Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
© 2023 Watch Tower Bible and Tract Society of Pennsylvania
ONYAN̄ ONAAN̄GE 4-10
INU UNYE OTU EWE OKUP ME USEM AWAJI | ESITA 1-2
“Sa Inyi Okosiki Lek Kubọk Esita”
w17.01 25 ¶11
Omokọt Ikup Inye Ikisiki Lek Me Irak Ntọ-Mkpọ
11 Esimalek itọn̄ eji, mokọt itọ nsiki-lek kiji ikpọ. Kpọ-nu ubọk Esita osabe irọ mkpọ mgbọ irek kan̄ onwenebe ugwat ugwat. Ọmọ ire ogwu enenwaan̄ ojajaan̄ uja enenen mè ire ogwu eriọọn̄be ubọk ikpọ chieen̄ ijaan̄ me lek me acha ge. Ikigọọk owuwa nsabọn ibaan̄ inan̄a me otutuuk ere ebi Pesia Ekikpulu, ikiwut ifan̄a ikiweek onwọn-isi ogwu ubọọn̄ igbaan̄ mkpọ irọ. Ire, ikup inye ikijeen̄ ulibi mè ikup dii. Ikagumu lek mè iyaka ire ibene lek ikerere me mgbọ egobobe ọmọ kubọk nwa ogwu ubọọn̄.—Esita 2:9, 12, 15, 17.
ia 130 ¶15
Irọ Mkpọ Me Ibot Ebi Eyi Awaji
15 Me mgbọ irebe isasa Esita inu me isi ogwu ubọọn̄, minyi ọmọ irek ibe igobo inu geelek iweekbe isasa ibala lek kan̄ igbaalek. Mije irebe ogwu okisiki lek, Esita ikado inu geege ilọ me lek inu echi Egaya otumube inyi ọmọ. (Esita 2:15) Usini mgbọ iriọọn̄ ibe ke uja gaalek kpobokọt irọ ibe ikaan̄ onwọn-isi ogwu ubọọn̄; ire eru nsiki-lek mè ikukup okem okem ore eyi echubọk iweek me uwu ogwu ubọọn̄. Ire inu ikeekbe itat ni?
w17.01 25 ¶12
Omokọt Ikup Inye Ikisiki Lek Me Irak Ntọ-Mkpọ
12 Ikukup okem okem motap ubọk inyi eji ekerọ mkpọ, eketap mkpọ mè ekebala lek kiji mgbọ geelek me oniin̄ ogbegbe mè ikijeen̄ ulibi. Eji miriọọn̄ ibe ke ebi ene ebekima eji ikare me mgbọ eji ekigugo lek mè iyaka ire ikitaba chieen̄ ebi ene inu lek kiji me oniin̄ ikagbege, ire, me mgbọ eji ekiluk “esuuk esuuk ugwem eyi ìkakitap okput.” (Fuk Pita Eyi Adasi 3:3, 4; Jeri 9:23, 24) Ugumu lek geelek okup me ejit kiji mosibi utoon̄ inan̄a me lek inu eji ekirọ. Kubọk inu njeen̄, eji mekọt irọ eyi sa me irọrọ me ebi ene ekekeek ibe ke eji mikaan̄ irek osisibi esese, ikaan̄ ukpatu eyi owuwa ene kperiọọn̄, mè iyaka ire iriọọn̄ isi ebi bọn ute ebi ikakaan̄ irek me ntitiin̄. Mè iyaka ire eji mekọt ikitumu usem me oniin̄ oborọ ibe eketọn̄ eji gaalek me lek inu ebi ofifi egọọkbe eji irọ. Jisọs si ijeen̄ ata akpat ukot ofolek inu yi. Ogbogbo me lek inu echi itumube ire mkpọ okup me Ikpa Mbuban Agan̄ Esabe Usem Iburu Ige. Isa me usikilek itumu usem ikeya inyi ebi ikigban̄ ọmọ eriọọn̄ ibe ke inu ikitumu inan̄a me ubọk Jioba, ikare me iriọọn̄-inu kan̄.—Jọn 8:28.
Week Inu Unye Otu Ewe Okup Me Usem Awaji
w22.11 31 ¶3-6
Ire Oriọọn̄ Ni?
Ebi ikikween̄ mkpọ miweek imun̄ inu ge egebe me lek abọt esabe usem ebi Pesia ige okpakpa mkpọ ofolek ogwu enerieen̄ ge ekigwen Marduka (Mordecai me Ebeke). Ikisi ikwaan̄ kubọk ogwu okikpọ chieen̄ me lek inu, mokọt ire ikpoko, me Susa. Ene ge okikween̄ mkpọ ofolek ere ya ekigwen Arthur Ungnad, ibe ke isan̄a me emen Baibul ke ire adasi mgbọ etumube mkpọ ofolek Mọdikai ire eya.
Karake Ungnad ogebe mfufuk kan̄ isan̄a, usini ebi ikikween̄ mkpọ mikaba obop obop inu esabe usem ebi Pesia ige me inyọn̄ abọt. Usini me lek inu chi ire eyi emun̄be me ere ekisun̄ mkpọ me ama Persepolis eyi egbugbọbe igwook. Ege inu chi me mgbọ Xerxes I okikpulu. Ege ema me usem ebi Elam mè iben si owuwa erieen̄ okup me ikpa Esita.
Owuwa inu egebe me lek abọt chi echi emun̄be me ama Persepolis iben erieen̄ Marduka, ogwu okisi ikwaan̄ kubọk ogwu uti ikpa isa inyi ogwu ubọọn̄ me Susa mgbọ Xerxes I okikpulu. Inu egebe me abọt ge ikpa Marduka kubọk ogwu okikaba usem. Eyi itat me lek mkpọ Baibul okpabe ofolek Mọdikai. Ọmọ ire ogwu osisi ikwaan̄ me uwu Ogwu Ubọọn̄ Ayaserọs (Xerxes I) mè ire ogwu okitumu mkpọ obet lek usem iba. Mọdikai ikimalek ikweek irek me otunchit uwu ogwu ubọọn̄ me Susa. (Esita 2:19, 21; 3:3) Otunchit yi, ire eyi ere omimin enenen ebi usun̄ ogwu ubọọn̄ ekisi ikwaan̄.
Ikaan̄ owuwa mkpọ etumube mkpọ ofolek Marduka egebe me inyọn̄ abọt cha otatat me lek mkpọ Baibul otumube ofolek Mọdikai. Ema eluk me mgbọ mè ere yaage mè ikisi mbet ikwaan̄ yaage me ere ikwaan̄ yaage. Otutuuk inu chi ebi ikirọkọ inu me ijọn̄ emun̄be ikijeen̄ ibe ke mokọt ire Mọdikai ekpabe mkpọ ofolek me ikpa Esita ore Marduka.
ONYAN̄ ONAAN̄GE 11-17
INU UNYE OTU EWE OKUP ME USEM AWAJI | ESITA 3-5
“Tap Ubọk Nyi Ebi Ofifi Ife Emun̄ Inu Ema Ebekọt Irọ”
it-2 431 ¶7
Mọdikai
Ikachieek Itọtọbọ Ibot inyi Aman. Sabum mgbọ yi, Aman ogwu owot iman kè Agagi ire ogwu Ayaserọs orọbe imin me ere ikwaan̄, ogwu ubọọn̄ si inyi ida ibe mè otutuuk ebi ikisi ikwaan̄ me otunchit ekegwuun̄ ekpe me ijọn̄ enyi Aman, mije ayaya irek kan̄. Mọdikai ikachieek irọrọ ikeya mije irebe ogwu Ju. (Esita 3:1-4) Eyi irebe ibe ke Mọdikai irọ inu ikeyi, ikijeen̄ ibe ke inu yi ikaan̄ mgbaan̄ me lek mgbaan̄je kan̄ melek Jioba. Ọmọ iriọọn̄ ibe ke igwugwuun̄ ekpe inyi Aman ikakpọkpọ ire inu isasa inyi ene umin, ike ebi Ju ekiwuuk lek irọ isa inyi ebi ikakaan̄ unye ntọ-ikọ. (2 Sam 14:4; 18:28; 1 Ubọọn̄ 1:16) Ofolek Aman, ikaan̄ ibot ibot inu orọrọ Mọdikai ikaweek itọtọbọ ebum inyi ọmọ. Mokọt ire ibe ke Aman ire ogwu Amalek, Jioba si iwuuk lek itumu ibe ke ọmọ ibokititim akọn̄ me lek ebi Amalek inan̄a me “ukot re me ukot” (Isis 17:16; kpọ HAMAN.) Isa inyi Mọdikai ire inu ogbaan̄ me lek igbegbe utoon̄-ejit isa inyi Awaji, ikare mkpọ ofolek irek Aman kubọk ogwu mkpulu.
it-2 431 ¶9
Mọdikai
Misa Ọmọ Inyan̄a Ebi Ijeren. Me mgbọ enyibe ida ibe efiat otutuuk ebi Ju ikup me ere Ayaserọs okikpulu, Mọdikai ijeen̄ ichechieek kan̄ ibe ke Esita ikana nwa ogwu ubọọn̄ me mgbọ ya isasa inyan̄a ebi Ju. Irọ inyi Esita imun̄ akpan ikwaan̄ ikaan̄be mè itumu inyi ọmọ ibe isi iweek onwọn-isi mè ntap-ubọk ogwu ubọọn̄. Ikerere ibe ke irọrọ ikeya motap ugwem kè Esita me unan, ichieek irọrọ igọọk inu etumube inyi ọmọ.—Esita 4:7–5:2.
ia 133 ¶22-23
Irọ Mkpọ Me Ibot Ebi Eyi Awaji
22 Ejit Esita ira ikpukpuku igwook me mgbọ inọbe etip ya. Eyi ore ntọ-mkpọ omimin ichit ichichinibe me ugwem kan̄. Itet ukpook, ike ikpabe me emen ikpa igebe isasa ifọọk Mọdikai. Esita iyaka ikeek Mọdikai ikan ogwu ubọọn̄. Inunu me isi ogwu ubọọn̄ me mgbọ kpegwen ene mokọt isibi mkpa. Itata me ogwu ubọọn̄ iyayana okuba alata araran̄ kan̄ ida ene ya ke ene ya obogat ugwem. Ire Esita ikaan̄ mkpọ oborọ ibe ichieek ibe ke ogwu ubọọn̄ morọ ọmọ nsan, ogak ge mije mkpọ orọrọn̄ itet Basiti ogwu ikachieek inunu me mgbọ ogwu ubọọn̄ ogwenbe ọmọ ni? Esita itumu inyi Mọdikai ibe ke ire akọp usen ita ire eya ogwu ubọọn̄ ikagwegwen ọmọ! Mbet inu okup ikeyi mokọt irọ ibe Esita ikikeek mè ire ikayaka ikaan̄ onwọn-isi ogwu ubọọn̄ okinwene ejit ugwat ugwat yi.—Esita 4:9-11.
23 Mọdikai isa me unye-ejit ifọọk otu Esita inyi ichechieek kan̄ inye. Itumu inyi Esita ibe ke ire ọmọ ikarọ inu geege, ke unyan̄a mokọt inan̄a me ofifi ere inu inyi ebi Ju. Ire, Esita ibojeje ikọt ikaan̄ unyan̄a ire tukutuku ya ibene ikibọkọ irek ni? Me irek yi Mọdikai ijeen̄ ichechieek onyenye me lek Jioba, ogwu ikpobotele ibe ekpan̄ otutuuk ebi eyi Kan̄ esan̄a, mè ilọ si irọrọ use Kan̄ iso. (Jos. 23:14) Mọdikai otutumu inyi Esita ibe: “Ekene oriọọn̄! Môkọt ire ibe ke îre mije ojelek mgbọ òkup ikeyi ke irek osibi inyi owu ònonin̄ emen uwu ogwu ubọọn̄.” (Esita 4:12-14) Ire ikagbe ibe eji egọọk akpat ukot Mọdikai ni? Ọmọ ikakaan̄ utoon̄-ejit onyenye me lek Jioba Awaji kan̄. Eji ye?—Urọk 3:5, 6.
Week Inu Unye Otu Ewe Okup Me Usem Awaji
kr 160 ¶14
Ititim Etim Me Ibot Unen Isasa Itọbọ Ebum
14 Kubọk Esita mè Mọdikai erọbe me ukot ikaan̄, ebi eyi Jioba me chereyi mekitim etim me ibot ata ntọbọ-ebum ike Jioba onyibe ema ida. (Esita 4:13-16) Ire owu mokọt igọọk irọ ni? Iin̄. Omokọt ikibeek uriaak mgbọ geelek me ibot bọn ute irieen̄ mè ibaan̄ ikije itibi ukeme mije ijo oyerebet. Mbet lek uriaak okup ikeya mokọt ire ata lek ntap-ubọk inyi ebi bọn ute irieen̄ mè ibaan̄ ikup me irak ukeme mè tukutuku chi. (Fuk Jemis 5:16.) Ire Jioba ikekifọọk mbet lek uriaak okup ikeya ni? Ntim-ngak eji ekikaan̄ me uwu ikọ ijeen̄ ibe ke ikifọfọọk!—Iburu 13:18, 19.
ONYAN̄ ONAAN̄GE 18-24
INU UNYE OTU EWE OKUP ME USEM AWAJI | ESITA 6-8
“Inu Nkween̄ Ofolek Ikekigbaan̄ Ikpa Usem Ijaan̄”
ia 140 ¶15-16
Isa Iriọọn̄-Inu, Unye-Ejit, mè Iweweek Onwọn Ebi Ofifi Ife Irọ Mkpọ
15 Bak me lek Esita okaan̄be ime, ikup egwe ge igbaalek sabum inikpa inu iweekbe ogwu ubọọn̄ irọ inyi ọmọ, inyi Aman mgbọ si ibe isa irọ mkpọ obosa nnan̄a-nrọn̄ kan̄ inu. Mokọt ire Jioba orọ ibe ogwu ubọọn̄ ikakọt ilaak. (Urọk 21:1) Eya orọ Usem Awaji otapbe eji efuuk me owot ibe mè eji ekaan̄ eru ikekikup ikpọ mkpọ! (Fuk Maika 7:7.) Eji esikup ikpọ Awaji, eji memun̄ ibe ke ubọk ibosa ineen̄ ufialek kiji isun̄ monwọn igak ubọk eji ekeekbe isasa inen̄e ufialek ya.
Isa Me Unye-Ejit Itumu Usem
16 Esita ikpoboyaka itọ ime ogwu ubọọn̄ ikpọ; mokpa otutuuk mkpọ echi okisisaak ọmọ me ijọk òso egwe iba kan̄. Ike owa ni? Ike iyaka inire, ogwu ubọọn̄ inyi ọmọ irek ibe itumu usem, mè ikpọk ido ọmọ inu ikiweek itutumu. (Esita 7:2) Mgbọ Esita obosa ‘isan̄a amọn’ ire.
ia 140 ¶17
Isa Iriọọn̄-Inu, Unye-Ejit, mè Iweweek Onwọn Ebi Ofifi Ife Irọ Mkpọ
17 Eji mekọt ikikeek ubọk Esita obokiriaak uriaak me ejit kan̄ inyi Awaji sabum itumube usem chi: “Ire owu ogwu ubọọn̄ obele ejit me lek n̄a, mè ire ineme owu, inu nkiweek ìre: Tele ebek ugwem n̄a nyi emi. Mbeek n̄a ìre: Nan̄a lek ebi n̄a egat ugwem.” (Esita 7:3) Taba iman̄ ibe ke Esita irọ ibe ogwu ubọọn̄ iriọọn̄ ibe ke ikaan̄ ulibi me lek ntumu-mfieek kan̄ ofolek inu otatat. Esita ikup esese me lek Basiti, adasi nwa ogwu ubọọn̄, ogwu ogegen ibak irọ ogwu olom inu esip! (Esita 1:10-12) Isọkọ me lek si, Esita ikatumu ikeme ogwu ubọọn̄ mije itoon̄be ejit me lek Aman. Kpan̄asi ikeya, ibeek ogwu ubọọn̄ ibe ibem ugwem kan̄ isan̄a me lek mkpọ unan.
ia 141 ¶18-19
Isa Iriọọn̄-Inu, Unye-Ejit, mè Iweweek Onwọn Ebi Ofifi Ife Irọ Mkpọ
18 Inu yi ikiweek ibe ogwu ubọọn̄ irọ inyi ọmọ ike ogwu ubọọn̄ chieen̄. Ire ekene okiweek itatap unan me lek nwa ogwu ubọọn̄ ni? Esita ofọfọọk ọmọ ibe: “Mije, mînyam emi melek ebi n̄a inyi ibe ejijaka eji, mè ekpan̄ eji, mè echep eji esan̄a kpai. Mebe ke ebe enyanyam eji ebirieen̄ mè ebibaan̄ enyi me usun̄, kpamasan̄a amọn, mije, eya kè ore mfufet inu eyi kpomododo inenisisaak ogwu ubọọn̄.” (Esita 7:4) Taba iman̄ ibe ke Esita isasa me atikọ ikpọk mbum ufialek ya, ire, itumu si ibe ke ọmọ kpomosan̄a amọn mebe ke ebe enyanyam ema kubọk usun̄. Ire, otitọt ikpakpan̄ ema yi mochubọk ire ichep isa inyi ogwu ubọọn̄ ire ọmọ ikasan̄a amọn.
19 Akpat ukot kè Esita ichubọk ijeen̄ eji ubọk ebekọt isa ire ene ejit. Ire okiweek ikpọkpọk mbum ufialek omimin ge isa inyi ogwu ima kwun̄ ge mè iyaka ire ogwu okakaan̄ unye ntọ-ikọ, ikakaan̄ ime, ulibi, mè isasa atikọ irọ mkpọ motap ubọk inyi owu enenen.—Urọk 16:21, 23.
Week Inu Unye Otu Ewe Okup Me Usem Awaji
w06 3/1 11 ¶1
Inu Ekpabe Ofolek Ikpa Esita
7:4—Kpa ubọk ke ijijijaka ebi Ju obosa ire ichep isa inyi ogwu ubọọn̄? Sa me isasa me iriọọn̄-inu isan̄a nkeek inyanyam ebi Ju kubọk ire usun̄ isibi, Esita ikpa ikpọk mbum ubọk ibosa ire ichep inyi ogwu ubọọn̄ mè ire ekpan̄ ebi Ju. Alata okuket òlolobo iso efit obop kilo ita mè akọp obop ini eyi Aman ochieekbe ikpekpe itap me uwu isun̄-ikpoko ogwu ubọọn̄ igele enenen ire esa itọt me lek ikpoko ogwu ubọọn̄ mokaan̄, mobe Aman itọt ibe enyam ebi Ju kubọk usun̄. Otitọt ikpakpan̄ ene yi ke osibi ikpakpan̄ nwa ogwu ubọọn̄ igbaalek.
ONYAN̄ ONAAN̄GE 25–AKỌP ONYAN̄ 1
INU UNYE OTU EWE OKUP ME USEM AWAJI | ESITA 9-10
“Isa Unye Ntọ-Ikọ Kan̄ Isa Itap Ubọk Inyi Ebi Ama Kan̄”
it-2 432 ¶2
Mọdikai
Mọdikai ibọkọ irek Aman kubọk ogwu ibot mkpulu mè ibọkọ si mkpọtubọk iman̄ òriọọn̄ ogwu ubọọn̄ eyi ekisa igon melek ikpa geelek onan̄a me ubọk ogwu ubọọn̄. Esita ito Mọdikai ibe ikikpọ chieen̄ me lek uwu kè Aman, eyi ogwu ubọọn̄ onyibe ọmọ. Mọdikai osasa unye ogwu ubọọn̄ onyibe ọmọ isa itap ofifi ikan eyi onyinyi ebi Ju unen isasa ibem lek kiban̄. Isa inyi ebi Ju, eyi ire utoon̄ unyan̄a mè unwọọn̄. Owuwa ebi ene ikukup me ere ebi Pesia ekikpulu enenikitap ubọk inyi ebi Ju, mgbọ akọp mè usen ita me emen Onyan̄ Adari orebe, ebi Ju mikup me mbem-lek ibebem lek kiban̄. Ebi mkpulu si migọọk ema ikeke mije irek ilile Mọdikai okaan̄be. Mitap usen ge igbaalek etim ya me Susa. Ebi ochicha ebi Ju iwawa iraka 75,000 ikup me ere ebi Pesia ekikpulu, ogọgọbọ si akọp nsabọn kè Aman ire ebi ekpan̄be. (Esita 8:1–9:18) Mgbọ ibọkọbe unye me ubọk Esita, Mọdikai inyi ida ibe me erọ ijọk ebekirọ acha geelek me akọp me usen ini mè akọp me usen go me Onyan̄ Adari, orere ‘usen ijọk Purim,’ usen chi ire usen ebekisa inwọọn̄ unwọọn̄ mè ikirie ijọk mè ikiche mkpọ inyi ge ge mè ebi ugbọọn̄. Ebi Ju emọmọnọ itoon̄ me ibot kiban̄ mè ibot ebi owot iman kiban̄, mè ibot ebi geelek ìgọgọbọ me lek kiban̄, ibe ke ema mêkisun̄ orọmijọn̄ ya. Kubọk ogwu òso ene iba me mkpulu ebi Pesia, Mọdikai ikaan̄ ulibi ebi eyi Awaji orere ebi Ju mè ikirọ mkpọ obosa onwọn ijet ema.—Esita 9:19-22, 27-32; 10:2, 3.
it-2 716 ¶5
Purim
Inu Orọrọ Ekirọ. Usini ebi ikitumu mkpọ ofolek ijọk Purim ebe ke ubọk ebi Ju ekirọ ijọk ya me chereyi ikup esese me ubọk ewuukbe lek ikirọ. Sabum mgbọ keyi, ekirọ kubọk ire ijọk uwu uriaak, ire, me chereyi, kpeyaka ikirọ ikeya, usini mgbọ si, ema ekirọrọ iraka iman̄. Mọdikai mè Esita ire ata ebi usun̄ Jioba, ema eneen̄ ijọk ya isasa ikimin Jioba. Ire Jioba ke ebetọn̄ me lek ubọk isabe inyan̄a ebi Ju, mije ufialek ibene me mgbọ Mọdikai ikachieek itọtọbọ ebum inyi ofifi ene ilọ me lek Jioba. Aman mokọt ire ogwu Amalek, ido Jioba me lek kan̄ ogbobe mè inyi ida ibe efiat. Ire ulibi Mọdikai okaan̄be me lek Awaji orọ ibe mè ijit itọtọbọ ebum inyi Aman. (Esita 3:2, 5; Isis 17:14-16) Usem Mọdikai otumube inyi Esita si (Esita 4:14) ijeen̄ ibe ke iyaka lek imaan̄ me lek Jioba ibe inyan̄a ebi Ju, Esita ijijin otu sabum isibe isi imun̄ ogwu ubọọn̄ mè igwen ọmọ ibe inirie inorie, ikijeen̄ ibe ke iweek ntap-ubọk Awaji.—Esita 4:16.
cl 101-102 ¶12-13
Kigọọk Akpat Ukot Awaji me Ubọk Okisa Unye Kwun̄ Irọ Mkpọ
12 Jioba isan̄a ebi ugane ntitiin̄ isibi ibe ekekpọ chieen̄ me lek ntitiin̄ ebi eyi Karais. (Ebi Iburu 13:17) Ebirieen̄ chi ekisa unye Awaji onyibe ema isa itap ubọk inyi, mè ikikpọ chieen̄ me lek ufiak arọọn̄ Awaji. Ire irek yi inyi ebi ugane ntitiin̄ unye isasa ikitọ ikọ ubọk geelek inyi ebi eyi Awaji ni? In̄-in̄, ikanyi ema! Igbe ibe ebi ugane ntitiin̄ ekup okem okem mè ekesiki lek me lek ikwaan̄ kiban̄ me ntitiin̄. (Pita Eyi Adasi 5:2, 3) Baibul itumu inyi ebi ugane ntitiin̄ ibe: “Soso, ìkpukpo ebi ntitiin̄ Okaan̄-ene chi ebi Okaan̄-ene osabe eje kan̄ ilep, kubọk ogwu òkpukpo arọọn̄ okikpukpo arọọn̄ kan̄.” (Ikwaan̄ 20:28) Ere Baibul yi itumu inu orọrọ ikupbe ufiak ibe ebi ugane ntitiin̄ ekegbala chieen̄ ekpọ arọọn̄ Awaji.
13 Eji mekọt itọt inu yi ikeyi. Keek-nu ibe ke ogwu unene kwun̄ inyi owu inu unye otu ewe ibe okpọ chieen̄ me lek. Owu oriọọn̄ ibe ke ogwu unene kwun̄ ifafiat ikpoko ilep mkpọ ya. Ire okpobokpọ chieen̄ ijaan̄ me lek inu ya ni? Ubọk yaage si, Awaji inyi ebi ugane ntitiin̄ akpan ikwaan̄ ikpọkpọ chieen̄ me lek mkpọ okukup unye otu ewe inyi ọmọ, orere ntitiin̄ kan̄, eyi ebi ikukup me emen ekup kubọk arọọn̄ isa inyi ọmọ. (Jọn 21:16, 17) Arọọn̄ Jioba ikup unye otu ewe inyi ọmọ enenen—ire lek isabe eje okpọkpọ Gwun̄ kan̄ imabe Jisọs Karais, isa ilep. Kpunu ofifi inu unye otu ewe Jioba obokọt isa ilep arọọn̄ kan̄ igak eyi. Ebi ugane ntitiin̄ isisiki lek mikikaan̄ eyi me nkeek mè ikikpọ chieen̄ me lek arọọn̄ Jioba me ubọk ogbegbe.
Week Inu Unye Otu Ewe Okup Me Usem Awaji
w06 3/1 11 ¶4
Inu Ekpabe Ofolek Ikpa Esita
9:10, 15, 16—Ikerere ibe ke minyi ema unye ibe efum inu, keke orọ ebi Ju kpefum inu geege? Ema ijijit ifufum inu geege ikijeen̄ ibe ke inu ema ekaan̄be me ejit ire ibebem lek kiban̄ ikare ibọbọọn̄ ubọọn̄.
AKỌP ONYAN̄ 2-8
INU UNYE OTU EWE OKUP ME USEM AWAJI | JOBU 1-3
“Kup Nye Kijeen̄ Ubọk Osabe Ima Jioba Ire”
w18.02 6 ¶16-17
Gọọk Akpa Ukot Ichechieek mè Nsiki-Ibot kè Nuwa, Danien, mè Jobu
16 Ufialek echi Jobu ochichinibe. Ugwem kè Jobu ire eyi onwenwene me ugwat ugwat. Sabum ufialek kan̄, “ọmọ omin ichit me lek otutuuk ebi agan̄ Mbum-ura.” (Jobu 1:3) Ibọọn̄ ubọọn̄, ebi ene miriọọn̄ ọmọ isi, mè ikijeen̄ ọmọ ulibi. (Jobu 29:7-16) Ire, me otutuuk inu chi, Jobu ikamọnọ lek kan̄ kubọk ọmọ inwọn igak ebi ofifi ife mè iyaka ire ikikeek ibe ke ọmọ ikaweek Awaji. Jioba igwen ọmọ “ogwu ikwaan̄” mè itumu si ibe: “Ọmọ ìre ogwu ikarọge inu geege ìlọ, mè ogwu òtatat me ugwem, mè ikitet ukpook Awaji, mè isan̄a lek kan̄ me ijo inu.”—Jobu 1:8.
17 Chit chieen̄ mè bolo, ugwem Jobu ikpọkpọ inwene me ugwat ugwat. Ikakana ogwu ugbọọn̄ mè ikup me ufieejit. Eji miriọọn̄ ibe ke ire Setan okirọ ibe Jobu ikibọkọ ukwook ikeyi. Setan ikitumu ibe ke Jobu ikitọbọ ebum inyi Awaji bak me lek inu echi Awaji onyibe ọmọ. (Fuk Jobu 1:9, 10.) Jioba ikakpọ chieen̄ ilọ me lek inu yi Setan otumube. Kpan̄asi ikeya, inyi Jobu irek isasa ijeen̄ igbegbe utoon̄-ejit kan̄ inyi ọmọ. Mè ijeen̄ si ibe ke ikitọbọ ebum inyi ọmọ inan̄a me ejit otatana mè ijot me lek ima.
w19.02 5 ¶10
Kweek Nye Kigbe Utoon̄-Ejit!
10 Ike irọbe me lek Jobu, mbet lek usem yaage ke Setan okitumu ikeme eji. Ike owa ke inu yi osa ikaan̄ mgbaan̄ me lek kwun̄? Setan ikitumu ibe ke okachubọk ima Jioba, ke owu motele itọtọbọ ebum inyi ọmọ isasa inyan̄a ugwem kwun̄, mè ke igbegbe utoon̄-ejit kwun̄ si ire eyi ofiaan̄! (Jobu 2:4, 5; Ichi 12:10) Ike owa ke inu yi okup owu me lek? Ire ikanaan̄ owu ni? Ire, keek inu yi nu: Jioba itoon̄ owu ejit me lek mè inyi owu atalek irek yi. Jioba ikaan̄ utoon̄-ejit ibe ke owu mokup inye ikigbe utoon̄-ejit inyi ọmọ mè ijeen̄ ibe ke Setan ire ogwu ataak. Ichieek use si ibe ke motap ubọk inyi owu okọt orọ eyi. (Iburu 13:6) Jioba Awaji ogwu obebene ichit itotoon̄ owu ejit me lek, ichubọk ire irek omimin! Ire omun̄ mkpọ orọrọ igbegbe utoon̄-ejit okupbe ufiak ni? Ikinyi eji irek isasa ijeen̄ ibe ke inu Setan otumube ire ataak mè irọ ibe eji eketumu esibi ata erieen̄ Nte kiji mè ekebieen̄ unen mkpulu kan̄ enye. Keke ke eji eberọ inyi eji ekup enye ekegbe utoon̄-ejit?
Week Inu Unye Otu Ewe Okup Me Usem Awaji
w21.04 11 ¶9
Keke Ke Eji Ebekọt Ikween̄ Inan̄a Me Lek Ota Usem Jisọs Otumube
9 Keke ke Jisọs otumu? Sọnja mgbọ sabum ikwube, Jisọs otataan̄ ukpo ibe: “Awaji n̄a, Awaji n̄a, ìre keke orọ mè owu òjit emi òtele?” (Mat 27:46) Baibul ikakpa inu orọrọ Jisọs otumube usem yi. Kpọ-nu mkpọ usem cha okijeen̄ eji. Inu ge ire, sa me itutumu usem cha, Jisọs irọ iso nriran okup me ikpa Okwa Itọn̄ 22:1. Isọkọ me lek si, usem chi ikijeen̄ ibe ke Jioba ikawak “ogọ ikana” Gwun̄ kan̄. (Jobu 1:10) Jisọs iriọọn̄ ibe ke Nte kan̄ itetele ibe ebi ochicha kan̄ etọ ichechieek kan̄ ekpọ mege ikwube. Kpunu ebilene geege owuwuuk lek ije itibi mbet lek ntọ-mkpọ yi. Ofifi si, usem chi ikijeen̄ ibe ke ikarọ ijo inu geege oweweek ibe ekpan̄ ọmọ.
AKỌP ONYAN̄ 9-15
INU UNYE OTU EWE OKUP ME USEM AWAJI | JOBU 4-5
“Gbala Chieen me lek Ataak Ukpatu”
it-1 713 ¶11
Elifaji
2. Ge me lek ebi unene ita kè Jobu. (Jobu 2:11) Ogwu Teman, mokọt ire ogwu owot iman adasi gwun̄ kè Isọ ogwu ekigwen si Elifaji ogwu ewuuk lek itumu mkpọ ofolek me Eyi 1, eyi isibi ibe ke ọmọ ire ogwu owot iman kè Ebereyam mè ire si ngwan̄ kè Jobu. Ọmọ mè ebi owot iman kan̄ ekisa iriọọn̄-inu kiban̄ igugo lek. (Jeri 49:7) Me lek ene ita inu inikat Jobu ejit, ire Elifaji kè ekpa mkpọ ofolek kubọk ogwu okukup ufiak mè isibi isi ichit, eyi ikijeen̄ si ibe ke usini mgbọ mokọt ire ibe ke ọmọ ore ogwu ugane ichit me lek kiban̄. Ọmọ okidasi itumu usem me lek ema ene ita, usem kan̄ si okijọn̄ọ ichit.
w05 9/15 26 ¶2
Jit Lọlọ Nkeek!
Mgbọ ikikeek inu ge orọrọ ọmọ, Elifaji itumu ibe: “Ekwukwu ge oraka emi me isi fîọọn̄, inwọọn̄ lek n̄a onanan̄a ikeke. Ọmọ oyayaka ikeke, ire, ǹkarọriọọn̄ ubọk îkupbe. Ogugo inu ge okekeke me isi n̄a; ere okukup yarak, Nneninọ ida ge okitumu ibe.” (Jobu 4:15, 16) Kpasi ekwukwu okaan̄ mgbaan̄ me lek ekiket kè Elifaji ni? Usem ekwukwu ya otumube igọọk ijeen̄ ibe ke ikare ogwu osat Awaji. (Jobu 4:17, 18) Ire ijo ekwukwu. Ire ikare ikeya, keke orọ Jioba obokaan̄ inu inyi Elifaji mè ebi melek kan̄ bak lek ema etumube usem ataak inyi Jobu? (Jobu 42:7) Me atikọ, ire ijo ekwukwu okaan̄ mgbaan̄ me lek nkeek Elifaji. Usem kan̄ ijeen̄ ibe ke nkeek kan̄ ikaje ikike me lek nkeek Awaji
w10 2/15 19 ¶5-6
Jit Ataak Kè Setan
Setan isa Elifaji, ge me lek ebi unene ita inikpọ Jobu, isa itumu ibe ke ebilene ire ebi iwọwọ, ebi kpeyaka ikaan̄ ikpọchieen̄ geege. Elifaji isa ebilene itọt me lek “ebi ìkiluk me uwu ntitaak,” mè itumu inyi Jobu ibe: “ọdọ ugwem kiban̄ okupbe me achiaan̄, ebi ìkup mfufet ikọkọt ikpukpuku iriọk igak mwuwu. Ekikpukpukpuku ema iriọk, ibene me ewelegwe ire ikakwun̄; ema mîra ichieen̄ ita ire mgbọ geelek.”—Jobu 4:19, 20.
Me ofifi ere me ikpa Mbuban, esa eji itọt me lek “otin̄ ibat ikike”. (2 Kọr 4:7) Eji kpenye mije ijo inu mè ekasoge eji ebọkọbe me irot. (Rom 5:12) Melek kiji gaalek eji kpebekọt ikeke ida Setan. Ire, kubọk ebi eyi Karais eji mikaan̄ ntap-ubọk. Me ekakpọge chieen̄ me lek iwọwọ kiji, eji mikup unye otu ewe me chieen̄ Awaji. (Asaya 43:4) Jioba ikisa ekwukwu mbuban kan̄ inyi ebi ikido ọmọ. (Luk 11:13) Ekwukwu kan̄ mokọt inyi eji “unye eyi ògak otutuuk unye,” obotap ubọk inyi eji ekọt eme ufialek geelek Setan obosa ijet eji. (2 Kọr 4:7; Filip 4:13) Ire eji ikeke ikeme Yọk, mè ‘ikeke inye me ichechieek,’ Awaji mobene eji igwuun̄, mè inyi eji unye. (1 Pita 5:8-10) Eya orọ, eji kpebefieek owot me lek Yọk.
mrt 32 ¶13-17
Bem Lek Kwun̄ San̄a Me Lek Ataak Ukpatu
● Wọlọ kpọ ere inan̄abe mè inu okup me emen
Inu Baibul otumube: “Ìwọlọ inu geelek ìkpọ.”—Ebi Teselonaika Eyi Adasi 5:21.
Sabum onochieek mè iyaka ire oria etip geelek, ikerere etip owuwa ene eriọọn̄be, mun̄ jaan̄ ibe ke ire atikọ. Ike owa ni?
Wọlọ kpọ ere etip ya onan̄abe. Ere ekikaan̄ etip mè ofifi ntitiin̄ mekọt inwene ukpatu bak me lek ewe kiban̄ mè iyaka ire agan̄ ema ekibieen̄ inye me lek rumurumun̄ mkpulu. Sa etip onọbe me ere ekikaan̄ etip ge sa tọt me lek eyi ofifi. Usini mgbọ, ebi unene kwun̄ mekọt iria ataak ukpatu ijet owu me emen fun mè iyaka ire okwukwut nden̄ me ekariọọn̄ge. Eya ọrọ, katoon̄ ejit me lek etip geelek onọbe itata ochuchubọk iriọọn̄ ere etip ya onan̄abe.
Mun̄ jaan̄ ibe ke mkpọ okup me emen etip ya ire mkpọ okirọrọ mè ire atikọ. Kpọ usen, mè inu okijeen̄ ibe ke ukpatu ya ire atikọ, mè inu okibieen̄ mkpọ etumube ya inye. Omogbala chieen̄ ire etumu ukpatu ochuchubọk ikup ufiak kubọk ikakup me lek inu geege mè iyaka ire etumu ukpatu ya me oniin̄ oborọ ibe ikup eji me lek ubọk ge ubọk ge.
Week Inu Unye Otu Ewe Okup Me Usem Awaji
w03 5/15 22 ¶5-6
Keke Nye, mè Libi Ekot Ugwem Re Ota
Irere ge me lek ebi ikitọbọ ebum inyi Jioba me otutuuk linyọn̄ yi mokọt ikaan̄ ata mgbaan̄ me lek kiji. Ichubọk ire ugbana omimin ikukup me eden̄ bọn ute irieen̄ mè ibaan̄ ebi imama ge ge! (Pita Eyi Adasi 2:17) Eji mekọt irọ si ibe ebi bọn ute ekeke enye.
Kpọ-nu ata akpat ukot Jobu. Ikerere Elifaji ogwu ikatumu atikọ mgbọ ikikat Jobu ejit itumu ibe: “Ikọ kwun̄ îbene ebi ìberọrọn̄ igwuun̄; owu orọ owuwa akpatukot òmemem inye.” (Jobu 4:4) Ire okekikọt irọ ikeya ni? Eji ge ge mikaan̄ akpan ikwaan̄ itatap ubọk inyi bọn ute irieen̄ mè ibaan̄ ibe ekup enye me ikwaan̄ Awaji. Kè irọrọ kiji me lek kiban̄ ikijeen̄ ibe ke eji mekirọ mkpọ Baibul otumu obe: “Ìrọ inyi ubọk òwọwọ inye, mè akpatukot òkiraran ikeke.” (Asaya 35:3) Eya orọ, tumu fieek ikekitap efuuk me owot gwun̄ ge mè iyaka iba mgbọ geelek osichichini ema me nkween̄mkpọ ntitiin̄. (Ebi Iburu 10:24, 25) Ata usem etumube isasa itọn̄ ema me lek efuuk ema ekitap isasa irọ inyi Jioba ibele ejit motap ubọk inyi ema ekeke enye mè elibi ekot ugwem ere ota.
AKỌP ONYAN̄ 16-22
INU UNYE OTU EWE OKUP ME USEM AWAJI | JOBU 6-7
“Mgbọ Ugwem Okikup Owu Me Lek Kubọk Okpoboyaka Ikọt Ime”
w06 3/15 14 ¶10
Inu Ekpabe Ofolek Ikpa Jobu
7:1; 14:14—Keke ke “usen ikwaan̄” mè iyaka ire ikwaan̄ etetbe ene me unye ubọk osibi? Ufialek Jobu ikup unye unye enenen ire lek isabe ugwem itọt me lek unye ikwaan̄ etetbe ene me unye ubọk ibe isi. (Jobu 10:17) Eyi irebe ibe ke mgbọ ene okupbe me udọn̄ ufuun̄, orere bene me mgbọ ene okwube sa re mgbọ ene ojomobe me mkpa—ire mgbọ ene ikpobokọt ilibi inwọnọ, eya orọ Jobu osabe mgbọ ya itọt me lek mgbọ etebe ene me unye ubọk.
w20.12 16 ¶1
“Jioba . . . Ikinyan̄a Ebi Efuuk Otabe Me Owot”
USINI MGBỌ, eji mekọt ikikeek ibe ke ugwem kiji migbidim, ke ire si “ufialek ufialek ojot.” (Jobu 14:1) Eya orọ, eji mekọt igobo itet inu orọrọ efuuk okita eji me owot usini mgbọ. Ubọk ikupbe me lek usini ebi usun̄ Jioba me ukot ikaan̄ ire eya. Usini kiban̄ miweek ikwukwu. (1 Ubọọn̄ 19:2-4; Jobu 3:1-3, 11; 7:15, 16) Ire, inan̄a me mgbọ ire mgbọ, Jioba—Awaji ogwu etoon̄be ejit me lek—ikat ema ejit mè inyi ema unye. Ege mfufuk kiban̄ isasa ikat eji ejit mè ekween̄ mkpọ enan̄a me lek.—Rom 15:4.
g 1/12 16-17
Mgbọ Ugwem Otabe Owu Efuuk Me Owot
Ikerere ibe ke irek kwun̄ mokọt ikup kubọk miyọt, riọọn̄ ibe ke ikare owu gaalek. Otutuuk ene mekichichini mbet ufialek yaage mè iyaka ire ofifi me chereyi. Baibul ibe: Otutuuk inu geelek Awaji orombe òkito mfi me irak uga ufialek kubọk nwa-owot uman okitet.” (Ebi Rom 8:22) Usini mgbọ, mokọt ikup kubọk ufialek kwun̄ ikpobota, ire, ike mgbọ okije, inu mokọt ikup ijaan̄. Ire, me mgbọ keyi, keke obokọt itap ubọk inyi owu?
Kpa ubọk inu okupbe owu me lek nyi ogwu unene kwun̄ otoon̄be ejit me lek. Baibul ibe: “Unene ìkima ene mgbọ geelek, ire, ekiriọọn̄ ngwan̄ me mgbọ uyọrọlek.” (Urọk 17:17) Jobu ogwu ata irọrọ, ekpabe mkpọ ofolek me emen Baibul, ikpa ufialek kan̄ isa inyi ebi ofifi ife me mgbọ ikibọkọ ukwook. Mgbọ ikikeek ibe ke ugwem ijọ ọmọ ejit, itumu ibe: “M̀kpakọt itele ininina lek n̄a; mâtumu ikọ ikpọ me lek ubọk ejit ofieekbe emi ire!” (Jobu 10:1) Ikpakpa ufialek kwun̄ inyi ebi ofifi ife mokọt itap ubọk irọ inyi ejit kwun̄ igele, mè itap ubọk inyi owu okomun̄ ufialek ya me ofifi oniin̄.
Kpa ejit kwun̄ nyi Awaji me uriaak. Usini ene ekikeek ibe ke uriaak ire gaalek inu okirọ lek ene ikup dii, ire, ikare inu Baibul otumube. Okwa Itọn̄ 65:2 igwen Jioba, Awaji ogwu “Okinọ uriaak,” ikpa Pita Eyi Adasi 5:7 ibe: “Îre ọmọ okikpọ enyi chieen̄ me lek.” Baibul ikikpa owuwa mgbọ ufiak iyayaka lek imaan̄ me lek Awaji. Kubọk inu njeen̄:
‘Sa otutuuk ejit kwun̄ toon̄ me lek Jioba; kasa ngobo-ntet eyi akpalek kwun̄ ìbieen̄ me lek. Riọọn̄ Jioba me oniin̄ kwun̄ geelek, ke ọmọ môrọ mè oniin̄ kwun̄ ije itat.’—URỌK 3:5, 6.
“Môkinyi ebi geelek ìkitet ukpook [Jioba] inu òkup ema me uyọt, mè ikinọ si ida ito kiban̄, mè ikinyan̄a ema.”—OKWA ITỌN̄ 145:19.
“Ejit kiji înye me isi Awaji, mije, eji mîriọọn̄ ibe ke Awaji îkinọ eji ida mgbọ geelek eji ekibeek ọmọ inu itat me lek nkeek kan.”—JỌN EYI ADASI 5:14.
‘Jioba îjọn̄ọ ere me lek ebi ikpak, ire, ìkinọ uriaak ebi ata irọrọ.’—URỌK 15:29.
Ire okpa ufialek okichichini inyi Awaji, motap ubọk inyi owu. Eya orọ Baibul otapbe owu efuuk me owot ibe “toon̄ Awaji ejit me lek mgbọ geelek; ìkpa ufialek kinyi ìnyi ọmọ.”—Okwa Itọn̄ 62:8.
Week Inu Unye Otu Ewe Okup Me Usem Awaji
w20.04 16 ¶10
Jeen̄ Ibe Ke Okaan̄ Ulọk Me Lek Ebi Ene mè Kijeen̄ Ema Njijin̄
10 Eji mekọt igọọk akpat ukot Jioba sa me ikekigobo ge ge itet. Sa inyi oriọọn̄ bọn ute irieen̄ mè ibaan̄ ojaan̄. Gọọk ema kpa usem sabum nkween̄mkpọ mè nkween̄mkpọ isita, gọọk ema sibi uko, mè ire ifet, gwen ibe enu enegọọk owu erie inorie. Osirọ ikeya, omomun̄ ibe ke gwun̄ ute enenwaan̄ ya okikeek ibe ke ikakaan̄ eru unene, ichubọk ikitet esip, omomun̄ si ibe ke gwun̄ ute enerieen̄ okikeek ibe ke mima ikpoko, ichubọk ire ogwu okichili ubọk itap ubọk inyi ebi ene, mè iyaka ire ke ototun̄ ukan̄ ikimalek inu nkween̄mkpọ ulọ mgbọ ekime ukeme. (Jobu 6:29) Me atikọ, eji kpebere ebi “ikitap chieen̄ me lek inu ebi ofifi ene.” (1 Tim 5:13) Ire, inwọn ibe eji eriọọn̄ usini mkpọ ofolek ebi bọn ute mè inu orọrọ ema ekirọ inu ubọk ema ekirọ.
AKỌP ONYAN̄ 23-29
INU UNYE OTU EWE OKUP ME USEM AWAJI | JOBU 8-10
“Ima Awaji Eyi Okikup Ire Mgbọ Geelek Okibem Eji Isan̄a Me Lek Ataak Kè Setan”
w15 7/1 12 ¶3
Ire Eji Mekọt Ichubọk Ikirọ Inu Obokineme Awaji Ni?
Jobu ibọkọ owuwa ukwook echi obokọt ikup kubọk ikagbe ibe ibọkọ. Ikaan̄ lọlọ nkeek ofolek, mè ikana igwook ibe ke Awaji ikakaan̄ ulọk me ire ene mikaan̄ ichechieek me lek kan̄ sa ikaan̄. (Jobu 9:20-22) Jobu ichieek inye ibe ke ọmọ ire ogwu ata irọrọ ire lek ebi ofifi ene ekikeek ibe kè ọmọ ikimọnọ lek kan̄ kubọk ogwu ata irọrọ igak Awaji.—Jobu 32:1, 2; 35:1, 2.
w21.11 6 ¶14
Keke Ke Ima Jioba Eyi Okikup Ire Mgbọ Geelek Osibi Inyi Owu?
14 Ima Awaji eyi okikup ire mgbọ geelek okibem eji me irek emen ekwukwu. Me uriaak iriaakbe inyi Jioba, Debit itumu ibe: “Owu ore ere nkinin̄ ilet lek; owu okinyan̄a emi isibi me uyọrọlek; owu orọ inyi ebi ene ekọt okwa unyan̄a ekana emi me ijọn̄ okokop. . . . Imumechieen̄ mgbọ geelek eyi [Jioba] ìkakana lek ebi ìtoon̄ ọmọ ejit me lek.” (Itọn̄ 32:7, 10) Ike mgban okikana ama me ukot ikaan̄ okibem ebi ikup me ama ya, ikeya si ke imumechieen̄ mgbọ geelek eyi Jioba okana eji, mè ikibem eji inan̄a me lek unan echi obokọt itap igbegbe utoon̄-ejit kiji me ntọ-mkpọ. Isọkọ me lek si, imumechieen̄ mgbọ geelek eyi Jioba okibieen̄ eji ibe etaba lek eriaak me lek kan̄.—Jeri 31:3.
Week Inu Unye Otu Ewe Okup Me Usem Awaji
w10 10/15 6-7 ¶19-20
‘Ìre Ekene Oriọọn̄ inu Òkup me Ejit Jioba?’
19 Keke ke eji ekween̄ ofolek ‘inu òkup me ejit Jioba?’ Igbe ibe eji etele me Usem Awaji ikpukpo ngobo-ntet kiji ofolek inu òkup me ejit Jioba. Eji ekafieek Jioba ikọ me lek inu echi eji kpekọt irọ mè iyaka ire isa nkeek kiji mè onineen̄ kiji ifieek ọmọ oyerebet. Jobu itumu ibe: “[Awaji] ìkare ebilene kubọk emi nrebe, eyi mâkọtbe ikifọọk ọmọ ikọ, eyi eji mêkọtbe igbaan̄ ikeke me oyerebet.” (Jobu 9:32) Kubọk Jobu, eji esibene ikigobo nkeek Jioba itet, eji kpebekọt itet ikaan̄ itutumu ibe: “Otutuuk kechi ìre echi asasa me lek ikwaan̄ îrọbe; otutuuk ikọ cha eji ekinọ ofolek inu îkirọ ìre gaalek nweenween̄ ikọ! Achubọk unye kan̄ ya ònye kubọk nsook-isinyọn̄, ekene obokọt igobo itet?”—Jobu 26:14.
20 Ike eji ekifuk ikpa Mbuban, keke ke eji eberọ ire eji ifuk ere ge oyọyọt eji igogobo itet, ogak ge ofolek nkeek Jioba ni? Ire me mgbọ eji ewọlọ inu ya ikpọ eji kpekọt ikaan̄ ata ufọọk-otu, eji emun̄ inu ya kubọk ire ntọ-mkpọ isa inyi utoon̄-ejit kiji me lek Jioba. Riọọn̄ ibe ke usini mgbọ, usini usem ikinyi eji irek isasa ijeen̄ ichechieek me lek eru echi Jioba okaan̄be. Kè eji esa me usikilek ebọkọ etap ibe ke eji kpebekọt igobo itet otutuuk inu echi Jioba orọbe. (Etip 11:5) Eyi mobieen̄ eji ibe echieek me lek usem ogwu ikwaan̄ Pọọlu otumube: “Ìre ekene oriọọn̄ ubọk Awaji osabe ibọọn̄ ubọọn̄ iyaka? Sà ìre ekene oriọọn̄ ubọk iriọọn̄-inu kan̄ mè ifuk-ibot kan̄ osabe idọk iyaka? Ìre ekene obokọt igobo itet ubọk îkisa idọmọ inu me nkeek kan̄? Ubọk irọ inu kan̄, kpunu ogwu òbokọt iriọọn̄. Kubọk ikpa Mbuban otumube ibe, “Ìre ekene oriọọn̄ ejit [Jioba]? Sà ìre ekene obokọt iteme ọmọ nteme? Ìre ekene orak ìfọọk inu inyi Awaji, eyi mêbe Awaji iniyaka ikpe?” Mije, otutuuk inu geelek ìnan̄a me ubọk kan̄, otutuuk inu geelek ìkiluk ugwem inan̄a me ubọk kan̄, otutuuk inu geelek ìkup inyi ọmọ. Itọn̄ mè umin ikup inyi ọmọ mege ire mgbọ ikakaan̄ge itata! Ikup ikeya!”—Rom 11:33-36.
AKỌP ONYAN̄ 30–AKỌP MÈ ONYAN̄ GE 5
INU UNYE OTU EWE OKUP ME USEM AWAJI | JOBU 11-12
“Oniin̄ Ita Ebesa Ikaan̄ Iriọọn̄-Inu mè Ikaan̄ Oruru Inan̄a Me Lek”
w09 4/15 6 ¶17
Jobu Imọnọ Erieen̄ Jioba Ibene
17 Keke otap ubọk inyi Jobu ibe ikup inye ikigbe utoon̄-ejit ni? Isibi utoon̄ ibe ke sabum ufialek orọn̄be itet ọmọ, ke ikaan̄ ata mgbaan̄je melek Jioba. Ikerere ibe ke eji kpekaan̄ inu geege okijeen̄ ibe ke iriọọn̄ inu Setan otumube inyi Jioba, Jobu itutumu ifieek ikukup inye ikigbe utoon̄-ejit. Itumu ibe: “Mege ǹkwu, ǹkabatele itutumu ibe ke emi ǹkalọ!” (Jobu 27:5) Ike owa ke Jobu osa ikaan̄ mgbaan̄je onyenye ikeya melek Jioba ni? Me kpunu ejit iba, imọnọ ibene inu inọbe ofolek ubọk Jioba osabe irọ mkpọ melek Ebereyam, Ajiki, mè Jekọp, ebi irere ebi ngwan̄ kan̄. Sa me ikekikpọ inu Jioba orombe si, Jobu mokọt iniriọọn̄ owuwa eru echi Jioba okaan̄be.—Fuk Jobu 12:7-9, 13, 16.
w21.06 10 ¶10-12
Ire Okaan̄ Jioba, Okakup Owu Gaalek
10 Rọ unene melek ebi eyi Karais ikigbe utoon̄-ejit. Week unene me emen ntitiin̄ ebi obokọt ikween̄ mkpọ inan̄a me lek ikerere ibe ke acha mè irek kiban̄ ikup esese me lek eyi kwun̄. Baibul iyaka ikeek eji ibe ke “iriọọn̄-inu ìkikup me etete ebi ìkakan.” (Jobu 12:12) Ebi ininiin̄ ugane mekọt ikween̄ mkpọ inan̄a me lek ebi ijija ikigbe utoon̄-ejit. Debit ire nsabọn me lek Jonatan, ire, eya ikagban ema ibe ekare atalek unene. (1 Sam 18:1) Debit mè Jonatan mitap ubọk inyi ge ge ibe etọbọ ebum enyi Jioba me ekakpọge chieen̄ me lek ufialek omimin. (1 Sam 23:16-18) Gwun̄ ute enenwaan̄ ge ekigwen Irina ogwu ọmọ gaalek orebe Ogwu Ata-Ikọ Jioba me ototun̄ ukan̄ kiban̄ itumu ibe: “Bọn ute irieen̄ mè ibaan̄ mekọt ichubọk ikana ebi nte kiji mè nga kiji mè ebi ngwan̄ kiji me irek emen ekwukwu. Jioba mokọt isa ema isa ikpọ chieen̄ me lek ufiak kiji.”
11 Ikakaan̄ ayaya unene ikakifet, ogak ge me ire owu ire ogwu okitet esip. Ratna, gwun̄ ute enenwaan̄ ge okitet esip ogwu okwekween̄ atikọ me ekakpọge chieen̄ me lek ukeme ibe, “Nniriọọn̄ ibe ke nweek ntap-ubọk ebi bọn nte n̄a.” Mokọt iyọt ikpakpa ubọk inu okup owu me lek inyi ofifi ene, ire, ikekichili ejit ikpa usem ikeya ikup ufiak me ikakaan̄ unene onyenye. Ebi unene kwun̄ miweek itatap owu efuuk me owot mè itap ubọk inyi owu, ire, ema miweek ibe okpa onyi ema ubọk ema ebekọt irọ ikeya.
12 Oniin̄ ge onwọnwọn ichit isasa ikaan̄ unene ire ikekigọọk bọn ute ikisibi uko. Carol ibe: “Nkaan̄ owuwa ata unene sa me ikekigọọk bọn ute ebibaan̄ ikisibi uko mè ikigọọk irọ ofifi ikwaan̄ ntitiin̄. Jioba isa ebi unene chi isa itap ubọk inyi emi me owuwa acha.” Irọrọ unene melek bọn ute ikigbe utoon̄-ejit ichubọk ire mkpọ ogbegbe ibe eji etap efuuk erọ. Jioba ikisa ebi unene chi ikisa itap ubọk inyi eji etim egak ikukup agaga.—Urọk 17:17.
it-2 1190 ¶2
Iriọọn-inu
Iriọọn-inu Awaji. Ire Jioba gaalek okaan̄ iriọọn̄-inu ichit. Mekọt itumu ibe ke ire ọmọ ore Awaji “ogwu ọmọ gaalek oriọọn̄be inu.” (Rom 16:27; Ichi 7:12) Iriọọn̄-inu ire irọriọọn̄ mkpọ ofolek inu, eyi irebe ibe ke ire Jioba ore Ogwu Orom ogwu okukup “bene me mgbọ ikakaan̄ge itata si re mgbọ ikakaan̄ge itata” (Itọn̄ 90:1, 2), iriọọn otutuuk inu geelek oweweek ibe eriọọn̄ ofolek inyọn̄ mè ijọn̄, inu esabe irom, inu okup me emen mè ubọk isabe ikup inire mgbọ keyi. Ire Ọmọ otap mè ineen̄ otutuuk ikan mè ndọmọ echi ebi ene ekisa ikpọ me lek irọ inu geelek ema ekirọ. (Jobu 38:34-38; Itọn̄ 104:24; Urọk 3:19; Jeri 10:12, 13) Ijeen̄ iriọọn̄-inu ibe ke onineen̄ kan̄ ikup ufiak inyi inu geelek ikije ijaan̄, ekerọ ata ntumu-mfieek, mè ebilene ekọt ekeluk ejaan̄. (Ikan 32:4-6; kpọ JEHOVAH [A God of moral standards].) Kpunu inu geege obebene igak ngobo-ntet kan̄. (Asaya 40:13, 14) Ikerere ibe ke ikekitele ibe inu echi ojeje ntikwo me lek ndọmọ ata irọrọ kan̄ ikibọkọ irek mè ikije ijaan̄ me mgbidim mgbọ, ire, ọmọ oriọọn̄ mkpọ echi oborọ me mgbọ okinu me isi, inu geelek moje igọọk ike iweekbe, inu geelek itumube si iborọrọ iso.—Asaya 55:8-11; 46:9-11.
Week Inu Unye Otu Ewe Okup Me Usem Awaji
w08 8/1 11 ¶5
Ikekigọọk Ebi Ijija Ikpa Usem
▪ ‘Ire ngobo itet inu ema ekisa lek itutumu ni?’ Ikpa Jobu 12:11 ibe: “Ike alọm okigban̄ utop eyi inorie, ikeya si ke utọn̄ okigobo ikọ.” Ikup ufiak me mgbọ keyi igak mgbọ oraraka ibe okogban̄ ikọ gwun̄ kwun̄ enerieen̄ mè iyaka ire enenwaan̄ okitumu. Ebi ijija ekitumu ikọ kubọk inu ya ikirọrọ mgbọ geelek. Kubọk inu njeen̄, gwun̄ kwun̄ enerieen̄ mè iyaka ire enenwaan̄ mokọt itumu ibe, “Okirọ mkpọ melek n̄a mgbọ geelek kubọk emi ire nsabọn!” mè iyaka ire “Enyi kpekigban̄ ikọ n̄a!” Kpan̄asi ikekigobo usem olọlọ me emen usem kiban̄, kubọk “mgbọ geelek” mè “kpekigban̄,” riọọn̄ ibe ke ikare mkpọ gwun̄ kwun̄ okaan̄be me ejit ire eya. Kubọk inu njeen̄, “Okirọ mkpọ melek n̄a mgbọ geelek kubọk emi ire nsabọn” mokọt isibi “Ikikup emi me lek kubọk okatoon̄ emi ejit me lek,” mè “Enyi kpekigban̄ ikọ n̄a” mokọt isibi “Nkiweek itutumu inyi enyi ubọk inu okikup emi me lek.” Sa inyi ogobo otet inu ema ekisa lek itutumu.