ESDRAS

1 Ciro, Persia ñi lonco ülmen, 1 tripantu yeniefui tañi ngünenieel. Feichi mu Jehová adniefi Ciro, Persia ñi lonco ülmen, ñi entual quiñe huercün dungu com tañi ngünenieel mu, femngechi ñi femtripayal Chau Jehová ñi dungu feipicünulu Jeremías. Ca huirintucucünui ti huercün dungu. Feipilei:

2 “Tüfa ñi feipin Ciro, Persia ñi lonco ülmen: ‘Jehová, ti Fütra Huenu Chau, elueneu com troquiñche mapu meu ca elfalcünueneu ñi deumalelafiel quiñe ruca Jerusalén huaria Judá mapu mu. 3 Eimün meu, ¿inei coneltulei Chau Dios tañi troquiñche mu? Chau Ngünechen afcadinieaimünmu ca amuaimün ta Jerusalén huaria Judá mapu mu. Cüme elcünutuaimün Jehová ñi ruca, Israel ñi Chau Ngünechen. Fei rüf Ngünechen-ngei* ca Jerusalén mu mülequefui tañi ruca.* 4 Inei rume ca cüpanche reque mülehuelu, cheu rume mülelmün, tamün pu carucatu* quelluaimünmu. Elungeaimün oro, plata, chemcün* ca culliñ. Cafei pu che quisu tañi pin mu ayüle ñi eluafiel regalo Chau Ngünechen ñi ruca mülelu Jerusalén mu, fempe müten’”.

5 Feimu pu loncolelu familia Judá ca Benjamín mu, pu sacerdote ca pu Leví che, com pu che ñi adnieteu Chau Ngünechen, pepicahuingün ñi amual ca ñi cüme elcünutuafiel Chau Jehová ñi ruca Jerusalén mu mülelu. 6 Fei tañi pu carucatu quellueyu ca elueyu engün oro chemcün, plata chemcün, tañi nieel, pu culliñ ca caquelu falinque chemcün. Ca quisu tañi pin mu hulingün itrofill regalo.

7 Cafei ti lonco ülmen Ciro huercüi ñi huiñolelngetual fillque chemcün entungelu Chau Jehová ñi ruca mu. Nabucodonosor entufui feiti chemcün Jerusalén mu ca tucufui tañi dios ñi ruca mu. 8 Ciro, Persia ñi lonco ülmen, huercüi ñi entungeal feichi chemcün ca ñi huirintucungeal, femngechi ñi quimelngeal ta Sesbazar,* ti huentru loncolelu Judá ñi troquiñche. Ñi femal tüfachi cüdau Ciro elfalcünufi ti huentru adniequelu plata, Mitrídates pingelu.

9 Tüfa tati chemcün huirintucungelu: 30 oro chemcün cülco adngelu,* mil plata chemcün cülco adngelu, 29 chemcün ca femngechi adngelu, 10 cafei 30 pichique oro tazon, 410 pichique plata tazon ca mil fillque chemcün. 11 Mülefui 5 mil 400 chemcün oro ca platangelu. Pu che camapu yengefulu tripatuingün Babilonia mu ñi huiñotual Jerusalén mu. Feichi mu Sesbazar yetufi com tüfachi chemcün.

2 Tüfachi pu che tripaingün Babilonia ñi troquiñ mapu mu. Tüfa engün mülefui rangi pu che camapu ñi yeeteu ti lonco ülmen Nabucodonosor. Fei engün huiñotui Jerusalén ca Judá mapu, quisuque tañi huaria mu. 2 Huiñotuingün quiñentrür Zorobabel, Jesúa, Nehemías, Seraya, Reelaya, Mardoqueo, Bilsán, Mispar, Bigvái, Rehúm ca Baaná.

Raquingelu pu Israel huentru mülerquei: 3 Parós ñi pu cüpanche: 2 mil 172 che, 4 Sefatías ñi pu cüpanche: 372 che, 5 Ará ñi pu cüpanche: 775 che, 6 Pahat-Moab ñi pu cüpanche cüpalu Jesúa ca Joab mu: 2 mil 812 che, 7 Elam ñi pu cüpanche: mil 254 che, 8 Zatú ñi pu cüpanche: 945 che, 9 Zacái ñi pu cüpanche: 760 che, 10 Baní ñi pu cüpanche: 642 che, 11 Bebái ñi pu cüpanche: 623 che, 12 Azgad ñi pu cüpanche: mil 222 che, 13 Adonicam ñi pu cüpanche: 666 che, 14 Bigvái ñi pu cüpanche: 2 mil 56 che, 15 Adín ñi pu cüpanche: 454 che, 16 Ater ñi pu cüpanche cüpalu Ezequías ñi familia mu: 98 che, 17 Bezái ñi pu cüpanche: 323 che, 18 Jorá ñi pu cüpanche: 112 che, 19 Hasum ñi pu cüpanche: 223 che, 20 Guibar ñi pu cüpanche: 95 che, 21 pu Belén huentru: 123 che, 22 pu Netofá huentru: 56 che, 23 pu Anatot huentru: 128 che, 24 pu Azmávet huentru: 42 che, 25 Quiryat-Jearim, Kefirá ca Beerot ñi pu huentru: 743 che, 26 pu Ramá huentru ca pu Gueba huentru: 621 che, 27 pu Micmás huentru: 122 che, 28 pu Betel huentru ca pu Hai huentru: 223 che, 29 pu Nebo huentru: 52 che, 30 pu Magbís huentru: 156 che, 31 ti cangelu Elam ñi pu huentru: mil 254 che, 32 Harim ñi pu cüpanche: 320 che, 33 Lod, Hadid ca Onó ñi pu huentru: 725 che, 34 pu Jericó huentru: 345 che, 35 ca pu Senaá huentru: 3 mil 630 che.

36 Tüfa tati pu sacerdote huiñotulu: Jedayá ñi pu cüpanche cüpalu Jesúa ñi familia mu: 973 che, 37 Imer ñi pu cüpanche: mil 52 che, 38 Pasjur ñi pu cüpanche: mil 247 che, 39 ca Harim ñi pu cüpanche: mil 17 che.

40 Tüfa tati pu Leví che huiñotulu: Jesúa ca Cadmiel ñi pu cüpanche Hodavías mu cüpalu: 74 che. 41 Tüfa tati pu ülcantufe huiñotulu: Asaf ñi pu cüpanche: 128 che. 42 Tüfa tati pu cuidaquelu puerta* huiñotulu: Salum ñi pu fotüm, Ater ñi pu fotüm, Talmón ñi pu fotüm, Acub ñi pu fotüm, Hatitá ñi pu fotüm ca Sobái ñi pu fotüm: com tüfa 139 che.

43 Ca huiñotui tüfachi pu huentru cüdauquelu Chau Ngünechen ñi ruca mu:* Ziha ñi pu fotüm, Hasufá ñi pu fotüm, Tabaot ñi pu fotüm, 44 Querós ñi pu fotüm, Siahá ñi pu fotüm, Padón ñi pu fotüm, 45 Lebaná ñi pu fotüm, Hagabá ñi pu fotüm, Acub ñi pu fotüm, 46 Hagab ñi pu fotüm, Salmái ñi pu fotüm, Hanán ñi pu fotüm, 47 Guidel ñi pu fotüm, Gahar ñi pu fotüm, Reayá ñi pu fotüm, 48 Rezín ñi pu fotüm, Necodá ñi pu fotüm, Gazam ñi pu fotüm, 49 Uzá ñi pu fotüm, Paséah ñi pu fotüm, Besái ñi pu fotüm, 50 Asná ñi pu fotüm, pu meunim che ñi pu fotüm, Nefusim ñi pu fotüm, 51 Bacbuc ñi pu fotüm, Hacufá ñi pu fotüm, Harhur ñi pu fotüm, 52 Bazlut ñi pu fotüm, Mehidá ñi pu fotüm, Harsá ñi pu fotüm, 53 Barcos ñi pu fotüm, Sísara ñi pu fotüm, Témah ñi pu fotüm, 54 Nezías ñi pu fotüm ca Hatifá ñi pu fotüm.

55 Ca huiñotuingün ñi fotüm Salomón ñi pu cüdaufe: Sotái ñi pu fotüm, Soféret ñi pu fotüm, Perudá ñi pu fotüm, 56 Jaalá ñi pu fotüm, Darcón ñi pu fotüm, Guidel ñi pu fotüm, 57 Sefatías ñi pu fotüm, Hatil ñi pu fotüm, Pokéret-Hazebaim ñi pu fotüm ca Amí ñi pu fotüm.

58 Com pu cüdauquelu Chau Ngünechen ñi ruca mu* ca tañi fotüm Salomón ñi pu cüdaufe 392 chengefuingün.

59 Ca mülefui che tripalu Tel-Mélah, Tel-Harsá, Kerub, Adón ca Imer meu, huelu pepi pengel-laingün ñi tuhun tañi chau ñi familia cam tañi Israel chengen engün. Mülefui: 60 Delayá ñi pu cüpanche, Tobías ñi pu cüpanche ca Necodá ñi pu cüpanche: 652 che. 61 Cafei pu sacerdote ñi pu fotüm mu mülefui: Habaya ñi pu fotüm, Hacoz ñi pu fotüm ca Barzilái ñi pu fotüm. Tüfachi huentru nierpufi Barzilái ñi ñahue, ti Galaad che, ca nierpui tañi üi tañi domo ñi familia. 62 Tüfa engün quintuingün ti huirintucun tañi pengelal ñi tuhun, huelu pelafingün. Feimu elungelai engün* tañi sacerdotengeal.* 63 Ti gobernador* feipifi engün ñi inoal iyael huichucünulelngelu Chau Dios, mülele hula quiñe sacerdote ramtufilu Chau Dios Urim ca Tumim meu.*

64 Com pu che* huiñotulu 42 mil 360 ngefuingün. 65 Cafei 7 mil 337 huentru ca domo esclavongelu, cafei 200 huentru ca domo ülcantuquelu. 66 Niefuingün 736 cahuellu, 245 mula, 67 435 camello ca 6 mil 720 burro.

68 Puulu engün cheu ñi mülen Chau Jehová ñi ruca Jerusalén mu, quiñeque loncolelu familia mu hulingün chalintucun* quisu tañi pin mu, femngechi ñi huiño deumatuafiel Chau Ngünechen ñi ruca cheu tañi mülequefel. 69 Quisuque engün huli tunte* tañi pepi hulün. Ñi femngeal ti cüdau hulngei 512 mil 400 kilo* oro, 2 mil 850 kilo* plata ca 100 sacerdote tacun. 70 Pu sacerdote, pu Leví che, quiñeque che, pu ülcantufe, pu cuidaquelu puerta ca pu cüdauquelu Chau Ngünechen ñi ruca mu* mülenagingün quisu tañi huaria mu. Fei com pu Israel che mülenagi tañi huaria mu.

3 Puulu ti 7 cüyen, pu Israel che* mülefuingün tañi huaria mu. Fei com pu che Jerusalén mu trahuluhui quiñe duam mu müten. 2 Jesúa ca tañi pu compañ sacerdote, cafei Zorobabel ca tañi pu peñi eluhuingün ñi huiño deumatuafiel Chau Dios ñi altar,* fei Israel ñi Chau Ngünechen. Deumaingün ti altar ñi hulal lüpümngeelchi chalintucun,* chumngechi huirintuculei Moisés ñi ley, tüfa Chau Ngünechen ñi huerquen. Jesúa fei ta Jehozadac ñi fotüm. Zorobabel fei ta Sealtiel ñi fotüm.

3 Fei engün llicafilu rume caquelu troquiñche, huiño deumatuingün ti altar cheu tañi mülequefel. Fei hula altar mu elufingün lüpümngeelchi chalintucun ta Chau Jehová: tati lüpümngeelchi chalintucun hulngelu pulihuen ca rupan antü mu. 4 Fei hula femingün ti Fiesta ñi Müleal Llamasa mu,* chumngechi huirintuculei. Fill antü hulingün lüpümngeelchi chalintucun, tunte* tañi huercüngeel engün ñi hulal caque quiñeque antü. 5 Fei hula hulingün lüpümngeelchi chalintucun hulngequelu fill antü, chalintucun hue cüyen mu, chalintucun hulngequelu fillque fiesta mu huichucünulelngelu Chau Jehová ca tati ayülu ñi eluafiel Chau Jehová hulingün chalintucun quisu tañi pin mu. 6 Conlu ti hunen antü 7 cüyen mu eluhuingün ñi eluafiel lüpümngeelchi chalintucun ta Chau Jehová, huelu petu deumangelafui cheu ñi anümngeal Chau Jehová ñi ruca.*

7 Fei hula elufingün plata pu che catrücaquelu cura ca pu artesano. Cafei elufingün pu Sidón che ca pu Tiro che iyael, pulcu ca aceite, femngechi ñi entual cedro mamüll Líbano mu ca ñi yeal Jope huaria meu lafquen püle. Femingün chumngechi tañi feipieteu Ciro, Persia ñi lonco ülmen.

8 Ti 2 tripantu mu, deu ñi puhun engün cheu ñi mülefel Chau Ngünechen ñi ruca Jerusalén mu, 2 conchi cüyen mu, Zorobabel ca Jesúa eluhuingu ñi cüdahual quiñentrür caquelu tañi pu peñi, pu sacerdote, pu Leví che ca com pu camapu yengefulu ca huiñotulu Jerusalén mu. Zorobabel fei ta Sealtiel ñi fotüm. Jesúa fei ta Jehozadac ñi fotüm. Cafei elfalcünulelngei pu Leví che nielu doi 20 tripantu ñi loncoleal ti cüdau femngelu Chau Jehová ñi ruca mu. 9 Feimu Jesúa, tañi pu fotüm ca tañi pu peñi, cafei Cadmiel ca tañi pu fotüm, quiñehuingün ñi loncoleal pu cüdauquelu Chau Ngünechen ñi ruca mu. Com engün Judá ñi pu fotümngeingün. Cafei quiñehui fei engün mu Henadad ñi pu fotüm, tañi pu fotüm engün ca tañi pu peñi. Tüfa engün Leví chengefui.

10 Pu cüdaufe deumaingün cheu ñi anümngeal Chau Jehová ñi ruca, feichi mu pu sacerdote tucutuucülei tañi yamfal tacun* ca yenierquei trompeta. Cafei pu Leví che, tüfa Asaf ñi pu fotüm, yenierquei cimbalo.* Fei engün huitrapüraingün tañi püramyeafiel ta Chau Jehová, inafingün chem huercüi David, Israel tañi lonco ülmen. 11 Ca eluhuingün ñi püramyeafiel ta Chau Jehová ca tañi mañumafiel. Hueluque ülcantuingün: “Chau Dios cüme piuquengei, rumel piuqueyenieafi* ta Israel”. Fei hula com pu che nehuentu huirari tañi püramyeafiel ta Chau Jehová, deumangelu cai cheu ñi anümngeal Jehová ñi ruca. 12 Fentren pu sacerdote, pu Leví che ca pu loncolelu tañi familia mu fütra ngümacahuingün, pefilu cai ñi deumangen cheu ñi anümngeal ti ruca. Tüfa engün deu füchafui ca pefuingün ti cuifi ruca. Huelu fentren che com tañi nehuen mu huiraringün fente tañi ayühun. 13 Feimu quimfal-lai inei huirarmequei tañi ngüman ca inei huirarmequei tañi ayühun mu. Pu che fente tañi huirarün, camapu allcüngefui ñi huaqueñcülen.

4 Pu caiñetufilu pu Judá che ca pu Benjamín che allcüingün ñi femquen pu che huiñotulu, tüfa pu camapu yengefulu. Tüfa engün petu deumalelfi quiñe ruca* ta Jehová, Israel ñi Chau Ngünechen. 2 Feica müten pu caiñe fülcontufingün* ta Zorobabel ca pu loncolelu familia mu, fei feipifingün: “Elumuiñ taiñ cüdahual eimün mu. Iñchiñ ca püramyequefiyiñ* tamün Dios ca feichi ngünenielu Esar-Hadón ca fantepu mu eluquefiyiñ chalintucun.* Esar-Hadón fei ta Asiria ñi lonco ülmen ca cüpaleiñmu tüfachi mapu mu”. 3 Huelu Zorobabel, Jesúa ca pu caquelu loncolelu Israel ñi familia mu feipingün: “Eimün quellumulayaiñ taiñ deumalelafiel quiñe ruca taiñ Chau Ngünechen. Iñchiñ müten deumalelafiyiñ quiñe ruca ta Jehová, Israel ñi Chau Ngünechen, chumngechi taiñ feipieteu ti lonco ülmen Ciro, Persia ñi lonco ülmen”.

4 Fei pu che* huallmaniefilu* pu Judá che ngañhuadelquefeyu engün* ca huesa duamelquefeyu, femngechi ñi huiño deumangenoal ti ruca. 5 Cafei cullifingün ngülamtufe ñi catrütuafiel tañi cüdau engün. Femngechi femingün petu ngünenielu Ciro, Persia ñi lonco ülmen, ngünenielu hula Darío, Persia ñi lonco ülmen. 6 Ellaconlu ñi ngünenieal Asuero, quiñe huirintucun mu dalluntucufingün pu Judá che ca pu Jerusalén che. 7 Ngünenielu Artajerjes, tüfa Persia ñi lonco ülmen, Bislam, Mitrídates, Tabeel quiñentrür caquelu tañi pu compañ huirintuculelfingün quiñe carta ti lonco ülmen Artajerjes. Fei engün rulpadunguingün ti carta arameo quehun mu ca huirintucuingün.*

8 * Rehúm ca Simsái huirintuculelfingu ti lonco ülmen Artajerjes tüfachi carta ñi chaftuafiel ta Jerusalén. Rehúm fei ta falin huentru cüdaulu gobierno mu. Simsái secretariongefui. 9 Ti falin huentru cüdaulu gobierno mu, Rehúm pingelu, huirintucui ti carta, cafei ti secretario Simsái quiñentrür caquelu tañi pu compañ engün, pu juez ca pu caquelu loncolelu, pu secretario, pu Erec che, pu Babilonia che, pu Susa che, tüfa tati pu Elam che. 10 Ca huirintucuingün ti carta caquelu troquiñche ñi camapu yeeteu ti fütra yamfal huentru* Asnapar pingelu. Tüfa elcünui feichi troquiñche Samaria ñi fillque huaria mu. Cafei huirintucui ti carta caquelu pu che mülelu feichi mapu conhue antü püle Éufrates leufü mu.* 11 Tüfachi dungu feipilei ti carta ñi huercüel engün.

“Lonco ülmen Artajerjes, iñchiñ eimi tami pu cüdaufe, iñchiñ pu huentru mülelu ti mapu mülelu conhue antü püle Éufrates leufü mu, huercüleluhuiyiñ tüfachi carta: 12 Lonco ülmen, quimeleluhuiyiñ, pu Judá che puhuingün Jerusalén mu. Fei engün tripaingün cheu tami mülen eimi ca acuingün cheu taiñ mülen iñchiñ. Tüfa engün huiño deumamequeingün ti huaria, ca tati pu che mülelu tüfa mu ngünefalngelai* ca huesa chengei. Feula epe fentepuingün ñi deumamequefiel ti fütra cura malal* ca cüme elcünuquetuingün cheu ñi anümngeal ti huaria. 13 Lonco ülmen, ca quimeleluhuiyiñ, tüfa engün huiño deumatufile ti huaria ca deumanentule ti fütra cura malal, cullilayaingün impuesto ca peaje no rume. Rupale tüfa, pichin plata trapümngeai ñi elungeal pu lonco ülmen. 14 Ti lonco ülmen ñi ruca mu llouqueiñ taiñ cullitu ca cümelayafui taiñ peal ñi rume huesa rupayal ti lonco ülmen. Feimu huercüiñ tüfachi carta taiñ quimelelafiel ti lonco ülmen 15 ca tañi ngüneduamngeal ti lifru nütramcalu ñi rupan tami pu cuifiqueche. Ti lifru mu ngüneduamaimi pu che mülelu feichi huaria mu ngünefalngelai, huesalcaquefingün pu lonco ülmen ca pu troquiñ mapu. Cafei cuifi ca fantepu feichi huaria mu pu che pofolcachequeingün.* Feimu apümcangei ti huaria. 16 Lonco ülmen, quimeleluhuiyiñ, fei engün huiño deumatufile ti huaria ca deumanentule ti fütra cura malal, pepi ngüneniehuelayafimi ti troquiñ mapu mülelu conhue antü püle Éufrates leufü mu”.

17 Ti lonco ülmen feipifi tati falin huentru cüdaulu gobierno mu Rehúm pingelu, ti secretario Simsái, caquelu tañi pu compañ engün mülelu Samaria mu ca caquelu pu che mülelu feichi mapu mülelu conhue antü püle Éufrates leufü mu:

“¡Mari mari! 18 Cüme papeltulelngen* ti carta tamün huercüel. 19 Iñche tañi pin mu cüme ngüneduamngei tüfachi dungu, fei quimngei fütra cuifi ta fantepu mu pu che mülelu feichi huaria chaftuquefi pu lonco ülmen. Feichi huaria mu pu che caiñetuchequei ca pofolcachequei. 20 Mülefui nehuen-ngechi lonco ülmen Jerusalén mu ca ngüneniequefuingün com ti mapu mülelu conhue antü püle Éufrates leufü mu. Cafei cofraquefuingün impuesto ca peaje. 21 Feimu, huercüaimün ñi fentecünual feichi pu che ñi cüdau. Mülelai ñi deumangetual ti huaria iñche huercüli hula. 22 Cüme inaduamaimün tüfachi dungu, fei tañi doi huesalcangenoal ti lonco ülmen”.

23 Ti carta ñi huercüel ti lonco ülmen Artajerjes papeltulelngei ta Rehúm, ti secretario Simsái ca tañi pu compañ, feica müten matu amuingün Jerusalén mu ca dicümtucufingün* pu Judá che ñi fentecünual ti cüdau. 24 Feichi mu fentecünungei ñi huiño deumangetual Chau Dios ñi ruca mülelu Jerusalén mu, fei fentepui ti cüdau Darío yenielu hula 2 tripantu tañi ngünenieel, tüfa Persia ñi lonco ülmen.

5 Rupalu tüfa, Chau Ngünechen ñi huerquen, Ageo ca Zacarías, tüfa Idó ñi lacu,* dungufingu pu judio mülelu Judá ca Jerusalén mu Chau Dios ñi huercün dungu. Tüfa engu huldungui Israel ñi Chau Ngünechen tañi üi mu, fei afcadinieyu engu. 2 Feichi mu Zorobabel, fei ta Sealtiel ñi fotüm, ca Jesúa, fei ta Jehozadac ñi fotüm, eluhuingu ñi huiño deumatuafiel Chau Dios ñi ruca Jerusalén mu. Fei Chau Ngünechen ñi pu huerquen quelluntucumequeyu engu. 3 Feichi mu Tatenái gobernadorcülefui ti mapu mülelu conhue antü püle Éufrates leufü mu. Tatenái, Setar-Bozenái ca tañi pu compañ pemefingün pu judio ca ramtufingün: “¿Inei feipieimünmu tamün deumayal tüfachi ruca ca tamün tucual tüfachi viga?”. 4 Ca ramtufingün: “¿Inei pingei tüfachi pu huentru cüdaumequelu ñi deumarucayal?”. 5 Huelu Chau Ngünechen cuñiutucumequefui pu judio loncolelu, feimu pepi catrütungelai tañi cüdau engün. Tatenái ca caquelu huentru cüpa huirintuculelfi ta Darío tañi feipiafiel chem ñi rupamequen, cafei cüpa üngümfingün* ti lonco ülmen ñi huiñoldunguaeteu* carta mu.

6 Tatenái gobernadorcülefui ti mapu mülelu conhue antü püle Éufrates leufü mu. Setar-Bozenái ca tañi pu compañ fei ta caquelu loncolelu ti mapu mu mülelu conhue antü püle Éufrates leufü mu. Tüfa engün huirintucuingün quiñe carta ca huercülelfingün ti lonco ülmen Darío. 7 Tati huirintucun feipilei:

“Lonco ülmen Darío:

¡Nieaimi cüme felen! 8 Lonco ülmen, quimeleluhuiyiñ, iñchiñ amuiñ Fütra Chau Ngünechen ñi ruca mu mülelu Judá mapu mu. Peiñ fütra cura mu ñi huiño deumamequengen ti ruca. Cafei pared mu tucumequengei mamüll. Pu che rume cüdauquei ca yafüluuquei, feimu ti cüdau matu amulei. 9 Feimu ramtufiyiñ tañi pu loncolelu: ‘¿Inei feipieimünmu tamün deumayal tüfachi ruca ca tamün tucual tüfachi viga?’. 10 Cafei ramtufiyiñ tañi üi engün tañi huirintucuafiel, fei tami quimal inei elfalcülei tüfachi cüdau mu.

11 Fei engün feipieiñmu: ‘Iñchiñ cüdahuelquefiyiñ ta Chau Ngünechen ngünenielu ti huenu ca ti mapu. Huiño deumamequefiyiñ ti ruca ñi deumael quiñe fütra lonco ülmen ngünenielu Israel ca fütra cuifi deumanentufi. 12 Huelu taiñ pu chau illculcafingün* ta Huenu Chau Ngünechen, feimu Chau Ngünechen elcünufi engün ñi ngünenieaeteu Nabucodonosor, Babilonia ñi lonco ülmen, tüfa tati Caldea che. Tüfachi lonco ülmen teifücafi tüfachi ruca, fei camapu yefi pu che Babilonia mu. 13 Huelu ti hunen tripantu ñi ngünenieel Ciro, Babilonia ñi lonco ülmen, ti lonco ülmen Ciro entui quiñe huercün dungu ñi huiño deumangetual Chau Dios ñi ruca. 14 Cafei ti lonco ülmen Ciro huercüi ñi entungeal oro chemcün* ca plata chemcün cheu poyengequei dios Babilonia mu. Nabucodonosor entufui feichi chemcün Chau Ngünechen ñi ruca* mülelu Jerusalén mu, fei hula yefi feichi chemcün cheu poyengequei dios Babilonia mu. Fei elungei tüfachi chemcün quiñe huentru Sesbazar pingelu,* tüfa Ciro gobernadorcünufi. 15 Ciro feipieyu: “Nüfinge tüfachi chemcün ca yefinge ti ruca mülelu Jerusalén mu. Ca Chau Ngünechen ñi ruca huiño deumangetupe cheu ñi mülequefel cuifi”. 16 Aculu Sesbazar deumafi cheu ñi anümngeal Chau Ngünechen ñi ruca mülelu Jerusalén mu. Feichi antü mu petu deumamequengei ti ruca, huelu petu deumanentungelai’.

17 Feimu cümelu troquifile ti lonco ülmen, feipihuiyiñ tami huercüafiel che tañi inaduamal tüfachi dungu. Babilonia mu inaduampe cheu ngülümngequei falinque fillem ca huirintucun ti lonco ülmen. Femngechi quimngeai ti lonco ülmen Ciro ñi huercüfiel tañi huiño deumangetual Chau Ngünechen ñi ruca Jerusalén mu cam tañi femnon. Cafei feipihuiyiñ taiñ huercüngeal chem ñi dulliel ti lonco ülmen”.

6 Fei hula ti lonco ülmen Darío entui quiñe huercün dungu, fei ngüneduamngei fillque huirintucun* Babilonia mu, cheu ngülümngequei falinque fillem. 2 Fei Ecbátana mülechi ellcaupeyüm* mülelu Media troquiñ mapu mu, pengei quiñe chumpol lifru* huirintuculelu tüfachi huercün dungu:

3 “Ti lonco ülmen Ciro 1 tripantu yeniefui tañi ngünenieel, feichi mu Ciro entui tüfachi huercün dungu nütramcalu Chau Ngünechen ñi ruca Jerusalén mu mülelu. Feipilei: ‘Pu judio huiño deumatupe ti ruca ñi hulal chalintucun* tiye mu. Cafei deumape engün cheu ñi anümngeal ti ruca. Ti ruca 27 metro* alüpürayai ca 27 metro* alürupayai. 4 Tuculelngepe 3 huifcülechi fütraque cura ca 1 huifcülechi mamüll. Ti lonco ülmen ñi plata mu cullingeai ti cüdau. 5 Cafei huiñolngetupe tati oro chemcün* ca plata chemcün Chau Dios ñi ruca mu, feichi chemcün Nabucodonosor ñi entufiel Chau Dios ñi ruca* Jerusalén mu mülelu, fei Babilonia mu cüpalfi. Chau Dios ñi ruca Jerusalén mu mülelu tucungepe tati chemcün cheu ñi mülefel. Elcünungepe Chau Dios ñi ruca mu’”.

6 “Feimu tiye mu pülleconlayaimi Tatenái, gobernadorcülelu ti mapu mülelu conhue antü püle Éufrates leufü mu. Cafei pülleconlayaimi Setar-Bozenái ca tami pu compañ, feita caquelu loncolelu ti mapu mülelu conhue antü püle Éufrates leufü mu. 7 Catrütulayaimün ti cüdau ñi femngeal Chau Dios tañi ruca. Ti gobernadorcülelu pu judio che ca pu judio loncolelu huiño deumatuaingün Chau Dios ñi ruca cheu tañi mülequefel. 8 Cafei tamün quelluafiel tüfachi pu judio loncolelu ñi huiño deumatual Chau Dios ñi ruca, feipihuaiñ tüfachi dungu: elufemafimün plata pu judio loncolelu ñi catrütungenoal ti cüdau. Entumün feichi plata ti lonco ülmen ñi plata mu, tüfa tati impuesto trapümngelu ti mapu mu conhue antü püle Éufrates leufü mu. 9 Fill antü eluafimün pu sacerdote mülelu Jerusalén mu chem tañi pediel engün, chem rume tañi duamnieel: hueque toro, caniru* ca cordero, fei ñi elungeal ta Huenu Chau Ngünechen lüpümngeelchi chalintucun, cafei eluafimün cachilla, chadi, pulcu ca aceite. 10 Femngechi fei engün rumel hulafuingün chalintucun ñi ayühuelafiel ta Huenu Chau Ngünechen ca ngillatuaingün ñi cüme feleal ti lonco ülmen ca tañi pu fotüm. 11 Cafei entun quiñe huercün dungu, inei rume inanole tüfachi huercün dungu, quisu tañi ruca mu entungeai quiñe orcon mamüll,* huitrañpüramngeai ti che ca clafantucungeai orcon mamüll mu. Tañi huesa femün mu ti che tripatripatuhue reque feleai tañi ruca.* 12 Chau Ngünechen dulli ñi püramyengeal tañi üi quisu tañi ruca mu, feimu chem lonco ülmen rume ca chem troquiñche rume inanole tüfachi huercün dungu ca apümcafile Chau Ngünechen ñi ruca mülelu Jerusalén mu, Chau Ngünechen apümcayayu. Iñche, Darío, entun tüfachi huercün dungu. Müchai müten femtripape”.

13 Feimu Tatenái, tati gobernadorcülelu ti mapu mülelu conhue antü püle Éufrates leufü mu, cafei Setar-Bozenái ca tañi pu compañ feica müten femingün com ñi huercüel ti lonco ülmen Darío. 14 Pu judio loncolelu amulerquei tañi cüdaumequen tañi deumanentual ti ruca. Yafültucueyu engün ñi feipicünuel Chau Ngünechen ñi pu huerquen Ageo ca Zacarías, fei ta Idó ñi lacu.* Deumanentuingün ti ruca chumngechi feipi Israel ñi Chau Ngünechen ca chumngechi huercüi Ciro, Darío ca Artajerjes, Persia ñi lonco ülmen. 15 Ti lonco ülmen Darío yenielu 6 tripantu tañi ngünenieel, deumanentuingün ti ruca ti 3 conchi antü adar pingechi cüyen mu.*

16 Feimu pu Israel che, pu sacerdote, pu Leví che ca pu caquelu che camapu yengefulu ayühunquechi fiestaingün ñi püntücünulelfiel* tüfachi ruca ta Chau Ngünechen. 17 Ñi püntücünulelafiel* tüfachi ruca ta Chau Dios, pu che hulingün 100 toro, 200 caniru, 400 cordero. Cafei hulingün 12 chifu* chalintucun reque com pu Israel che ñi culpan mu.* Elungei 12 chifu chumngechi tunten-ngei* pu Israel troquiñche. 18 Fei hula chumngechi feipi Moisés tañi lifru, hudamngei pu sacerdote ca pu Leví che quiñeque troquiñche mu, fei tañi cüdahual Chau Ngünechen ñi ruca Jerusalén mu.

19 Pu che huiñotulu, tüfa tati pu camapu yengefulu, femingün ti Pascua* ti 14 antü hunen cüyen mu. 20 Com pu sacerdote ca pu Leví che quisuque liftuhuingün, feimu com lifcüleingün Chau Ngünechen ñi adquiñ mu. Feimu langümingün ti culliñ ñi chalintucual Pascua mu, fei ñi fürenengeal com pu camapu yengefulu, tañi pu compañ sacerdote ñi duam mu ca quisu engün tañi duam mu. 21 Fei hula pu Israel che huiñotulu, tüfa tati pu camapu yengefulu, ingün ti chalintucun. Ingün quiñentrür com pu quiñeulu fei engün mu. Tüfachi pu che quiñepülecünui huesaque dungu ñi femquen pu troquiñche mülelu feichi mapu mu, femngechi ñi püramyeafiel* ta Jehová, Israel ñi Chau Ngünechen. 22 Cafei 7 antü ayühunquechi femingün tati Fiesta ti Fayümngenochi Cofque, Chau Jehová elueyu engün ñi rumeñma ayüucüleal. Cafei Chau Dios tañi pin mu Asiria ñi lonco ülmen quellueyu engün ca quelluntucui ñi deumangeal Chau Dios ñi ruca, Israel ñi Chau Ngünechen.

7 Rupalu tüfa Esdras* huiñotui, petu ngünenielu Artajerjes, Persia ñi lonco ülmen. Esdras fei ta Seraya ñi fotüm, Azarías ñi fotüm, Hilquías ñi fotüm, 2 Salum ñi fotüm, Sadoc ñi fotüm, Ahitub ñi fotüm, 3 Amarías ñi fotüm, Azarías ñi fotüm, Merayot ñi fotüm, 4 Zerahías ñi fotüm, Uzí ñi fotüm, Buquí ñi fotüm, 5 Abisúa ñi fotüm, Finehás ñi fotüm, Eleazar ñi fotüm, ti loncolechi sacerdote Aarón ñi fotüm. 6 Esdras tripatui Babilonia mu. Fei huirintucuquefui Chau Ngünechen ñi huirintucun ca cüme adümquefui Moisés tañi ley. Jehová, Israel ñi Chau Ngünechen, eli tüfachi ley. Jehová, Esdras tañi Chau Ngünechen, afcadinieyu, feimu ti lonco ülmen elueyu com tañi ngillatuel.

7 Ti lonco ülmen Artajerjes yenielu 7 tripantu tañi ngünenieel, amui Jerusalén mu quiñeque Israel che, pu sacerdote, pu Leví che, pu ülcantufe, pu cuidaquelu puerta ca pu cüdauquelu Chau Ngünechen ñi ruca mu.* 8 Ti lonco ülmen yenielu 7 tripantu tañi ngünenieel, ti 5 cüyen mu, Esdras puhui Jerusalén mu. 9 Babilonia mu tripai ti hunen antü ti hunen cüyen mu ca Jerusalén mu puhui ti hunen antü ti 5 cüyen mu. Tañi cüme piuquengechi Dios afcadinieyu. 10 Esdras pepicacünui tañi piuque* tañi ngüneduamal Chau Jehová ñi ley, tañi inayafiel ca tañi quimeltulelafiel pu Israel che tañi feipin ca tañi ley dungu.

11 Ti lonco ülmen Artajerjes elufi tüfachi carta ta Esdras, tüfa sacerdotengefui, huirintucuquefui Chau Ngünechen ñi huirintucun, cüme adümquefui ca cüme quimniefui Chau Jehová ñi huercün dungu ca tañi feipin ñi elungeel pu Israel che.

12 * “Iñche ta Artajerjes, tati doi nehuen-ngechi lonco ülmen, huirintuculeleyu sacerdote Esdras, tati huirintucuquelu Huenu Chau Dios ñi ley. Com dungu mu cüme feleaimi. 13 Entun quiñe huercün dungu feipilelu, com pu Israel che mülelu cheu tañi ngünenieel, cafei pu sacerdote ca pu Leví che ayüle tami compañaeteu Jerusalén mu, amupe müten. 14 Ti lonco ülmen ca tañi 7 ngülamtufe huercüeimu tami ngüneduamal ñi inaniengepen mai Chau Dios ñi ley Judá ca Jerusalén mu. Tüfachi ley eimi tami nieel.* 15 Cafei ti lonco ülmen ca tañi pu ngülamtufe huercülelfingün plata ca oro Israel ñi Chau Ngünechen Jerusalén mu mülelu. Eimi yeafimi ti plata ca ti oro. 16 Cafei yeaimi com ti plata ca oro tami elungeel com Babilonia troquiñ mapu mu ca chem tami eluaeteu pu che ca pu sacerdote quisu tañi pin mu, fei ñi pünengeal Chau Dios ñi ruca mu Jerusalén mülelu. 17 Feichi plata mu ngillafemaimi toro, caniru,* cordero quiñentrür tati fün chalintucun* ca tati hutrulngeelchi* chalintucun. Mülei tami chalintucual tüfa ti altar mu mülelu Chau Dios ñi ruca Jerusalén mu.

18 Ca tati sofrachi plata ca oro mu, eimi ca tami pu peñi femaimün chem cümelu tamün troquifiel, chumngechi ñi ayüqueel tamün Chau Ngünechen. 19 Cafei elungeaimi fillque chemcün* ñi pünengeal Chau Dios ñi ruca mu. Eimi, Jerusalén mu hultucuaimi com feiti chemcün Chau Ngünechen ñi adquiñ mu. 20 Ca chem dungu rume duamfalngele ñi hulngeal Chau Dios ñi ruca mu, culliaimi ti lonco ülmen ñi plata mu.

21 Iñche, tati lonco ülmen Artajerjes, feipifiñ chem chumal com pu adniequefilu plata ti mapu mu conhue antü püle Éufrates leufü mu. Feipifiñ engün ñi elufemafiel ti sacerdote Esdras com tañi pediel, tüfa tati huirintucuquelu Huenu Chau Dios ñi ley. 22 Huelu ngelai ñi hulal doi 3 mil 420 kilo* plata, 16 mil kilo* cachilla, 2 mil 200 litro* pulcu ca 2 mil 200 litro* aceite. Chadi, tunten-ngeafui rume.* 23 Com ñi feipicünuel Huenu Chau Dios ñi femngeal tañi ruca mu, com nehuen mu femngepe. Femngechi Huenu Chau Ngünechen illcutulayaeneu iñche,* tañi pu yall* ca tañi troquiñche. 24 Cafei feipicünun, ngelai ñi cofrangeal chem impuesto ca peaje no rume pu sacerdote, pu Leví che, pu ülcantufe, pu cuidaquelu puerta, pu cüdauquelu Chau Ngünechen ñi ruca mu* ca quiñe cüdaufe no rume mülelu Chau Dios ñi ruca mu.

25 Eimi Esdras, Chau Ngünechen elueimu quimün,* feimu dullinge pu juez ca tañi pu quelluqueteu, fei ñi juzgayafiel com pu che mülelu feichi mapu conhue antü püle Éufrates leufü mu, com pu quimniefilu tami Chau Ngünechen ñi ley. Cafei, eimün quimelelafimün feichi ley inei rume quimnofile. 26 Com pu inanofilu Chau Ngünechen ñi ley ca tati lonco ülmen ñi ley, feica müten condenangeai ñi layal, cam ñi camapu yengeal, cam ñi cullial multa, cam tañi presungeal”.

27 ¡Püramyengepe ta Jehová, taiñ cuifiqueche ñi Chau Ngünechen! ¡Fei nengümüñmafi ti lonco ülmen ñi piuque ñi cüpa ayüfalcünuafiel Chau Jehová ñi ruca Jerusalén mu mülelu! 28 Chau Ngünechen pengeleneu piuqueyen* ca quisu tañi pin mu füreneeneu ti lonco ülmen, tañi pu ngülamtufe ca ti lonco ülmen ñi pu nehuen-ngechi principe. Tañi Chau Ngünechen Jehová afcadinieneu, feimu nehuen piuquecünuhun,* fei trahulfiñ quiñeque Israel loncolelu quiñentrür taiñ amual.

8 Petu ngünenielu ti lonco ülmen Artajerjes, quiñeque loncolelu tañi familia mu ca caquelu huentru tripatuiñ Babilonia mu. Tañi üi engün mülei ti huirintucun pengelquelu tañi familia ñi tuhun. Tüfa tati pu loncolelu tañi üi: 2 Finehás ñi pu cüpanche mu fei ta Guersom. Itamar ñi pu cüpanche mu fei ta Daniel. David ñi pu cüpanche mu fei ta Hatús. 3 Secanías ñi pu cüpanche mu ca Parós ñi pu cüpanche mu fei ta Zacarías quiñentrür 150 huentru huirintucungelu tañi üi. 4 Pahat-Moab ñi pu cüpanche mu fei ta Elieho-Enái, tüfa ta Zerahías ñi fotüm, quiñentrür 200 huentru. 5 Zatú ñi pu cüpanche mu fei ta Secanías, tüfa ta Jahaziel ñi fotüm, quiñentrür 300 huentru. 6 Adín ñi pu cüpanche mu fei ta Ébed, tüfa ta Jonatán ñi fotüm, quiñentrür 50 huentru. 7 Elam ñi pu cüpanche mu fei ta Jesayá, tüfa ta Atalía ñi fotüm, quiñentrür 70 huentru. 8 Sefatías ñi pu cüpanche mu fei ta Zebadías, tüfa ta Miguel ñi fotüm, quiñentrür 80 huentru. 9 Joab ñi pu cüpanche mu fei ta Abdías, tüfa ta Jehiel ñi fotüm, quiñentrür 218 huentru. 10 Baní ñi pu cüpanche mu fei ta Selomit, tüfa ta Josifías ñi fotüm, quiñentrür 160 huentru. 11 Bebái ñi pu cüpanche mu fei ta Zacarías, tüfa ta Bebái ñi fotüm, quiñentrür 28 huentru. 12 Azgad ñi pu cüpanche mu fei ta Johanán, tüfa ta Hacatán ñi fotüm, quiñentrür 110 huentru. 13 Adonicam ñi pu cüpanche mu fei ta Elifélet, Jeiel ca Semaya, quiñentrür 60 huentru. Tüfa engün inangechi huiñotuingün. 14 Bigvái ñi pu cüpanche mu fei ta Utái ca Zabbud, quiñentrür 70 huentru.

15 Trahulfiñ engün inaltu ti leufü puulu Ahavá lof mu ca üyeu mülenagpuiñ tolto ruca mu* 3 antü. Huelu ngüneduamlu iñche rangi pu che meu ca cheu ñi mülen pu sacerdote, quiñe Leví che no rume pelan. 16 Fei hula mütrümfalfiñ* tati pu loncolelu Eliezer, Ariel, Semaya, Elnatán, Jarib, Elnatán, Natán, Zacarías ca Mesulam. Cafei mütrümfalfiñ pu quimeltufe Joiarib ca Elnatán. 17 Fei huercüfiñ engün ñi dungumeafiel ta Idó, tüfa loncolefui Casifía pingechi lof. Feipifiñ engün ñi dunguafiel ta Idó ca tañi pu peñi. Tüfa engün cüdauquefui Chau Ngünechen ñi ruca mu* ca mülequefuingün Casifía lof mu. Feipifingün: “Cüpalelmuiñ che ñi cüdahual taiñ Chau Ngünechen ñi ruca mu”. 18 Taiñ cüme piuquengechi Dios afcadinieiñmu, feimu cüpalelngeiñ ta Serebías quiñentrür tañi pu fotüm ca tañi pu peñi. Com tüfa ta 18 huentru. Serebías quim huentrungei, Mahlí tañi cüpanchengei, Leví pingei ñi lacu,* tüfa Israel ñi fotüm. 19 Cafei cüpalelngeiñ Hasabías ca Jesayá, pu Merarí che meu cüpalu, quiñentrür tañi pu peñi ca tañi pu fotüm. Com tüfa ta 20 huentru. 20 Ca mülefui 220 huentru cüdauquelu Chau Ngünechen ñi ruca mu.* David ca tati pu principe elfalcünufi feichi pu huentru ñi quelluafiel pu Leví che. Com huirintucungei tañi üi engün.

21 Fei hula feipifiñ ta che ñi ngüñüluhual* inaltu Ahavá leufü mu, fei taiñ illamcahual taiñ Chau Ngünechen ñi adquiñ mu, cafei taiñ feipiafiel taiñ adnieaeteu cheu taiñ amual ca taiñ cuñiutucuaeteu iñchiñ, taiñ pu yall* ca com taiñ nieel. 22 Yehuelefun ñi feipiafiel ti lonco ülmen taiñ compañaeteu rüpü mu pu soltau ca pu püracahuellulelu, fei taiñ cuñiutucuaeteu pu caiñe mu. Iñchiñ deu feipicünufuiñ ti lonco ülmen: “Taiñ cüme piuquengechi Chau Ngünechen afcadiniequefi com tañi pu quintuqueteu, huelu fütra illcutuquefi* com tañi pu elcünueteu”. 23 Feimu ngüñüluhuiyiñ ca ngillatufiyiñ taiñ Chau Ngünechen taiñ quelluaeteu tüfachi dungu mu. Fei allcütui taiñ ngillatun.

24 Fei hula huichucünufiñ 12 loncolechi sacerdote, tüfa engün Serebías ca Hasabías, quiñentrür tañi 10 peñi engün. 25 Ca fanelelfiñ ti plata, ti oro ca tati chemcün* ñi hulün ti lonco ülmen, tañi pu ngülamtufe, tañi pu principe ca com pu Israel che tiye mu mülelu. Fei engün hulingün feiti fillem taiñ Chau Ngünechen ñi rucangealu. 26 Feimu fanefiñ ca elufiñ engün 22 mil 230 kilo* plata, 100 plata chemcün doi 68 kilo* fanelu, 3 mil 420 kilo* oro, 27 ca 20 pichique tazon orongelu mil oro moneda* falilu, cafei 2 chemcün deumangelu rume cüme cobre mu, quelülelu ca huilüfcülelu. Feiti chemcün rume falifui oro reque.

28 Fei hula feipifiñ engün: “Eimün ca tati fillque chemcün huichucünulelngeimün Chau Jehová mu. Cafei ti plata ca ti oro elungei ta Jehová, tamün cuifiqueche ñi Chau Ngünechen, quiñe regalo reque. 29 Tüfa fanengeai Jerusalén mu, feichi pieza mu* mülelu Chau Jehová ñi ruca. Fanengeai adquiñ püle cheu ñi mülen pu loncolechi sacerdote, pu Leví che ca pu principe quisuque Israel ñi familia mu. Feimu cüme cuidayafimün petu tañi fanetungenon”. 30 Fei pu sacerdote ca pu Leví che llohuingün ti plata, oro ca tati fillque chemcün. Com tüfa fanelelngei engün tañi yengeal Jerusalén mu, taiñ Chau Ngünechen ñi ruca mu.

31 Fei hula ti 12 antü hunen cüyen mu elcünuiñ Ahavá leufü, fei amutuiñ Jerusalén mu. Chau Ngünechen afcadinieiñmu, cafei rüpü püle lifrenentueiñmu pu caiñe mu ca pu saltiachequelu. 32 Fei Jerusalén mu puhuiyiñ, mülenagpuiñ 3 antü tiye mu. 33 Puulu ti 4 antü, taiñ Chau Ngünechen ñi ruca mu fanetuiñ ti plata, oro ca tati fillque chemcün, fei elufiyiñ ti sacerdote Meremot, tüfa Uriya ñi fotüm. Ca mülefui Eleazar ca pu Leví che Jozabad ca Noadías. Eleazar fei ta Finehás ñi fotüm. Jozabad fei ta Jesúa ñi fotüm. Noadías fei ta Binuí ñi fotüm. 34 Com raquingei ca fanengei. Cafei huirintucungei tunte* ñi fanen. 35 Ca pu che huiñotulu, tüfa tati camapu yengefulu, elufingün Israel ñi Chau Ngünechen lüpümngeelchi chalintucun:* 12 toro com pu Israel che ñi duam mu, 96 caniru,* 77 cordero lüpümngeelchi chalintucun reque ca 12 chifu* hulingün chalintucun culpan dungu mu.* Com tüfachi lüpümngeelchi chalintucun elungei ta Chau Jehová.

36 Fei hula chem tañi huercüel ti lonco ülmen elufiyiñ ti lonco ülmen ñi pu satrapa* ca pu gobernador mülelu feichi mapu conhue antü püle Éufrates leufü mu. Tüfa engün quelluntucufingün pu che ca hulingün chem ñi duamniengeel Chau Ngünechen ñi ruca mu.

9 Femngelu müten com tüfachi dungu, pu principe fülcontueneu* ca feipieneu: “Pu Israel che, pu sacerdote ca pu Leví che püntütripalaingün* pu troquiñche mu taiñ huallmanieteu* ca elcünulaingün tañi ünufal dungu ñi femquen engün. Elcünulaingün ñi femün pu Canaán che, pu Het che,* pu perizita che, pu jebuseo che, pu Ammón che, pu Moab che, pu Egipto che ca pu amorreo che. 2 Pu Israel che, pu sacerdote, pu Leví che ca tañi pu fotüm engün niefingün domo feichi troquiñche mu cüpalu. Feimu ti troquiñche huichucünulelngelu Chau Dios reyüingün* feichi mapu ñi troquiñche engün. Doi mai, pu principe ca pu caquelu gobernante huneleingün ñi femngechi culpaconal”.

3 Allcülu müten tüfa, huichafcan* tañi tacun ca tañi tacun cuhul nienolu,* ngedunentun* cal tañi lonco ca tañi payun mu, rume huesa duamcülefun. 4 Fente tañi culpan pu huiñotulu, tüfa pu camapu yengefulu, trahuluhuingün com pu rume yamniefilu* Israel ñi Chau Ngünechen tañi dungu, fei hualloñmaeneu engün. Puulu ñi hulngeal ti fün chalintucun* nagantü mu, iñche anücünuhun ca huesa duamcülequefun.

5 Puulu ti hora ñi hulngeal ti fün chalintucun nagantü mu, huitrapüran, fei doi huesa duamcülehuelan. Fei hula petu huichafcalelu tañi tacun, lucutunagün, fei huitrañpüramfiñ tañi cuhu huenu mu, tañi Chau Ngünechen Jehová ñi adquiñ mu. 6 Feipin: “Tañi Chau Ngünechen, rume yehuelen. Müte falinolu troquihun tañi fülconal eimi mu ca tami ngillatuafiel. Raquifalngelai taiñ huelulcan. Taiñ huesa femquen huenu mu puhui. 7 Taiñ cuifiqueche ñi antü ta fantepu mu rume culpaqueiñ. Ca taiñ culpan mu, iñchiñ, taiñ pu lonco ülmen ca taiñ pu sacerdote hultucungeiñ taiñ ngünenieaeteu caque troquiñche ñi pu lonco ülmen. Fütra cuchillo mu langümngeiñ, camapu yengeiñ, malocontungeiñ ca illamcangeiñ. Ca femngechi rupamequei fachantü. 8 Huelu Chau Ngünechen Jehová, pichin antü fürenemuqueiñ. Elumuqueiñ* quiñeque iñchiñ taiñ lefmahual ca elumuqueiñ cüme felen tami yamfal mülehue mu, femngechi ñi huilüfal taiñ nge. Ahuem, taiñ Chau Ngünechen, femngechi femimi taiñ pichi nehuencontual petu esclavolefulu iñchiñ. 9 Esclavongelu rume iñchiñ, eimi taiñ Chau Ngünechen, quisucünumulaiñ petu taiñ esclavongen mu. Pengelmuiñ piuqueyen* ca elumuiñ taiñ füreneaeteu Persia ñi pu lonco ülmen. Femngechi yafültucumuiñ taiñ huiño deumayafiel tami huesañmalechi ruca. Judá ca Jerusalén mu elumuiñ taiñ deumayal quiñe fütra cura malal* taiñ cuñiutucuaeteu.

10 Taiñ Chau Ngünechen, rupan mu com tüfa, ¿ca chem feipiafuiñ? Elcünuiñ tami huercün dungu 11 tami elumufiel tami pu huerquen mu. Eimi feipimuiñ: ‘Ti mapu cheu tamün conpual ca nürpual podcülei. Tati pu che mülelu feichi mapu mu liftungelai. Ünufal dungu femqueingün ca com apolfingün ti mapu tañi pod dungu mu. 12 Feimu elulayafimün tamün pu ñahue ñi niehual tañi pu fotüm engün ca lloulayafimün fei engün tañi ñahue ñi niehual tamün pu fotüm engün. Quellulayafimün ñi tüngcüleal* ca ñi cüme feleal engün. Femngechi nehuen-ngeaimün, iyaimün cümeque fün ñi hulqueel ti mapu ca elcünuafimün tamün pu yall* ñi rumel ngen-ngetual ti mapu’. 13 Taiñ Chau Ngünechen, eimi fütra castigamulaiñ huesa femlu rume iñchiñ, doi mai elumuiñ taiñ montual iñchiñ, pu mülelu tüfa mu. Com tüfachi dungu rupaiñ taiñ huesa femün ca taiñ culpan mu, 14 fei ¿huiño inahuelayafuiñ mai tami huercün dungu? ¿Niehuafuiñ mai pu che femquelu ünufal dungu taiñ quiñehual tañi pu che engün? Femliyiñ, eimi rume illcutumuafuiñ,* fei com apümcamuafuiñ. Inei no rume leftripalayafui ca montulayafui. 15 Ahuem, Jehová, Israel ñi Chau Ngünechen, eimi nor dungu femqueimi, feimu quiñeque iñchiñ mongetripaiñ, fei müleiñ fachantü. Eimi tami adquiñ mu culpafe chengeiñ. Taiñ femün mu pepi huitralelaiñ tami adquiñ mu taiñ fürenengeal”.

10 Esdras llellipumequefui, ngümalen feipimequefui tüfachi culpan dungu* ca llüpülen* tranalefui itrotripa Chau Ngünechen ñi ruca mu. Petu femlu tüfa, trahuluhui rume fentren Israel che, huentru, domo ca pichiqueche. Com engün huallmaeyu.* Pu che fütra ngümacahui. 2 Fei Secanías, tüfa Jehiel ñi fotüm, Elam ñi cüpanche mu tuulu, feipifi ta Esdras: “Iñchiñ inalaiñ taiñ Chau Ngünechen ñi feipin, fei niehuiyiñ* ca cüpanche domo iñchiñ. Tüfa engün cüpai fillque troquiñche mülelu tüfachi mapu mu. Huelu pu Israel che petu nieingün maneluhun. 3 Eldungucünuaiñ taiñ Chau Ngünechen iñchiñ ca eluafiyiñ* ñi amutual com feichi pu domo ca tañi pu püñeñ engün. Femngechi eluhuaiñ taiñ adnieaeteu Chau Jehová ca pu rume yamniefilu* taiñ Chau Ngünechen ñi huercün dungu. Inayaiñ ñi feipin Moisés ñi ley. 4 Huitrapürange, eimi elfalcünulelngeimi tüfachi dungu. Iñchiñ quelluhuaiñ. Nehuen piuquecünuunge ca femnge chem duamfalngele rume”.

5 Feimu Esdras huitrapürai ca feipifi pu loncolechi sacerdote, pu Leví che ca com pu Israel che ñi feipicünual* tañi femal chem tañi feipingeel. Tüfa engün eldungucünuingün. 6 Esdras mülefui itrotripa Chau Ngünechen ñi ruca mu, tiye mu tripai, fei amui Jehohanán ñi pieza* mülelu Chau Ngünechen ñi ruca mu.* Jehohanán fei ta Eliasib ñi fotüm. Tiye mu amui Esdras, huelu rume hueñancülefui culpalu cai pu huiñotulu, tüfa pu camapu yengefulu, feimu chem ilai rume ca pütocolai rume.

7 Fei hula com Judá ca Jerusalén mu huldungungei ñi trahuluhual Jerusalén mu com pu huiñotulu, tüfa pu camapu yengefulu. 8 Cafei pu principe ca pu loncolelu feipingün, inei rume trahunole rupan mu 3 antü, feichi che entungeai tati troquiñche mu* camapu yengefulu ca ñamümaingün com tañi nieel. 9 Feimu puulu ti 3 antü, feichi 20 antü 9 cüyen mu, com pu Judá ca Benjamín huentru trahuluhuingün Jerusalén mu. Fei com pu che anücünuhui quiñe lepün mu* mülelu Chau Ngünechen ñi ruca. Com müllmüllingün raquiduamlu cai fente tañi culpan ca tañi fente mahunün.

10 Fei hula ti sacerdote Esdras huitrapürai ca feipifi: “Eimün culpaimün niefilu cai ca cüpanche domo. Eimün tamün duam mu pu Israel che doi culpaingün. 11 Feula entudungulelafimün* tamün culpan* ta Jehová, tamün cuifiqueche ñi Chau Ngünechen, ca inayaimün tañi feipin. Huichucünuhuaimün tüfachi mapu ñi troquiñche mu ca elcünumün tamün pu ca cüpanche domo”. 12 Fei com ti trahunche nehuentu feipi: “Mülei taiñ femal com tami feipin. 13 Huelu fentren che mülei ca rume mahunmequei. Pepi mülelaiñ huecun püle. Cafei rume huesa culpaiñ Chau Dios mu, feimu 1 antü cam 2 antü meu müten norümngelayai tüfachi huesa dungu. 14 Feimu, fürenemuiñ, eluafimi pu principe ñi mülenagal fau ca ñi adcünual fill dungu pu che tañi duam mu. Cafei elcünungepe antü ñi cüpayal pu huentru mülelu taiñ fillque huaria mu ca niefilu ca cüpanche domo, cafei mülei ñi compañaeteu engün pu loncolelu ca pu juez fillque huaria mu, femngechi femngeai puule hula taiñ illcutuhuenoaeteu* Chau Ngünechen tüfachi dungu mu”.

15 Huelu Jonatán feita Asahel ñi fotüm, ca Jahzeya feita Ticvá ñi fotüm, pilaingu ñi femngeal tüfa, cafei pu Leví che, Mesulam ca Sabetái pingelu, quelluntucueyu. 16 Huelu pu huiñotulu, fei tüfa pu camapu yengefulu, femingün chem tañi feipicünuel. Cafei ti sacerdote Esdras ca pu loncolelu familia mu, tüfa tati pu huirintucuñmangelu tañi üi, huichu trahuluhuingün tañi ngüneduamal ti dungu. Femingün tüfa ti hunen antü 10 cüyen mu. 17 Feiti hunen antü hunen cüyen mu fentecünuingün ñi juzgayafiel com pu huentru nieulu ca cüpanche domo engün. 18 Fei quimngei quiñeque sacerdote ñi pu fotüm niehui ca cüpanche domo engün. Tüfa engün Jesúa ñi pu fotüm ca tañi pu peñi. Tüfa ta Maaseya, Eliezer, Jarib ca Guedalías. Jesúa fei ta Jehozadac ñi fotüm. 19 Huelu tüfachi pu huentru feipicünuingün ñi elcünuafiel tañi pu domo. Cafei culpalu cai engün mülefui ñi chalintucual 1 caniru* feichi culpan mu.

20 Imer ñi pu fotüm mu: Hananí ca Zebadías. 21 Harim ñi pu fotüm mu: Maaseya, Elías, Semaya, Jehiel ca Uzías. 22 Pasjur ñi pu fotüm mu: Elioenái, Maaseya, Ismael, Netanel, Jozabad ca Eleasá. 23 Pu Leví che meu: Jozabad, Simeí, Quelaya, tüfa Quelitá ca pingei, Petahías, Judá ca Eliezer. 24 Pu ülcantufe meu: Eliasib. Pu huentru meu cuidaquelu puerta: Salum, Télem ca Urí.

25 Pu Israel che meu, Parós ñi pu fotüm mu: Ramías, Izías, Malkiya, Mijamín, Eleazar, Malkiya ca Benaya. 26 Elam ñi pu fotüm mu: Matanías, Zacarías, Jehiel, Abdí, Jeremot ca Elías. 27 Zatú ñi pu fotüm mu: Elioenái, Eliasib, Matanías, Jeremot, Zabad ca Azizá. 28 Bebái ñi pu fotüm mu: Jehohanán, Hananías, Zabái ca Atlái. 29 Baní ñi pu fotüm mu: Mesulam, Maluc, Adaya, Jasub, Seal ca Jeremot. 30 Pahat-Moab ñi pu fotüm mu: Adná, Kelal, Benaya, Maaseya, Matanías, Bezalel, Binuí ca Manasés. 31 Harim ñi pu fotüm mu: Eliezer, Isiya, Malkiya, Semaya, Shimeón, 32 Benjamín, Maluc ca Semarías. 33 Hasum ñi pu fotüm mu: Matenái, Matatá, Zabad, Elifélet, Jeremái, Manasés ca Simeí. 34 Baní ñi pu fotüm mu: Maadái, Amram, Uel, 35 Benaya, Bedeya, Kelúhi, 36 Vanías, Meremot, Eliasib, 37 Matanías, Matenái ca Jaasú. 38 Binuí ñi pu fotüm mu: Simeí, 39 Selemías, Natán, Adaya, 40 Macnadebái, Sasái, Sharái, 41 Azarel, Selemías, Semarías, 42 Salum, Amarías ca José. 43 Nebo ñi pu fotüm mu: Jeiel, Matitías, Zabad, Zebiná, Jadái, Joel ca Benaya. 44 Com tüfachi pu huentru niehui ca cüpanche domo engün, huelu elufingün ñi amutual tañi ca cüpanche domo ca tañi pu püñeñ engün.