Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
ONYAN̄ GO 1-7
© 2023 Watch Tower Bible and Tract Society of Pennsylvania
INU UNYE OTU EWE OKUP ME USEM AWAJI | MFUFUK EYI ÒSO IBA 17-19
“Kimun̄ Ebi Ofifi Ife Ike Jioba Okimun̄ Ema”
w17.03 24 ¶7
Ire Omokeek Mkpọ Osilek Inu Egebe Ni?
7 Ofolek Jiosefat gwun̄ kè Asa ye? Ọmọ ikaan̄ owuwa ata eru. Sa me iyayaka lek iman̄ me lek Awaji, Jiosefat irọ owuwa ata mkpọ. Ire, irọ usini ijo ntumu-mfieek. Kubọk inu njeen̄, isido gwun̄ kè Eyabu ogwu mkpikpak, Ogwu Ubọọn̄ ama ubọọn̄ agan̄ inyọn̄ inyi gwun̄ kan̄. Ofifi si mè ikakpọge chieen̄ me lek ntaba-ubọk-me-utọn̄ ogwu nriran Mikaya, igọọk Eyabu isi itim akọn̄ melek ebi Siria, sọntiik me kpan̄ Jiosefat me akọn̄ ya. Ire, iyaka ika inu Jeruselem. (2 Mfuf. 18:1-32) Me mgbọ ya Jewu ogwu nriran ododo ọmọ ibe: “Ìre îtat ibe ene itap ubọk inyi ogwu ikpak, mè igọọk ogwu òchacha [Jioba NW ] itet unene?”—Fuk Mfufuk Eyi Òso Iba 19:1-3.
w15 8/15 11-12 ¶8-9
Kigwu Nkeek Kọm Me Lek Ima Jioba Eyi Okikup Ire Mgbọ Geelek
8 Jioba iweek ibe eji eriọọn̄ ọmọ kubọk ogwu omama eji mè ikikpọ iraka ekasoge kiji. Ikiweek ata mkpọ okup me emen kiji. (2 Mfuf. 16:9) Kubọk inu njeen̄, irọ ikeya me lek Jiosefat Ogwu Ubọọn̄ Juda. Me mgbọ ge, Jiosefat irọ ijo ntumu-mfieek sa me igọọk Eyabu Ogwu Ubọọn̄ Ijeren isi akọn̄ ebesa iyaka ibọkọ ama Ramot me Giliadi inan̄a me ubọk ebi Siria. Ikerere ibe efit ataak ebi nriran ini mitumu inyi Eyabu ogwu mkpikpak ibe ke akọn̄ ya monwọn ọmọ, Mikaya ata ogwu nriran Jioba itumu ibe ke akọn ya mofieek ọmọ. Eyabu ikwu me akọn ya, sọntiik mekpan̄ Jiosefat. Me mgbọ iyakabe inu me Jeruselem, mikaan̄ inu inyi ọmọ mije igọọkbe Eyabu igbaan̄ mkpọ ikirọ. Ikerere ikeya, Jewu ogwu nriran gwun̄ kè Anani otutumu inyi Jiosefat ibe: “îkaan̄ ata inu òkup me ugwem kwun̄.”—2 Mfuf. 18:4, 5, 18-22, 33, 34; 19:1-3.
9 Me mgbọ ibenebe ikikpulu, Jiosefat itumu ibe mè ebi ibot mkpulu, ebi Libai, mè ebi ngwugwa esi otutuuk ama ile me Juda esi ejeen̄ ebi ọmọ okikpulu ikan kè Jioba. Ijejeen̄ yi itet mun̄ ire lek ebi ido ikukup ikana ema ebenebe ikitet ukpook me lek Jioba. (2 Mfuf. 17:3-10) Iin̄, Jiosefat irọ inu osasaak ge, ire Jioba ikakpọ chieen̄ ilọ me lek ata mkpọ echi irọbe. Mfufuk Baibul yi ikijeen̄ ibe mè ekakpọge chieen̄ me lek ekasoge ebilene, Jioba ibokakaan̄ ima obokukup ire mgbọ geelek me lek kiji ire eji ikisa otutuuk ejit kiji ikiweek ọmọ.
Week Inu Unye Otu Ewe Okup Me Usem Awaji
w17.03 20 ¶10-11
Sa Otutuuk Ejit Kwun̄ Sa Tọbọ Ebum Nyi Jioba!
10 Jiosefat gwun̄ kè Asa “ìje me akpat ukot ogwu ute Asa.” (2 Mfuf. 20:31, 32) Ike owa ni? Kubọk ogwu ute, Jiosefat itap efuuk me owot ebi ene ibe eweek Jioba. Irọ ikeyi sa me ineneen̄ ibe esa “Ikpa Ikan Jioba” esa ejeen̄ ebi ene mkpọ. (2 Mfuf. 17:7-10) Isi si usini ama okup me ama ubọọn̄ agan̄ inyọn̄ me Ijeren, mè ijọn̄ ogoon̄ ogoon̄ ebi otoko kè Iferem, “inyi ema egwu ekom enegọọk Jioba.” (2 Mfuf. 19:4) Jiosefat ire ogwu ubọọn̄ “ogwu òsasa otutuuk ejit kan̄ iweek Jioba.”—2 Mfuf. 22:9.
11 Otutuuk kiji mekọt itap lek me lek ikwaan̄ ijejeen̄ mkpọ omimin eyi Jioba oneen̄ ibe erọ me chereyi. Ire otumu ifieek ijejeen̄ ebi ofifi ife Usem Awaji me onyan̄ geelek sa me itatap ubọk inyi ema esa otutuuk ejit kiban̄ etọbọ ebum enyi Awaji ni? Sa me itatap efuuk melek ugbana Awaji, omokọt ibene Nkween̄mkpọ Baibul me lek ebi ene. Ire mkpọ okibeek uriaak ofolek ire ya ni? Ire obem lek isisi ikwaan̄ yi, ikerere ibe ke moweek ibe osa usini mgbọ obosa ikitap efuuk osa orọ ni? Ike Jiosefat osibe ama ebi Iferem isitap ubọk inyi ema eyaka enu me lek ata ntọbọ ebum, eji si mekọt isi lek ebi kpeyaka ikilook ata etip mè ikinu nkween̄mkpọ me ujọn̄ọ ujọn̄ọ mgbọ. Isoko me lek si, ebi ugane ntitiin̄ meneen̄ ijeje ichak mè itap ubọk inyi ebi esan̄abe isan̄a me ntitiin̄ ekiluk me agan̄ ema ekilook ata etip ebi usini mgbọ mitele ijo inu ema ewuuk lek irọ.
ONYAN̄ GO 8-14
INU UNYE OTU EWE OKUP ME USEM AWAJI | MFUFUK EYI ÒSO IBA 20-21
“Kaan̄ Ichechieek Me Lek Jioba Awaji Kwun̄”
w14 12/15 23 ¶8
Ikekigbaan̄ Ije Itibi Ota Ijo Ukot Keyi
8 Me usen Ogwu Ubọọn̄ Jiosefat, ebi eyi Awaji michichini ufialek omimin orere “urum akọn̄ òmimin enene” inan̄a me ido ikukup ikana ema. (2 Mfuf. 20:1, 2) Inwọn ibe ke ebi usun̄ Awaji kpesa ititim igak ebi ochicha chi me unye kiban̄. Kpan̄asi ikeya, ema eyaka lek iman̄ me lek Jioba. (Fuk Mfufuk Eyi Òso Iba 20:3, 4.) Ema si kperọ ikeya me lek kiban̄ ge ge, ogwu ikup ikarọ ubọk oneme ọmọ. Mfufuk Baibul itumu inyi eji ibe: “Otutuuk ebi Juda mè ebi nwa kiban̄ mè bọn kiban̄ melek asasa nsabọn kiban̄ ekpọkpọ ikeke ikeya me isi Jioba.” (2 Mfuf. 20:13) Me ire ebi ijija sa ire ebi inin̄ ugane, otutuuk kiban̄ egbagbaan̄ isa me ichechieek igọọk ntọ-ubọk Jioba, Jioba si onyanyan̄a ema isibi me ubọk ebi ochicha kiban̄. (2 Mfuf. 20:20-27) Ire eyi ikare ata akpat ukot ofolek ubọk eji ebesa ikije itibi ufialek kubọk ebi eyi Awaji ni?
w21.11 16 ¶7
Olom Mè Nwa Ebi Ibabat Ayaya—Imọnọ Itọtọbọ Ebum Inyi Jioba Kubọk Adasi Inu Me Ugwem Kinyi
7 Jioba isa Jayajien ogwu Libai itumu usem inyi Jiosefat ibe: “Ìmọnọ irek kinyi, mè ìkeke ìnye, mè ìkpọ unyan̄a Jioba obonyan̄a enyi isibi.” (2 Mfuf. 20:13-17) Eyi ikare ubọk ekitim akọn̄ ire ya! Ire ntọ-ubọk yi ikanan̄a me ubọk ebilene; inan̄a me ubọk Jioba. Mije isabe otutuuk ejit kan̄ itoon̄ me lek Awaji kan̄, Jiosefat irọ mkpọ Jioba obe me irọ. Mgbọ ọmọ mè ebi me lek kan̄ enan̄a isibi ebesichichini ebi ochicha kiban̄, ikato ebi irọriọọn̄ akọn̄ me isi, kpan̄asi ikeya ito ebi ikikọt okwa, ebi kpeben mkpọ akọn̄ geege me isi. Jioba ikatọbọ Jiosefat ilọ; Itim ikpan̄ ebi akọn̄ ebi ochicha kiban̄.—2 Mfuf. 20:18-23.
Week Inu Unye Otu Ewe Okup Me Usem Awaji
it-1 1271 ¶1-2
Jeyoram
Usini mgbọ bak me lek ijo mgbaan̄ ogwu nwa Atalia okaan̄be me lek kan̄, Jeyoram ikarọ mkpọ otatat ike Jiosefat ogwu ute orọbe. (2 Ubọọn̄ 8:18) Ikare gaalek ibe ke ikpan̄ ebi ngwan̄ kan̄ gweregwen mè usini ebi ibot mkpulu me Juda, ire, irọ inyi ebi ikikpulu enan̄a me lek Jioba mè ekesitọbọ ebum enyi ataak awaji. (2 Mfuf 21:1-6, 11-14) Otutuuk mkpulu kan̄ ijot me lek ufialek. Adasi, ebi Edọm mifieek inan̄a me irak mkpulu ido Juda; ebi Libina si efefieek inan̄a me irak mkpulu kan̄. (2 Ubọọn̄ 8:20-22) Me emen ikpa igebe ijet Jeyoram, ogwu nriran Ilaija itaba ọmọ ubọk me utọn̄ ibe: “Jioba mônisulu ebi ido kwun̄ ikpele osusut, mè isulu si bọn kwun̄, mè ebi nwa kwun̄, mè otutuuk inu geelek okaan̄be.” Ire, owu, Ogwu Ubọọn̄ Jeyoram, “môbene ikifiak ikpele ijo orukan̄ owot eyi ìkakita, eyi òbokininọọn̄ owu usen geelek, mege nkat kwun̄ môgbukube isibi.”—2 Mfuf 21:12-15.
Ibọkọ irek ikeya si. Jioba itele ibe ebi Arabu mè ebi Filisia etim egak ema mè ekpulu ebi nwa mè nsabọn Jeyoram me usun̄ akọn̄. Awaji itele ibe gwun̄ kan̄ ogwu osisip ichit Jeyowayaji (ogwu ekigwen si Ayajaya), ibe inwọn̄ọ, Awaji irọ eyi mije inyan̄a ibot Ama Ubọọn̄ ikaan̄be melek Debit. “Me mgbọ eya orakabe, [Jioba NW ] oraria ijo orukan̄ owot eyi kpekikọt igwa itap me owot kè Jeyoram.” Mgbọ acha iba orakabe me lek orukan̄ kan̄ “nkat kè Jeyoram ogbugbuku isibi” ikwukwu melek ikpele unaan̄. Ikeya ke ugwem ogwu mkpikpak yi osa ita, kpunu ene geege òtoto ito mkpa kan̄. Ebeben ifuun̄ me ama kè Debit, ire, kpefuun̄ ọmọ me ere ekifuun̄ ebi ubọọn̄.” Ayajaya ogwu gwun̄ okakana ubọọn̄ me irek kan̄.—2 Mfuf 21:7, 16-20; 22:1; 1 Mfuf 3:10, 11.
ONYAN̄ GO 15-21
INU UNYE OTU EWE OKUP ME USEM AWAJI | MFUFUK EYI ÒSO IBA 22-24
“Jioba Ikpe Mkpukpe Inu Esabe me Unye Ejit Irọ”
w09 4/1 24 ¶1-2
Jowas Itele Jioba Mije Ijo Mgbaan̄je
IRE MGBỌ osasak enenen me Jeruselem, ama ere uwu mbuban Awaji okupbe. Mikpan̄ Ogwu Ubọọn̄ Ayajaya. Ire iyọt ikekeek mkpọ Atalia nga kè Ayajaya orọbe. Atalia inyi ida ibe ekpan bọn̄ kè Ayajaya—irere bọn bọn kan̄—gaalek! Ire oriọọn̄ mkpọ orọrọ ni?— Inyi ọmọ ikana ogwu obokikpulu kpan̄asi ene ge melek kiban̄.
Ire, minyan̄a ge melek bọn bọn kè Atalia, orere sọntitiik gwun̄ Jowas, ire, nga ogwu ute ikariọọn̄ mkpọ osilek. Ire omoma irọriọọn̄ ubọk esabe inyan̄a ọmọ ni?— Sọntiik gwun̄ ya ikaan̄ ngwan̄ nte kan̄ ge ekigwen Jeyoseba, ogwu olelet Jowas me uwu mbuban Awaji. Jeyoseba ikọt irọ eyi mije nlom kan̄ Jeyoyada orebe Ogwu Ibot Ebi Ngwugwa. Ema ene iba mimun̄ ibe ke inu geege ikare lek Jowas.
w09 4/1 24 ¶3-5
Jowas Itele Jioba Mije Ijo Mgbaan̄je
Milet Jowas me uwu mbuban me acha gweregwen. Me ere ya mijeen̄ ọmọ mkpọ ofolek Jioba mè ikan kan̄. Me mgbọ Jowas orebe acha jaaba, Jeyoyada orọrọ mkpọ isasa irọ ọmọ ubọọn̄. Ire omoma irọriọọn̄ ubọk Jeyoyada osa irọ eyi mè mkpọ orọrọ inyi nga nte kè Jowas, Atalia Ogwu Ubọọn̄ enenwaan̄ mkpikpak ni?
Jeyoyada isa me nlelet igwen otutuuk ebi ikibem ebi ubọọn̄ me Jeruselem me mgbọ ya. Itumu inyi ema ubọk ọmọ melek nwa kan̄ esabe inyan̄a sọntiik gwun̄ Ogwu Ubọọn̄ Ayajaya. Jeyoyada osasa Jowas ijeen̄ ebi ikibem ebi ubọọn̄ cha, ebi iniriọọn̄ ibe ke ire ọmọ ogbe irere ogwu ubọọn. Ema si etọtọt inu ema eberọ.
Jeyoyada osasan̄a Jowas isibi mè irọ ọmọ ubọọn̄. Mgbọ ya “ebi ene ekekikwak ubọk, mè ikitaan̄ ukpo ikibe, ‘Ogwu ubọọn̄, luk ugwem jọn̄ọ!’ ” Ebi ikibem ebi ubọọn̄ cha ekekeke ikana Jowas me ikibem ọmọ. Mgbọ Atalia onọbe otutuuk ene ekinwọọn̄ unwọọn̄, ililibi isibi mè ikiweek ikpukput. Ire, Jeyoyada onyinyi ida, ebi mbem cha ekpakpan̄ Atalia.—Ebi Ubọọn̄ Eyi Òso Iba 11:1-16.
it-1 379 ¶5
Ufuun̄, Ere Ufuun̄
Jeyoyada Ogwu Ibot Ebi Ngwugwa Ogwu Ata Irọrọ ire ogwu enyibe umin me ifuun̄ ọmọ “me etete ebi ubọọn̄ me Ama kè Debit,” ọmọ gaalek ore ogwu ikare ogwu ubọọn̄ enyibe mbet lek umin okup ikeya.—2 Mfuf 24:15, 16.
Week Inu Unye Otu Ewe Okup Me Usem Awaji
it-2 1223 ¶13
Jekaraya
12. Gwun̄ kè Jeyoyada Ogwu Ibot Ebi Ngwugwa. Mgbọ Jeyoyada okwube iraka, Ogwu Ubọọn̄ Jowas otetele ata ntọbọ ebum, mè ibene ikigban̄ ijo nteme kpan̄asi ebi nriran Jioba. Jekaraya, gwun̄ ngwan̄ nte kè Jowas (2 Mfuf 22:11), itaba ema ubọk me utọn̄ ofolek eyi, ire kpan̄asi ema ebegwu ikọm, ema esasa ewuuk itọbọ ọmọ ikpan̄ me emen egep uwu mbuban. Mgbọ Jekaraya obokwu, itutumu ibe, “Kè [Jioba] imun̄, mè ido urieek.” Usem nriran yi irọ iso, mije ikare gaalek ibe ke ebi Siria mifiat owuwa mkpọ me Juda ire, ebi ibot ikwaan̄ Jowas iba mikpan̄ ọmọ “mije îkpan̄be gwun̄ kè Jeyoyada ogwu ngwugwa.” Ikpa Greek Septuagint melek Latin Vulgate ibe ke ekpan̄ Jowas mije eje “gwun̄” kè Jeyoyada. Ire, eyi Masoretic mè Syriac Peshitta, ebe “bọn,” ema esa usem okijeen̄ owuwa isa irọ mkpọ isasa ijeen̄ ubọk Jekaraya gwun̄ kè Jeyoyada ogwu nriran mè ire ogwu ngwugwa osabe ikup unye otu ewe ire.—2 Mfuf 24:17-22, 25.
ONYAN̄ GO 22-28
INU UNYE OTU EWE OKUP ME USEM AWAJI | MFUFUK EYI ÒSO IBA 25-27
“Jioba Môkọt Inyi Owu Eyi Òwawa Igak Ikeya”
it-1 1266 ¶6
Jeyowas
Jeyowas si inyi efit obop ebi akọn̄ kan̄ ibe esigọọk ebi akọn̄ Juda etim akọn̄ melek ebi Edọm. Ire, igọọk me lek nteme “ogwu ikwaan̄ Awaji ge” ebebe me ema efo, ikerere ibe ke miwuuk lek ikpe ema obop kilo alata okuket ita mè efit kilo ini ($660,600), ema minaan̄ ejit mije ebe me ema eyaka efo, usini mgbọ mokọt ire ibe bak me lek ema kpegọọk ikaan̄ uche me lek inu ebefumbe me akọn̄ ya. Eya orọ mgbọ ema eyaka inu me agan̄ inyọn̄ ema efufum owuwa inu me ama okup me ama ubọọn̄ okup me agan̄ osiki, bene me Sameria (mokọt ire ere ema ekinan̄a isi akọn̄ ya) isi ire Bet Oron.—2 Mfuf 25:6-10, 13.
w21.08 30 ¶16
Ike Owa Ke Obosa Iriọọn̄ Ibe Ke Jioba Inwọn?
16 Gwa Ngwugwa Sa Nyi Jioba. Eji kpebetele otutuuk inu geelek eji ekinwọọn̄ sabum eji erọ ibe Jioba ibele ejit. (Etip. 5:19, 20) Ire, ire eji ikpebe lek irọrọ ikwaan̄ inyi Jioba igbaalek, mije eji kpeweek itetele usini mkpọ eji emabe, eji mekọt ikirọ mbet lek lọlọ inu ogwu enerieen̄ me emen urọk Jisọs okpabe orọbe, ogwu enerieen̄ ya ititiin̄ owuwa inu ubọọn̄ ibonwọọn̄ ire ikakeek mkpọ ofolek Awaji. (Fuk Luk 12:16-21.) Gwun̄ enerieen̄ ge ekigwen Christian, ogwu okiluk me France ibe, “Nkakinyi Jioba mè ebi ototun̄ ukan̄ n̄a mgbọ mè efuuk n̄a eyi onwọnwọn ichit.” Ọmọ mè ogwu nwa mitumu ifieek ikekigbo oniin̄ eyi ojot mgbọ. Ire, inyi ema ekọt erọ etet moweek ibe ema etele ikwaan̄ kiban̄. Inyi ema ekọt ekekpọ chieen̄ me lek ufiak kiban̄, ema mibene sọntiik ikwaan̄ ikekisun̄ ere me utana, mè ikween̄ ikekitele ibe sọntiik inu ema ekaan̄be iso ema. Ire ngwugwa yi ema egwabe isibi oruru ni? Christian ibe, “Eji minwọọn̄ ikekisibi uko me mgbọ keyi mè ikinwọọn̄ imumun̄ ebi eji ekigọọk ikween̄ mkpọ mè ebi eji ekije ichak ekikween̄ mkpọ ofolek Jioba.”
Week Inu Unye Otu Ewe Okup Me Usem Awaji
w07 12/15 10 ¶1-2
Ire Okaan̄ Ogwu Nteme Me Irek Emen Ekwukwu Ni?
Me mgbọ irebe akọp mè acha gweregwen, Ujaya ikana ogwu ubọọn̄ me ama ubọọn̄ agan̄ osiki me Juda. Ikpulu me mkpọ oraraka akọp acha go, ibene me 829 B.C.E isi ire 777 B.C.E. Bene me ijija, Ujaya “îrọ inu òtatat me chieen̄ Jioba.” Keke otap ubọk inyi ọmọ ikọt ikirọ inu otatat ni? Mfufuk ya itumu ibe: “Ujaya îweek Awaji me otutuuk mgbọ Jekaraya, ogwu òkiteme ọmọ nteme me ukpook Awaji, okupbe me ugwem. Otutuuk mgbọ îkiweek Jioba, Awaji okekirọ ibe inu ije ijaan̄ me lek kan̄.”—Mfufuk Eyi Òso Iba 26:1, 4, 5.
Kperiọọn̄ owuwa mkpọ ofolek Jekaraya yi, ogwu okiteme ogwu ubọọn̄, isan̄a me lek mfufuk Baibul yi. Ire, kubọk “ogwu òkiteme ọmọ nteme me ukpook Awaji,” Jekaraya ikaan̄ ata mgbaan̄ me lek ogwu ubọọn̄ ijija yi ibe ikirọ mkpọ otatat. Ofolek Jekaraya The Expositor’s Bible ibe ke “ọmọ iriọọn̄ ikpa mbuban ijaan̄, mè ijot me lek ngobo ntet eyi Awaji mè ikọt ikikpa iriọọn̄-inu kan̄ ijaan̄.” Ene ge okikween̄ Baibul itumu mkpọ ofolek Jekaraya ibe: “Iriọọn̄ nriran ijaan̄ mè . . . ire ogwu okakaan̄ iriọọn̄-inu, ikaan̄ ukpook Awaji, ire ata ene; mè ichubọk ikaan̄ mgbaan̄ omimin me lek Ujaya.”
ONYAN̄ GO 29–ONYAN̄ GWEREGWEN 4
INU UNYE OTU EWE OKUP ME USEM AWAJI | MFUFUK EYI ÒSO IBA 28-29
“Owu Mokọt Itọbọ Ebum Inyi Jioba Ikerere Ibe Ke Nga Kwun̄ mè Nte Kwun̄ Kpejeen̄ Ata Akpat Ukot”
w16.02 14 ¶8
Gọọk Akpat Ukot Ata Ebi Unene Jioba
8 Irek Ejikaya ikup esese me lek eyi Rufu, eman ọmọ itap me ido ebi isasa lek kiban̄ inyi Jioba. Ire, ikare otutuuk ebi Ijeren ekiluk ugwem igọọk isasa lek inyi ya. Ogwu Ubọọn̄ Ayaji nte kè Ejikaya ire ge me lek kiban. Ogwu mkpikpak yi irọ inyi ebi ama ubọọn̄ Juda ekeriaak Yọk, me ichaka mbuban me lek uwu mbuban Jioba okup me Jeruselem. Iyọt ikokọt ikeek ubọk ugwem Ejikaya obokup me mgbọ ikupbe sọntitiik, mije usini ebi ngwugwa kan̄ ire ebi ikwukwu mkpa unye, ewọwọp ema me ukan̄ isa igwa ngwugwa inyi ataak awaji!—2 Ubọọn̄. 16:2-4, 10-17; 2 Mfuf. 28:1-3.
w16.02 14 ¶9-11
Gọọk Akpat Ukot Ata Ebi Unene Jioba
9 Ejikaya ke okọt omin osibi kubọk ogwu okinaan̄ ejit, ikaweekge itọtọ ebum inyi Awaji. Ebi ofifi ife ebi kpechichini mbet lek uyot mkpọ ichichinibe mikikeek ibe ke itat ibe ema ‘enaan̄ ejit enyi Jioba’ mè iyaka ire ntitiin̄ kan̄. (Urọk. 19:3) Mè mgbọ usini ene si ekichieek ibe ke ijo akpat ukot ebi ototun̄ ukan̄ kiban̄ orọ ibe ema eluk ijo ugwem, inyi ema erọ ijo inu yaage nte mè nga kiban̄ erọbe. (Ijik. 18:2, 3) Ire, ire nkeek chi itat ni?
10 Mfufuk ugwem Ejikaya inyi eji ata ufọọk-otu ibe ke nkeek chi ikatat! Ikakaan̄ ata mkpọ geege oborọ ibe ene enaan̄ ejit enyi Jioba, mije ikare ọmọ orọ ibe ijo inu okibọkọ irek me inyọn̄ keyi ikirọ. (Jobu 34:10) Atikọ ibe ke uga mè ute mikikaan̄ mgbaan̄ lek ugwem nsabọn kiban̄ mokọt ire ata mè iyaka ire ijo mgbaan̄. (Urọk 22:6; Kọl. 3:21) Ire, eyi ikasibi ibe ke ototun̄ ukan̄ ene enan̄a isibi obotumu ifieek mbet lek ugwem ene oboluk. Kpan̄asi ikeya, Jioba inyi otutuuk kiji inyinyi okukup unye otu ewe orere nkeek isasa igobo inu eji eberọ mè mbet ene eji ebere. (Ikan. 30:19) Ike owa ke Ejikaya osa inyinyi yi irọ mkpọ ni?
11 Ikerere ibe Ejikaya ire gwun̄ ge me lek ogwu ubọọn̄ Juda osasak ichit, imin isibi me inikana ene ge me lek ebi ubọọn̄ Juda inwọnwọn ichit. (Fuk Ebi Ubọọn̄ Eyi Òso Iba 18:5, 6.) Atikọ ibe nte kan̄ ikajeen̄ ata akpat ukot, ire, ikaan̄ owuwa ata akpat ukot ibokọt ikween̄ mkpọ inan̄a me lek.Asaya, Miaka mè Osia misi ikwaan̄ kubọk ebi nriran me ukot ya. Eji mekọt ikikeek ike Ogwu Ubọọn̄ Ejilaya obokiriọọn̄ ubọk igban usem Awaji ebirieen̄ chi ikigbe utoon̄-ejit ekitumu, itele si ibe nteme mè nnen̄e nsun̄ Jioba ire ọmọ ejit. Eya orọ Ejikaya itap efuuk inenen̄e isun̄ otutuuk ijo inu nte kan̄ orọbe. Irọ eyi sa me itutuku uwu mbuban itana, igwa ngwugwa mije ijo inu ebi ene, mè itap efuuk onyenye isasa ijijaka mkpọmfaka. (2 Mfuf. 29:1-11, 18-24; 31:1) Mgbọ ichichini irek oyọyọt, kubọk mgbọ Senakerip ogwu ubọọn̄ Asiria obonitim akọn̄ me lek Jeruselem, Ejikaya ijeen̄ unye-ejit mè ichechieek onyenye. Iyaka lek iman̄ me lek Jioba ibe inyan̄a ọmọ mè itap efuuk me owot ebi kan̄ inan̄a me lek usem kan̄ mè irọrọ kan̄. (2 Mfuf. 32:7, 8) Ike mgbọ ojebe, mgbọ Ejikaya oweekbe nnen̄e nsun̄ mije ijeen̄be eru ugumu, isiki lek mè igwu ikom. (2 Mfuf. 32:24-26) Ikpọ mbum ibe ke Ejikaya ikatele ibe inu owuwuulek irọ me ugwem kan̄ ifiat ugwem kan̄ mè irọ inyi ọmọ ikakaan̄ mgbọ okup me isi. Kpan̄asi ikeya, ijeen̄ ibe ke ọmọ ire ogwu unene Jioba mè ire ata akpat ukot inyi eji.
Week Inu Unye Otu Ewe Okup Me Usem Awaji
w12 2/15 24-25
Netan—Ogwu Ogbegbe Utoon̄-Ejit Me Ibieen̄ Ata Ntọbọ Ebum Inye
Kubọk ogwu ogbegbe utoon̄-ejit inyi Jioba, Netan isa me uyok uyok ejit ibieen̄ ntọt Debit inanama adasi uwu ebesa irọ ata ntọbọ-ebum me inyọn̄ ijọn̄ yi inye. Ire, mgbọ ya, Netan ikpa nkeek kan̄ kpan̄asi itutumu ikọ me erieen̄ Jioba. Me ikakwun̄ ya, Awaji onyinyi ogwu nriran kan̄ ida ibe isi ilook ogwu ubọọn̄ esese etip: Ikare Debit obonama uwu mbuban ya. Ogwu obonama uwu mbuban ya ibore ge me lek bọn kè Debit. Ire, Netan ilook ibe ke Awaji morọ inyan̄a-ibot melek Debit ibe ke ogboon̄ ubọọn̄ kan̄ “ìbokekeke inye isi ire mgbọ geelek.”—2 Sam. 7:4-16.
Nkeek Netan ikaje ikeke me lek nkeek eyi Awaji ofolek inanama uwu mbuban. Ire, me kpunube mun̄un̄u, ogwu nriran yi osisiki lek ibọkọ nkeek Awaji itap mè ibieen̄ inye. Eyi ichubọk ire ata akpat ukot igọgọọk, ire Awaji inen̄e eji isun̄ me usini irek! Ikwaan̄ Netan oyaka isi igọọk ijeen̄ ibe ke ikachep onwọn isi Awaji. Ibelek Jioba inyi Netan mè Gadi ogwu nriran ntọ-ubọk ofolek ubọk Debit obosa ineen̄ obop ene ini ebi ikikọt okwa me uwu mbuban.—1 Mfuf. 23:1-5; 2 Mfuf. 29:25.
ONYAN̄ GWEREGWEN 5-11
INU UNYE OTU EWE OKUP ME USEM AWAJI | MFUFUK EYI ÒSO IBA 30-31
“Ikekigbaan̄ Ititiin̄ Inwọn̄ Inyi Eji”
it-1 1103 ¶2
Ejikaya
Uyọk uyọk ejit ikaan̄be me lek ata ntọbọ-ebum. Ejikaya ijeen̄ uyọk uyọk ejit ikaan̄be me lek ntọbọ-ebum Jioba mgbọ yaage ikanabe ogwu ubọọn̄ me mgbọ irebe akọp acha iba mè go. Adasi inu irọbe ire iyayaka ichili mè ineneen̄ uwu mbuban isun̄. Igbaan̄ si ebi ngwugwa mè ebi Libai ititiin̄, mè itumu inyi ema ibe: “Ntumu ifieek ibe ke eji mênyan̄a ibot melek Jioba, Awaji ebi Ijeren.” Eyi ire inyan̄a-ibot igbegbe utoon̄-ejit, eyi ikup kubọk eyayaka irọ inyan̄a-ibot eyi Ikan eyi ema ekpọbe chieen̄ ilọ me lek me Juda. Ejikaya itap efuuk isi ikwaan̄ mineen̄ ebi Libai mè inyi ema ikwaan̄, iyaka ineen̄ ndọmọ ikọkọt okwa. Ire onyan̄ Nisan, onyan̄ ekirie Ijọk Iraraka, ire, uwu mbuban, ebi ngwugwa mè ebi Libai kpekup me utana. Me òso akọp mè usen gweregwen me onyan̄ Nisan, esusun̄ uwu mbuban me utana mè iyaka inisa otutuuk mkpọ ekisa irọ ikwaan̄ initap me emen. Egwagwa ngwugwa isasa irọ esuuk osibi esese me ibot otutuuk ebi Ijeren. Ebi ibot mkpulu edadasi isa ngwugwa inu, inyi egwa me ibot ijo inu ido ya, uwu mbuban, mè otutuuk ebi ene, mgbọ eya orakabe ebi ene esasa obop obop ngwugwa ewọwọp iriọk inu.—2 Mfuf 29:1-36.
it-1 1103 ¶3
Ejikaya
Mije ebi Juda kpekup me utana ema kpekọt irọ Ijọk Iraraka me mgbọ ekirọ, Ejikaya osasa irek enyibe me emen ikan ibe ke ebi kpetana mekọt irọ Ijọk Iraraka me onyan̄ ogọgọọk irọ mkpọ. Iraria ebi ìkilook etip ibe esa ikpa eche ekana, ikare me Juda gaalek, ire, me otoko kechilọ bene me Bieseba si re Dan. Ire, ebi ene ekekichak ebi ikilook etip cha, ire, usini ebi otoko kè Ase, Manasi, mè Jebulọn egegele lek isiki, mè isibi inu Jeruselem, usini ebi otoko kè Iferem mè Isaka, migọọk inu si. Isan̄a me lek ebibi usini ebi kpere ebi Ijeren ikitọbọ ebum inyi Jioba migọọk inu. Mokọt ire mkpọ oyọyọt inyi ebi ikup me ama ubọọn̄ agan̄ inyọn̄ ikup inyi ata ntọbọ-ebum inunu. Mije, kubọk erọbe ebi ikilook etip cha, ema mekọt ikichichini ochak mè ukeme, mije, ebi akọp otoko ama ubọọn̄ agan̄ inyọn̄ ire ebi itatap lek idọk me ataak ntọbọ-ebum mè ire si ebi, ebi Asiria ekisisaak—2 Mfuf 30:1-20; Ifuk 9:10-13.
it-1 1103 ¶4-5
Ejikaya
Mgbọ erọbe Ijọk Iraraka isan̄a, erọrọ Ijọk Fituru Kpunu Olat me egwe jaaba mije unwọọn̄ ema ekaan̄be otutuuk ebi Ijeren etutumu ifieek irọrọ Ijọk ya usen jaaba igbaalek. Ikerere me mgbọ oyọyọt yi, ugbana Jioba isibi utoon̄ ire lek “uga unwọọn̄ ojojot Jeruselem me ijọk ya, mije, karake ukot kè Solomọn gwun̄ kè Debit ogwu ubọọn̄, otutuuk Ijeren mege inire ukot keyi, mbet inu òkup ikeyi ìkamọnọ irek me Jeruselem.”—2 Mfuf 30:21-27.
Mkpọ orọrọ igọọk ijeen̄ ibe ke eyi ichubọk ire iyayaka iben ata ntọbọ-ebum igwuun̄ ikare unwọọn̄ okpọkpọ ikup me sọnja mgbọ. Sabum ema eyaka ifo usini ebi inu orirọ ya ejijibi inin̄ ama, mè ibak otutuuk ewuuk mfaka cha geelek igwook, mè isọp uti yọk Asera, mè igbugbọ otutuuk isi-ijọn̄ melek otutuuk ntook geelek isan̄a me otutuuk agan̄ ebi otoko kè Juda mè Benjamin mè ikerere ebi otoko kè Iferem mè Manasi. (2 Mfuf 31:1) Ejikaya ijeen̄ ata akpat ukot sa me ijijaka ijijinu eyi Mosis osabe ekwe irọ, mije, ebi Ijeren misa ijijinu ya irọ mkpọmfaka, mè ikigwa ngwugwa inyi. (2 Ubọọn̄ 18:4) Mgbọ erọbe ijọk ya isan̄a Ejikaya imun̄ ijaan̄ ibe ke ata ntọbọ-ebum ikup inye ikije inyi isi sa me ineneen̄ ebi ngwugwa me urum mè urum mè ineen̄ ubọk ebekirọ ikwaan̄ me uwu mbuban; itap efuuk me owot ebi ene ibe esun̄ ikan irek ge me akọp irek mè adasi mfut ekisa inyi ebi Libai mè ebi ngwugwa, ebi ene esasa me otutuuk ejit kiban̄ irọ ikeya.—2 Mfuf 31:2-12.
Week Inu Unye Otu Ewe Okup Me Usem Awaji
w18.09 6 ¶14-15
“Mgbọ Keyi Enyi Eriọọn̄be Inu Chi, Awaji Môgbana Enyi, Ire Enyi Ikirọ Inu Chi”
14 Ofifi oniin̄ eji ebesa ijeen̄ ibe ke eji misiki lek, ire ikekigban̄ ebi ene ijaan̄. Ikpa Jemis 1:19 itumu ibe eji ‘ekegwat lek enọ ikọ.’ Jioba me lek kan̄ ijeen̄ akpat ukot onwọnwọn ichit ofolek eyi. (Ibeb. 18:32; Jos. 10:14) Kpọ-nu mkpọ eji ebekọt ikween̄ inan̄a me lek usem igọọkbe Mosis ikpa okup me ikpa Isisibi 32:11-14. (Fuk.) Ikerere ibe ikaweek nkeek Mosis, Jioba inyi Mosis irek ikpakpa ejit kan̄ isibi. Kpasi ogwu ebilene oboma igbagban ogwu nkeek kan̄ owuuk lek ikilọ me mgbọ oraraka mè isa nkeek kan̄ irọ inu ni? Ire, Jioba ikisasa me ime ikigban̄ ebilene ikisa me ichechieek igwen ọmọ.
15 Eji ge ge merọ ijaan̄ mè ido lek kiji: ‘Ire Jioba isiki lek ikigban ebilene ikike kubọk Ebereyam, Rechen, Mosis, Josuwa, Manowa, Ilaija, mè Ejikaya, ire ikagbe ibe nkirọ ikeya sa me ikekinyi bọn ute irieen̄ mè ibaan̄ ulibi inan̄a me lek ikekigban ema mè ikekisa ata nkeek kiban̄ irọ mkpọ ni? Ire ikaan̄ ene ge me ntitiin̄ mè iyaka ire ototun̄ ukan̄ n̄a ogbegbe ibe nche ulọk n̄a nnyi ni? Keke ke mbarọ ofolek?’—Ibeb. 30:6; Oyer. 13:9; 1 Ubọọn̄. 17:22; 2 Mfuf. 30:20.
ONYAN̄ GWEREGWEN 12-18
INU UNYE OTU EWE OKUP ME USEM AWAJI | MFUFUK EYI ÒSO IBA 32-33
“Kitap Efuuk Me Owot Ebi Bọn Ute Kwun̄ Me Mgbọ Ufialek”
it-1 204 ¶5
Asiria
Senakerip. Senakerip, gwun̄ kè Sargon II, ijibi akọn̄ inu me lek ebi ama Juda me òso akọp me acha ini me lek mkpulu Ejikaya (732 B.C.E.). (2 Ubọọn̄ 18:13; Asa 36:1) Ejikaya ikaya iweek ikukup me irak akpan̄ ebi Asiria esabe ikeme ema mije inu ogwu ute Ayaji orọbe. (2 Ubọọn̄ 18:7) Senakerip ojijibi akọn̄ inin Juda, mè ibọkọ mkpọ obet lek akọp ama ini mè gweregwen (kpọ si Asaya 36:1, 2), inan̄a me ere ọmọ mè ebi akọn̄ kan̄ ekupbe me Lakis, idodo Ejikaya ibe inyi ọmọ obop kilo alata araran (c. $11,560,000) mè akọp obop kilo alata okuket (c. $1,982,000). (2 Ubọọn̄ 18:14-16; 2 Mfuf 32:1; kpọ si Asaya 8:5-8.) Ikerere ibe ke mikpe inu chi, Senakrip iria etip inu ibe ebi Jeruselem ere ebi usun̄ kan̄. (2 Ubọọn̄ 18:17–19:34; 2 Mfuf 32:2-20) Ire Jioba okpakpan̄ 185,000 me lek ebi akọn̄ Senakrip, eyi orọrọ ibe ogwu Asiria okigumu lek yi iyaka ifo Ninife. (2 Ubọọn̄ 19:35, 36) Me ere ya ke nsabọn kan̄ ene iba ekpan̄ ọmọ, ofifi gwun̄ kan̄ Esaradọn okakana ubọọn̄ me irek kan̄. (2 Ubọọn̄ 19:37; 2 Mfuf 32:21, 22; Asaya 37:36-38) Mige otutuuk inu chi, isan̄a me lek mkpa ebi akọn̄ ebi Asiria me mfufuk ofolek Senakrip mè Esaradọn.—PICTURES, Vol. 1, p. 957.
w13 11/15 19 ¶12
Inu Ebi Òkpukpo Arọọn̄ Jaaba, Mè Ebi Ibot Mkpulu Jeeta—Esibi Inyi Eji Me Chereyi
12 Jioba ikukup me mbem lek irọrọ mkpọ eji kpebekọt irọ inyi eji, ire, iweek ibe eji erọ eyi eji ebekọt irọ. Ejikaya onenigọọk “ebi ibot ikwaan̄ kan̄ mè ebi ibot akọn̄ kan̄ igbaan̄ itọt ibe echit mun̄ òkinan̄a me emen ama ya ilibi isibi oyet. . . . [Ejikaya] otetet lek inye ikpọk inama otutuuk ere ògbugbugbọ me lek mgban ama ya, mè inama si owuwa uwu-oket me inyọn̄ mgban ama ya. Înama si ofifi mgban me udun̄ mgban ama ya, . . . Îrom si owuwa nroon̄ akọn̄ melek owuwa agbọ.” (2 Mfuf. 32:3-5) Inyi ikọt ibem mè ikpọ chieen̄ me lek ebi eyi kan̄ me mgbọ ya, Jioba isa ebirieen̄ inyenye lek kubọk—Ejikaya, ebi ibot ikwaan̄ kan̄, mè ebi nriran ikakaan ichechieek onyenye irọ mkpọ.
w13 11/15 19 ¶13
Inu Ebi Òkpukpo Arọọn̄ Jaaba, Mè Ebi Ibot Mkpulu Jeeta—Esibi Inyi Eji Me Chereyi
13 Mkpọ Ejikaya orọbe igọọk ikup ufiak igak ichichit mun̄ mè iyayaka inama mgban ama. Kubọk ogwu okpukpo aroon̄ okakaan̄ ulọk melek ebi ọmọ okikpọ, Ejikaya ititiin̄ ebi eyi kan̄ mè itap ema efuuk me owot me lek usem obe: “Ikatet ukpook, ikasisik ejit mije ogwu ubọọn̄ Asiria . . . . Mije, ebi ìkup melek kiji mîwa igak ebi ìkup melek kan̄. Unye ebilene gaalek okup melek kan̄. Ire, Jioba Awaji kiji me lek kan̄ okup melek kiji. Ọmọ obotap ubọk inyi eji, mè itim otutuuk akọn̄ kiji.” Eya ichubọk ire usem oborọ ibe ichechieek ene inye—Jioba motim akọn̄ me ibot ebi eyi kan̄! “Ikọ cha Ejikaya ogwu ubọọn̄ Juda otumube otatap otutuuk ebi ene efuuk me emen.” Taba iman̄ ibe ke ire ikọ Ejikaya otumube otap ebi ife cha efuuk me emen. Ọmọ mè ebi ibot ikwaan̄ kan̄ mè ebi ibot akọn̄ kan̄ melek ebi nriran Maika mè Asaya mijeen̄ ibe ke ema ire ata ebi ikpukpo aroon̄, ike Jioba otumube inan̄a me otu ogwu nriran kan̄.—2 Mfuf. 32:7, 8; fuk Maika 5:5, 6.
Week Inu Unye Otu Ewe Okup Me Usem Awaji
w21.10 4 ¶11-12
Keke Ore Ata Ngwu Nkom?
11 Ike mgbọ ojebe, Jioba ofọfọọk uriaak kè Manasi. Jioba imun̄ ejit kan̄ miriọọn̄ ibe ke inwene, ike uriaak kan̄ ojeen̄be. Jioba inọ uriaak Manasi mè ikpọk iyaka irek ubọọn̄ kan̄ inyi ọmọ. Manasi isa irek ya isa irọ mkpọ onwọnwọn ichit mè ijeen̄ ibe ke ọmọ ichubọk igwu ikom. Irọ mkpọ Eyabu ikarọbe. Inwene eru kan̄. Isa me uyọk uyọk ejit itim ikeme ataak ntọbọ-ebum mè bieen̄ ata ntọbọ-ebum inye. (Fuk Mfufuk Eyi Òso Iba 33:15, 16.) Eyi ichubok iweek unye-ejit mè ichechieek, mije, Manasi ijeen̄ ijo akpat ukot inyi ebi ototun̄ ukan̄ kan̄, ebi ibot mkpulu kan̄, mè ebi eyi kan̄ me owuwa acha. Ire mgbọ keyi, me acha ukan̄ kan̄, Manasi isa inen̄e isun̄ usini ijo inu irọbe. Usini mgbọ eyi ikaan̄ ata mgbaan̄ me lek gwun̄ gwun̄ kan̄ Josaya, ogwu oyaka ikana ata ogwu ubọọn̄.—2 Ubọọn̄. 22:1, 2.
12 Keke ke eji ebekọt ikween̄ inan̄a me lek akpat ukot Manasi? Isiki lek kan̄, ire, ikare eya gaalek. Ibeek ibe ejeen̄ ọmọ nsan, mè inwene eru kan̄. Itap efuuk isasa inen̄e isun̄ ijo inu irọbe, mè itap efuuk itọbọ ebum inyi Jioba mè itap ubọk inyi ebi ofifi ife ibe erọ ikeya. Akpat ukot Manasi ijeen̄ ibe ke ikpọchieen̄ omaan̄ inyi ebi irọrọ ijo inu omimin. Eji mimun̄ si inu okijeen̄ ibe ke Jioba ire Awaji onwọnwon, “mè ikikup me mbem-lek itetele ijo inu inyi ene.” (Itọn̄ 86:5) Ntele nnyi ifet—isa inyi ebi ichuchubọk igwu ikom.
ONYAN̄ GWEREGWEN 19-25
INU UNYE OTU EWE OKUP ME USEM AWAJI | MFUFUK EYI ÒSO IBA 34-36
“Ire Okekikaan̄ Oruru Ojot Ojot Inan̄a Me Lek Usem Awaji Ni?”
it-1 1157 ¶4
Uluda
Mgbọ Josaya onọbe “ikọ ònan̄a me emen Ikpa Ikan ya,” eyi Ilikiya ogwu ibot ebi ngwugwa omun̄be me mgbọ ekirọ ikwaan̄ me uwu mbuban, iraria ebi ene ibe esido ida Jioba. Ema esisi lek Uluda, ogwu okpakpa inyi ema usem kè Jioba, okijeen̄ ibe ke otutuuk ufialek obonan̄a isibi me lek mkpaka ibot ike egebe me emen ikpa ya iborọrọn itet ido ya itetele ata ntọbọ-ebum. Uluda itumu si ibe mije Josaya osikibe lek kan̄ me isi Jioba, ke ọmọ ikpobosa chieen̄ kan̄ imun̄ ufialek cha, ire ke mokwu igọọk ebi nte nte kan̄, ke meben ọmọ ifuun̄ si me esuuk.—2 Ubọọn̄ 22:8-20; 2 Mfuf 34:14-28.
w09 6/15 10 ¶20
Kaan̄ Uyọk Uyọk Ejit Me Lek Uwu Jioba!
20 Me mgbọ ekirọ ikwaan̄ Ogwu Ubọọn̄ Josaya oneen̄be me uwu mbuban, Ogwu Ibot Ngwugwa Ilikiya omumun̄ “Ikpa Ikan [Jioba] eyi òje me ubọk kè Mosis.” Isasa ikpa ya inyi Safan ogwu uti ikpa ogwu ubọọn̄, Safan ofufuk inu okup me ikpa ya inyi Josaya. (Fuk Mfufuk Eyi Òso Iba 34:14-18.) Kpasi mgbaan̄ ke eyi okaan̄ me lek kan̄? Mgbọ yaage ogwu ubọọn̄ ogwagwak ofọnti okup ọmọ me lek mije ufieek-ejit, mè iria ebi ene ibe esido ida Jioba. Inan̄a me otu Uluda ogwu nriran enenwaan̄, Awaji itumu ikeme ataak ntọbọ-ebum okibọkọ irek me Juda. Ire, Jioba imun̄ efuuk Josaya otapbe isasa isan̄a ataak ntọbọ-ebum isan̄a. Josaya ikaan̄ onwọn isi Jioba me ekakpọge chieen̄ me lek ufialek oborọn̄ itet otutuuk ido ya. (2 Mfuf. 34:19-28) Keke ke eji ekween̄ inan̄a me lek inu yi? Me atikọ, eji miweek irọrọ inu Josaya orọbe. Eji miweek irọrọ mkpọ igọọk ntọ-ubọk Jioba ugwat ugwat, sa me ikakaan̄ me ejit mkpọ obokọt irọ ire eji itele ibe ataak ijejeen̄ mè ekagbege utoon̄-ejit ijijaka ntọbọ-ebum kiji. Eji mekọt ikaan̄ utoon̄-ejit ibe ke Jioba mobọkọ itap uyọk uyọk ejit kiji me lek ata ntọbọ-ebum, ike ibọkọbe eyi kè Josaya itap.
Week Inu Unye Otu Ewe Okup Me Usem Awaji
w17.03 27 ¶15-17
Ire Omokeek Mkpọ Osilek Inu Egebe Ni?
15 Me ota kan̄, kpasi ntaba-ubọk-me-utọn̄ ke eji emun̄ ofolek mkpọ orọrọ ata Ogwu Ubọọn̄ Josaya ni? Kpọ-nu mkpọ osasa mkpa ijet ọmọ. (Fuk Mfufuk Eyi Òso Iba 35:20-22.) Ikerere ibe Neko Ogwu Ubọọn̄ Ijipiti ikakaan̄ ufialek geege me lek Josaya, “Josaya osasa ebi akọn̄ kan̄ ije isibi isi ikweek ọmọ.” Baibul ibe ke usem Neko inan̄a me otu Awaji. Keke orọ Josaya obositim ọmọ etim me lek ni? Baibul ikatumu.
16 Ire, ike owa ke Josaya obosa iriọọn̄ ibe ke usem Neko inan̄a me ubọk Jioba ni? Ke okọt odo Jerimaya, ge melek ebi nriran igbegbe utoon̄-ejit. (2 Mfuf. 35:23, 25) Ire mfufuk ikajeen̄ ibe ke irọ ikeya. Ofifi si, Neko ibositim akọn̄ me lek ama Karekemis, ikare Jeruselem ke inu akọn̄ me lek. Isokọ me lek si akọn̄ yi ikagbaan̄ me lek erieen̄ Awaji, Neko ikatumu ikeme Jioba mè iyaka ire ebi eyi kan̄. Eya orọ, Josaya isasa akọn̄ isi lek Neko ire ijo ntumu-mfieek. Ire eji mimun̄ inu nkween̄ eji ebekọt isa irọ mkpọ ni? Eji esichichini ufialek igbe ibe eji eriọọn̄ nkeek Jioba ofolek inu ya.
17 Ire ufialek inan̄a isibi igbe ibe eji eweek onineen̄ Baibul eji ebekọt isa irọ mkpọ mè erọ mkpọ me oniin̄ okup okekem. Usini mgbọ eji mekọt isi lek ebi ugane ntitiin̄. Eji mekọt ikeek mkpọ eji ewuuk lek iriọọn̄ ofolek inu ya, mè iweek ikpa ntitiin̄ okpakpa mkpọ ofolek inu ya. Ire, mokọt ikaan̄ ofifi onineen̄ Baibul ogbegbe ibe eji ekeek mkpọ ofolek eyi ogwu ugane ntitiin̄ obokọt itap ubọk inyi eji ewọlọ ekpọ. Kubọk inu njeen̄, gwun̄ ute enenwaan̄ ge iriọọn̄ ibe ke ire akpan̄ ikwaan̄ kan̄ ilolook ata etip. (Ikwaan̄ 4:20) Ire, keek-nu ibe ke itọt isisibi uko me usen ge, ire ogwu olom ogwu ikakupge me ntitiin̄ obebe me ikup me uwu, mije ke ifiin̄ ema egbaan̄ mkpọ irọ, ke moma ibe ema egbaan̄ mkpọ erọ me usen ya kubọk olom mè nwa. Gwun̄ ute enenwaan̄ ya mokọt ikeek ere Baibul ogbagbaan̄ me lek irek ya, kubọk isisiki ibot inyi Awaji mè ilolook ata etip. (Mat. 28:19, 20; Ikwaan̄ 5:29) Ire, igbe si ibe ọmọ ikeek ere obe me nwa ikisiki ibot mè ekesa iriọọn̄-inu erọ mkpọ. (Efes. 5:22-24; Fili. 4:5) Ire nlom kan̄ ikekeke ikeme ọmọ ibe ikakisibi uko, sa ire ibe me irọ ofifi mkpọ me usen ya ni? Ikup ufiak ibe eji ekekup okekem ike eji ekisa irọrọ nkeek eyi Awaji mè ikakaan̄ utọn̄ọ nkeek.
ONYAN̄ GWEREGWEN 26–ONYAN̄ JAABA 2
INU UNYE OTU EWE OKUP ME USEM AWAJI | EJIRA 1-3
“Tele Ibe Jioba Isa Owu Isi Ikwaan̄”
w22.03 14 ¶1
Ire Omun̄ Mkpọ Jekaraya Omun̄be Ni?
Ebi ene mekibele ejit. Jioba awaji itap “me ejit kè Sarọs ogwu ubọọn̄ Pesia ibe isan̄a ebi Ijeren ikup me usun akọn̄ me Babilọn owuwa acha isibi. Ogwu ubọọn̄ inyi ida ibe ebi Ju eyaka efo ama kiban̄ “mè esi enama Uwu Mbuban Jioba, Awaji ebi Ijeren.” (Ejira 1:1, 3) Eyi ichubọk ire ida obonyi ene ubelejit! Isibi ibe ke ntọbọ-ebum ata Awaji ire eyi ebeyaka iben igwuun̄ me ijọn̄ inyibe ebi eyi kan̄.
w17.10 26 ¶2
Uji Akọn̄ Mè Okpibot Ubọọn̄ Ikibem Owu
2 Jekaraya iriọọn̄ ibe ke ebi Ju ifofo Jeruselem ire ebirieen̄ mè ebibaan̄ ikakaan̄ ichechieek. Ema ire “ebi Awaji osulube ubọk me ejit” ibe etele mbubeek kiban̄ mè uwu kiban̄. (Ejira 1:2, 3, 5) Ema mitele ama ema eriọọn̄be me ifo ama eyi owuwa kiban̄ kpewuuk lek iriọọn̄. Ire ikwaan̄ iyayaka inama uwu mbuban ikakup ufiak, ema kpeme je ujọn̄ọ ije oboso 1,000 miles (1,600 km) itibi ijọn̄ okup uyot uyot.
Week Inu Unye Otu Ewe Okup Me Usem Awaji
w06 1/15 19 ¶1
Ikpakpa Isibi Inu Okup Me Emen Ikpa Ejira
1:3-6. Kubọk usini ebi Ju ibabia me Babilọn usini ebi Ata-Ikọ Jioba kpebekọt isi ikwaan̄ ojot mgbọ mè iyaka ire isi ikwaan̄ me ere ufiak ominbe. Ire, ema mekibieen̄ inye mè ikitap efuuk me owot ebi ibekọt irọ mè ikinyi inyinyi kiban̄ isasa ibieen̄ ikwaan̄ ilolook ata etip mè irọrọ ene ebi udun̄ kè Karais inye.