INU NKWEEN̄ 14

Gon Aban me lek Okpan Okpan Usem

Ebi Iburu 8:1

ME MGBIDIM: Tap ubọk rọ inyi ebi ikigban̄ owu ekegọọk usem kwun̄, mè rọ inyi eriọọn̄ ike inu okikpa osabe ikaan̄ mgbaan̄ me lek ibot usem kwun̄.

Kaan̄ nkeek me ejit. Riọọn̄ mè ire obosa usem kwun̄ inyi ene etip, isa irọ ibe ene echieek me lek inu, miya ire isa itap ebi ene efuuk me owot, mè san̄a usem kwun̄ sibi kpọ me lek. Mun̄ ibe ke otutuuk okpan okpan ibot usem kwun̄ itap ubọk irọ inyi okọt okaan̄ inu okaan̄be me nkeek.

Do lek kwun̄ be: ‘Idodo echi owa miya ire ofifi inu okukup ke ebi ikigban̄ emi ebekaan̄ ikeme ibot usem yi?’ Neen̄ usem kwun̄ kpọ me lek ikeya inyi ema mekọt ikigọọk owu si, igobo itet, mè ibọkọ usem kwun̄ itap.
Gon aban me lek ibot usem kwun̄. Kichak otu me lek ibot usem kwun̄ mege usem kwun̄ ota sa me ikpọkpọk ikigwen okpan okpan usem echi okup me ibot usem kwun̄ miya ire isa mbet lek usem echi okup ikeya irọ inu.
Rọ kè okpan ibot usem kwun̄ isibi utoon̄ mè ikup me mfufet. Gobo gaalek okpan ibot usem ogbagbaan̄ me lek ibot usem kwun̄ mè echi obokọt ijeen̄ ijaan̄ me okike mgbọ enyibe. Ikare otutuuk usem okup me ufiak ke obogobo, riọọn̄ ubọk kpa jaan̄ okpan ibot usem ge ge, tumu mè tet otu kaan̄ sabum otumu ofifi, mè rọ inyi ge ikaan̄ mgbaan̄ me lek ofifi.

Omokọt igo okpan ibot usem cha me ibebene usem kwun̄ inyi ema ekegọọk me lek ikeya miya ire iyaka ikpọk ibak si me ikakana usem kwun̄ igwook ifuna ebi ikigban̄ owu ekọt ekekeek.