Keke Orọ Obosa Lek Kwun̄ Inyi Awaji Mè Ikaan̄ Ntap-Me-Mun̄?

Obosa lek kwun̄ inyi Jioba sa me ichechieek ọmọ use me uriaak ibe ke omotọbọ ebum inyi ọmọ gaalek, mè ito si irọrọ nkeek kan̄ kubọk adasi inu me ugwem kwun̄. (Okwa Itọn̄ 40:8) Osirọ eyi isan̄a, omokọt ikaan̄ ntap-me-mun̄. Ntap-me-mun̄ ikijeen̄ ebi ofifi ife ibe ke osa lek kwun̄ inyi Awaji. Ntumu-mfieek isasa lek kiji inyi Jioba ore ntumu-mfieek okukup ufiak ichit eji ebekọt irọ. Keke obokọt ibieen̄ owu ibe orọ ntumu-mfieek yi ni?

1. Keke obobieen̄ ene ibe isa lek kan̄ inyi Awaji?

Ire ima obobieen̄ eji ibe eji esa lek kiji enyi Jioba. (Jọn Eyi Adasi 4:10, 19) Baibul itumu inyi eji ibe: ‘Ma Jioba Awaji kwun̄ me otutuuk ejit kwun̄, mè otutuuk ibot ejit kwun̄, mè otutuuk ekiket kwun̄, mè otutuuk unye kwun̄.’ (Mak 12:30) Eji ekijeen̄ ibe ke eji mima Awaji ikare gaalek me lek inu eji ekitumu, ire, sa me inu eji ekirọ si. Ike ebi imama lek kiban̄ ekibat, ikeya si ke ima eji ekaan̄be me lek Jioba okibieen̄ eji ibe eji esa lek kiji enyi ọmọ mè ekaan̄ ntap-me-mun̄.

2. Kpasi ugbana ke Jioba okinyi Ebi Ata-Ikọ kan̄ ikakaan̄ ntap-me-mun̄?

Osikaan̄ ntap-me-mun̄, omonenikana ge me lek ototun̄ ukan̄ Jioba ikikaan̄ ubelejit. Omomun̄ ima Awaji me owuwa oniin̄, mè itaba lek iriaak me lek kan̄ igak ubọk ikupbe me chereyi. (Fuk Malakai 3:16-18.) Isọkọ me lek ikakaan̄ Jioba kubọk Ute, omokaan̄ bọn ute irieen̄ mè ibaan̄ me otutuuk linyọn̄ yi ebi imama Awaji mè ima owu si. (Fuk Mak 10:29, 30.) Ire, ikaan̄ usini mkpọ oborọ sabum onokaan̄ ntap-me-mun̄. Omokween̄ mkpọ ofolek Jioba inyi oma ọmọ, mè ikaan̄ ichechieek me lek Gwun̄ kan̄ si. Ota kan̄, omosa ugwem kwun̄ inyi Jioba. Ire orọ otutuuk inu chi mè ikaan̄ ntap-me-mun̄, mofet ibe oluk ugwem ore mgbọ geelek. Usem Awaji ibe: ‘Ntap-me-mun̄ yi ke ekisa inyan̄a ene isibi.’—Pita Eyi Adasi 3:21.

KWEEN̄ GBAALEK

3. Otutuuk kiji megobo ogwu eji ebetọbọ ebum inyi

Me Ijeren ukot ikaan̄, usini ene ekikeek ibe ke ema mekọt ikitọbọ ebum inyi Jioba mè ataak awaji ekigwen Baali me mgbọ yaage. Ire, Jioba iria Ilaija ogwu nriran ibe isi ineen̄ lọlọ nkeek kiban̄ isun̄. Fuk Ebi Ubọọn̄ Eyi Adasi 18:21, mè igbaan̄ ikpa idodo yi:

• Kpasi ntumu-mfieek ke ebi Ijeren cha eberọ?

Kubọk ebi Ijeren̄, eji si megobo ogwu eji ebetọbọ ebum inyi. Fuk Luk 16:13, mè igbaan̄ ikpa idodo chi:

• Keke orọ eji kpebekọt ikitọbọ ebum inyi Jioba mè ofifi ene mè iyaka ire ofifi inu me mgbọ yaage?

• Ike owa ke eji ebesa ijeen̄ Jioba ibe ke eji egobo itọtọbọ ebum inyi ọmọ?

4. Kikeek mkpọ ofolek ima Jioba okaan̄be me lek kwun̄

Jioba inyi eji owuwa ata mkpọ. Keke ke eji ebesa inyi ọmọ ni? Fit FIDIO yi.

FIDIO: Sa Inyinyi Kwun̄ Sa Nyi Jioba (3:04)

Me oniin̄ echi owa ke Jioba osa ijeen̄ ibe ke ima owu? Fuk Okwa Itọn̄ 104:14, 15 mè Jọn Eyi Adasi 4:9, 10, mè igbaan̄ ikpa idodo chi:

• Echi owa me lek inyinyi Jioba ke oma ichit?

• Ike owa ke okimun̄ Jioba bak lek inyinyi cha?

Eji esibọkọ inyinyi eji echubọk ima, eji ekekiweek ijejeen̄ ibe ke eji minwọọn̄ ogwu onyinyi eji inyinyi ya. Fuk Ikan Òso Mgbọ Iba 16:17, mè igbaan̄ ikpa idodo yi:

• Osikikeek otutuuk inu echi Jioba orọbe inyi owu, keke ke ikibieen̄ owu ibe orọ onyi ọmọ?

5. Isasa lek inyi Jioba ikisa owuwa ugbana inu

FIDIO: Ififit Ifit Ukot Ore Mkpọ Okukup Ufiak Ichit Me Ugwem N̄a (5:45)

• Ikerere ibe ke ogwu enerieen̄ eji emun̄be me fidio yi ima ifit ukot, keke orọ ijuukbe itele?

• Itumu ifieek isasa lek inyi Jioba ikare ifit ukot. Ire okeek ibe ke irọ ata ntumu-mfieek ni? Keke orọ ofọọkbe ikeya?

Sabum ogwu otuchieen̄ Pọọlu okanabe ogwu eyi Karais, ikiweek irek ilile. Ikween̄ ikan ebi Ju me ubọk ogwu ijejeen̄ osisibi isi. Ire, ijuuk otutuuk inu cha itele inyi ọmọ ikana ogwu eyi Karais. Ire Pọọlu ibọnọ lek ni? Fuk Ebi Filipai 3:8, mè igbaan̄ ikpa idodo chi:

• Keke orọ Pọọlu otumube ibe ke otutuuk inu ọmọ orọbe sabum ọmọ onikana ogwu eyi Karais ire “ifin ikike” mè iyaka ire okpa ni?

• Keke ke iyaka inikaan̄?

• Eyi owa obonwọn me lek kwun̄, ire itọtọbọ ebum inyi Jioba sa ire isasa ugwem kwun̄ irọ ofifi mkpọ?

ME MGBIDIM

Ima obieen̄ eji ibe eji esa lek kiji enyi Jioba mè ekaan̄ ntap-me-mun̄.

Idodo

• Keke orọ Jioba ogbe ogwu eji ebesa otutuuk ejit kiji ima mè itọbọ ebum inyi?

• Ike owa ke Jioba okisa igbana Ebi Ata-Ikọ kan̄ ikakaan̄ ntap-me-mun̄?

• Ire omoma isasa lek kwun̄ inyi Jioba ni?

WEEK

Kpọ inu orọrọ ogwu okikọt okwa mè ogwu okifit ifit etumube ifieek isasa lek kiban̄ inyi Jioba.

Young People Ask—What Will I Do With My Life?—Looking Back (6:54)

Kpọ-nu ofifi mkpọ orọrọ eji ebesa lek kiji inyi Jioba.

“Why Dedicate Yourself to Jehovah?” (The Watchtower, January 15, 2010)

Me emen okwa okijeen̄ fidio yi, kpọ-nu unwọọn̄ ebi isasa lek kiban̄ inyi Jioba ekikaan̄.

I Give My Life to You (4:30)

Me ukpatu “For Years I Wondered, ‘Why Are We Here?’” taba iman̄ me lek inu obebieen̄ ogwu enenwaan̄ ge ibe iwọlọ ikpọ inu okukup ufiak me ugwem kan̄.

“The Bible Changes Lives” (The Watchtower, November 1, 2012)