Use Ebi Ijeren Echieekbe Jioba

Me mkpọ obet lek onyan̄ iba eyi ebi Ijeren enan̄abe me Ijipiti, ema erere ogoon̄ Saina mè igwuun̄ uwu ọfọ kiban̄ me ere ya. Jioba ogwegwen Mosis ibe inu me inyọn̄ ogoon̄ ya, mè itumu inyi ọmọ ibe: ‘Emi nnyan̄a ebi Ijeren, ire ema ikweek inye ikisiki ibot inyi emi mè ikisun̄ ikan n̄a, ema mere ebi n̄a isisibi esese.’ Mosis osisibi ijọn̄ isi itumu inyi ebi Ijeren inu Jioba otumube. Keke ke ebi Ijeren efọọk? Ema efọọk ibe: ‘Eji merọ otutuuk inu geelek Jioba obe me eji erọ.’

Mosis okpọkpọk ije isi inyọn̄ ogoon̄ ya. Me ere ya, Jioba otutumu inyi ọmọ ibe: ‘Matumu usem inyi owu me òso egwe ita. Taba ebi Ijeren ubọk me utọn̄ ibe ekanu inyọn̄ ogoon̄ Saina.’ Mosis osisibi ijọn̄ mè isi itumu inyi ebi Ijeren ibe ebem lek inọnọ usem Jioba obotumu.

Me òso egwe ita, ebi Ijeren emumun̄ ike isinyọn̄ okimumen mè ikisook. Mimun̄ si ubọk oduku okanabe ichit ogoon̄ Saina mè inọ ida otita okitaan̄. Jioba ojeje me emen ukan̄ inu me inyọn̄ ogoon̄ ya. Ukpook otetet ema enenen, ema ekekiran. Oduku ojojot otutuuk inyọn̄ ogoon̄ ya, ogoon̄ ya okekisisik unye unye. Ida otita ya ikpọkpọk ikitaan̄ inye igbaalek. Mgbọ ya, Awaji otutumu ibe: ‘Emi ire Jioba. Ikalululuk itọbọ ebum inyi ofifi awaji geege.’

Mosis ogwugwu ikom inene isi inyọn̄ ogoon̄ ya, Jioba onyinyi ọmọ ikan ibe isa ijet ebi Ijeren ofolek ubọk ema ebekisa itọbọ ebum inyi ọmọ mè ubọk ema ebekisa irọ eru. Mosis ogege ikan cha isibi mè isi ifuk inyi ebi Ijeren. Ema echechieek use ibe: ‘Eji merọ otutuuk inu geelek Jioba obe me eji erọ.’ Iin̄, ema michieek Awaji use. Ire, ire ema merọ use ya iso ni?