APOCALIPSIS

1 Fei tüfa Jesucristo ñi quimfalcünuel.* Chau Dios elufi tüfachi dungu ta Jesús, femngechi ñi pengelelafiel tati pu serfiquefilu ta Chau Dios chem dungu ñi rupayal pichiñma mu. Jesucristo huercülelfi ñi cüme püllü ta Juan, tati serfiquefilu ta Chau Dios, fei ñi pengelelafiel chem dungu ñi rupayal cüpalechi antü mu. 2 Juan nütramcai Chau Dios ñi eluelchi dungu* ca Jesucristo ñi huldunguel. Felei, nütramcai com tañi peel. 3 Püllelei ti medin antü, feimu ayühun niei tuchi nehuentu papeltuquelu tüfachi dungu ñi feipicünuel Chau Ngünechen. Cafei ayühun niei pu allcütulu ca inanielu chem ñi huiriconcülen tüfa mu.

4 Iñche ta Juan, huirintuculelfiñ tati regle trahunche Asia troquiñ mapu mülelu.

Chau Ngünechen fei “tati mongelelu, tati afquentu mülequelu ca tati cüpalelu”. Fei llellipulen tamün rume cutranpiuqueyeaeteu ca eluaeteu cüme felen Chau Ngünechen, tati regle püllü mülelu itrotripa ñi ülmen huancu meu, 5 ca Jesucristo, tati Manelfal Huldunguquelu, tati hune huiñomongetulu rangiñ ti pu layelu, ca tati ngünenielu pu lonco ülmen mapu mu.

Fei piuqueyeiñmeu ca montuleiñmeu taiñ culpan* quisu tañi mollfüñ meu. 6 Femcünueiñmeu taiñ lonco ülmencüleal ca sacerdotengeal, femngechi taiñ serfiafiel tañi Chau Ngünechen.* Fei püramyengepe ca elungepe pepiluhun rumel mu. Felepe mai.

7 Tromü meu cüpayai, fei tañi pu chüngartucueteu ca com pu che peaeyu. Fei tañi duam mu, com pu troquiñche mapu meu quimfalcünuai tañi hueñancün.* Mai, rüf femtripayai. Felepe mai.

8 Chau Ngünechen Jehová* feipi: “Iñche tati Alfa ca tati Omega,* tati mongelelu, tati afquentu mülequelu ca tati cüpalelu, tati Com Nehuen Nielu”.

9 Iñche ta Juan, tamün peñi, tañi inaniefiel ta Jesús ca rupan huesaque dungu, nehuentulen ca elungen tañi lonco ülmencüleal eimün reque. Nütramcan Chau Dios mu ca huldungun Jesús ñi dungu. Feimu mülepun Patmos huapi mu. 10 Llohun Chau Ngünechen ñi nehuen, feimu Ñidol ñi antü mu mülepun. Fei furitu püle allcün quiñe nehuentu dungun, dungulngelu quiñe trompeta reque. 11 Feipi: “Quiñe lifru mu* huirintucunge tami peel. Fei huercülelafimi tati regle trahunche: Éfeso, Esmirna, Pérgamo, Tiatira, Sardis, Filadelfia ca Laodicea”.

12 Huiñoquintun tañi peal inei dungueneu. Fei pen regle candelabro* orongelu.* 13 Rangiñ ti pu candelabro pen quiñe huentru ñi fotüm reque. Quiñe fütra tacun yenierquei, tañi namun püle puhui. Ca oro trarihuetulerquei rücu püle. 14 Cafei lingarcülei ñi lonco,* lig cal ufisa* ca pire reque. Tañi nge hueihuiñ cütral reque felei.* 15 Chumngechi huilüfquei ti cüme cobre horno meu femngei tañi namun. Tañi dungun raracülechi co reque allcüngei.* 16 Tañi man cuhu mu nierquei regle huangülen. Tañi hun mu tripai quiñe fütra cuchillo, epuñpüle yungei. Rume huilüfcülechi antü reque femngei tañi ange. 17 Pefilu iñche, la reque feletun fei tañi namun püle.

Fei fampuhuleneu tañi man cuhu. Feipieneu: “Ngelai tami llicayal. Iñche tati Hunen-ngelu ca tati Inan-ngelu, 18 cafei tati mongelelu. Lafun, huelu feula mongeletun. Chumcaunorume lahuelayan, nien ti llafe ñi lifrenentuafiel pu che ti lan dungu ca ti Rüngan meu.* 19 Feimu huirintucunge chem tami peel, chem ruparupangei ca chem ñi cüpayal deu rupale tüfachi dungu. 20 Ti regle huangülen tami pefiel iñche tañi man cuhu mu ca tati regle oro candelabro, fei Chau Ngünechen ñi ellcalechi dungu. Ti regle huangülen adentulei pu cümeque püllü mülelu ti regle trahunche mu, ca tati regle candelabro adentulei ti regle trahunche.

2 Huirintuculelafimi tüfachi dungu tati cüme püllü Éfeso trahunche mu mülelu: tüfa tañi feipin feiti nielu ti regle huangülen tañi man cuhu mu ca miyaulu rangi ti regle oro candelabro mu:* 2 ‘Quimnien tami femün, tami rume cüdauquen ca tami nehuentulen. Cafei quimnien llouquelafimi pu huesaque huentru, ca quimfalcünuimi ñi ineingen pu apostolfaluuquelu, ngüneduamfimi ñi coilatufengen engün. 3 Cafei nehuentuleimi, afeluulaimi. Doi mai amuleimi iñche tañi üi ñi duam mu. 4 Huelu tüfachi dungu mu norümtuayu: piuqueyehuelafimi ta Chau Dios chumngechi tami piuqueyefel ellaca mu.

5 Feula tranürpuimi, feimu acordange* cheu tami mülequefel, nor raquiduamtunge ca huiño femtunge chem tami femquefel ellaca mu. Femnolmi, entuñmayayu tati candelabro cheu tañi mülen. Huelu nor raquiduamtulmi, femlayan. 6 Huelu tüfachi cüme dungu nieimi: üdequefimi ñi femün pu inaquefilu Nicolás ñi quimeltun. Iñche ca üdequefiñ feichi dungu. 7 Tati pepi allcülu, allcütupe chem ñi feipifiel Chau Ngünechen ñi nehuen tati pu trahunche: tuchi hueule ti hueichan,* eluafiñ ñi iñmayafiel ñi fün tati anümca hulquelu mongen, feiti mülelu Chau Ngünechen ñi ayüfalchi mapu mu’.

8 Huirintuculelafimi tüfachi dungu tati cüme püllü Esmirna trahunche mu mülelu: tüfa tañi feipin tati Hunen-ngelu ca tati Inan-ngelu, tati lafulu, huelu huiñomongetui: 9 ‘Tunte ricungeimi rume, huelu quimnieñmaeyu tami cutrancahun ca tami pofrelen. Cafei quimnien tati pu judiofaluuquelu tañi caiñetudungun, fei engün Satanás ñi troquiñchengei. 10 Llicaquelayaimi chem mu tami cutrancahual. Ti Huecüfü amuleai ñi presuafiel ta quiñeque eimün, femngechi cüme ngüneduamngeaimün ca cutrancangeaimün mari antü. Tunte puule tami mongen, nehuentuleaimi. Fei iñche eluayu mongen cullitu reque.* 11 Tati pepi allcülu, allcütupe chem ñi feipifiel Chau Ngünechen ñi nehuen tati pu trahunche: tuchi hueule ti hueichan,* turpu huesalcalayaeyu ti epungechi lan’.

12 Huirintuculelafimi tüfachi dungu tati cüme püllü Pérgamo trahunche mu mülelu: tüfa ñi feipin tati nielu ti fütra cuchillo epuñpüle yungelu: 13 ‘Cheu tami mülen ca mülei Satanás ñi ülmen huancu, iñche quimnien tati. Huelu eimi püntütripaquelaimi iñche mu.* Cafei elcünulaimi tami feyentun iñche meu, Antipas ñi antü mu no rume. Feichi manelfal huentru huldunguquelu iñche meu, langümngei inafül ta eimün mu, cheu mülei Satanás.

14 Huelu quiñeque dungu mu norümtuayu: eimi mu mülei quiñeque huentru inaquefilu Balaam ñi quimeltun. Feichi huentru quimeltufi ta Balac ñi ngüchaltucuafiel* pu Israel che, femngechi ñi iyal engün ilo chalintuculelngelu pu coilaque dios ñi adentun* ca ñi conal pod cudumuhun mu.* 15 Cafei eimi mu mülei feichi pu inaquefilu Nicolás ñi quimeltun. 16 Feimu nor raquiduamtunge. Femnolmi, müchai müten cüpayan. Fei ti fütra cuchillo tañi hun mu tripalu quehuapayafiñ engün.

17 Tati pepi allcülu, allcütupe chem ñi feipifiel Chau Ngünechen ñi nehuen tati pu trahunche: tuchi hueule ti hueichan,* iñche eluafiñ tati ellcalechi mana ca quiñe lig pichi cura.* Feichi cura meu huirintuculeai quiñe hue üi, inei no rume quimquelafi, tati lloufilu müten’.

18 Huirintuculelafimi tüfachi dungu tati cüme püllü Tiatira trahunche mu mülelu: tüfa ñi feipin Chau Ngünechen ñi Fotüm, tañi nge hueihuiñ cütral reque felei* ca tañi namun cüme cobre reque: 19 ‘Quimnieñmaeyu tami femün, tami piuqueyefiel ta Chau Dios ca tati pu che, tami feyentun, tami cüdahuelquefiel ta Chau Dios ca tami nehuentulen. Ca quimnien tami inan cümeque femün doicülei tami hunenque femün mu.

20 Huelu tüfachi dungu mu norümtuayu: llouquefimi feichi domo Jezabel, Chau Ngünechen ñi huerquen femfaluuquei. Tañi quimeltun mu ngünencaquefi iñche tañi pu che, femngechi ñi conal engün pod cudumuhun mu* ca ñi iyal ilo chalintuculelngelu pu adentun. 21 Üngümnierquefiñ ñi nor raquiduamtual. Huelu pilai ñi elcünual tañi pod cudumuhun.* 22 Feimu cutranelafiñ, fei tranalehuetuai ngütantu mu.* Cafei rume cutrancayafiñ feichi pu pod cudumuulu fei engu. Huelu femlayan nor raquiduamtule engün tañi huesa femün feichi domo ñi duam mu. 23 Feichi domo ñi pu püñeñ huesa cutran mu langümafiñ. Femngechi com tati pu trahunche quimürpuai iñche inaduamquefiñ tati pu che ñi piuque ca tañi ellcalechi raquiduam.* Iñche huiñoleluhuayiñ chumngechi tamün femün caque quiñeque eimün.

24 Huelu caquelu eimün Tiatira trahunche mülelu, inaquelaimün tüfachi quimeltun ca quimlafimün tati coilaque quimeltun* Satanás mu cüpalu. Iñche feipihuayiñ: “Eluulayayiñ tamün yeal cangelu fanechi dungu. 25 Huelu mai cüpali hula, elcünulayaimün ti cümeque dungu tamün nieel. 26 Tuchi hueutripale ti hueichan mu* ca rumel inaniefile tañi rüpü, iñche eluafiñ autoridad ñi ngünenieal tati pu troquiñche, 27 chumngechi elueneu autoridad tañi Chau. Fei pañillhue retrü mu castigayafi tati pu che,* fei quiñe metahue reque trafongeai engün. 28 Cafei eluafiñ ti huangülen epe hun tripaquelu. 29 Tati pepi allcülu, allcütupe chem ñi feipifiel Chau Ngünechen ñi nehuen tati pu trahunche”’.

3 Huirintuculelafimi tüfachi dungu tati cüme püllü Sardis trahunche mu mülelu: tüfa ñi feipin tati nielu Chau Dios ñi regle püllü ca ti regle huangülen: ‘Quimnieñmaeyu tami femün. Mongelelu troquingeimi, huelu rüfcünu laimi. 2 Iñche ngüneduamün huechunentulaimi com ñi ayünieel Chau Ngünechen tami femal. Feimu llihuatulenge,* nehuentufinge tati epe lafulu. 3 Feimu llemai, loncontucunienge chem tami llohuel ca tami allcütuel. Feyentuniefinge ca nor raquiduamtunge. Trepeluucülenolmi,* hueñefe reque cüpayan. Fei quimlayaimi chem hora ñi acual iñche.

4 Huelu Sardis trahunche mu nieimi quiñeque che podümnolu tañi tacun, fei trür miyahuaiñ lif tacun mu. Fei engün felei ñi elungeal tüfachi dungu. 5 Tuchi hueule ti hueichan,* lig tacun tucutuhuai.* Fei turpu entuñmalayafiñ tañi üi ti mongen ñi lifru meu. Doi mai quimnieñmafiñ ñi üi pian tañi Chau ca tañi pu cümeque püllü ñi adquiñ meu. 6 Tati pepi allcülu, allcütupe chem ñi feipifiel Chau Ngünechen ñi nehuen tati pu trahunche’.

7 Huirintuculelafimi tüfachi dungu tati cüme püllü Filadelfia trahunche mu mülelu: tüfa ñi feipin tati lifngelu Chau Ngünechen ñi adquiñ meu, tati rüfngelu, tati nielu David ñi llafe, tati nülaquelu ti puerta inei no rume ñi cerranoafiel, ca ti cerraquefilu ti puerta inei no rume ñi nülanoafiel: 8 ‘Quimnieñmaeyu tami femün. Tami adquiñ mu elcünuleyu quiñe nülalechi puerta, inei no rume pepi cerraquelafi. Feyentuimi tañi feipin, turpu elcünulaen,* pichin nehuen-ngeimi rume, iñche quimnien tüfachi dungu. 9 Satanás ñi troquiñche* judio femfaluuqueingün, huelu coilatuquei. Iñche cüpalafiñ engün, fei lucutunagai* tami namun püle. Fei pengelelafiñ ñi piuqueyefiel ta eimi. 10 Eimi inayentuñmaen tañi nehuentulen. Feimu iñche cuñiutucuayu feichi ngüneduamngele com chi mapu, fei ngüneduamngeai com ti pu che. 11 Müchai müten cüpayan. Nünienge tami nieelchi dungu, fei inei no rume müntuñmalayaimu* tami cullitu.*

12 Tuchi hueule ti hueichan,* quiñe nehuen-ngechi orcon reque femcünuafiñ tañi Chau Dios ñi ngillatuhue ruca mu, feimu rumel müleai üye mu. Huente püle huirintuculelafiñ tañi Chau Dios ñi üi ca huirintucuafiñ ti üi ñi nieel tañi Chau Dios ñi huaria, ti Hue Jerusalén huenu mu nagpalu cheu ñi mülen tañi Chau Dios. Ca huirintucuafiñ iñche tañi üi. 13 Tati pepi allcülu, allcütupe chem ñi feipifiel Chau Ngünechen ñi nehuen tati pu trahunche’.

14 Huirintuculelafimi tüfachi dungu tati cüme püllü Laodicea trahunche mu mülelu: tüfa ñi feipin tati Felepe Mai pingelu,* tati manelfal rüf huldunguquelu, tati hunen ñi deumafiel ta Chau Ngünechen: 15 ‘Quimnieñmaeyu tami femün. Llaco co reque* feleimi, füshcülelaimi ca arelelaimi rume. Ayüfun tami feleal füshcü co reque cam are co reque. 16 Huelu llaco co reque* feleimi, arelelaimi ca füshcülelaimi rume. Feimu rapinentuayu tañi hun mu. 17 Eimi feipiqueimi “iñche ülmen chengen, nien itrofillem, duamnielan chem no rume” piqueimi. Huelu huesa conangeimi, cuñifallcüleimi, pofreleimi, traumaleimi ca triltrangcüleimi. Ngüneduamlaimi rume tami felen. 18 Feimu ngülamtueyu, ngillañmaen cüme oro* cütral mu rulpangelu, fei ülmen chengeaimi. Ngillañmaen lig tacun,* femngechi tucutuhuaimi, fei pengelayai tami yehuen triltrangcülen. Cafei ngillañmaen lahuen tami tucual nge mu, femngechi pelotuaimi.

19 Norümquefiñ ca ngülamtuquefiñ com tañi piuqueyeniefiel. Feimu rume yafüluunge ca nor raquiduamtunge. 20 Puerta mu huitralen, fei mütrümmequen. Inei rume allcütule tañi dungun, fei nülafile ti puerta, iñche conpuan tañi ruca mu, fei quiñentrür iyayu. 21 Iñche huehun ti hueichan,* feimu anücünuhun tañi Chau iñchiu tañi ülmen huancu mu. Ca femngechi tuchi hueule, iñche eluafiñ ñi anüal tañi ülmen huancu mu quiñentrür iñchiu. 22 Tati pepi allcülu, allcütupe chem ñi feipifiel Chau Ngünechen ñi nehuen tati pu trahunche’”.

4 Fei hula pen quiñe nülalechi puerta huenu mu. Ti hunen dungun tañi allcütuel quiñe trompeta reque allcüngei. Feipieneu: “Pürapange, pengelelayu chem ñi rupayal”. 2 Feimeu müten adnieneu Chau Ngünechen tañi nehuen. Huenu mu perumen quiñe ülmen huancu ca tati anülelu fei mu. 3 Tati anülelu chi huancu mu huilüfcülei cüme adngechi cura reque, jaspe ca sardio pingelu.* Cafei quiñe relmu esmeralda cura reque felelu* huallmaniefi ti ülmen huancu.

4 Cafei hualloñmalei 24 ülmenque huancu mu. Tüfa meu anülei 24 loncolelu,* lig tacun* tucutuucülei ca lonco meu yenieingün oro corona.* 5 Ti ülmen huancu meu tripai llüfqueñ,* fillque dungun ca tralcan. Cafei tañi itrotripa meu mülei regle fütraque pelontuhue üicülelu, tüfa adentulei Chau Ngünechen ñi regle püllü. 6 Ti ülmen huancu ñi itrotripa meu mülei quiñe lafquen reque, huilüfquei ca rumequintun-ngei vidrio reque.*

Meli püllü mülei rangiñ ülmen huancu meu* ca hualloñmaeyu. Tüfa engün com püle niei nge, ad püle ca furi püle. 7 Tati hunen cüme püllü trapial reque femngei. Ti cangelu, toro reque femngei. Cangelu, huentru reque femngei tañi ange. Ca tati inalelu, müpülechi ñamcu reque femngei.* 8 Tüfachi meli püllü niei cayu müpü, com püle niei nge, huente püle ca miñche püle. Antü ca pun meu feipifeipingei engün: “Chau Ngünechen Jehová* rumeñma lifngei,* com nehuen niei, tati afquentu mülequelu, tati mongelelu ca tati cüpalelu”.

9 Tati meli püllü püramyequefi, yamquefi* ca mañumquefi tati anülelu ti ülmen huancu meu, feiti rumel mongelequelu. 10 Femlu engün, tati 24 loncolelu pochongnagqueingün* tati anülelu ti ülmen huancu meu ñi adquiñ püle, ca püramyequefingün tati rumel mongelequelu. Famnacümquefingün tañi pu corona ti ülmen huancu ñi itrotripa meu. Fei feipiqueingün: 11 “Taiñ Chau Ngünechen Jehová,* eimi nehuen-ngeimi, deumaimi com tati mülelu, eimi tami pin meu mülei ca deumangei engün. Feimu mülei tami püramyengeal ca yamniengeal”.

5 Pefiñ tati anülelu ti ülmen huancu meu. Tañi man cuhu meu niei quiñe chumpol lifru* epuñpüle huirintuculelu.* Cüme racümcülerquei* regle sello meu.* 2 Fei pefiñ quiñe nehuen-ngechi cüme püllü. Nehuentu dungun mu feipi: “¿Inei cai elungepeafui ñi nülayafiel ti chumpol lifru ca ñi catrüafiel tañi sello?”. 3 Huelu huenu mu, mapu ca miñche mapu ngelai inei no rume ñi nülayafiel ti chumpol lifru ca peafiel chem ñi huirintuculen fei mu. 4 Feimu hueñancün, fütra ngümacahun. Pengelai inei no rume ñi nülayafiel ti chumpol lifru ca ñi ngüneduamal chem ñi huirintuculen fei mu. 5 Fei quiñe tati pu loncolelu feipieneu: “Fentecünunge tami ngüman. Tati Trapial Judá troquiñche mu tuulu, feiti David ñi cüpanchengelu,* hueutripai. Fei nülayafui tati chumpol lifru ca tañi regle sello”.

6 Cheu ñi mülen ti ülmen huancu, tati meli püllü ca tati pu loncolelu, rangiñ mu huitralerquei quiñe cordero, langümngelu quiñe chalintucun reque* troquifali. Nierquei regle müta ca regle nge. Tati nge adentulei Chau Ngünechen ñi regle püllü huercüngelu com mapu püle. 7 Feimeu müten ti Cordero fülcontufi* tati anülelu ti ülmen huancu mu, fei nüfi ti chumpol lifru ñi nieel tañi man cuhu mu. 8 Ti Cordero nüfilu ti chumpol lifru, tati meli püllü ca tati 24 loncolelu pochongnagingün* tañi adquiñ meu. Caque quiñeque engün nierquei quiñe arpa ca oro metahue* apolelu incienso meu.* Tati incienso adentulei ñi llellipun ta Chau Ngünechen ñi pu che.* 9 Fei nentuingün quiñe hue ül. Feipi: “Felei tami nüafiel ti chumpol lifru ca nülayal tañi sello. Langümngeimi quiñe chalintucun reque, fei tami mollfüñ meu ngillalelfimi ta Chau Ngünechen pu che itrofill tuhun-ngelu, caque quehun dungulu, caque rume mollfüñ nielu ca fillque troquiñche mu tuulu. 10 Eimi femcünufimi engün tañi lonco ülmencüleal ca sacerdotengeal ñi serfiafiel taiñ Chau Ngünechen. Fei engün ngünenieai ti mapu”.

11 Adquintun, fei allcürumefiñ fentren cümeque püllü ñi dungun. Hualloñmanierquefi engün ti ülmen huancu, tati meli püllü ca tati pu loncolelu. Fentren huaranca cümeque püllü mülerquei. Felei, fentren millon. 12 Nehuentu dungun mu feipi engün: “Ti Cordero langümngelu chalintucun reque, felei ñi llohual autoridad, falinque fillem, quimün, pepiluhun. Ca felei ñi yamngeal,* saquingeal ca püramyengeal”.

13 Fei allcün com tati mülelu huenu, mapu, miñche mapu ca lafquen meu. Itrofill mongen mülelu tüfa meu feipi: “Tati anülelu tati ülmen huancu mu ca tati Cordero felei ñi püramyengeal, yamngeal, saquingeal ca nieal autoridad rumel meu”. 14 Tati meli püllü feipingün: “¡Felepe mai!”. Cafei tati pu loncolelu lucutunagingün, fei püramyefingün ta Chau Ngünechen.

6 Pefiñ tati Cordero ñi nülafiel quiñe tati regle sello. Fei allcüfiñ quiñe tati meli püllü dungumequelu tralcan reque, feipi: “¡Amulenge!”.* 2 Fei pefiñ quiñe lig cahuellu.* Tati püracahuellulelu nierquei quiñe arco. Elungei quiñe corona, fei tripai ñi huehuafiel tañi pu caiñe.

3 Tati Cordero nülafilu ti epungechi sello, allcüfiñ ti epungechi cüme püllü ñi feipiel: “¡Amulenge!”. 4 Fei tripai cangelu cahuellu, quelülei cütral reque. Tati püracahuellulelu elungei ñi müntuñmayafiel ti tüngün* mapu meu, femngechi ñi hueluconque langümuhual tati pu che. Cafei elungei quiñe fütra cuchillo.

5 Tati Cordero nülafilu tati cülangechi sello, allcüfiñ tati cülangechi cüme püllü ñi feipiel: “¡Amulenge!”. Fei pefiñ quiñe curü cahuellu, tati püracahuellulelu cuhu mu niei quiñe romana reque.* 6 Rangiñ tati meli püllü allcün quiñe dungun, feipi: “Quiñe kilo cachilla, quiñe denario fali,* ca cüla kilo cahuella, quiñe denario fali. Ngünamlayafimi tati oliva aceite ca tati pulcu”.

7 Tati Cordero nülafilu tati melingechi sello, allcün tati melingechi cüme püllü ñi feipiel: “¡Amulenge!”. 8 Fei pefiñ quiñe cahuellu cochornagcülelu reque. Tati püracahuellulelu Lan pingei, tati Rüngan* inanieyu. Fei elungei autoridad quiñe troquiñ mapu meu, femngechi ñi langümcheal fütra cuchillo mu, ngüñün, huesa cutran ca mapu müleyechi huapo culliñ.

9 Ti Cordero nülafilu ti quechungechi sello, miñche altar* pefiñ tati mongen ñi müntuñmangeel* feichi pu che langümngelu. Langümngei engün tañi inaniefiel Chau Dios ñi dungu ca tañi huldunguel engün. 10 Fei engün nehuentu feipi: “Eimi Doi Fütra Ñidol, tati lifngelu ca rüfngelu, ¿tunteñmayaimi tami juzgayafiel pu che mülelu mapu meu? ¿Tunteñmayaimi tami huiñoleltuafiel ñi femün taiñ pu langümeteu?”. 11 Com engün elungei quiñe fütra lig tacun,* ca feipingei ñi doi pichi ürcütual deu trapümngele hula ñi tunten-ngen tañi pu chaf cüdaufe* ca com tañi pu peñi epeque langümngelu fei engün reque.

12 Pefiñ ti Cordero ñi nülafiel ti cayungechi sello. Rupai quiñe fütra nüyün, curünagi ti antü quiñe curü pañu reque,* ti cüyen com quelücünuhui mollfüñ reque. 13 Huenu mülechi huangülen ütrüfnagpai mapu meu chumngechi llancoquei ti carü higo fütra cürüf nengümfilu tati higuera anümca. 14 Ti huenu chumpolcünungei* quiñe chumpol lifru reque, fei ñamrumetui. Com tati huincul ca com ti huapi ngedunentungei* cheu ñi mülen. 15 Fei hula, mapu müleyechi lonco ülmen, pu fütraque autoridad, pu loncolechi soltau, pu ricu, pu nehuen-ngelu, com pu esclavo ca com pu lifre che ellcahuingün lolo meu ca huincul mülechi fütraque cura mu. 16 Feipimequefingün tati huincul ca tati fütraque cura: “Trañmanacümmuiñ, ca ellcalmuiñ taiñ penoaeteu feiti anülelu ti ülmen huancu meu ca taiñ ditunoaeteu ti Cordero ñi illcun.* 17 Deu puhui fei engu ñi fütra antü ñi pengelal tañi illcun,* ¿inei cai mongetripayafui?”.

7 Fei hula pefiñ meli cümeque püllü huitralelu tati meli huitran mapu meu.* Catrütuniefi ti cürüf meli huitran mapu meu cüpalu, femngechi ñi pimunoafiel ti mapu, lafquen ca quiñe anümca no rume. 2 Cafei pefiñ cangelu cüme püllü pürapalu tripahue antü püle. Nüniei chem ñi elueteu Chau Ngünechen tañi marcacheal. Fei nehuentu dungun mu huirarelfi tati meli cümeque püllü, fei engün elungerquei ñi huesalcayafiel ta mapu ca ti lafquen. 3 Feipifi engün: “Petu taiñ marcanofiel tol meu tati pu serfiquefilu ta Chau Ngünechen, huesalcalayafimün tati mapu, lafquen ca ti anümca no rume”.

4 Fei allcün tunten che marcacünungei: 144.000 che marcangelu com ti troquiñche meu ñi nieel pu Israel che.

5 Judá troquiñche mu, 12.000 che marcacünungei;

Rubén troquiñche mu, 12.000 che;

Gad troquiñche mu, 12.000 che;

6 Aser troquiñche mu, 12.000 che;

Neftalí troquiñche mu, 12.000 che;

Manasés troquiñche mu, 12.000 che;

7 Simeón troquiñche mu, 12.000 che;

Leví troquiñche mu, 12.000 che;

Isacar troquiñche mu, 12.000 che;

8 Zabulón troquiñche mu, 12.000 che;

José troquiñche mu, 12.000 che;

Benjamín troquiñche mu, 12.000 che.

9 Fei hula pefiñ quiñe fütra troquiñche, inei no rume pepi raquilaeyu. Itrofill troquiñche mu tuhui, itrofill tuhun niei, itrofill mollfüñ niei ca fillque quehun dunguquei. Tati ülmen huancu ca tati Cordero ñi adquiñ mu huitralei engün. Fütraque lig tacun* tucutuucülei engün ca nüniei engün tapül palmera. 10 Nehuentu dunguingün, mañumcülen mu feipimequeingün: “¡Taiñ Chau Ngünechen, feiti anülelu ti ülmen huancu meu, ca ti Cordero, montuleiñmu!”.

11 Com tati pu cümeque püllü huitralerquei, hualloñmanierquefi engün tati ülmen huancu, tati pu loncolelu ca tati meli püllü. Ti ülmen huancu ñi itrotripa meu pochongnagingün,* fei püramyefingün ta Chau Dios. 12 Feipi engün: “¡Felepe mai! Taiñ Chau Ngünechen niei quimün, nehuen ca pepiluhun, feimu mülei ñi püramyengeal, saquingeal, yamniengeal* ca mañumngeal rumel meu. Felepe mai”.

13 Fei quiñe tati pu loncolelu ramtueneu: “¿Inei am feichi pu che fütraque lig tacun* tucutuucülelu? ¿Cheu cüpai engün?” 14 Feimeu müten huiñoldungufiñ:* “Ñidol, eimi ta quimnieimi”. Fei feipieneu: “Tüfa engün tripai tati fütra cutrancahun mu. Ti Cordero ñi mollfüñ mu cüchacünuingün ñi fütraque tacun, femngechi ligcünutufingün.* 15 Feimu huitralerquei engün itrotripa Chau Ngünechen ñi ülmen huancu meu. Antü ca pun meu serfiquefingün ta Chau Ngünechen tañi ruca mu.* Fei tati anülelu ti ülmen huancu mu cuñiutucuaeyu engün.* 16 Ngüñühuelayai ca huihuhuelayai engün, huesalcalayaeyu engün ti antü ca fütraque are no rume. 17 Ti Cordero, feiti inaltu mülelu ti ülmen huancu meu, camañnieaeyu ca adnieaeyu engün tati hufco meu* hulquelu mongen. Chau Ngünechen liftuñmayaeyu ñi cülleñu tañi nge mu”.

8 Ti Cordero nülafilu ti reglengechi sello, huenu mu allcüngelai chem no rume rangiñ hora mu peno. 2 Fei pefiñ tati regle cümeque püllü huitralelu Chau Ngünechen tañi adquiñ mu. Tüfa engün elungei regle trompeta.

3 Fei puhui cangelu cüme püllü, nüniei quiñe oro pichi fraseru* ñi füchotungeal incienso.* Fei huitracünuhui inaltu altar meu. Elungei fentren incienso ñi füchotual ti oro altar meu mülelu ti ülmen huancu ñi adquiñ mu. Füchotulu ti incienso, ca mülefui ñi chalintucual ñi llellipuel Chau Ngünechen ñi pu che.* 4 Fei ti cüme püllü füchotulu ti incienso, Chau Ngünechen ñi adquiñ mu pürai ti fitrun* ca ñi llellipun Chau Ngünechen ñi pu che.* 5 Feimeu müten ti cüme püllü entui ailen* ti altar meu, apolfi ti pichi fraseru cheu füchotungei ti incienso, fei ütrüftucufi ti ailen mapu meu. Fei mülerquei tralcan, dungun, llüfqueñ* ca quiñe nüyün. 6 Fei tati regle cümeque püllü nielu ti regle trompeta pepicahuingün ñi dungulafiel.

7 Tati hunen cüme püllü dunguli ñi trompeta. Fei mapu meu ütrüftucungei pire* ca cütral reyülelu* mollfüñ engu. Lüfi quiñe troquiñ* mapu, quiñe troquiñ ti anümca ca com ti cachu.

8 Ti epungechi cüme püllü dunguli ñi trompeta. Fei lafquen mu ütrüftucungei quiñe fütra huincul reque üicülelu. Fei quiñe troquiñ* lafquen mollfüñcünuhui. 9 Lai quiñe troquiñ* lafquen mülechi mongen, ca quiñe troquiñ farcu teifücangei.

10 Ti cülangechi cüme püllü dunguli ñi trompeta. Fei huenu mu ütrüfnagpai quiñe fütra huangülen üicülelu quiñe cüdetuhue reque,* quiñe troquiñ* leufü ca ti hufco meu puhui.* 11 Ajenjo pingei feiti huangülen. Fei quiñe troquiñ co* ajenjocünuhui. Füretui ti co,* feimu fentren che lai.

12 Tati melingechi cüme püllü dunguli ñi trompeta. Fei dumiñnagi quiñe troquiñ* antü, quiñe troquiñ cüyen ca quiñe troquiñ huangülen. Feimu mülehuelai pelon quiñe troquiñ antü meu ca quiñe troquiñ pun no rume.

13 Adquintun, fei allcün quiñe ñamcu* rangi callfü huenu müpüyaulu, nehuentu dungun mu feipi: “Ti caquelu cüla cümeque püllü epe dungulniefi tañi trompeta. Feimu, ¡aungeai! ¡Aungeai! ¡Aungeai mai mapu müleyechi pu che allcüngele ñi dungulngeel tachi trompeta!”.

9 Ti quechungechi cüme püllü dunguli ñi trompeta. Fei adquintun quiñe huangülen huenu mu nagpalu. Mapu meu ütrüfnagpai, fei elungei tati fütraconchi lolo ñi llafe.* 2 Ti huangülen nülafi ti fütraconchi lolo, fei tripapai fitrun,* fütra horno mu tripachi fitrun reque. Fei tripalu ti fitrun, dumiñcünufi ti antü ca ti cürüf. 3 Fitrun mu tripai ta langosta,* mapu meu nagpaingün. Fei elungei nehuen, mapu müleyechi escorpion reque. 4 Feipingei ñi huesalcanoafiel mapu müleyechi cachu, pichique anümca ca fütraque anümca no rume. Feipingei ñi re huesalcayafiel tati pu che nienolu Chau Ngünechen ñi marca tañi tol meu.

5 Tati langosta elungelai* ñi langümafiel tati pu che, huelu mai ñi cutrancayafiel engün quechu cüyen. Ñi cutrancachen ti pu langosta trürümngeafui chumngechi cutrancachequei pu escorpion. 6 Feichi mu pu che quintuai chumngechi ñi layal, huelu pelayai engün. Rume ayüai ñi layal, huelu puulayai ñi layal.

7 Pu langosta ñi ad trürümngei cahuellu pepicaucülelu ñi hueichayal.* Lonco mu nierquei oro corona reque,* che ange reque niei engün. 8 Domo reque alüquei ñi lonco* ca nierquei foro trapial reque. 9 Pañillhue mu reque cuñiutucuniei ñi rücu. Tañi müpü allcüngei pu carreta cahuellu reque amulelu ñi hueichayal.* 10 Cafei tañi cülen mu chüncatuquei,* escorpion reque. Tañi cülen niei ta nehuen ñi huesalcayafiel pu che quechu cüyen. 11 Ti cüme püllü elfalcülelu ti fütraconchi lolo mu, lonco ülmencülei tüfachi pu langosta meu. Abadón* pingei hebreo quehun mu, ca griego quehun mu Apolión* pingei.

12 Ti hunen aungen dungu deu rupai. ¡Llihuatulemün!* Epulehuei ñi rupayal deu femtripale tüfachi dungu.

13 Ti cayungechi cüme püllü dunguli ñi trompeta. Fei allcün quiñe dungun tripalu feiti müta reque ñi nieel ti oro altar* Chau Ngünechen ñi adquiñ mu mülelu. 14 Fei feipingei tati cayungechi cüme püllü nielu ti trompeta: “Neicümfinge tati meli cümeque püllü trarilelu inaltu Éufrates pingechi fütra leufü mu”. 15 Tati meli cümeque püllü neicümngei ñi langümafiel quiñe troquiñ* tati pu che meu. Fei engün pepicangei ñi femal tüfachi dungu feichi hora, antü, cüyen ca tripantu.

16 Mülerquei 200 millon soltau püracahuellulelu. Iñche allcün ñi tunten-ngen engün. 17 Pu cahuellu ca ti pu püracahuellulelu ñi pefiel iñche ti afmatun dungu mu, femngechilei: ti pañillhue cuñiutucuquefilu ñi rücu quelülei cütral reque, callfülei jacinto pingechi rayen reque ca chodcülei azufre reque. Lonco trapial reque niei pu cahuellu, tañi hun mu tripai cütral, fitrun ca azufre. 18 Quiñe troquiñ* che lai tüfachi cüla huesaque dungu mu: ti cütral, fitrun ca ti azufre tripalu ti pu cahuellu ñi hun meu. 19 Pu cahuellu tañi hun ca tañi cülen meu niei ta nehuen. Tañi cülen filu reque felei ca niei ta lonco, cülen meu huesalcachequeingün.

20 Huelu ti pu caquelu che lanolu feiti huesaque dungu mu, huiñoraquiduamtulaingün tañi femün meu.* Fentecünulaingün ñi püramyefiel ti pu huecüfü ca tati pu adentun oro, plata, cobre, cura ca mamüll meu deumangelu. Tüfachi pu adentun peloquelai, allcüquelai ca trecaquelai rume. 21 Langümchequeingün, femqueingün calcu dungu, pod cudumuhun* ca hueñequeingün, huelu nor raquiduamtulaingün.

10 Pefiñ cangelu nehuen-ngechi cüme püllü huenu mu nagpalu, tromü ta impolnieyu,* ca nierquei quiñe relmu huente lonco mu. Antü reque felei tañi ad, ca tañi chang* fütraque orcon reque felei, cütral troquifali. 2 Tañi cuhu mu niei quiñe pichi chumpol lifru nülalelu.* Lafquen mu tucui tañi man namun, tañi huele namun mapu mu mülei. 3 Feimeu nehuentu dungun mu huirari quiñe trapial reque. Huirarlu, allcün regle tralcan ñi trününün.

4 Dungulu tati regle tralcan, epe huirintucufun. Huelu huenu mu allcün quiñe dungun, feipieneu: “Ellcacünufinge* ñi feipiel ti regle tralcan, huirintuculayafimi”. 5 Feichi cüme püllü tuculu ñi namun lafquen ca mapu meu, huenu mu huitrañpürami ñi man cuhu. 6 Fei feipicünui* Chau Ngünechen ñi üi mu, feiti rumel mongelequelu, tati deumafilu ti huenu ca com ñi mülen fei mu, tati deumafilu ti mapu ca com ñi mülen tüfa meu, tati deumalu ti lafquen ca com ñi mülen fei mu. Feipi: “Alüñmahuelayai. 7 Doi mai, epe puule ti reglengechi cüme püllü ñi dungulafiel tañi trompeta, rüf femtripayai Chau Ngünechen ñi ellcalechi dungu, tüfa tati cümeque dungu Chau Dios ñi quimelelfiel tañi pu cüdaufe, tañi pu huerquen”.

8 Fei huiño allcün ti dungun huenu mu nagpalu, feipieneu: “Amunge, nünge tati nülalechi chumpol lifru, tati cüme püllü ñi cuhu meu mülei, feiti tuculu ñi namun lafquen ca mapu meu”. 9 Fei amun cheu ñi mülen ti cüme püllü, feipifiñ tañi eluaeteu ti pichi chumpol lifru. Fei feipieneu: “Nünge ca ifinge ti chumpol lifru. Fürenagai* tami pütra meu, huelu hun mu cochüntuafimi miel reque”.* 10 Feimeu nüfiñ ti pichi chumpol lifru tati cüme püllü ñi cuhu meu mülelu, fei ifiñ. Tañi hun meu miel reque cochüi, huelu ifilu hula, füretui ñi pütra. 11 Fei feipingen: “Mülei tami huiño huldungual chem ñi rupayal pu troquiñche, fillque tuhun che, pu che fill quehun dungulu ca fentren lonco ülmen”.

11 Elungen quiñe rüngi ñi medial, fei feipingen: “Huitrapürange, mediafimi Chau Ngünechen ñi ruca,* ti altar ca com pu püramyequefilu ta Chau Ngünechen üye mu. 2 Huelu rulpacünuafimi ti lepün* huecuntu mülelu Chau Ngünechen ñi ruca mu, medilayafimi. Elcünulelngei tati pu troquiñche, tüfa engün rume huesalcayafi ti yamfal huaria 42 cüyen. 3 Fei huercüan tañi epu huldunguquelu. Huldunguaingu Chau Ngünechen ñi feipicünuel 1.260 antü, sacu mu tucutuhuaingün”. 4 Tati epu olivo anümca ca ti epu candelabro adentulei tüfachi epu huldunguquelu. Huitralerquei engu tati Ñidolcülelu mapu meu ñi adquiñ püle.

5 Inei rume cüpa huesalcafile tati epu huldunguquelu, tañi hun meu engu tripayai cütral ñi apümafiel tañi pu caiñe. Femngechi layai com tañi cüpa huesalcaeteu engu. 6 Fei engu niei ta nehuen ñi cerrantucuafiel ti callfü huenu, femngechi ñi mahunnoal petu huldungumequelu engu Chau Ngünechen ñi feipicünuel. Cafei nieingu nehuen ñi mollfüñcünuafiel ti co, ca ñi huesalcayafiel ti mapu itrofill huesaque dungu meu, tunten rupa ñi ayüel engu.

7 Fentecünule ñi huldungun engu, tati huapo huesa culliñ tripapatulu ti fütraconchi lolo meu* hueichayaeyu,* huehuaeyu ca langümaeyu engu. 8 Tati epu huldunguquelu ñi lachi cuerpo* tranalehueai ti fütra huaria ñi falin rüpü meu. Üye mu ca langümngei tañi Ñidol engu orcon mamüll mu. Sodoma ca Egipto adentulei feichi huaria. 9 Pu che caque rume mollfüñ nielu, fillque tuhun nielu, fill quehun dunguquelu ca fill troquiñche mu tuulu, adquintunieafingün ñi lachi cuerpo engu cüla antü ca rangiñ. Elungelayai ñi rüngaltucungeal tañi cuerpo. 10 Tüfachi epu huldunguquelu cutrancayafingün mapu müleyechi pu che. Feimu langümngele engu, pu che ayühuai ca fiestayai engün, hueluquentu eluhuaingün regalo.*

11 Deu rupalu ti cüla antü ca rangiñ, Chau Ngünechen elutueyu ñi neyen hulquelu mongen, fei huitrapüratuingu. Pu che pefilu tüfachi dungu, rume llicai. 12 Fei hula allcüingu quiñe nehuentu dungun huenu mu nagpalu, feipi: “Pürapamu”. Fei huenu mu püraingu quiñe tromü meu, tañi pu caiñe adquintunieyu.* 13 Feimeu müten* rupai quiñe fütra nüyün. Quiñe troquiñ* ti huaria mu teifünagi, fei 7.000 che lai ti nüyün meu. Pu caquelu che pellquelehuei, fei püramyefi engün ta Huenu Chau.

14 Deu rupai ti epungechi aungen dungu. ¡Llihuatulemün!* Püllelepai tati cülangelu.

15 Ti reglengechi cüme püllü dunguli ñi trompeta. Fei huenu mu allcüngei nehuentu dungun, feipi: “Taiñ Chau Ngünechen ca tañi Cristo deu ngüneniemequei tati pu che mapu meu mülelu, fei Lonco Ülmencüleai rumel meu”.*

16 Tati epu mari meli loncolelu anülerquei tañi ülmen huancu meu Chau Ngünechen tañi adquiñ mu, fei pochongnagingün* ca eluhuingün ñi püramyeafiel ta Chau Ngünechen. 17 Feipi engün: “Mañumuhuiyiñ Chau Ngünechen Jehová,* tati Com Nehuen Nielu, tati mongelelu, tati afquentu mülequelu. Tami fütra nehuen mu eluhuimi tami ngünenieal. 18 Huelu ti pu troquiñche rume illcui,* fei eimi pengelimi tami illcun.* Fei puhui ti medin antü ñi juzgangeal tati pu layelu, ca ñi elungeal tañi cullitu tami pu cüdaufe, tami pu huerquen, cafei eimi tami pu che ca tati pu yamniefilu tami üi,* tati pu illamcangelu ca tati pu falin chengelu. Cafei apümcangeai tuchi huesalcamequefilu ta mapu”.

19 Feimeu nülatripai Chau Ngünechen ñi ruca huenu mu mülelu. Üye mu pengei ti falin caja pengelquelu Chau Ngünechen ñi eldungu. Fei tripai llüfqueñ,* dungun, tralcan, quiñe nüyün ca fütraque pire.*

12 Fei huenu mu pengei quiñe fütra afmatun dungu: quiñe domo. Tañi tacun huilüfcülei antü reque, tañi miñche namun meu nierquei ti cüyen. Lonco mu yeniei quiñe corona mari epu huangülen nielu. 2 Niepüñeñcülerquei. Huirarmequei fente tañi cutrancaumequen ñi choyüafiel tañi püñeñ.

3 Ca quiñe afmatun dungu pengei huenu mu. Mülerquei quiñe llicafalchi fütra filu, quelülei cütral reque. Niei regle lonco ca mari müta, tañi lonco meu nierquei regle corona. 4 Tañi cülen meu huingüdyefi quiñe troquiñ* huenu mülechi huangülen, fei mapu meu ütrüfnacümpafi. Tati llicafalchi fütra filu huitrañmaniefi tati domo epe choyülelu, pepicaucülei ñi lümüafiel tati pichiche choyüngele müten.

5 Ti domo choyüi quiñe huentru püñeñ. Fei tüfa pañillhue retrü mu ngünenieafi* com pu troquiñche. Fei ti pichiche yefemngei ta Chau Dios mu, tañi ülmen huancu meu mülelu. 6 Fei ti domo lefmahui huellin mapu meu.* Üyeu Chau Dios pepicalelnieyu quiñe mülehue, femngechi tañi elungeal iyael 1.260 antü.

7 Fei huenu mu mülerquei ta hueichan.* Miguel* ca tañi pu cümeque püllü hueichafingün tati llicafalchi fütra filu. Tüfachi fütra filu ca tañi pu huesaque püllü ca hueichaingün. 8 Huelu pepi hueulaingün,* fei elungehuelai ñi müleal huenu meu. 9 Fei ti llicafalchi fütra filu mapu meu ütrüfnacümngepai, fei tüfa tati cuifi fütra filu, Huecüfü ca Satanás pingelu. Fei ngünencamequefi com mapu müleyechi pu che. Mapu mu ütrüfnacümngepai quiñentrür tañi pu huesaque püllü engün. 10 Fei huenu mu allcün quiñe nehuentu dungun, feipi:

“¡Taiñ Chau Ngünechen montulfi tati pu che, fei quimfalngei tañi nehuen! Eluhui tañi ngünenieal, ca tañi Cristo llohui autoridad. Ütrüfnacümngepai feiti dalluntucuquefilu taiñ pu peñi, antü ca pun meu dalluntucuquefi engün taiñ Chau Ngünechen ñi adquiñ meu. 11 Huelu fei engün hueutripaingün tati Cordero ñi mollfüñ mu ca ti huercün dungu ñi huldunguel engün. Piuqueyelafingün tañi mongen, feimu llicalaingün ñi layal. 12 Feimu llemai, ¡ayüucülemün eimün tati pu mülelu huenu meu! Huelu, ¡aungei ti mapu ca ti lafquen! Huecüfü nagpui ta eimün meu. Fütra illculei,* quimniei ñi pichilehuen tañi antü”.

13 Ti llicafalchi fütra filu ngüneduamlu ñi ütrüfnacümngepan mapu meu, eluhui ñi inantucuafiel ti domo choyülu tañi huentru püñeñ. 14 Huelu ti domo elungei epu müpü quiñe fütra ñamcu reque,* femngechi ñi müpüal* tañi mülehue mu huellin mapu meu. Fei elungeai iyael, cafei camapuleai ti fütra filu ñi adquiñ meu* cüla tripantu ca rangiñ.*

15 Tati fütra filu tañi hun meu hutrunentui co, quiñe leufü reque, fei ñi diturpuafiel tati domo tañi ürfial. 16 Huelu ti mapu quellupafi ti domo. Nülatripai, fei lümüfi ti leufü ti fütra filu ñi hun meu tripalu. 17 Feimu ti llicafalchi fütra filu rume illcutufi* tati domo, fei tripai ñi hueichayafiel tati domo ñi pu püñeñ petu mülehuelu. Tüfa engün inaniequei Chau Ngünechen ñi huercün dungu ca elfalcünulelngei ñi huldungual Jesús meu.

13 Ti llicafalchi fütra filu huitracünuhui ti cuyüm lafquen meu.

Fei pen ñi tripapan lafquen meu quiñe huapo huesa culliñ. Mari müta nierquei ca regle lonco. Tañi müta meu yeniei mari corona, tañi lonco meu nierquei fillque üi caiñetudungufilu ta Chau Ngünechen. 2 Quiñe fütra auca ñarqui reque felei* ti huapo huesa culliñ. Niei oso namun ca trapial hun. Ti llicafalchi fütra filu elueyu tañi nehuen, tañi ülmen huancu ca fütra autoridad.

3 Pefiñ ñi fütra allfülen quiñe tañi lonco. Epe lafui, huelu tremolngetui* tañi huesa allfen. Com mapu müleyechi pu che afmatufi ti huapo huesa culliñ ca inaniefi. 4 Püramyefingün ti llicafalchi fütra filu ñi elufiel autoridad tati huapo huesa culliñ, ca püramyefingün ti huapo huesa culliñ, feipingün: “¿Inei cai trürcüleafui ti huapo huesa culliñ meu? ¿Inei hueichayafeyu?”.* 5 Elungei quiñe hun ñi mallma dungual ca ñi caiñetudunguafiel ti yamfalngelu.* Cafei elungei autoridad tañi femal chem ñi ayünieel 42 cüyen. 6 Fei nülai tañi hun ñi caiñetudunguafiel ta Chau Ngünechen, tañi üi ca tañi mülehue. Felei llemai, ñi caiñetudunguafiel com pu mülelu huenu meu. 7 Ti huapo huesa culliñ elungei ñi hueichayafiel* ca huehuafiel Chau Ngünechen ñi pu che.* Cafei elungei ñi autoridadcüleal fillque tuhun che meu, fillque mollfüñ che, quehun ca troquiñche. 8 Fei com mapu müleyechi pu che püramyeafingün tati huapo huesa culliñ. Hue choyüngelu pu che ta fantepu meu, quiñe no rume tañi üi huirintuculelai tati langümngeelchi Cordero ñi lifru meu. Tüfachi lifru mu huirintuculei inei tañi mongeleal.

9 Tuchi pepi allcülu, allcütupe. 10 Inei rume mülele ñi presungeal, presungeai. Inei rume langümchele* fütra cuchillo meu, ca femngechi langümngeai fütra cuchillo mu. Feimu Chau Ngünechen ñi pu che* duamnieingün ñi nehuentuleal ca ñi feyentuleal.

11 Fei pefiñ cangelu huapo huesa culliñ mapu mu tripapalu. Nierquei epu müta cordero reque, huelu eluhui ñi dungual quiñe llicafalchi fütra filu reque. 12 Tati hunen huapo huesa culliñ ñi adquiñ meu pengelquei ñi nieel ca femngechi autoridad. Fei tañi duam mu, ti mapu ca tati pu che püramyequefingün tati hunen huapo huesa culliñ, tüfa tati tremolngetulu ñi huesa allfen. 13 Fütraque afmatun dungu femquei. Cafei huenu meu nacümpaquei* cütral ta mapu meu com pu che ñi adquiñ meu.

14 Tati huapo huesa culliñ ñi adquiñ meu elungei ñi femal afmatun dungu. Femngechi ngünencaquefi mapu müleyechi pu che ca feipimequefi engün ñi deumalelafiel quiñe adentun tati huapo huesa culliñ. Fei tüfa fütra cuchillo meu allfüngerquei, huelu tremotui. 15 Tati epungechi huapo huesa culliñ eluñmangei ñi eluafiel mongen* tati hunen huapo huesa culliñ ñi adentun, femngechi ti adentun ñi nentual tañi dungun, cafei ñi langümfalafiel com pu pinolu ñi püramyeafiel tati hunen huapo huesa culliñ ñi adentun.

16 Obligaquefi* com pu che ñi marcangeal tañi man cuhu cam tañi tol, pu illamcangelu ca pu falin chengelu, pu ricu ca pu pofre, pu lifre che ca tati pu esclavo. 17 Feimu inei rume nienole ti marca, tati huapo huesa culliñ ñi üi cam tañi numero, pepi ngillalayai ca pepi fendelayai. 18 Tuchi nielu quimün loncontucuai tüfachi dungu: tati adümuhun nielu ngüneduampe tati huapo huesa culliñ ñi numero, pu che mu tuhui tüfachi numero: 666.

14 Pefiñ ti Cordero huitralelu Sion pingechi huincul meu, compañnieyu 144.000 che. Tañi tol meu huirintucuniei engün tati Cordero ñi üi ca tañi Chau ñi üi. 2 Allcün quiñe raracün huenu mu tripalu. Fentren co reque* allcüngei ca fütra tralcan reque. Feichi raracün fillque ülcantufe reque felei dungulquefilu tañi arpa. 3 Fei engün ülcantumequei itrotripa ti ülmen huancu meu. Tati meli püllü ca tati pu loncolelu ñi adquiñ meu ülcantumequeingün quiñe hue ülcantun reque. Inei no rume cüme quimquelafui tüfachi ülcantun, tati 144.000 che müten. Tüfa engün mapu meu ngillanentungei. 4 Fei engün pod cudumuulai chem domo engu no rume, cafei lif chengeingün.* Inaniefingün ti Cordero cheu rume ñi amuquen. Fei engün rangiñ pu che meu ngillanentungei tati hunen huefpachi fün quetran reque, femngechi ñi chalintuculelngeal ta Chau Ngünechen ca tati Cordero. 5 Ngünenca dunguquelaingün rume, nielaingün chem huelulcan no rume.

6 Fei pefiñ cangelu cüme püllü müpüyaulu* rangiñ ti callfü huenu meu. Miyahuli afquenochi cümeque dungu ñi huldungulelafiel tati pu che mapu meu mülelu, tati pu che com troquiñche mu cüpalu, caque tuhun nielu, itrofill quehun dunguquelu, caque rume mollfüñ nielu. 7 Nehuentu dungun mu feipimequei: “Puhui mai ti antü Chau Ngünechen ñi juzgayafiel tati pu che. Feimu rume yamniefimün* ca saquiafimün. Püramyefimün tati deumalu ti huenu, ti mapu, ti lafquen ca tati hufco”.*

8 Fei hula tripai cangelu cüme püllü, ti epungelu. Feipi: “¡Hueungei ti Fütra Babilonia! ¡Hueungei llemai! Tüfa ngüchaltucufi com pu troquiñche ñi putual* tañi pulcu. Tüfachi pulcu huedhuedcalchequei pod cudumuhun mu”.*

9 Ca quiñe cüme püllü inalen tripai, ti cülangelu. Nehuentu feipimequei: “Tuchi püramyefile ti huapo huesa culliñ ca tañi adentun, cafei marcacünungele tañi tol cam tañi cuhu, 10 ca femngechi putuai Chau Ngünechen ñi pulcu, fei tüfa tañi fütra illcun.* Feichi pulcu reyüngelai,* Chau Ngünechen ñi copa meu putungequei. Tüfachi copa meu mülei Chau Ngünechen ñi fütra illcun.* Cafei cütral engu azufre meu cutrancangeai feichi che tati pu dullin cümeque püllü ñi adquiñ meu ca tati Cordero ñi adquiñ meu. 11 Af fitrulayai* ti cütral cheu ñi cutrancangen engün. Cafei tati pu püramyefilu ti huapo huesa culliñ ca tañi adentun, antü ca pun meu cutrancangeai engün, fentecünungelayai. Ca femngechi femngeai tati pu marcacünungelu tati huapo huesa culliñ ñi üi meu. 12 Feimu llemai, Chau Ngünechen ñi pu che* duamniei ñi nehuentuleal. Fei engün inaniequei Chau Dios ñi huercün dungu ca tañi mongen mu pengelqueingün ñi feyentufiel ta Jesús”.

13 Fei allcün quiñe dungun huenu mu nagpalu, feipi: “Huirintucunge tüfachi dungu: ‘Feula mai, lale quiñe che inaniefilu ta Ñidol* ayüucüleai. Felei, Chau Ngünechen ñi nehuen feipi, cansatupe engün tañi fentren cüdau mu. Chau Dios loncontucuniei tañi cümeque femün engün’”.

14 Fei pen quiñe lig tromü,* fei meu anülerquei quiñe huentru ñi fotüm reque. Lonco meu yeniei quiñe oro corona,* cuhu mu niei quiñe yungechi ichona.

15 Chau Ngünechen ñi ruca mu* tripai cangelu cüme püllü. Fei nehuentu dungun mu feipifi tati anülelu ti tromü meu: “¡Deu ancüi ti ngan quetran, puhui ti antü ñi cosechangeal! Feimu tami ichona meu cosechafinge ti mapu”. 16 Feimu tati anülelu tromü meu, tañi ichona meu cosechafi tati ngan quetran mapu meu.

17 Ca quiñe cüme püllü tripai Chau Ngünechen ñi ruca* huenu mu mülelu. Fei ca nierquei quiñe yungechi ichona.

18 Altar meu tripai cangelu cüme püllü, elfalcülei ti cütral meu. Nehuentu dungun mu feipifi feichi nielu ti yungechi ichona: “¡Deu afüi ti ofad! Feimu tami yungechi ichona meu catrünentufinge ti ofad mapu müleyechi anüm ofad meu”. 19 Ti cüme püllü tañi ichona meu catrünentufi mapu mülechi anüm ofad. Fei ütrüftucufi cheu ñi cütrüngequen fentren ofad, fei tüfa ta adentulei Chau Ngünechen ñi fütra illcun.* 20 Huecuntu huaria mu ti pu cahuellu pünofingün ti anüm ofad. Rume fentren mollfüñ tripai, pu cahuellu ñi lonco meu puhui ti mollfüñ ca hutrutripai epe 300 kilometro.*

15 Huenu mu pen quiñe fütra afmatun dungu falin-ngelu. Pefiñ regle cümeque püllü cüpalnielu regle huesaque dungu. Tüfa tati afchi huesaque dungu, femngechi fentecünuai Chau Ngünechen ñi fütra illcun.*

2 Cafei pen quiñe lafquen reque vidrio deumangelu, reyülerquei* cütral mu. Ca pefiñ tati pu hueufilu ti huapo huesa culliñ, tañi adentun ca tañi üi ñi numero. Huitraleingün inaltu ti lafquen vidrio deumangelu, nünieingün Chau Dios ñi arpa. 3 Ülcantumequeingün Moisés ñi ül, tati cüdahuelquefilu ta Chau Dios, ca ülcantumequeingün tati Cordero ñi ül. Feipi engün:

“Chau Ngünechen Jehová* alün-ngei ca afmatufali tami deuman. Eimi com nehuen nieimi. Norngei ca rüfngei tami femquen. Eimi tati Lonco Ülmen rumel mülequelu. 4 Chau Jehová,* ¿inei cai yamnielayafeimu?* ¿Inei cai püramyelayaimu tami üi? Eimi müten ta manelfalngeimi. Com pu troquiñche cüpayai eimi tami adquiñ meu, fei püramyengeaimi. Fei engün ngüneduamquei tami nor juzgachequen”.

5 Fei hula pefiñ ñi nülatripan ti Doi Yamfal Mülehue ti tolto ruca mu mülelu.* Tüfa ta nierquei chem ñi quimfalcünuel Chau Ngünechen. 6 Fei tüfa mu tripai ti regle cümeque püllü cüpalnielu ti regle huesaque dungu. Tañi tacun engün lifcülei ca huilüfi, oro trarihue reque* yenieingün tañi rücu mu. 7 Quiñe tati meli püllü elufi tati regle cümeque püllü regle oro metahue. Feichi metahue apolerquei Chau Ngünechen ñi fütra illcun meu.* Chau Ngünechen rumel mülequei. 8 Fente tañi afmatufalngen Chau Ngünechen ca tañi nehuen-ngen, fitruñmai tañi ruca.* Inei no rume pepi conpulai Chau Ngünechen ñi ruca meu fentecünule hula ti regle huesaque dungu cüpalnielu ti regle cümeque püllü.

16 Fei allcün quiñe nehuentu dungun Chau Ngünechen ñi ruca mu tripalu. Feipingei tati regle cümeque püllü: “Amumün, fei hutrunacümafimün mapu meu ti regle metahue, tüfa ta adentulei Chau Ngünechen ñi fütra illcun”.*

2 Ti hunen cüme püllü amui, fei mapu meu hutrunacümi tañi metahue. Fei quiñe rume huesa allfen cutrancafi tati pu che. Tüfachi pu che nierquei tati huapo huesa culliñ ñi marca ca püramyefingün tañi adentun.

3 Ti epungechi cüme püllü hutrunacümi tañi metahue lafquen meu. Quiñe lachi che ñi mollfüñ reque feletui ti lafquen, fei com ti mongelelu lafquen mu lai.

4 Ti cülangechi cüme püllü hutrunacümi tañi metahue leufü ca hufco meu.* Fei com mollfüñcünuhui. 5 Fei allcüfiñ ti cüme püllü elfalcülelu co meu, feipi: “Eimi tati mongelelu, tati afquentu mülequelu, tati manelfalngelu. Eimi nor dungu femqueimi, feimu feipicünuimi ñi rupayal tüfachi dungu. 6 Fei engün langümüñmaeimu tami pu che* ca tami pu huerquen, hutrulfingün tañi mollfüñ, feimu elufimi ñi pütocoal mollfüñ. Femngechi huiñolelngetui tañi huesa femün”. 7 Fei allcün quiñe dungun altar mu tripalu, feipi: “Felei llemai, Chau Ngünechen Jehová,* tati Com Nehuen Nielu, rüfngei ca norngei tami juzgachequen”.

8 Ti melingechi cüme püllü hutrunacümi tañi metahue antü meu. Feimu ti antü elungei ñi lüpümafiel ti pu che cütral meu. 9 Fei fütra are mu lüfi ti pu che. Tüfachi pu che nor raquiduamtulaingün, caiñetudungufingün Chau Ngünechen ñi üi, püramyelafingün rume ta Chau Ngünechen, feiti nielu nehuen tüfachi huesaque dungu meu.

10 Ti quechungechi cüme püllü hutrunacümi tañi metahue tati huapo huesa culliñ ñi ülmen huancu meu. Fei com tañi ngünenieel dumiñnagi. Feimu tati pu che quisu ünatui tañi quehun fente tañi cutrantun engün. 11 Huelu caiñetudungufingün ta Chau Dios huenu mu mülelu fente tañi cutrantun ca tañi allfülen engün. Tüfachi pu che huiñoraquiduamtulaingün tañi huesa femün mu.

12 Ti cayungechi cüme püllü hutrunacümi tañi metahue Éufrates pingechi fütra leufü meu. Fei arcüi tañi co, femngechi tañi pepicalelafiel ti rüpü tati pu lonco ülmen tripahue antü püle cüpalu.

13 Fei pefiñ ti llicafalchi fütra filu, tati huapo huesa culliñ ca ti huentru Chau Ngünechen ñi huerquen femfaluuquelu. Quisuque tañi hun mu engün tripai ünufal huercün dungu,* pacarhua troquifali. 14 Pu huecüfü mu tuhui tüfachi huercün dungu, com mapu müleyechi pu lonco ülmen allcütufi. Tüfachi huercün femquei afmatun dungu, femngechi ñi trahulafiel pu lonco ülmen hueichan mu.* Feichi hueichan rupayai Chau Ngünechen ñi fütra antü meu, tati Com Nehuen Nielu.

15 “¡Allcütunge! Hueñefe reque cüpalen. Ayühun niei tuchi trepeluucülelu* ca tucutuucülelu. Femngechi triltrangquiyaulayai ca tati pu che pelayai tañi yehuen”.

16 Fei trahulfingün tati pu lonco ülmen Armagedón meu,* femngechi pingequei feichi lof hebreo quehun mu.

17 Tati reglengechi cüme püllü hutrunacümi tañi metahue cürüf meu. Feimu quiñe nehuentu dungun tripai ti ülmen huancu meu Chau Ngünechen ñi ruca mu mülelu, feipi: “¡Deu rupai tati!”. 18 Fei tripai llüfqueñ,* dungun, tralcan, ca rupai quiñe fütra nüyün. Elcünungelu ta che mapu mu ta fantepu meu turpu rupaquelafui femngechi fütra nüyün, rume nehuen-ngei. 19 Ti fütra huaria cüla troquiñcülehuei, tati pu troquiñche ñi huaria com teifünagi. Cafei Chau Ngünechen acordafi* ti Fütra Babilonia, fei ñi eluafiel tañi copa pulcu, tüfa ta niei Chau Ngünechen ñi fütra illcun.* 20 Cafei com pu huapi lefmahuingün ca tati pu huincul ñamnagi. 21 Huenu mu nagpai fütraque pire* cura reque, fei trañmanacümpafi tati pu che. Quisuque tati pire 20 kilo fanepelai.* Tati pire mu com huesalcaletui, feimu tati pu che caiñetudungufi ta Chau Ngünechen.

17 Quiñe tati pu regle cümeque püllü nielu ti regle metahue feipipaeneu: “Cüpange, pengelelayu chumngechi cutrancangeai* ti fütra cüri domo,* feiti anülelu fentren co meu. 2 Mapu müleyechi lonco ülmen pod cudumuhui* tüfachi cüri domo engün. Mapu müleyechi pu che ngollicahuingün ti domo ñi pulcu meu. Tüfachi pulcu adentulei tañi femquen pod cudumuhun”.*

3 Chau Ngünechen ñi nehuen mu ti cüme püllü yeeneu huellin mapu meu.* Feimu pen quiñe domo, anülerquei huente quiñe huapo huesa culliñ meu. Ti culliñ quelüngei, com püle nierquei fentren üi caiñetudungufilu ta Chau Ngünechen. Regle lonco nierquei ca mari müta. 4 Coñol tacun* ca quelü tacun yeniei ti domo, adelcaucülei oro meu,* falinque cura ca llancatu.* Cuhu mu niei quiñe oro copa, tüfa apolei ünufal dungu mu ca tañi podngechi femün pod cudumuhun mu.* 5 Tol meu huirintucuniei quiñe üi, quiñe quimngenochi dungu. Feipilei: “Tati Fütra Babilonia, ñuque reque felei pu cüri domo meu ca ti mapu müleyechi ünufal dungu”. 6 Fei pefiñ ti domo, ngollilerquei ti mollfüñ tripalu Chau Ngünechen ñi pu che meu* ca pu huldunguquelu Jesús mu.

Pefilu iñche, rume afmatulehuen. 7 Feimu ti cüme püllü feipieneu: “¿Chumngelu* afmatulehueimi? Iñche nütramcalelayu tati quimngenoelchi dungu ti domo meu ca tati huapo huesa culliñ cheu tañi püralen, feiti nielu regle lonco ca mari müta. 8 Ti huapo huesa culliñ tami pefiel mülequefui, feula mülehuetulai, huelu epe tripaletui ti fütraconchi lolo meu* ca amulei ñi apümcangeal. Mapu müleyechi pu che afmatulehueaingün ñi pefiel tati huapo huesa culliñ. Tüfa mülequefui, feula mülehuetulai, huelu huiño mületuai. Hue choyüngelu pu che mapu meu ta fantepu mu, feichi pu che ñi üi huirintuculelai ti mongen ñi lifru meu.

9 Duamfali quimün ñi adümngeal tüfachi dungu. Ti regle lonco adentulei regle huincul, tüfa mu anülei ti domo. 10 Mülei regle lonco ülmen: quechu ta falihuelai,* quiñe ta mülei, cangelu petu aculai, huelu acule, pichiñma mülenagai. 11 Ti huapo huesa culliñ, fei tati purangechi lonco ülmen, tüfa tati mülequefulu, huelu feula mülehuetulai. Tati cangelu regle lonco ülmen mu tripai ca amulei ñi apümcangeal.

12 Tati mari müta tami peel adentulei mari lonco ülmen, petu elungelai ñi ngünenieal. Huelu quiñe hora elungeai autoridad ñi lonco ülmencüleal quiñentrür tati huapo huesa culliñ engu. 13 Quiñeucülei tañi raquiduam engün, feimu elufingün tañi pepiluhun ca autoridad tati huapo huesa culliñ. 14 Fei engün hueichayafi* tati Cordero, huelu ti Cordero huehuaeyu engün, fei Ñidolcülei com pu ñidol meu, ca Lonco Ülmencülei com pu lonco ülmen mu. Tati pu compañniefilu ti Cordero ca hueutripayaingün, fei engün tati pu mangelngelu, dullingelu ca manelfalngelu”.

15 Ti cüme püllü ca feipieneu: “Tati co tami peel cheu ñi anülen ti cüri domo, adentulei pu che fillque mollfüñ nielu, fütraque trahunche, fillque troquiñche ca pu che fillque quehun dungulu. 16 Ti mari müta tami peel ca ti huapo huesa culliñ üdeafingün tati cüri domo, müntuñmayafingün* com tañi nieel ca triltrangcünuafingün. Iñmayafingün tañi fün ca com lüpümafingün. 17 Chau Dios raquiduamelfi engün ñi femal tañi ayünieel. Quiñeucülei tañi raquiduam engün, eluucülei engün ñi eluafiel autoridad tati huapo huesa culliñ ñi lonco ülmencüleal femtripale hula Chau Dios ñi feipin. 18 Ti domo tami peel adentulei ti fütra huaria, tüfa ngüneniefi tati pu lonco ülmen mapu mu mülelu”.

18 Fei hula pefiñ cangelu cüme püllü, huenu mu nagpai, fütra autoridad nierquei. Fente tañi afmatufalngen, alofcülehuei ti mapu. 2 Fei nehuentu dungun mu feipi: “¡Hueungei ti Fütra Babilonia! ¡Hueungei llemai! Pu huecüfü ñi ruca felehuetui, tüfa mu ellcauquei com pu huesaque püllü* ca com tati pod üdefal üñüm.* 3 Huesalcafi com pu troquiñche tañi pulcu meu, tüfachi pulcu huedhuedcalchequei pod cudumuhun mu.* Mapu müleyechi lonco ülmen pod cudumuhui tüfachi domo engün. Cafei pu negociante mapu mu mülelu ricuingün tati domo ñi falinque fillem meu, fei yehuequelai ñi ngülümnieel fentren falinque fillem”.

4 Fei allcün ca quiñe dungun huenu mu cüpalu, feipi: “Saquin troquiñche, tripatumün fei mu. Femngechi culpaconlayaimün* fei tañi huesa femün mu, ca ditungelayaimün tañi cutrancangen mu. 5 Raquifal-lai rume fente tañi culpan,* feimu Chau Ngünechen juiciantucuaeyu tañi huesaque femün meu. 6 Chumngechi ñi femfiel ta caquelu che, ca femngechi femafimün, epu rupa huiñoleltuafimün. Quisu tañi copa ñi pepicael, epuchi rupa pepicalelafimün tañi pütocoal. 7 Quisu rume saquiuquei ca yehuequelai ñi ngülümel fentren falinque fillem, feimu mülei ñi rume cutrancahual ca hueñancüleal. Fei feipimequei tañi piuque mu: ‘Ülmen domo reque ngüneniemequen, lantu domolelan, feimu turpu hueñancülelayan’. 8 Feimu llemai quiñe antü mu müten rupayai tañi cutrancahun, lan dungu, hueñancün ca ngüñün, fei com lüpümngeai. Chau Ngünechen Jehová ta juzgaeyu,* fei ta nehuen-ngei.

9 Mapu müleyechi lonco ülmen pod cudumuhui* tüfachi domo engün. Cafei tati domo yehuequenolu ñi ngülümel falinque fillem, pu lonco ülmen allmalltuingün. Pefile engün ñi fitrumequen* tati domo ñi lüpümngeel, ngümacahuaingün ca quimfalcünuaingün ñi rume hueñancülen tati domo ñi duam mu. 10 Llicaleaingün ñi cutrancangeal tati domo reque, feimu pichi camapucünuhuaingün, huitracünuhuaingün. Fei feipiaingün: ‘¡Müna huesa! ¡Müna huesa! Eimi tati fütra huaria Babilonia, tati nehuen huaria. ¡Quiñe hora mu müten puhui tami cutrancangeal!’.

11 Cafei pu negociante mapu mu mülelu ngümacahuaingün ca hueñancüleaingün ti domo meu. Inei no rume ngillañmalayaeyu com tañi chemcün engün, 12 tañi oro,* plata, falinque cura, llancatu,* cüme lino, coñol pañu,* seda ca quelü pañu. Cafei itrofill chemcün deumangelu cüme nümün-ngechi mamüll meu, marfil, cümeque trafla, cobre, pañillhue cam marmol deumangelu. 13 Cafei canela, cüme nümün-ngechi tapül India mapu mu cüpalu, incienso,* cüme nümün-ngechi aceite, olibano, pulcu, oliva aceite, cüme rüngo, cachilla, huaca, ufisa, cahuellu, carreta, esclavo ca caquelu che. 14 Felei, müntuñmangeimi* ti cümeque dungu tami ayüqueel.* Ngehuelai eimi meu cümeque iyael ca tutengechi dungu. Chumcaunorume huiñotulayai.

15 Pu negociante fendequefuingün tüfachi dungu ca ricurpuingün fei tañi duam mu. Llicaleaingün ñi cutrancangeal feichi domo reque. Feimu pichi camapucünuhuaingün, fei ngümacahuaingün ca hueñancüleaingün. 16 Feipiaingün: ‘¡Müna huesa! ¡Müna huesa! Tati fütra huaria tucutuucülefui cüme lino mu, coñol tacun* ca quelü tacun. Adelcauquefui oro meu,* falinque cura ca llancatu.* 17 ¡Quiñe hora mu müten apümcangei fütra falinque chemcün!’.

Fei com pu capitancülelu farcu meu, com pu miyauquelu farcu mu ca pu cüdauquelu tüfa mu pichi camapucünuhuingün. 18 Adquintufilu engün ñi fitrumequen ti huaria ñi lüpümngeel, huiraringün: ‘¡Chem huaria trürümngeafui tüfachi fütra huaria mu!’. 19 Trufür tucuhuingün lonco meu, fütra hueñancün mu ngümacahuingün ca huiraringün: ‘¡Müna huesa! ¡Müna huesa! Ti fütra huaria tañi falinque fillem mu ricuingün com pu ngen farcu. ¡Quiñe hora mu müten apümcangei tüfachi huaria!’.

20 ¡Eimün pu huenu mu mülelu, Chau Ngünechen ñi pu che,* ñi pu huerquen ca pu apostol,* ayüucülemün tüfachi dungu mu! Chau Ngünechen juiciantucufi ti domo tamün huesalcaeteu mu”.

21 Fei quiñe nehuen-ngechi cüme püllü huitrañpürami quiñe fane fütra cura, fei lafquen mu ütrüftucufi. Feipi: “Femngechi lef ütrüfnacümngeai ti fütra huaria Babilonia, fei chumcaunorume pengehuelayai. 22 Allcüngehuelayai eimi mu ülcantufe dungulmequefilu tañi arpa, pu musico, pu dungulquelu flauta* ca pu dungulquelu trompeta no rume. Ca pengehuelayai eimi mu inei no rume cüdauquelu tañi cuhu meu. Allcüngehuelayai eimi meu ti cura rüngümquetranquelu. 23 Turpu alofhuelayai eimi meu quiñe pelontuhue no rume. Allcüngehuelayai eimi mu ñi dungun quiñe novio cam quiñe novia no rume. Tami pu negociante falinque huentrungerpuingün mapu meu, ca tami calcu dungu mu ngünencafimi com pu troquiñche mapu meu. 24 Felei llemai, Chau Ngünechen ñi pu che* ca tañi pu huerquen ca com pu langümngelu mapu meu, hutrulngei tañi mollfüñ engün tüfachi huaria mu”.

19 Fei hula allcün fentren che ñi nehuentu dungun reque huenu mu. Feipimequeingün: “¡Püramyengepe ta Chau Jehová!* Taiñ Chau Ngünechen montulchequei, niei fentren nehuen ca saquifalngei. 2 Manelfali tañi nor juzgachequen. Apümcafi tati fütra cüri domo* ñi huesalcafiel ti mapu tañi pod cudumuhun mu.* Tüfachi cüri domo langümfi pu cüdahuelquefilu ta Chau Dios, feimu huiñoleltueyu tañi huesa femün”. 3 Feimeu müten ca huiño feipingün: “¡Püramyengepe ta Chau Jehová!* Babilonia huaria aflayai ñi fitrumequeal”.*

4 Ti epu mari meli loncolelu ca ti meli püllü lucutunagingün, fei püramyefingün ta Chau Ngünechen, feiti anülelu ülmen huancu meu. Feipingün: “¡Felepe mai! ¡Püramyengepe ta Chau Jehová!”.*

5 Cafei ti ülmen huancu mu tripai quiñe dungun. Feipi: “Püramyefimün taiñ Chau Ngünechen com eimün, tañi pu cüdahuelqueteu, tañi pu yamnieteu,* tati pu illamngelu ca ti pu falin chengelu”.

6 Fei allcün fentren che ñi dungun reque, fentren co reque allcüngei, fütraque tralcan reque. Feipimequeingün: “¡Püramyengepe ta Chau Jehová!* ¡Taiñ Chau Ngünechen Jehová,* feiti Com Nehuen Nielu, deu eluhui tañi ngünenieal! 7 Rumeñma ayüucüleaiñ ca püramyeafiyiñ. Puhui llemai ti Cordero ñi mafün antü, pepicaucülei tañi domo. 8 Felei llemai, tati domo elungei ñi tucutuhual cüme lino meu, huilüfcülelu ca lifcülelu. Ti cüme lino adentulei ñi cümeque femün Chau Ngünechen ñi pu che”.*

9 Ti cüme püllü feipieneu: “Huirintucunge tüfachi dungu: ‘Ayühun niei tati pu mangelngelu ti Cordero ñi mafün meu’”. Ca feipi: “Tüfa ta Chau Ngünechen ñi rüfngechi dungun”. 10 Feimu pochongnagün* ti cüme püllü ñi namun püle, ayüfun ñi püramyeafiel. Huelu fei feipieneu: “¡Cuñiutucunge! ¡Femquelayaimi! Cüdaufe müten ta iñche, eimi ca tami pu peñi reque. Fei engün elfalcülei ñi huldungual Jesús meu. ¡Chau Ngünechen mai ta püramyefinge! Chau Ngünechen ñi feipicünuel elcünungei ñi rüf huldungungeal Jesús meu”.

11 Pefiñ ñi nülatripan ti huenu, fei huefpai quiñe lig cahuellu.* Ti püracahuellulelu Manelfalngelu ca Rüfngelu pingei. Nor dungu mu juzgachequei ca hueichaquei.* 12 Üicülechi cütral reque felei tañi nge, ca fentren corona niei tañi lonco meu. Huirintucuniei quiñe üi, inei no rume quimlafi, fei müten quimniefi. 13 Mollfüñtulei tañi tacun.* Femngechi üitungei: Chau Dios tañi Dungun. 14 Cafei inanieyu huenu mülechi pu soltau ligque cahuellu mu,* cüme lino tucutuucüleingün, ligngelu* ca lifcülelu. 15 Tañi hun meu tripai quiñe yungechi fütra cuchillo ñi hueichayafiel* tati pu troquiñche. Fei pañillhue retrü mu ngünenieafi engün. Cafei pünocayafi ti ofad cheu ñi cütrüngequen, fei tüfa adentulei ñi illcun* ta Chau Ngünechen, ti Com Nehuen Nielu. 16 Ñi tacun mu huirintucuniei quiñe üi, tañi chang püle. Feipilei: Lonco Ülmencülei pu lonco ülmen meu ca Ñidolcülei pu ñidol meu.

17 Cafei pefiñ quiñe cüme püllü, antü mu huitralerquei. Fei nehuentu dungun mu feipifi com tati pu üñüm* callfü huenu püle müpüyaulu: “¡Fau püle cüpamün! Trahuaimün tamün coneltual Chau Dios tañi fütra iyael mu. 18 Iñmayafimün ñi fün* pu lonco ülmen, pu loncolechi soltau ca pu ülmen che, cafei pu cahuellu ca tati pu püracahuellulelu. Com pu che ñi fün iñmayafimün, lifrelechi che ca pu esclavo, pu illamngelu ca pu falin chengelu”.

19 Ca pefiñ ti huapo huesa culliñ, mapu müleyechi pu lonco ülmen ca tañi pu soltau. Com trahulerquei engün ñi hueichayafiel* tati püracahuellulelu ca tañi pu soltau. 20 Fei nüngei ti huapo huesa culliñ, ca femngechi nüngei ti huentru Chau Ngünechen ñi huerquen femfaluuquelu. Fei tüfa femürquei afmatun dungu ti huapo huesa culliñ ñi adquiñ meu, femngechi ngünencafi com tati pu lloulu tati huapo huesa culliñ ñi marca ca tati pu püramyefilu ñi adentun. Petu ñi mongelen ti huapo huesa culliñ ca ti huentru huerquen femfaluulu, mür ütrüftucungeingu ti cütral lafquen mu üicülelu azufre meu. 21 Huelu ti pu lonco ülmen ca tañi pu soltau langümngei fütra cuchillo mu, feiti tripalu ti püracahuellulelu ñi hun meu. Fei pu üñüm iñmaeyu ñi fün engün,* feimu huedaingün.

20 Pen quiñe cüme püllü huenu mu nagpalu. Cüpalniei ti fütraconchi lolo ñi llafe* ca nüniei quiñe fütra cadena. 2 Nüfi ti llicafalchi fütra filu, fei tüfa ti cuifi tuhun-ngechi filu, Huecüfü ca Satanás pingelu. Traricünufi 1.000 tripantu. 3 Ütrüftucufi ca cerrantucufi fütraconchi lolo meu. Fei cüme cerracünui ti conhue, femngechi ñi ngünencahuenoafiel* ti troquiñche fentepuule hula ti 1.000 tripantu. Fei hula pichiñma mu neicümngetuai.

4 Pen ülmenque huancu. Fei tati anüpulu üye mu elungei autoridad ñi juzgacheal. Felei llemai, pefiñ ñi mollfüñ tati pu langümngelu. Fei engün langümngei* tañi huldunguel Jesús mu ca Chau Ngünechen mu. Tüfa engün püramyelafi tati huapo huesa culliñ ca tañi adentun, ca marcangelaingün tañi tol ca tañi cuhu no rume. Fei mongetuingün ca ngünenieingün 1.000 tripantu Cristo engün. 5 Tüfa tati hunen huiñomongetun. Caquelu la huiñomongetuingün deu rupalu hula ti 1.000 tripantu. 6 Ayühun niei ca lif chengei tati pu coneltulelu ti hunen huiñomongetun mu, tati epungechi lan pepi ngünenielaeyu engün. Doi mai sacerdotengeaingün ñi serfiafiel ta Chau Ngünechen ca tati Cristo, tüfa engün 1.000 tripantu ngünenieai Cristo engu.

7 Huelu rupale hula ti 1.000 tripantu, Satanás neicümngetuai cheu tañi presulen. 8 Fei tripayai ñi ngünencayafiel tati pu troquiñche meli huitran mapu mu mülelu,* tüfa ta Gog ca Magog. Femngechi trahulafi engün tañi hueichayal.* Rume fentren-ngeingün, lafquen mülechi cuyüm reque. 9 Tüfa engün com mapu püle puhuingün, fei hualloñmafingün cheu ñi mülen Chau Ngünechen ñi pu che* ca tati piuqueyengeelchi huaria. Huelu huenu mu nagpai cütral, fei apümcaeyu engün. 10 Tati Huecüfü, feiti ngünencafilu ti pu troquiñche, ütrüftucungei feichi lafquen mu nielu cütral ca azufre. Tüfa mu ütrüftucungerquei ti huapo huesa culliñ ca ti huentru Chau Ngünechen ñi huerquen femfaluuquelu. Fei engün antü ca pun meu cutrancangeaingün* rumel meu.

11 Fei pen quiñe fütra ülmen huancu ligngelu* ca pefiñ tati anülelu fei mu. Ti mapu ca ti huenu leftripaingün fei mu, fei pengehuetulai engu. 12 Fei pefiñ tati pu layelu, tati pu illamngelu ca ti pu falin-ngelu. Huitraleingün itrotripa ti ülmen huancu meu, fei nülangei chumpolque lifru.* Huelu ca quiñe chumpol lifru nülangei, mongen ñi lifru pingei. Fei ramtucadungungei pu layelu tañi femün meu, chumngechi huirintuculei tati chumpolque lifru mu. 13 Ti lafquen huiñoltufi tati pu layelu fei meu mülelu, ca femngechi femi tati lan dungu ca tati Rüngan.* Fei caque quiñeque che ramtucadungungei tañi femün meu. 14 Ti lan dungu ca ti Rüngan* ütrüftucungei cütral lafquen mu. Tüfachi cütral lafquen adentulei ti epungechi lan. 15 Cafei tati pu huirintucunienolu tañi üi ti mongen ñi lifru mu, ütrüftucungei cütral lafquen meu.

21 Feimu pen quiñe hue huenu ca quiñe hue mapu. Ti cuifi huenu ca ti cuifi mapu ñamturquei ca ti lafquen ngehuetulai. 2 Ca pefiñ ti yamfal huaria, ti Hue Jerusalén, huenu mu nagcülepai cheu ñi mülen Chau Ngünechen. Pepicaucülei quiñe novia reque, adelcaucülei* ñi llohuafiel tañi füta. 3 Fei hula allcün quiñe nehuentu dungun, ti ülmen huancu mu tripai. Feipi: “Chau Ngünechen ñi tolto ruca* mülei tati pu che meu, quisu mülenagcüleai fei engün meu, fei tañi troquiñchengeai engün. Chau Ngünechen llemai müleai tati pu che meu. 4 Fei Chau Ngünechen com liftuñmayafi tati pu che ñi cülleñu. Ngehuelayai lan, afai ta hueñancün, ngüman ca cutrantun. Ngehuetulai ti cuifi huesaque dungu”.

5 Tati anülelu ülmen huancu mu feipi: “Huecünumequetufiñ com dungu”. Ca feipi: “Tüfachi dungun manelfali ca rüfngei, feimu huirintucufinge”. 6 Ca feipieneu: “¡Deu femtripai tati! Iñche tati Alfa ca tati Omega,* tati ellaca mu mülelu ca ti af mu mülelu. Com pu huihulelu, eluafiñ* ñi pütocoal ti co hulquelu mongen hufco meu tripalu.* 7 Inei rume hueule, llohuai tüfachi dungu, quisu tañi Ngünechen ngean, fei iñche tañi yallngeai. 8 Huelu tati pu llicaquelu, tati pu feyentuquenolu, tati pu pod chengelu, tati pu ünufal chengelu, tati pu langümchefe, tati pu femquelu pod cudumuhun* ca calcu dungu, pu püramyequefilu coilaque dios ñi adentun ca com tati pu coilatufe, ütrüftucungeai tati lafquen cütral mu üicülelu azufre engu. Fei tüfa adentulei tati epungechi lan”.

9 Quiñe cüme püllü cüpai, tüfa ta quiñe tati regle cümeque püllü nielu tañi regle metahue, apolerquefui ti regle af huesaque dungu mu. Fei feipieneu: “Cüpange, pengelelayu tati novia, tati Cordero ñi domo”. 10 Feimu Chau Ngünechen ñi nehuen mu yeeneu quiñe alüpürachi fütra huincul mu, fei pengeleleneu ta Jerusalén, ti yamfal huaria. Huenu mu nagcüleparquei cheu ñi mülen Chau Ngünechen. 11 Huilüfcülei Chau Dios ñi afmatufalngen mu. Quiñe rume falichi cura reque, jaspe cura reque, llümllümcülei ca rumequintun-ngei. 12 Quiñe alüpürachi fütra cura malal nierquei, mari epu puerta nierquei. Cafei caque quiñeque tüfa mu mülei quiñe cüme püllü. Tati puerta mu huirintuculei ñi üi tati mari epu troquiñche Israel mu mülelu. 13 Tripahue antü püle mülei cüla puerta, picun püle* cüla puerta, huaihuen püle* cüla puerta, conhue antü püle cüla puerta mülei. 14 Mari epu cura mu anümtuculerquei tañi cura malal. Tüfachi cura mu huirintuculei ti mari epu üi ñi nieel tati Cordero ñi mari epu apostol.

15 Feiti ñi dungueteu ta iñche nüniei quiñe oro rüngi* ñi mediafiel ti huaria, ti puerta ca ti cura malal. 16 Cuadraucülei chi huaria, trürcülei tunte tañi alürupan ca tañi alütuhun. Fei ti rüngi mu medifi ti huaria: 2.200 kilometro ürque.* Trürcülei tañi alütuhun, tañi alürupan ca tañi alüpüran. 17 Cafei medifi tati cura malal: 64 metro ürque.* Ti cüme püllü mediquei chumngechi mediquei pu che. 18 Ti cura malal jaspe cura deumangei, cafei re oro mu deumangei ti huaria, rumequintun-ngei vidrio reque. 19 Cheu ñi anümngeel ti huaria ñi cura malal itrofill falinque cura mu adelcaucülei: hunelu mu mülerquei jaspe, epungelu zafiro, cülangelu calcedonia, melingelu esmeralda, 20 quechungelu sardónica, cayungelu sardio, reglengelu crisólito, purangelu berilo, aillangelu topacio, maringelu crisoprasa, mari quiñe jacinto, ca mari epu amatista. 21 Ti mari epu puerta, mari epu perla ürque. Caque quiñeque puerta quiñe perla mu deumangei. Ti doi falin rüpü ti huaria mu re orongei, rumequintun-ngei vidrio reque.

22 Tüfachi huaria mu ngelai ngillatuhue ruca. Chau Ngünechen Jehová,* tati Com Nehuen Nielu, fei tañi ngillatuhue ruca reque felei. Ca femngechi felei ti Cordero. 23 Ti huaria duamlai ñi pelontueteu ti antü ca ti cüyen. Chau Ngünechen ñi afmatufalngen pelontuqueyu, ca tati Cordero, ñi pelontuhue reque felei. 24 Tati pu troquiñche, ti huaria ñi pelon mu miyahuaingün. Mapu müleyechi lonco ülmen saquiafingün ti huaria. 25 Üye mu punmalayai, feimu com antü nülaleai tañi puerta. 26 Fei ti pu troquiñche saquiafingün ca yamnieafingün ti huaria.* 27 Turpu conpulayai ti huaria mu chem podngechi dungu no rume, inei no rume femquelu ünufal dungu ca ngünencachequelu. Conpuai feichi che müten huirintuculelu tañi üi ti mongen ñi lifru nielu tati Cordero.

22 Fei pengeleleneu quiñe leufü, nierquei co hulquelu mongen, rumequintun-ngei ti co.* Chau Ngünechen ca ti Cordero ñi ülmen huancu mu tripai ti leufü. 2 Fei hutrulerquei rangiñ ti falin rüpü huaria mu mülelu. Inaltu leufü mu epuñpüle mülerquei anümca hulquelu mongen. Caque quiñeque hulquei fün, mari epu rupa tripantu mu. Fill cüyen hulquei ñi fün. Ti tapül anümca elcünungei ñi tremoltuafiel* pu troquiñche.

3 Chau Ngünechen malisialayafi ti huaria. Doi mai Chau Ngünechen ca ti Cordero ñi ülmen huancu müleai ti huaria mu, fei tañi pu cüdahuelqueteu serfitunieaeyu engün. 4 Peñmayaeyu engün tañi ange, cafei tol meu huirintucunieaingün tañi üi. 5 Punmahuelayai, duamhuelayai ñi pelontuaeteu quiñe cüdetuhue* ca tati antü no rume. Chau Ngünechen Jehová mai ta* pelontuafi engün, fei ngünenieaingün rumel meu.

6 Tati cüme püllü feipieneu: “Tüfachi dungun rüfngei ca manelfali. Felei llemai, Chau Ngünechen Jehová,* feiti adniefilu tañi pu huerquen ñi dungual, huercüi tañi cüme püllü, fei pengelelfi tañi pu cüdahuelqueteu chem ñi rupayal pichiñma mu. 7 ¡Cüpalen tati! Pichiñma mu puhuan. Ayühun niei tati inaniefilu Chau Ngünechen ñi feipicünuel tüfachi lifru mu”.

8 Iñche ta Juan, iñche llemai allcün ca pen tüfachi dungu. Deu ñi peel ca ñi allcütuel chem ñi pengeleteu ti cüme püllü, pochongnagün* tañi namun püle, ayüfun ñi püramyeafiel. 9 Huelu fei feipieneu: “¡Cuñiutucunge! ¡Femquelayaimi! Iñche eimi tami chaf cüdaufe müten,* ca chaf cüdaufeyefiñ* tami pu peñi, Chau Ngünechen ñi pu huerquen ca tati pu inaniefilu ñi chem pin tüfachi lifru. Chau Ngünechen mai ta püramyefinge”.

10 Ca feipi: “Ellcacünulayafimi* chem ñi feipicünuel Chau Ngünechen tüfachi lifru mu. Püllelepai ti medin antü. 11 Tati nor chengenolu amulepe tañi femün norngenochi dungu, ti pod chengelu amulepe tañi femün pod dungu. Huelu ti nor che amulepe ñi femün nor dungu, ca tati lif chengelu amulepe ñi femün lif dungu.

12 ‘¡Allcütunge! Cüpalen tati, pichiñma mu puhuan. Fei chumngechi ñi femün caque quiñeque che, eluafiñ tañi cullitu. 13 Iñche tati Alfa ca tati Omega,* tati hunelelu ca tati inalelu, tati ellaca mu mülelu ca tati af mu mülelu. 14 Ayühun niei tati pu cüchaquelu tañi fütraque tacun. Fei engün iñmayafui ñi fün tati anümca hulquelu mongen ca conpuafui ti huaria ñi puerta püle. 15 Huecuntu mülei pu trehua,* pu femquelu calcu dungu, pod cudumuhun,* pu langümchefe, pu püramyequefilu coilaque dios ñi adentun, com pu rume ayüquelu ñi coilatual ca pu huimtulelu ñi ngünencacheal’.

16 ‘Iñche, Jesús, huercün tañi cüme püllü tamün huercülelafiel tüfachi dungu ñi cümelcaleal pu trahunche. Iñche ta David ñi folil ca tañi cüpanche, cafei iñche tati huilüf huangülen epe hun tripaquelu’”.

17 Chau Ngünechen ñi nehuen ca tati novia feipimequei: “¡Cüpange!”. Cafei com tati allcütulu feipipe: “¡Cüpange!”. Ca com tati huihulelu, cüpape. Com tati ayünielu, cullinon mu pütocope tati co hulquelu mongen.

18 “Iñche feipiafiñ com pu allcütulu Chau Dios ñi feipicünuel tüfachi lifru mu: inei rume doi amulcünule tüfachi dungu, Chau Ngünechen huercülelaeyu ti huesaque dungu huirintuculelu tüfachi lifru mu. 19 Inei rume catrünentuñmafile quiñe dungun Chau Dios ñi feipicünuel tüfachi lifru mu, Chau Dios elulayaeyu ñi iñmayafiel tañi fün ti anümca hulquelu mongen ca elungelayai ñi conpual Chau Dios ñi huaria mu. Femngechi huirintuculei tüfachi lifru mu.

20 Tati huldungulu tüfachi dungu feipi: ‘Mai, cüpalen tati. Pichiñma mu puhuan’”.

“¡Felepe mai! Cüpange Ñidol Jesús”.

21 Llellipulen Ñidol Jesús ñi rume cutranpiuqueyeafiel Chau Ngünechen tañi pu che.*