Quiñe cuifi adentun mülelu Egipto meu, pengeli ñi rüfngen Biblia ñi feipiel

Tüfachi adentun mülelu cura meu, 8 metro alüpürai, niei cuifique huirin dungu. Fülcülei quiñe cuifi ngillatuhue ruca ñi conhue meu cheu ñi püramyengequefel tati dios Amón, Karnak lof, Egipto mapu mu. Tati doi quimluchi che feipingün tüfa meu ñi huirintuculen tati hueichan ñi huehuel ti faraon Sisaq feipingelu, feichi mapu mülelu noreste püle Egipto mapu mu, cheu ñi mülequefel Judá ñi mapu, ca Israel ñi mapu.

Ti adentun pengeli tati dios Amón chalintucumequefi tati faraon Sisaq (Sesonq ca üitungelu) doi 150 trarilelu hueichafe hueucangelu.a Quiñequentu ti hueichafe adentulei ñi hueungeel quiñe huaria cam troquiñche. Tachi üi ñi niequefel tati huaria ca tati troquiñche pengelngei huenuntu ti hueichafe ñi lonco püle. Petu chillcatungeafui quiñeque huiringeelchi dungu. Pu chillcatuquelu Biblia quimingün quiñeque tüfachi mülehue: Bet-seán, Gabaón, Meguidó ca Sunem.

Egipto tañi hueichafiel ta Judá feipingei Biblia meu (1 Reyes 14:25, 26). Biblia feipi chumngechi Sisaq ñi hueichafiel ta Judá. Fei feipi: “Quechu tripantu tañi loncolen ti rey Rehoboam, Sisaq Egipto tañi rey, amui ñi hueichayafiel ta Jerusalén [...]. Yeniei 1.200 hueichan carreta, 60.000 hueichafe püracahuellulelu, ca raquifalngelafui tunten hueichafe ñi inanieteu cüpalelu Egipto mapu meu [...]. Fei hueulu ca nüfi tati fütraque huaria pepicalelu ñi incapehual ti hueichan mu, mülelu Judá meu. Fei hula ca conpui Jerusalén meu” (2 Crónicas 12:2-4).

Tüfachi adentun Karnak mapu mu mülelu, tüfa müten pengelquelai Sisaq ñi hueichafiel Israel ñi troquiñ mapu. Ca mülei cangelu huiquef cura huirintuculelu ti üi Sesonq, mülelu tati Meguidó huaria, ñi nütramcael tati Biblia.

Tüfachi nütram ñi huirilen tati Biblia meu, chumngechi Sisaq ñi hueufiel hueichan meu ta Judá, pengeli tañi rüfngen ca manelfalngen tati pu che huirintuculu Biblia. Manelfalngei ñi huirintucuel engün chumngechi tañi troquiñche ñi huehun ca tañi hueungen hueichan meu. Femngechi manelfalngechi che, nehue pengequelafui tati pu cuifique che huirintucufulu tañi rupan cuifi mu.