Tüfa ñi kimafel tati pu chaw cristiano ngelu:

Eymi chaw, eymi ñuke, küpa kellufimi tami pu sakin pichikeche ñi piwkeyerpuafiel ta Jewba, femngechi tañi wülal ñi mongen kidu mew, fey ñi poyeafiel. Eymi ¿chumafuymi ñi pepikawküleal tami pu pichikeche ñi fautizawal? ¿Rüf küme pepikawkülefuyngün tañi femal tüfachi doy falin dungu?

Jesus feypifi tañi pu inanieetew: “Amumün, kom chüf Mapu müleyechi pu che mew. Ka kimeltuafimün [...] iñche ñi discipulongeal engün. Fautizayafimün” (Mat. 28:19). Feymu llemay tati pu che fautizawalu müley ñi discipulongerpual engün. ¿Chumkey kiñe discipulo? Tüfa kimniey chem ñi kimeltuel Jesus ka feyentukefi, welu doyelchi may yeniey tañi mongen chumngechi ñi kimeltuel Jesus. Tati pu wechekeche kütu femafuyngün tüfachi dungu.

Tami femün mew inayentufalngeaymi, fey tami inayentuaetew tami pu pichikeche. Kafey küme kimeltulelafimi Jewba tañi küme dungu (Deut. 6:6-9). ¿Chumngechi femafuymi tüfa? Tami pichikeche eymu, trür ngüneduamafuymu chi lifru ¡Rumel Ayüucüleaimi!, femngechi kimeltuafimi tati wünenke duamfalchi kimeltun Biblia mew mülelu, ka pepikayeafimi tañi rakiduamal ka tañi inayal engün Biblia tañi ngülam. Kelluafimi tami pu pichikeche rüf piwke mew kimfalkünual tañi feyentukeel (1 Ped. 3:15). Fey kimeltulelafimi ka yafültukuafimi engün, tüfa kelluaeyew ñi fautizawürpual engün. ¿Ka chem kelluafeyew engün? Kidu papeltual Biblia, amual trawün mu, nieal kümeke weni, ka tamün kiñentrür poyeafiel ta Jewba. Kafey kelluafimi ñi rakiduamal chem chumal, fey ñi doy küme weniyeafiel ta Jewba.

Proverbios 20:11 feypi: “Tati weche kimngerpukey kidu ñi femkeelchi dungu mew, lifkülele kam norkülele tañi chumngen”. Tami pichikeche, ¿pengelpey may ñi inanierpufiel ta Jesus ka ñi pepikawkülen ñi fautizawal?

Pu pichikeche müley ñi allkütuafiel tañi pu chaw, femngechi pengelay ñi pepikawkülen ñi fautizawal (Hecho 5:29; Kol. 3:20). Biblia nütramkay ñi femün ta Jesus niefulu 12 tripantu, kidu eluwi ñi ngünenieaetew tañi pu chaw (Luka 2:51, TNM). ¿Tami pichikeche kay? Rakiduamlayaymi tami pichikeche ñi welulkawnoal. Welu rüf ayüle ñi fautizawal, eluway ñi inayafiel ta Jesus ñi femün, ka kimfalkünuay ñi eluwkülen ñi ngünenieaetew tañi pu chaw.

Kafey tami pichikeche müley tañi pengelal ñi küpa kimafiel tati rüf dungu mülelu Biblia mew (Luka 2:46). Feymu ramtuwnge: “¿Ayükepey may ñi trawüluwal ka koneltual trawün mu?” (Sal. 122:1). “¿Ayükepey may ñi papeltuafiel ka chillkatuafiel ti Biblia?” (Mat. 4:4).

Kafey ti pichikeche pepikawkülelu ñi fautizawal, eluwküley ñi doyümnieafiel kom tati dungu koneltulelu Ngünechen ñi Ngünenien mu (Mat. 6:33). Ka kimniey ñi amuldungulelafiel pu che, feymu fillke dungu femkey ñi kimeltuafiel tati pu che. Kafey colegio mu, yewekelay ñi feypiafiel tañi pu kimeltuchefe ka tañi pu compañ ñi Dungukelu Iney Ngen Jewba ngen. Kafey küme femkey tañi elfalngeelchi küdaw ti trawün mu Taiñ Mongen ka Taiñ Amuldungukeel pingelu.

Kafey kiñepülekünuwkey pu wedake compañ mew, femngechi tañi nieal lif mongen (Prov. 13:20; 1 Kor. 15:33). Feymu küme dulliay ti musica, pelicula, videojuego, chem peal television ka internet mew.

Fente ñi kellukeetew tañi pu chaw, fentren pichikeche piwkeyerpufingün ti rüfngechi dungu, feymu elungeyngün tañi fautizawal petu ñi wechengen mu. Feymew, eymün pu chaw, eluwkülemün tamün kelluafiel tamün pichikeche ñi weniyerpuafiel ta Jewba, fey tañi fautizawal. Femngechi femülmün, Jewba kümelkayaeymünmew llemay.

Tüfa ñi kimafel ti pu amuldungukelu petu fautizawnolu:

Petu tami fautizawnon, elungeymi kiñe falin küdaw tami amuldungual. Müna ayüwküleiñ tami küme amulen mu Jewba ñi dungu mew. Eymi küme papeltufimi tati Biblia, feymu kimürpufimi ta Chaw Ngünechen, ka maneluwürpuymi kidu mu (Juan 17:3; Eb. 11:6).

Petu tami chillkatunofiel ta Biblia pu Dungukelu Iney Ngen Jewba engu, eymi koneltukefuymi chi kiñe religion mu, kam koneltukelafuymi chi. Kafey, kiñepülekünufimi chi kakelu dungu, femngechi yenieal tami mongen chumngechi ñi feypilen ti Biblia. Fewla feyenturpuymi Jewba mu, feymu femwelaymi tami weda femkefelchi dungu. Kafey küme elkünuymi tami mongen, kiñepülekünufimi tati weda rüpü tami inaniekefel, fey fewla eluwimi tami femal Chaw Ngünechen ñi ayükeelchi dungu (Hecho 3:19).

Petu pichikalu eymi kimeltungeymi chi Chaw Dios tañi dungu, fey tüfachi dungu kellueymu tami kon-noal wedake dungu mew (2 Tim. 3:15). Kafey eymi eluwimi tami femal Jewba ñi ayükeel, ngüchaltukungelmi rume tami femal wedake dungu. Tami feyentukefiel mew ta Jewba, eymi kelluntukukeymi ñi poyengeal ta Jewba ka wüldungukeymi. Kafey pepikangeymi tami amuldungual. Feley, eymi tami pin mew eluwimi tami amuldungual petu tami fautizawnon, femngechi tami poyeafiel ta Jewba.

Petu pichikalu kam doy tremlu eymi chi, kimürpufimi ta Jewba. Fey tami doy weniyerpuafiel ta Jewba, rakiduam-mekeymi chi wülal tami mongen Jewba mu ka tami fautizawal. ¿Chumngechi wülafuymi tami mongen Jewba mu? Llellipuafimi, fey mew feypiafimi ta Jewba ‘iñche rumel poyeaeyu eymi müten’ (Mat. 16:24). Fey wüla, fautizangeaymi ko mew, femngechi pengelaymi wülün tami mongen ñi poyeafiel ta Jewba (Mat. 28:19, 20). Wülülmi tami mongen ka fautizawülmi, fey koneltuaymi Jewba tañi trokiñche mu. ¡Müna ayüwün-ngey tüfachi dungu!

Pichi inaduamaiñ Jesus tañi rupan. Pichin rupan müten tañi fautizawün mew, Chaw Ngünechen ñi newen mew Jesus puwi ti desierto mew tati Weküfü tañi kintukaduamaetew (Mat. 4:1). Chumngechi kimürpuymi tami chillkatufiel ti Biblia, eymi rupayaymi wedake dungu mu. Fey fautizawülmi, tüfa doyelkülerpuay (Juan 15:20). ¿Chem wedake dungu mu rupayafuymi? Tami pu che kayñetuafeymew (Mat. 10:36). Kafey tami pu compañ colegio mew, küdaw mu kam tami pu kuyfike weni yewelkayafeymew. Feymu longkontukufinge Jesus tañi feypiel Marku 10:29, 30 mu: “Rüf dungu ta feypian iney rume fey iñche tañi duam ka tati werkün montuluwün dungu ñi duam elkünule ta ruka, kam peñi, kam lamngen, kam chaw, kam ñuke, kam domo, kam fotüm, kam mapu, welu fewla ta tüfachi Mapu mew lloway doy pataka rupachi tañi niekefel ta ruka mew, peñi, lamngen, ñuke, fotüm ka mapu, tunte üyawtuniengeay rume. Fey tati we mületuachi Mapu mew lloway tati rumel mongen”. Feymew amulepe tami doy weniyefiel ta Jewba ka küme yenieaymi tami mongen chumngechi ñi ayünieel kidu.

Küpa fautizawülmi, feypiafimi tati peñi adkünukelu ti trokiñ longkolelu tami trawünche mew (coordinador del cuerpo de ancianos). Tati pu longkolelu trawüluway eymi engün, fey trür küme ngüneduamaymün tati ramtun, femngechi ñi kimal tami pepikawkülepen may tami fautizawal. Feymew kümeafuy tami wüne inaduamal tüfachi ramtun kidu tami chillkatun mu.

Petu pepikawülmi küme ngüneduamnge ti ramtun ka rakiduamnge tati pu versiculo mew wirikonkülelu. Ayülmi, wirintukuafuymi kiñeke dungu tami acordayal tüfachi lifru mu kam chuchi mu rume. Newe pepilnofilmi kiñe ramtun, ‘kelluen’ piafimi tati peñi kam lamngen tami kimeltuetew ti Biblia, kam tati pu longkolelu ramtuafuymi tami kimnon. Fey trawülmi tati pu longkolelu eymün, peafuymi tami wirintukuel ka nülanieafuymi tüfachi lifru.

Trawülmi pu longkolelu engün, rume alükilpe tami wiñoldungun. Welu may, adümfalngepe tami feypin ka rüf piwke mu tripape tami wiñoldungun. Ramtungelmi, kümeafuy tami feypial kiñe kam epu versiculo küpalu Biblia mew.

Petu newe küme pepilnolmi tati doy falinke kimeltun Biblia mew mülelu, tati pu longkolelu adkünuayngün tami kellungeal, ¿chumngelu (chemu)? Tami küme adümürpual tati doy duamfalngechi kimeltun Biblia mew, ka tami kimeltulelafiel tüfa ta kakelu che. Femngechi pepikawküleaymi tami fautizawal küpalechi antü mew.

[Ñi kimnieal tati pu longkolelu trawünche mu: Ti pagina 54 puwlu 59 feypi chumngechi müley ñi femngeal tati trawün pu küpa fautizawlu engün].