NEHEMÍAS

1 Tüfa tañi feipin Nehemías,* feita Hacalías ñi fotüm. Feichi kislev pingechi cüyen mu,* ti 20 tripantu, iñche mülefun ti nehuen-ngechi ülmen ruca Susa* huaria mu. 2 Feichi mu, quiñe tañi pu peñi Hananí pingelu acui quiñentrür caquelu Judá huentru engün. Fei ramtufiñ engün ñi chumlen caquelu judio camapu yengefulu ca ñi chumlen Jerusalén. 3 Fei engün huiñoldungui:* “Rume huesa rupamequeingün ca yehuen-ngei ñi rupamequen pu che mülehuelu feichi troquiñ mapu mu ca pu mongetripalu camapu, cheu tañi yengefel. Jerusalén ñi fütra cura malal* teifücalehuei ca lüpümngei tañi puerta”.

4 Allcülu iñche tüfa, anücünuhun ca eluhun tañi ngümayal. Fentren antü rume hueñancülefun, ngüñüluhun* ca llellipuniefiñ ta Huenu Chau Ngünechen. 5 Feipin: “Ahuem, Jehová, Huenu Chau Ngünechen, Fütra Chau Dios, afmatufalngeimi, huechunentuqueimi tami eldungu, rume piuqueyefimi* tami pu piuqueyeteu ca pu inaniefilu tami huercün dungu. 6 Füreneen, cüme allcütuen ca adquintuen. Allcütuafimi tami cüdaufe ñi llellipun, chem tami llellipumequeteu fachantü. Antü ca pun llellipuquen tami pu cüdaufe ñi duam mu, pu Israel che. Cafei entudungun* pu Israel che ñi culpan* eimi mu. Iñche ca tañi chau ñi familia com culpaiñ. 7 Rüfcünu, iñchiñ rume huesa femiyiñ ca culpaiñ* eimi mu inanofiel mu tami huercün dungu, tami feipin ca ti ley dungu tami elufiel tami cüdaufe Moisés.

8 Füreneen, acordanieaimi tami feipifiel tami cüdaufe Moisés: ‘Eimün culpalmün* iñche mu, fill püle pu troquiñche mu puhuluhuaiñ. 9 Huelu huiñotulmün iñche mu ca inalmün tañi huercün dungu, fill püle puhulngelmün rume com mapu mu, tiye mu trahuluhuaiñ ca cüpaluhuaiñ ti mülehue mu ñi dulliel iñche tañi püramyengeal tañi üi’. 10 Fei engün tami cüdaufengei ca tami troquiñchengei engün. Tami fütra nehuen ca tami pepiluhun mu montulfimi engün. 11 Chau Jehová, iñche eimi tami cüdaufengen, füreneen, allcütuñmaen tañi llellipun ca allcütuafimi tami pu cüdaufe ñi llellipun, fei engün ayühunquechi yamquefi* tami üi. Füreneen, quelluen iñche, eimi tami cüdaufe, ñi cüme tripayal tañi dungu fachantü, femngechi ñi cutranpiuqueyeaeteu ti lonco ülmen”.

Feichi mu iñche serfiquefun pulcu ti lonco ülmen.

2 Ti lonco ülmen Artajerjes yenielu 20 tripantu tañi ngünenieel, nisan cüyen mu, cüpalelngei pulcu tati lonco ülmen. Iñche chumngechi tañi femquen, nüfiñ ti pulcu ca elufiñ. Huelu iñche turpu hueñancülequelafun quisu tañi adquiñ mu. 2 Feimu ti lonco ülmen feipieneu: “Huesa duamcülelu troquieyu. ¿Chem rupamequeimi? Cutrancülelaimi, ¿tami piuque hueñancülepelai?”. Feica müten rume llican.

3 Fei feipifiñ ti lonco ülmen: “¡Fürenengepe ti lonco ülmen! Ti huaria cheu rüngaltucungei tañi pu cuifiqueche teifücalehuei ca tañi puerta lüpümngei, feimu ¿hueñancülenoafulu iñche?”. 4 Ti lonco ülmen ramtueneu: “¿Chem ayüimi tami femal?”. Feica müten llellipufiñ tañi Huenu Chau Ngünechen. 5 Fei huiñoldungufiñ:* “Cümelu troquifile ti lonco ülmen ca cüme che troquieli iñche, eimi tami cüdaufe, huercüen Judá mapu mu, ti huaria cheu rüngaltucungei tañi pu cuifiqueche, femngechi ñi huiño deumatuafiel”. 6 Feichi mu ti ülmen domo anülefui inafül ti lonco ülmen, fei feiti huentru feipieneu: “¿Amulmi, tunteñmayaimi?* ¿Chumül huiñoaimi?”. Ti lonco ülmen cümelu troquifi tañi huercüaeteu, fei iñche feipifiñ tunteñmayal tañi mülepun.

7 Fei hula feipifiñ ti lonco ülmen: “Cümelu troquifile ti lonco ülmen, elumuafun carta ñi yelelafiel pu gobernador* mülelu ti mapu conhue antü püle Éufrates leufü mu,* femngechi ñi catrütungenoal ñi puhual Judá mapu mu. 8 Ca elumuafun quiñe carta ñi yelelafiel ta Asaf, tüfachi huentru cuidaquei ti lonco ülmen ñi mahuidantu, femngechi ñi eluaeteu mamüll ñi deumayal viga. Feichi viga tucungeai ti Nehuen-ngechi Mülehue, puerta püle Chau Ngünechen ñi ruca mu,* ti huaria ñi fütra cura malal* ca ti ruca mu cheu ñi müleal iñche”. Tañi cüme piuquengechi Dios afcadinieneu, feimu ti lonco ülmen elueneu feichi carta.

9 Rupalu ta antü, puhun cheu ñi mülen pu gobernador mülelu ti mapu conhue antü püle Éufrates leufü mu ca elufiñ ti lonco ülmen ñi carta. Cafei ti lonco ülmen huercüi ñi compañaeteu pu loncolechi hueichafe* ca pu püracahuellulelu. 10 Sanbalat ca Tobías quimlu ñi cüpan quiñe che tañi quelluafiel pu Israel che, rume illcuingu.* Sanbalat fei ta Bet-Horón che. Tobías fei ta Ammón che ca loncolefui.*

11 Fei hula puhun Jerusalén mu. Fei 3 antü rupalu, 12 iñche ca quiñeque huentru engün pun meu huitraiñ ca inei no rume feipilafiñ chem tañi adnieteu Chau Ngünechen tañi femal Jerusalén ñi duam mu. Yenien quiñe culliñ müten, feiti culliñ tañi püracahuellniefiel. 13 Feimu pun tripan ti Laf Mapu ñi Conhue* pingelu, rupan itrotripa Fütra Filu pingechi Rünganco* ca puhun ti Conhue Cheu Trapümngequei Trufquen. Inaduamfiñ Jerusalén ñi fütra cura malal teifücalelu ca tañi fillque puerta com lüpümcünungelu. 14 Fei hula puhun Rünganco ñi Conhue mu ca puhun ti Lonco Ülmen ñi Estanque püle. Huelu pichi rupai cheu ñi amulen, feimu ti culliñ ñi püracahuellniefiel rumelai. 15 Felelu rume, pun meu iñche amulen müten laf mapu püle ca inaduamniefun ti fütra cura malal. Fei hula huiñon ca conpun ti Laf Mapu ñi Conhue püle. Femngechi huiñotun.

16 Pu caquelu gobernante quimlaingün cheu tañi amun iñche ca chem tañi femmequen. Petu feipilafun chem no rume pu judio, pu sacerdote, pu yamfal huentru,* pu caquelu gobernante ca pu caquelu cüdaufe. 17 Fei hula feipifiñ: “Eimün pequeimün fente taiñ huesa rupamequen. Jerusalén teifücalehuei ca tañi puerta lüpümngei. Eluhuaiñ taiñ huiño deumatual Jerusalén ñi fütra cura malal. Femngechi illamcangehuelayaiñ”. 18 Fei hula nütramcalelfiñ engün chumngechi tañi cüme piuquengechi Chau Ngünechen afcadinieneu ca feipifiñ tañi feipieteu ti lonco ülmen. Allcülu tüfa, feipingün: “¡Huiño deumatuaiñ ti fütra cura malal!”. Femngechi hueluquentu yafültucuhuingün ñi femal tüfachi cüme cüdau.

19 Huelu Sanbalat, Tobías ca Guésem quimlu tüfa, ayentueiñmu, illamcaeiñmu ca feipieiñmu: “¿Chummequeimün? ¿Caiñetumequefimün mai tati lonco ülmen?”. Sanbalat fei ta Bet-Horón che. Tobías fei ta Ammón che ca loncolefui.* Guésem fei ta Arabia che. 20 Huelu iñche feipifiñ: “Taiñ Huenu Chau Ngünechen quelluaiñmu taiñ cüme tripayal. Iñchiñ, pu cüdahuelquefilu Chau Ngünechen, deumayaiñ ti fütra cura malal. Huelu eimün chem no rume chumconpalaimün* Jerusalén mu, tamün pu cuifiqueche mülelaingün fau ca ngen-ngelaimün tüfachi huaria”.

3 Fütra cura malal mu* ti hunen lonco sacerdote Eliasib ca tañi pu peñi sacerdote eluhuingün ñi huiño deumatual ti Ufisa ñi Conhue pingelu. Huichucünufingün ti conhue Chau Dios mu ca tucuingün tañi puerta. Cafei huichucünufingün Chau Dios mu ti troquiñ cheu ñi mülen ti Meá Adquintuhue puulu Hananel Adquintuhue. 2 Pu Jericó huentru huiño deumatuingün ca troquiñ ti fütra cura malal mu. Cafei Zacur, Imrí ñi fotüm, huiño deumatufi ti cangelu troquiñ.

3 Hasenaá ñi pu fotüm huiño deumatuingün ti Challhua ñi Conhue. Tucuingün viga ti conhue mu, tucuingün tañi puerta, cheu ñi llafentucual ca tañi tranca.* 4 Meremot huiño deumatufi ti cangelu troquiñ. Meremot fei ta Uriya ñi fotüm, Hacoz ñi lacu.* Mesulam huiño deumatufi ti cangelu troquiñ. Mesulam fei ta Berekías ñi fotüm, Mesezabel ñi lacu. Sadoc fei ta Baaná ñi fotüm, huiño deumatufi ti cangelu troquiñ. 5 Pu Tecoa che huiño deumatuingün ti cangelu troquiñ, huelu tañi pu falinque huentru fente tañi mallma piuquengen cüdaulaingün, pilaingün ñi adnieaeteu pu elfalcülelu cüdau mu.

6 Joiadá ca Mesulam cüme elcünutuingu ti Cuifi Huaria ñi Conhue. Joiadá fei ta Paséah ñi fotüm ca Mesulam fei ta Besodeya ñi fotüm. Tucuingu ti conhue ñi viga, tañi puerta, cheu tañi llafentucual ca tañi tranca. 7 Melatías ti Gabaón che ca Jadón ti Meronot che cüme elcünutuingu ca troquiñ. Tüfa engu Gabaón ca Mizpá chengefui ca adnieyu engu ti gobernador mülelu feichi mapu conhue antü püle Éufrates leufü mu. 8 Uziel cüme elcünutui cangelu troquiñ. Uziel fei ta Harhaya ñi fotüm ca cüdauquefui pañillhue mu.* Hananías, tati pepicaquelu cüme nümün-ngechi aceite,* cüme elcünutui ca troquiñ. Tüfa engu lürümcünufi* mapu cura mu, femingu tüfa quiñe troquiñ Jerusalén mu puulu Alürupachi Fütra Cura Malal mu. 9 Refayá, Hur ñi fotüm, cüme elcünutui ti cangelu troquiñ. Tüfa principengefui rangi Jerusalén troquiñ mapu. 10 Jedayá, Harumaf ñi fotüm, cüme elcünutui ti cangelu troquiñ mülelu itrotripa tañi ruca mu. Ca Hatús, Hasabneya ñi fotüm, cüme elcünutui ti cangelu troquiñ.

11 Harim ñi fotüm Malkiya pingelu ca Hasub, tüfa Pahat-Moab ñi fotüm, cüme elcünutuingu cangelu troquiñ ca ti Horno Adquintuhue. 12 Salum fei ta Halohés ñi fotüm. Salum ca tañi pu ñahue cüme elcünutuingün cangelu troquiñ. Salum principengefui rangi Jerusalén troquiñ mapu mu.

13 Hanún ca pu Zanóah che cüme elcünutuingün ti Laf Mapu ñi Conhue.* Huiño deumatufingün, fei hula tucuingün tañi puerta, cheu tañi llafentucual ca tañi tranca. Cafei cüme elcünutuingün ti fütra cura malal, 450 metro peno.* Fei puhuingün ti Conhue Cheu Trapümngequei Trufquen. 14 Malkiya cüme elcünutui ti Conhue Cheu Trapümngequei Trufquen. Huiño deumatufi, tucui tañi puerta, cheu ñi llafentucual ca tañi tranca. Malkiya fei ta Recab ñi fotüm ca principengefui Bet-Hakerem troquiñ mapu mu.

15 Colhozé ñi fotüm, Salún pingelu, tati principe Mizpá troquiñ mapu mu, cüme elcünutui ti Rünganco* ñi Conhue. Huiño deumatufi, deumalelfi techo ca tucufi tañi puerta, cheu tañi llafentucual ca tañi tranca. Cafei cüme elcünutui ti fütra cura malal, cheu ñi mülen ti Huitrunco ñi Estanque, inafül ti Lonco Ülmen ñi Ayüfalchi Lof, puulu ti Escalera nagpalu David ñi Huaria mu.

16 Nehemías, Azbuc ñi fotüm, tati principe rangi Bet-Zur troquiñ mapu mu, cüme elcünutui ti cangelu troquiñ, itrotripa David ñi Eltun mu* puulu ti estanque mu, ca puulu pu Hueichafe* ñi Ruca mu.

17 Pu Leví che cüme elcünutuingün ti cangelu troquiñ ca adnieyu engün Rehúm, Baní ñi fotüm. Cafei Hasabías, tañi troquiñ mapu ñi duam mu cüme elcünutui cangelu troquiñ ti fütra cura malal mu. Hasabías principengefui rangi Queilá troquiñ mapu. 18 Pu caquelu Leví che cüme elcünutuingün cangelu troquiñ. Tüfa engün adnieyu Bavái, Henadad ñi fotüm, principengefui rangi Queilá troquiñ mapu mu.

19 Tañi inafül püle mülefui Ézer, Jesúa ñi fotüm, tati principe Mizpá mapu mu. Ézer cüme elcünutui cangelu troquiñ itrotripa cheu ñi puhun Hueichahue püle, ti Nehuencülechi Orcon mu.*

20 Tañi inafül püle mülefui Baruc, Zabái ñi fotüm. Com nehuen mu cüdahui, fei cüme elcünutui cangelu troquiñ, ti Nehuencülechi Orcon püle puulu conhue püle ti hunen lonco sacerdote Eliasib ñi ruca mu.

21 Tañi inafül püle mülefui Meremot, feita Uriya ñi fotüm, Hacoz ñi lacu. Tüfa cüme elcünutui cangelu troquiñ, conhue püle Eliasib ñi ruca mu puulu cheu fentepuhui Eliasib ñi ruca.

22 Pu sacerdote Jordán troquiñ mapu mu cüme elcünutuingün ti cangelu troquiñ. 23 Benjamín ca Hasub cüme elcünutuingu ti cangelu troquiñ mülelu itrotripa tañi ruca mu. Cafei Azarías, feita Maaseya ñi fotüm, Ananíah ñi lacu, cüme elcünutui ti cangelu troquiñ püllelelu tañi ruca mu. 24 Tañi inafül püle, Binuí, Henadad ñi fotüm, cüme elcünutui ti cangelu troquiñ, cheu ñi mülen Azarías ñi ruca puulu Nehuencülechi Orcon mu ca puulu esquina püle.

25 Palal, Uzái ñi fotüm, cüme elcünutui ti cangelu troquiñ, itrotripa ti Nehuencülechi Orcon ca tati doicülechi adquintuhue tripalu ti Lonco Ülmen ñi Ruca mu, tüfa mu ca mülei pu Soltau ñi Lepün püle.* Pedaya, Parós ñi fotüm, cüme elcünutui cangelu troquiñ.

26 Pu cüdauquelu Chau Ngünechen ñi ruca* mülelu Ofel mu ca cüme elcünutuingün ti fütra cura malal. Tripahue antü püle puhuingün itrotripa Co tañi Conhue püle ca tati adquintuhue tripalu fütra cura malal mu.

27 Tañi inafül püle, pu Tecoa che cüme elcünutuingün cangelu troquiñ, itrotripa ti fütra adquintuhue tripalu fütra cura malal mu puulu ti fütra cura malal püllelelu Ofel mu.

28 Pu sacerdote cüme elcünutuingün ti troquiñ huente püle pu Cahuellu ñi Conhue mu. Quisuque engün cüdahui itrotripa tañi ruca meu.

29 Sadoc, Imer ñi fotüm, cüme elcünutui ti cangelu troquiñ mülelu itrotripa tañi ruca mu.

Ca Semaya, Secanías ñi fotüm, tati cuidaquelu ti Tripahue Antü Mülechi Conhue, cüme elcünutui cangelu troquiñ.

30 Tañi inafül püle, Hananías ca Hanún cüme elcünutuingu cangelu troquiñ. Hananías fei ta Selemías ñi fotüm. Hanún fei ta Zalaf ñi cayungechi fotüm.

Ca Mesulam, Berekías ñi fotüm, cüme elcünutui ti cangelu troquiñ mülelu itrotripa tañi ruca mu.

31 Tañi inafül püle, Malkiya, tati cüdauquelu pañillhue mu, cüme elcünutui ti cangelu troquiñ, cheu ñi mülen tañi ruca pu cüdauquelu Chau Ngünechen ñi ruca mu* ca pu negociaquelu, itrotripa ti Conhue ñi Ngüneduamal pingelu puulu huechuñ pieza esquina püle.

32 Cafei pu cüdauquelu pañillhue mu ca pu negociaquelu cüme elcünutuingün ti fütra cura malal, femngechi femingün huechuñ pieza mülelu esquina püle puulu Ufisa ñi Conhue mu.

4 Sanbalat allcülu taiñ huiño deumamequefiel ti fütra cura malal* rume huesa illcui* ca fentecünulai ñi ayentuafiel pu judio che. 2 Fei hula adquiñ püle tañi pu compañ ca pu Samaria hueichafe mu* feipi: “¿Chummequei tüfachi pu judio nehuen-ngenolu? ¿Quisu huechunentualu ti cüdau troquihuingün? ¿Hulpeai mai engün chalintucun?* ¿Quiñe antü mu müten deumanentupeai mai tañi cüdau? Com teifücalehuei, fei ¿cüme elcünupetuai mai engün tati cura lüpümngelu ca trafocalelu?”.

3 Ca Sanbalat tañi inafül püle mülefui Tobías, ti Ammón che. Fei feipi: “Quiñe ngürü müten teifücayafui ti fütra cura malal tañi deumamequefiel engün”.

4 Fei hula llellipun: “Taiñ Chau Ngünechen, füreneen, allcütunge. Iñchiñ illamcamequengeiñ. Eimi tami pin mu ayentungepe engün chumngechi tañi femquen. Hultucuafimi tañi pu caiñe mu. Presuyengepe engün caque mapu meu. 5 Tüfa engün huesa dunguyefingün pu cüdaufe, feimu loncontucuaimi tañi huelulcan engün ca eimi tami adquiñ mu rulpacünulayaimi tañi culpan engün”.*

6 Feimu amuleiñ taiñ huiño deumamequefiel ti fütra cura malal ca tunte* ñi alüpüralen, rangi puhuiyiñ taiñ huiño deumanentun. Ca tati pu che amulei ñi cüdaumequen com piuque mu.

7 Jerusalén ñi fütra cura malal ca cheu ñi huesañmaucülen amulei ñi cüme elcünungetun. Quimlu tüfa Sanbalat, Tobías, pu Arabia che, pu Ammón che ca pu Asdod che rume illcuingün. 8 Fei com quiñehuingün ñi lefcontupayafiel ta Jerusalén ca pofolcacheal* huaria mu. 9 Feimu iñchiñ llellipufiyiñ taiñ Chau Ngünechen. Fill antü ca pun meu elcünuiñ huentru taiñ cuñiutucuaeteu fei engün mu.

10 Huelu quiñeque Judá che feipingün: “Pu cüdaufe* deu nehuen-ngehuelai. Cafei rume fentrelei ti pod ütrüfentungealu. Turpu huiño deumalayafuiñ ti fütra cura malal”.

11 Taiñ pu caiñe feipingün: “Petu tañi quimnon engün ca petu taiñ pengenon, mülepuaiñ quisu engün mu, fei langümafiyiñ. Femngechi catrütuafiyiñ tañi cüdau engün”.

12 Ca cüpalu pu judio mülelu inafül taiñ pu caiñe mu, fentren rupa* feipiqueiñmu: “Fill püle cüpayai che taiñ lefcontuaeteu”.

13 Ti fütra cura malal mu, nag püle, elcünun huentru tañi cuñiutuculeal, elcünufiñ engün cheu ñi doi cuñihun-ngen ca troquiñcünufiñ engün quisuque tañi familia mu. Yenieingün fütra cuchillo, huaiqui* ca arco. 14 Ngüneduamün tañi llicalen engün, feica müten feipimefiñ pu yamfal huentru,* pu caquelu gobernante ca pu caquelu che: “Llicalayafimün engün. Loncontucuafimün ta Chau Jehová, fei alüpüralei ca afmatufalngei. Cafei tamün pu peñi, tamün pu fotüm, tamün pu ñahue ca tamün pu domo ñi duam mu hueichayaimün. Cafei incayafimün tamün ruca”.

15 Taiñ pu caiñe allcüntucuingün iñchiñ taiñ quimniefiel tañi chumal engün ca ngüneduamingün Chau Ngünechen* ñi catrütufiel tañi ayüel. Fei hula com iñchiñ huiño cüdautuiñ ti fütra cura malal mu. 16 Huelu feichi antü, rangiñ tañi pu troquiñ huentru eluhui ñi cüdahual ti fütra cura malal mu ca ti cangelu rangiñ troquiñ huentru yeniefui huaiqui, escudo, arco ca tacun ñi hueichayal. Cafei pu principe quelluntucuquefui com pu Judá che 17 deumamequelu ti fütra cura malal. Pu yenielu fanechi chemcün* quiñe cuhu mu müten cüdahuingün ca tañi cangelu cuhu mu nünieingün quiñe hueichahue. 18 Pu huentru cüdaumequelu yeniefui quiñe fütra cuchillo cintura mu. Ca tañi inafül püle mülefui ti huentru felelu ñi dungulal ti cullcull.

19 Fei feipifiñ pu yamfal huentru, pu caquelu gobernante ca pu caquelu che: “Fentren cüdau mülei ñi femngeal fütra cura malal mu ca fülmaucülelaiñ petu taiñ cüdaumequen. 20 Feimu allcülmün ti cullcull, com cüpayaimün cheu taiñ mülen. Taiñ Chau Ngünechen hueichayai iñchiñ taiñ duam mu”.

21 Hunlu ta tripalu hula huangülen, rangi taiñ troquiñ huentru cüdauquefui ca ti cangelu troquiñ huentru nüniefui huaiqui. 22 Fei hula feipifiñ pu che: “Pu huentru rulpapunpe ponhui Jerusalén mu. Quisuque pu huentru compañayu tañi quelluqueteu. Antü mu cüdahuaingün ca pun mu huelucontu ngüneduamaingün taiñ cuñiutucuaeteu”. 23 Feimu iñche, tañi pu peñi, tañi pu quelluqueteu ca pu hueichafe tañi inanieteu entulafuiñ rume taiñ tacun. Com yeniefuiñ quiñe hueichahue taiñ man cuhu mu.

5 Feichi mu pu huentru ca tañi pu domo rume fütra ngümaingün, fei chaftudungufingün tañi pu judio peñi. 2 Quiñeque che feipingün: “Nieiñ fotüm ca ñahue. Ca com iñchiñ fentren-ngeiñ. Duamnieiñ fillque fün taiñ iyal, femngechi mongeleaiñ”. 3 Caquelu che feipingün: “Nehue ngehuelai iyael, cafei hultucuqueiñ taiñ mapu, taiñ anümca ofad ca taiñ ruca, fei taiñ nierpual fün ca taiñ pengelal taiñ cullial”. 4 Caquelu che ca feipingün: “Taiñ culliafiel impuesto ti lonco ülmen, aretuiñ plata ca hultucuiñ taiñ mapu ca taiñ anümca ofad. Femngechi pengelqueiñ taiñ cullial. 5 Iñchiñ ca taiñ pu peñi quiñe mollfüñ müten-ngeiñ, ca taiñ pu yall* ca femngechi fali quisu engün ñi pu yall mu. Felelu rume, mülei taiñ hultucual taiñ fotüm ca ñahue esclavongealu. Feula mai, quiñeque taiñ pu ñahue deu esclavangei. Huelu caquelu che ngen-ngetui taiñ mapu ca taiñ anümca ofad, feimu chumlayafuiñ rume taiñ femngechi femngenoal”.

6 Allcülu iñche ñi fütra ngüman engün ca tañi feipin, iñche rume illcun.* 7 Raquiduamün tüfachi dungu tañi piuque mu, fei hula dalluntucufiñ pu yamfal huentru* ca pu caquelu gobernante. Feipifiñ engün: “Com eimün feipiquefimün quisu tamün pu peñi tamün doi huiñolelngetual”.

Cafei tañi femün mu engün adcünun quiñe fütra trahun. 8 Feipifiñ: “Taiñ pu judio peñi fendengei ca troquiñche mu, huelu femiyiñ tunte* taiñ pepi femün, fei ngillafiyiñ taiñ pu peñi, femngechi taiñ montulafiel. Feula, ¿eimün fendeaimün tamün pu peñi? ¿Ca iñchiñ huiño ngillapeafuiñ mai engün?”. Allcülu engün tüfa, ñücüfcülehueingün,* quimlaingün chem pial. 9 Ca feipin: “Tamün femmequen, cümelai. Taiñ ayentunoaeteu pu troquiñche, tüfa taiñ pu caiñe, ¿cümenoafulu cai tamün yamnieafiel taiñ Chau Ngünechen? 10 Iñche, tañi pu peñi ca tañi pu quelluqueteu arelqueiñ plata ca fillque fün. Fürenemuiñ, arelhuelayaiñ taiñ doi cofrayal. 11 Fürenemuiñ, fachantü müten huiñoltuaimün ti mapu, anümca ofad, olivo anümca ca tati ruca. Cafei arelqueimün plata, fillque fün, hue pulcu ca aceite ca doi cofraqueimün, huelu com tüfa huiñoltuaimün”.

12 Fei engün feipingün: “Com huiñoltuaiñ ca trafquintulayaiñ chem no rume. Femaiñ com tami feipiel”. Feimu mütrümfiñ* pu sacerdote ca feipifiñ pu culpalu tañi eldungucünual ñi femürpual tañi feipin engün. 13 Feimu mütrohun tañi tacun* ca feipifiñ: “Ca femngechi Chau Ngünechen mütroucayafi ti huentru femürpunolu tañi feipicünun, cafei müntuñmayafi* tañi ruca ca tañi nieel. Femngechi mütroucangepe ca niehuelayai chem no rume”. Allcülu tüfa com ti trahunche feipi: “¡Felepe mai!”. Fei hula püramyefingün ta Chau Jehová. Ca tati pu che femürpui tañi feipicünuel.

14 Cafei, feichi antü tañi gobernadorcünueteu ti lonco ülmen Judá mapu mu, iñche ca tañi pu peñi no rume iquelaiñ chem tañi elungeafel tati gobernador. Tüfa rupai feichi 20 tripantu puulu 32 tripantu ngünenielu ti lonco ülmen Artajerjes. Com tüfa 12 tripantu. 15 Huelu petu tañi mülenon iñche, pu gobernador rume huesalcafi pu che ca fill antü cofrafi 456 gramo* plata ñi nieal cofque ca pulcu. Cafei tañi pu quelluqueteu ca cutrancafingün pu che. Huelu iñche yamniefiñ ta Chau Ngünechen, feimu femlan.

16 Doi mai, iñche ca cüdahun ñi huiño deumangeal ti fütra cura malal.* Com tañi pu quelluqueteu cüdahuingün üyeu ca ngillalaiñ quiñe mapu no rume. 17 Tañi mesa meu iquefui 150 judio che ca pu caquelu gobernante, ca pepaeiñmu pu che caquelu troquiñ mapu mu, fei quiñentrür iquefuiñ. 18 Fill antü pepicalelngefun* 1 toro, 6 doi cümeque ufisa ca achahuall, cafei rupan mu 10 antü elungequefuiñ itrofill fentren pulcu. Huelu iñche pedilan tati iyael felelu ñi elungeafel pu gobernador. Pu che rume cüdauquefui serfiquefulu cai tati lonco ülmen. 19 Ahuem, tañi Chau Ngünechen, com tüfachi dungu femün tati pu che ñi duam mu, feimu raquiduamtucunieen ca cümelcaen.*

6 Fei Sanbalat, Tobías, Guésem, tüfa ti Arabia che, ca caquelu taiñ pu caiñe quimürpuingün iñche ñi huiño deumatufiel ti fütra cura malal* ca tañi ngehuenon chem no rume teifücalelu (huelu petu tuculafun puerta conhue mu). 2 Feica müten Sanbalat engu Guésem feipifaleneu tüfachi huercün dungu: “Cüpange, fei quiñe pichi huaria Onó laf mapu mu* elantücünuaiñ taiñ trahuluhual”. Huelu ayüfuingün tañi huesalcayaeteu. 3 Feimu huercülelfiñ pu huerquen ñi feipiafiel: “Iñche femmequen quiñe falin cüdau. Pepi amulayan. ¿Fentecünupean mai ti cüdau tamu pemeafiel?”. 4 Meli rupa feipifaleneu tüfachi huercün dungu, fei meli rupa ca femngechi huiñoldungulelfiñ.*

5 Fei hula Sanbalat huercüleneu tañi quelluqueteu ñi feipiaeteu feichi dungu ca quiñe rupa, tañi cuhu mu yenierquei quiñe nülalechi carta. 6 Ti carta feipilerquei: “Pu troquiñche mu pu che ca Guésem feipiyauqueingün, eimi ca pu judio che ayüleimün caiñetuafiel ti lonco ülmen. Feimu huiño deumamequeimi ti fütra cura malal. Ca feipingei, eimi lonco ülmen-ngerpuaimi. 7 Cafei dullifimi Chau Ngünechen ñi pu huerquen ñi amual com Jerusalén mu ca ñi huldungual tüfachi dungu eimi mu: ‘¡Judá niei quiñe lonco ülmen!’. Ti lonco ülmen allcüntucuai tüfachi dungu, feimu cüpange, fei nütramcayaiñ tüfachi dungu”.

8 Huelu feipifalfiñ: “Chem rume tami feipiel, rüfngelai tati. Re feipicantumequeimi müten”. 9 Fei engün ayüfuingün taiñ llicalcayaeteu ca feipingün: “Nehuen-ngehuelayaingün,* fei deumanentulayaingün ti cüdau”. Feimu yafültucuen,* tañi Chau Ngünechen.

10 Fei hula pemefiñ Semaya petu ñi rucaconcülen üye mu. Semaya fei ta Delayá ñi fotüm, Mehetabel ñi lacu.* Semaya feipieneu: “Cüpayai che tami langümaeteu, pun meu langümngeaimi, feimu elantücünuayu tayu trahuluhual ponhuitu Chau Ngünechen ñi ruca mu* ca cerracünuayu ti puerta”. 11 Huelu feipin: “Iñche ta gobernador, ¿lefmahuafulu iñche? Iñche tañi femngechi huentrungen mu, conpufuli Chau Ngünechen ñi ruca mu, ¿mongetripapeafun mai? ¡Conpulayan tati!”. 12 Fei hula ngüneduamün Chau Dios ñi huercünofiel ta Semaya. Doi mai, Tobías ca Sanbalat cullirquefui tüfachi huentru ñi feipial tüfachi dungu tañi huesalcayaeteu. 13 Cullingei tañi llicalcayaeteu ca tañi culpayal iñche.* Tañi femün mu engün, cüme che troquingehuelayafun, fei huesa dunguyengeafun.

14 Tañi Chau Ngünechen, acordanieaimi com tüfachi dungu ñi femün Tobías ca Sanbalat. Cafei acordanieaimi chumngechi fentren rupa cüpa llicalcaeneu ti huerquen domo, Noadías pingelu, ca tati pu caquelu huerquen.

15 Af meu, ti 25 antü conchi elul pingechi cüyen mu* deumanentungei ti fütra cura malal 52 antü mu.

16 Taiñ pu caiñe quimingün tüfachi dungu ca pu püllelechi troquiñche peingün chem ñi rupan. Feica müten com yehuelcahuingün,* fei ngüneduamingün taiñ Chau Ngünechen ñi quellun mu deumanentungei ti cüdau. 17 Feichi mu Judá mülechi yamfalque huentru* huercülelquefui ta Tobías fentren carta, fei Tobías huiñoldungueyu. 18 Fentren Judá che feipicünuingün* ñi püntütripanoal* Tobías mu. Tobías chedcuiyefi* ta Secanías, tüfa Ará ñi fotüm. Cafei Tobías ñi fotüm, Jehohanán pingelu, niefi Mesulam ñi ñahue, tüfa Berekías ñi fotüm. 19 Cafei fentren che cüme nütramcaquefeneu Tobías mu, fei hula feipimefingün chem tañi feipin iñche. Fei Tobías huercülelquefeneu carta tañi llicalcayaeteu.

7 Huiño deumanentungelu müten ti fütra cura malal,* tucufiñ puerta. Fei hula dullingei pu cuidaquelu puerta, pu ülcantufe ca pu Leví che. 2 Fei hula Jerusalén mu elfalcünufiñ tañi peñi Hananí. Cafei elfalcünufiñ ta Hananías, tüfa loncolefui ti Nehuen-ngechi Mülehue mu, rume manelfal huentrungefui ca doi yamniequefui* ta Chau Ngünechen caquelu huentru mu. 3 Fei hula feipifiñ engün: “Petu ñi eñumtripanon antü, ngelai ñi nülangeal Jerusalén ñi puerta. Ca pu elfalcülelu ñi cuidayal puerta pun meu mülei ñi cerracünuafiel ca trancayafiel. Cafei elfalcünuafimün pu Jerusalén che tañi cuidayal ti huaria, quiñeque che mülepe cheu ñi müleafel pu cuidaquelu, caquelu che mülepe itrotripa tañi ruca mu”. 4 Jerusalén fütra huaria fel, huelu pichin che müten mülefui ponhuitu. Ca tati fillque ruca huiño deumanentungelafui.

5 Fei hula tañi Chau Ngünechen adnieneu* ñi trahulafiel pu yamfal huentru, pu caquelu gobernante ca tati pu che, fei tañi huirintucual quisuque pu che ñi familia. Cafei pefiñ ti huirintucun pengelquelu pu familia ñi tuhun, tüfa mu mülefui tañi üi pu hune huiñotulu Jerusalén mu. Ti huirintucun feipilei:

6 “Tüfachi pu che tripaingün Babilonia ñi troquiñ mapu mu. Tüfa engün mülefui rangi pu che camapu ñi yeeteu ti lonco ülmen Nabucodonosor. Fei engün huiñotui Jerusalén ca Judá mapu, quisuque tañi huaria mu. 7 Huiñotuingün quiñentrür Zorobabel, Jesúa, Nehemías, Azarías, Raamías, Nahamaní, Mardoqueo, Bilsán, Mispéret, Bigvái, Nehúm ca Baaná.

Raquingelu pu Israel huentru mülerquei: 8 Parós ñi pu cüpanche: 2 mil 172 che, 9 Sefatías ñi pu cüpanche: 372 che, 10 Ará ñi pu cüpanche: 652 che, 11 Pahat-Moab ñi pu cüpanche cüpalu Jesúa ca Joab mu: 2 mil 818 che, 12 Elam ñi pu cüpanche: mil 254 che, 13 Zatú ñi pu cüpanche: 845 che, 14 Zacái ñi pu cüpanche: 760 che, 15 Binuí ñi pu cüpanche: 648 che, 16 Bebái ñi pu cüpanche: 628 che, 17 Azgad ñi pu cüpanche: 2 mil 322 che, 18 Adonicam ñi pu cüpanche: 667 che, 19 Bigvái ñi pu cüpanche: 2 mil 67 che, 20 Adín ñi pu cüpanche: 655 che, 21 Ater ñi pu cüpanche cüpalu Ezequías ñi familia mu: 98 che, 22 Hasum ñi pu cüpanche: 328 che, 23 Bezái ñi pu cüpanche: 324 che, 24 Harif ñi pu cüpanche: 112 che, 25 Gabaón ñi pu cüpanche: 95 che, 26 pu Belén huentru ca pu Netofá huentru: 188 che, 27 pu Anatot huentru: 128 che, 28 pu Bet-Azmávet huentru: 42 che, 29 Quiryat-Jearim, Kefirá ca Beerot ñi pu huentru: 743 che, 30 pu Ramá huentru ca pu Gueba huentru: 621 che, 31 pu Micmás huentru: 122 che, 32 pu Betel huentru ca pu Hai huentru: 123 che, 33 ti cangelu Nebo ñi pu huentru: 52 che, 34 ti cangelu Elam ñi pu huentru: mil 254 che, 35 Harim ñi pu cüpanche: 320 che, 36 pu Jericó huentru: 345 che, 37 Lod, Hadid ca Onó ñi pu huentru: 721 che, 38 ca pu Senaá huentru: 3 mil 930 che.

39 Tüfa tati pu sacerdote huiñotulu: Jedayá ñi pu cüpanche cüpalu Jesúa ñi familia mu: 973 che, 40 Imer ñi pu cüpanche: mil 52 che, 41 Pasjur ñi pu cüpanche: mil 247 che, 42 ca Harim ñi pu cüpanche: mil 17 che.

43 Tüfa tati pu Leví che huiñotulu: Jesúa ñi pu cüpanche tuulu Cadmiel ñi familia mu ca cüpalu Hodevá ñi pu cüpanche mu: 74 che. 44 Tüfa tati pu ülcantufe huiñotulu: Asaf ñi pu cüpanche: 148 che. 45 Tüfa tati pu cuidaquelu puerta huiñotulu: Salum ñi pu fotüm, Ater ñi pu fotüm, Talmón ñi pu fotüm, Acub ñi pu fotüm, Hatitá ñi pu fotüm ca Sobái ñi pu fotüm: com tüfa 138 che.

46 Ca huiñotui tüfachi pu huentru cüdauquelu Chau Ngünechen ñi ruca mu:* Ziha ñi pu fotüm, Hasufá ñi pu fotüm, Tabaot ñi pu fotüm, 47 Querós ñi pu fotüm, Sia ñi pu fotüm, Padón ñi pu fotüm, 48 Lebaná ñi pu fotüm, Hagabá ñi pu fotüm, Salmái ñi pu fotüm, 49 Hanán ñi pu fotüm, Guidel ñi pu fotüm, Gahar ñi pu fotüm, 50 Reayá ñi pu fotüm, Rezín ñi pu fotüm, Necodá ñi pu fotüm, 51 Gazam ñi pu fotüm, Uzá ñi pu fotüm, Paséah ñi pu fotüm, 52 Besái ñi pu fotüm, pu meunim che ñi pu fotüm, Nefusesim ñi pu fotüm, 53 Bacbuc ñi pu fotüm, Hacufá ñi pu fotüm, Harhur ñi pu fotüm, 54 Bazlit ñi pu fotüm, Mehidá ñi pu fotüm, Harsá ñi pu fotüm, 55 Barcos ñi pu fotüm, Sísara ñi pu fotüm, Témah ñi pu fotüm, 56 Nezías ñi pu fotüm ca Hatifá ñi pu fotüm.

57 Ca huiñotuingün ñi fotüm Salomón ñi pu cüdaufe: Sotái ñi pu fotüm, Soféret ñi pu fotüm, Peridá ñi pu fotüm, 58 Jaalá ñi pu fotüm, Darcón ñi pu fotüm, Guidel ñi pu fotüm, 59 Sefatías ñi pu fotüm, Hatil ñi pu fotüm, Pokéret-Hazebaim ñi pu fotüm ca Amón ñi pu fotüm. 60 Com pu cüdauquelu Chau Ngünechen ñi ruca mu* ca tañi fotüm Salomón ñi pu cüdaufe 392 chengefuingün.

61 Ca mülefui che tripalu Tel-Mélah, Tel-Harsá, Kerub, Adón ca Imer meu, huelu pepi pengel-laingün ñi tuhun tañi chau ñi familia cam tañi Israel chengen engün. Mülefui: 62 Delayá ñi pu cüpanche, Tobías ñi pu cüpanche ca Necodá ñi pu cüpanche: 642 che. 63 Cafei pu sacerdote ñi pu fotüm mu mülefui: Habaya ñi pu fotüm, Hacoz ñi pu fotüm ca Barzilái ñi pu fotüm. Tüfachi huentru nierpufi Barzilái ñi ñahue, ti Galaad che, ca nierpui tañi üi tañi domo ñi familia. 64 Tüfa engün quintuingün ti huirintucun tañi pengelal ñi tuhun, huelu pepi pelaingün. Feimu elungelai engün* tañi sacerdotengeal.* 65 Ti gobernador* huercüfi engün ñi inoal iyael huichucünulelngelu Chau Dios, mülele hula quiñe sacerdote ramtufilu Chau Dios Urim ca Tumim meu.

66 Com pu che* huiñotulu 42 mil 360 ngefuingün, 67 cafei 7 mil 337 huentru ca domo esclavongelu, cafei 245 huentru ca domo ülcantuquelu. 68 Niefuingün 736 cahuellu, 245 mula, 69 435 camello ca 6 mil 720 burro.

70 Quiñeque loncolelu familia mu hulingün fillem ñi femngeal ti cüdau. Ti gobernador* huli 8 kilo 400 gramo* oro, 50 tazon ca 530 sacerdote tacun, fei ñi elcünungeal cheu ñi ngülümngequen falinque fillem. 71 Quiñeque loncolelu familia mu hulingün 168 kilo* oro ca mil 254 kilo* plata. Com elcünungei cheu ñi ngülümngequen falinque fillem pünengealu cüdau mu. 72 Caquelu pu che hulingün 168 kilo* oro, mil 140 kilo* plata ca 67 sacerdote tacun.

73 Pu sacerdote, pu Leví che, pu cuidaquelu puerta, pu ülcantufe, quiñeque che, pu cüdauquelu Chau Ngünechen ñi ruca mu* ca caquelu Israel che* mülenagingün quisu tañi huaria mu. Puulu ti 7 cüyen, pu Israel che deu mülenagcülefui quisuque tañi huaria mu”.

8 Fei com pu che quiñe duam mu müten trahuluhui ti plaza mülelu itrotripa Co tañi Conhue püle. Fei feipingei ti huentru huirintucuquelu Chau Ngünechen ñi huirintucun, Esdras pingelu, ñi cüpalal ti lifru nielu Moisés tañi ley, feichi ley Chau Jehová ñi elufiel pu Israel che. 2 Feimu ti hunen antü 7 cüyen mu, ti sacerdote Esdras yefi Moisés tañi ley itrotripa pu huentru ca domo trahulelu ca com pu pepi ngüneduamlu chem tañi allcütuel. 3 Fei nehuentu dungun mu papeltui ti plaza meu itrotripa Co ñi Conhue püle. Hunlu müten, rangiantülu hula papeltui itrotripa pu huentru, pu domo ca com pu pepi ngüneduamlu chem tañi allcütuel. Com che cüme allcütuingün petu papeltungelu ti lifru nielu Moisés tañi ley. 4 Feichi mu deumangei quiñe trafla plataforma, fei mu huitralei Esdras, tati huirintucuquelu Chau Ngünechen ñi huirintucun. Ca tañi man püle mülefui Matitías, Sema, Anaya, Urías, Hilquías ca Maaseya. Ca Esdras tañi huele püle mülefui Pedaya, Misael, Malkiya, Hasum, Has-Badaná, Zacarías ca Mesulam.

5 Esdras huitralefui alüpüralechi mülehue mu, fei nülafi ti lifru com pu che ñi adquiñ mu. Femlu tüfa, com pu che huitrapürai. 6 Fei hula Esdras püramyefi ta Chau Ngünechen Jehová, tati Afmatufalngelu. Fei com pu che feipi: “¡Felepe mai! ¡Felepe mai!”. Cafei huitrañpürami tañi cuhu engün, fei hula lucutunagingün ca pochongnagingün* mapu mu Chau Jehová ñi adquiñ mu. 7 Ca tati pu Leví che fei ta Jesúa, Baní, Serebías, Jamín, Acub, Sabetái, Hodías, Maaseya, Quelitá, Azarías, Jozabad, Hanán ca Pelayá quimeltulelfingün Chau Dios ñi ley tati pu che huitralelu. 8 Nehuentu dungun mu papeltuniefingün ti lifru nielu Chau Dios ñi ley ca cüme quimelelfingün pu che chem ñi cüpa feipin. Femngechi quellufingün pu che ñi adümal chem tañi papeltungequen.

9 Feichi mu Nehemías gobernadorngefui,* Esdras sacerdotengefui ca huirintucuquefui Chau Ngünechen ñi huirintucun. Com pu che petu allcütulu Moisés tañi ley ngümamequefui, feimu Nehemías, Esdras ca pu Leví che quimeltuchequelu feipifingün com pu che: “Fachantü falin antüngei ñi püramyengeal tamün Chau Ngünechen Jehová. Ngümalayaimün ca hueñancülayaimün rume”. 10 Nehemías feipifi engün: “Amumün, iyaimün tati doi cümeque iyael,* pütocoaimün cochi co ca huercülelafimün iyael tati pu nienolu chem no rume. Fachantü falin antüngei ñi püramyengeal taiñ Chau Ngünechen. Chau Jehová mu cüpaquei ayühun, tüfa nehuentucuaimünmu, feimu hueñancülelayaimün”. 11 Fei pu Leví che tüngduamelquefui com pu che. Feipifingün: “Ngümahuelayaimün. Fachantü falin antüngei. Hueñancülelayaimün”. 12 Feimu com pu che amui ñi imeal, ñi pütocoal, ñi huercülelafiel iyael caquelu che ca ñi ayühunquechi cüme rupayal feichi antü. Com engün quimtucuingün feichi dungu tañi quimeltulelngen.

13 Ti 2 antü mu, pu loncolelu familia mu, pu sacerdote ca pu Leví che trahuluhuingün Esdras engün, tüfa tati huirintucuquelu Chau Ngünechen ñi huirintucun. Ayüfuingün ñi doi cüme quimtucual Moisés tañi ley. 14 Ngüneduamingün Moisés tañi ley huirintuculelu ca ngüneduamingün Chau Jehová ñi huercüfiel pu Israel che ñi müleal llamasa mu* petu femngele ti fiesta ti 7 cüyen mu. 15 Cafei huercüngei pu Israel che com huaria püle ca com Jerusalén mu tañi quimeltual ca huldungual: “Amumün mahuidantu mapu mu ca cüpalaimün fütraque rou* entungelu olivo, pino, mirto, palmera ca caquelu fütraque anümca mu. Femngechi deumayaimün llamasa, chumngechi huirintuculei”.

16 Feimu pu che amui ca cüpalingün rou. Huente tañi ruca mu deumaingün llamasa, tañi lepün mu* ca fillque lepün mu Chau Ngünechen tañi ruca mu, ti plaza mülelu Co tañi Conhue mu ca ti plaza mülelu Efraín ñi Conhue mu. 17 Com pu che* camapu yengefulu deumaingün llamasa ca mülenagingün fei mu. Nun ñi fotüm fei ta Josué, tüfachi huentru ñi antü meu puulu feichi antü mu turpu femngequelafui femngechi fiesta. Feimu com pu Israel che rume ayüucülefui. 18 Cafei fill antü papeltungei ti lifru nielu Chau Dios ñi Ley, conlu ti hunen antü puulu hula ti inan antü. Ti fiesta 7 antüi, huelu ti 8 antü mu femingün quiñe yamfal trahun,* chumngechi feipicünungei ñi femal.

9 Feichi 24 antü ti 7 cüyen mu pu Israel che trahuluhuingün. Ngüñüluhuingün, sacu tacun tucutuhuingün ca trufürmai tañi lonco mu engün. 2 Fei hula pu che Israel tuhun-ngelu püntütripaingün* com pu ca cüpanche mu. Fei hula huitrapüraingün ca entudunguingün* quisu tañi culpan* ca tañi pu chau ñi huelulcan. 3 Cheu tañi huitralen engün, 3 hora mu nehuentu dungun mu papeltuingün ti lifru nielu tañi Chau Ngünechen Jehová ñi ley. Cafei, ca 3 hora mu entudunguingün tañi culpan* ca pochongnagingün* tañi Chau Ngünechen Jehová ñi adquiñ mu.

4 Jesúa, Baní, Cadmiel, Sebanías, Buní, Serebías, Baní ca Kenaní püraingün pu Leví che ñi plataforma mu ca nehuentu dungun mu llellipufingün tañi Chau Ngünechen Jehová. 5 Cafei pu Leví che Jesúa, Cadmiel, Baní, Hasabneya, Serebías, Hodías, Sebanías ca Petahías feipingün: “Huitrapüramün ca rumel püramyeafimün tamün Chau Ngünechen Jehová. Ahuem, Chau Ngünechen, püramyengepe tami afmatufal üi. Pu che cümelcayaimu ca püramyeaimu, huelu doicülei tami afmatufal üi.

6 Eimi ca lle müten Chau Jehová. Eimi deumafimi ti huenu, felei, com ti fütra huenu ca com ñi mülen fei mu.* Deumafimi ti mapu ca com ñi mülen fei mu. Deumafimi ti fütra lafquen ca com ñi mülen fei mu. Eimi com mongelniefimi. Com ñi mülen huenu mu* pochongnagquei eimi tami adquiñ mu. 7 Eimi ta Jehová, rüfngechi Ngünechen. Eimi dullifimi ta Abrán, entufimi Ur huaria mu cheu ñi mülen pu Caldea che ca üitucufimi Abrahán. 8 Eimi pefimi tami feyentuqueteu com piuque mu, feimu eldungucünufimi ca feipicünufimi tami eluafiel Abrahán ca tañi cüpanche ti mapu cheu ñi mülequefel pu Canaán che, pu Het che,* pu amorreo che, pu perizita che, pu jebuseo che ca pu guirgaseo che. Eimi nor dungu femqueimi, feimu huechurpuimi tami feipicünuel.

9 Eimi pefimi ñi cutrancaumequen taiñ cuifiqueche Egipto mapu mu ca inaltu Quelü lafquen mu allcüimi ñi huirarmequen engün tañi quellungeal, 10 feimu fentren afmatun dungu femimi tami castigayafiel ti faraon, tañi pu cüdaufe ca com pu che mülelu tañi mapu mu. Quimürpuimi fei engün ñi huesalcafiel taiñ pu cuifiqueche. Fantepu mu quimnieñmangeimi tami üi tami femün mu. 11 Hudamfimi ti lafquen tami pu cüdaufe ñi adquiñ mu, fei rumeingün ancün mapu mu. Chumngechi ütrüftucungei quiñe cura pofolcalechi co meu,* ca femngechi ütrüftucufimi pu inacaquefilu tami pu che alüconchi lafquen mu. 12 Antü mu adniefimi tami pu che tromü meu ca pun meu adniefimi quiñe cütral mu. Femngechi pelontulelfimi tañi rüpü cheu püle ñi amual engün. 13 Nagpaimi Sinaí huincul mu ca huenu meu dungunagümpafimi engün. Elufimi ley dungu ñi nor juzgayal, ley manelfalngelu,* feipin ca cümeque huercün dungu. 14 Quimelelfimi engün ñi yamnieafiel* ti ürcütun antü,* fei ñi huichucünulelafiel Chau Dios. Cafei tami cüdaufe Moisés ñi duam mu elufimi engün huercün dungu, feipin ca ley dungu. 15 Ngüñülelu engün, elufimi huenu cüpachi cofque. Huihulelu engün, entulelfimi co fütra cura mu. Feipifimi engün ñi conpual ti mapu mu tami feipicünufiel engün* ñi ngen-ngetual ca tañi mülenagal.

16 Huelu taiñ pu cuifiqueche mallmahuingün ca trencül piuquecünuhuingün,* fei inahuelaingün tami huercün dungu. 17 Pilaingün tami allcütuaeteu, fei acordalaingün tati afmatun dungu tami femün quisu engün ñi adquiñ mu. Doi mai, trencül piuquecünuhuingün ca üitufingün quiñe loncolelu ñi huiñotual engün Egipto mapu mu tañi esclavongeal. Huelu, eimi, Chau Ngünechen, eluucüleimi tami perdonacheal, duamtuchequeimi ca cutranpiuqueyechequeimi, illcufemquelaimi* ca rume piuqueyechequeimi.* Feimu lle, elcünulafimi engün. 18 Fei deumaingün quiñe pañillhue pichi culliñ,* fei feipimequehuingün: ‘Tüfa tami Dios, tami entueteu Egipto mapu mu’. Fei engün yamquelaeimu, feimu fütra culpaingün. 19 Femlu rume engün, eimi quisucünulafimi huellin mapu mu* fente tami cutranpiuqueyechefengen. Antü mu ti tromü püntütripalai* quisu engün mu ñi adnieafiel rüpü meu. Cafei pun meu rumel mülequefui ti cütral tañi pelontuafiel ti rüpü, cheu püle ñi amual engün. 20 Cafei elufimi tami nehuen* ñi nieal adümuhun engün. Rumel eluquefimi mana ca huihulelu engün, elufimi co. 21 Huellin mapu mu 40 tripantu elufimi iyael. Nierquefuingün com tañi duamnieel. Huesañmaulai tañi tacun ca poñpoñlai* tañi namun.

22 Quellufimi engün ñi huehuafiel pu lonco ülmen ca pu huaria che, cafei hudamcalelfimi ti mapu engün. Feimu mülenagingün ti mapu mu ñi niefel ti lonco ülmen Sehón ca Og pingelu. Sehón fei ta Hesbón ñi lonco ülmen. Og fei ta Basán ñi lonco ülmen. 23 Cafei eimi tami pin mu rume alün-ngerpui tañi pu yall* huenu mülechi huangülen reque. Fei hula yefimi engün ti mapu meu tañi nürpuafel, chumngechi feipicünulelfimi tañi pu cuifiqueche. 24 Feimu tañi pu yall conpuingün ti mapu mu ca mülenagingün tiye mu. Fei engün tañi adquiñ mu, eimi hueufimi pu Canaán che mülefulu feichi mapu mu. Cafei hultucufimi tañi cuhu mu engün pu lonco ülmen ca pu che mülelu feichi mapu mu tañi femafiel chem rume ñi ayüqueel. 25 Nüfingün fillque huaria nielu fütra cura malal* ca cümeque mapu. Cafei ngen-ngetuingün ruca nielu itrofill cümeque chemcün,* deumangeelchi rünganco,* ofad anümca, olivo anümca ca fentren anümca hulquelu fün. Feimu ingün, huedaingün ca motringün. Fente tami cüme piuquengen, cüme felerpuingün.

26 Huelu inahuelaingün tami feipin, caiñetueimu ca famentufingün* tami ley dungu. Langümfingün tami pu huerquen, feichi pu huentru tañi ngülamtueteu ñi huiñotual eimi mu. Fei engün yamquelaeimu, feimu fütra culpaingün. 27 Feimu hultucufimi engün tañi pu caiñe ñi cuhu mu ca huesalcangequefui engün. Huelu, huesa rupamequelu, fei engün llellipueimu tañi quellungeal, ca eimi huenu mu allcüquefuimi engün. Fente tami cutranpiuqueyechequen, eimi eluquefuimi montulchefe, fei ñi montulafiel engün tañi pu caiñe ñi cuhu mu.

28 Huelu cümelcaletulu engün, ca huiño huesa femingün eimi tami adquiñ mu. Feimu eimi hulcünufimi engün tañi pu caiñe ñi cuhu mu, fei tañi ngüneniengeal. Fei hula tüfa engün ca huiño llellipueimu tañi quellungeal, ca eimi fente tami cutranpiuqueyechequen, fentren rupa allcüquefuimi huenu mu ca montulquefuimi. 29 Eimi ngülamtuquefuimi engün tañi huiño inayal eimi tami ley dungu, huelu fei engün mallma piuquengeingün, fei pilaingün ñi allcütual tami huercün dungu. Tami feipin eluquefi ñi mongeleal pu allcütuquelu, huelu inalaingün tami feipin, feimu culpaingün.* Furintucueimu, trencül piuquengeingün ca pilaingün ñi allcütual. 30 Fentren tripantu pengelelfimi engün tami ñom piuquengen, cafei eluquefuimi tami nehuen tami pu huerquen, femngechi ngülamtuchequefuimi, huelu pilaingün ñi allcütual. Fei hula, eimi tami pin mu, pu che mülelu feichi mapu meu ngünenieyu engün. 31 Fente tami cutranpiuqueyechequen, eimi apümcalafimi ca quisucünulafimi engün. Eimi Chau Ngünechen duamtuchequeimi ca cutranpiuqueyechequeimi.

32 Ahuem, taiñ Chau Ngünechen, Fütra Chau Dios, nehuen-ngeimi ca afmatufalngeimi. Eimi huechunentuqueimi tami eldungu ca rüf piuqueyechequeimi.* Feula ngoimalayaimi* com taiñ cutrancahun ca ñi cutrancahun taiñ pu lonco ülmen, taiñ pu principe, taiñ pu sacerdote, taiñ pu huerquen Chau Ngünechen mu cüpalu, taiñ pu cuifiqueche ca com tami pu che mülequefulu petu ngünenielu Asiria ñi pu lonco ülmen ta fantepu mu. 33 Com taiñ rupan iñchiñ, eimi nor piuquengeimi ca nor dungu femqueimi. Iñchiñ mai huesa femqueiñ tati. 34 Taiñ pu lonco ülmen, taiñ pu principe, taiñ pu sacerdote ca taiñ pu cuifiqueche inalaingün tami ley dungu, cafei allcütulaingün tami huercün dungu ca chem tami ngülamtufiel engün. 35 Petu tañi ngünenieteu ñi pu lonco ülmen, eimi fentren cümeque dungu elufimi tati pu che. Elufimi engün ñi müleal quiñe fütra cüme mapu. Huelu fei engün serfihuelaeimu ca elcünulaingün tañi huesaque femün. 36 Feula adquintumuiñ: esclavongeiñ. Felei, esclavongeiñ tati mapu mu tami elufiel taiñ cuifiqueche, fei ñi iyal engün tati cümeque fün ñi hulqueel ti mapu. 37 Huelu com ñi hulquen ti mapu elungequei pu lonco ülmen ca tuhun-ngelu, eimi tami elcünuel iñchiñ mu. Femngechi femimi taiñ culpan* ñi duam mu. Fei engün chumngechi tañi ayüqueel ngünenieiñmu iñchiñ ca taiñ pu culliñ. Rume cutrancauqueiñ.

38 Feimu com tüfachi dungu taiñ rupan mu, feipicünuqueiñ quiñe falin dungu ca huirintucuqueiñ. Cafei taiñ pu principe, taiñ pu Leví che ca taiñ pu sacerdote tucuingün quisu tañi sello* tañi falintuafiel”.

10 Tüfachi pu huentru tucuingün tañi sello ñi falintuafiel tañi feipicünun engün:

9 Ca mülefui tüfachi pu Leví che: Azanías ñi fotüm Jesúa pingelu, Binuí, tüfa quiñe fotüm nielu Henadad, cafei Cadmiel 10 ca tañi pu peñi, tüfa ta Sebanías, Hodías, Quelitá, Pelayá, Hanán, 11 Micá, Rehob, Hasabías, 12 Zacur, Serebías, Sebanías, 13 Hodías, Baní ca Beninú.

14 Ca mülefui pu loncolelu pu che meu: Parós, Pahat-Moab, Elam, Zatú, Baní, 15 Buní, Azgad, Bebái, 16 Adonías, Bigvái, Adín, 17 Ater, Ezequías, Azur, 18 Hodías, Hasum, Bezái, 19 Harif, Anatot, Nebái, 20 Magpías, Mesulam, Hezir, 21 Mesezabel, Sadoc, Jadúa, 22 Pelatías, Hanán, Anaya, 23 Hosea, Hananías, Hasub, 24 Halohés, Pilhá, Sobec, 25 Rehúm, Hasabná, Maaseya, 26 Ahíya, Hanán, Anán, 27 Maluc, Harim ca Baaná.

28 Ca mülefui caquelu pu che, tüfa tati pu sacerdote, pu Leví che, pu cuidaquelu puerta, pu ülcantufe, pu cüdauquelu Chau Ngünechen ñi ruca mu,* cafei com pu che püntüulu* caquelu püllelechi troquiñche mu tañi inayafiel Chau Ngünechen ñi ley, ca compañeyu tañi pu domo, tañi pu fotüm ca tañi pu ñahue, cafei com pu che quimtuculu ca adümuulu ti feipicünun.* 29 Tüfa engün quiñehui tañi pu peñi engün, tati pu falin huentru. Feipicünuingün* ñi inayafiel Chau Ngünechen ñi ley elungelu ta Moisés, tati cüdahuelfilu Chau Ngünechen. Femnoliyiñ, castigamuaiñ, feipifingün Chau Dios. Cafei feipicünuingün ñi cüme inayafiel com ti huercün dungu, ley dungu ca taiñ Ñidol Jehová ñi feipin. Feipingün: 30 “Elulayafiyiñ taiñ pu ñahue ñi niehual tüfachi mapu mülechi troquiñche ñi pu fotüm ca elulayafiyiñ taiñ pu fotüm ñi niehual tañi pu ñahue engün.

31 Cafei tüfachi mapu ñi pu troquiñche cüpale ürcütun antü mu* tañi fendepayal tañi fillque fillem ca itrofill fün quetran, chem no rume ngillañmalayafiyiñ ürcütun antü mu ca chem yamfal antü meu no rume.* Cafei ti 7 tripantu mu cüdaulayafiyiñ ti mapu tañi ürcütual ca rulpacünuaiñ com taiñ defen.

32 Cafei caque quiñeque iñchiñ feipicünuiñ taiñ hulal 4 gramo* plata fill tripantu tañi femngeal fillque cüdau taiñ Chau Ngünechen ñi ruca mu, 33 ñi huelurentrücünungeal cofque,* ñi hulngeal ti fün chalintucun* fill antü, ñi hulngeal tati lüpümngeelchi chalintucun ürcütun antü ca hue cüyen mu, ñi femngeal fillque fiesta, ñi hulngeal yamfal chalintucun, chalintucun culpan dungu mu* rulpacünufilu pu Israel che ñi culpan ca tañi femngeal com ti cüdau taiñ Chau Ngünechen ñi ruca mu.

34 Cafei sortiacünuiñ* ca dullicünuiñ chumül yeaingün mamüll pu loncolelu pu sacerdote ñi familia mu, pu Leví che ca tati pu che, fei engün mülei ñi yeal mamüll fill tripantu taiñ Chau Ngünechen ñi ruca mu. Feichi mamüll lüpümngealu taiñ Chau Ngünechen Jehová ñi altar mu,* chumngechi feipilei Moisés tañi ley. 35 Cafei, fill tripantu yeaiñ Chau Jehová ñi ruca mu tati hunenque fün tripalu taiñ mapu mu ca com taiñ anümca mu. 36 Cafei, chumngechi feipilei Moisés tañi ley, yeaiñ taiñ hunenque fotüm, taiñ culliñ ñi hunenque coñi, taiñ huaca ñi hunenque coñi ca taiñ quechan culliñ ñi hunenque coñi. Com yeafiyiñ taiñ Chau Ngünechen ñi ruca, yelelafiyiñ pu sacerdote cüdauquelu taiñ Chau Ngünechen ñi ruca mu. 37 Cafei, cheu ngülümngequei itrofillem* taiñ Chau Ngünechen ñi ruca mu, yelelafiyiñ pu sacerdote ti hunen rüngo taiñ hunen cosecha meu, taiñ hulün, com anümca ñi fün, ti hue pulcu ca ti aceite. Cafei 10 troquiñ mu hudamcayaiñ com ñi hulqueel taiñ mapu, fei 1 troquiñ* yelelafiyiñ pu Leví che. Tüfa engün elungequefui 1 troquiñ com ñi hulqueel feichi huaria cheu ñi cosechangequen.

38 Cafei 10 troquiñ mu hudamcangele com ñi hulqueel pu che, pu Leví che elungeai 1 troquiñ, ca tati sacerdote, tüfa Aarón ñi fotüm, mülei ñi compañaeteu engün. Fei hula pu Leví che 10 troquiñ mu hudamcayai feichi troquiñ tañi elungeel, fei 1 troquiñ hulaingün taiñ Chau Ngünechen ñi ruca mu, cheu ngülümngequei itrofillem.* 39 Pu Israel che ca pu Leví che ñi pu fotüm mülei ñi yeafiel chem ñi hulquen pu che, tati fün quetran, ti hue pulcu ca ti aceite. Com elcünungepe cheu ngülümngequei itrofillem.* Tüfa mu mülei fillque chemcün* pünengelu Chau Ngünechen ñi ruca mu, mülei pu sacerdote cüdaumequelu, pu cuidaquelu puerta ca pu ülcantufe. Cüme cuidayaiñ taiñ Chau Ngünechen ñi ruca”.

11 Jerusalén mu mülefui pu principe ti troquiñche mu. Huelu pu caquelu che sortiaingün,* femngechi 10 familia meu dullingei 1 familia ñi mülepual ti yamfal huaria* Jerusalén. Ti cangelu 9 familia mülenagai caquelu huaria mu. 2 Cafei pu che ngillatuñmafi pu huentru mülenaglu Jerusalén mu quisu tañi pin mu.

3 Tüfa mu mülei tañi üi pu loncolelu ti troquiñ mapu mülelu Jerusalén mu. (Pu caquelu Israel che, pu sacerdote, pu Leví che, pu cüdauquelu Chau Ngünechen ñi ruca mu* ca pu fotüm ñi nieel Salomón ñi pu cüdaufe mülefuingün Judá ñi fillque huaria, quisuque tañi mapu, tañi huaria mu.

4 Jerusalén mu ca mülefui quiñeque Judá che ca Benjamín che). Judá tañi pu che mu mülefui Ataya, tüfa Uzías ñi fotüm, Zacarías ñi fotüm, Amarías ñi fotüm, Sefatías ñi fotüm, Mahalalel ñi fotüm, tüfa Pérez ñi familia mu cüpai. 5 Ca mülefui Maaseya, tüfa Baruc ñi fotüm, Colhozé ñi fotüm, Hazaya ñi fotüm, Adaya ñi fotüm, Joiarib ñi fotüm, Zacarías ñi fotüm, Selá ñi fotüm. 6 Jerusalén mu mülefui 468 Pérez ñi pu fotüm, com adümuucülefui.

7 Benjamín ñi pu che mu mülefui Salú, tüfa Mesulam ñi fotüm, Joed ñi fotüm, Pedaya ñi fotüm, Colaya ñi fotüm, Maaseya ñi fotüm, Itiel ñi fotüm, Jesayá ñi fotüm. 8 Ca mülefui Gabái ca Salái. Com 928 chengefuingün. 9 Joel, tüfa Zicrí ñi fotüm, loncolei pu che huaria mu, ca inaeyu tañi loncolen Judá, Hasenuá ñi fotüm.

10 Pu sacerdote mu mülefui Jedayá, tüfa Joiarib ñi fotüm. Ca mülefui Jakín ca 11 Seraya, tüfa Hilquías ñi fotüm, Mesulam ñi fotüm, Sadoc ñi fotüm, Merayot ñi fotüm, Ahitub ñi fotüm, tüfa loncolerquei Chau Ngünechen ñi ruca mu.* 12 Ca mülefui Seraya tañi pu peñi cüdauquelu Chau Dios ñi ruca mu. Com 822 chengefuingün. Ca mülefui Adaya, tüfa Jeroham ñi fotüm, Pelalías ñi fotüm, Amzí ñi fotüm, Zacarías ñi fotüm, Pasjur ñi fotüm, Malkiya ñi fotüm. 13 Ca mülefui Adaya ñi pu peñi loncolelu tañi familia mu. Com 242 chengefuingün. Ca mülefui Amashái, tüfa Azarel ñi fotüm, Ahzái ñi fotüm, Mesilemot ñi fotüm, Imer ñi fotüm. 14 Ca mülefui Amashái ñi pu peñi, fei engün llicaquelaingün ca nehuen-ngeingün. Com 128 chengefuingün. Ca Zabdiel, coneltulelu quiñe falin familia mu, loncolei fei engün mu.

15 Pu Leví che mu mülefui Semaya, tüfa Hasub ñi fotüm, Azricam ñi fotüm, Hasabías ñi fotüm, Buní ñi fotüm. 16 Ca mülefui Sabetái ca Jozabad, tüfa engu loncolefui pu Leví che ca adcünuingu ti cüdau femngelu huecuntu Chau Ngünechen ñi ruca mu. 17 Ca mülefui Matanías, tüfa Miqueas ñi fotüm, Zabdí ñi fotüm, Asaf ñi fotüm. Matanías loncolefui pu ülcantufe ca adniefui ti ülcantun petu llellipumequengelu. Ca mülefui Bacbuquías, inalei tañi loncolen tañi pu peñi mu. Ca mülefui Abdá, tüfa Samúa ñi fotüm, Galal ñi fotüm, Jedutún ñi fotüm. 18 Pu Leví che mülelu ti yamfal huaria mu 284 chengefuingün.

19 Tati pu cuidaquelu puerta fei ta Acub, Talmón ca tañi pu peñi. Tüfa engün ngüneduamquefui fillque puerta. Fei 172 chengefuingün.

20 Caquelu pu Israel che, pu sacerdote ca pu Leví che mülefui caquelu fillque huaria Judá mu, quisuque mülefui tañi mapu mu tañi elungeel. 21 Pu cüdauquelu Chau Ngünechen ñi ruca mu* mülefuingün Ofel mu. Cafei Ziha ca Guispá loncolefui tati pu cüdauquelu Chau Ngünechen ñi ruca mu.

22 Uzí loncolefui pu Leví che Jerusalén huaria mu. Uzí, tüfa Baní ñi fotüm, Hasabías ñi fotüm, Matanías ñi fotüm, Micá ñi fotüm, tüfa Asaf ñi familia mu tuhui, pu ülcantufe. Uzí adniefi ti cüdau femngelu Chau Ngünechen ñi ruca mu. 23 Feichi mu inangequefui quiñe huercün dungu entulu ti lonco ülmen tañi fürenengeal pu ülcantufe, fei fill antü elungequefui engün com tañi duamnieel. 24 Cafei Petahías ngülamtuquefui ti lonco ülmen chumngechi tañi ngünenieafiel pu che. Petahías fei ta Mesezabel ñi fotüm, Zérah ñi familia mu tuhui, Judá ñi fotüm.

25 Cafei lelfün mu mülefui pichique huaria. Fei quiñeque Judá che mülefui Quiryat-Arbá mu ca tañi püllelechi huaria, Dibón ca tañi püllelechi huaria, Jecabzeel ca tañi püllelechi huaria, 26 Jesúa, Moladá, Bet-Pélet, 27 Hazar-Sual, Beer-Seba ca tañi püllelechi huaria, 28 Ziclag, Meconá ca tañi püllelechi huaria, 29 En-Rimón, Zorá, Jarmut, 30 Zanóah, Adulam ca tañi pichique huaria, Lakís ca tañi lelfün, Azecá ca tañi püllelechi huaria. Mülenagingün* feichi mapu meu mülelu Beer-Seba puulu Hinón laf mapu mu.*

31 Pu Benjamín che mülefui Gueba mu, Micmash, Aya, Betel ca tañi püllelechi huaria, 32 Anatot, Nob, Ananíah, 33 Hazor, Ramá, Guitaim, 34 Hadid, Zeboím, Nebalat, 35 Lod ca Onó, tüfa pu artesano ñi laf mapu.* 36 Cafei quiñeque Leví troquiñche Judá mu tuulu mülenagingün Benjamín ñi mapu mu.

12 Mülefui pu sacerdote ca pu Leví che compañfilu ta Zorobabel ca Jesúa. Zorobabel fei ta Sealtiel ñi fotüm. Tüfa tañi üi engün: Seraya, Jeremías, Esdras, 2 Amarías, Maluc, Hatús, 3 Secanías, Rehúm, Meremot, 4 Idó, Guinetói, Abías, 5 Mijamín, Maadías, Bilgá, 6 Semaya, Joiarib, Jedayá, 7 Salú, Amoc, Hilquías ca Jedayá. Tüfa engün loncolefui pu sacerdote ca tañi pu peñi, Jesúa ñi antü mu.

8 Ca amui tüfachi pu Leví che: Jesúa, Binuí, Cadmiel, Serebías, Judá ca Matanías. Tüfa quiñentrür tañi pu peñi engün ülcantuquefuingün ñi mañumafiel Chau Dios, ca Matanías adniequefui ti ül. 9 Ca tañi pu peñi Bacbuquías ca Uní itrotripa fei engün mu mülefuingu ca cuidaquefuingu Chau Dios ñi ruca. 10 Jesúa fei ta Joiaquim ñi chau, Joiaquim fei ta Eliasib ñi chau, Eliasib fei ta Joiadá ñi chau, 11 Joiadá fei ta Jonatán ñi chau, ca Jonatán fei ta Jadúa ñi chau.

12 Joiaquim ñi antü mu mülefui tüfachi pu sacerdote, loncolelu tañi familia mu: Seraya ñi familia mu loncolei Meraya, Jeremías ñi familia mu loncolei Hananías, 13 Esdras ñi familia mu loncolei Mesulam, Amarías ñi familia mu loncolei Jehohanán, 14 Malukí ñi familia mu loncolei Jonatán, Sebanías ñi familia mu loncolei José, 15 Harim ñi familia mu loncolei Adná, Merayot ñi familia mu loncolei Helcái, 16 Idó ñi familia mu loncolei Zacarías, Guinetón ñi familia mu loncolei Mesulam, 17 Abías ñi familia mu loncolei Zicrí, Miniamín ñi familia mu loncolei [?],* Moadías ñi familia mu loncolei Piltái, 18 Bilgá ñi familia mu loncolei Samúa, Semaya ñi familia mu loncolei Jehonatán, 19 Joiarib ñi familia mu loncolei Matenái, Jedayá ñi familia mu loncolei Uzí, 20 Salái ñi familia mu loncolei Calái, Amoc ñi familia mu loncolei Éber, 21 Hilquías ñi familia mu loncolei Hasabías, ca Jedayá ñi familia mu loncolei Netanel.

22 Eliasib, Joiadá, Johanán ca Jadúa ñi antü mu huirintucungei tañi üi pu loncolelu pu Leví che ñi familia mu ca tati pu sacerdote. Femngechi femngei ngünenierpulu hula Darío, ti Persia huentru.

23 Ti lifru nielu chem ñi rupan feichi mu huirintucungei tañi üi pu Leví che loncolelu tañi familia mu. Huirintucungei engün puulu hula Johanán ñi antü, tüfa Eliasib ñi fotüm. 24 Hasabías, Serebías ca Jesúa, tüfa Cadmiel ñi fotüm, loncolefui pu Leví che meu. Ca tañi adquiñ mu tañi pu peñi püramyefingün ca mañumfingün ta Chau Dios. Inaquefuingün ñi feipin David, tüfa Chau Ngünechen ñi huerquen. Fei quiñe troquiñ cuidaquelu puerta mülefui inafül cangelu troquiñ cuidaquelu puerta. 25 Matanías, Bacbuquías, Abdías, Mesulam, Talmón ca Acub cuidaquefuingün puerta, ngüneduamquefuingün ti mülehue cheu ngülümngequei itrofillem. Tüfa mülefui inafül puerta Chau Ngünechen ñi ruca mu.* 26 Fei engün cüdauquefui Joiaquim, Nehemías ca Esdras ñi antü mu. Joiaquim fei ta Jesúa ñi fotüm, Jozadac ñi lacu.* Nehemías gobernadorngefui. Fei Esdras sacerdotengefui ca huirintucuquefui Chau Ngünechen ñi huirintucun.

27 Tañi fiestayal ñi deumanentun Jerusalén ñi fütra cura malal,* pu che huall püle yemefingün pu Leví che, cheu tañi mülen engün. Jerusalén mu cüpalfingün ñi ayühunquechi fiestayal ñi deumanentun ti fütra cura malal, ülcantuingün ñi mañumafiel Chau Dios, dungulingün cimbalo,* dungulhue* nielu cuerda ca arpa. 28 Ca trahuluhuingün pu ülcantufe ñi pu fotüm.* Fei engün cüpai ti troquiñ mapu meu,* huall püle Jerusalén mu, pu Netofá che ñi pichique huaria, 29 Bet-Guilgal, cafei Gueba ca Azmávet ñi lelfün mu. Feichi mu pu ülcantufe deumafuingün pichique huaria huall püle Jerusalén mu. 30 Pu sacerdote ca pu Leví che liftuhuingün, cafei liftufingün pu che, fillque puerta ca tati fütra cura malal.

31 Fei hula feipifiñ Judá ñi pu principe ñi pürayal ti fütra cura malal mu. Cafei adcünun 2 fütra troquiñ ülcantufe ñi mañumafiel Chau Dios ca quisuque troquiñ inaeyu 1 troquiñche. Quiñe troquiñ ülcantufe man püle amui ca amulei ñi trecalen huente ti fütra cura malal mu, amuleingün ti Conhue Cheu Trapümngequei Trufquen. 32 Ca inaeyu engün Hosaya ca rangi Judá ñi pu principe, 33 cafei Azarías, Esdras, Mesulam, 34 Judá, Benjamín, Semaya ca Jeremías. 35 Ca compañeyu engün quiñeque sacerdote ñi pu fotüm yenielu trompeta. Amui Zacarías, tüfa ta Jonatán ñi fotüm, Semaya ñi fotüm, Matanías ñi fotüm, Micaya ñi fotüm, Zacur ñi fotüm, Asaf ñi fotüm. 36 Ca amui tañi pu peñi Semaya, Azarel, Milalái, Guilalái, Maái, Netanel, Judá ca Hananí. Tüfa engün yeniefui David ñi dungulhue, tüfa ta Chau Ngünechen ñi huerquen. Ca Esdras, tati huirintucuquelu Chau Ngünechen ñi huirintucun, hunelefui quisu engün mu. 37 Cafei Rünganco* ñi Conhue mu amuleingün itrotripa ti Escalera mülelu David ñi Huaria mu, rupaingün cheu ñi püralen ti fütra cura malal, ca doi üyeu David tañi ruca mu amuleingün, fei puhuingün Co tañi Conhue mu, tripahue antü püle.

38 Ti cangelu troquiñ ülcantufe elfalcünungelu ñi mañumafiel Chau Dios amui huele püle. Ca iñche quiñentrür ti cangelu rangiñ troquiñche inaniefiyiñ, huente ti fütra cura malal. Rupaingün Horno Adquintuhue püle, amuleingün Alürupachi Fütra Cura Malal mu, 39 rupaingün Efraín ñi Conhue püle, amuleingün ti Cuifi Huaria ñi Conhue mu, ti Challhua ñi Conhue, Hananel Adquintuhue ca Meá Adquintuhue püle. Fei hula amuleingün ti Ufisa ñi Conhue mu ca puhuingün pu Soltau ñi Conhue püle. Tiye mu huitracünuhuingün.

40 Af meu, ti 2 troquiñ ülcantufe elfalcünungelu ñi mañumal huitracünuhuingün itrotripa Chau Ngünechen ñi ruca mu. Cafei iñche ca tati rangiñ caquelu gobernante tañi compañeteu ca huitracünuhuiyiñ. 41 Ca huitracünuhui pu sacerdote yenielu trompeta, tüfa ta Eliaquim, Maaseya, Miniamín, Micaya, Elioenái, Zacarías ca Hananías, 42 cafei Maaseya, Semaya, Eleazar, Uzí, Jehohanán, Malkiya, Elam ca Ézer. Ca tati pu ülcantufe nehuentu ülcantuingün, fei Izrahías adnieyu engün.

43 Feichi antü pu che huli fentren chalintucun* ca rume ayüucülefuingün. Chau Ngünechen elueyu engün ñi rume ayüucüleal. Cafei pu domo ca pu pichiqueche rume ayüucülerquei. Camapu allcün-ngei fente tañi ayüucülen pu che Jerusalén mu.

44 Feichi antü dullingei che ca elfalcünulelngei tati mülehue cheu ngülümngequei ñi hulün pu che, ti hunenque fün ca tati diezmo.* Tiye mu mülefui ñi ngülümngeal feiti troquiñ cosechangelu pu huaria tañi lelfün mu. Feichi fün elungequefui pu sacerdote ca pu Leví che, chumngechi feipilei Moisés tañi ley. Com pu Judá che ayüucülerquei pu sacerdote ca pu Leví che ñi cüdau mu. 45 Fei engün eluhuingün ñi huechunentual tañi cüdau ñi serfiafiel ta Chau Ngünechen ca tañi liftuafiel com pu che, chumngechi femi pu ülcantufe ca pu cuidaquelu puerta. Tüfa tañi huercüel David ca tañi fotüm Salomón. 46 Cuifi, David ca Asaf ñi antü meu mülequefui huentru adniequefilu pu ülcantufe ca tati fillque ülcantun ñi püramyeafiel ca mañumafiel ta Chau Dios. 47 Fei Zorobabel ca Nehemías ñi antü mu, com pu Israel che hulquefui chem tañi elungeafel pu ülcantufe ca pu cuidaquelu puerta, tunte* tañi duamnieel fill antü. Pu Israel che ca hulquefui chem tañi elungeafel pu Leví che, fei pu Leví che ca hulquefui chem tañi elungeafel Aarón ñi pu cüpanche.

13 Feichi antü mu papeltulelngei pu che Moisés ñi lifru. Ngüneduamingün ñi feipilen ti lifru pu Ammón che ca pu Moab che mu, ngelafui ñi coneltual Chau Ngünechen ñi troquiñche mu. 2 Tüfa engün elulafi pu Israel che co ca cofque. Huelu mai cullifingün ta Balaam tañi malisiayafiel engün. Feimu taiñ Chau Ngünechen huelucünufi feichi malisian dungu tañi cümelcayafiel pu Israel che. 3 Pu che allcülu Moisés ñi ley, feica müten pu Israel che meu püntünentungei* pu ca cüpanche.

4 Petu ñi rupanon tüfa, ti sacerdote Eliasib elfalcünungei cheu ñi ngülümngequen itrofillem* Chau Dios ñi ruca mu.* Eliasib fei ta Tobías ñi pariente. 5 Eliasib deu elufi ta Tobías quiñe fütra pieza cheu ngülümngequei itrofillem.* Tiye mu elcünungequefui cuifi ti fün chalintucun,* ti olibano* ca fillque chemcün.* Cafei 10 troquiñ mu hudamngequefui ti fün, ti hue pulcu ca ti aceite, fei 1 troquiñ* elungequefui pu Leví che, pu ülcantufe ca pu cuidaquelu puerta, fei elcünungequefui tüfachi fütra pieza mu. Tüfa mu ca elcünungequefui chem tañi elungeel pu sacerdote.

6 Artajerjes yenielu 32 tripantu tañi ngüneniefiel Babilonia, iñche huiñotun cheu ñi mülen ti lonco ülmen, feimu iñche mülelafun Jerusalén feichi mu. Huelu rupalu ta antü, eluafen* tañi amutual pifiñ ti lonco ülmen. 7 Fei hula huiñotun Jerusalén mu ca ngüneduamün ñi rume huesa femün Eliasib tañi cüme duamelafiel ta Tobías: lepün püle* Chau Ngünechen ñi ruca mu Eliasib deu elufi ta Tobías quiñe pieza cheu ñi ngülümal itrofillem. 8 Tüfa illculcaeneu,* feimu ti pieza cheu ngülümngequei itrofillem* entufiñ com Tobías ñi chemcün,* ütrüfentufiñ. 9 Fei hula feipin ñi liftungeal ti pieza cheu ngülümngequei itrofillem,* ca tiye mu huiño elcünufiñ fillque chemcün pünengelu Chau Ngünechen ñi ruca mu, ti fün chalintucun ca ti olibano.

10 Ca quimürpun pu Leví che ñi elungenon chem tañi llohuafel. Feimu pu Leví che ca pu ülcantufe cüdauquefulu tiye mu amutuingün, quisuque tañi lelfün mu. 11 Feimu norümtufiñ pu caquelu gobernante ca feipifiñ: “¿Chumngelu* cuidangequelai Chau Ngünechen ñi ruca?”. Fei hula trahulfiñ pu amutulu ca feipifiñ ñi huiño femal tañi cüdau. 12 Cafei com pu Judá che 10 troquiñ mu hudami ti fün, ti hue pulcu ca ti aceite, fei 1 troquiñ yefingün ti pieza mu cheu ngülümngequei itrofillem. 13 Fei hula dullifiñ ta Selemías, Sadoc ca Pedaya ñi loncoleal ti pieza cheu ngülümngequei itrofillem. Selemías sacerdotengefui. Sadoc huirintucuquefui Chau Dios ñi huirintucun. Pedaya Leví chengefui. Ca quellueyu engün Hanán, feita Zacur ñi fotüm, Matanías ñi fotüm. Com engün manelfal huentrungefui. Fei engün elfalcünulelngei ñi eluafiel quisuque tañi pu peñi chem tañi llohuafel.

14 Fei llellipun: “Tañi Chau Ngünechen, rumel raquiduamtucunieen tañi femün mu. Iñche rume piuqueyeyu,* falintuquefiñ tami ruca ca fillque cüdau femngequelu tiye mu.* Loncontucunieaimi ta tüfa”.

15 Feichi mu ngüneduamün ürcütun antü mu* pu che pünocaquefui ofad cheu deumangequei pulcu. Cafei pu che ngülümquefui fün quetran ca püramquefuingün burro mu. Cafei Jerusalén mu cüpalquefuingün pulcu, ofad, higo ca itrofill fün ürcütun antü. Feimu feipifiñ engün ñi fendehuenoal chem no rume feichi antü mu.* 16 Cafei pu Tiro che mülelu huaria mu cüpalquefui challhua ca itrofillem ñi negociayal, fei fendelelfuingün pu Judá che. Jerusalén mu femingün ürcütun antü mu. 17 Feimu norümtufiñ pu Judá yamfal huentru* ca feipifiñ: “¿Chumngelu eluhuimün tamün huesa femal? ¡Yamlafimün ti ürcütun antü! 18 Femngechi femi tamün cuifiqueche yem, feimu taiñ Chau Ngünechen huercüleiñmu iñchiñ ca ti huaria com tüfachi huesaque dungu. ¿Feula mai eluhuimün tamün yamhuenoafiel ti ürcütun antü? ¿Ayüniepeimün mai Chau Dios ñi doi illcutuafiel pu Israel che?”.

19 Feimu petu tañi dumiñnagnon, feipin ñi cerrantucungeal Jerusalén ñi puerta, petu ñi acunon ti ürcütun antü. Ca feipin ñi nülangenoal afle hula ti ürcütun antü. Cafei elcünun quiñeque huentru tañi quelluqueteu ñi ngüneduamafiel ti puerta, femngechi ñi cüpalngenoal chem no rume tañi negociayal ürcütun antü mu. 20 Feimu pu negociaquelu ca fendequelu itrofillem quiñe cam epu rupa rulpapuningün huecuntu Jerusalén huaria mu. 21 Feimu feipifiñ engün: “¿Chummequeimün fau? Ca huiño umalmün itrotripa ti fütra cura malal mu,* huemünentuhuaiñ”.* Feica müten cüpahuelaingün ürcütun antü mu.

22 Ca feipifiñ pu Leví che ñi rumel liftuucüleal ca tañi cuidapayal fillque puerta ñi yamniengeal ti ürcütun antü. Fei llellipun: “Ahuem, tañi Chau Ngünechen, ca acordanieaimi tüfachi dungu ca füreneen. Eimi rume piuqueyechequeimi,* feimu cutranpiuqueyeen”.

23 Feichi mu ca ngüneduamün quiñeque judio huentru ñi niefiel* domo Asdod, Ammón ca Moab tuhun-ngelu. 24 Rangiñ tañi pu yall* dunguquefui Asdod quehun ca ti cangelu troquiñ dunguquefui caquelu troquiñche ñi quehun dungun mu, huelu quiñe tañi pu yall no rume dunguquelafui judio quehun dungun mu. 25 Feimu norümtufiñ feichi pu judio ca feipifiñ Chau Dios tañi castigayaeteu, hulelfiñ quiñeque huentru ca ngedunentuñmafiñ* tañi cal lonco.* Ca feipifiñ engün ñi eldungucünual Chau Dios ñi üi mu. Feipifiñ: “Elulayafimün tamün pu ñahue ñi niehual tañi pu fotüm engün. Cafei elulayafimün tamün pu fotüm ñi niehual tañi pu ñahue engün. Eimün ca nielayafimün feichi pu domo. 26 Tüfachi dungu mu culpai* Salomón, Israel ñi lonco ülmen, ¿felelai am? Fentren troquiñche mu ngelafui quiñe lonco ülmen Salomón reque. Tañi Chau Ngünechen piuqueyeyu, feimu lonco ülmencünueyu com Israel mu. Felelu rume, Salomón culpai tañi pu ca cüpanche domo ñi duam mu. 27 Raquiduamlafun rume tamün conün tüfachi rume huesa femün mu. Niefimün ca cüpanche domo. ¿Chemu feyentuquelafimün taiñ Chau Ngünechen?”.

28 Ca quiñe fotüm ñi nieel Joiadá, ti hunen lonco sacerdote Eliasib ñi lacu,* chedcuiyefi ta Sanbalat, ti Bet-Horón che. Feimu püntünentufiñ* tañi adquiñ mu.

29 Fei llellipun: “Tañi Chau Ngünechen, acordanieaimi tañi femün engün. Femngechi femlu engün, podümfingün pu sacerdote ñi cüdau ca chem ñi eldungucünuel pu sacerdote ca pu Leví che”.

30 Iñche liftufiñ tati pu che ñi femhuenoal pu ca cüpanche ñi huesa femün. Cafei adcünufiñ pu sacerdote ca pu Leví che ñi cüdau, quisuque engün chumngechi ñi cüdauquen. 31 Cafei com adcünun ñi rumel cüpalngeal mamüll ca hunenque fün.

Fei llellipun: “Tañi Chau Ngünechen, raquiduamtucunieen ca cümelcaen”.*