Tati Mapu wiño küme mülewe ngetuay

TI AFCHI lifru Biblia mu —Revelación kam Apokalipsi— elufi maneluwün kom pu che. Ti apostol Juan wirintukuy tüfachi lifru, ka niey fentren pelon dungu pengelpulerpuy tüfachi falin-ngechi dungu: chumngechi Jewba wechunenturpuy (tripanenturpuy) ñi duam mu.

Wünen perimontun mu, Jesu tati wiñomongetulu yafültukufi ka norümfi fentren trawünche. Kangelu, pengeli Ngünechen ñi mülemüm wenu mapu, ka pengeli chumngechi pu werken püllü sakiyefingün ta Jewba.

Fülkülepay Ngünechen ñi wechurpun (tripawentun) ñi ayükeelchi dungu, ti Korderu (Jesukristo) llowi kiñe lifru nielu regle sellu. Feymu nülangelu wünen meli lifru, pewfaluwingün meli kawellutulelu. Wünen Jesu ürke, üytungey Longko Ülmen ka kawellutuley kiñe lig kawellu. Ka tati küla kawellutulelu kakewme kolotun ngeyngün tañi pu kawellu, tüfa küpalingün ti weychan, ngüñün ka kutran wall mapu püle, tüfa pengeli pichin antü mu afay tüfachi wedake dungu Mapu mu. Nülangelu regle sellu allküngey regle dungun ti kullkull mu, pengeli chumngechi Ngünechen wültukuay fentren kuisio. Tüfa yeniey ka regle fütra wedake dungu, femngechi pengeli Ngünechen tañi fütra illkun (lladkün).

Fey wüla, Juan pey chumngechi choyüngey (llegi) kiñe we püñeñ, tüfa pengeli chumngechi küme elkünuy Ngünechen ñi Ngünenien wenu mapu mu. Müley kiñe fütra weychan, Satana ka tañi pu weküfü wemünentungey wenu mapu mu ka ütrüfnakümngepay Mapu mu. Feymew allküngey kiñe fütra dungun feypilu: “Awngeay tati müleyelu mapu mew”. ¿Chumngelu (chemu)? Tati weküfü kimnielu am pichin antü ñi niewen, feymew müna illkuley (Apokalipsi 12:12).

Juan pefi ta Jesu wenu mapu mu kiñe korderu reke, ka kompañnieeyew 144.000 dullinche (ngüminche) “fey Kristo longko ülmenküleay [ngünenieay, TNM] kisu engün mew”. Feymu chi lifru Apokalipsi kimeltueiñmew tati yomelche (küpalelu) mew ka tripayngün 144.000 che (Apokalipsi 14:1; 20:6).

Feymew tati pu wentru ngünenielu tüfachi Mapu, trawüluwayngün ta Armagedon mew, “ñi weychayafiel feychi antü tati itrokom pepiluwün niechi Ngünechen”, ka chaftufi engün ti lig kawellutulelu, Jesu ka tañi pu weychafe küpalu wenu mapu mew. Feymu ¿chumül afay tüfachi fütra weychan? Tati pu wentru ngünenielu apümngeayngün ka Satana rakümkünungeay. Jesu ka tati pu 144.000 che ngünenieayngün tüfachi Mapu kiñe warangka tripantu, ka afle feychi tripantu Satana ka apümkangeay (Apokalipsi 16:14; 20:4).

¿Chumay Kristo ngüneniele kiñe warangka tripantu tati pu feyentulechi (müngeltulechi) che? Juan wirintukuy: ‘[Jewba, TNM] angkümüñmatuaeyew ñi külleñu engün (angkümtoay nge külle ngewelayay), fey ngewelayay ta lan, ngüman no rume, eyütun no rume, kutrantun no rume. Itrokom tati mülekefulu am ta kuyfi dew ta mülewetunolu’ (Apokalipsi 21:4). Fey llemay ¡ti Mapu küme rumel mülewe ngetuay!

Femngechi, chi lifru Apokalipsi aflu ñi werkün dungu tuwlu Biblia mu: Mesia ñi Ngünenien mu, Jewba liftuay ñi üy, ka küme elkünuay kidu müten ngünenieay rumel mew.

(Tuwlu Apokalipsi ñi lifru.)