa inyi okotumu usem me oniin̄ okijeen̄ ima mè ikup dii.—Urọk 15:1.
2. Mbet lek usem okukup ke eji ebekijit?
Baibul ibe: “Ikachieek ibe ijo ikọ geege ikinan̄a me otu kinyi isibi.” (Fuk Ebi Efesọs 4:29.) Eyi isibi ibe ke eji kpebekisa ijo usem irọ mkpọ mè iyaka ire itumu usem obokinaan̄ ene ejit. Eji mejit si ikekilo ene mè ikekikan̄ ataak itoon̄ ene.—Fuk Urọk 16:28.
3. Keke obotap ubọk inyi eji eketumu usem obokitap ebi ene efuuk me owot?
Owuwa mgbọ, mkpọ eji ekitumu ikijeen̄ mkpọ ochubọk ikup eji me ejit mè iyaka ire mkpọ okisisaak eji. (Luk 6:45) Eya orọ, ikup ufiak ibe eji ekekpukpo lek kiji inyi eji ekekeek ata mkpọ—echi òtatat, echi òtatana, echi okijeen̄ ima, mè echi ebi ene ebekitọn̄. (Ebi Filipai 4:8) Inyi eji ekọt ekekeek mbet lek inu chi, eji mekisa me iriọọn̄-inu igobo inu eji ekisa inwọọn̄ lek mè ebi unene kiji. (Urọk 13:20) Ikekikeek mkpọ sabum eji etumu mokọt itap ubọk si. Kikeek mgbaan̄ usem kwun̄ obokaan̄ me lek ebi ofifi ife. Baibul ibe: “Ikọ etumube me una ekiket ìkifieek ene nkat me owot, ire, ikọ ogwu òriọọn̄ inu ìkigwagwa ene.”—Urọk 12:18.
KWEEN̄ GBAALEK
Kween̄ ubọk obosa ikitumu usem me oniin̄ obokibele Jioba ejit mè ikitap ebi ofifi ife efuuk me owot.
4. Kitet otu alọm kwun̄ kaan̄
Usini mgbọ, otutuuk kiji ekekitumu usem olọlọ. (Jemis 3:2) Fuk Ebi Galesia 5:22, 23, mè igbaan̄ ikpa idodo chi:
Echi owa me lek eru chi ke obokọt ibeek me uriaak, echi obotap ubọk inyi owu okotet otu alọm kwun̄ okaan̄ ni? Ike owa ke eru chi obosa itap ubọk inyi owu?
Fuk Ebi Kọrint Eyi Adasi 15:33, mè igbaan̄ ikpa idodo yi:
Kpasi mgbaan̄ ke ebi unene kwun̄ mè inu okisa inwọọn̄ lek obokọt ikaan̄ me lek mbet lek usem obokitumu?
Keke obokọt ikaan̄ mgbaan̄ me lek ubọk okisa itumu usem?
Fuk Ogwu Etip 3:1, 7, mè igbaan̄ ikpa idodo yi:
Kpa mgbọ obonwọn ibe oriaan̄ ere mè iyaka ire okup okpọ mgbọ onwọnwọn itutumu usem ni?
5. Kitumu ata mkpọ ofolek ebi ofifi ife
Ike owa ke eji ebesa ijit ikekinye chieen̄ inyi ene mè iyaka ire itutumu ijo usem inyi ebi ofifi ife? Fit FIDIO yi, mè igbaan̄ ikpa idodo chi ogọgọọk.
Me fidio ya, keke orọ gwun̄ ute ya oweek inwenwene ubọk ikisa itumu usem inyi ebi ofifi ife?
Keke ke irọ isasa inwene?
Fuk Ogwu Etip 7:16, mè igbaan̄ ikpa idodo yi:
Keke ke eji ebekikeek eji esibetumu ijo usem ibak ofifi ene?
Fuk Ogwu Etip 7:21, 22, mè igbaan̄ ikpa idodo yi:
Ike owa ke ere Baibul chi obotap ubọk inyi owu inyi okamalek inaan̄ ejit ire ene itumu ijo usem ofolek kwun̄?
6. Kisa ata ejit tumu usem nyi ebi ototun̄ ukan̄ kwun̄
Jioba iweek ibe eji ekegọọk ebi ototun̄ ukan̄ kiji etumu usem me oniin̄ okijeen̄ ata ejit mè ima me lek kiban̄. Fit FIDIO yi, mè igbaan̄ ikpa idodo yi ogọgọọk.
Keke obotap ubọk inyi owu okosa me ata ejit otumu usem onyi ebi ototun̄ ukan̄ kwun̄?
Fuk Ebi Efesọs 4:31, 32, mè igbaan̄ ikpa idodo yi:
Kpasi mbet lek usem okinama ototun̄ ukan̄ inye?
Jioba itumu ubọk inu ofolek Jisọs okupbe ọmọ me lek. Fuk Matiyu 17:5, mè igbaan̄ ikpa idodo yi:
Ike owa ke obosa ikigọọk akpat ukot Jioba me oniin̄ okisa igọọk ebi ototun̄ ukan̄ kwun̄ ikpa usem?
Week irek echi obokisa itọn̄ ebi ene
USINI ENE EKIBE: “Nkitumu nkeek n̄a. Ikagbaan̄ emi me lek ire ebi ofifi ife kpema mkpọ nkitumu.”
Ire ochieek me lek usem ya ni? Keke orọ ofọọkbe ikeya?
ME MGBIDIM
Usem ikaan̄ unye. Igbe ibe eji ekekeek mkpọ ejaan̄ ofolek inu eji ebetumu, mgbọ eji ebetumu, mè ubọk eji ebesa itumu.
Idodo
Me oniin̄ echi owa ke obokọt isa usem kwun̄ itap ubọk inyi ebi ofifi ife?
Mbet lek usem echi owa ke oweek ijijit?
Keke obotap ubọk inyi eji ekejeen̄ ata ejit mè eketumu usem obokinama ene inye mgbọ geelek?
WEEK
Keke obotap ubọk inyi eji eketumu usem onwọnwọn?
Kween̄ inu obotap ubọk inyi owu ojit ikekitumu ijo usem.
Kpọ ubọk obosa ijit irọrọn̄ inin̄ me ntọ-mkpọ ilolo ene.
Kween̄ ubọk Jioba osabe itap ubọk inyi ogwu enerieen̄ ge okirurumun̄ me lek ikekitumu ijo usem.
“I Began to Think Seriously About Where My Life Was Headed” (The Watchtower, August 1, 2013)