EFESIOS

1 Iñche ta Pablo, Chau Ngünechen ñi duam mu Cristo Jesús tañi apostolngen iñche.* Huirintuculelfiñ tüfachi carta ta Chau Ngünechen ñi pu che* Éfeso huaria mu. Cafei manelfalngeingün ñi inaniefiel ta Cristo Jesús.

2 Llellipulen tamün rume cutranpiuqueyeaeteu ca tamün eluaeteu cüme felen taiñ Chau Ngünechen ca taiñ Ñidol Jesucristo.

3 Taiñ inaniefiel ta Cristo, huenu mülehue mu Chau Ngünechen elueiñmeu fentren cümelcan tañi nehuen mu cüpalu. Feimu taiñ Ñidol Jesucristo ñi Chau Ngünechen* püramyengepe. 4 Petu ñi choyüngenon pu che mapu mu, fei dullieiñmeu taiñ quiñeucüleal Cristo iñchiñ. Femngechi taiñ dullicünulelngeal ta Chau Ngünechen, taiñ pengelal piuqueyehun ca nienoal huelulcan fei tañi adquiñ meu. 5 Chau Ngünechen dullicünueiñmeu, fei yallyeiñmeu Jesucristo ñi duam mu chumngechi tañi ayünieel ca tañi piel. 6 Femngechi tati pu che püramyeafi ta Chau Dios taiñ rume füreneeteu tañi saquin Fotüm ñi duam mu. 7 Chau Ngünechen rume fütra cutranpiuqueyechequei. Fei culli taiñ montulngeal tañi Fotüm ñi mollfüñ mu. Femngechi lifrenentungeafuiñ, fei rulpacünuñmangeafuiñ taiñ culpan.*

8 Chau Ngünechen rume fütra cutranpiuqueyeiñmeu ca elueiñmeu com quimün ca adümuhun.* 9 Femngechi quimeltueiñmu tañi ellcalechi dungu. Fei tüfa nüucülei tañi piel mu. Chumngechi tañi ayünieel, 10 cüpa elcünui chumngechi ñi adcünungeal com dungu puule ti medin antü. Femngechi trapümai com dungu Cristo ñi duam mu: tati dungu huenu mu mülelu ca tati mapu mu mülelu. Felei, Cristo mu trapümngeai com dungu. 11 Quiñeucüleiñ Cristo iñchiñ. Cafei Chau Dios femcünueiñmeu taiñ llohual tañi feipicünuel. Chumngechi ñi ayünieel, dullicünueiñmeu. Fei com dungu femquei chumngechi tañi dulliel quisu tañi pin mu. 12 Femngechi iñchiñ meu püramyengeai ca saquingeai ta Chau Ngünechen, iñchiñ pu hunenque che maneluulu Cristo meu. 13 Allcütulu eimün ti rüf dungu, feiti cümeque dungu Chau Dios ñi montulchequen, ca maneluhuimün Cristo meu. Fei deu feyentulu eimün, Chau Ngünechen huli ñi nehuen chumngechi tañi feipicünuel. Femngechi tuculelngeimün quiñe sello* Cristo ñi duam mu. 14 Chau Ngünechen ñi nehuen mu quimfalcünungeiñ taiñ llohual chem taiñ feipicünueteu Chau Dios. Femi tüfachi dungu ñi ngillanentuafiel tañi pu che, fei rume püramyengeai.

15 Fei iñche, allcülu müten tamün feyentufiel ta Ñidol Jesús ca tamün piuqueyefiel ta Chau Ngünechen ñi pu che,* 16 fentecünuquelan ñi mañumniefiel ta Chau Dios eimün tamün duam mu. Ngillatuñmaniehuiyiñ. 17 Petu loncontuculu eimün chumngechi ñi quimafiel taiñ Ñidol Jesucristo ñi Chau Ngünechen, feiti fütra pepiluhun nielu, fei eluaimünmeu nehuen tamün quimchengeal ca tamün adümafiel chem ñi quimfalcünuel. 18 Fei nülaeimünmeu tamün piuque, femngechi quimaimün ti maneluhun tamün elueteu. Cafei quimaimün chem fütra cümeque dungu eluafi quiñe cullitu reque tati pu che dullicünungelu. 19 Ca femngechi quimaimün Chau Ngünechen ñi fütra nehuen taiñ pengeleteu iñchiñ pu feyentulelu. Tañi femün mu quimfalquei ñi fütra nehuen. 20 Tañi fütra nehuen mu huiñomongeltufi ta Cristo rangiñ ti pu layelu, ca elufi ñi anüal tañi man püle huenu mülehue meu. 21 Doi fütra huenupüramfi com pu gobierno mu, autoridad, gobernante, lonco ülmen ca inei rume falin chengelu famülque mu* ca cüpalechi antü mu rume. 22 Chau Ngünechen com famnacümfi Cristo tañi miñche namun meu, cafei loncocünufi com dungu trahunche mu. 23 Ti trahunche Cristo ñi cuerpo reque felei,* apolei reque Cristo ñi duam mu. Cristo huechunentuquefi com dungu.

2 Tamün culpan mu* la reque felefuimün, huelu Chau Dios elueimünmeu mongen. 2 Femngechi culpaquefuimün cuifi,* miyauquefuimün chumngechi miyauquei mapu müleyechi pu che.* Feichi mu inaniequefuimün feiti ngünenielu ti raquiduam, feichi raquiduam cürüf reque hualloñmanieiñmeu. Feichi raquiduam ngüneniequefi tati pu che feyentuquenolu. 3 Felei tati, cuifi miyauquefuiñ fei engün reque. Inaquefuiñ taiñ huesaque illutun, adniequefeiñmeu quisu taiñ raquiduam. Choyüngelu müten iñchiñ felefui taiñ lladcütuaeteu* Chau Ngünechen caquelu che reque. 4 Huelu Chau Ngünechen rume fütra cutranpiuqueyechequei, fei rume piuqueyeiñmeu. 5 La reque felefuiñ taiñ culpan mu,* huelu Chau Ngünechen elueiñmu mongen ca femcünui taiñ quiñeucüleal Cristo iñchiñ. Tamün rume cutranpiuqueyeteu Chau Ngünechen montulngeimün. 6 Felei, Chau Ngünechen femcünui taiñ quiñeucüleal Cristo Jesús iñchiñ. Feimu elueiñmu mongen* ca elueiñmu cheu taiñ anüpual huenu mu. 7 Femngechi cüpalechi antü meu cümelcayaiñmu taiñ quiñeucülen Cristo Jesús iñchiñ, fei pengelai tañi rume fürenechequen.

8 Eimün feyentuimün, fei Chau Ngünechen ñi rume cutranpiuqueyechen mu montulngeimün. Huelu montulngelaimün eimün tamün femün mu, Chau Ngünechen ñi hulün llemai.* 9 Felei, eimün tamün femün mu montulngelaimün. Feimu inei no rume mallmaulayafui. 10 Chau Ngünechen deumaeiñmu. Inaniefiyiñ ta Cristo Jesús, fei elngeiñ taiñ femal cümeque dungu. Chau Ngünechen deu pepicacünurquei taiñ femngechi femal.

11 Feimu raquiduamtucuniemün: eimün judiongelaimün, feimu circuncidalelaimün piqueimünmeu feichi pu che ñi circuncidaeteu pu huentru.* 12 Feichi mu quimlafuimün ta Cristo, coneltuquelafuimün pu Israel che meu, quimlafuimün ti eldungu Chau Ngünechen ñi feipicünuel. Mapu mu nierquelafuimün maneluhun ca quimquelafuimün ta Chau Dios. 13 Huelu feula quiñeucüleimün Cristo Jesús eimün. Püntülequefuimün* ta Chau Dios mu, huelu Cristo tañi mollfüñ mu fülcontufimün* ta Chau Dios. 14 Cristo cüpaleiñmu tüngün,* fei trapümfi ti epu troquiñche ñi quiñeucüleal. Teifücafi reque ti fütra malal hudaniequefulu ti epu troquiñche. 15 Moisés ñi ley ca tañi huercün dungu mu caiñetuhui ti epu troquiñche. Huelu Cristo hulcünulu tañi cuerpo* fentecünui ti ley, femngechi quiñe hue troquiñche reque femcünufi engün. Rüfcünu mai ti epu troquiñche inaquefi ta Cristo, fei ñi duam mu cümelcautui engün. 16 Quisu tañi femün mu fentecünufi ñi caiñetuhun tati epu troquiñche. Fei Cristo tañi lan orcon mamüll meu,* ti epu troquiñche cümelcautui Chau Dios engün. Femngechi quiñe troquiñchecünufi engün.* 17 Fei huldungupai ti cümeque dungu tamün cümelcautual Chau Ngünechen eimün. Eimün tati pu püntülefulu* ta Chau Dios mu ca tati pu fülconcülefulu quimeltungeimün tüfachi dungu. 18 Com iñchiñ llohuiyiñ Chau Ngünechen ñi nehuen, feimu Cristo ñi duam mu ti epu troquiñche fülconafuiñ taiñ Fütra Chau mu.

19 Feimu quimngenoelchi che cam catripanche* pingehuelaimün, doi mai eimün ca ti caquelu che Chau Ngünechen ñi dullicünuel* quiñe tuhun-ngetuimün.* Cafei coneltuleimün Chau Dios tañi familia mu. 20 Eimün ruca reque deumangeimün cheu ñi mülen tati pu apostol ca Chau Ngünechen ñi pu huerquen. Cristo Jesús fei tati doi falin cura cheu ñi anümngeal ti ruca. 21 Feichi ruca deumangelu com tañi troquiñ quiñeucüleingün. Fei tañi quiñeucülen Cristo meu tremcülequei, fei felerpuai quiñe fütra ngillatuhue ruca dullicünulelngelu ta Chau Jehová.* 22 Quiñeucüleimün Cristo eimün, feimu Chau Ngünechen quiñe ruca reque femcünueimünmeu ta eimün ca tati caquelu che. Chau Ngünechen mülei feichi ruca mu, fau mülelu cai tañi nehuen.

3 Feimu llemai, iñche Pablo, presulen Cristo Jesús ñi duam mu ca tañi quellufiel ta eimün, pu judiongenolu. 2 ¿Allcüpelaimün iñche ñi elungeel quiñe elfal cüdau? Fei tüfa tamün quelluafiel eimün chumngechi tamün cümelcayaeteu Chau Ngünechen ñi rume cutranpiuqueyechen. 3 Chau Ngünechen quimeleneu tañi ellcalechi dungu. Deu pichi nütrameluhuiyiñ tüfachi dungu. 4 Feimu papeltufilmün tüfachi carta, ngüneduamaimün fente ñi adümfiel iñche Chau Ngünechen ñi ellcalechi dungu, feiti nütramcalu Cristo mu. 5 Cuifi Chau Dios cüme quimelel-lafi tañi ellcalechi dungu tati pu che. Huelu feula, quisu tañi nehuen mu, cüme quimelelfi tañi ellcalechi dungu tati pu apostol ca tañi pu huerquen. 6 Tüfa tati ellcalechi dungu: pu judiongenochi che quiñeucülelu Cristo Jesús engün ca llohuaingün chem tañi elcünulelngeel ta Cristo, fei quiñen troquiñche mu coneltuleingün. Tañi allcütufiel engün tati cümeque dungu, llohuaingün chem taiñ feipicünueteu Chau Ngünechen. 7 Iñche quiñe cüdaufengetun, fei quelluhuiyiñ tamün adümafiel Chau Dios tañi ellcalechi dungu. Femngechi femün Chau Dios tañi rume cutranpiuqueyeteu. Elueneu tüfachi regalo reque,* feichi tañi elueteu ñi nehuen.

8 Iñche ancapuulan tati doi inan-ngelu Chau Ngünechen ñi pu che mu.* Huelu Chau Ngünechen rume cutranpiuqueyeneu, feimu amuldungulelquefiñ pu catripanche* ti cümeque dungu nütramcalu Cristo tañi rume cümelcachequen. 9 Cafei quimeltulelfiñ pu che chumngechi Chau Ngünechen huechunentuquei tañi ellcalechi dungu. Chau Ngünechen, tati deumalu itrocom, fentreñma ellcanierquefi tüfachi dungu. 10 ¿Chumngelu* femngechi rupai? Ti trahunche mu Chau Ngünechen ayüfui ñi quimeltuafiel pu gobernante ca pu autoridad huenu mu mülelu,* femngechi ñi quimal engün Chau Dios tañi quimün. Tüfa fillque dungu mu quimfalngequei. 11 Tüfa ñi piel Chau Ngünechen, nüucülei taiñ Ñidol Cristo Jesús mu, cafei rumel felequei. 12 Cristo ñi duam mu lifreleiñ taiñ dungual. Cafei taiñ feyentufiel ta Cristo, lifreleiñ taiñ fülmayafiel ta Chau Dios maneluhun mu. 13 Eimün tamün duam mu iñche rupamequen huesaque dungu. Huelu llellipuhuayiñ, afeluulayaimün. Iñche tañi huesa rupan mu, eimün saquingequeimün.

14 Feimu taiñ Fütra Chau ñi adquiñ meu lucutunagün iñche. 15 Chau Ngünechen ñi duam mu mai mülei pu familia huenu ca mapu mu. 16 Llellipuquefiñ ta Chau Ngünechen, tati nielu fütra pepiluhun, fei yafültucupe tamün piuque ca tamün raquiduam quisu tañi nehuen mu. 17 Llellipuquefiñ ta Chau Ngünechen. Femngechi tamün feyentulen mu nieafimün ta Cristo piuque mu ca nieaimün piuqueyehun. Cafei llellipuquen tamün nehuentuleal chumngechi cüme foliluucülequei quiñe fütra anümca. 18 Fei eimün ca ti caquelu che Chau Ngünechen ñi dullicünuel* cüme adümafimün ti rüf dungu ñi tunte rupan, tunte tuhui, tunte pürai ca tunte coni. 19 Ca quimafimün Cristo ñi piuqueyen. Fei tüfa ta doicülei pu che ñi quimün meu, fei llohuaimün itrofill cümeque dungu hulquelu Chau Ngünechen.

20 Iñchiñ llohuiyiñ Chau Ngünechen ñi nehuen, feimu chem taiñ llellipuel ca chem taiñ raquiduamqueel, Chau Ngünechen doi fütra dungu femafui quisu tañi nehuen meu. 21 Ti trahunche ca Cristo Jesús ñi duam mu rumel püramyengepe ta Chau Ngünechen. Felepe mai.

4 Chau Ngünechen dullieimünmeu. Feimu iñche, presulelu Cristo ñi duam mu, llellipuhuayiñ tamün cüme miyahual. 2 Rüf ñom piuquengeaimün, ñom chengeaimün, ñochi duamngeaimün, hueluquentu duamtuniehuaimün piuqueyehun mu. 3 Chau Ngünechen ñi nehuen mu quiñeucüleimün. Yafüluumün tamün cüme yeucüleal, femngechi amuleai tamün quiñeucülen. 4 Quiñe trahunche müten mülei,* cafei quiñelei Chau Ngünechen ñi nehuen. Ca femngechi quiñe maneluhun müten mülei, Chau Ngünechen mangeleimünmeu tamün llohual. 5 Quiñelei müten ta Ñidol, ti feyentun ca ti fautizahun. 6 Quiñelei müten ta Dios, com pu che tañi Fütra Chau, fei ngüneniei itrocom. Ñi femal tañi ayünieel adniequeiñmeu com iñchiñ. Cafei itrofill dungu femquei tañi nehuen mu.

7 Chau Ngünechen ñi rume cutranpiuqueyechen quiñe regalo reque felei.* Quisuque iñchiñ llohuiyiñ tüfa chumngechi taiñ elueteu ta Cristo. 8 Chau Ngünechen ñi huirintucuel feipilei: “Huechuntu pürapulu, lifrenentufi pu presu. Huli fillque adümuhun-ngechi huentru”. 9 Ti feipin “pürapulu”, ¿chem pengeli? Ñi hune nagpan mapu mu. 10 Tati nagpalu mapu mu, doi huenu mu pürapui ñi femtripayal itrocom.

11 Fei elcünui quiñeque ñi apostolngeal, caquelu Chau Ngünechen ñi huerquen-ngeal, quiñeque amuldungufengeal,* caquelu camañfe reque ca quimeltuchefengeal. 12 Elcünufi engün ñi norümtuafiel* ta Chau Ngünechen ñi pu che,* ñi serfiafiel ta caquelu che ca ñi nehuentucuafiel Cristo ñi cuerpo.* 13 Femngechi quiñeucüleaiñ com taiñ feyentun mu ca taiñ cüme quimfiel Chau Ngünechen ñi Fotüm. Cafei fütaqueche reque ngerpuaiñ, Cristo tañi chumngechi chengen reque felerpuaiñ. 14 Pichiqueche reque femngehuelayaiñ. Tati pu inaquefilu pu ngünencachefe ñi coilaque quimeltun trürümngeafui quiñe huampo reque lafquen mu miyaulu. Ti cürüf ca tati reu* fillque püle yequeyu. 15 Huelu iñchiñ rüf dunguqueaiñ ca piuqueyechequeaiñ. Femngechi com dungu mu, fütaqueche reque ngerpuaiñ taiñ miyahun Cristo reque, feiti loncolelu. 16 Fei ñi duam mu, com ti troquiñ* cuerpo mu cüme quiñeucülei, ca hueluquentu quelluuquei ñi eluafiel chem ñi duamnieel ti cuerpo. Caque quisuque troquiñ cüme huechunentule tañi cüdau, fei tüfa quelluafi ti cuerpo ñi tremcüleal ca ñi nehuencüleal piuqueyehun mu.

17 Feimu Ñidol tañi üi mu feipihuayiñ ca llellipuhuayiñ:* miyauhuelayaimün chumngechi miyauquei pu feyentulenolu. Fei engün inaniequei tañi falinochi raquiduam müten. 18 Pilai engün ñi quimafiel ta Chau Ngünechen. Cafei yafü piuquengeingün, feimu dumiñmalei tañi raquiduam engün. Fei lloulayaingün ti mongen Chau Ngünechen ñi feipicünuel. 19 Duamcülelai engün chem ñi cümen ca chem ñi cümenon, feimu quim yehuequelai ñi huesaque femün mu.* Cafei itrofill ünufal dungu femqueingün, rumeñma illutuquefi ñi femal.

20 Eimün quimelelngelaimün ñi femngechi chengen ta Cristo. 21 Eimün cüme quimnieimün tüfachi dungu tamün allcütufiel ca tamün quimeltungeel ti rüf dungu Jesús ñi quimeltuel. 22 Eimün quimürpuimün tüfachi dungu: mülei ñi famentuafiel tamün chumngechi chengefel cuifi. ¿Chumngelu cai?* Eluuquefuimün tamün ngünencayaeteu ti huesaque illutun, feimu huesañmaucülefui tamün chumngechi chengen. 23 Feimu amulepe tamün huecünutufiel tamün raquiduam.* 24 Cafei huengetupe tamün chumngechi chengen. Tüfa ta rüf norngei, manelfali ca ayüniei Chau Ngünechen.

25 Deu elcünuimün fillque ngünencan dungu. Feimu caque quiñeque eimün mülei ñi rüf dunguafiel tañi chafche.* Com iñchiñ coneltuleiñ quiñe cuerpo mu reque. 26 Fei illculelmün,* culpalayaimün.* Elcünulayaimün tañi rupayal ti antü tamün illculen.* 27 Eluulayaimün tamün ngüchaltucuaeteu tati Huecüfü.* 28 Tati hueñequelu fentecünupe tañi hueñemequen, nehuentu cüdaupe, fempe cümeque cüdau quisu tañi cuhu mu. Femngechi pepi quelluafi tati duamnielu. 29 Huesa entulayaimün* tamün feipin. Doi mai re cümeque dungu nütramcayaimün. Femngechi tamün feipin mu yafültucuafimün tati pu allcütulelu. 30 Chau Ngünechen ñi nehuen mu marcacünungeimün reque puule hula ti antü tamün ngillanentungeal, fei tamün montulngeal. Feimu ngelai tamün hueñancülafiel Chau Ngünechen ñi nehuen.

31 Turpu lladcütuchelayaimün tamün piuque mu, com famentuafimün ti fütra illcun,* huirarcahun, huesa pihun ca fill huesaque dungu. 32 Huelu mai hueluquentu fürenehuaimün, duamtuniehuaimün, cutranpiuqueyehuaimün, ca hueluquentu perdonahuaimün com piuque mu. Chau Ngünechen femngechi femeimünmeu Cristo ñi duam mu.

5 Feimu llemai, inayentuafimün ta Chau Ngünechen, fei tañi saquin pu yallngeimün. 2 Amulepe tamün piuqueyechen chumngechi taiñ piuqueyeteu ta Cristo.* Iñchiñ taiñ duam mu* hultucui tañi mongen, cüme nümün-ngechi chalintucun reque* elungelu ta Chau Dios.

3 Ngelai tamün nütramcayal ti pod cudumuhun,* ti ünufal dungu, diñmatun dungu no rume.* Femngechi dungu nütramcaquelai pu che poyequefilu ta Chau Dios. 4 Cafei ngelai tamün miyahual yehuen-ngechi dungu mu, huedhued dunguyaulayaimün, pecanca dungu mu ayecauquelayaimün, feichi dungu ta cümelai. Doi mai mañumtuafimün ta Chau Ngünechen. 5 Eimün quimnieimün ca cüme loncontucunieimün tüfachi dungu: Chau Ngünechen ngünenietule ta mapu, lonco ülmencülele Cristo, conpulayai tati pu femquelu pod cudumuhun,* tati femquelu ünufal dungu ca ti diñmafengelu, tüfa ta püramyefilu pu adentun reque felei.*

6 Eluulayaimün tamün ngünencangeal falinochi dungun meu. Tüfachi dungu mu Chau Ngünechen castigayafi tati pu feyentuquenolu. 7 Feimu inaconlayaimün tañi femün engün.* 8 Cuifi dumiñ mu miyauquefuimün. Huelu feula quiñeucüleimün ta Ñidol eimün, feimu pelon mu müleimün. Tati pu che miyauquelu pelon mu reque, ca femngechi femqueaimün. 9 Feichi pelon quelluqueiñmu taiñ cüme piuquengeal fillque dungu mu, taiñ nor dungu femal ca taiñ miyahual rüf dungu mu. 10 Raquiduamtucunieafimün chem ñi ayünieel ta Ñidol. 11 Femhuelayaimün falinochi dungu nüucülelu ta dumiñ meu, doi mai quimfalcünuafimün ñi huesalcalen. 12 Chem ñi femün pu che ellcalen mu, yehuefali ñi feipingeal rume. 13 Tati pelon alofquefi feichi dungu cümenolu, femngechi quimfalngequei ti cümenolu. 14 Feimu Chau Ngünechen ñi huirintucuel feipilei: “Trepenge,* eimi, tati umaucülelu. Huitrapürange rangiñ pu layelu meu. Cristo ta pelontuaimu”.

15 Rume cuñiutuculemün, huedhued che reque miyaulayaimün, quimche reque miyahuaimün. 16 Cuñihun-ngechi antü mu müleiñ, feimu ngünamcaquelayaimün tamün tiempo.* 17 Felei llemai, huedhued che reque miyauhuelayaimün. Chem ñi ayünieel ta Chau Jehová* loncontucuaimün. 18 Cafei ngollicauquelayaimün,* rume huesaque dungu mu conafuimün. Doi mai mülepe eimün meu Chau Ngünechen ñi nehuen. 19 Hueluconque yafültucuhuaimün,* feimu ülcantuqueaimün salmo, ca fillque ülcantun ñi saquiafiel ca poyeafiel ta Chau Dios. Com piuque mu ülcantulelafimün ta Chau Jehová.* 20 Taiñ Ñidol Jesucristo ñi üi meu com dungu mu mañumtunieafimün taiñ Chau Ngünechen.*

21 Fente tamün yamniefiel* ta Cristo eluucülemün tamün hueluquentu ngüneniehual. 22 Pu domo, eimün eluucüleimün tamün ngünenieaeteu ta Ñidol. Ca femngechi eluucülemün tamün ngünenieaeteu tamün füta. 23 Ti füta loncolei tañi domo meu chumngechi Cristo loncolei ti trahunche meu, fei montulfi tüfachi cuerpo.* 24 Chumngechi ti trahunche eluucülei ñi ngünenieteu ta Cristo, ca femngechi pu domo eluucülepe ñi ngünenieaeteu tañi füta com dungu mu. 25 Pu füta piuqueyenieafimün tamün domo chumngechi Cristo piuqueyefi tati trahunche ca hultucui tañi mongen ti trahunche ñi duam mu. 26 Chau Dios ñi dungu mu liftufi ti trahunche, co meu cüchafi reque, femngechi ñi dullicünulelafiel ta Chau Ngünechen. 27 ¿Chumngelu* Cristo femi tüfachi dungu? Ñi cüme adngeal ti trahunche tañi adquiñ mu. Cafei ayüniei ñi lifngeal ca ñi nienoal huelulcan.

28 Ca femngechi pu füta mülei ñi piuqueyeafiel tañi domo chumngechi quisu piuqueyeuquei. Ti huentru piuqueyefilu tañi domo, quisu piuqueyeuquei. 29 Inei no rume turpu üdequelai quisu tañi cuerpo, doi mai eluquefi iyael ca piuqueyen mu cuidaquefi. Ca femngechi Cristo femquefi ti trahunche. 30 ¿Chumngelu cai?* Iñchiñ coneltuleiñ Cristo tañi cuerpo mu. 31 “Feimu ti huentru elcünuai tañi chau ca tañi ñuque, fei quiñehuai ñi domo engu. Trür quiñe chengetuaingu”. 32 Feula nütramcamequen tüfachi fütra ellcalechi dungu, nüucülei ta Cristo ca ti trahunche mu. 33 Huelu mai quisuque eimün mülei ñi piuqueyeafiel tañi domo chumngechi quisu piuqueyeuquei. Ca femngechi ti domo, com piuque mu mülei ñi yamnieafiel tañi füta.

6 Pu yall, pu püñeñ, feyentuqueafimün tamün chau ca tamün ñuque chumngechi ayüniei ta Ñidol. Tüfa ta norngei Chau Ngünechen ñi adquiñ meu. 2 “Yamniefinge* tami chau ca tami ñuque”. Tüfa tati hunen huercün dungu quiñentrür elungelu tüfachi feipicünun mu, feipilei: 3 “Fei cüme mongen nieaimi* ca alüntu müleaimi mapu mu”. 4 Pu chau, huesa duamel-layafimün tamün pu yall. Doi mai norümtuafimün ca ngülamtuafimün chumngechi ayüniei ta Chau Jehová.*

5 Pu cüdaufe, rüf piuque mu feyentuqueafimün tamün pu ngen cüdau fütra yamün mu, chumngechi feyentuquefimün ta Cristo. 6 Feyentulayaimün re tamün pengeal müten, fei ñi tuteafiel pu che. Doi mai Cristo tañi cüdaufe reque feyentuqueaimün, fei com piuque meu femaimün Chau Dios tañi ayünieel. 7 Cüme duam mu cüdauqueaimün, serfiquefilu ta Chau Jehová troquihuaimün,* pu huentru no. 8 Eimün quimnieimün Chau Jehová* huiñoleltuafi caque quiñeque che chem cüme dungu tañi femün, esclavongefule cam lifre huentrungefule rume. 9 Eimün pu ngen cüdau, ca femngechi femafimün tamün pu cüdaufe, aneltuquelayafimün.* Eimün quimnieimün huenu mu mülei tati Ngencülelu ta eimün meu ca tamün pu cüdaufe mu, fei dullintuchequelai.

10 Af meu, nehuentucungeaimün Ñidol tañi fütra nehuen mu. 11 Tucutuhuaimün reque com tamün elueteu Chau Ngünechen fei tamün hueichayal,* femngechi nehuentuleaimün tati Huecüfü ñi fillque ngünen mu. 12 Iñchiñ hueichaquelaiñ pu che engün.* Doi mai hueichaquefiyiñ* pu gobierno, pu autoridad, tati pu ngünenielu tüfachi mapu dumiñmalelu, fei tüfa tati pu huecüfü huenu mu mülelu. 13 Feimu llemai, tucutuhuaimün reque com tamün elueteu Chau Ngünechen fei tamün hueichayal.* Femngechi nehuentuleaimün puule tamün hueichayaeteu ti caiñe.* Fei femülmün com ñi duamfalngen, yafüluucüleaimün.

14 Feimu llemai tamün nehuentuleal, trarihue reque tucutuhuaimün tati rüf dungu. Tati nor dungu mu cuñiutucuhuaimün reque tamün rücu. 15 Tucunieaimün tamün ocota,* fei pepicaucüleaimün ñi huldungual ti cümeque dungu, feiti nütramcalu pu che ñi hueniyeafiel ta Chau Dios. 16 Cafei nünieafimün reque ti fütra escudo, fei tüfa tamün feyentun. Femngechi chongümafimün ti üicülechi flecha tamün ütrüftueteu tati Huecüfü.* 17 Cafei raquiduamtucunieafimün ti montuluhun, tüfa cuñiutucuai tamün lonco quiñe casco reque. Yenieaimün ti fütra cuchillo hulquelu Chau Ngünechen ñi nehuen, tüfa ta Chau Ngünechen ñi dungu. 18 Ca femngechi, tamün adnieteu Chau Ngünechen ñi nehuen llellipulemün, fillque llellipun ca fillque ngillatun feipiaimün. Tamün femal tüfachi dungu, trepeluucülemün* ca llellipuñmanieafimün ta Chau Ngünechen ñi pu che.* 19 Cafei llellipulemün iñche tañi duam mu. Femngechi eluuli ñi dungual, Chau Ngünechen eluaeneu ñi chem pial. Fei nehuen piuquecünuhuan ñi huldungual ti cümeque dungu, tüfa ta Chau Ngünechen ñi ellcalechi dungu. 20 Chau Ngünechen huercüeneu ñi amuldungual ti cümeque dungu. Tañi amuldungun mu traricünungen cadena mu. Feimu llellipulemün iñche tañi duam mu, femngechi nehuen piuquecünuhuan tañi huldungual ti cümeque dungu, tüfa tañi femafel iñche.

21 Tañi saquin peñi Tíquico manelfali ñi cüdahuelquefiel ta Ñidol. Fei feipiaimünmeu tañi chumlen iñche ca tañi chumquen. 22 Feimu huercüleluhuiyiñ ta Tíquico, tamün quimal taiñ chumlen ca ñi yafültucuafiel tamün piuque.

23 Com pu peñi niepe cüme felen, piuqueyehun ca feyentun cüpalu Chau Ngünechen mu ca taiñ Ñidol Jesucristo. 24 Rume cutranpiuqueyengepe com pu che rüf piuqueyefilu taiñ Ñidol Jesucristo.