Me lek ijọn̄ Usu, ikaan̄ ogwu enerieen̄ ge okitọbọ ebum inyi Jioba. Erieen̄ kan̄ ire Jobu. Ibọọn̄ ubọọn̄ enenen mè ikaan̄ ototun̄ ukan̄ omimin. Ikaan̄ ata ejit mè ikitap ubọk inyi ebi ugbọọn̄, ebi nlom kiban̄ ekwube, mè nsabọn ebi una uga mè una ute. Ire, ire Jobu ikpobokaan̄ ufialek geege bak lek ikebirọ inu otatat ni?

Jobu ikariọọn̄ ibe ke Setan ikpọkpọk ikikpọ ọmọ. Jioba ido Setan ibe: ‘Ire otaba iman̄ me lek ogwu usun̄ n̄a Jobu? Kpunu ene geege obet lek kan̄ me linyọn̄ yi. Ikigban̄ utọn̄ me lek n̄a mè ikirọ inu otatat.’ Setan ofọfọọk ibe: ‘Me atikọ, Jobu ikisiki ibot inyi owu bak lek okibem ọmọ mè ikigbana ọmọ. Owu onyi ọmọ ijọn̄ mè ogbogbo anam. Bọkọ otutuuk inu cha, owu momun̄ ibe ke Jobu ikpoboyaka itọbọ ebum inyi owu.’ Jioba ofọfọọk ibe: ‘Owu mokọt itọ ọmọ ikpọ. Ire, kakpan̄ ọmọ.’ Keke orọ Jioba otelebe ibe Setan itọ Jobu ikpọ ni? Bak lek ikaan̄be utoon̄-ejit ibe ke Jobu ikpobotọbọ ọmọ ilọ.

Setan obebene ikisa esese esese ufialek itọ Jobu ikpọ. Adasi, iria ebi ekigwen ebi Saba ibe esi echiin̄ inyinya mè inyinya akpan kè Jobu. Ukan̄ onenitaka otutuuk arọọn̄ Jobu isan̄a kpai. Ofifi urum ebi ene ekigwen ebi Kalidia enenichiin̄ aligọ kè Jobu mè ikpan̄ ebi ikikpọ chieen̄ me lek aligọ cha. Ofifi ufialek ofefieek ichit orọrọ. Uwu otutuuk nsabọn kè Jobu ekupbe ikirie ijọk ogbugbugbọ ikeme ema, otutuuk kiban̄ ekwakwaan̄ isan̄a. Jobu ikaan̄ sasaak omimin enenen, ire, ikpọkpọk ikweek inye si ikitọbọ ebum inyi Jioba.

Setan iweek ibe Jobu ibọkọ ufialek igbaalek, eya orọ, irọrọ ibe okporotu ukan̄ igwook ichit lek Jobu. Unaan̄ Jobu imin enenen. Ikariọọn̄ mkpọ orọrọ otutuuk inu chi okirọ ikeme ọmọ. Ire, ikpọkpọk ikweek inye ikitọbọ ebum inyi Jioba. Jioba imun̄ otutuuk inu chi, ibele ejit enenen me lek Jobu si.

Setan okpọkpọk iria ebirieen̄ ita ibe esi etọ Jobu ekpọ. Ema etumu inyi Jobu ibe: ‘Owu ora irọ ijo inu mè ikisa ilelet. Ire Awaji okisut owu osusut.’ Jobu ofọfọọk ema ibe: ‘Nkarọ inu geege ilọ.’ Ibebene ikikeek ibe ke ire Jioba okirọ ibe ọmọ ikibọkọ otutuuk ufialek ọmọ okibọkọ, mè itumu ibe ke Awaji ikarọ mkpọ ijaan̄ me lek kan̄.

Gwun̄ nsabọn irieen̄ ge ekigwen Eliyu ogwu orọriọọn̄ ubọk iriaan̄ ere mè ikigban̄ usem kiban̄ onenitumu ibe: ‘Inu otutuuk kinyi ekitumu ilọlọ. Jioba ibene igak mkpọ eji ebekọt igobo itet. Ikpobokọt irọ inu ikpak geege. Ikimumun̄ otutuuk inu geelek okibọkọ irek mè ikitap ubọk inyi ebi ikup me ufialek.’

Jioba obebene ikitumu ikọ inyi Jobu ibe: ‘Ire okup me ere owa mgbọ nrombe inyọn̄ mè ijọn̄? Keke orọ otumube ibe ke nkarọ inu ijaan̄? Owu okitumu ikọ me okariọọn̄ge inu okimọnọ irek.’ Jobu ochechieek, mè itumu ibe: ‘Nrọ ijo inu. Mwuuk lek inọ inu ofolek kwun̄, ire, mgbọ keyi, ke nchubọk iniriọọn̄ owu ijaan̄. Kpunu inu geege okiyọt me lek kwun̄ irọrọ. Soso, kpukpa me lek inu ntumube.’

Mgbọ ntọ-mkpọ cha orakabe, Jioba orọrọ inyi lek Jobu inye, irọ si ibe Jobu iyaka ikaan̄ inu iwa igak ubọk iwuukbe lek ikaan̄. Jobu iluk ujọn̄ọ ugwem mè ikaan̄ ubelejit. Jioba igbana Jobu mije igban̄be utọn̄ me lek kan̄ ikerere me mgbọ oyọyọt. Ire omoma ibebet lek Jobu mè ikitọbọ ibot inyi Jioba ikerere me irek oyọyọt ni?

Eriọọn̄ ebi ototun̄ ukan̄ Jekọp kubọk ebi Ijeren me Ijipiti. Mgbọ Jekọp mè Josefu ekwube iraka, ayaya ogwu Fero obebene ikikpulu. Ayaya ogwu Fero ya ikaan̄ ukpook bak lek ebi Ijeren ekiwa mè ikikaan̄ unye igak ebi Ijipiti. Eya orọ, irọrọ me ebi Ijeren ekana ebi usun̄. Ikekitet ebi Ijeren me ubọk unye ibe ekebot okpungwu mè iyaka ire ewuuk inama-uwu mè ekesi ikwaan̄ onyenye. Ire, ike ebi Ijipiti ekitet ebi Ijeren me unye ibe ekesi unye ikwaan̄, ikeya ke ebi Ijeren ekiwa igbaalek. Bak lek Fero ikamage ubọk ebi Ijeren ekpọkpọk ikiwa, inyinyi ida ibe ekpan̄ nsabọn ebirieen̄ geelek ebibaan̄ ebi Ijeren emanbe. Ire omokọt ikeek mbet lek ukpook ebi Ijeren ekaan̄be ni?

Ogwu enenwaan̄ ogwu Ijeren ge ekigwen Jokebedi omaman gwun̄ enerieen̄ ge ojajaan̄. Inyi ọmọ ikọt ibem gwun̄ ya, Jokebedi obeben gwun̄ ya itap me emen okwun mè iben isi iyik me agba okwaan̄ Nali. Ngwan̄ gwun̄ ya ogwu ekigwen Miriam okukup iriak ikikpọ mkpọ obobọkọ irek.

Gwun̄ enenwaan̄ Fero onunu me agba okwaan̄ ya iboniken mun̄, mè imun̄ okwun ya okite me isi mun̄. Imun̄ sọntiik gwun̄ okito ito me emen okwun ya, nsan gwun̄ ya otetet ọmọ. Miriam onanan̄a isibi mè ido ibe: ‘Ire nsi mweek ogwu enenwaan̄ obokọt ikpọ chieen̄ me lek gwun̄ yi inyi owu ni?’ Mgbọ gwun̄ enenwaan̄ kè Fero ochieekbe, Miriam osisi igwen nga kan̄ Jokebedi inu. Gwun̄ enenwaan̄ kè Fero otutumu inyi Jokebedi ibe: ‘Bọkọ gwun̄ yi kpọ chieen̄ me lek nyi emi, ke makpe owu ikpoko.’

Mgbọ gwun̄ ya ominbe, Jokebedi osasa gwun̄ ya ijet gwun̄ enenwaan̄ Fero. Gwun̄ enenwaan̄ Fero ogwegwen gwun̄ ya Mosis mè ikikpọ chieen̄ me lek kubọk gwun̄ kan̄. Mosis imin isibi kubọk gwun̄ ogwu ubọọn̄, mokọt ikaan̄ mkpọ geelek iweekbe si. Ire, ikawuuk Jioba. Mosis iriọọn̄ ibe ke ọmọ ire ogwu Ijeren, ikare ogwu Ijipiti. Igobo si itọtọbọ ebum inyi Jioba.

Mgbọ Mosis osobe akọp acha ini, itutumu ifieek me ejit kan̄ itatap ubọk inyi ebi ama kan̄. Me mgbọ imun̄be ogwu Ijipiti ge okisulu ogwu Ijeren ge, isusulu ogwu Ijipiti ya, ene ya okwukwu. Mosis orọrọkọ ijọn̄ ifuun̄ ene ya. Mgbọ Fero oweekbe iriọọn̄, iweek ubọk ibokpan̄ Mosis. Ire, Mosis olilibi isi lek ijọn̄ Midian. Jioba okekikpọ chieen̄ me lek kan̄ me ere ya.