2 TESALONICENSES

1 Iñche Pablo, Silvano* ca Timoteo huercülelfiyiñ tüfachi carta tati trahunche Tesalónica huaria mu mülelu. Fei engün quiñeucülei taiñ Fütra Chau Ngünechen ca taiñ Ñidol Jesucristo engün.

2 Llellipulen tamün rume cutranpiuqueyeaeteu, ca tamün eluaeteu cüme felen taiñ Fütra Chau Ngünechen ca taiñ Ñidol Jesucristo.

3 Pu peñi,* rumel mülei taiñ mañumafiel ta Chau Ngünechen eimün tamün duam mu. Cümei taiñ femngechi femquen fente ñi tremcülen tamün feyentun, ca doi amulei tamün hueluconque piuqueyehun com eimün. 4 Eimün inantucungequeimün ca rupaqueimün huesaque dungu. Huelu nehuentuleimün ca amulei tamün feyentun. Feimu quisu saquiuqueiñ ñi nütramcalelfiel tüfachi dungu Chau Dios ñi pu trahunche. 5 Com tüfachi dungu pengelquei Chau Dios ñi nor juzgaquen ti dungu. Feimu eimün cüme troquingeimün, femngechi tamün conpual Chau Ngünechen ngünenietule ta mapu. Tüfachi dungu mu rupamequeimün huesaque dungu.

6 Chau Dios nor femquei, feimu castigayafi tati pu che tamün cutrancaqueteu. 7 Huelu eimün pu cutrancaumequelu montulngeaimün. Iñchiñ ca montulngeaiñ peufaluule taiñ Ñidol Jesús huenu mu quiñentrür tañi pu nehuen-ngechi cümeque püllü engün. 8 Fütra cütral mu cupayai engün, fei castigayafi tati pu quimnofilu ta Chau Ngünechen ca tati feyentuquenofilu taiñ Ñidol Jesús ñi cümeque dungu. 9 Taiñ Ñidol juiciantucuafi feichi pu che, fei apümcangeai ñi mülehuenoal engün. Ti Ñidol famentuafi tüfachi pu che quisu tañi adquiñ meu, ca quellulayafi tañi fütra nehuen mu. 10 Fei cüpayai tañi püramyengeal quiñentrür tañi pu serfiqueteu engün.* Feichi mu com pu feyentulelu saquiafi ta Ñidol. Eimün ca saquiafimün fente tamün feyentufiel com taiñ feipin.

11 Feimu rumel llellipuqueiñ eimün tamün duam mu. Femngechi taiñ Chau Ngünechen cümelu troquiafi tamün mangeleteu ta eimün. Cafei llellipuquefiyiñ ta Chau Ngünechen, femngechi quisu tañi nehuen mu cüme femürpuai com tati cümeque dungu ñi ayünieel, ca cüme tripayai com tamün femquen fente tamün feyentulen. 12 Femngechi eimün tamün duam mu püramyengeai taiñ Ñidol Jesús ñi üi. Eimün ca püramyengeaimün tamün fülmaucülen fei engu. Tüfachi dungu pengelcünuai taiñ Chau Ngünechen ca taiñ Ñidol Jesucristo ñi rume cutranpiuqueyechequen.

2 Pu peñi, puhuai ti antü taiñ Ñidol Jesucristo ñi müleal iñchiñ meu,* ca elungeaiñ ñi trahuluhual ta fei iñchiñ. Feimu llellipuhuayiñ tüfachi dungu: 2 hueluraquiduamlayaimün inei rume feipile ñi deu acun Jehová ñi antü.* Cafei tüfa ta Chau Dios ñi dungu pile rume ti che, fill raquiduamlayaimün. Papeltungele rume quiñe carta iñchiñ tañi huercüel pifule engün, fill raquiduamlayaimün.

3 Turpu ngelai tamün ngünencangeal. Petu acunole feichi antü, hune peufaluhuai pu caiñetuquefilu ta Chau Dios, ca quimfalngeai tati huentru chaftuquefilu ti ley. Tüfachi huentru apümcangeai. 4 Fei quiñe caiñetufe tati. Doicülelu troquiuquei feichi dios ñi troquifiel ta che ca tati püramyengequelu. Chau Ngünechen ñi ruca mu* anücünuuquei. Com pu che ñi adquiñ meu iñche ta dios piquei. 5 Petu mülelu iñche eimün meu feipicünuhuiyiñ tüfachi dungu, ¿acordalaimün?*

6 Deu quimimün inei catrütuniefi tati huentru chaftuquefilu ti ley,* femngechi quimfalngeai puule hula tañi medin antü. 7 Rüfcünu mai, deu müleuyei tüfachi huentru ñi huesa femün, huelu petu ellcalei. Tüfachi huentru ñi huesa femün ellcaleai mülehuetunole hula inei tañi catrütunieteu. 8 Fei hula quimfalngeai ti huentru chaftuquefilu ti ley. Huelu Ñidol Jesús pepiluhun mu dunguai ñi apümcangeal tüfachi huentru. Cafei quimfalngele Ñidol Jesús ñi mülen iñchiñ meu,* apümcayafi tüfachi huentru. 9 Satanás ñi duam mu mülei tüfachi huentru chaftuquefilu ti ley. Satanás elueyu nehuen ñi femal fütraque dungu, afmatun dungu ca coilaque pengelün dungu. 10 Cafei norngenochi dungu femquei tüfachi huentru. Fei ngünencaquefi tati pu che apümcangealu.* Feichi pu che lloulafi ti rüf dungu, piuqueyelafi rume. Femngechi femfule engün, montulngeafui. Huelu apümcangeaingün, femngechi llohuai tañi cullitu engün. 11 Chau Dios catrütuquelafi ñi ngünencangeal engün. Fei tañi hueluraquiduamün engün feyentuquei coilaque dungu. 12 Feichi pu che feyentulafi ti rüf dungu. Doi mai ayüniei ñi femal ti norngenolu. Feimu com engün juiciantucungeai.

13 Pu peñi, Chau Jehová piuqueyeimünmeu.* Ellaca mu Chau Dios dullieimünmeu tamün montulngeal. ¿Chumngechi cai? Tamün huichucünungeel quisu tañi nehuen mu ca tamün feyentufiel ti rüf dungu. Feimu rumel mülei taiñ mañumafiel ta Chau Ngünechen eimün tamün duam mu. 14 Iñchiñ quimeleluhuiyiñ ti cümeque dungu. Eimün lloufimün. Feimu Chau Ngünechen dullieimünmeu tamün montulngeal. Femngechi iñchiñ saquingeaiñ, chumngechi saquingei taiñ Ñidol Jesucristo. 15 Feimu pu peñi, yafüluucülemün, inaniemün feichi dungu taiñ quimelelfiel. Tüfa ta iñchiñ taiñ feipifiel cam quiñe carta tamün huercüfiel. 16 Taiñ Chau Ngünechen piuqueyeiñmeu, fei tañi rume cutranpiuqueyechen fentecünulayai taiñ yafültucuqueteu. Ca eluqueiñmeu maneluhun. Feimu llellipuquefiyiñ taiñ Chau Ngünechen ca taiñ Ñidol Jesucristo 17 ñi yafültucuaeteu tamün piuque, ca tamün nehuentucuaeteu. Femngechi femaimün ca feipiaimün re cümeque dungu.

3 Pu peñi, af meu feipihuayiñ: llellipulemün iñchiñ mu. Femngechi Chau Jehová ñi dungu* matu amuleai ñi puhual huall püle. Cafei yamün mu* lloungeai Chau Dios ñi dungu chumngechi lloufimün eimün. 2 Femngechi montulngeaiñ pu huesaque huentru meu huesa piuquengelu, com pu che nienolu cai feyentun. 3 Huelu taiñ Ñidol manelfali, fei yafültucuaimünmeu ca cuñiutucuaimünmeu ti Huecüfü mu.* 4 Iñchiñ inaniefiyiñ ta Ñidol, feimu maneluucüleiñ ta eimün meu. Eimün feyentumuqueiñ, ca quimnieiñ tamün feyentunieafiel iñchiñ taiñ feipin. 5 Taiñ Ñidol adniepe tamün piuque, femngechi piuqueyeafimün ta Chau Dios ca nehuentuleaimün tamün inanieafiel ta Cristo.

6 Feimeu pu peñi, taiñ Ñidol Jesucristo ñi üi meu feipicünuhuayiñ: püntünentuhuaimün* tati pu peñi meu cüme miyauquenolu ca inaquenolu chem taiñ feipifiel ta eimün.* 7 Eimün quimnieimün chem chumal taiñ inayentuaeteu. Mülelu iñchiñ eimün meu, cüme miyauquefuiñ. 8 Cafei refalta ilaiñ chem iyael rume. Doi mai antü ca pun meu cüdahuiyiñ. Rume yafüluhuiyiñ, ürcütulaiñ rume, femngechi inei no rume cullilai taiñ quelluaeteu. 9 Elumuiñ taiñ duamnieel feipihuafuiñ. Huelu ayüfuiñ tamün inayal taiñ femquen. 10 Feimu quiñentrür mülelu iñchiñ, femngechi ngülamtuhuiyiñ: “Inei rume pinole ñi cüdahual, ilayai”. 11 Iñchiñ allcüiñ quiñeque che eimün meu cüme miyauquelai, cüdauquelaingün, cafei dunguconmequei caquelu che ñi dungu mu. 12 Feimu Ñidol Jesucristo ñi üi mu ngülamtuafiyiñ* ca feipiafiyiñ feichi pu che, quisu tañi dungu müten ngüneduampe engün, ca ipe engün ti iyael quisu ñi culliel.

13 Eimün cai pu peñi, fentecünulayaimün tamün cüme femquen. 14 Huelu quiñeque che femnole taiñ feipin tüfachi carta mu, cuñiutucuhuaimün feichi che mu,* hueniyehuelayafimün, femngechi yehueleai. 15 Huelu caiñe troquilayafimün, doi mai ngülamtunieafimün chumngechi ngülamtuquefimün quiñe peñi.

16 Taiñ Ñidol hulquei tüngün,* fei llellipuqueiñ tamün elunieaeteu tüngün com dungu meu. Taiñ Ñidol afcadilepe eimün meu.

17 Iñche Pablo, huirintucun tüfachi chalin quisu tañi cuhu meu. Femngechi femquen com tañi fillque carta meu, fei tamün quimal iñche ñi huirintucufiel.

18 Llellipulen com eimün tamün rume cutranpiuqueyeaeteu taiñ Ñidol Jesucristo.