INU NKWEEN̄ 38
Kijeen̄ Ulibi Me Lek Inyinyi Eyi Ugwem
Ugwem ijot me lek owuwa ata mkpọ. Ikerere mgbọ eji ekaan̄be ufialek, eji ekekinwọọn̄ usini inu me ugwem. Ike owa ke eji ebesa ikijeen̄ ulibi me lek inyinyi eyi ugwem? Keke ore okpan okpan inu orọrọ eji ebekirọ ikeya?
1. Keke orọ eji ebekijeen̄ ulibi me lek ugwem?
Igbe ibe eji ekejeen̄ ulibi me lek ugwem mije irebe inyinyi onan̄a me ubọk Jioba, Nte kiji ogwu okakaan̄ ima. Ọmọ “ore ogbuuruk ere ugwem okinan̄a isibi”—ọmọ orom otutuuk ugwem. (Okwa Itọn̄ 36:9) “Ọmọ me lek kan̄ okinyi ebilene ugwem, mè efuuk, mè otutuuk inu geelek.” (Ikwaan̄ 17:25, 28) Jioba ikinyi eji inu eji eweekbe isasa ikiluk ugwem. Irọ si inyi ifet ibe eji ekọt ekenwọọn̄ ugwem.—Fuk Ikwaan̄ 14:17.
2. Ike owa ke eji ebekọt ikijeen̄ Jioba ibe ke eji mikaan̄ ulibi me lek inyinyi eyi ugwem?
Bene me mgbọ enin̄be owot kwun̄, Jioba ikikpọkpọ owu chieen̄ me lek. Sa me unye ekwukwu mbuban, Debit ogwu usun̄ Jioba ibe: “Owu omun̄ emi me emen nkwa.”(Okwa Itọn̄ 139:16) Jioba imọnọ ugwem ibene enenen. (Fuk Matiyu 10:29-31.) Ikinaan̄ ọmọ enenen ire ene igen ibak ikpan̄ ofifi ene, ikerere lek kan̄ si.a (Isisibi 20:13) Ikinaan̄ Jioba si mè ire eji itap ugwem kiji me unan mè iyaka ire, ire eji kpegbala chieen̄ ibem ugwem ebi ofifi ife. Eji esikikpọ chieen̄ me lek ugwem kiji mè ikijeen̄ ulibi me lek ugwem ebi ofifi ene, eji ekijeen̄ ibe ke eji mimọnọ inyinyi eyi ugwem ibene.
KWEEN̄ GBAALEK
Kween̄ usini oniin̄ obosa ikijeen̄ ibe ke okaan̄ ulibi me lek inyinyi eyi ugwem.
3. Kikpọ chieen̄ jaan̄ me lek akpalek kwun̄
Bak me lek eji echieekbe Jioba use irọrọ nkeek kan̄ mgbọ geelek, eji ekisa otutuuk ugwem kiji itọbọ ebum inyi ọmọ. Ikup kubọk eji ekisa akpalek kiji igwa ngwugwa inyi Awaji. Fuk Ebi Rom 12:1, 2, mè igbaan̄ ikpa idodo chi:
Keke obobieen̄ owu ibe okokpọ chieen̄ ojaan̄ me lek akpalek kwun̄?
Kpasi esese oniin̄ ke obokọt ikirọ eyi?
4. Gbala chieen̄ me lek inu geelek okirọ inyi okasak ene unan mè iyaka ire ikpan̄ ene
Baibul itap eji efuuk me owot ibe ejit inu geelek obokọt isak ene unan. Fit FIDIO yi inyi okween̄ usini inu obokọt ikirọ inyi okasak unan.
Fuk Urọk 22:3, mè igbaan̄ ikpa ubọk owu mè ebi ofifi ife kpebekisak unan . . .
me uwu kwun̄.
me ere ikwaan̄ kwun̄.
me mgbọ okifit ifit.
me mgbọ okikọp mè iyaka ire ikup me emen uji.
5. Jeen̄ ulibi me lek ugwem gwun̄ okup me owot
Me emen okwa kan̄ ge, Debit ikpa ubọk Jioba osabe ikaan̄ ulọk me lek ugwem gwun̄ okimin isibi me owot ogwu uga. Fuk Okwa Itọn̄ 139:13-17, mè igbaan̄ ikpa idodo yi:
Me chieen̄ Jioba, kpa mgbọ ke ugwem obene, ire mgbọ enin̄be owot ene sa ire mgbọ emanbe ene?
Ikan Jioba onyibe ebi Ijeren me ukot ikaan̄ ibem ebi irere uga mè bọn kiban̄ ikup me owot. Fuk Isisibi 21:22, 23, mè igbaan̄ ikpa idodo chi:
Ike owa ke Jioba omun̄ ogwu ikagen ibak ikpan̄ gwun̄ okup me owot?
Ike owa ke ibokup me lek kan̄ ire ene igen ibak ikpan̄ gwun̄ okup me owot?b
Ubọk Jioba okimun̄ inu yi ikukup owu me lek?
Ikerere ogwu enenwaan̄ okakaan̄ ulibi me lek ugwem mokọt ikikeek ibe ke isasan̄a owot gaalek ore inu ibokọt irọ me irek kan̄. Fuk Asaya 41:10, mè igbaan̄ ikpa idodo chi:
Ire ogwu enenwaan̄ ikije itibi ukeme isasan̄a owot, ekene ke ibokọt iweek ntap-ubọk me ubọk? Keke orọ ofọọkbe ikeya?
USINI ENE EKIBE: “Ogwu enenwaan̄ ikaan̄ unye itutumu ifieek mè ire mosan̄a owot, mije ire ọmọ onin̄ owot ya.”
Keke orọ ochieekbe inye ibe ke Jioba imọnọ ugwem uga mè gwun̄ okup me owot ibene?
ME MGBIDIM
Baibul ijeen̄ ibe me eji ema, ejeen̄ ulibi, mè ebem inyinyi ugwem Jioba onyibe eji. Eyi igọbọ ugwem kiji mè ugwem ebi ofifi ife si.
Idodo
Keke orọ ugwem ebilene okupbe unye otu ewe inyi Jioba?
Ike owa ke Jioba okimun̄ ogwu ogegen ibak ikpan̄ ene?
Keke ke oma ofolek inyinyi eyi ugwem?
WEEK
Ike owa ke eji ebekọt ikitọn̄ Jioba me lek inyinyi eyi ugwem?
Week ufọọk-otu nyi idodo yi, Ire Awaji motele inyi ogwu enenwaan̄ osasan̄a owot ni?
Kween̄ ubọk irọriọọn̄ ike Awaji okisa imun̄ ugwem osa ikaan̄ mgbaan̄ me lek inu inwọọn̄-lek eji ekigobo.
“‘Extreme Sports’—Should You Take the Risk?” (Awake!, October 8, 2000)
Ire ene ikikaan̄ ekiket ikpakpan̄ lek kan̄ ye? Kpọ ubọk Baibul obokọt itap ubọk.
“I Want to Die—Can the Bible Help Me When I Have Suicidal Thoughts?” (Web article)
a Jioba ichuchubọk ikikpọ chieen̄ me lek ebi ikaan̄ uga ufieejit. (Okwa Itọn̄ 34:18) Igobo itet unaan̄ echi okirọ ibe ebi ene ekekeek ikpakpan̄ lek kiban̄, mè iweek itatap ubọk inyi ema. Inyi omun̄ ubọk ntap-ubọk kan̄ obosa irọ mè onwene nkeek yi, fuk ibot usem obe “I Want to Die—Can the Bible Help Me When I Have Suicidal Thoughts?” me agan̄ Week me inu nkween̄ yi.
b Ebi iwuwuuk lek isan̄a owot ekafieek ejit iraka iman̄—Jioba mokọt itele inyi ema. Inyi okween̄ ogbaalek, fuk ibot usem obe “What Does the Bible Say About Abortion?” me agan̄ Week me inu nkween̄ yi.