1 TESALONICENSES

1 Iñche Pablo, Silvano* ca Timoteo huercülelfiyiñ tüfachi carta tati Tesalónica trahunche. Fei engün quiñeucülei taiñ Fütra Chau Ngünechen ca taiñ Ñidol Jesucristo engün.

Llellipuquen tamün rume cutranpiuqueyeaeteu Chau Dios ca tamün eluaeteu cüme felen.

2 Llellipulu iñchiñ com eimün tamün duam mu, rumel mañumquefiyiñ ta Chau Ngünechen. 3 Taiñ Chau Ngünechen ñi adquiñ meu* acordaquefiyiñ* tamün cüdahun. Femngechi femimün tamün feyentufiel ta Chau Dios ca tamün nieel piuqueyen. Cafei maneluucüleimün taiñ Ñidol Jesucristo meu, feimu nehuentuleimün huesaque dungu mu. Ca acordaqueiñ tüfachi dungu. 4 Pu peñi,* Chau Ngünechen piuqueyeimünmeu. Iñchiñ quimnieiñ fei tamün dullieteu. 5 Eimün allcüimün Chau Ngünechen ñi cümeque dungu. Huelu iñchiñ taiñ feipin müten no, Chau Ngünechen ñi nehuen quellueimünmeu. Maneluucüleiñ ñi rüfngen tamün amuldungulelfiel. Rume quellueimünmeu chem taiñ huldunguel. 6 Cafei inayentumuiñ ta iñchiñ ca taiñ Ñidol. Cutrancaumequefuimün rume, huelu ayühun mu llohuimün ti huercün dungu, feichi ayühun Chau Ngünechen ñi nehuen mu cüpai. 7 Feimu com pu feyentulelu Macedonia ca Acaya mapu mu inayentuqueingün tamün femün.

8 Rüfcünu mai, eimün tamün femün mu Chau Jehová ñi dungu* allcüngei Macedonia ca Acaya mapu mu. Huelu feica müten no, huall püle nütramyengei tamün feyentufiel ta Chau Ngünechen. ¿Ca chem piafuiñ cai? 9 Feichi pu che amulei ñi nütramcan ñi chem rupan hue quimuulu iñchiñ. Ca nütramcaquei engün chumngechi püramyehuelafimün pu coilaque dios ñi adentun.* Fei eluhuimün ñi serfiafiel ta Chau Ngünechen, fei mongelei ca rüfngei. 10 Femngechi llihuatuleimün* tañi Fotüm ñi cüpayal huenu mu. Chau Dios huiñomongeltueyu rangiñ pu layelu meu, fei tüfa ta Jesús, fei montulaiñmeu Chau Ngünechen ñi cüpalechi illcun meu.*

2 Pu peñi, cüme quimnieimün iñchiñ refalta peumelayiñ.* 2 Cafei quimnieimün Filipos huaria mu cutrancangeiñ ca huesalcangeiñ. Huelu taiñ Chau Ngünechen ñi duam mu nehuen piuquecünuhuiyiñ, femngechi nütrameluhuiyiñ Chau Dios ñi cümeque dungu huesa caiñetungeiñ rume. 3 Chem taiñ ngülamtufiel ta eimün huelulcalelai, huesa duam mu ngülamtuulayiñ. Ayülaiñ tamün ngünencayafiel. 4 Doi mai Chau Ngünechen cüme troquieiñmeu ca elfalcünueiñmeu ñi huldungual tañi cümeque dungu. Feimu dunguquelaiñ taiñ ayühuelafiel pu huentru, doi mai cüpa ayühuelquefiyiñ ta Chau Dios, fei ta ngüneduamquei taiñ piuque.

5 Eimün quimnieimün, iñchiñ turpu cochüñmacünuquelaiñ* taiñ dungun, fei tamün ngünencayafiel. Cafei diñmatufengelaiñ,* feimu cümeque che reque femfaluulaiñ. ¡Chau Ngünechen ta cüme quimniei tüfachi dungu! 6 Cafei ayüquelaiñ taiñ saquiaeteu caquelu che, eimün no rume. Cristo ñi apostol ta iñchiñ,* feimu elumuiñ taiñ duamnieel feipihuafuyiñ. 7 Huelu femlaiñ. Cüme piuque mu fürenehuiyiñ chumngechi ñi femquen quiñe ñuque. Fei moyolquefi ca piuqueyen mu cuidaquefi* tañi pichiche. 8 Rume piuqueyehuiyiñ, feimu eluucülefuiñ tamün amuldungulelafiel Chau Dios ñi cümeque dungu. Huelu feica müten no, ca eluucülefuiñ ñi hulal taiñ mongen, femngechi tamün quelluafiel.

9 Pu peñi, ¿acordaniepelaimün* taiñ fütra cüdahun ca taiñ rume yafüluhun? Amuldunguleluhuiyiñ Chau Dios ñi cümeque dungu. Huelu com antü ca pun meu cüdauquefuiñ. Femngechi inei no rume eimün meu elumuiñ taiñ duamnieel pilafiyiñ. 10 Chau Ngünechen ca eimün pu feyentulelu, pemuiñ taiñ manelfal chengen, taiñ nor femquen ca taiñ huesa femquenon chumngechi tamün quellufiel. 11 Eimün cüme quimnieimün, chumngechi quiñe chau femquefi tañi pu yall, iñchiñ ngülamtuhuiyiñ, yafültucuhuiyiñ, ca feipihuiyiñ caque quiñeque eimün tamün cüme miyahual. 12 Femngechi amuleai tamün miyahun chumngechi ayüquei ta Chau Dios. Fei mangeleimünmeu, femngechi tamün saquiaeteu ca tamün conpual ngünenietule ta mapu.

13 Feimu iñchiñ mañumniequefiyiñ ta Chau Dios. Allcülu eimün Chau Ngünechen ñi dungu iñchiñ tamün huldungufiel, tüfa ta pu huentru ñi dungu pilaimün. Doi mai tüfa ta Chau Dios ñi dungu pimün, fei ñi dungu cai tati. Chau Ngünechen ñi dungu quellueimünmeu ta eimün, pu feyentulelu. 14 Pu peñi, eimün inayentuquefimün Chau Dios ñi trahunche Judea mapu mu mülelu. Fei engün inaquefingün ta Cristo Jesús. Eimün tamün tuhun pu che cutrancaeimünmeu, ca femngechi pu feyentulelu Judea mu mülelu cutrancaeyu tañi pu chaf judio che.* 15 Fei engün langümfingün ta Ñidol Jesús ca Chau Ngünechen ñi pu huerquen, ca inantucueiñmeu iñchiñ. Fei ayühuelquelafingün ta Chau Dios. Tañi femün engün, cümelcachequelai rume 16 ayülu engün taiñ catrütueteu, femngechi taiñ amuldungunoafiel tati pu catripanche* ñi montual engün. Femün mu, rume culpaqueingün.* Huelu pichiñma mu dituaeyu Chau Ngünechen ñi illcun.*

17 Pu peñi, puulu taiñ püntühual* pichiñma mu peuhuetulaiñ, huelu piuquentucuniehuiyiñ. Rume ayüfuiñ taiñ peutual, feimu rüf yafüluhuiyiñ taiñ femngechi femal. 18 Cüpa peumeyiñ. Iñche Pablo eluhun tañi amual, quiñe rupa müten no, epu rupa. Huelu Satanás catrütueiñmeu. 19 Taiñ Ñidol Jesús mülele iñchiñ mu,* ¿inei am taiñ maneluhun, taiñ ayühun ca ti cullitu* taiñ ayühuelqueteu fei ñi adquiñ meu? ¡Eimün tati! 20 Felei llemai, eimün mu saquiuqueiñ ca ayüuqueiñ.

3 Feimu fente cüpa quimlu iñchiñ tamün chumlen, cümelu troquiyiñ taiñ quisu mülenagcüleal Atenas huaria mu. 2 Fei huercüleluhuiyiñ taiñ peñi Timoteo. Fei serfiquefi* ta Chau Dios ca amuldunguquei Cristo ñi cümeque dungu. Huercüfiyiñ tamün nehuentucuaeteu ca tamün yafültucuaeteu, femngechi ñi nehuencüleal tamün feyentun. 3 Fei tamün ngañhuadcülenoal* tüfachi huesaque dungu mu. Eimün quimnieimün, chumlayafuiñ rume ñi rupanoal tüfachi cutrancahun.* 4 Quiñentrür mülelu iñchiñ, feipicünuhuiyiñ taiñ cutrancahual. Femngechi rupai tati, deu quimnieimün. 5 Feimu rume cüpa quimlu tamün chumlen, huercüfiñ ta Timoteo. Cüpa quimün tunte maneluucüleimün ta Chau Ngünechen mu. Llicalefun ti Huecüfü tamün famtucuaeteu culpan meu,* femngechi ngünamcayafui taiñ cüdau.

6 Huelu Timoteo hue acutui deu tamün pemefiel. Cümeque dungu nütramelpaeiñmu tamün maneluucülen Chau Dios mu ca tamün piuqueyechen. Ca feipi chumngechi raquiduamtucuniemuiñ piuqueyehun mu, ca fente cüpa pemuiñ iñchiñ reque. 7 Feimu pu peñi, cutrancahuiyiñ rume ca rupaiñ huesaque dungu mu, huelu rume yafüluhuiyiñ quimlu iñchiñ tamün maneluucülen Chau Dios mu. 8 Nehuencontuquei taiñ piuque* quimlu iñchiñ tamün nehuentulen ñi inaniefiel ta Ñidol. 9 Eimün müna ayühuelmuiñ, feimu mañumquefiyiñ ta Chau Ngünechen ta eimün meu. 10 Antü ca pun meu llellipuqueiñ com piuque mu, femngechi taiñ peutual ca quelluntucual chem tamün duamnieel, fei ñi nehuencüleal tamün feyentun.

11 Llellipuqueiñ, femngechi taiñ Chau Ngünechen* ca taiñ Ñidol Jesús adnieaiñmeu ñi puhual ta eimün meu. 12 Cafei taiñ Ñidol femcünupe ñi doi alün-ngeal tamün hueluconque piuqueyehun ca tamün piuqueyefiel com pu che. Felei, alün-ngepe chumngechi iñchiñ piuqueyehuiyiñ ta eimün. 13 Fei nehuentuaimünmeu tamün piuque. Femngechi mülele iñchiñ mu* taiñ Ñidol Jesús quiñentrür tañi pu che dullicünulelngelu, eimün culpalayaimün* ca lif piuquengeaimün taiñ Chau Ngünechen ñi adquiñ meu.*

4 Pu peñi, deu feipicünuhuiyiñ chumngechi tamün miyahual ñi ayühuelafiel ta Chau Dios. Femngechi femmequeimün llemai. Huelu feula, taiñ Ñidol Jesús ñi üi meu feipihuiyiñ ca llellipuhuiyiñ: amulepe tamün doi cüme femquen tüfachi dungu. 2 Eimün quimnieimün chem feipihuiyiñ tamün femal Ñidol Jesús ñi duam mu.

3 Chau Ngünechen ayüniei tüfachi dungu: tamün lif mongen nieal ca tamün connoal pod cudumuhun mu.* 4 Caque quiñeque eimün mülei ñi ngünenieafiel quisu tamün cuerpo,* femngechi ñi lifngeal ca ñi yamfalngeal.* 5 Inayentulayafimün tati pu che quimnofilu ta Chau Dios. Rume illutuqueingün cudumuhun dungu, ngüneuquelaingün, turpu tuduamquelaingün rume. 6 Inei no rume ngelai ñi femal tati cümenolu, allmalltulayai ñi huesalcayafiel tañi chaf feyentulelu.* Deu feipicünuhuiyiñ, ca cüme quimeleluhuiyiñ, Jehová* castigayafi tati pu femquelu tüfachi dungu. 7 Chau Ngünechen mangelquelaeiñmeu taiñ yenieal podngechi mongen. Doi mai mangelqueiñmu taiñ lif mongen nieal. 8 Feimu tuchi famentuquefilu tüfachi quimeltun, famentuquelafi ta huentru, Chau Ngünechen mai ta famentuquefi, fei elueimünmeu tañi nehuen.

9 Duamfal-lai tamün huirintuculelafiel ñi piuqueyehual chumngechi piuqueyeuquei pu familia. Chau Ngünechen mai ta quimeltueimünmeu tamün hueluconque piuqueyehual. 10 Rüfcünu mai, deu piuqueyefimün com pu feyentulelu Macedonia mapu mu. Huelu pu peñi, yafültucuhuiyiñ, doi amulepe tamün piuqueyehun. 11 Yafüluhuaimün tamün tüngcülen mongeleal.* Dunguconlayaimün caquelu che ñi dungu mu. Cafei cüdauqueaimün, chumngechi feipicünuhuiyiñ. 12 Femngechi cüme miyahuaimün com pu che ñi adquiñ meu, fei nieaimün com tamün duamnieel.

13 Cafei pu peñi, ayünieiñ tamün quimal chem ñi rupayal tati pu layelu,* femngechi hueñancülayaimün chumngechi hueñancüquei tati pu che nienolu maneluhun. 14 Iñchiñ feyentuqueiñ Jesús tañi lan ca ñi huiñomongetun, ca feyentuqueiñ Chau Dios ñi huiñomongeltuafiel tati pu che lalu ñi inaniefiel ta Jesús. Quiñentrür mülepuaingün fei engu.* 15 Chumngechi feipi Chau Jehová ñi dungun,* iñchiñ feipihuayiñ: mongelecaliyiñ mülele iñchiñ meu ta Ñidol,* huenu mu yengeaiñ. Huelu tati pu deu lalu, hune yengeaingün, fei hula yengeaiñ iñchiñ. 16 Taiñ Ñidol huenu mu nagpayai, nünieai Chau Dios ñi trompeta, fei tañi loncolechi cüme püllüngen, rume nehuentu dunguai. Fei hula tañi pu inanieteu deu lalu hune huiñomongetuai engün. 17 Fei mongelecaliyiñ, tromü meu yengeaiñ, femngechi quiñentrür müleaiñ fei engün meu, ca trahuluhuayiñ Ñidol iñchiñ callfü huenu meu. Femngechi rumel müleaiñ Ñidol iñchiñ. 18 Feimu llemai hueluconque yafültucuniehuaimün tüfachi dungu mu.

5 Pu peñi, duamfal-lai tamün huirintuculelafiel tati medin antü meu. 2 Eimün quimnieimün, chumngechi acurumequei quiñe hueñefe pun meu, ca femngechi acuai Chau Jehová tañi antü.* 3 Chumngechi cutranrumequei quiñe domo ñi püñeñal, ca femngechi rupayai. Pu che feipimequeai “¡Com cümelcalei, ngelai chem dungu rume!”. Feimeu müten acurumeai ñi apümcangeal engün. Turpu montutripalayai engün. 4 Pu peñi, dumiñ mu miyauquelaimün. Feimu acurumele feichi antü, afmatulayaimün chumngechi afmatuafui ti hueñefe ñi pepaeteu ti pelon antü. 5 Com eimün miyauqueimün antü ca pelon meu. Iñchiñ miyauquelaiñ pun ca dumiñ meu no rume.

6 Feimu llemai umautulayaiñ chumngechi umaucülei caquelu che. Huelu mai trepeluucüleaiñ* ca cüme raquiduam nieaiñ. 7 Tuchi umautulu, pun meu umautuquei, ca tuchi ngolliquelu, pun meu ngolliquei. 8 Huelu iñchiñ, ngünenieiñmu ti antü, feimu cüme raquiduam nieaiñ. Cafei chumngechi quiñe soltau tucutuuquei ñi cuñiutucuhual tañi rücu, ca femngechi tucutuhuaiñ reque tati feyentun ca piuqueyehun. Cafei raquiduamtucunieafiyiñ ti maneluhun taiñ montulngeal. Tüfa cuñiutucuai taiñ lonco quiñe casco reque. 9 Chau Ngünechen dullilaeiñmeu taiñ cutrancangeal,* doi mai taiñ montulngeal taiñ Ñidol Jesucristo ñi duam mu. 10 Fei lai iñchiñ meu, femngechi trepeleliyiñ* ca umaucüleliyiñ rume lan meu, mongelepuaiñ Cristo iñchiñ. 11 Feimu yafültucuniehuaimün, ca hueluquentu nehuentucuhuaimün chumngechi femmequeimün.

12 Pu peñi, llellipuhuayiñ: yamqueafimün* tati pu che nehuentu cüdauquelu ta eimün meu. Fei engün adnieimünmeu Ñidol tañi cüdau mu, ca ngülamtueimünmeu. 13 Pengelqueaimün tamün rume falintuquefiel engün, ca piuqueyeafimün fente ñi cüdahun engün. Cafei com eimün cüme yeucülemün. 14 Pu peñi, llellipuhuayiñ: cüme ngülamtuqueafimün tati pu cüme miyauquenolu,* yafültucuafimün tati pu rume hueñancülelu,* quelluqueafimün tati pu nehuencülenolu, ca ñom chengeaimün com pu che meu. 15 Cuñiutuculemün, inei no rume ngelai ñi huesalcayafiel feiti tañi huesa femeteu. Doi mai yafüluhuaimün tamün hueluconque cümelcaniehual ca cümelcayafiel caquelu che.

16 Rumel ayüucülequeaimün. 17 Llellipulequeaimün. 18 Com dungu mu mañumtuqueaimün. Chau Ngünechen ayüniei ñi femngechi femal pu inaniefilu ta Cristo Jesús. 19 Catrütulayafimün ñi femün Chau Ngünechen ñi nehuen ta eimün meu. 20 Cafei illamcalayafimün Chau Ngünechen ñi feipicünuel. 21 Ngüneduamaimün ñi rüfngepen mai com dungu. Elcünulayafimün tati cümelu. 22 Famentuqueafimün chem huesa dungu rume.

23 Chau Ngünechen hulquei tüngün,* fei dullicünuaimünmeu tañi serfiafiel. Pu peñi, mülele iñchiñ meu* taiñ Ñidol Jesucristo, tamün cüme raquiduam, tamün mongen ca tamün cuerpo* nielayai culpan,* ca com dungu meu cümelcaleai. 24 Chau Ngünechen, fei tamün dullieteu, manelfali. Feimu rüf femai tüfachi dungu.

25 Pu peñi ngillatuñmaniemuiñ.

26 Com pu peñi chaliafimün piuqueyehun meu.*

27 Ñidol tañi üi mu llellipuhuayiñ: papeltungepe tüfachi carta com pu peñi tañi allcütual.

28 Llellipulen tamün rume cutranpiuqueyeaeteu taiñ Ñidol Jesucristo.