Inyinya Akpan kè Balam Itumu Ikọ

Ebi Ijeren mikup me emen ewe iso akọp acha ini. Ema mitim igak owuwa ama ikakaan̄ unye. Mgbọ keyi, ema ekup me òla ijọn̄ Mowabu okup me agan̄ ichep-ura me okwaan̄ Jodan. Mgbọ ema ebenin̄ ijọn̄ echieekbe me use ya ire. Balak ogwu ubọọn̄ Mowabu okekikaan̄ ukpook ibe ke ebi Ijeren menibọkọ ijọn̄ kan̄. Eya orọ, iraria ibe esi egwen ogwu enerieen̄ ge ekigwen Balam ibe inu me Mowabu inigbo ebi Ijeren.

Ire, Jioba otutumu inyi Balam ibe: ‘Kagbo ebi Ijeren.’ Eya ọrọ, Balam ikachieek isisi Mowabu. Ogwu ubọọn̄ Balak okpọkpọk iria ibe esi egwen Balam, mè ichieek use inyinyi ọmọ inu geelek modobe. Ire, Balam ikachieek isisi. Awaji otutumu inyi Balam ibe: ‘Owu mokọt isi, ire, obotumu gaalek inu mbe me owu otumu.’

Balam onenene inyọn̄ inyinya akpan kan̄ mè ikisi agan̄ mbum-ura. Iben me ejit isisi igbo ebi Ijeren ikerere ibe ke Jioba itumu inyi ọmọ ibe ikagbo ema. Ogwu osat Jioba osisibi mgbọ ita me oniin̄. Balam ikamun̄ ogwu osat ya, ire, inyinya akpan kan̄ imun̄. Me adasi mgbọ, inyinya akpan ya iwuwulu inin̄ oron. Me òso mgbọ iba, iwuwulu itọbọ me lek ewuuk, Balam otọtọbọ ukot me lek ewuuk ya. Ota kan̄, inyinya akpan ya ogegele igwook me eden̄ oniin̄. Mgbọ ita cha, Balam isasa uti okup ọmọ me ubọk ikisulu inyinya akpan ya.

Me òso mgbọ ita, Jioba orọrọ me inyinya akpan ya itumu ikọ. Inyinya akpan ya ododo Balam ibe: ‘Keke orọ okpọkpọ ikisulu emi?’ Balam ofọfọọk ibe: ‘Owu orọ ibe nkup kubọk ogwu welewele. Kè mkpan̄ owu mebe ke oge akọn̄ omaan̄ me ubọk n̄a.’ Inyinya akpan ya otutumu inyi ọmọ ibe: ‘Owu osa emi ije ije owuwa acha. Ire mwuuk lek irọ owu mbet lek inu okup ikeyi ni?’

Jioba orọrọ ibe Balam imun̄ ogwu osat ya. Ogwu osat ya otutumu inyi Balam ibe: ‘Jioba itaba owu ubọk me utọn̄ ibe me owu okagbo ebi Ijeren.’ Balam ofọfọọk ibe: ‘Nrọ inu olọlọ enenen. Magwu ikom ifo.’ Ire, ogwu osat ya otutumu inyi ọmọ ibe: ‘Owu mokọt isi, ire, obotumu gaalek inu Jioba obe me owu otumu.’

Ire Balam ikween̄ mkpọ inan̄a me lek inu orọrọ ni? In̄-in̄, ikakween̄. Ọmọ orọ, iweek igbogbo ebi Ijeren mgbọ ita mgbọ irebe Mowabu. Ire, ge ge me lek mgbọ cha, Jioba ikirọrọ ibe igbana ebi Ijeren. Ike mgbọ ojebe, ebi Ijeren esisi itim akọn̄ melek ebi Mowabu mè ikpan̄ Balam. Mebe ke Balam igban̄ utọn̄ me lek Jioba, ire kpomonwọn inyi ọmọ ni?