AGEO

1 Zorobabel fei ta Sealtiel ñi fotüm ca gobernadorcülerquei* Judá mu. Josué fei ta Jehozadac ñi fotüm ca hunen lonco sacerdotelerquei. Ti lonco ülmen Darío yenielu 2 tripantu tañi ngünenieel, feiti hunen antü ti 6 cüyen mu, Zorobabel ca Josué llohuingu Chau Jehová ñi dungun, tüfa tañi feipieteu Ageo,* Chau Ngünechen ñi huerquen. Feipingei engu:

2 “Tüfa ñi feipin Chau Jehová, Ñidolcülelu pu hueichafe mu:* ‘Tüfachi troquiñche feipi: “Petu aculai chi antü ñi deumangetual* Chau Jehová ñi ruca”’”.*

3 Fei Chau Ngünechen ñi huerquen, Ageo pingelu, ca huiño huli Chau Jehová ñi dungun. Fei feipi: 4 “Tüfachi ruca teifücalei, feimu ¿cümepei mai tamün mülen cümeque ruca deumangelu adngechi* trafla meu? 5 Feimu, tüfa tañi feipin Chau Jehová, Ñidolcülelu pu hueichafe mu: ‘Cüme raquiduammün* tamün femmequen mu. 6 Fentren nganqueimün, huelu pichin cosechaqueimün. Iqueimün, huelu huedaquelaimün. Pütocoqueimün, huelu tuhuihuquelaimün. Tucutuimün tacun, huelu eñumauquelaimün. Cafei tati cüdauquelu ngülümquei tañi cullin quiñe huechod carpa mu’”.

7 “Tüfa tañi feipin Chau Jehová, Ñidolcülelu pu hueichafe mu: ‘Cüme raquiduammün* tamün femmequen mu’.

8 ‘Püramün mahuida mu, yeaimün mamüll, fei deumayaimün iñche tañi ruca tañi ayühulngeal ca püramyengeal’ feipi Chau Jehová.

9 Iñche, Chau Jehová, Ñidolcülelu pu hueichafe mu, feipihuiyiñ: ‘Üngümniefuimün* fentren cosecha, huelu pichin llohuimün. Fei yefilu ti cosecha tamün ruca mu, pimucünufiñ, fei mülehuetulai. ¿Chumngelu?* Iñche tañi ruca teifücalehuei, huelu eimün cüdaumequeimün müten tamün ruca mu. 10 Feimu ti huenu hulhuelai tañi ilhuen* ca ti mapu hulhuelai tañi fün. 11 Iñche tañi pin mu ancüquei tamün mapu ca tamün mahuida. Fei mülehuelai fillque fün, pulcu, aceite ca com huefquelu mapu meu. Feimu eimün ca tamün pu culliñ cutrancaumequeimün. Ngünam cüdaumequeimün tati’”.

12 Zorobabel fei ta Sealtiel tañi fotüm. Josué fei ta Jehozadac tañi fotüm ca hunen lonco sacerdotengefui. Tüfa engu ca com caquelu pu che allcütuñmafingün tañi Chau Ngünechen Jehová ca tañi huerquen Ageo ñi dungun. Chau Jehová huercüeyu. Fei ti troquiñche eluhui ñi yamnieafiel* ta Chau Jehová.

13 Feimu Ageo, Chau Jehová tañi huerquen, chumngechi tañi huercüeteu Jehová, feipifi ti troquiñche: “‘Iñche eimün mu mülen’ feipi ta Chau Jehová”.

14 Femngechi Chau Jehová yafültucufi ta Zorobabel, Josué ca ti troquiñche. Zorobabel gobernadorcülerquei Judá mu, feita Sealtiel tañi fotüm. Josué hunen lonco sacerdotelerquei, feita Jehozadac tañi fotüm. Tüfa engün eluhuingün ñi cüdahual tañi Chau Jehová ñi ruca mu, Ñidolcülelu pu hueichafe mu. 15 Tüfa rupai 24 antü conchi 6 cüyen meu, ti lonco ülmen Darío yenielu 2 tripantu tañi ngünenieel.

2 Ti 21 antü conchi 7 cüyen mu, Ageo, Chau Ngünechen ñi huerquen, llohui Chau Jehová ñi dungun. Feipingei: 2 “Füreneen, dunguafimi ta Zorobabel, Josué ca tati pu che. Zorobabel, tüfa Sealtiel ñi fotüm ca gobernadorcülei Judá mu. Josué, tüfa Jehozadac ñi fotüm ca hunen lonco sacerdotengei. Ramtuafimi engün: 3 ‘Eimün mu, ¿inei pefui fente tañi afmatufalngen tüfachi ruca* cuifi? Feula cai, ¿chumngentufimün? ¿Trürümngepeafui mai ñi chumlequefel cuifi?’.

4 Chau Jehová feipi: ‘Nehuencülenge feula, Zorobabel. Cafei nehuencülenge Josué, ti hunen lonco sacerdote, Jehozadac ñi fotüm’.

Chau Jehová ca feipi: ‘Nehuencülemün com eimün pu mülelu tüfachi mapu mu ca cüdaucülemün’.

‘Iñche eimün mu mülen’ feipi Jehová, Ñidolcülelu pu hueichafe mu.* 5 ‘Acordamün chem ñi feipicünufiel ta eimün tripalu Egipto mapu mu. Iñche petu adniehuiyiñ tañi nehuen mu, feimu ngelai tamün llicayal’”.

6 “Tüfa tañi feipin Chau Jehová, Ñidolcülelu pu hueichafe mu: ‘Pichin antü mu, ca quiñe rupa mütroucayafiñ ti huenu, ti mapu, ti lafquen ca ti anquen mapu’.

7 ‘Mütroucayafiñ com pu troquiñche, fei com troquiñche ñi falinque dungu conpuai tüfachi ruca mu. Iñche tañi pin mu afmatufalngeai’ feipi Chau Jehová, Ñidolcülelu pu hueichafe mu.

8 ‘Iñche ngen-ngen ti plata ca ti oro’ feipi Jehová, Ñidolcülelu pu hueichafe mu.

9 ‘Cüpalechi antü mu tüfachi ruca doi afmatufalngeai ti cuifi ruca mu’ feipi Chau Jehová, Ñidolcülelu pu hueichafe mu.

‘Tüfa mu eluhuaiñ cüme felen’ feipi Chau Jehová, Ñidolcülelu pu hueichafe mu”.

10 Ti 24 antü conchi 9 cüyen mu, Darío yenielu 2 tripantu tañi ngünenieel, Ageo, Chau Ngünechen ñi huerquen, llohui Chau Jehová ñi dungun. Feipingei: 11 “Tüfa tañi feipin Jehová, Ñidolcülelu pu hueichafe mu: ‘Füreneen, ti ley dungu mu ramtuafimi pu sacerdote tüfachi dungu: 12 “Quiñe huentru yeniei tañi tacun mu ilo püntücünulelngealu* Chau Dios, huelu ti tacun topantucufile cofque, corü, pulcu, aceite ca chem caquelu iyael rume, ¿lifcülepeai mai chem tañi topantucufiel?”’”.

Pu sacerdote huiñoldunguingün:* “¡Femlayai!”.

13 Fei hula Ageo ramtueyu engün: “Inei rume topantucufile quiñe la,* lifngehuelayai. Feimu feichi che topantucufile chem iyael rume, ¿podümngepeai mai chem tañi topafiel?”.

Pu sacerdote huiñoldunguingün: “Femai llemai”.

14 Feimu Ageo feipi: “Chau Jehová feipi: ‘Iñche tañi adquiñ mu femngechi felei tüfachi pu che, femngechi felei tüfachi troquiñche, femngechi felei com tañi femquen engün quisu tañi cuhu mu. Com tañi chalintucuquen engün tiye mu podcülei tati’.

15 ‘Huelu fürenemuchi, feula ca rumel mu cüme raquiduamcülemün* tüfachi dungu: petu ñi rentrücünungenon cura Jehová tañi ruca mu, 16 ¿chem rupaquefui? Quiñe che amuquefui cheu ñi trapümngequen fün ñi peal 20 sacu fün, huelu 10 müten mülerquei. Cafei quiñe che amuquefui cheu ñi pünongequen ofad tañi entual 50 metahue pulcu, huelu 20 müten mülerquei. 17 Huesalcañmahuiyiñ com tamün femquen, huercüleluhuiyiñ are cürüf, cutran anümca mu ca pire,* huelu quiñe no rume eimün mu huiñotulai iñche mu’ pi Chau Jehová.

18 ‘Fürenemuchi, cüme raquiduamaimün* ta tüfa. Fachantü 24 antü conchi 9 cüyen mu, anümcünungei Jehová ñi ruca. Fachantü ca rumel mu piuquentucunieaimün ta tüfa. 19 Cheu tañi ngülümngequen fün, ¿petu mülepei mai fün? Ti anümca ofad, ti higuera, ti granado ca ti olivo... petu hul-lai tañi fün, ¿felelai am? Huelu fachantü ca rumel mu cümelcahuaiñ’”.

20 Ti 24 antü conchi 9 cüyen mu, Ageo ca quiñe rupa llohui Chau Jehová ñi dungun. Feipingei: 21 “Feipiafimi ta Zorobabel, ti gobernadorcülelu Judá mu: ‘Mütroucayafiñ ti huenu ca ti mapu. 22 Apümcayafiñ pu lonco ülmen ñi ülmenque huancu ca müntuñmayafiñ* tañi nehuen pu troquiñche ñi ngünenieel. Apümcayafiñ pu carretela* ca tañi pu adnieteu, apümcayafiñ pu cahuellu ca pu püracahuellulelu. Hueluquentu langümuhuaingün fütra cuchillo mu’”.

23 “Jehová, Ñidolcülelu pu hueichafe mu feipi: ‘Feichi antü adnieayu Zorobabel, iñche tañi cüdaufe, Sealtiel tañi fotüm’. Chau Jehová ca feipi: ‘Iñche dullieyu, feimu iñche tañi pin mu falin yihul cuhu reque* feleaimi’ feipi Jehová, Ñidolcülelu pu hueichafe mu”.