Inu Ukechieen̄ Orọrọ me Okwaan̄ Anyiaan̄

Mgbọ yaage Fero onọbe ibe ke ebi Ijeren mekifo, ikpọkpọk inwene ejit kan̄ mè inyi ebi akọn̄ kan̄ ida ibe: ‘Inen̄e uji akọn̄ n̄a isun̄, mè inije mè eji egọọk ema! Eji kpemetele ibe ema efo.’ Ọmọ mè ebi melek kan̄ ebebene ikigọọk ebi Ijeren.

Jioba ikisa efit oduku ochechep me inyọn̄ ikijeen̄ ebi kan̄ oniin̄ me ikarek, mè ikisa efit ukan̄ ochechep me inyọn̄ ikijeen̄ ebi kan̄ oniin̄ me eririeen̄. Isa ema ije ire okwaan̄ Anyiaan̄ mè ibe me ema ekweek me ere ya.

Me ere ya, ebi Ijeren ebebene chieen̄ imun̄ ebi Ijipiti ekigọọk ema. Ire, okwaan̄ ikwek ema ibia me ubọk ebi Ijipiti. Ema ebebene ikito ito mè ikitumu inyi Mosis ibe: ‘Eji menikwaan̄ ita! Okojuuk eji otele me Ijipiti.’ Ire, Mosis otutumu inyi ema ibe: ‘Ikatet ukpook, ikweek ikpọ, ke enyi memun̄ ubọk Jioba obosa inyan̄a eji.’ Mosis ichubọk itoon̄ ejit me lek Jioba, ire ikare ikeya ni?

Jioba otutumu inyi ebi Ijeren ibe eje efo isi. Me eririeen̄ ya, Jioba ogwugwuun̄ ujọn̄ọ efit oduku inyọn̄ ya me etete ebi Ijeren mè ebi Ijipiti. Eya irọ inyi udun ikup me agan̄ ebi Ijipiti, me mgbọ agan̄ ebi Ijeren otoon̄be.

Jioba otutumu inyi Mosis ibe inyana ubọk kan̄ ida okwaan̄ ya, Jioba orọrọ ibe unye efet iwut otutuuk eririeen̄ ya. Okwaan̄ ya ocheche irek iba, oniin̄ osisibi me etete okwaan̄ ya. Efie efie ebi Ijeren ejeje me nchat ijọn̄, me etete mun̄ ocheche irek iba ya isaba itoon̄ me agan̄ keyilọ.

Ebi akọn̄ Fero egọgọọk ebi Ijeren inin̄ emen okwaan̄ ya. Jioba otatap wọlọwọlọ me etete ebi akọn̄ cha. Ukot uji akọn̄ kiban̄ obebene ikinwaan̄. Ebi akọn̄ cha ekekitaan̄ ukpo ibe: ‘Eji egwu ekom, Jioba okitim etim me ibot ife chi.’

Jioba onenitumu inyi Mosis ibe: ‘Nyana ubọk kwun̄ da okwaan̄ ya.’ Mgbọ yaage, mun̄ ocheche irek iba ya ogbugbuku inu mè imeen̄ Fero mè ebi akọn̄ kan̄. Ene geege ikagat ugwem.

Eyi ema esababe okwaan̄ ya, owuwa ene ekekikọt okwa itọn̄ Awaji ikibe: “Mâkọt okwa itọn̄ Jioba, mije, ọmọ îtim ikpan̄ me ikpele umin. Îtọọn̄ inyinya mè ebi ìkikọkọp ifiin̄ me okwaan̄.” Mgbọ ema ekikọt okwa ya, ebibaan̄ ekekijop mè ikikwak nkwukwak. Otutuuk kiban̄ ekekibele ejit ibe ke ema minan̄a me usun̄ me atikọ.