TITO

1 Iñche ta Pablo, serfiquefiñ ta Chau Dios. Cafei Jesucristo ñi apostolngen.* Feyentulen chumngechi feyentulei Chau Dios ñi pu dullinche. Tañi apostolngen mu inaquefiñ ti rüf quimeltun, tüfa pengelquei chumngechi poyeafiel ta Chau Ngünechen. 2 Com tüfachi dungu nüucülei ti maneluhun mu taiñ nieal rumel mongen. Fütra cuifi Chau Ngünechen feipicünui tüfachi dungu, fei coilatuquelai. 3 Chau Ngünechen fei taiñ Montulchefe. Quisu tañi pin mu elfalcünungen ñi amuldungual, femngechi puuchi antü mu quimfalcünui tañi dungu. 4 Huirintuculelfiñ tüfachi carta ta Tito, iñche tañi fotüm ca müten, cafei chaf feyentuleyu.*

Llellipulen tami rume cutranpiuqueyeaeteu ca tami eluaeteu cüme felen taiñ Fütra Chau Ngünechen ca taiñ Montulchefe Cristo Jesús.

5 Creta huapi mu elcünueyu tami norümtual tati huesalcalelu ca tami elfalcünual loncolelu fillque huaria mu, chumngechi deu feipicünueyu: 6 ti loncolelu cüme yeniepe tañi mongen tañi dunguyengenoal. Mülei ñi nieal quiñe domo müten. Tañi pu yall feyentulepe ca ngelai ñi feipintucungeal engün tañi huedhuedquiyauquen mu cam tañi feyentuquenon.* 7 Ti loncolelu serfiquefi ta Chau Dios,* feimu mülei ñi cüme yenieal ñi mongen tañi dunguyengenoal. Mülei ñi yafü piuquengenoal ca illcufemnoal.* Cafei ngelai ñi ngollifengeal ca quehuatufengeal. Ngelai ñi diñmatual* ta plata ca nieal itrofillem. 8 Huelu mai mülei ñi poyechefengeal,* piuqueyeafiel ti cümeque dungu, cüme raquiduam nieal, nor chengeal ca manel chengeal. Cafei quim ngünenieupe. 9 Chumngechi tañi quimeltuchequen, mülei ñi cüme inanieal tati rüfngechi dungu.* Femngechi yafültucuafi* pu che ti cümeque quimeltun mu* ca norümtuafi tati pu huesa pimequefilu ti cümeque quimeltun.

10 Fentrenque huentru ngünefal-lai engün, ngam fillpiyauqueingün ca ngünencachequeingün, doyelchi mai femngechi femquei tati pu ayüquelu ñi circuncidahual pu huentru.* 11 Catrütufinge ñi dungunoal engün. Fei engün diñmatuquei ñi quisu cümelcahual müten, feimu huelulcan dungu quimeltuqueingün. Femngechi apümcamequefingün pu familiahuen ñi feyentun. 12 Quiñe pelon huentru Creta huapi tuulu feipi: “Pu Creta che rume coilatufengeingün, huesa huapo culliñ reque feleingün, ifengeingün ca chofüngeingün”.

13 Rüfngei tüfachi dungu. Feimu llemai nehuen mu norümtunieafimi engün. Femngechi nehuencüleai tañi feyentun engün 14 ca allcütulayaingün pu judio che ñi epeu ca chem ñi huercüel pu huentru püntütripalu* ti rüf dungu meu. 15 Tati pu lif chengelu, lifngelu troquiquefi com dungu. Huelu tati pod chengelu ca feyentuquenolu, lifngelu troquiquelafi chem no rume. Podcülei tañi piuque ca tañi raquiduam. 16 Pu che ñi adquiñ meu feipiqueingün ñi quimfiel ta Chau Ngünechen, huelu tañi femün mu pengelqueingün ñi famentufiel. Ünufalngeingün, feyentuquelaingün, ca pepilquelaingün ñi femal chem cüme dungu no rume.

2 Huelu eimi nütramcanieafimi tati quiñeucülelu ti cümeque quimeltun mu.* 2 Pu füchaque huentru cüme yeniepe tañi mongen engün, yamfal chengepe, cüme raquiduam niepe, amulepe tañi feyentulen, tañi piuqueyehun ca tañi nehuentulen engün. 3 Cafei pu cusheque domo tañi femün mu pengelpe ñi yamniefiel* ta Chau Dios. Ngelai ñi dallucachefengeal ca putufengeal,* ca quimeltupe engün ti cüme dungu. 4 Femngechi ngülamtuafingün* tati pu üllchaque domo, fei ñi piuqueyeafiel tañi füta ca tañi pu püñeñ, 5 cafei cüme raquiduam nieaingün, lif piuque mu miyahuaingün, cüme cüdaucüleaingün tañi ruca mu,* cüme piuquengeaingün ca eluhuaingün ñi ngünenieaeteu tañi füta. Femngechi dunguyengelayai Chau Ngünechen ñi dungu.

6 Ca femngechi ngülamtunieafimi pu huecheque huentru ñi cüme raquiduam nieal engün. 7 Cafei com dungu meu cüme inayentufalngeaimi tami cümeque femün mu. Cüme raquiduam mu quimeltuqueaimi tati rüfngelu.* 8 Cafei cüme dunguqueaimi tami dunguyengenoal. Femngechi yehuelcahuai taiñ pu caiñe taiñ peñmanoaeteu chem huesa dungu no rume. 9 Pu esclavo eluupe ñi ngünenieaeteu tañi ñidol com dungu meu, eluucülepe ñi ayühuelafiel engün, ngelai ñi chaftudunguafiel engün, 10 cafei ngelai ñi hueñeafiel. Doi mai quimfalngepe ñi manelfalngen engün. Femngechi femle, püramyengeai* ti quimeltun Chau Dios mu cüpalu, taiñ Montulchefe.

11 Quimfalcülei Chau Ngünechen ñi rume cutranpiuqueyechen, fei tüfa elufi ñi montual fillque tuhun pu che. 12 Tüfa quimeltuqueiñmu ñi famentuafiel chem rume caiñetuquefilu Chau Dios ñi pin, ca taiñ illutuhuenoal mapu mu müleyechi huesaque dungu. Cafei quimeltuqueiñmu taiñ pengelal cüme raquiduam taiñ mongen mu, taiñ femquen nor dungu ca com piuque mu taiñ serfiquefiel ta Chau Dios fantepu mu. 13 Ca llihuatuleiñ* ñi femtripayal taiñ ayühun-ngechi maneluhun ca ñi pengelal tañi pepiluhun taiñ Fütra Chau Ngünechen ca taiñ Montulchefe Jesucristo. 14 Fei hultucui tañi mongen iñchiñ taiñ duam mu, femngechi lifrenentueiñmeu* itrofill huesaque dungu mu* ca liftueiñmeu quisu tañi saquin troquiñchengeal iñchiñ, fei taiñ femal cümeque dungu com piuque meu.

15 Nütramcaqueaimi tüfachi dungu, ngülamtuchequeaimi* ca norümtuchequeaimi nielu cai eimi autoridad. Eluulayaimi tami illamcangeal.

3 Ngülamtuqueafimi tati pu peñi, eluucülepe engün ñi ngünenieaeteu tati pu gobierno ca pu autoridad, ca mülei tañi feyentuafiel engün. Eluucülepe ñi femal itrofill cümeque dungu. 2 Ngelai ñi dunguyecheal engün ca yafcahulcheal no rume. Doi mai ngünefalngepe engün ca rumel ñom piuquengepe engün com pu che meu. 3 Iñchiñ ca huedhuedquiyauquefuiñ ca feyentuquelafuiñ. Ngünencangequefuiñ, ngüneniequefeiñmeu fillque huesaque illutun ca inaniequefuiñ taiñ ayünieel müten. Huesaque chengefuiñ, ütrirchefengefuiñ, ünufal chengequefuiñ ca hueluconque üdeuquefuiñ.

4 Huelu taiñ Montulchefe, Chau Ngünechen, pengeli tañi cüme piuquengen ca tañi piuqueyechen. 5 Fei ñi rume cutranpiuqueyechen mu montuleiñmu, taiñ nor femün meu no. Liftueiñmu, fei mongeltueiñmu. Elueiñmu hue chumngen quisu tañi nehuen mu, femngechi montuleiñmeu. 6 Fei rume elueiñmeu tañi nehuen Jesucristo ñi duam mu, taiñ Montulchefe. 7 Femngechi nor che troquingeiñ quisu tañi rume cutranpiuqueyechen mu. Feimu nieiñ ti maneluhun taiñ llohual afnoachi mongen chumngechi tañi feipicünuel.

8 Tüfachi dungu manelfali, ca ayünien tami feipimequeal tüfachi nütram. Femngechi tati pu feyentulelu Chau Dios mu raquiduamtucunieai ñi femal cümeque dungu. Feitachi cümeque nütram cümelcaquefi pu che.

9 Eimi conlayaimi chaftudungumequeule pu che falinochi dungu mu, yafcaumequele engün chem rume huirintucungelu pu cuifique lacu meu cam quehuamequeule pu che Moisés ñi ley mu. Ngünam dungu tati, ca cümelcachequelai. 10 Inei rume amulmequele caque quimeltun, epu rupa ngülamtuafimi.* Huelu allcütunole, famentuafimi. 11 Eimi quimnieimi feichi huentru püntütripai* ti cüme rüpü mu, culpamequei* ca quisu condenahui.

12 Huercüfili ta eimi mu Ártemas cam Tíquico, yafüluunge, pemeaen ta iñche Nicópolis huaria mu. Eluucülen ñi rupayal puquem üye mu. 13 Eluafimi com tañi duamnieel ta Apolos ca Zenas, feichi huentru cüme quimniefi Moisés ñi ley. Fei cañpüle amule engu, duamtulayai chem no rume. 14 Huelu taiñ pu peñi ca pu lamngen quimpe ñi femmequeal cümeque dungu. Femngechi quelluaingün duamngerumele, feimu rumel cümelcamequeaingün.

15 Com tañi pu compañ lemoria pieimu.* Lemoria piafimi pu che taiñ piuqueyeteu ca feyentulelu.

Llellipulen com eimün tamün rume cutranpiuqueyeaeteu Chau Ngünechen.