COLOSENSES

1 Iñche ta Pablo, Chau Ngünechen ñi duam mu Cristo Jesús ñi apostolngen.* Taiñ peñi Timoteo iñchiu huercülelfiyiñ tüfachi carta 2 ta Chau Ngünechen ñi pu che.* Manel chengeingün Chau Dios ñi adquiñ meu, cafei inaniefingün ta Cristo Colosas huaria mu.

Llellipulen tamün rume cutranpiuqueyeaeteu ca tamün eluaeteu cüme felen taiñ Chau Ngünechen.

3 Llellipulu iñchiñ eimün tamün duam mu, rumel mañumquefiyiñ ta Chau Ngünechen, taiñ Ñidol Jesucristo tañi Chau. 4 Allcüqueiñ tamün feyentufiel ta Cristo Jesús ca tamün piuqueyefiel Chau Ngünechen ñi pu che.* 5 ¿Chumngelu* femngechi femqueimün? Maneluucüleimün tamün llohual ti cümelcan tamün elungeal huenu meu. Eimün allcütuimün ti rüf quimeltun, tüfa tati cümeque dungu. Femngechi quimürpuimün tüfachi maneluhun. 6 Tüfachi cümeque dungu puhui ta eimün meu. Fei doi alün-ngerpui ca amulei ñi puhun huall mapu püle. Ca femngechi felei ta eimün meu feichi tamün allcütuel ca tamün cüme quimürpuel chumngechi rüf cutranpiuqueyechequei ta Chau Dios. 7 Tüfachi dungu quimeltueimünmeu taiñ saquin peñi Epafras. Fei manelfali, serfiquefi ta Cristo. Fei femquei tati cüdau iñchiñ taiñ femafel mülefuliyiñ üyeu. 8 Epafras nütramcaeiñmeu tamün hueluconque piuqueyeuquen Chau Ngünechen ñi nehuen mu.

9 Feimu llemai feichi allcülu iñchiñ tüfachi dungu, fentecünuquelaiñ taiñ llellipual eimün tamün duam mu. Ca llellipuqueiñ tamün nieal rüf quimün ca ti adümuhun Chau Ngünechen ñi nehuen mu cüpalu. Fei cüme quimaimün Chau Dios tañi ayünieel. 10 Cüme miyauqueaimün chumngechi miyauquei Chau Jehová ñi pu che.* Femngechi com dungu mu ayühuelafimün, femqueaimün itrofill cümeque dungu ca doi cüme quimafimün ta Chau Ngünechen. 11 Cafei llellipuqueiñ tamün yafüluucüleal Chau Ngünechen ñi afmatufalchi nehuen mu, fei llohuaimün tamün duamnieelchi nehuen. Femngechi chem rupale rume, ayühunquechi amuleaimün ñochi duam mu, 12 ca mañumafimün taiñ Fütra Chau. Fei pepicaeimünmeu tamün llohual chem ñi elungeal Chau Ngünechen ñi pu che* pelon mu mülelu.

13 Fei montuleiñmu taiñ ngünehuenoaeteu ti dumiñ. Fei adcünueiñmu ñi conal tañi poyen Fotüm ñi ngünenieelchi dungu mu.* 14 Tañi Fotüm ngillanentueiñmeu, fei rulpacünuñmangeiñ taiñ culpan.* 15 Chau Ngünechen pengequelai. Fei tañi chumngechi chengen, ca femngei tañi Fotüm, fei tati hunelu* ñi deumael Chau Ngünechen. 16 Chau Ngünechen adcünufi tañi Fotüm tañi deumayal itrocom, ti mülelu huenu mu ca ti mapu mu, tati pengequelu ca tati pengequenolu, pu lonco ülmen, pu ngünenielu, pu gobernante ca pu autoridad. Chau Ngünechen adcünufi tañi Fotüm ñi deumayal com caquelu dungu, fei tañi ngen-ngeal. 17 Petu ñi mülenon chem no rume, Cristo deu mülerquei. Chau Ngünechen adcünueyu ñi deumayal com caquelu dungu. 18 Cristo loncolei ti cuerpo mu,* fei tati trahunche. Com dungu amulcünungei Cristo meu, tati hune huiñomongetulu rangiñ ti pu layelu, fei tañi huneleal com dungu meu. 19 Chau Ngünechen ayüniefui com tañi chumngen ñi müleal Cristo mu. 20 Cristo ñi duam mu, tañi hutruelchi mollfüñ orcon mamüll meu,* Chau Ngünechen cümelcautui com caquelu engün, tati mülelu huenu mu ca ti mapu mu.

21 Cuifi püntülequefuimün* Chau Dios mu, raquiduamtucuniequefuimün huesaque dungu. Feimu caiñeyeuquefuimün Chau Dios eimün. 22 Huelu Chau Ngünechen ñi Fotüm hultucuhui ñi layal, feimu feula Chau Ngünechen eluhui ñi cümelcautual ta eimün meu. Femngechi Chau Ngünechen ñi adquiñ meu lif chengeaimün, nielayaimün huelulcan, dalluntucungelayaimün rume. 23 Huelu mülei tamün feyentuleal. Cafei cheu ñi foliluucülen tamün feyentun yafüluucülemün, nehuentulemün. Eluulayaimün tamün püntünentungeal* feichi maneluhun ñi hulqueel Chau Ngünechen ñi cümeque dungu. Eimün allcüimün tüfachi cümeque dungu, deu amuldungungei com mapu püle. Iñche Pablo, dullingen ñi huldungual feiti cümeque dungu.

24 Eimün tamün duam mu rupamequen huesaque dungu, huelu ayüucülen. Cristo reque cutrancaumequen, huelu petu mülehuei tañi cutrancahual, femngechi ñi cümelcaleal Cristo ñi cuerpo, fei tüfa tati trahunche. 25 Chau Ngünechen elfalcünueneu, feimu cüdahuelquefiñ tañi trahunche. Femquen tüfa eimün tamün cümelcaleal, feimu rume yafüluuquen ñi amuldungual Chau Dios ñi dungu. 26 Felei, amuldunguquen Chau Dios ñi ellcalechi dungu. Fantepu mu quimngequelafui tüfachi dungu mapu mu, pu cuifiqueche quimquelafui rume. Huelu feula quimelelngei ta Chau Ngünechen ñi pu che.* 27 Chau Ngünechen pengelelfi engün chumngechi tati pu catripanche* ca quimelelngei ti ellcalechi dungu. Feichi ellcalechi dungu afmatufali ñi falin-ngen, tüfa ta Cristo, fei quiñeucülei eimün meu. Femngechi maneluucüleimün tamün püramyengeal quiñentrür Cristo eimün. 28 Cristo ñi dungu huldungumequeiñ, com pu che ngülamtumequefiyiñ ca quimeltumequefiyiñ fütra quimün meu. Femngechi com pu che taiñ chalintuculelfiel ta Chau Ngünechen inanieafi ta Cristo ca quimchengeaingün. 29 Feimu nehuentu cüdaumequen ca hueichamequen reque* fei tañi nehuen mu.

2 Ayülen tamün ngüneduamal tüfachi dungu: nehuentu cüdaumequen tamün quelluafiel eimün, ñi quelluafiel pu Laodicea che ca com pu che ñi penoaeteu ta iñche. 2 Ayülen ñi yafültucuafiel tañi piuque engün ñi quiñeucüleal piuqueyehun mu. Cafei ayünien tamün nieal tati falin-ngechi dungu, fei tüfa cüme quimal ti rüf dungu, ca cüme adümafiel Chau Ngünechen ñi ellcalechi dungu, fei ta Cristo. 3 Cristo meu cüme ellcalei com ti falin quimün ca adümuhun. 4 Feipihuiyiñ tüfachi dungu, femngechi hueluraquiduamngelayaimün ngünencan dungu mu. 5 Mülelan ta eimün meu, huelu raquiduamtucuniehuiyiñ. Ayüucülen tamün cüme miyahun. Cafei nehuencüleimün tamün feyentufiel ta Cristo.

6 Eimün ta deu lloufimün ta Ñidol Cristo Jesús, feimu amulepe tamün miyahun chumngechi miyahui Cristo. 7 Eimün quimnieimün, tamün feyentufiel ta Cristo mülei tamün nehuencüleal ca yafüluucüleal chumngechi quiñe anümca cüme foliluucülequei mapu mu. Cafei rumel mañumtuqueafimün ta Chau Ngünechen.

8 Cuñiutucuhuaimün, femngechi ngünencangelayaimün* pu che ñi quimün mu ca coilaque raquiduam. Feichi dungu nüucülelai ta Cristo meu, huelu mai nüucülei pu che ñi huimtun ca ti mapu müleyechi dungu mu. 9 Itrocom tañi chumngechi chengen Chau Ngünechen mülei ta Cristo meu. 10 Feimu Cristo ñi duam mu eimün nieimün itrocom, fei loncolei com pu gobierno ca pu autoridad. 11 Tamün feyentufiel ta Cristo circuncidangeimün,* huelu chumngechi ñi femquen pu huentru no. ¿Chumngelu cai?* Eimün elcünutuimün tamün cuerpo ñi illutuqueel,* femngechi circuncidangequei reque pu inaniefilu ta Cristo. 12 Fautizaulu eimün chumngechi fautizahui Cristo, quiñentrür rüngaltucungeimün Cristo eimün, huelu ca huiñomongelngetuimün. ¿Chumngelu cai?* Tamün quiñeucülen Cristo eimün ca feyentuimün chem ñi femün Chau Dios tañi nehuen mu. Chau Ngünechen huiñomongeltufi ta Cristo rangiñ ti pu layelu.

13 Tamün culpan* ca tamün circuncidangenon mu, la reque felefuimün. Huelu Chau Ngünechen elueimünmeu mongen tamün quiñeucüleal Cristo eimün. Fei tañi cüme piuquengen mu, rulpacünui com taiñ huelulcan. 14 Cafei Chau Ngünechen fentecünufi com tati ley huirintucungelu taiñ caiñetuqueteu. Lalu Jesús orcon mamüll meu,* Chau Dios famentufi ti ley. 15 Rupalu tüfachi dungu, hueufi tati pu gobierno ca pu autoridad. Com pu che ñi adquiñ meu quimfalcünufi engün, femngechi pengeli ñi hueufiel ca ñi presuyefiel engün.

16 Feimu llemai, inei no rume ngelai tamün feipiaeteu chem tamün iyal ca pütocoal, tamün inayal quiñe fiesta fill tripantu femngequelu, tati hue cüyen cam ürcütun antü.* 17 Tüfachi dungu adentulei tati felelu ñi cüpayal, huelu feichi dungu rüf femtripayai Cristo meu. 18 Quiñeque che ñom piuquefaluuqueingün ca püramyequefingün pu cümeque püllü.* Huelu eluulayaimün feichi pu che tamün catrütuaeteu ñi llohual tamün cullitu. Tañi peel müten inaqueingün ca mallmauqueingün tañi falinochi raquiduam mu. 19 Feichi pu che nüucülelai tati lonco meu, ti lonco eluquefi tati cuerpo com tañi duamnieel ca quiñeucünuquefi com tañi troquiñ.* Ti lonco ñi duam mu, Chau Ngünechen tremümquefi com ti cuerpo.

20 Eimün deu quiñepülecünufimün mapu müleyechi dungu ca laimün quiñentrür Cristo eimün. Huelu petu coneltulelu reque tüfachi mapu mu miyauqueimün, ¿chumngelu cai?* ¿Chumngelu* inaniequefimün tüfachi huercün dungu? 21 Fei tüfa feipilei: “Nüquelayaimi chem no rume, cümecümetulayafimi, ca fampuhul-layaimi tami cuhu”. 22 Tüfachi dungu aftuquei deu pünengelu. Tüfachi huercün dungu ca ti quimeltun pu huentru mu cüpai. 23 Tüfachi dungu hulquelu quimün troquingeafui, huelu quelluquelafi pu che ñi famentual tañi cuerpo ñi illutuqueel. ¿Chumngelu* rupaquei tüfachi dungu? Tati pu che quisu dulliquei chumngechi püramyeafiel ta Chau Ngünechen. Ñom piuquefaluuqueingün ca cutrancaquefingün tañi cuerpo.

3 Chau Ngünechen elueimünmeu mongen Cristo eimün. Feimu quintunieafimün huenu mu müleyechi dungu, üye mu Cristo anülei Chau Dios ñi man püle. 2 Huenu müleyechi dungu raquiduamnieafimün, mapu müleyechi dungu no. 3 Eimün deu laimün reque, huelu tamün mongen elfalcünungei ta Cristo Chau Ngünechen ñi duam mu. 4 Peufaluule Cristo, tati hulquelu mongen,* eimün ca peufaluhuaimün Cristo eimün quisu tañi pepiluhun meu.

5 Com quiñepülecünuafimün* tamün cuerpo ñi illutuel,* femngechi conlayaimün pod cudumuhun,* ünufal dungu, ca rume illulayaimün cudumuhun dungu. Cafei conlayaimün huesaque illutun mu, ca diñmatufengelayaimün,* tüfa trürümfali ñi püramyequefiel pu adentun.* 6 Chau Ngünechen illcutuafi* tuchi femngechi femquelu. 7 Eimün ca femquefuimün feichi dungu. 8 Feimu feula famentuafimün com tüfachi dungu: illcun, lladcün, huesa femün ca huesaque pin. Cafei nütramcalayaimün podngechi dungu. 9 Hueluconque coilatuuquelayaimün. Famentuafimün tamün chumngechi chengefel cuifi ca tamün femquefel. 10 Cafei huecünutuafimün tamün chumngechi chengen.* Cüme quimfilu iñchiñ ta Chau Ngünechen, fei elueiñmu femngechi chumngen. Feimu huengequetui taiñ chumngechi chengen, taiñ doi cüme inayentuafiel Chau Ngünechen ñi chumngen. 11 Huengetuafui inei rume tañi chumngechi chengen, Grecia che ca judio che rume, circuncidalelu cam circuncidalenolu, catripanche* ca escita,* esclavo ca lifre huentru rume. Cristo nüucülei com dungu mu ca com iñchiñ quiñeucüleiñ fei mu.

12 Eimün ta Chau Ngünechen ñi pu dullinche. Fei piuqueyeimünmeu, cafei lif chengeimün. Feimu pengelqueaimün* piuqueyehun, cutranpiuqueyecheaimün, cüme piuquengeaimün, ñom piuquengeaimün, tüng chengeaimün* ca ñochi duamngeaimün. 13 Huesa femngelmün, illcutumequeulayaimün.* Hueluquentu perdonahuaimün com piuque mu huesalcangelmün rume. Chau Jehová* com piuque mu rulpacünui com tamün huelulcan, feimu ca femngechi femqueaimün. 14 Cafei pengelqueaimün* piuqueyehun. Piuqueyehun mu rüf quiñeucülequei pu che.

15 Cristo ñi hulqueelchi tüngün ngüneniepe tamün piuque. Chau Ngünechen mangeleimünmeu tamün quiñeucüleal quiñe cuerpo mu müten ca tamün nieal tüngün. Cafei pengelqueaimün tamün mañumcülen. 16 Com tamün piuque apolepe reque Cristo tañi quimeltun meu, fei quimchengeaimün. Ülcantuqueaimün salmo ca fillque ülcantun ñi saquiafiel ca poyeafiel ta Chau Dios mañumcülen mu. Femngechi hueluquentu quimeltuniehuaimün ca yafültucuniehuaimün.* Piuque mu ülcantulelafimün ta Chau Jehová.* 17 Chem rume femülmün ca chem rume feipilmün, com femqueaimün Ñidol Jesús tañi üi meu. Fei ñi duam mu mañumqueafimün tamün Fütra Chau Ngünechen.

18 Pu domo, eluucülemün tamün ngünenieaeteu tamün füta, femngechi mülei ñi femal pu inaniefilu ta Ñidol. 19 Pu füta, piuqueyenieafimün tamün domo ca huesa illcutulayafimün.* 20 Pu yall, pu püñeñ, com feyentuqueafimün tamün chau ca tamün ñuque, tüfachi dungu ayüquei ta Ñidol. 21 Pu chau, huesa duamel-layafimün* tamün pu yall, femngechi ñi cutrantupiuquenoal engün. 22 Pu cüdaufe, com feyentuqueafimün tamün pu ngen cüdau, tamün penieteu müten no re ñi tuteafiel pu che. Doi mai, cüme piuque mu feyentuqueafimün engün tamün yamniefiel* ta Chau Jehová.* 23 Chem rume femülmün, com piuque ca com nehuen mu femaimün. Cüdahuelquefilu ta Chau Jehová troquihuaimün,* pu huentru no. 24 Eimün quimnieimün, Chau Jehová mai ta* eluaimünmeu tamün cullitu, feichi cullitu elcünui Chau Ngünechen tamün llohual. Serfiafimün ta Cristo, eimün tamün Ñidol. 25 Inei rume huesa femle, huiñolelngetuai tañi huesa femün. Chau Dios tañi juzgachequen, dullintuchequelai.

4 Eimün pu ngen cüdau, nor dungu ca cümeque dungu femqueafimün tamün pu cüdaufe. Eimün quimnieimün, tati Ngencülelu eimün meu huenu mu mülei.

2 Fentecünulayaimün tamün llellipuquen. Femün mu trepeluucülemün* ca mañumtuqueaimün. 3 Cafei ngillatuñmamuiñ, femngechi Chau Ngünechen eluaiñmeu ñi amuldungual tañi dungu. Femngechi huldunguaiñ Chau Ngünechen ñi ellcalechi dungu, fei tüfa nütramcai Cristo mu. Tüfachi ellcalechi dungu mu, trarintuculen cadena meu. 4 Iñche tañi amuldungufiel Chau Ngünechen ñi ellcalechi dungu mülei ñi quimfalcüleal, feimu llellipulemün tañi femngechi femal.

5 Quimche reque miyahuaimün pu feyentulenolu ñi adquiñ meu, ca ngünamcaquelayaimün tamün tiempo.* 6 Rumel ayüfalngepe tamün dungun, chadiñmalepe reque. Femngechi quimaimün chumngechi huiñoldunguafiel* caque quiñeque che.

7 Tañi saquin peñi Tíquico feipiaimünmeu iñche tañi chumlen. Fei quiñe manelfal cüdaufe, quiñentrür serfiquefiyu ta Ñidol. 8 Huercüleluhuiyiñ ta Tíquico tamün quimal taiñ chumlen iñchiñ, fei yafültucuaimünmeu tamün piuque. 9 Tañi saquin peñi Onésimo ca amuai. Fei manelfali ca mülequefui eimün meu. Fei engu feipiaimünmeu com ñi rupamequen fau püle.

10 Lemoria* pi ta Aristarco, quiñentrür presuleyu iñchiu. Ca lemoria pi Marcos, Bernabé tañi primo. Fei amule üyeu, cüme llohuafimün chumngechi tamün feipingeel. 11 Cafei lemoria pi Jesús, feiti Justo pingelu. Fei engün coneltulei pu judio tuhun-ngelu.* Fei engün müten quelluqueneu ti cüdau mu, femngechi quelluntucuqueingün Chau Ngünechen ñi ngünenietual ta mapu. Rume yafültucuqueneu engün. 12 Lemoria pi Epafras, fei ca mülequefui eimün meu ca serfiquefi ta Cristo Jesús. Com piuque mu llellipulequei eimün tamün duam mu. Femngechi nehuentuleaimün tamün quimchengen ca rume maneluhuaimün com ñi femürpual ta Chau Ngünechen. 13 Rüfcünu mai iñche feipiafun fei ñi rume cüdauquen eimün tamün cümelcaleal, ca tati pu peñi Laodicea ca Hierápolis huaria mu mülelu.

14 Ti saquin doctor Lucas ca Demas lemoria pi engu. 15 Lemoria piafimün tati pu peñi Laodicea mu mülelu, taiñ lamngen Ninfa ca com ti trahunche fei ñi ruca mu trahuquelu. 16 Deu papeltufilmün tüfachi carta, ca papeltungepe Laodicea trahunche mu. Ca femngechi eimün papeltuafimün ti carta huercülelngelu ta Laodicea trahunche. 17 Ca feipiafimün ta Arquipo: “Tami inaniefiel ta Ñidol llohuimi quiñe cüdau, yafüluucülenge tami huechunentuafiel”.

18 Iñche Pablo, tañi cuhu mu huirintucun tüfachi chalitun.* Raquiduamtucuniemün tañi trarintuculen iñche cadena meu. Llellipuquen tamün rume cutranpiuqueyeaeteu ta Chau Dios.